2 Thessalonians 2
แกแย จามู๊แหม่ เตเพร
1โป่แหว่ ครี๊พู๊ ซี๋, แว ซิหยื่อ แด๊โฉ่โล เป่ ซี เร๊อ ช๋า แบ่เจ่ เหย่ซู่ครี๊ แฮ เบ๊อะเนอ ปา อาหรี่อาแก เร๊อ เป เก่ กาโอ่ปล๊อ เต่อคยาลู เด๊อ อา โอ่ ปา อาหรี่อาแก เออเนอ แพ๊. a 2แกแย เตเพรเพร เก่ เฮ๊ ซี เร๊อ แบ่เจ่ อาม๊อเนอ แฮโต่ โทเฮ๊อ เฮ๊เนอหม่า เป กุยซิยอ ซี๋, คย๊ายื๊อ ยู งย๊า แลแค แต่เหม่ นี๋, ต๊อหร่อเซ๊ ซิอิเช แลแค แต่เหม่ นี๋. อา เก่ เฮ๊ เป่ เจ๊อ ซี เนอ, จอแปแหร่ นอเฮ๊โพร หนื่ออื่อ แว เก่หม่าโต่เรอ อู แด๊โฉ่ ซิเงโล เป่ แว ฮู๊เนอ อา เฮ๊จ๊อ เบ่เบ่, เก่หม่าโต่เรอ อา เก่ เฮ๊ แลแค เร๊อ ลี แฮโต่ เด๊อ เป โอ่ ต๊าบ่า, อา เก่ เฮ๊จ๊อ ฮู๊เนอ เบ่เบ่ หยื่อเอ่ แลแค แต่เหม่ นี๋. 3นออิลออี๊โหล่ แต่ ซีเหน่ แต่เหม่ นี๋. แบ่เจ่ เหย่ซู่ครี๊ แฮ แต่ล๋ายโต่ เนอ, แกแย เต๊เห่ เก่ เท๊ฉื่อ จอแปแหร่ ปา. เร๊อ แกแย เด๊อ อา เท๊ฉื่อแก จอแปแหร่ เร๊อ จอแปแหร่ อา เตซว๊าเตแส่ เนอเตเพร เก่ โอ่โลแถ่ ปา. เตเออเต๊เห่ เก่ ทวาแถ่เหร่อ โทปาเรอ แบ่เจ่ เหย่ซู่ครี๊ แฮ คยาแซ๊ ปา อาม๊อเนอ เออเนอ, อา เก่ แฮ ทวาแถ่ เนอ ปา. โทเรอ จอแปแหร่ เก่ เมปย๊าปลื๊อแก แกแยมู๊แหม่ เนอเตเพร เด๊อ ปอรากยากู ปา. 4ล๋อ เตเด๊อ อู เอ๊ เร๊อ จอแปแหร่, หม่าโต่เรอ, ล๋อ เตเด๊อ แกแย จ๊อเบแถ่ อา เต๊เห่เนอ, แกแย จามู๊แหม่ เออเตเพร เก่เท๊ เก่แตแอ ฉื่อแก ปา เร๊อ อา เก่ แด่แถ่โล อาเหน่ เร๊อ อาดุเล๊อ เจ๊อ เร๊อ ล๋อ เตเออเต๊เห่ ฮู๊เนอ เจ๊อ ปา. ฮู๊เนอ อาขว่าอาคยา, อา เก่ แฮโน โอ่แนโอ่ เด๊อ จอแปแหร่ เตหลู่แตโฮอากู ปา, เร๊อ อา เก่ แด๊กว๊าแล เกอ เร๊อ เจ๊อ อาเหน่ เร๊อ แว หม่า จอแปแหร่ เตเพร ฮู๊เนอ เจ๊อ ปา. b 5หม่า ซี โตม๊า ปาแหน่ โต่ แอ? เบ๊อะแว โอ่ เกอปา เร๊อ ซี เบ๊อะเนอ, แว แด๊โฉ่โด่แน โล ลอ โทเฮ๊อ ซี เฮ๊อ, แวเฮ๊โต่? 6กู๊แหน่เออ เตเด๊อ อา เมดู๊แด ตาตือ ปา แกแย จามู๊แหม่ เออเตเพร อาแกล๊เนอ อา โอ่ เร๊อ หม่าอิเต เนอหม่า ซี ซิเงดื่อเฮ๊อ. ฮู๊เนอเรอ ช๋า ม๊อเนอม๊อเซแฮโต่เฮ๊อ ปาเนอ หม่า แกแยจามู๊แหม่ เนอเตเพร เก่ โอ่โลแถ่ ปา. 7เตโอ่โอ๊โอ่บี๊ เด๊อ อา หม่าเฮ๊อ เตมู๊แหม่รีแจ่ เออเต๊เห่เนอ, อา เมเฮ๊อ เตเด๊อ เห่ขุเออ เฮ๊อ. หม่าแน๊เรอ แกแย เด๊อ อา เมดู๊แด ตาตือ เตมู๊แหม่รีแจ่ เออเตเพรเนอ, อา เก่ เมดู๊แด ตาตือ แฮเง โต่เด๊อ จอแปแหร่ พย๊าตาพาแก อา เออเนอ ปา. 8โทเรอ แกแย จามู๊แหม่ เออเตเพร เก่ โอ่โลแถ่ ปา หม่าแน๊เรอ เบ๊อะแบ่เจ่ เหย่ซู่ครี๊ แฮ ปา เบ๊อะเนอ, อา เก่ เมเซอแก ลู เร๊อ อา เตเซ๊เถ่ เด๊อ อาแกกู เออเนอ ปา, เร๊อ อา เก่ แฮ เมปย๊าแก ลู เร๊อ อา เตเตอเรอดุทู เออเนอ ปา. c 9แกแย จามู๊แหม่ เออเตเพรเนอ อา เก่ พย๊าหนิ โลเน๊มู๊แหม่รีแจ่ กู่กล๊อ อา เตโพรเตเตอเรอ เร๊อ อา เก่ เด๊อะโล แลโฮแลแห่ เป่ ลอ อู เร๊อ เตโค๊ตีกลี๊ ปว๋าเต๊อเจ่อ, เต เมม๊าเมแด ปว๊า เต๊อเจ่อ เร๊อ เตตาปา คย๊ายื๊อ เต๊เห่ ปว๋า เต๊อเจ่อ ปา. d 10แซ่ฮู๊ อา เก่ แลโฮแลแห่หนิ แกแย เด๊อ อา เตเร เซอ เด๊อ แหย่โย ตากยา เต๊เห่ อาเงเนอ, อา เก่ นอเอ่ เกอเร๊อ อา เตมู๊แหม่รีแจ่ เนอเต๊เห่ ปว๊า เต๊อเจ่อ ปา. เหย่ซี ซิครือซิลอ พย๊าฉื่อ เกออู เตหมะเตจ๊อ โต่ อาขว่าอาคยา, อา เก่ เซอ แลแค ปา. เหย่ซี เก่ พย๊าฉื่อ เฮ๊เรอ อา เก่ พย๊าหนิ แลแค เตแลเปล๊กา ปา. 11– 12ฮู๊เนอเรอ แซ่ฮู๊ เหย่ซี เก่ หยื่อเอ่ เกออู เตแลโฮแลแห่ เออ ปา, โท๊โต่ แซ่ฮู๊ จอแปแหร่ เก่ เมจากาคยา แก แกแย เด๊อ อา หยื่อเอ่ เกออู เตหมะเตจ๊อ โต่ เร๊อ อา จว๊า ซิครือซิลอ หยื่อเอ่ ดื่อเง เตมู๊แหม่รีแจ่ เนอเต๊เห่ อาเงเนอ, จอแปแหร่ ปลวาแฮ โค๊เล๊อ เป่แหน่ เฮ๊อ เหย่ซี เตแลโฮแจ่แหน่ อาฉว่าอาชอ เออเต๊อเจ่อ เฮ๊อ.เพร หยื่อเอ่แหน่ เตฮู๊ เต๊เห่ โตเบ่ ก๊อถ่อ โอ่กลอช๊อหม่า แฮเง ตื๊อดื่อ เด๊อ อา เตหยื่อเตแหน่ อากู
13โป่แหว่ ซี๋, ซี หม่า แกแย เด๊อ แบ่เจ่ โมหนิเร๊อ ซีเต๊เห่ เร๊อ เป เบ่ เฮ๊บุ๊ยเฮ๊เตอเรอ จอแปแหร่ เด๊อ ซีเง ปว๋า โตโพ๊ เจ๊อ, เมเตเฮ๊เรอ แซ่ฮู๊ ซี เก่ พย๊าหนิ เกอ เตเมแลเปล๊กา อาเงเนอ, จอแปแหร่ นว๊าแถ่ หนื่ออื่อ โทเฮ๊อ ซี เด๊อ กูลู่เค ปาเนอ เจ๊อ เฮ๊อ. เด๊อ แหย่โยบูโพ๊ แบ่เจ่ เมบูโพ๊ เฮ๊อ ซี เร๊อ ซี หยื่อเอ่ เตหมะเตจ๊อ อาขว่าอาคยา, จอแปแหร่ เมแลเปล๊กา ซี เฮ๊อ. 14เด๊อ เป แด๊โฉ่ เป่ ซี เตซิครือมีลา เออ ขว่าคยาเร๊อ, จอแปแหร่ เอ๊ เฮ๊อ ซี ฮู๊เนอ เฮ๊อ. เมเตเฮ๊เรอ แซ่ฮู๊ ซี เก่ พย๊าหนิ เกอ แบ่เจ่ เหย่ซู่ครี๊ อา เตเตอเรอดุเตอเรอทู เร๊อ อา เอ๊ เฮ๊อ ซี เฮ๊อ. 15ฮู๊เนอเรอ โป่แหว่ ซี๋, เป อิซว๊าอี๊แส่ แด๊โฉ่โด่แน โทเป่เฮ๊อ ซี เร๊อ เป กู๊อู่กู๊เผ่ เนอเต๊เห่ เบ่เบ่, หม่าโต่เรอ เป อิซว๊าอี๊แส่ โทเป่เฮ๊อ ซี เร๊อ ลี เด๊อ เป รา จว๊า เป่ ซี เออเต๊เห่ อากูเนอ เบ่เบ่, โอ่หม่าโอ่กลอ เกอ แลแค อู เร๊อ ปื่อหม่า หนิ แร๊ เกอ แลแค อู นี๋. 16– 17เปเพ จอแปแหร่ อาบุ๊ยอาเตอเรอ ขว่าคยาเร๊อ, อา เด๊อะตา เฮ๊อ เป อา เตเด๊อะอ๊าเด๊อะเหร่ ตูจูเพร เร๊อ เตแม๊ชือ เด๊อ อาตาอาเต เออเต๊เห่เนอ เฮ๊อ. เป แบ่เจ่ เหย่ซู่ครี๊ เร๊อ เปเพ จอแปแหร่ เด๊อ อา โมหนิเร๊อ เป เออเตเพร เก่ เด๊อะอ๊าเด๊อะเหร่ ดื่อ ซี นี๋. โท๊โต่ แซ่ฮู๊ ล๋อ ซี เตเอ่เตแร เนอเต๊เห่ เร๊อ ล๋อ ซี เตเฮ๊เบ่เฮ๊โช เต๊เห่ เก่ แร๊ อาเงเนอ, อา เก่ เด๊อะฉว่าเด๊อะชอแถ่ ดื่อ ซี ซิปล่อ นี๋.
Copyright information for
EkySCThai