2 Thessalonians 3
กุยจ๊อเบ เป่เด๊อะ เปเง
1เป โป่แหว่ ซี๋, เป ซิหยื่อ เฮ๊โฉ่แก ซี เด๊อ คยา ตื๊อดื่อ เนอ, แซ่ฮู๊ แบ่เจ่ อา เตซิครือมีลา เก่ โลปีชีจว๊า แพรแพร อาเงเนอ, กุยจ๊อเบ เป่ เกอ เด๊อ เปเง นี๋. โท๊โต่ ฮู๊ ซี พย๊าฉื่อ โทเฮ๊อ เตซิครือมีลา เออเนอ เร๊อ เด๊อ เตแด่หยื่อแด่แหน่ อากูเนอ, แซ่ฮู๊ อู เก่ พย๊าฉื่อ แซ่เกอดื่อ ฮู๊ ซี พย๊าฉื่อ เออเนอเนอ, กุยจ๊อเบ เป่ เกอ โป่ แลแค เด๊อ เปเง นี๋. 2กุยจ๊อเบ เป่เกอ โป่ เป เร๊อ แบ่เจ่ เก่ เมแลเปล๊ เป เร๊อ เด๊อ แกแยมู๊แหม่ เนอเต๊เห่ เร๊อ แกแยจา เนอเต๊เห่ อา กู๊ยากู นี๋. เมเตเฮ๊เรอ จอแปแหร่ อา เตซิครือมีลา เออเนอ, อู หยื่อเอ่ ลอ ปว๋า เตเพร หม่าโต่. 3หม่าแน๊เรอ แบ่เจ่ เออเนอ อาจ๊อ เร๊อ อาโหง่ เร๊อ อา เก่ เด๊อะฉว่าแถ่ ซี ซิปล่อ อาอ๊าอาเหร่ ปา, เร๊อ อา เก่ ตอกอเตเก ตาตือ เปเร๊อ ซี เร๊อ แกแยมู๊แหม่ เนอเตเพร ปา. 4เด๊อ เป หยื่อเอ่หนิ แบ่เจ่ อาขว่าอาคยาเรอ, เป ซิเง เร๊อ ซี เกล๋ ครวาเม แฮเง ตื๊อดื่อ โป่ แหน่ ฮู๊ เป เฮ๊แก ซี เออเนอ เฮ๊อ. 5แบ่เจ่ เก่ ซูจว๊า ดื่อ ซี เด๊อ จอแปแหร่ เตโม อากู เร๊อ ครี๊ อา เตแด่ทูซิปล่อ อากู เออเนอ ปา นี๋.เตแร แลเบ่ เด๊อ เบ่เม เตเอ่เตแร อาเง
6โป่แหว่ ครี๊พู๊ ซี๋, เด๊อ แบ่เจ่ เหย่ซู่ครี๊ อามุย อากู, เป เฮ๊แก ซี โหง่ เนอ, ล๋อ โป่แหว่ เด๊อ อา เตเกลแลแบ๊ เร๊อ อา ครวาเม เกออู ฮู๊ เป เหล่โกลเม เด๊อ เป เด๊อะแก ซี เออเนอ โต่ เต๊เห่เนอ จว๊า แบ๊ซว๊า แต่ เร๊อ เหย่ซี แต่เหม่ นี๋. 7ซี แหน่แบ่เจ่ เร๊อดื่อ ซี โต ครวาแม๊บือ เมเกอ เป ฮู๊เตเนอ ซี ซิเง ตาเต โทดื่อเฮ๊อ. เมเตเฮ๊เรอ เบ๊อะเป โอ่เต่อเกอ เร๊อ ซี เบ๊อะเนอ, เป เตเกลแลแบ๊ เร๊อ โต่. 8อู ลอแก เป่น๊อ เร๊อ เป เหล่เอ่เหล่โอ อาเง โต่. หม่าแน๊เรอ, แซ่ฮู๊ อา เก่ ทวาแถ่ แต่ ดู๊ดี๊ดู๊แด เด๊อ ซีเง เตเพร่ว แต่เหม่ เนอ, เป แอ๊จื๊อเอ่ แอ๊จื๊อแร โกโน๋ โต่. 9เป เก่ กุยเมจว่า ซี เร๊อ เป เหล่เอ่เหล่โอ เร๊อ เหล่โอ่เหล่แบ่ เฮ๊เนอหม่า อา โตแพ๊ หม่าแน๊เรอ แซ่ฮู๊ เป เก่ ทวาแถ่ ซี เหล่แม๊บือ เร๊อ ซี เก่ ครวาเมเกอ ฮู๊ เป เมเออ อาเงเนอ, เป เบ่ เอ่ครือแรครือ เกอเร๊อ แหน่เจ๊อ. 10เบ๊อะเป โอ่เกอปา เร๊อ ซี เบ๊อะเนอ, เป อิซว๊าแก ซี เน๊อ, “แกแย เด๊อ อา เตเกล ดื่อเง เตเพรเนอ, อู โตเบ่ เด๊อะเอ่หนิ ลู เตอเจ๋อ โต่” 11เป จว๊าเฮ๊โต่ ฮู๊เออ เมเตเฮ๊เนอหม่า, เป หนิโฮ เร๊อ เด๊อ ซีเกลเนอ แกแย เตเกล เร๊อ อาเอ่อาแร เกออู เตอเจ๋อ โต่ เนอ อาโอ่ เต๊เห่. เร๊อ อา จว๊าโน เมซู๊ซ๊า เกอลอ อูโร อา เตหรี่เตแก เนอ อาโอ่ เต๊เห่, เป หนิโฮ ฮู๊เนอ. 12เด๊อ แบ่เจ่ เหย่ซู่ครี๊ อากู, เป เฮ๊แก เปโหง่ เออเนอ เร๊อ แกแย เตเกลแลแบ๊ เออเต๊เห่ อาเง. แซ่ฮู๊ เหย่ซี เก่ โอ่เซอเพร ตาโตตาเบ่ เกออู, โท๊โต่ อา เก่เอ่เก่แร เกอ แลแค อู เร๊อ อา เก่ เด๊อะเอ่แลหนิ เร๊อเกอ แลแค ดื่อ อา ซิปล่อเซอเพร อาเงเนอ, เป เฮ๊ฉว่าเฮ๊ชอแก แหน่ เฮ๊อ เหย่ซี เฮ๊อ. 13หม่าแน๊เรอ, โป่แหว่ ครี๊พู๊ ซี๋, เบ๊อะซี เม เตแร๊ เบ๊อะเนอ, ซิปล่อปย๊า แต่ แลแค แต่เหม่ นี๋. ตูรู๊ เม แฮเง ตื๊อดื่อลา แลแค ฮู๊เนอ นี๋. 14แกแย เตเพรเพร เก่ จูเอ่ เกออู ลี เด๊อ เป ซูเป่ ซี เออต๊าบ่า อา เตอิซว๊าอี๊แส่ โต่ เฮ๊เนอหม่า, แม๊โตม๊าแก อา นี๋. แซ่ฮู๊ อา เก่ ซิเตเร แล เกอเร๊อดื่อ อาเหน่ ปาเนอ เนอ, แบ๊ซว๊า แต่ แลแค อา แต่เหม่ นี๋. 15หม่าแน๊เรอ ซิเถ่ซิฮา แต่ อา แต่เหม่ นี๋, หม่าแน๊เรอ เด๊อะรอเด๊อะเร อา ฮู๊ เน เด๊อะรอเด๊อะเร เน โป่แหว่ ครี๊พู๊ เตเพรเนอ แพ๊ นี๋.เตเฮ๊เบ่ เด๊อคยาเล๊อ
16เตตู๊จุเตอเจ๊อ อา แบ่เจ่ เก่ เด๊อะตา ดื่อ ซี เตตู๊จุเตอเจ๊อ ปว๋า โตโพ๊ เด๊อ แกล๊ ปว๋า โตโบ อากู นี๋. แบ่เจ่ เก่ โอ่เกอ ดื่อ เร๊อ ซี ปว๋า เตเพร นี๋. 17แว หม่า คูเปาโล เร๊อ แว รา เตเฮ๊โมเฮ๊แร๊ เออเนอ เร๊อ แว กู๊ขุ เร๊อดื่อ. ลี ปว๋า ต๊าบ่า เด๊อ แว รา โทเฮ๊อ เร๊อ เด๊อ อาตื๊อดื่อ เนอ, แว รา เมม๊าเมแดแก โค๊ดื่อ ฮู๊เนอ. แว รา เมม๊าเมแดแก ฮู๊เนอ ปว๋า โตโพ๊ เจ๊อ. 18เป แบ่เจ่ เหย่ซู่ครี๊ อาบุ๊ยอาเตอเรอ เก่ โอ่ เกอดื่อ เร๊อ ซี ปว๋า เตเพร นี๋.
Copyright information for
EkySCThai