2Ti 1 | EkySCThai | STEP | แว หม่า คูเปาโล. แว ราจว๊า หนิเป่ ซี ลีเออต๊าบ่า. จอแปแหร่ ซิปล่อโอ่ แว เด๊อ แว เก่ ทวาแถ่ เหย่ซู่ครี๊ อา เพรโด่แนพู๊ เตเพร, โทเรอ จอแปแหร่ อ๊อแล โทเฮ๊อ เน๊อ อา เก่ เด๊อะ เป ซิปล่อเซอเพร เด๊อ เหย่ซู่ครี๊ อากู ปา อาหรี่อาแก เออเนอ, แว แด๊โฉ่ ลอเป่เฮ๊อ อู ปว๋า เตเพร เฮ๊อ.

2 Timothy 1

1 แว หม่า คูเปาโล. แว ราจว๊า หนิเป่ ซี ลีเออต๊าบ่า. จอแปแหร่ ซิปล่อโอ่ แว เด๊อ แว เก่ ทวาแถ่ เหย่ซู่ครี๊ อา เพรโด่แนพู๊ เตเพร, โทเรอ จอแปแหร่ อ๊อแล โทเฮ๊อ เน๊อ อา เก่ เด๊อะ เป ซิปล่อเซอเพร เด๊อ เหย่ซู่ครี๊ อากู ปา อาหรี่อาแก เออเนอ, แว แด๊โฉ่ ลอเป่เฮ๊อ อู ปว๋า เตเพร เฮ๊อ.

2 แว ราจว๊า เป่ แวพู๊คู คูทิโมธี เด๊อ แหย่โย ตากยา, เด๊อ แว โม เกอเร๊อ อา เออเตเพร อา โอ่. เพ จอแปแหร่ เน๊อ เป แบ่เจ่ เหย่ซู่ครี๊ เก่ เด๊อะแลดื่อ เน เตบุ๊ยเตเตอเรอ, เตซิยอกล่าเบ่, เน๊อ เตตู๊จุเตอเจ๊อ นี๋. ^a

เตเฮ๊บุ๊ยเฮ๊เตอเรอ เน๊อ เตเด๊อะอ๊าเด๊อะเหร่

3 แว เฮ๊บุ๊ยเฮ๊เตอเรอ จอแปแหร่ เด๊อเนเง. อา หม่า จอแปแหร่ เตเพร เด๊อ แว เม อาเต เน๊อ แว ซิปล่อ อา เหล่เตเน อาโพ๊อาแปละ ฮู๊ แว โหมะเพเพอโพ เด๊อ เด๋อ งย๊า เต๊เห่ เมโทเฮ๊อ เนอเฮ๊อ. เบ๊อะแว ซิเหน่แถ่เบ่ เน ปว๋า โตโพ๊ เบ๊อะเนอ, แว เฮ๊บุ๊ยเฮ๊เตอเรอ จอแปแหร่ เร๊อ แว กุยจ๊อเบ เด๊อ เนเง เหมาะคี๊คี๊ เหมาะเชเกลเกล เจ๊อ. 4 เบ๊อะแว ซิเงแถ่เบ่ เน เป๊เส่เทอแล เบ๊อะเนอ, แว ซิหยื่อ แม๊เถอะ แหน่เจ๊อ เน, เมเตเฮ๊เรอ แซ่ฮู๊ แว เก่ ซิครือ เล๊อเล๊อบาบา อาเงเนอเรอ, แว ซิหยื่อ แม๊เถอะ เน แพ๊. 5 แว ซิเหน่แถ่เบ่ เน เตหยื่อเตแหน่ เด๊อ อา ตาเต โทเร๊อ เด๊อ อา หม่า เต๊อเจ๋อ โต ลู เน๊อ เนเพอ โหล่เอ่ เน๊อ เนโหมะ อู๊นี๋เก่ หยื่อเอ่ โทเฮ๊อ เนอเต๊เห่. แว หยื่อเอ่ ชาเผร่แหน่เจ เจ๊อ เน๊อ เหย่ซี เตหยื่อ เออเนอ อา โอ่เกอดื่อ เด๊อ เนกู แพ๊. ^b 6 เด๊อ เน หยื่อเอ่แหน่ ตาเตแร๊ อาขว่าอาคยา, แว เด๊อะ ซิเหน่แถ่ เน เน๊อ เน เก่ นอเอ่ แฮเงลา เน เชหยู่ เออเนอ. เบ๊อะแว แด่แถ่ แว กู๊ขุ เด๊อ เนลู เบ๊อะเนอ, จอแปแหร่ เด๊อะโทเฮ๊อ เน เชหยู่ เฮ๊อ. 7 เมเตเฮ๊เรอ, แหย่โยบูโพ๊ แบ่เจ่ เด๊อ จอแปแหร่ เด๊อะแล โทเฮ๊อ เป เออเนอ, อา นอทวาแถ่ ปา เป เน๊อ แกแย เด๊อ อา ซิอิเช เต เต๊เห่เนอ หม่าปาโต่เฮ๊อ. โท๊โต่ แหย่โยบูโพ๊ แบ่เจ่ เมบาโน เป่เฮ๊อ เป ซิปล่อ เน๊อ เตเตอเรอฉว่าชอ เน๊อ เตโม เน๊อ เตเป๊อแล แจ่ เกอเร๊อดื่อ เปเหน่ เออเนอเฮ๊อ.

8 ฮู๊เนอเร๊อ, เน เตเร ข่าเฮ๊โล เนเหน่ เด๊อ เป แบ่เจ่ อาเงเนอ ซิเตเร แต่เหม่, เด๊อ แบ่เจ่ อาขว่าอาคยาเร๊อ, อู ด๊อตา แว เด๊อ ทอกู เออเนอ เบ่เบ่, ซิเตเร แต่เหม่เหม่. โท๊โต่ ข่าโหร่เกอ เตโซพ๊าโซแร เน๊อ แว เด๊อ เตซิครือมีลา อาเง ฮู๊ จอแปแหร่ เด๊อะ เน เตอ๊าเหร่เตเหร่เนอ. 9 แซ่ฮู๊ เป เก่ ทวาแถ่ จอแปแหร่ อา เพรบูโพ๊พู๊ เร๊อดื่อ เต๊เห่ อาเงเนอเรอ, อา เมแลเปล๊กา เฮ๊อ เป เฮ๊อ, เร๊อ อา เอ๊ เฮ๊อ เป เฮ๊อ, เด๊อ เป เมโทเฮ๊อ เตเอ่เตแร เนอเต๊เห่ อาขว่าอาคยาเร๊อ, อา เอ๊ เป เนอ หม่าโต่. เออ หม่า หม่าดื่อ อา เตเตเนหนื่ออื่อ เน๊อ อาบุ๊ยเตอเรอ เร๊อดื่อ แพ๊. เบ๊อะอา แบ๊แล แต่ล๋าย เห่ขุ โต่เนอ, อา เด๊อะแล เป เตบุ๊ยเตเตอเรอ เออเนอ เด๊อ เหย่ซู่ครี๊ อากู เออเนอเฮ๊อ. 10 หม่าแน๊เรอ กู๊แหน่เออ เป แบ่เจ่ เหย่ซู่ครี๊ เด๊อ อา เมแลเปล๊กา เป เออเตเพร แฮเฮ๊อ อาขว่าอาคยา, อา เด๊อะโล เป่เฮ๊อ เป เตบุ๊ยเตเตอเรอ เออเนอเฮ๊อ. อา เมปย๊าแกเฮ๊อ เตเซอ อา เตอเรอฉว่าชอ เด๊อ อา เป่เอ่เป่โอ เป เออเต๊เห่ เฮ๊อ. โทเรอ เด๊อ เตซิครือมีลา อาขว่าอาคยา, อา เด๊อะโล โทเฮ๊อ ซิปล่อเซอเพร เด๊อ อา เซอ แจโต่ เออเนอเฮ๊อ. 11 จอแปแหร่ นว๊าแถ่เฮ๊อ แว ฮู๊ เพรแด๊โฉ่โด่แน เป่ อู เต เตเพร เนอเฮ๊อ, โทเรอ อา นว๊าแถ่เฮ๊อ แว ฮู๊ เพรโด่แนพู๊ เต๊เห่ เตเพร เน๊อ ซ๊าร๊า เด๊อ อา อิซว๊า เตซิครือมีลา เตเพร เนอเฮ๊อ. ^c 12 เมฮู๊เนอเรอ เด๊อ เตเออเต๊เห่ อาขว่าอาคยา, แว ข่าเบ่เฮ๊อ เตเออ เต๊เห่ เฮ๊อ. หม่าแน๊เรอ แว ซิเตเร โต่, เมเตเฮ๊เรอ, แว ซิเงเฮ๊อ เพร เด๊อ แว หยื่อเอ่ อา เออเตเพร เฮ๊อ. โทเรอ แว หยื่อเอ่เฮ๊อ เน๊อ เต เด๊อ อา เด๊อะแล เด๊อ แว กู๊ยากู เออเต๊เห่เนอ, อา เก่ โอ่ป่อหม่า หนิโต่เร๊อดื่อ เด๊อ ม๊อเนอ ตื๊อดื่อปา เนอเตอเนอ ปา.

13 ฮู๊ เน อิซว๊า หนิโทเฮ๊อ เด๊อ แวโอ่ เต๊เห่เนอ, ปื่อหม่า เร๊อ ครวาแม๊บือ เม เกอดื่อ นี๋. เร๊อ เน โตเบ่ หยื่อเอ่ แฮเงหนิ ครี๊ เร๊อ เน โตเบ่ โมหนิเร๊อ แกแย เด๊อ อาโร เต๊เห่. เน เน๊อ เหย่ซู่ครี๊ ทวาแถ่ เฮ๊อ ลู เต๊อเจ๋อ โต อาขว่าอาคยา เน เมเบ๊เต แพ๊. 14 โอ่ป่อหม่าหนิ เต อาแร๊ เด๊อ จอแปแหร่ เด๊อะแล โทเฮ๊อ เน เออเต๊อเจ่อเนอ นี๋. แหย่โยบูโพ๊ แบ่เจ่ เด๊อ อา โอ่เซอเพร เด๊อ เนกู เนอเตเพร อา เตอเรอฉว่าชอ ขว่าคยาเร๊อ ปื่อหม่า เร๊อดื่อ เตแร๊ เออเต๊อเจ่อ นี๋.

15 เน ซิเง เร๊อ ล๋อ แกแย โอ่ เด๊อ เอเซียเก่กู เต๊เห่เนอ เหย่ซี ตีรี๊ จว๊าโค๊แก ลอปลีเฮ๊อ แว เหล่ เฮ๊อ เร๊อ เด๊อ เหย่ซี เนอเต๊เห่ อาเกลเนอหม่า, คูฟีเจลัส เน๊อ คูเฮอร์โมเกเนส โอ่เต่อเกอดื่อ เบ๊อะเนอ.

16 แบ่เจ่ จอแปแหร่ เก่ ซิยอ เร๊อดื่อ คูอ๊อนี๋ส่าพรู๊ เน๊อ อา หี่ด๊อหี่แพพู๊ เน๊อ แกแย อาโร เด๊อ อา โอ่เกอ เน๊อ อา ล๋อ ปลี เนอเต๊เห่ นี๋. เมเตเฮ๊เรอ, คูโอเนสิโฟรัส หม่า อา เมโม ครือลา เฮ๊อ แว ซิปล่อ เฮ๊อ, โทเรอ อู ด๊อโน เจ๊อ แว เด๊อ ทอกู หม่าแน๊เรอ เด๊อ แวขว่าแวคยา เร๊อ อา ซิเตเร โต่. 17 เบ๊อะอา แฮโต่ เด๊อ วีโรม อากู เบ๊อะเนอ, ทู๋ อา แม๊เถอะ แว อา เตเน เร๊อ อา จ่าเพรอ แม๊ปู ตื๊อดื่อ เจ๊อ แว เจ๊อ. 18 แบ่เจ่ แฮ อาม๊อเนอ เตอเนอ ปาเนอ แบ่เจ่ เก่ เด๊อะ แม๊เถอะ ดื่อ ลู เน๊อ อา เตซิยอ ปานี๋. อา เมจว่า แว เด๊อ วีเอเฟซัส อากู บ๋า เต เนอ, เน ซิเง ตาเต ดื่อเฮ๊อ.