2Ti 3 | EkySCThai | STEP | หม่าแน๊เรอ ช๋า ม๊อเนอ เด๊อคยา ตื๊อดื่อปา เต๊เห่เนอ, ซี โตเบ่ ซิเง เน๊อ เตอาเค๊อาขิ อาแป่อาเช เก่ โอ่แถ่ ปา.

2 Timothy 3

เตมู๊แหม่รีแจ่ ช๊า ม๊อเนอ เด๊อคยา ตื๊อดื่อปา เต๊เห่

1 หม่าแน๊เรอ ช๋า ม๊อเนอ เด๊อคยา ตื๊อดื่อปา เต๊เห่เนอ, ซี โตเบ่ ซิเง เน๊อ เตอาเค๊อาขิ อาแป่อาเช เก่ โอ่แถ่ ปา. 2 เบ๊อะเนอ อาเคปาเนอ, แกแย เต๊เห่เห่ เนอ, อา เก่ โมแล เกอเร๊อดื่อ อาเหน่, อา เก่ โมหนิเร๊อ รือ, อา แด่ดุ อาเหน่, อา เก่ แด่แถ่โล อาซิปล่อ ปา. เหย่ซี หม่า แกแย เด๊อ อา เป๊อเจ่ออิแช๊ เต, จูลาพย๊าหนิ โหมะโหง่เพโหง่ โต่, ซิเง อูบุ๊ยอูเตอเรอ โต่, ซิเง เตบูโพ๊ โต่. 3 เหย่ซี หม่า แกแย เด๊อ อา โมหนิเร๊อ เกออู โต่, อา ปลวาแก เกออู เตซื๊อ โต่, เฮ๊ปย๊า อูมีลา, เป๊อแจ่ เกอเร๊อดื่อ อาเหน่โต่, แกแยฮาแกแยเฮ, เหย่ซี หม่า แกแย เด๊อ อา ซิเถ่ เตแร๊ เต๊เห่ ปา. 4 เหย่ซี เก่ หม่า แกแย เด๊อ อา อิแช๊เอ่ อูมุย, อา อิแช๊เอ่ อูเหน่ เร๊อ เมบูเมบย่า อาเหน่, จ่า แถ่ม๊อแถ่โผ่ อาเหน่, ซิหยื่อ เมโม ตาปา โชชื่อ เจ๊อ อาเหน่ เออเนอ อาดุเล๊อ เจ๊อเน๊อ เตโมหนิ จอแปแหร่ ปา. 5 เหย่ซี จ่า ครวาเมเกอบย่า แพ๊ เป เตจ๊อบู่จ๊อเบ อาเหล่โกล เหล่แบ่ ปา. หม่าแน๊เรอ เหย่ซี เก่ โชโม๊บิแก เตจ๊อบู่จ๊อเบ อา เตอเรอฉว่าชอ เด๊อ อา หม่าแหน่ เออเนอเต๊เห่ ปา. จว๊า ตาพาแก เน๊อ แกแย ฮู๊เนอเต๊เห่ อาเหล่นี๋.

6 เหย่ซี เต๊เห่เห่เนอ, อา จว๊า โนค๊าโนโข่ เด๊อ อู หี่ด๊อหี่แพกู เร๊อ เหย่ซี เป๊อตี๊หรี่ ปื่อหม่าหนิ เพรเหมาะ เด๊อ อา จูเอ่ยูงย๊า เนอเต๊เห่. เพรเหมาะ เออเต๊เห่ เนอหม่า เพรเหมาะ เด๊อ อา โอ่ เน๊อ อา เตซื๊อเตโอ่หร่า อา เตวี๊เตแย๊ เร๊อ อา ครวาเกอ เตซิหยื่อซิลอ อาเมวเมว อาเจ่อเจ่อ อาคยา เนอเต๊เห่ แพ๊. 7 เพรเหมาะ เนอเต๊เห่ หม่า อา อิซว๊า โตโมโตโม เกอ โทเฮ๊อ เต หม่าแน๊เรอ อา ซิเง เบ๊แถ่ เป่ เกออู จอแปแหร่ อา เตหมะเตจ๊อ โตโพ๋ โต่ เนอเต๊เห่ เฮ๊อ. 8 อา เม แซ่ฮู๊ คูยันเนส เร๊อ คูยัมเบรส์ เม โตโมเต๊เก่ฉื่อ คูโมเสส เนอ เฮ๊อ. ^a แกแย เนอเต๊เห่หม่า อา เท๊ฉื่อ เตหมะเตจ๊อ. เหย่ซีหม่า แกแย เด๊อ อา เตเน มู๊แหม่รีแจ่ เต เต๊เห่, เร๊อ อา เตหยื่อเตแหน่ ปย๊าแก ดื่อเง เนอเต๊เห่ แพ๊. 9 หม่าแน๊เรอ เหย่ซี เตเม เออเนอ งยาแต๋โต่ ปาหม่า อา โอ่เหม่แก แพ๊. อู ปว๋า เตเพร เก่ แม๊เถอะ เน๊อ เหย่ซี ซิปล่อ เนอหม่า อา บูบย่า แพ๊. เตฮู๊เออ เต๊เห่ เนอหม่า อา ทวาแถ่ โทเฮ๊อ เด๊อ คูหย่าหนิ เร๊อ คูหย่าหรี่ อาทือเค เนอเฮ๊อ.

เตอิซว๊าอี๊แส่ คูทิโมธี เด๊อ คยาเล๊อ

10 หม่าแน๊เรอ เนติ เร๊อ, เน ครวาเกอเฮ๊อ แว เตอิซว๊าอี๊แส่ อาคยา, เน๊อ แว เตโอ่เซอเพร อาแกล๊อาโกล เนอเต๊เห่, เน๊อ แว เตโอ่เซอเพร อา เตเตเนหนื่ออื่อ เนอเต๊เห่ เฮ๊อ. เน แม๊เถอะเฮ๊อ แว เตหยื่อเตแหน่, แว เตแด่แลปีซิปล่อ, แว เตโม, แว เตแด่ทูซิปล่อ เต๊เห่เฮ๊อ, 11 โทเรอ แว ข่าเบ่น๊อ อู เมจาเมจือ แว เออเนอ, เร๊อ แว ป่อชิเต่อเบ่ เน๊อ เตแป่เตเช เออเต๊เห่ เด๊อ วีอันทิโอก, ^b วีอิกานี ^cเร๊อ วีอิโคเนยูม ^d เน๊อ วีลิสตรา ^e อากู เนอหม่า, อา เมแคร๊ อาเหน่ เร๊อ แว ฮู๊เตเนอ เน ซิเง โทดื่อเฮ๊อ. แว ข่าเบ่ อู เมจาเมจือ แว หม่าแน๊เรอ ล๋อ เต เออเต๊เห่ เนอหม่า, แบ่เจ่ เมแลเปล๊กา เป่ ลอปลี แว แพ๊. 12 แกแย ปว๋า เตเพร เด๊อ อา ซิหยื่อ โอ่เซอเพร โต ฮู๊ จอแปแหร่ อาซิปล่อ อา เตซิหยื่อ เด๊อ เหย่ซู่ครี๊ อากู เต๊เห่เนอ, อู เก่ เมจาเมจือ หม่าแหน่ เจ๊อ เหย่ซี ปา. 13 แกแย มู๊แหม่รีแจ่ เน๊อ แกแย แลโฮแลแห่ อู เต๊เห่เนอ, งยาฉว่าฉว่า อาจาแฮ ฉว่าฉว่า ปา. เร๊อ อา เก่ อิลออี๊โหล่ แลโฮ อูโร เต๊เห่ ปา, เร๊อ อู เก่ อี๊ลอแลโฮ แลแค เกอติเหย่ซี ปา. 14 หม่าแน๊เรอ เนเออ, ตูรู๊ จว๊าแฮเง ลา โป่ เด๊อ เตหมะเตจ๊อ เด๊อ เน อิซว๊า โทเฮ๊อ, เร๊อ เน หยื่อเอ่แหน่ อาหม่าอากลอ โทเฮ๊อ เนอเต๊เห่ นี๋, เมเตเฮ๊เรอ เน ซิเงดื่อเฮ๊อ เน๊อ ซ๊าร๊า เด๊อ อา อิซว๊า เน เต๊เห่ เนอหม่า ซ๊าร๊า เด๊อ อาโตอาเบ่ เต๊เห่ อาขว่าอาคยา, ตูรู๊ จว๊าแฮเง ลา ฮู๊เนอ นี๋. 15 เด๊อ เน เป๊เจ่เค เนอ, อู อิซว๊า โทเฮ๊อ เน เน๊อ ลีเทส่อพ๊า เออเนอ เฮ๊อ. แซ่ฮู๊ เน เก่ หยื่อเอ่ แบ่เจ่ เหย่ซู่ครี๊ เร๊อ เน เก่ พย๊าหนิ จอแปแหร่ อา เมแลเปล๊กา เน อาเงเนอ, ลีเทส่อพ๊าเออ เด๊อะโทเฮ๊อ เน เตลีแมลีเพ๊ เฮ๊อ. 16 ลีเทส่อพ๊า ล๋อ ปลี เนอหม่า จอแปแหร่ อา แหย่โยบูโพ๊ เด๊อ เป, เร๊อ อา โอ่ เน๊อ อาบุ๊ยอาเตอเรอ เด๊อ อา อิซว๊า เตหมะเตจ๊อ เต๊เห่, อา อิซว๊าอี๊แส่ แร๊กาคยา เตหยื่อเอ่ซื๊อ เต๊เห่, อา เมแร๊ โตเบ่ กาคยา คยาแซ๊ เตเม เด๊อ อาซื๊อ เต๊เห่, เน๊อ เตอิซว๊า เด๊อ อา ซู แกแย เด๊อ เตโอ่เซอเพร อาจ๊ออาเต เต๊เห่ อาเง เฮ๊อ, 17 เมเตเฮ๊เรอ แซ่ฮู๊ จอแปแหร่ อาแกแย เก่ เล๊อแถ่บาแถ่ เร๊อ เก่ โอ่ ตี๊หรี่แตแร อาเหน่ เน๊อ อา เก่ เมเต อาแร๊ ปว๋า เต๊อเจ่อ อาเงเนอเรอ, อา อิซว๊า เป่ อู เฮ๊อ.