2 Timothy 4
แด๊โฉ่โด่แน เป่ อู เตซิครือมีลา
1ช๋า เหย่ซู่ครี๊ แฮเป๊อเฮ๊อ ฮู๊ คุ๊ยจ๊อแผ่ เตเพร เบ๊อะเนอปาเนอ, อา เก่ แฮ เมจากาคยา แกแย เซอเพร เต๊เห่ เน๊อ แกแยเซอ เต๊เห่ เนอเจ่อลอ ปา. ฮู๊เนอเรอ เด๊อ จอแปแหร่ เน๊อ เหย่ซู่ครี๊ อา เป๊เส่เง เนอ, แว ซิหยื่อ เฮ๊หม่า เฮ๊กลอแก แวโหง่ เน๊อ เน ฮู๊เออ, 2แด๊โฉ่โด่แน แลแค เตซิครือมีลา นี๋. ค๊าขิ แร๊ เบ่เบ่, ค๊าขิ แร๊โต่ เบ่เบ่, ตูรู๊ โด่แน แฮเง ตื๊อดื่อ ลาโป่ เตซิครือมีลา เออเนอ นี๋. โทเร๊อ ซิพรวาหนิ เหย่ซี นี๋, อิซว๊าอี๊แส่ แร๊กาคยา เหย่ซี นี๋, เร๊อ เด๊อะอ๊าเด๊อะเหร่ เหย่ซี, อิซว๊าอี๊แส่ เหย่ซี เน๊อ เตแด่ทูซิปล่อ เนอ นี๋. 3ม๊อเนอม๊อเซ เด๊อ แกแย หนิดา ปา เตอิซว๊าอี๊แส่ เตหมะเตจ๊อ เออโต่เนอ, อา เก่ แฮเต่อ ปา. เร๊อ เหย่ซี ซิปล่อ ก๊อหย่อ แลแค เด๊อ อา เก่ แด่ปล๊อ โอ่โหร่แถ่เอ๊ เร๊อดื่อ อาซ๊าร๊า เต๊เห่ เด๊อ อา แด๊โฉ่โด่แน เป่ เหย่ซี ฮู๊ เหย่ซี ซิปล่อ ก๊อหย่อ ซิหยื่อ หนิดา เนอ เต๊เห่ ปา. 4เหย่ซี เก่ ตีรี๊ จว๊าโค๊แก อาเหน่ เร๊อ เตหนิดา เตหมะเตจ๊อ ปา, เร๊อ เหย่ซี เก่ ซิหยื่อ หนิดา แลแค แพ๊ แกแย เด๊อ อู แด๊โมแด๊หนิ เป่ เหย่ซี เร๊อ เตโด่แน กี๊นีกี๊เนอ เนอเต๊เห่ ปา. 5หม่าแน๊เรอ เน ลาติเรอ, เป๊อตี๊หรี่ เนเหน่ เด๊อ เตปว๋า เต๊อเจ่อ อากูเนอ นี๋, แด่ทูซิปล่อ เตจาเตจือ เร๊อ เมแพ๊ เพรโด่แน เตซิครือมีลา อา เตเอ่เตแร เร๊อ เมเล๊อบา ลอ ล๋อ เตเอ่เตแร เด๊อ จอแปแหร่ นอเม เน เออเนอ แพ๊ นี๋. 6เมเตเฮ๊เรอ, ค๊าขิ โต่เฮ๊อ เด๊อ แว เก่ เถ่จว๊าแก เร๊อ เห่ขุเออ เฮ๊อ. ม๊อเนอม๊อเซ แฮโต่เฮ๊อ เด๊อ แว เก่ แด่แก แว เตโอ่เซอเพร เออเฮ๊อ. 7เตช๊า เด๊อ อาแร๊เล๊อ เนอ แว ช๊าโทเฮ๊อ. เตแกล่ ดี๊เจ เนอ แว แกล่ โทเฮ๊อ. แว ปื่อหม่า หนิ แร๊ เฮ๊อ แว เตหยื่อ โต่เด๊อ อาตื๊อดื่อเฮ๊อ. 8กู๊แหน่เรอ จอแปแหร่ แด่ดว๊า เป่เฮ๊อ แว เตจ๊อเตเต อา กู๊โก่เท เด๊อ อา หม่าเฮ๊อ เตเมหนิคว๊าเก่ เออเตเม เนอเฮ๊อ. โทเรอ ช๋า ม๊อเนอ ตื๊อดื่อ ปาเนอ, เพรเฮ๊เบ่เมโตเต จ๊อเต อา แบ่เจ่ เออเตเพร เก่ เด๊อะแล แว ปา หม่าแน๊เรอ เออเนอหมา แวเง ตื้อดื่อ หม่าโต่. ล๋อ แกแย เด๊อ อา โอ่ป่อแม๊ชือเกอ แบ่เจ่ เก่ แฮ โอ่โลแถ่ คยา ปา เนอเต๊เห่ อาเงหม่า อา โอ่เต่อเกอ ปาปา.คูเปาโล นอแฮ คูทิโมธี เด๊อ อา โอ่
9แอ๊จื๊อ จ่าเพรอ แฮเล๊ แพรแพร เด๊อ แว โอ่ นี๋. 10เมเตเฮ๊เรอ, คูเดมาส aโมหนิเร๊อ เต, ปว๋า เต๊อเจ่อ เด๊อ เห่ขุเออ อาขว่าอาคยา, อา จว๊า ตาพาแก เฮ๊อ เน๊อ แว เฮ๊อ, เร๊อ อา จว๊าเฮ๊อ เด๊อ วีเธสะโลนิกา เฮ๊อ. คูเครสเซนส์ เร๊อ อา จว๊าเฮ๊อ เด๊อ กาลาเทียเก่ เร๊อ คูติตัส b เร๊อ อา จว๊าเกอลาติ เด๊อ ดาลมาเทียเก่ เฮ๊อ. 11แกแย โอแกเกอ เร๊อ แว หม่า ตื๊อแพ๊ คูลูกา เตเพรแพ๊. จว๊า เอ๊แฮ หนิเกอ คูมาระโก นี๋. เมเตเฮ๊เรอ อา เตเมจว่า แว เต๊เห่เนอ, อา ทวาบุ๊ยทวาเตอเรอ แหน่เจ๊อ เด๊อ แว เตเอ่เตแร อาเง เจ๊อ. c 12แว นอตาแล เฮ๊อ คูทีคิกัส เด๊อ วีเอเฟซัส อากู เฮ๊อ. d 13ช๋า เน แฮ ปา เร๊อ พย๊าแฮหนิ เป่ แว จากลอดุ เนอ นี๋. แว แด่โอ่แก อา เบ๊อะวีโตรอัส เด๊อ คูคราปัส อา โอ่ เนอ. พย๊าแฮ หนิเกอ ลีตูลู เนอเต๊เห่. อา โหล่ดุเล๊อ หม่า ลีพ๊า เนอเต๊เห่ เฮ๊อ. e 14เพรดา ตีลี คูอเล็กซานเดอร์ เนอเตเพร หม่า, อา เม มู๊แหม่รีแจ่ แหน่เจ๊อ แว เจ๊อ. fล๊อ อา เมโทเฮ๊อ แว เต๊เห่เนอ แบ่เจ่ เก่ เมจากาคยา เกอลาติ ดื่อ ลู ฮู๊เนอ ปา. 15โอ่รอโอ่เร เกอเร๊อ เกอ เนเหน่ เร๊อ อาเนอ นี๋, เมเตเฮ๊เรอ อา ซิเถ่ซิฮา เมตาตือ ชอแหน่เจ๊อ เป เตซิครือมีลา เจ๊อ. 16เบ๊อะแว เฮ๊เบ่ เตเก บี๊เกอเร๊อ แวเหน่ เน๊อ อู เมจากาคยา แว อาเหร่อเล๊อ โตโพ๊ เบ๊อะเนอ, อู โอ่เกอ เด๊อ แว ช๊า เตเพร่ว โต่. อู แกล่ ตาพาแก ลอปลี แวเหล่. เก๋อ จอแปแหร่, แด่ แต่ เตซื๊อ เด๊อ เหย่ซี อาโอ่ เตเพร่ว แต่เหม่ นี๋. 17หม่าแน๊เรอ แซ่ฮู๊ แกแยยิวพู๊ หม่าโต่ เต๊เห่ เก่ หนิโฮน๊อ เกอ เตซิครือมีลา อาเงเนอเรอ, แบ่เจ่ โอ่เกอ เน๊อ แว เร๊อ อา เด๊อะ แว เตอ๊าเตเหร่ เร๊อ แว แด๊โฉ่โล เล๊อบา เป่โท เหย่ซี เฮ๊อ. ฮู๊เนอเรอ แว แลเปล๊ เถ่แกเฮ๊อ เออเนอหมา อา แซ่เจ๊อเร๊อ แว แลเปล๊ เถ่แก เด๊อ แอ๊ซี แกกู เจ๊อ. 18แบ่เจ่ เก่ เมแลเปล๊ แว เน๊อ เตมู๊แหม่รีแจ่ ล๋อปลี เออเต๊เห่ ปา. โท๊โต่ อา เก่ พย๊ากา แว ปา เร๊อ อา เก่ ตอกอตอเก เกอเร๊อ แว เด๊อ ม๊อขุ อา เทอเลเก่กู ปา. เตลีเตเค เก่ แลเบ่ ดื่อ แบ่เจ่ เออ ตูจูเพร ตาแลเคร๊ นี๋. อาเมน.เตเฮ๊โมเฮ๊แร๊ เด๊อคยาเล๊อ
19แว ซูแฮ เป่ แว เตเฮ๊โมเฮ๊แร๊ เออเต๊เห่ เด๊อ โหมะปริสสิลลา, g เพอาควิลลา เร๊อ คูโอเนสิโฟรัส อา หี่ด๊อหี่แพพู๊ เต๊เห่ อา โอ่. h 20คูเอรัสทัส เร๊อ อา โอ่แก เบ๊อะวีโครินธ์ อากูเนอ. iโทเรอ คูโตรฟีมัส เร๊อ อา โอ่โมโอ่รี แร๊ต๊าโต่ อาขว่าอาคยา, แว แด่แก ลู เด๊อ วีมิเลทัส อากูเนอ. j 21เบ๋อ เก๊โหร่เค แฮโต่ แต่ล๋ายโต่ เออเนอ, แอ๊จื๊อ แฮเล๊ แพร เด๊อ แว โอ่ นี๋, คูยูบูลูส, คูปูเดน, คูลีนัส เน๊อ หม่อคลาวเดีย ซูแฮ เกอ อา เตเฮ๊โมเฮ๊แร๊ เต๊เห่. โทเรอ โป่แหว่ ครี๊พู๊ เด๊อ อาโร เต๊เห่ ซูแฮ หนิเกอ อา เตเฮ๊โมเฮ๊แร๊ เต๊เห่ ฮู๊เนอเนอ. 22แบ่เจ่ เก่ โอ่เกอดื่อ เร๊อ เน นี๋. เตบุ๊ยเตเตอเรอ เก่ โอ่เกอดื่อ เน๊อ ซี ล๋อ ปลี นี๋.
Copyright information for
EkySCThai