ลี ยอห์น โซบ่า ต๊าบ่าเออ หม่าดื่อ ลี เด๊อ โหมะเผระ เตเพร ราจว๊า เป่ คูกายอัส เด๊อ อา ทวา เพรหยื่อเอ่ตู๊หมู่ตอกล๊อ กู่กล๊อ เออเตเพร อา โอ่. คูกายอัส เออเนอ อา เมจว่าเกอ เป่ แหน่เจ๊อ ครี๊พู๊ เต๊เห่ อาขว่าอาคยา, เพรราลี เออเตเพร ถู่เซ๊หนิ แหน่เจ๊อ ลู. เน แบ๊ซว๊า เร๊อ คูดิโอเตรเฟส เนอหม่า รอหนิ เนเหน่ ตี๊กินี๋, อาเฮ๊จว๊าหนิ ลู โหง่ ฮู๊เนอ.

เตเฮ๊เบ่ โต๊โต่ เร๊อ โต๊โต่

เตเฮ๊เบ่ เหร่อ เด๊อ เง ๑:๑-๔

อู ถู่เซ๊หนิ กายอัส ๑:๕-๘

อู เป๊เจ่อหนิ คูดิโอเตรเฟส ๑:๙-๑๐

อู ถู่เซ๊หนิ เดเมตริอัส ๑:๑๐-๑๒

เตเฮ๊เบ่ เด๊อ คยา ๑:๑๓-๑๕

3 John

1แว หม่า โหมะพรูโหมะเผระ เด๊อ อา ทวา ทวาดุทวาเต เตเพร เร๊อ แว ราจว๊าเป่ ลีเออต๊าบ่า เด๊อ คูกายอัส อาโอ่. คูกายอัส หม่า แกแย เด๊อ แว โมเร๊อ หม่าแหน่ เจ๊อ อา เตเพร เจ๊อ. ^a

2แว โคแบ๊ซว๊า โม๋, แซ่ฮู๊ เตล๋อ ปลี เก่ จว๊า แร๊แร๊ เกอ ดื่อ เร๊อเน เรอ, แว กุยจ๊อเบ เป่ เด๊อ เนเง. ฮู๊ แว ซิเงเฮ๊อ เร๊อ เน โอ่โมโอ่รี แร๊ เด๊อ แหย่โย ตากยาเนอ, แว กุยจ๊อเบ เร๊อ เน เหน่กล่อ พ๊าหย่า ตากยาเนอ, อา เก่ โอ่โม โอ่แร๊ เกอดื่อ ฮู๊เนอ นี๋. 3เมเตเฮ๊เรอ เบ๊อะเป โป่แหว่ ครี๊พู๊ เต๊เห่ แฮโต่เกอ แว เบ๊อะเนอ อาเค, อา แด๊โฉ่โล เป่ แว เร๊อ เนหรี่เนแก. เร๊อ อา เฮ๊ เป่ แว, เน ซิปล่อจ๊อ เร๊อ เตหมะเตจ๊อ เร๊อ เน โอ่เซอเพร ครวาเกอ ฮู๊เนอ ปว๋า โตโพ๊ เจ๊อ. อาขว่าอาคยา, แว ซิครือ แหน่เจ๊อ. 4เบ๊อะแว หนิโฮ เร๊อ แวพู๊แวเลอ ครี๊พู๊ เต๊เห่ โอ่เซอเพร เด๊อ เตหมะเตจ๊อ อากู เบ๊อะเนอ, แว ซิครือ เจ๊อ ปว๋า โตโพ๊ เจ๊อ. เต เด๊อ อา เก่ เมซิครือ เล๊อ แว เร๊อ เออเนอ อาโอ่ ปา เตอเจ๋อ โต่ เฮ๊อ.

อู ถู่เซ๊ เกอเร๊อ คูกายอัส

5แว โคแบ๊ซว๊า โม๋, เน ซิปล่อจ๊อ แหน่เจ๊อ เร๊อ เตเม เด๊อ เน เมจว่า เป่ โป่แหว่ ครี๊พู๊ เนอ เต๊เห่. เหย่ซี หม่า ซิเผระ เด๊อ เน ซิเงน๊อ ลู โต่ เต๊เห่ หม่าแน๊เรอ เน เมจว่า เป่ เหย่ซี. 6เหย่ซี โด่แนโล แลแค เป่ เพรหยื่อเอ่เออ ตู๊หมู่ตอกล๊อ เบ๊อะเออ เต๊เห่ เน๊อ เน เตโม อาหรี่อาแก. แซ่ฮู๊ เหย่ซี เก่ จว๊า แฮเง หนิโป่ แกล๊ เด๊อ เง ตากยาเนอ, แด่ทูซิปล่อ เร๊อ เมจว่า เป่ เหย่ซี ฮู๊ อาโต เร๊อ จอแปแหร่ อา เตซิหยื่อ เนอเต๊เห่ นี๋. 7เมเตเฮ๊เรอ เหย่ซี เถ่จว๊า เป่ แกล๊ เด๊อ ครี๊ อาเง หม่าแน๊เรอ อา พย๊า เกออู เตเมจว่า เด๊อ แกแย หยื่อเอ่ เกออู ครี๊ โต่ เนอเต๊เห่ อา โอ่ เตอเจ๋อ โต่. 8ฮู๊เนอ อาขว่าอาคยา, แซ่ฮู๊ เป เก่ เม เต่อเกอเต เร๊อ เหย่ซี เด๊อ อา เม แลแค เตหมะเตจ๊อ อาเตเม เออเต๊เห่ อาเงเนอ, เป ครี๊พู๊ เต๊เห่ โตเบ่ เมจว่า เป่ แกแย ฮู๊เนอ เต๊เห่ เฮ๊อ.

คูดิโอเตรเฟส เร๊อ เดเมตริอัส

9แว ราจว๊า เป่ โทเฮ๊อ ลี เด๊อ เพรหยื่อเอ่ตู๊หมู่ตอกล๊อ อา โอ่ ต๊าบ่า หม่าแน๊เรอ คูดิโอเตรเฟส เด๊อ อา ซิหยื่อ ทวา เหย่ซี กู่กล๊อ เออเตเพรเนอ, อา หนิดา เกออู เป ราเฮ๊โฉ่จว๊า ลีเนอ เต๊เห่ โต่. 10ฮู๊เนอ อาขว่าอาคยา, ช๋า แว แฮโต่ ปา เร๊อ แว เก่ เฮ๊โลแถ่ เป่ ซี เน๊อ ล๋อ อา เมซื๊อ โทเฮ๊อ เนอเต๊เห่ ปา. อา แด๊ เปแหย่โย เร๊อ อา เฮ๊ มู๊แหม่รีแจ่ เป, โท๊โต่ เบ๊อะโป่แหว่ เต๊เห่ แฮโต่ จว๊าโต่เกอ อา เบ๊อะ เบ๊อะเนอ, อา เอ๊ฉื่อ เกอ เหย่ซี โต่. โท๊โต่ แกแย เด๊อ อา ซิหยื่อ เอ๊ฉื่อ โป่แหว่ เออเต๊เห่เนอ อา เมดู๊แด ตาตือ เร๊อ อา เหว่เถ่แก อู เด๊อ เหย่ซี เพรหยื่อเอ่ตู๊หมู่ตอกล๊อ อากลอ เจ๊อ.

11แว โคแบ๊ซว๊า, เตมู๊แหม่รีแจ่ ฮู๊เนอ เต๊เห่เนอ แม๊บือแม๊ตู่ เกอ แต่ อู แต่เหม่ นี๋. แม๊บือแม๊ตู่ เกอดื่อ อู เต เด๊อ อาแร๊ เนอเต๊เห่ นี๋. แกแย เตเพรเพร เด๊อ อา เมเตแร๊ เนอ, อา หม่า จอแปแหร่ อาแกแย เตเพร เฮ๊อ. แกแย เด๊อ อา เม เตมู๊แหม่ เตเพรเพร เนอหม่า หม่าเฮ๊อ แกแย เด๊อ อา ซิเง ตาเต แต่เกอลา อู จอแปแหร่ โต่. 12อู ถู่เซ๊ ลอปลี เจ๊อ คูเดเมตริอัสเจ๊อ. เตหมะเตจ๊อ ข่าเฮ๊โล เจ๊อดื่อ เร๊อ อา แร๊ อาหรี่อาแก เจ๊อ. แว ถู่เซ๊ เกอเร๊อ เกอ ดื่อ อา อาหรี่อาแก, เร๊อ เน ซิเง เร๊อ เป เฮ๊เออ เนอหม่า อาจ๊ออาเต แพ๊.

เตเฮ๊โมเฮ๊แร๊ เด๊อคยา ตื๊อดื่อ

13เตหรี่เตแก เด๊อ แว ซิหยื่อ แด๊โฉ่ เน เนอหม่า อาโอ่ เอ๊แหน่เจ๊อ หม่าแน๊เรอ แว ซิหยื่อ ราจว๊า เป่ ปา เน เร๊อ ลี โต่. 14หม่าแน๊เรอ แว แม๊ชือ เด๊อ แว เก่ แม๊เถอะ แพร เร๊อ เน ปา เร๊อ เป เก่ เฮ๊เบ่ตาฉื่อ แคลู เตเพร เร๊อ เตเพร ปา.

15เตเพรเตดือ เก่ โอ่เกอ ดื่อ เร๊อ เน นี๋. ล๋อ เป โคแบ๊ซว๊า เบ๊อะเออ เต๊เห่ เฮ๊โมเฮ๊แร๊ เกอดื่อ เน. เฮ๊โมเฮ๊แร๊ เป่ โป่ แฮเง เกอดื่อ ล๋อ เป โคแบ๊ซว๊า เนอเต๊เห่ เตเพร โท เตเพร นี๋.