Acts 1

1ซ๊าร๊าดุ เธโอฟีลัส, เป๊อแถ่ เบ๊อะแบ่เจ่ เหย่ซู่ เม จอแปแหร่ อาเตเม เนอเตอเนอ เร๊อ อา โต่ เด๊อ จอแปแหร่ เอ๊กา กาแถ่ ลู เนอเตอเนอ อาหรี่อาแก เร๊อ อา เตอิซว๊าอี๊แส่ ล๋อ ปลี เต๊เห่เนอ แว ราม๊าราแด โทลอเฮ๊อ เด๊อ ลี อาเหร่อเล๊อ เนอต๊าบ่า อากู เฮ๊อ. ^a 2เบ๊อะอู เอ๊กา กาแถ่ แต่ล๋าย อา เด๊อ ม๊อขุ ล๋ายโต่ เนอ, เด๊อ แหย่โยบูโพ๊แบ่เจ่ อาขว่าอาคยา เร๊อ, อา เฮ๊แก อา เพรโด่แนพู๊ เต๊เห่ เด๊อ อา นว๊าแถ่ โทเฮ๊อ ลู เนอเต๊เห่ เร๊อ เหย่ซี เก่ เบ่ เมเต เต๊เห่ อาหรี่อาแก. 3อา ข่าเซอโทเฮ๊อ อาเหน่ เร๊อ อา ก๊อถ่อเซอเพร กาคยา เด๊อ เตเซอ โทเร๊อ เด๊อคยา อาเนอ ลุยเชอ อากูเนอ, อา เด๊อะโล เอ๊เป่ลา อาเหน่ เร๊อ อา โคเจ่ เต๊เห่. โทเร๊อ อา แด๊โฉ่โด่แน เป่ เหย่ซี เร๊อ จอแปแหร่ อาเทออาเก่ อาหรี่อาแก. อา โคเจ่ เต๊เห่ แม๊เถอะ อา เร๊อ อาซิปล่อ หร่าเหร่ ปา แลแค โต่. เหย่ซี หยื่อเอ่ แหน่แหน่ เจ๊อ เน๊อ อา เซอเพร หม่าแหน่ เจ๊อ. 4โตโพ๊เค เบ๊อะอา เอ่โอ เต่อเกอ เร๊อ อา โคเจ่ เออเต๊เห่ เบ๊อะเนอ, อา เฮ๊แก เหย่ซี เน๊อ, “เถ่จว๊าแก แต่ แลแค เด๊อ เยรูซาเล็ม วีเออ อากูเนอ แต่ แลเหม่. โอ่ป่อตื๊อดื่อ แลแค เบ๊อะเนอ โต่เด๊อ ซี พย๊าหนิ เชหยู่ เด๊อ แว แด๊โฉ่หนื่ออื่อ โทเฮ๊อ ซี เร๊อ แวเพ อ๊อแล เด๊อ อา เก่ เด๊อะ ซี ปาเนอ นี๋.” ^b 5โท๊โต่ อา เฮ๊โป่ เหย่ซี เน๊อ, “คูยอห์น เจ เป่ อู เร๊อ เทอ, หม่าแน๊ เรอ งยาแต่โต่ ปาเนอ อู เก่ ปลวา เป่ ซี เร๊อ แหย่โยบูโพ๊แบ่เจ่ ปา.” ^c

อู เอ๊กา กาแถ่แก เหย่ซู่ เด๊อ ม๊อขุ

6เบ๊อะเพรโด่แนพู๊ เต๊เห่ แฮ แม๊เถอะ ตาฉื่อ คยาแซ๊ ลู เด๊อ เหย่ซู่ โอ่ เบ๊อะเนอ, อา แด๊เฮอ เหย่ซู่ เน๊อ, “แบ่เจ่, กู๊แหน่เออหม่า ม๊อเนอโตเฮ๊อ เด๊อ เน เตเร เด๊อะกาคยา เฮ๊อ อิสราเอล เต๊เห่ อาเทออาเก่ เนอ เฮ๊อ แอ?”

7เร๊อ เหย่ซู่ เฮ๊ฉื่อ เหย่ซี เน๊อ, “เบ๊อะม๊อเนอม๊อเซ เต๊เห่ เนอหม่า อา ทวาแถ่ดื่อ เร๊อ เพ อาเตอเรอฉว่าชอ แพ๊. อา เก่ ทวาแถ่ เบ๊อะเกเต ปา เนอหม่า, ซี โหล่ ซิเง หม่าโต่. 8หม่าแน๊เรอ เบ๊อะแหย่โยบูโพ๊แบ่เจ่ ตากาแลโอ่เฮ๊อ เด๊อ ซีกู ปา เบ๊อะเนอ, ซี เก่ เล๊อบา เร๊อ เตฉว่าเตชอ ปา เร๊อ ซี เก่ ทวาแถ่ เป่แว เพรข่าเฮ๊โล เต๊เห่ เด๊อ วีเยรูซาเล็ม อากู, เร๊อ ยูดาห์เต๊เก๋ เล, เร๊อ สะมาเรียเก่, โท๊โต่ อา เก่ โต่ เจ๊อเด๊อ เห่ขุต๊าบ่า ลอ เจ๊อ ปา,” อา เฮ๊ฮู๊เนอ. ^d

9เหย่ซู่ เฮ๊เบ่ โทเร๊อ เบ๊อะอา โคเจ่ เต๊เห่ แม๊ตู่แถ่ อา เบ๊อะเนอ, จอแปแหร่ เอ๊กา กาแถ่แก ลู เด๊อ ม๊อขุ. อ๊อโหล่ ต๊าบ่า โกบี๊แก ลู เร๊อ เหย่ซี แม๊เถอะ ปา ลู โต่. ^e

10เบ๊อะเหย่ซี แม๊แถ่ โอ่แต่ปา ปา เด๊อ ม๊อเล เบ๊อะเนอ, แกแยซิเนอ กือแซ๊หนิ เห่อจาบู เร๊อ แฮโอ่ก๊อแถ่ โอ่โลคย๊า เป่ เด๊อ เหย่ซี อาช๊า. 11เร๊อ อา เฮ๊ เหย่ซี เน๊อ, “แกแยกาลิลีพู๊ ซี๋ ซี จว๊า ก๊อถ่อโอ่ แม๊แถ่ แลแค เด๊อ ม๊อเล เบ๊อะเออ เมเต? เหย่ซู่ เด๊อ ซี แม๊เถอะ อู เอ๊กา กาแถ่แก อา เด๊อ ม๊อขุ เออเตเพรเนอ, อา เก่ ตากาแล แซ่ คยาแซ๊ ฮู๊ ซี แม๊เถอะ อา กากี๊แถ่ กู๊แหน่เออเนอ ปา.” 12โทเร๊อ อา โคเจ่ เต๊เห่ โอ่ เด๊อ โต๊โฉ่โฉ่ขุ เร๊อ อา กาคยา คยาแซ๊ แลแค เด๊อ วีเยรูซาเล็ม. วีเยรูซาเล็ม เออเนอหมา อา โอ่ยา เร๊อ โฉ่เออ อากลี เยโซซว๊า เร๊อ เช๊อโซซว๊า แพ๊. 13เหย่ซี กาโต่ เด๊อ วีเยรูซาเล็ม อากู เร๊อ อา จว๊าแถ่โน เด๊อ หี่ เด๊อ เหย่ซี เหล่จว๊าโอ่โก๊ เกอเร๊อ แตแปล๊เตอเปลอ เออเนอเตเม เด๊อ อาขุเนอ โต๊โต่. เร๊อ เหย่ซี เออเต๊เห่หม่า แคร๋ อูเป เฮ๊เร๊อ คูเปโตร, คูยอห์น, คูยากอบ, คูอันดรูว์, เร๊อ คูฟีลิป, คูโธมัส, คูบารโธโลมิว, คูมัทธิว, คูอัลเฟอัส อาพู๊เพรคู คูยากอบ, คูซีโมน เด๊อ อา โม เกอเร๊อ อาเทออาเก่ เออเตเพร เน๊อ เพยากอบ อาพู๊เพรคู คูยูดาส ซีเต๊เห่ แพ๊. ^f 14เหย่ซี เออเต๊เห่เนอ อา แฮ แม๊เถอะ ตาฉื่อ ตาปล๊อ โตโมโม เร๊อ เพรเหมาะ เด๊อ อาโรเต๊เห่ เร๊อ เหย่ซู่ อาโหมะ มารีย์ เร๊อ เหย่ซู่ อา โป่เพรคู เต๊เห่ เร๊อ เหย่ซี กุยจ๊อเบ โหร่ลอ ลู เบ๊อะเนอ.

นว๊าแถ่ แกแย เด๊อ อา โตแถ่ คูยูดาส อากู๊เหล่

15เตอเนอเคเนอ, เพรหยื่อเอ่เต๊เห่ เด๊อ อา ผื๋อ โอ่โหร่ เพร เตเยเนอเชอ เออเนอ, อา แฮ โอ่กู๊โอ่แก๊ ลู. 16เร๊อ คูเปโตร ก๊อถ่อเฮ๊ เน๊อ, “โป่แหว่ ซี๋, ลีเทส่อพ๊า เฮ๊หนื่ออื่อ โทเฮ๊อ คูยูดาส เด๊อ อา ยู เป่ อู แกล๊ เร๊อ อา นอปื่อ อู เร๊อ เหย่ซู่ เออ อาหรี่อาแก. เร๊อ แหย่โยบูโพ๊แบ่เจ่ นอเฮ๊เบ่ คุ๊ยดาวิด เร๊อ อาหรี่อาแก เออเต๊เห่ เนอหม่า อา โตเบ่ เล๊อแถ่บาแถ่ แหน่ แพ๊. 17อา หม่า อา โนโอ่เต่อเกอ เด๊อ เป ตู๊หมู่ตอกล๊อกู เตเพร เร๊อ อู นว๊าแถ่ เกอ อา เด๊อ อา เก่ เมเต่อเกอเตเร๊อ เป.”

18(รือ เด๊อ คูยูดาส พย๊าหนิ เด๊อ เตมู๊แหม่รีแจ่ อากู เออเนอ, อา พรี เร๊อ เห่ขุ เต๊เหล่ เร๊อ อา แลคื๊อตาเซอ อาฮ๊อป่อเพ๊ เด๊อ เบ๊อะเนอ เร๊อ อาโพอาพรา เต๊เห่ ตาเถ่ ลอ. ^g 19แกแย โอ่ เด๊อ วีเยรูซาเล็ม เต๊เห่ หนิโฮ แลแค เตทวาแถ่ เออ เร๊อ อา เอ๊ แลแค เห่ขุ เออโต๊โผ่ อามุย เน๊อ อาโหง่ เร๊อดื่อ. เร๊อ เหย่ซี เอ๊ เน๊อ “อาเคลดามา,” อาโหง่แลช๊า หม่า อา เฮ๊ เร๊อ “เตสุ่ย เห่ขุ.”)

20“อู ราโอ่ เด๊อ ลีถู่เซ๊แถ่ อากูเนอ เร๊อ อา เฮ๊ เน๊อ,

‘อาหี่ เก่ โอ่แหร่แก ดื่อ ปา นี๋. อู เก่ โนโอ่ แต่ เด๊อ อาเหล่โอ่ อากูเนอ เตเพร่ว แต่เหม่ นี๋.’ ^h

โทเร๊อ อา เฮ๊โป่ เน๊อ,

‘อู เก่ โนเมดื่อ อาเตเม เตเพร ปา นี๋.’ ⁱ

21– 22ฮู๊เนอเรอ แกแย เตเพรเพร โตเบ่ โน โอ่เตอเกอ เน๊อ เป เร๊อ อา เก่ ข่าเฮ๊โล อาเหน่ เน๊อ แบ่เจ่ เหย่ซู่ เซอก๊อถ่อ เซอเพร กาคยาเออ อาหรี่อาแก. แกแย เด๊อ เป เตเร นว๊าแถ่ เต๊เปล่ อา เออเตเพร เนอหม่า, เบ๊อะเหย่ซู่ จว๊าเต่อเคเต่อ เกอปา เร๊อ เป เบ๊อะเห่ขุเออ เบ๊อะเนอ, โท๊โต่ เป๊อแถ่ เบ๊อะคูยอห์น เจเป่ อู เทอ โต่ แฮ เด๊อ จอแปแหร่ เอ๊กา กาแถ่แก แบ่เจ่ เหย่ซู่ เด๊อ ม๊อขุเนอ, อา หม่า เบ๊อะเนอเค อา โตเบ่ หม่าดื่อ แกแย เด๊อ อา โอ่เต่อจว๊าเต่อ เกอ เร๊อ เป ปว๋า โพ๊ เนอเตเพร,” คูเปโตร เฮ๊ ฮู๊เนอ. ^j

23เร๊อ เหย่ซี แด๊โฉ่โลแถ่ แกแย ซิเนอ เด๊อ อามุย เร๊อ คูโยเซฟ, แกแย เต๊เห่เห่ อาเอ๊ ลู เน๊อ คูบารซับบาส (หม่าโต่เรอ คูยุสทัส) เร๊อ คูมัทธีอัส. 24โทเร๊อ เหย่ซี กุยจ๊อเบ แลแค เน๊อ, “เก๋อ แบ่เจ๋, เน ซิเง ดื่อเฮ๊อ แกแย ซิปล่อ อา เตเตเน เต๊เห่ อาขว่าอาคยา, เด๊อ แกแย เออซิเนอ อาเกลเนอ เน นว๊าแถ่ โทเฮ๊อ อา เบ๊อะเตเพร, 25โท๊โต่ แกแย เด๊อ เน นว๊าแถ่ โทเฮ๊อ อา เออเตเพร แซ่ฮู๊ อา เก่ พย๊าหนิ เพรโด่แนพู๊ เต๊เห่ คูยูดาส เด๊อ อา วี๊แก แก อา เหล่เอ่เหล่แร เออเตเพร อากู๊เหล่ เนอ, เด๊อะโลแถ่ เป่ เป กู๊แหน่. คูยูดาส หม่า อา เซอเฮ๊อ เร๊อ อา จว๊า ดื่อเฮ๊อ แกล๊ เด๊อ อา โตเบ่ จว๊า เร๊อ ลู เนอเฮ๊อ.” 26โทเร๊อ แซ่ฮู๊ เหย่ซี เก่ นว๊าแถ่ เด๊อ เออซิเนอ อาเกล เตเพร เนอเรอ, เหย่ซี บ๊อ แลแค เตแบบุ๊ย เต๊อเจ๊อ เร๊อ อา ตาโต เด๊อ คูมัทธีอัส เร๊อ อู แด่โน เต่อเกอ อา เด๊อ เพรโด่แนพู๊ เต๊เห่ เช๊อเตเพร ตู๊หมู่ตอกล๊อ เออ อากู.