Acts 10

คูเปโตร เร๊อ เพโครเนลิอัส

1เบ๊อะวีเก่ซารียา อากู เนอ, เกลอฮู๊ ทวาดุ เด๊อ อามุย เร๊อ เพโครเนลิอัส โอ่เตเพร. อา หม่า โรมัน เกลอฮู๊ เตเย อากู่กล๊อ เด๊อ อู เฮ๊ เร๊อ อิตาเลีย เกลอฮู๊โกล. 2อา หม่า แกแยยิวพู๊ หม่า โต่, เร๊อ อา หม่า แกแย เด๊อ อา โมหนิเกอ เร๊อ จอแปแหร่ เตเพร. โท๊โต่ อา เร๊อ ล๋อ อา ตี๊หี่แตแพ เต๊เห่เนอ อา แด่ดุหยื่อแหน่ แหน่เจ๊อ จอแปแหร่. อา เมจว่า เอ๊แหน่เจ๊อ แกแยยิวพู๊ เด๊อ อา โซพ๊าโซแร เต๊เห่. เร๊อ เบ๊อะค๊าขิ ดาโต กุยจ๊อเบ เฮ๊อ เฮ๊เนอ, อา กุยจ๊อเบ ปว๋า โตโพ๊ เจ๊อ. 3เตอเนอเค เบ๊อะเหมาะเฮ๊แล โซมือ ผื่อเบ่เฮ๊อ เบ๊อะเนอ, อา แม๊เถอะลว๊า หนื่ออื่อ ลีโพ๊ เจ๊อ จอแปแหร่ อา เตเน่วม๊อขุพู๊ เตเพร แฮโน โอ่โลคย๊า เด๊อ อา หี่ด๊อกู เร๊อ อา เอ๊ ลู เน๊อ, “เพโครเนลิอัส!” ฮู๊เนอ.

4อา แม๊ โอ่แต่ฉื่อ เตเน่วม๊อขุพู๊ เร๊อ อา ซิอิเช โกโน๋ โต่, เร๊อ “แบ่เจ่, เน ซิหยื่อ เฮ๊ แว อิเต?” อา แด๊เฮอ เตเน่วม๊อขุพู๊ ฮู๊เนอ,

เร๊อ เตเน่วม๊อขุพู๊ เฮ๊ฉื่อ อา เน๊อ, “จอแปแหร่ ซิปล่อโอ่เฮ๊อ เน, เมเตเฮ๊เรอ เน เตกุยจ๊อเบ เต๊เห่ เร๊อ เน เตเมจว่า แกแย โซพ๊าโซแรพู๊ เต๊เห่เนอ, อา โต่แถ่เฮ๊อ เด๊อ จอแปแหร่ อา โอ่ แซ่เฮ๊อเร๊อ เน หลู่แถ่ อา เนอเฮ๊อ. 5กู๊แหน่เออ นอจว๊า เอ๊แฮมอ คูซีโมน เปโตร เร๊อ แกแย เต๊เห่ เด๊อ วียัฟฟา อากู เนอ. 6อา จว๊าโอ่ เด๊อ คูซีโมน เด๊อ อา เมพ๊า เนอเตเพร อาหี่ เด๊อ อา โอ่ เด๊อ เทอดุซาวาทือ เนอเตเพร.”

7– 8เตเน่วม๊อขุพู๊ เถ่จว๊าแก โทเรอ, เพโครเนลิอัส เอ๊แฮ อาหลู่เล๊ เด๊อ อา หี่ด๊อกู ซิเนอ เร๊อ เกลอฮู๊ เตเพร เด๊อ อา แด่ดุหยื่อแหน่ จอแปแหร่ เร๊อ อา เหล่หยื่อเอ่ เกอเร๊อ ลู เออเตเพร. เร๊อ อา แด๊โฉ่โล เป่ลอ เหย่ซี เร๊อ เตเมทวาแถ่ โทเฮ๊อ อาเหน่ เร๊อ อา เออเต๊เห่, โทเรอ อา นอจว๊า เหย่ซี เด๊อ วียัฟฟา.

9เด๊อคยาเตอเนอ เบ๊อะเหย่ซี จว๊าโตผื่อเฮ๊อ เร๊อ วียัฟฟา เบ๊อะเนอ, คูเปโตร แถ่ เด๊อ หี่ขุ รือดือ เตเม เร๊อ อา แถ่ กุยจ๊อเบ. เบ๊อะเนอ อาเค หม่า อาโต เร๊อ เหมาะผื่อ เตเร เหมาะโถ่เฮ๊อ. 10อา ซิเอ่ซิโอ เร๊อ อู ตี๊หรี่แตแร เป่ ลู เหล่เอ่ เนอ อา แม๊เถอะลว๊า เตเต๊อเจ่อ. 11อา แม๊เถอะ ม๊อขุ อาโบ๊โม เร๊อ เตเต๊อเจ่อ เด๊อ อาแซ่เน๊อ อิเก แหล่ดุ เด๊อ อาเหนาะ โอ่ ลุยเหนาะ ต๊าบ่า เร๊อ อู แจตา เหย่เนอ. 12ล๋อ เตมีเตดอ เด๊อ อา แข่โอ่ ลุยโค๊ เนอเต๊เห่ เร๊อ ล๋อ เตมีเตดอ เด๊อ อา บ๊าจว๊า เนอเต๊เห่ เร๊อ ล๋อ ถู่พู๊โหย่พู๊ เด๊อ อา โย เด๊อ ม๊อเล เต๊เห่เนอ อา โอ่ ลอปลี เด๊อ อิเกดุ เออต๊าบ่า อากู. 13โหง่พราแถ่ เร๊อ อา เฮ๊ ลู เน๊อ, “คูเปโตร๋ ก๊อถ่อ เมเซอเอ่แกมอ เตเออเนอเต๊เห่.”

14หม่าแน๊เรอ คูเปโตร เฮ๊ฉื่อ เน๊อ, “แบ่เจ๋ แว เอ่ เจ๊อแหน่ ตีกี๋ โต่, เตเด๊อ อู แด่เฮ๊อ อา เน๊อ อา โพ๊แปละโต่ เนอเต๊เห่ เบ่เบ่, หม่าโต่เรอ อา อาโพ๊อาแปละ โต่ เนอเต๊เห่ เบ่เบ่, แว เอ่น๊อ อา โตโพ๋ โต่.”

15เร๊อ โหง่พราแถ่ โป่ เน๊อ, “เต เด๊อ จอแปแหร่ ดาเฮ๊เฮ๊อ เร๊อ อา โพ๊แปละ แพ๊, เร๊อ เอ่หนิ แพ๊ อา เฮ๊ เนอเต๊เห่เนอ, เฮ๊ แต่ อา เน๊อ อา มู๊แหม่ แต่เหม่.”

16อิเกดุ เด๊อ เตมีเตดอ โอ่ เด๊อ ลูกู เออต๊าบ่าเนอ, อาโล โกตา บา เป่ ลู โซโพ๊ โทเรอ อู จอแถ่ โอ่เหม่แก คยา อา เด๊อ ม๊อขุ.

17เบ๊อะคูเปโตร เตเนแม๊หนิ จอแปแหร่ อา เตเด๊อะโล อา เตแม๊เถอะลว๊า เออ อาโหง่แลช๊า เบ๊อะเนอ, แกแย เด๊อ เพโครเนลิอัส นอแฮ ลู เต๊เห่เนอ, อา แฮ แด๊เฮอ แม๊ปู คูซีโมน อาหี่ เร๊อ อา แฮก๊อถ่อโอ่ เบ๊อะอาหี่เป๊เส่เง กู่ดาโมทือเนอ. 18เร๊อ เหย่ซี แด๊เฮอแถ่ เน๊อ, แกแย มุย เน๊อ คูซีโมน เปโตร เฮ๊เนอ เตเพร หม่า อา โอ่โต เบ๊อะเออ แอ? 19เบ๊อะคูเปโตร โอ่เตเนปา เตแม๊เถอะลว๊า เออ เบ๊อะเนอ, แหย่โยบูโพ๊แบ่เจ่ เฮ๊ ลู เน๊อ, “คูซีโมน! แกแย แฮแม๊ปู เน ซิโซ. 20ฮู๊เนอ อาขว่าอาคยา, กี๊ตามอ เด๊อ หี่เล เนอ, เมคอเมยอ แต่เหม่, ตูรู๊ ครวาจว๊าเกอ เหย่ซี เนอเต๊เห่ อาคยาเนอ, เมเตเฮ๊เรอ แว นอแฮแหน่ เหย่ซี เด๊อ เนโอ่.” 21ฮู๊เนอเรอ คูเปโตร แก๊ตา เด๊อ หี่เล เร๊อ อา เฮ๊ เหย่ซี เน๊อ, “แว หม่า แกแย เด๊อ ซี จว๊า แม๊ปู อา เนอเตเพร เฮ๊อ. ซี แฮแม๊ปู แว เมเต?”

22เร๊อ เหย่ซี เฮ๊ฉื่อ เน๊อ, “เกลอฮู๊ทวาดุ เพโครเนลิอัส นอแฮ เป. อา หม่า แกแยจ๊อแกแยเต เตเพร, โท๊โต่ แกแย เด๊อ อา เบ่หยื่อเบ่แหน่เกอ จอแปแหร่ เตเพร. แกแยยิวพู๊ เต๊เห่ เบ่หยื่อแหน่หนิ ลอปลี เจ๊อ ลู ปว๋า เตเพร เจ๊อ. แซ่ฮู๊ อา เก่ หนิโฮน๊อ เกอ เน เตเฮ๊เบ่อี๊โช เต๊เห่เนอ เร๊อ, จอแปแหร่ อา เตเน่วม๊อขุพู๊ แฮ เฮ๊ ลู เร๊อ เบ่ จว๊า เอ๊แฮ เน เด๊อ อาหี่.” 23เร๊อ คูเปโตร เอ๊ โอ่เมอฉื่อ เหย่ซี.

โทเรอ ปาโร เตอเนอเนอ, คูเปโตร ตี๊หรี่แตแร อาเหน่ เร๊อ อา ครวาจว๊าเกอ เหย่ซี. เพรหยื่อเอ่แหน่เอ่ เด๊อ อา โอ่ เด๊อ วียัฟฟา อากู เต๊เห่ ครวาจว๊าเกอ ลู. 24เร๊อ เด๊อคยา เตอเนอเนอ เหย่ซี จว๊าโต่ เด๊อ วีเก่ซารียา เบ๊อะเพโครเนลิอัส เอ๊โอ่ปล๊อ เกอเร๊อ อาโป่แหว่ ต๊อต่อ เต๊เห่ เร๊อ อาซว๊าอาโค เต๊เห่ อาเหล่โอ่, เร๊อ เหย่ซี เบ๊อะเนอเต๊เห่ โอ่ป่อแม๊ชือ หนิ แลแค คูเปโตร. 25เบ๊อะคูเปโตร เตเร โน เด๊อ หี่ด๊อกู เบ๊อะเนอ, เพโครเนลิอัส เอ๊โมฉื่อ ลู เร๊อ อา แด๊งือแล งอตา เด๊อ ลู กู๊โด่ช๊า เร๊อ อา จ๊อเบแถ่ ลู. 26หม่าแน๊เรอ คูเปโตร นอก๊อถ่อคยา อา เร๊อ อา เฮ๊ ลู เน๊อ, “ก๊อถ่อม๋อ แว หม่า แกแยเห่ขุพู๊ แซ่เน๊อ เน แพ๊.”

27เบ๊อะคูเปโตร เร๊อ เพโครเนลิอัส เฮ๊เบ่ เร๊อโน เด๊อ หี่ด๊อกู เบ๊อะเนอ, อา แม๊เถอะ แกแย แฮโอ่ปลู่โอ่เผ่, โอ่ปล๊อหนื่ออื่อ แลแค เบ๊อะเนอ. 28คูเปโตร เฮ๊ เหย่ซี เน๊อ, “ซี ซิเง ดื่อเฮ๊อ, เป แกแยยิวพู๊ อา เตซว๊าเตแส่โอ่เร๊อ แกแยยิวพู๊ เตเพร เตเร จว๊าแบ๊ซว๊าเค๊โค เต่อเร๊อ แกแยยิวพู๊ หม่าโต่ เต๊เห่ เบ่เบ่, อา เตเร จว๊าโอ่เลโอ่ เกอ แพ๊ เหย่ซี เบ่เบ่, อาหนิ โต่. หม่าแน๊เรอ จอแปแหร่ เด๊อะโลเฮ๊อ แว เร๊อ แกแยยิวพู๊ หม่าโต่ เต๊เห่ เนอหม่า, อา โพ๊แปละอาโพ๊อาแปละ เกออู โต่, หม่าโต่เรอ อา บูโพ๊ เกออู โต่ เฮ๊ แต่ แลแค แต่เหม่. เป โตเบ่ แบ๊ซว๊า ลอปลี เหย่ซี, จอแปแหร่ เด๊อะโล แว ฮู๊เนอ. 29ฮู๊เนอ อาขว่าอาคยา, เบ๊อะเน เอ๊แฮ แว เบ๊อะเนอ, แว เฮ๊ฉื่อ ปา เตอเจ๋อ โต่, แว แฮ โต๊โพ๊แฮ แพ๊. ฮู๊เนอเรอ กู๊แหน่เออ แว ซิหยื่อ แด๊เฮอ เน เนอ, เน เอ๊แฮ แว เมเต?” เนอแพ๊.

30เร๊อ เพโครเนลิอัส เฮ๊ เป่ ลู เน๊อ, “เบ๊อะอา ตาลว๊าแก โซเซ เหมาะเฮ๊แล โซมือ อาแซ่เน๊อ กู๊แหน่เค เออเนอเฮ๊อ, แว กุยจ๊อเบ เต. เบ๊อะเนอโตโพ๊, แกแย กือแซ๊หนิ เห่อจา เตเคแปล๊ลีซิ เตเพร แฮก๊อถ่อโอ่ คย๊า เด๊อ แว เป๊เส่เง. 31เร๊อ อา เฮ๊ แว เน๊อ, ‘เพโครเนลิอัส จอแปแหร่ หนิโฮเฮ๊อ เน เตกุยจ๊อเบ เฮ๊อ อา ซิเงแถ่เบ่ โต่ เฮ๊อเน เด๊อเน เมจว่า เป่ แกแย โซพ๊าโซแรพู๊ เนอเต๊เห่ เฮ๊อ. 32นอจว๊ามอ แกแย เต๊เห่ เร๊อ นอจว๊าเอ๊ เหย่ซี เร๊อ แกแย เตเพร เด๊อ อามุย เร๊อ คูซีโมน เปโตร เด๊อ อา โอ่ เด๊อ วียัฟฟา เนอเตเพร กู๊แหน่เร๊อ อา จว๊า โอ่โก๊เกอ เด๊อ อามุย คูซีโมน อาหี่ เฮ๊อ. คูซีโมน เออเนอหมา อาหี่ โอ่ เด๊อ เทอดูซาวาทือ, อา หม่า เพรเมพ๊า เตเพร’ 33ฮู๊เนอเรอ แว นอจว๊าเอ๊ อู เร๊อ เน โตโพ๊โต เจ๊อ, เน แฮเต่อเกอ เป เร๊อ อาแร๊ แหน่เจ๊อ. แซ่ฮู๊ เป เก่ หนิโฮน๊อ เกอลอ จอแปแหร่ แด๊โฉ่ตา โทเฮ๊อ เน เนอเต๊เห่ เร๊อ กู๊แหน่เออ เป แฮ ลอปลี เด๊อ จอแปแหร่ อา เป๊เส่เงเฮ๊อ.”

คูเปโตร อา เตแด๊โฉ่โด่แน

34คูเปโตร เป๊อแถ่ เฮ๊เบ่ เน๊อ, “กู๊แหน่เรอ แว ซิเง เร๊อ จอแปแหร่ แม๊ดุแม๊ปีตี๊ อู เตเพร่ว โต่ เนอหม่า อา หม่าแหน่ เจ๊อ. ^a 35แกแย เมวเจอะ อิเตเต๋ เบ่เบ่, เก่ อา แด่หยื่อแด่แหน่ จอแปแหร่ เร๊อ อา เก่ เมโตเมเบ่เตเฮ๊เนอหม่า จอแปแหร่ เอ๊โมฉื่อ เหย่ซี แพ๊. 36ซี ซิเง โทดื่อ เฮ๊อ เตหรี่เตแก เด๊อ จอแปแหร่ นอจว๊า เป่ เหย่ซู่ เด๊อ อิสราเอล อากลุยอาแล เต๊เห่ อาเง เร๊อ อา จว๊า แด๊โฉ่โล เป่ เหย่ซี เร๊อ เตซิครือซิลอมีลา อาหรี่อาแก เออเนอ เฮ๊อ. เด๊อ เหย่ซู่ครี๊ เด๊อ อา ทวา อู ปว๋า เตเพร อา แบ่เจ่ เออเตเพร อาขว่าอาคยาเร๊อ, เป พย๊าหนิเฮ๊อ เตเปเตดวา เฮ๊อ. 37เด๊อ ยูดาห์เก่ เต๊เก่เล อากูเนอ, แบ่เจ่ เหย่ซู่ เมโทเฮ๊อ แคร๋ หม่าอิเต เนอหม่า ซี ซิเง ดื่อ เฮ๊อ. เบ๊อะคูยอห์น แด๊โฉ่โด่แน โทเป่เฮ๊อ อู เร๊อ เจเทอ อาหรี่อาแก เบ๊อะเนอ, เหย่ซู่ เป๊อแถ่ เตเม เด๊อ กาลิลี เก่กู. 38โทเรอ จอแปแหร่ นว๊าแถ่ วีนาซาเร็ธพู๊ เหย่ซู่ เร๊อ อา เด๊อะ ลู แหย่โยบูโพ๊แบ่เจ่ เร๊อ อา เตโพรเตเตอเรออาฉว่าชอ ฮู๊เต เนอ, ซี ซิเง โทดื่อเฮ๊อ. เหย่ซู่ เลจว๊า เด๊อ เหล่โอ่ ปว๋า โต๊โผ่ เร๊อ จว๊า เมบุ๊ยเมเตอเรอ เป่ อู, แหย่โอ่เหม่ลอ แกแย โอ่ เด๊อ โลเน๊โลหน่า กู่กล๊อ เมนือเมจ๊า ลู เต๊เห่, เมเตเฮ๊เรอ จอแปแหร่ โอ่เกอ เน๊อ อา อาขว่าอาคยา, อา เมเฮ๊อ เต ฮู๊เนอ เฮ๊อ.

39“เป หม่า แกแย เต๊เห่ เด๊อ อา ข่าเฮ๊โล เป่ ลอ อู เร๊อ ล๋อ เหย่ซู่ เมโทเฮ๊อ เต เด๊อ แกแยยิวพู๊ เต๊เห่ โอ่ เกอเร๊อ เก่ เต๊เห่, เร๊อ วีเยรูซาเล็ม อากู เออเนอเต๊เห่ อาหรี่อาแก แพ๊. โทเรอ เหย่ซี มือเซอแถ่แก เหย่ซู่ เด๊อ เด๊ออี๊ถื่อดีเต่ลู อาลู 40หม่าแน๊เรอ เบ๊อะโซเซ เตเซเนอ, จอแปแหร่ เมเซอเพร ก๊อถ่อกาคยา คยาแซ๊ ลู เด๊อ เตเซอ เร๊อ อา เด๊อะโล คยาแซ๊ อู. 41อา โอ่โลแถ่ เป่ อู ปว๋า เตเพร หม่าโต่. อา โอ่โล แถ่ เป่ ตื๊อแพ๊ จอแปแหร่ นว๊าแถ่เฮ๊อ เป เด๊อ เป เก่ ทวาแถ่ เพรข่าเฮ๊โล เออเต๊เห่ เนอแพ๊. อา เซอ ก๊อถ่อ กาคยา โทเฮ๊อ เบ๊อะเนอ, เป เออเต๊เห่เนอ, เป เอ่โหร่โอโหร่ เต่อเกอ โทเฮ๊อ เร๊อ ลู เฮ๊อ. 42เร๊อ อา เฮ๊แก โป่ เป เร๊อ เป เก่ จว๊า แด๊โฉ่โด่แน เป่ อู เร๊อ เตซิครือซิลอมีลา, โทเรอ เป เก่ จว๊า ข่าเฮ๊โล เป่ อู เร๊อ อา หม่า แกแย เตเพร เด๊อ จอแปแหร่ นว๊าแถ่ ลู เร๊อ อา หม่า อา เก่ ทวา เป่แกแย เซอเพร เต๊เห่ เร๊อ แกแยเซอ เต๊เห่ อา เพร เมจากาคยา ปา. 43เพรโพร ปว๋า เตเพร แด๊โฉ่โด่แน หนื่ออื่อ โทเฮ๊อ อา อาหรี่อาแก เร๊อ เหย่ซี เฮ๊ เน๊อ, ‘ล๋อ แกแย เด๊อ อา หยื่อเอ่แลแค ลู เต๊เห่เนอ จอแปแหร่ เก่ ปลวาแก แฮเง เหย่ซี เตซื๊อ เร๊อ เหย่ซู่ อาคยา ปา,’” คูเปโตร เฮ๊ เป่ เหย่ซี ฮู๊เนอ.

แกแยยิวพู๊ หม่าโต่ เต๊เห่ พย๊าหนิ แหย่โยบูโพ๊แบ่เจ่.

44เบ๊อะคูเปโตร เฮ๊เบ่ ปาแพ๊ เบ๊อะเนอ, แหย่โยบูโพ๊แบ่เจ่ ตาแล เด๊อ แกแย เด๊อ อา หนิดา เตหรี่เตแก เออเต๊เห่ อาลู ปว๋า เตเพร. 45จอแปแหร่ จว๊า เด๊อะแล โต่เกอ แหย่โยบูโพ๊แบ่เจ่ เด๊อ แกแยยิวพู๊ หม่าโต่ เออเต๊เห่ อาลู อาขว่าอาคยา, แกแยยิวพู๊ เด๊อ อา หยื่อเอ่แลแค เฮ๊อ เต เร๊อ อา โอ่ แลแค เด๊อ วียัฟฟา อากู เร๊อ อา จว๊า เต่อโร๊ เร๊อ คูเปโตร เออเต๊เห่เนอ อา คย๊ายื๊อ แหน่เจ๊อ. 46เมเตเฮ๊เรอ เหย่ซี หนิโฮ ดื่อ แกแย เออเต๊เห่ เฮ๊เบ่ เร๊อ โหง่โค๊ตีกลี๊ เต๊เห่ อาขว่าอาคยา, เหย่ซี ถู่เซ๊แถ่ แลแค จอแปแหร่.

โทเรอ คูเปโตร เฮ๊ เน๊อ, 47“แกแย เออเต๊เห่ พย๊าหนิเกอ แหย่โยบูโพ๊แบ่เจ่ ฮู๊ เป พย๊าหนิ โทเฮ๊อ เออเนอเฮ๊อ. เมฮู๊เนอเรอ เหย่ซี เก่ เจ อาเหน่ เร๊อ เทอ อาเงเนอ หม่าอูเป เตเพร เก่ เมตาตือแจ่ เหย่ซี เป.” 48ฮู๊เนอ อาขว่าอาคยา, คูเปโตร เฮ๊เบ่ ตาโหง่ เร๊อ เหย่ซี เก่ เจ อาเหน่ เร๊อ เทอ เด๊อ เหย่ซู่ อามุย อากู. เร๊อ เหย่ซี กุยซิยอ คูเปโตร เร๊อ โอ่เต่อ เกอโป่ เร๊อ เหย่ซี เบ๊อะเนอ เนอโซเซ.