Acts 11

คูเปโตร แด่โฉ่โลแถ่คยา เตหรี่เตแก เด๊อ เยรูซาเล็ม เพรหยื่อเอ่ตู๊หมู่ตอกล๊อ อา โอ่

1เพรโด่แนพู๊ เต๊เห่ เร๊อ เพรหยื่อพู๊ เด๊อ อา โอ่ เด๊อ ยูดาห์เก่ ปว๊า โต๊โผ่ เต๊เห่เนอ, อา หนิโฮ เร๊อ แกแยยิวพู๊ หม่าโต่ เต๊เห่ พย๊าหนิ เกอเฮ๊อ จอแปแหร่ อาลาอาโหง่. 2ฮู๊เนอเรอ เบ๊อะคูเปโตร จว๊า เด๊อ วีเยรูซาเล็ม เบ๊อะเนอ, เพรหยื่อเอ่พู๊ เด๊อ อา ดื๊อตีลี๊พ๊า เต๊เห่เนอ, อา แด่ เตซื๊อ เด๊อ ลูขุ. 3เร๊อ เหย่ซี เฮ๊ คูเปโตร เน๊อ, “เน จว๊าโอ่เล โต่เกอ แกแยยิวพู๊ หม่าโต่ เด๊อ อา ดื๊อตีลี๊ เกออา พ๊า โต่ เต๊เห่ อาหี่ เร๊อ เน จว๊าเอ่จว๊าโอ เต่อเกอ โต่ เร๊อ เหย่ซี.”

4เร๊อ คูเปโตร เฮ๊โฉ่โลโปล ลอ เหย่ซี เตหรี่เตแก เด๊อ อา ทวาแถ่ ลู่ เด๊อ อาแกช๊า โต่เด๊อ อาตื๊อดื่อ เนอเต๊เห่ ปว๋าเต๊อเจ่อ. 5เร๊อ อา เฮ๊โฉ่โลโปล เป่ เหย่ซี เน๊อ, “เบ๊อะแว โอ่ เด๊อ วียัฟฟา เร๊อ แว กุยจ๊อเบ เบ๊อะเนอ, แว แม๊เถอะลว๊า เตเต๊อเจ่อ. แว เตแม๊เถอะลว๊า เออเนอ, อา โอ่ เด๊อ ม๊อขุ เร๊อ อา แจตา เป่ แว แซ่เน๊อ อิเกดุ เด๊อ อาเหนาะ โอ่ ลุยเหนาะ ต๊าบ่าเนอ. โทเร๊อ อา แจตา ผื่อต๊อต่อ เบ๊อะแว อาช๊า. 6แว แม๊โน ตาเต เด๊อ อิเกดุ เอออากูเนอ เร๊อ แว แม๊เถอะ เตมีเตดอ เด๊อ อากู๊โด่ โอ่ ลุยโค๊ เต๊เห่, เตมีเตแหม่ เต๊เห่ เน๊อ เตมีเตดอ เด๊อ อาบ๊าจว๊า เต๊เห่ เร๊อ ถู่พู๊ เด๊อ อา โย เด๊อ ม๊อเล เต๊เห่. 7เออโตโพ๊เรอ แว หนิโฮ โหง่พราแถ่ เร๊อ อา เฮ๊ แว เน๊อ, ‘คูเปโตร, ก๊อถ่อ มือเซอเอ่แก มอ เตเออเนอเต๊เห่.’ 8หม่าแน๊เร๊อ แว เฮ๊ฉื่อ เน๊อ, ‘แบ่เจ๋, แว เอ๋ เจ๊อแหน่ ตีกี๋ โต่. เต เด๊อ อู แด่ อา เร๊อ อา บูโพ๊ โต่ เต๊เห่ เร๊อ อา โพ๊แปละอาโพ๊อาแปละ โต่ เต๊เห่เนอ, แว เอ่น๊อ เจ๊อ โตโพ๋ โต่.’ 9เร๊อ โหง่พราแถ่ เด๊อ ม๊อขุ เออเนอ เฮ๊ โป่ เน๊อ, ‘จอแปแหร่ ดาเฮ๊ เร๊อ อา โพ๊แปละอาโพ๊อาแปละ เฮ๊เนอหม่า, อา บูโพ๊ โต่, เบ่ เตเน หนิ โต่.’ 10เร๊อ อา โลโกตา บา โซโพ๊ เร๊อ เด๊ออาโน่เล๊อ โตโพ๊เนอ, อา พย๊าแถ่ ดว้าแก อา เด๊อ ม๊อขุ. 11อู พย๊าแถ่แกแก เร๊อ โตโพ๊เรอ แกแย วีเก่ซารียาพู๊ ซิโซ เด๊อ อู นอแฮ เหย่ซี เออเต๊เห่เนอ, โล๋, อา แฮโต่ เบ๊อะเป เหล่จว๊าโอ่โก๊หนิ หี่ เนอเตเม. 12เออโตโพ๊เรอ แหย่โยบูโพ๊แบ่เจ่ เฮ๊ แว เน๊อ เมคอเมยอ แต่เหม่, ครวาจว๊า เหล่เกอมอ เหย่ซีเนอ. เร๊อ โป่แหว่ เด๊อ วียัฟฟา อาโอเพรโซซว๊า เออ ครวาจว๊าเกอ เร๊อ แว โต่เด๊อ วีเก่ซารียา เร๊อ เป โนเกอ เด๊อ เพโครเนลิอัส อาหี่กู ปว๋า เตเพร. 13เพโครเนลิอัส แด๊โฉ่ เป่ เป เร๊อ อา แม๊เถอะ เตเน่วม๊อขุพู๊ เตเพร แฮก๊อถ่อโอ่ เด๊อ อา หี่ด๊อกู อาหรี่อาแก เร๊อ อา เฮ๊ ลู เน๊อ, ‘นอจว๊า แกแย เตเพร เด๊อ วียัฟฟา เร๊อ นอจว๊าเอ๊แฮ แกแยมูย เร๊อ คูซีโมน เด๊อ อู เอ๊ ป่า ลูมูย เร๊อ คูเปโตร เนอเตเพร. 14อา เก่ เฮ๊เบ่เน เต๊อ เจ่อ ปา เร๊อ เด๊อ อา เฮ๊เบ่ ซี อาขว่าอาคยา, เน เร๊อ เน หี่พู๊แพพู๊ ล๋อ ปลี เก่ พย๊าหนิ เตเมแลเปล๊กา ปา.’ 15เร๊อ เบ๊อะแว เป๊อแถ่ เฮ๊เบ่เต เบ๊อะเนอ, แหย่โยบูโพ๊แบ่เจ่ แฮแล เด๊อ เหย่ซี อาลู ฮู๊ อา แฮแล โทเฮ๊อ เด๊อ เปโอ่ เด๊อ กูลู่เค เนอโต๊โผะ เนอเฮ๊อ. 16เออโตโพ๊เรอ แว ซิเงแถ่เบ่ โต่ เตเฮ๊เบ่ เด๊อ แบ่เจ่ เฮ๊แก เน๊อ, ‘คูยอห์น เจ ซี เร๊อ เทอ ตื๊อดื่อเรอ อู เก่ เจ ซี เร๊อ แหย่โยบูโพ๊แบ่เจ่ ปา เนอตือมือ.’ ^a 17เมฮู๊เนอเรอ เป หยื่อเอ่ แบ่เจ่ เหย่ซู่ครี๊ เร๊อ จอแปแหร่ เด๊อะ เป เชหยู่, ฮู๊เนอเฮ๊อ แกแยยิวพู๊ หม่าโต่ เด๊อ อา หยื่อเอ่ แซ่เกอเร๊อ เป เออเต๊เห่เนอ, จอแปแหร่ อา เก่ เด๊อะ แซ่เกอ เหย่ซี เชหยู่ ฮู๊ อา เด๊อ โทเฮ๊อ เปเนอ เก่เฮ๊เรอ แว หม่า แกแย เตเพร เด๊อ อา เมตาตือ จอแปแหร่ อาแกล๊อาโกล เตเพร แอ? คูเปโตร เฮ๊ เป่ เหย่ซี ฮู๊เนอ.” 18เบ๊อะเหย่ซี หนิโฮ เตหรี่เตแก เออ เบ๊อะเนอ, เหย่ซี เป๊อเจ่ออิแช๊ ปา คูเปโตรโต่, เร๊อ อา ถู่เซ๊แถ่ แลแค จอแปแหร่ เน๊อ, “เก่ อา หม่าแหน่ ฮู๊เนอเฮ๊เรอ จอแปแหร่ เด๊อะเป่เกอเฮ๊อ แกแยยิวพู๊ หม่าโต่ เต๊เห่ เตค๊าขิโตแร๊ เด๊อ อา เก่ ถู่แหล่ เต๊เปล่กา แลแค อาซิปล่อ เร๊อ อา เก่ พย๊าหนิ เกอ แลแค แหย่โยบูโพ๊เซอเพร เฮ๊อ.”

เพรหยื่อเอ่ตู๊หมู่ตอกล๊อ เด๊อ วีอันทิโอก

19เด๊อ อู เมเซอ คูสเทเฟน อาขว่าอาคยา, เป๊อแถ่ เบ๊อะเนอเรอ อู เมจาเมจือ แกแย เด๊อ อา หยื่อเอ่แลแค เหย่ซู่ เต๊เห่ ฮู๊เนอเรอ เหย่ซี ลูโพร๊ลูแพร จว๊า ลอปลี. เต๊เห่เห่เนอ อา จว๊าโต่ เด๊อ ฟีนิเซียเก่, ไซปรัสกลื๊อขุ เร๊อ วีอันทิโอก. เหย่ซี แด๊โฉ่โด่แน เป่ ตื๊อแพ๊ แกแยยิวพู๊ ซี เต๊เห่เนอ เร๊อ จอแปแหร่ อาลาอาโหง่ แพ๊. ^b 20หม่าแน๊เรอ ไซปรัสกลื๊อขุ แกแยไซริน เร๊อ วีอันทิโอก เด๊อ อา หยื่อเอ่แหน่หยื่อรี อาเกล เต๊เห่เห่เนอ, อา จว๊าโต่ เด๊อ วีอันทิโอก เร๊อ อา แด๊โฉ่โด่แน เป่ เมวเจอะโร กรีกพู๊ เต๊เห่ เร๊อ เหย่ซู่ครี๊ อา เตซิครือซิลอมีลา อาหรี่อาแก. 21เร๊อ จอแปแหร่ อา เตโพรเตเตอเรออาฉว่าชอ โอ่ เร๊อ เหย่ซี อาขว่าอาคยา, แกแย หยื่อเอ่ ปลูเผ่ เร๊อ อาซิปล่อ ถู่แหล่ กาโต แลแค เด๊อ แบ่เจ่ โอ่.

22เตหรี่เตแก เออ โลจว๊าโต่ เด๊อ วีเยรูซาเล็ม เพรหยื่อเอ่ตู๊หมู่ตอกล๊อ อา โอ่ อาขว่าอาคยา, เหย่ซี ซูจว๊า คูบารนาบัส เด๊อ วีอันทิโอก. 23เร๊อ เบ๊อะอา จว๊าโต่ เนอ, อา จว๊าแม๊เถอะ เร๊อ แกแย เออเต๊เห่ พย๊าหนิ จอแปแหร่ อาบุ๊ยอาเตอเรอ อาขว่าอาคยา, อา ซิครือซิลอ แหน่เจ๊อ เร๊อ แซ่ฮู๊ เหย่ซี เก่ โอ่เซอเพร เจ๊อ เป่แฮ ตื๊อดื่อ เน๊อ แบ่เจ่ เร๊อ, อา เด๊อะอ๊าเด๊อะเหร่ แฉ่โคร เกอโป่ เหย่ซี อาคยา. 24คูบารนาบัส หม่า แกแย เด๊อ อาแร๊ เร๊อ อา เล๊อบา เร๊อ แหย่โยบูโพ๊แบ่เจ่ เตเพร. เร๊อ อา หม่า แกแย เด๊อ อา เตหยื่อเตแหน่ ชอ เตเพร. เร๊อ อา เมจว่า เอ๊ เป่ลา อู เร๊อ อู หยื่อเอ่แลแค เอ๊ลา แบ่เจ่.

25ฮู๊เนอโทเรอ เด๊อคยาเนอ, คูบารนาบัส จว๊าแม๊ปู คูเซาโล เด๊อ วีทาร์ซัส อากู. 26เบ๊อะอา แม๊เถอะ ลู เบ๊อะเนอ, อา เอ๊กาหนิ ลู เด๊อ วีอันทิโอก. เร๊อ เหย่ซี เออซิเนอ กาโอ่กู๊ แม๊เถอะ ตาฉื่อ เร๊อ เพรหยื่อเอ่ ตู๊หมู่ตอกล๊อ เบ๊อะเนอ เต๊เห่ ต๊าน๋า กู เจ๊อ. เร๊อ อา อิซว๊าอี๊แส่ ตา หนิเอ๊ เป่ลา แกแย โอ่เบ๊อะเนอ เต๊เห่. อู เอ๊ เหร่อเล๊อ เพรหยื่อเอ่ เต๊เห่ เร๊อ ครี๊พู๊ หม่า เบ๊อะวีอันทิโอก เออเนอ เฮ๊อ.

27เบ๊อะเนอเค, เพรโพร เต๊เห่ โอ่ เด๊อ วีเยรูซาเล็ม เร๊อ อา แฮ เด๊อ วีอันทิโอก. 28เด๊อ เหย่ซี อาเกลเนอ อามุย เร๊อ คูอากาบัส โอ่เตเพร. เด๊อ แหย่โยบูโพ๊แบ่เจ่ อา เตโพรเตเตอเรออาฉว่าชอ อาขว่าอาคยา, อา ก๊อถ่อ เร๊อ อา เฮ๊โพร หนื่ออื่อ โหง่ เร๊อ เตโอ่วีโอ่กอ จาจือ เก่ โอ่แถ่ เด๊อ เห่ขุต๊าบ่า ลอ ปา. (เออเนอหมา อา ทวาแถ่ เบ๊อะคูครวาดิอัส ทวา จ๊อแผ่ เบ๊อะเนอ.) ^c 29เพรหยื่อเอ่ ปว๋า เตเพร แด่แล แลแค อาซิปล่อ เร๊อ อา เก่ ซูจว๊า เป่ เกอ เตเมจว่า บ๋า เหย่ซี เด๊อะเบ๊ เนอ, เด๊อ เหย่ซี โป่แหว่ โอ่ เด๊อ ยูดาห์เก่กู เนอเต๊เห่. 30ฮู๊เนอเรอ อา ซู๊จว๊าหนิ รือเออ เร๊อ คูเซาโล เร๊อ คูบารนาบัส. คูเซาโล เน๊อ คูบารนาบัส พย๊าจว๊าหนิ รือเออ เร๊อ อา จว๊า เด๊อะตา แฮเง เด๊อ เพรหยื่อเอ่ตู๊หมู่ตอกล๊อ โหมะพรูโหมะเผระ เด๊อ อา ทวา ทวาดุทวาเต เต๊เห่ อา กู๊ยากู.