Act 14 | EkySCThai | STEP | ฮู๊ เหย่ซี เมโทเฮ๊อ เด๊อ วีอันทิโอก อากูเนอ, คูเปาโล เร๊อ คูบารนาบัส จว๊าโน เด๊อ แกแยยิวพู๊ เต๊เห่ เตจ๊อเบโฮกู เด๊อ อา โอ่ เด๊อ วีอิโคเนยูม อากู เนอเตเม. เร๊อ เหย่ซี เฮ๊เบ่อาโปลเพ๊ เป่ แร๊แหน่เจ๊อ อู เร๊อ แบ่เจ่ เหย่ซู่ อาหรี่อาแก อาขว่าอาคยา, แกแยยิวพู๊ เร๊อ แกแยยิวพู๊ หม่าโต่ เต๊เห่ หยื่อเอ่ เอ๊เกอ เหย่ซี โกโน๊ โต่.

Acts 14

1 ฮู๊ เหย่ซี เมโทเฮ๊อ เด๊อ วีอันทิโอก อากูเนอ, คูเปาโล เร๊อ คูบารนาบัส จว๊าโน เด๊อ แกแยยิวพู๊ เต๊เห่ เตจ๊อเบโฮกู เด๊อ อา โอ่ เด๊อ วีอิโคเนยูม อากู เนอเตเม. เร๊อ เหย่ซี เฮ๊เบ่อาโปลเพ๊ เป่ แร๊แหน่เจ๊อ อู เร๊อ แบ่เจ่ เหย่ซู่ อาหรี่อาแก อาขว่าอาคยา, แกแยยิวพู๊ เร๊อ แกแยยิวพู๊ หม่าโต่ เต๊เห่ หยื่อเอ่ เอ๊เกอ เหย่ซี โกโน๊ โต่. 2 หม่าแน๊เรอ แกแยยิวพู๊ เด๊อ อา หยื่อเอ่ เกออู โต่ เต๊เห่เนอ, อา นอฉว่านอชอ แฉ่ครวา แกแยยิวพู๊ หม่าโต่ เต๊เห่ เด๊อ อา เก่ เท๊แตแอฉื่อแก แกแย เด๊อ อา หยื่อเอ่แลแค เนอเต๊เห่. 3 เพรโด่แนพู๊ เต๊เห่ เออซิเนอ โอ่ งยา กู๊ลา เบ๊อะเนอ. เร๊อ เหย่ซี ซิเลแถ่หนิ แบ่เจ่ เหย่ซู่ เด๊อ อา เก่ เมจว่า เหย่ซี อาขว่าอาคยา, อา แด๊โฉ่โด่แน คือฮา บื่อ เป่ เจ๊อ อู. แบ่เจ่ เด๊อะ เหย่ซี เตเมแจ่ เตตาปา คย๊ายื๊อ ซีเต๊เห่ เร๊อ อาเมวโค๊ตีกลี๊ อา เตม๊าเตแด เออเต๊เห่ เนอหมา หม่าเฮ๊อ แบ่เจ่ ข่า เฮ๊ โล เน๊อ เตบุ๊ยเตเตอเรอ อาหรี่อาแก เด๊อ เพรโด่แนพู๊ เต๊เห่ แด๊โฉ่ เป่ อู เต๊เห่ เนอหม่า อา หม่าแหน่เฮ๊อ เนอแพ๊. 4 วีกู เบ๊อะเนอ เต๊เห่ ลูโพร๊ลูแพรแก เนอหมู่, ตู๊หมู่ เร๊อ อาโป๊เกอเร๊อ แกแยยิวพู๊, ตู๊หมู่ เร๊อ อาโป๊ เกอเร๊อ เพรโด่แนพู๊ เต๊เห่. 5 แกแยยิวพู๊ หม่าโต่ เต๊เห่ เร๊อ แกแยยิวพู๊ เต๊เห่ จว๊าโอ่เต่อเกอ เร๊อ เหย่ซี กู่กล๊อดุกู๊ฉู่ทู เร๊อ เฮ๊เบ่ ปลื๊อโทแก โหร่ลู โหง่ เน๊อ เก่ เมจาเมจือ เพรโด่แนพู๊ เต๊เห่ เร๊อ เก่ ต่า เหย่ซี เร๊อ หล่อ ปา. 6 เบ๊อะเพรโด่แนพู๊ เต๊เห่ ซิเงเฮ๊อ เร๊อ อู เตเน เครเมมู๊แหม่ เฮ๊อ เหย่ซี เบ๊อะเนอ, เหย่ซี เถ่แกล่ จว๊าแก เด๊อ วีลิสตรา เน๊อ วีเตอร์บี เด๊อ อา โอ่ เด๊อ ลิคาโอเนียเก่ อา เตเป๊ออาเล เนอเต๊เห่, เร๊อ เหล่โอ่ โอ่ตี๊วี๊ตาวา เบ๊อะเนอเต๊เห่. 7 เร๊อ เหย่ซี จว๊าเล แด๊โฉ่โด่แน เป่แฮ เป่ โป่ อู เตซิครือมีลา ตีวี๊ตาวา เบ๊อะเนอโต๊โผะ.

จว๊าเม แรเต เด๊อ วีลิสตรา เร๊อ วีเตอร์บี อากู

8 เบ๊อะวีลิสตรา อากูเนอ แกแย กู๊โด่ด๊า ตือรือ เด๊อ อา โหมะฮ๊อกู เร๊อ อา จว๊าแจ่โต่ โอ่ เตเพร. 9 – 10 อา โอ่แน หนิดา คูเปาโล แด๊โฉ่โด่แน เบ๊อะเนอ. คูเปาโล แม๊ตาต๊า ลู เร๊อ อา ซิเง เร๊อ อา โอ่ เร๊อ อา เตหยื่อเตแหน่ เด๊อ อา เมโอ่เหม่เบ๊ เป่ลู กู๊โด่ด๊าตือรือ อาขว่าอาคยา, อา เอ๊โทเฮ๊ ลู เน๊อ, “ก๊อถ่อมอ” เร๊อ แกแย กู๊โด่ด๊าตือรือ เออเตเพร ป่าก๊อถ่อ จว๊ากาจว๊าแฮ เบ๊อะเนอ.

11 เบ๊อะแกแย เบ๊หมู่ แม๊เถอะ คูเปาโล เมเตฮู๊เออ เบ๊อะเนอ, เหย่ซี เอ๊โท เฮ๊เบ่ ลู เน๊อ ลิคาโอเนียเก่พู๊ อาโหง่ เร๊อ อา เฮ๊ เน๊อ, “จอแปแหร่ เต๊เห่ กลว่าแฮแล อาเหน่ ฮู๊ แกแย เห่ขุพู๊ เด๊อ เปโอ่ เฮ๊อ.” 12 เหย่ซี อาเอ๊ คูบารนาบัส อามุย เร๊อ แบ่เจ่ “ซูส” โทเร๊อ อา เฮ๊ เกอลาติ คูเปาโล มุย เร๊อ แบ่เจ่ “เฮอร์เมส.” ^{▼▼แบ่เจ่ ซูส หม่า กรีกพู๊ เต๊เห่ อา จอแปแหร่ เด๊อ อาดุเล๊อ อู เตเพร. โทเรอ แบ่เจ่ เฮอร์เมส หม่า เพรซู เป่ จอแปแหร่ เต๊เห่ เตหรี่เตแก.} เมเตเฮ๊เรอ คูเปาโล ย๋อ เฮ๊เบ่ เอ๊เล๊อ เร๊อ อู อาขว่าอาคยาเร๊อ, อา อาเอ๊ ลู ฮู๊เนอ. 13 แบ่เจ่ ซูส อา เตหลู่แตโฮ เนอ, อา โอ่ เด๊อ วีกลอ เร๊อ แบ่เจ่ ซูส อา เพรหลู่แตเต เออเตเพรเนอ, อา เร๊อ แกแย เบ๊หมู่ เต๊เห่ ซิหยื่อ แฮ หลู่แตแถ่ เพรโด่แนพู๊ เต๊เห่ อาขว่าอาคยา, อา จุ่ยแฮหนิ ปู่เพ เต๊เห่ เร๊อ อา พย๊าแฮหนิ เตโพ เต๊เห่ เด๊อ เตหลู่แตโฮ กู่ดาทือ.

14 เบ๊อะคูบารนาบัส เร๊อ คูเปาโล หนิโฮ เด๊อ อู เตเร หลู่แตแถ่ เหย่ซี เบ๊อะเนอ, เหย่ซี ท๊อเย อาเห่อจา เร๊อ, เหย่ซี แกล่แฮโน เด๊อ แกแย เบ๊หมู่ เต๊เห่ อาเกล เร๊อ เหย่ซี เอ๊โท เฮ๊ แกแย เนอเต๊เห่ เน๊อ, 15 “ซี จว๊าเมฮู๊เออ เมเต? เป หม่า แกแย แซ่เน๊อ ซี แพ๊. เป แฮแด๊โฉ่ เป่ ซี เตซิครือมีลา อาหรี่อาแก แพ๊. เป ซิหยื่อ แด๊โฉ่โล เป่ ซี เร๊อ จ๊อเบปา แต่ แลแค เต เด๊อ อาโหง่แลช๊า โอ่โต่ เนอเต๊เห่ แต่เหม่. เป ซิหยื่อ นอจ๊อเบ ซี เร๊อ จอแปแหร่ เด๊อ อา เซอเพร เออเตเพร. อา หม่า จอแปแหร่ เด๊อ อา แบ๊แล ม๊อขุ, เห่ขุ, เทอดุซาวา เน๊อ เตโอ่ เด๊อ อากู เนอเต๊เห่ ล๋อ ปลี เตเพร. ^b 16 เด๊อ เนอเค หม่า จอแปแหร่ ปลวา ลออู ปวาเมวปวาเจ่อ เร๊อ จู๊ดื่อ อู ซิหยื่อ เมดื่อ อูเต ฮู๊เนอ. 17 หม่าแน๊เรอ จอแปแหร่ เด๊อะโลโทเฮ๊อ อู เน๊อ อา เตข่าเฮ๊โล ปว๋า โตโพ๊ เฮ๊อ. อา เตข่าเฮ๊โล เออเต๊เห่ หม่า อิเต เฮ๊เรอ อา เมเตแร๊ เต๊เห่ เด๊อ ซิเง อาขว่าอาคยา, เออหม่า หม่าเฮ๊อ อา เด๊อะโล เน๊อ อา โอ่ หม่าแหน่ เนอเฮ๊อ. อา นอเก๊จือตา เป่ ซี เก่, อา นอเส่เถ่โอ่ โตมู๊เนอมู๊เซ เป่ ซี โบ๊โฮดี เร๊อ ส่อเส่เหว่โพ เต๊เห่, อา เด๊อะตา เล๊อบา เป่ ซี เหล่เอ่เหล่โอ เร๊อ อา เม ซิครือซิลอ เป่ ซี ซิปล่อ.” 18 เพรโด่แนพู๊ เต๊เห่ เฮ๊ฉื่อ เจ๊อ เหย่ซี บ๊าเออ ตื๊อดื่อเรอ เหย่ซี เตเร เมตาตือฉื่อเบ๊ แกแย เบ๊หมู่ เด๊อ อา เตเร หลู่แตแถ่ เต เด๊อ เหย่ซี โอ่ เออเต๊เห่ เนอ อายู โต่.

19 โทเรอ แกแยยิวพู๊ เต๊เห่เนอ, อา โอ่ เด๊อ วีอันทิโอก เร๊อ เด๊อ วีอิโคเนยูม เร๊อ อา แฮ. แซ่ฮู๊ แกแย เบ๊หมู่ เออเต๊เห่ เก่ ซิโตโคแก คูเปาโล เร๊อ คูบารนาบัส, เร๊อ อา เก่ ซิปล่อ โอ่เกอ เหย่ซี ตากยา อาเงเนอ, อา จว๊าอิลอ แกแย เบ๊หมู่ เต๊เห่. โทเรอ เหย่ซี ต่าโทเฮ๊อ คูเปาโล เร๊อ หล่อ เร๊อ อา เตเน แลแค เน๊อ อา เซอเฮ๊อ เร๊อ เหย่ซี จุ่ยเถ่ วีแก แก ลู เด๊อ วีกลอ. 20 หม่าแน๊เรอ เบ๊อะเพรหยื่อเอ่ เต๊เห่ แฮโอ่ป่อตาวา แม๊ อา เบ๊อะเนอ, อา ก๊อถ่อ คยาแซ๊ เร๊อ อา กาโน คยาแซ๊ เด๊อ วีกู. เด๊อคยา เตอเนอเนอ, อา เร๊อ คูบารนาบัส เถ่จว๊า เด๊อ เดอร์บี.

คูเปาโล เร๊อ คูบารนาบัส กาคยา คยาแซ๊ เด๊อ เหย่ซี เพรหยื่อเอ่ตู๊หมู่ตอกล๊อ อากู

21 คูเปาโล เร๊อ คูบารนาบัส แด๊โฉ่โด่แน เป่ อู เร๊อ เตซิครือมีลา เบ๊อะวีเดอร์บี อากู เนอ, เร๊อ อู ทวาแถ่ โร๊ลู อา โคเจ่. โทเรอ เด๊อคยาเนอ, เหย่ซี กาคยา คยาแซ๊ เด๊อ วีลิสตรา เร๊อ วีอิโคเนยูม เร๊อ วีอันทิโอก เด๊อ อา โอ่ เด๊อ ปิสิเดีย เก่กูเนอ เต๊เห่. 22 แซ่ฮู๊ เพรหยื่อเอ่ เต๊เห่ เก่ โอ่หม่าโอ่กลอ เด๊อ อา เตหยื่อเตแหน่ อากู อาเงเนอ, คูเปาโล เร๊อ คูบารนาบัส เด๊อะอ๊าเด๊อะเหร่ แถ่หนิ เหย่ซี, โท๊โต่ ครอครวาเกอ เหย่ซีคยา. เหย่ซี อิซว๊าอี๊แส่ เป่ อู เน๊อ, “เป เตเร จว๊าโน ล๊อปลู๊เบ๊ โต่เด๊อ จอแปแหร่ อาเทออาเก่กู เออเนอหม่า, เป เบ่ จว๊าตาลว๊า เอ๊ลา เร๊อ เตแป่เตเช ซีเต๊เห่ เจ๊อ.” 23 เด๊อ เพรหยื่อเอ่ตู๊หมู่ตอกล๊อ ตู๊หมู่ เร๊อ ตู๊หมู่ อากูเนอ, คูเปาโล เร๊อ คูบารนาบัส นว๊าแถ่ เป่ เหย่ซี โหมะพรูโหมะเผระ เด๊อ อา เบ่ ทวา ทวาดุทวาเต เต๊เห่. เร๊อ อา กุยจ๊อเบ เป่ เหย่ซี, โทเรอ อา โด่เอ่ เหล่เอ่เหล่โอ, อา เมโท ฮู๊เนอเรอ อา เด๊อะตาแก แกแย เออเต๊เห่ เด๊อ แบ่เจ่ เด๊อ เหย่ซี หยื่อเอ่ เกอเร๊อ เออเตเพร อา กู๊ยากู. 24 เหย่ซี จว๊าลู๊ปลู๊ ตาลว๊าแก วีปิสิเดียเก่ เร๊อ เหย่ซี จว๊าโต่ เด๊อ ปัมฟีเลีย เก่กู. 25 เหย่ซี แด๊โฉ่โด่แน เป่โทเฮ๊อ อู เตซิครือมีลา เบ๊อะวีเปอร์กา อากูเนอ เร๊อ เหย่ซี จว๊า แฮเง โป่ เด๊อ วีอัททาลิยา.

26 เหย่ซี แถ่แด๊นี๋ ส่อเกลอดุ เบ๊อะวีอัททาลิยา เนอ เร๊อ กาคยา คยาแซ๊ แลแค เด๊อ วีอันทิโอก. วีอันทิโอก หม่า วี เด๊อ อา เด๊อะตา คูเปาโล เร๊อ คูบารนาบัส เด๊อ จอแปแหร่ อา กู๊ยากู เด๊อ อา เก่เก่แม๊ เก่ตู่หนิ เร๊อ เหย่ซี เด๊อ อา เตจว๊าเล โด่แน เร๊อ จอแปแหร่ อาลาอาโหง่ เออเนอ เฮ๊อ. เร๊อ เหย่ซี เมโทเฮ๊อ เตเอ่เตแร เออเต๊เห่ เฮ๊อ. 27 เบ๊อะเหย่ซี กาโต่ เด๊อ วีอันทิโอก เบ๊อะเนอ, เหย่ซี เอ๊ปล๊อ เพรหยื่อเอ่เต ตู๊หมู่ตอกล๊อ เต๊เห่ เร๊อ อา แด๊โฉ่โด่แน ลอ เหย่ซี เร๊อ ล๋อ จอแปแหร่ เมเต่อเกอเต เร๊อ เหย่ซี เนอเต๊เห่ เร๊อ แกแยยิวพู๊ หม่าโต่ เต๊เห่ เก่ หยื่อเอ่แลแค เกอ อาเง เนอ, จอแปแหร่ บ๊าโมแถ่ เป่ เหย่ซี กู่ดา. 28 เหย่ซี โอ่งยาเกอ แหน่เจ๊อ เร๊อ เพรหยื่อเอ่แหน่เอ่พู๊ ซีเต๊เห่ เบ๊อะเนอ.