Act 15 | EkySCThai | STEP | แกแย โอ่ เด๊อ ยูดาห์เก่กู เต๊เห่ แฮแล แลแค เด๊อ วีอันทิโอก เร๊อ แฮ อิซว๊าอี๊แส่ ตา เพรหยื่อเอ่แหน่เอ่พู๊ เต๊เห่ เน๊อ, “ซี เก่ ดื๊อตีลี๊ พ๊า ฮู๋ คูโมเสส อา เตซว๊าเตแส่ โอ่แก เนอโต่ เฮ๊หม่า ซี พย๊าหนิแจ่ เตเมแลเปล๊กา โต่.”

Acts 15

อู แด๊เฮอ คูโมเสส อา เตซว๊าเตแส่

1 แกแย โอ่ เด๊อ ยูดาห์เก่กู เต๊เห่ แฮแล แลแค เด๊อ วีอันทิโอก เร๊อ แฮ อิซว๊าอี๊แส่ ตา เพรหยื่อเอ่แหน่เอ่พู๊ เต๊เห่ เน๊อ, “ซี เก่ ดื๊อตีลี๊ พ๊า ฮู๋ คูโมเสส อา เตซว๊าเตแส่ โอ่แก เนอโต่ เฮ๊หม่า ซี พย๊าหนิแจ่ เตเมแลเปล๊กา โต่.” ^a 2 คูเปาโล เร๊อ คูบารนาบัส เคร๊แขะ ชอฉื่อ แหน่เจ๊อ แกแย เออเต๊เห่ เน๊อ เตหรี่เตแก เออเต๊อเจ่อ. ฮู๊เนอเรอ เด๊อ เตหรี่เตแก เออ อาขว่าอาคยา, อู นว๊าแถ่ คูเปาโล เร๊อ คูบารนาบัส เร๊อ แกแย โอ่ เด๊อ วีอันทิโอก อากู เต๊เห่, เร๊อ เหย่ซี โตเบ่ จว๊า แม๊เถอะฉื่อ เร๊อ เพรโด่แนพู๊ เต๊เห่ เร๊อ เพรหยื่อเอ่ตู๊หมู่ตอกล๊อ โหมะพรูโหมะเผร่ อา ทวาดุทวาเต เด๊อ วีเยรูซาเล็ม อากู เนอเต๊เห่. 3 ฮู๊เนอเรอ เพรหยื่อเอ่ ตู๊หมู่ตอกล๊อ เต๊เห่ ซูจว๊าเต่อ เหย่ซี เด๊อ วีเยรูซาเล็ม เร๊อ เบ๊อะเหย่ซี จว๊า ตาลว๊าปลู๊เบ๊ เฮ๊อ ฟีนิเซียเก่ เร๊อ สะมาเรียเก่ เบ๊อะเนอ, อู แด๊โฉ่โล เป่ เหย่ซี เร๊อ แกแยยิวพู๊ หม่าโต่ เต๊เห่ หยื่อเอ่แลแค เกอเฮ๊อ จอแปแหร่ ฮู๊เตเนอ อาหรี่อาแก อาขว่าอาคยา, เพรหยื่อเอ่ เต๊เห่ เหย่ซีซิครือซิลอ ลอปลี เจ๊อ ปว๋า เตเพร เจ๊อ. 4 เบ๊อะเหย่ซี จว๊าโต่ เด๊อ วีเยรูซาเล็ม เบ๊อะเนอ, เพรหยื่อเอ่ ตู๊หมู่ตอกล๊อ เต๊เห่ เร๊อ เพรโด่แนพู๊ เต๊เห่ เร๊อ เพรหยื่อเอ่ตู๊หมู่ตอกล๊อ โหมะพรูโหมะเผร่ เด๊อ อา ทวา ทวาดุทวาเต เต๊เห่ เอ๊โมฉื่อ เหย่ซี เร๊อ แด๊โฉ่ เป่ อู เร๊อ เตหรี่เตแก เด๊อ จอแปแหร่ เม แฮเง เต เด๊อ เหย่ซีกู เต๊เห่ อาหรี่อาแก.

5 หม่าแน๊เรอ ฟาริสี ตู๊หมู่ตอกล๊อ เด๊อ อา หยื่อเอ่แลแค เต อาเกล เต๊เห่ ก๊อถ่อ เฮ๊ เน๊อ, “แกแยยิวพู๊ หม่าโต่ เต๊เห่เนอ อา โตเบ่ ดื๊อตีลี๊ เกอ พ๊า, โทเรอ อู โตเบ่ เฮ๊ เต่อเป่เกอ เหย่ซี เร๊อ เหย่ซี โตเบ่ โครครวาเมเกอ คูโมเสส อา เตซว๊าเตแส่ เต๊เห่.”

6 เพรโด่แนพู๊ เต๊เห่ เร๊อ เพร เด๊อ อา ทวา เพรหยื่อเอ่ตู๊หมู่ตอกล๊อ โหมะพรูโหมะเผร่ ทวาดุทวาเต เต๊เห่เนอ, เหย่ซี โอ่ปล๊อเฮ๊เบ่ แคลู เร๊อ เหย่ซี เตเน โหร่แคลู เตหรี่เตแก เออเต๊อเจ่อ. 7 เหย่ซี เฮ๊เบ่โด่แน แคลู เร๊อ อางยา กู๊ลาเฮ๊อ เนอ คูเปโตร ก๊อถ่อ เฮ๊ เหย่ซี เน๊อ, “แว โป่แหว่ ซี๋, แซ่ฮู๊ แว เก่ แด๊โฉ่โด่แน เป่เกอ แกแยยิวพู๊ หม่าโต่ เต๊เห่ เร๊อ เตซิครือมีลา, โท๊โต่ แซ่ฮู๊ เหย่ซี เก่ หนิโฮ เกอ เร๊อ หยื่อเอ่แลแค เหย่ซู่ อาเงเนอ, จอแปแหร่ นว๊าแถ่ อางยาลาเฮ๊อ แว เด๊อ ซีเกล เนอหม่า ซี ซิเง ดื่อ เฮ๊อ. ^b 8 จอแปแหร่ หม่า อา แม๊เถอะ ซิเงลอ อู ปว๋า เตเพร อาซิปล่อ. เด๊อ อา เด๊อะ เป่ แกแยยิวพู๊ หม่าโต่ เต๊เห่ แหย่โยบูโพ๊แบ่เจ่ อาขว่าอาคยา, อา เด๊อะโล เฮ๊อ เร๊อ อา ซิปล่อโอ่เฮ๊อ เหย่ซี ฮู๊ อา เด๊อะ โทเฮ๊อ เป แหย่โยบูโพ๊ เนอ เฮ๊อ. ^c 9 จอแปแหร่ อา เตแม๊เถอะ เนอหม่า ฮู๊เตเฮ๊เรอ, แกแยยิวพู๊ เออเต๊เห่ เร๊อ แกแยยิวพู๊ หม่าโต่ เออเต๊เห่ เนอหม่า อาโค๊ เร๊อ ลู เตอเจ๋อ โต่. เด๊อ เหย่ซี หยื่อเอ่แลแค จอแปแหร่ อาขว่าอาคยา, อา ปลวาแก เหย่ซี เตซื๊อ เร๊อ อา เมโพ๊เมแปละเฮ๊อ เหย่ซี ซิปล่อ. 10 ฮู๊เนอเรอ, หม่าเมเต ซี จว๊าเม ซิปล่อดุ โต่ จอแปแหร่ เมเต? เตวี๊เตแย๊ เด๊อ เป เออเต๊เห่ เร๊อ เป โหมะเพเพอโพ เด๋อ งย๊าเค เต๊เห่ อาวี๊เป่โต่ เต๊เห่เนอ, ซี จว๊า ซิหยื่อ นอวี๊นอแย๊ โต่ เร๊อ แกแย เด๊อ อา หยื่อเอ่แลแค เตเออเต๊เห่ อาเหน่ลู เมเต? 11 จว๊าเม แลแคเตฮู๊เนอ แต่เหม่, เด๊อ แบ่เจ่ เหย่ซู่ อาบุ๊ยอาเตอเรอ อาขว่าอาคยา, เป พย๊าหนิ เตเมแลเปล๊กา แพ๊ เป หยื่อเอ่ ฮู๊เนอ. เหย่ซี๋ หม่า อา พย๊าหนิ แซ่เกอดื่อ เตเมแลเปล๊กา ฮู๊ เป พย๊าหนิ เนอเนอ แพ๊,” คูเปโตร เฮ๊ เหย่ซี ฮู๊เนอ.

12 เบ๊อะคูเปาโล เร๊อ คูบารนาบัส อาโอ่ เด๊อ แกแยยิวพู๊ หม่าโต่ เต๊เห่ อาเกล เบ๊อะเนอ, จอแปแหร่ เม เมป่าเหย่ซีซิเนอ เตโค๊ตีกลี๊คยา อา เตเมม๊าเมแด เร๊อ เตเม อาตาปา คย๊ายื๊อ เต๊เห่. เบ๊อะคูเปาโล เร๊อ คูบารนาบัส แด๊โฉ่โล เป่ แกแย แฮโอ่กู๊โอ่แก๊ เออเต๊เห่ เร๊อ เตหรี่เตแก เออ เบ๊อะเนอ, โส่โส๋ อา หนิดา แลแค เจ๊อ. 13 เบ๊อะเหย่ซี เฮ๊เบ่โท เบ๊อะเนอ, คูยากอบ เฮ๊ เน๊อ, “โป่แหว่ ซี๋, หนิดา แลแค แว แด๊โฉ่โล เป่ ซี, 14 คูซีโมน เปโตร เฮ๊โฉ่โปลโล โทเซ เป่ แพ๊ เป เร๊อ จอแปแหร่ เป๊อแถ่ เด๊อะโล เป่ เฮ๊อ อา เตแม๊เตตู่หนิ เออเนอ เด๊อ แกแยยิวพู๊ หม่าโต่ เต๊เห่ อา โอ่ เฮ๊อ. เมเตเฮ๊เร๊อ เด๊อ แกแยยิวพู๊ หม่าโต่ อาเกล เต๊เห่เห่เนอ, แซ่ฮู๊ อา เก่ ทวาแถ่ หนิเกอดื่อ จอแปแหร่ อาเต อาเงเนอเร๊อ, อา นอ หยื่อเอ่แลแค เฮ๊อ เหย่ซี เฮ๊อ. 15 เออ หม่า อา แซ่เจ๊อเฮ๊อ เร๊อ เพรโพร เต๊เห่ โด่แน หนื่ออื่อแก เนอ เจ๊อเฮ๊อ, เร๊อ ลีเทส่อพ๊ากู เฮ๊หนื่ออื่อ เน๊อ,

16 ‘เด๊อคยา ปาเนอ แว เก่ แฮ คยาแซ๊ ปา. แว เก่ แฮ เมแร๊ กาคยา คยาแซ๊ คูดาวิด อาหี่ เด๊อ อา ตาพรอแก เออเนอ ปา. แว เก่ แฮ ช๊อเซแถ่ เต๊เปล่ คยาแซ๊ อา แลตาพรอ ปย๊าแก เออเนอ ปา. ^d 17 แซ่ฮู๊ ล๋อ แกแยเห่ขุพู๊ เด๊อ อาโร เต๊เห่ ปว๋า เตเพร เร๊อ แกแยยิวพู๊ หม่าโต่ เต๊เห่ เด๊อ แว เอ๊ โทเฮ๊อ เหย่ซี เร๊อ แวมุย เด๊อ อา เก่ ทวาแถ่ หนิลอดื่อ แว เตเต๊เห่เนอ, อา เก่ แฮลอดื่อ เด๊อ แวโอ่ ปา. ^e 18 แบ่เจ่ เด๊อ อา เด๊อะซิเง งย๋า ลอเฮ๊อ แกแยเห่ขุพู๊ เน๊อ เตหรี่เตแก เออเต่อเจ๊อ เตเพรเนอ, อา เฮ๊แกดื่อ ฮู๊เนอ เฮ๊อ.’”

19 ฮู๊เนอ อาขว่าอาคยา, คูยากอบ เฮ๊เกอ โป่ เน๊อ, “แว เตแม๊เถอะ โอ่ เด๊อ แกแยยิวพู๊ หม่าโต่ เด๊อ อา ตีรี๊ กาคยาโต เด๊อ จอแปแหร่ อา โอ่ เต๊เห่เนอ, เป โตเบ่ เมดี๊แดหนิ เหย่ซี โต่. 20 เป โต รา เป่ เหย่ซี ลี, เร๊อ เป โต เฮ๊เต๊เปล๋ เหย่ซี เน๊อ เหล่เอ่ เด๊อ อู หลู่แตแถ่ อา เร๊อ แหย่โย เต๊เห่เนอ, อาโพ๊อาแปละโต่ อาขว่าอาคยา, เป โตเบ่ นอเอ่ เหย่ซี โต่. เป โตเบ่ นอจว๊าซื๊อหนิ เหย่ซี เร๊อ เพรเหมาะเพรคู โต่, ^f โทเร๊อ เป โตเบ่ นอเอ่หนิ เหย่ซี เร๊อ เตมีเตดอ เด๊อ อู จี่เซอ อา เนอเต๊เห่ โต่. ^g โทเร๊อ สุ่ย อิเตเต๋ เบ่เบ่เนอ, เป โตเบ่ นอเอ่หนิ เหย่ซี โต่. ^h 21 เมเตเฮ๊เรอ อู แด๊โลแถ่ คูโมเสส เตซว๊าเตแส่ เนอหม่า อางย๋า ลูเฮ๊อ. แกแยยิวพู๊ ม๊อเนอโด่ ปว๋า โผ่โผ๋ เนอ, อู แด๊แถ่ อา เด๊อ เตจ๊อเบโฮกู. อาลาอาโหง่ เออเต๊เห่เนอ, อู แด๊โฉ่โด่แน โล อา เด๊อ วีปว๊าตีวี อากู,” คูยากอบ เฮ๊ เหย่ซี ฮู๊เนอ.

อู ราจว๊า เป่ ลี เด๊อ แกแยยิวพู๊ หม่าโต่ เร๊อ อา หยื่อเอ่แลแค เหย่ซู่ เต๊เห่ อาโอ่

22 โทเรอ เพรโด่แนพู๊ เต๊เห่ เร๊อ โหมะพรูโหมะเผระ เด๊อ อา ทวา ทวาดุทวาเต เต๊เห่ เร๊อ เพรหยื่อเอ่ ตู๊หมู่ตอกล๊อ เนอ, เหย่ซี ซิปล่อโต เด๊อ อา เก่ นว๊าแถ่ แกแย เด๊อ เหย่ซีเกล เต๊เห่ เร๊อ นอจว๊าเต่อ เหย่ซี เร๊อ คูเปาโล เร๊อ คูบารนาบัส เด๊อ วีอันทิโอก. เหย่ซี นว๊าแถ่ แกแย เด๊อ เพรหยื่อเอ่ เต๊เห่ เบ่จูลาพย๊าโหง่ เกอเร๊อ แหน่เจ๊อ ลู เออซิเนอ เร๊อ อามุย เร๊อ คูสิลาส เร๊อ คูยูดาส คูยูดาส เออเนอ อู เอ๊โป๊ อามุย เร๊อ คูบารซับบาส. 23 เหย่ซี รา ลีเออ เร๊อ อา ราจว๊า เป่ เพรหยื่อเอ่ ตู๊หมู่ตอกล๊อ เด๊อ อา ทวา แกแยยิวพู๊ หม่าโต่ เต๊เห่, เร๊อ อา ซูจว๊า เร๊อ แกแย เออเต๊เห่. เร๊อ เหย่ซี รา แลแค เน๊อ,
เป เด๊อ อา หม่าดื่อ ซี โป่แหว่ เพรโด่แนพู๊ เต๊เห่ เออเต๊เห่ เร๊อ เพรหยื่อเอ่ตู๊หมู่ตอกล๊อ โหมะพรูโหมะเผร่ เด๊อ อา ทวา ทวาดุทวาเต เออเต๊เห่ ซูจว๊า เป่ ซี เตเฮ๊โมเฮ๊แร๊เต๊เห่,
เป ซูจว๊า เป่ ลอปลี ล๋อ เปโป่เปแหว่ หม่าเฮ๊อ แกแยยิวพู๊ หม่าโต่ เด๊อ อา โอ่ เด๊อ วีอันทิโอก, ซีเรียเก่ เน๊อ ซีลีเซียเก่ เออเต๊เห่ อากู เนอเต๊เห่ อาโอ่.
24 เป หนิโฮ เร๊อ แกแย เด๊อ เปเกล เต๊เห่ จว๊าโน เมดี๊แด ซี, โทเร๊อ เฮ๊กู่เฮ๊แก ลอ ซี, อู เฮ๊ ฮู๊เนอ หม่าแน๊เรอ เหย่ซี หม่า แกแย เด๊อ อา พย๊าหนิ เกอ เตอิซว๊าอี๊แส่ เด๊อ เปโอ่ เนอเต๊เห่ หม่าโต่. 25 ฮู๊เนอ อาขว่าอาคยา, เป โอ่กู๊ เฮ๊เบ่ คยาเฮ๊อลู เน๊อ เตหรี่เตแก เออ อาหรี่อาแก เร๊อ เป ซิปล่อโต คยาแซ๊ลู เร๊อ เป เก่ นว๊าแถ่ แกแย เด๊อ เปเกล เต๊เห่ เร๊อ เป เก่ นอแฮ เด๊อ ซี โอ่ ปา. เหย่ซี เก่ จว๊าโหร่เกอ เร๊อ เป โคแบ๊ซว๊า คูบารนาบัส เร๊อ คูเปาโล เด๊อ เป โม เกอเร๊อ แหน่เจ๊อ เออเนอ ซิเนอ ปา. 26 เหย่ซี หม่า แกแย เด๊อ อา เด๊อะแลบื่อ อาซิปล่อ เด๊อ แบ่เจ่ เหย่ซู่ครี๊ อาเง เต๊เห่. 27 ฮู๊เนอ อาขว่าอาคยา, แซ่ฮู๊ คูยูดาส เร๊อ คูสิลาส เก่ แฮ เฮ๊โฉ่โปล ตาเต เป่ โป่ ซี เน๊อ เป ราจว๊า เป่ ซี เตเนอเต๊เห่ อาเงเนอเร๊อ, เป นอแฮ เหย่ซี แพ๊. 28 แหย่โยบูโพ๊แบ่เจ่ เน๊อ ล๋อ เป เออเต๊เห่ ซิปล่อโต แคลู เร๊อ เตซว๊าเตแส่ เด๊อ อาโร เต๊เห่เนอ, เป ซิหยื่อ นอวี๊นอแย๊ ซี เตอเจ๋อ โต่. เป ซิหยื่อ นอลือครวาเม แพ๊ ซี เต เด๊อ อา โหล่ ครวาเม เนอเต๊เห่ แพ๊. 29 เตเด๊ออาโหล่ ครวาเม เต๊เห่ หม่า แคร๋ อิเตเฮ๊เร๊อ เหล่เอ่ เด๊อ อู หลู่แถ่ เร๊อ แหย่โย เต๊เห่เนอ, เอ่ แลแค แต่เหม่, เตสุ่ย เนอหม่า เอ่ หนิ โต่โต่, เตมีเตดอ เด๊อ อู จิเซอ อา เนอหม่า เอ่ หนิ โต่โต่. โทเร๊อ จว๊าซื๊อจว๊าปล๊า แลแค แต่ เพรเหมาะเพรคู แต่เหม่. ซี เก่ รอเบ๊ แลแค เตเออเต๊เห่ เฮ๊เนอหม่า, อา เก่ แร๊ เด๊อ ซีเงปา.
โอ่โมโอ่ แร๊ โอ่ฉว่าโอ่แพร แลแค ดื่อ นี๋ เหย่ซี ราจว๊า แลแค ฮู๊เนอ.

30 อู นอจว๊า เพรซู เตหรี่เตแก เออเต๊เห่ เด๊อ วีอันทิโอก โทเร๊อ เหย่ซี จว๊า เอ๊โอ่ปล๊อลอ เพรหยื่อเอ่แหน่เอ่พู๊ เต๊เห่ เร๊อ อา เด๊อะ เหย่ซี ลีเออต๊าบ่า. 31 ลีเออ ต๊าบ่าเนอ, ลี เด๊อ อา เด๊อะอ๊าเด๊อะเหร่ เหย่ซี อาขว่าอาคยา เบ๊อะเหย่ซี แด๊ เบ๊อะเนอ, อา ซิครือซิลอ แลแค เจ๊อ. 32 คูยูดาส เร๊อ คูสิลาส เด๊อ อา หม่าดื่อ เพรโพร เออซิเนอเนอ, อา แช่ครวา เด๊อะอ๊าเด๊อะเหร่ งยากู๋ ลา เน๊อ เพรหยื่อเอ่แหน่พู๊ เบ๊อะเนอ เต๊เห่. 33 เหย่ซี โอ่งยา เบ๊อะเนอ เตอเปลอฮู๊ โทเร๊อ แกแย เด๊อ อา หยื่อเอ่แลแค เตเต๊เห่ อากาโมกาแร๊ เหย่ซี เด๊อ อู นอแฮ เหย่ซี เต๊เห่ อา โอ่. 34 หม่าแน๊เรอ คูสิลาส แด่แล อาซิปล่อ เน๊อ อา เก่ โอ่แก เบ๊อะเนอ. ^{▼▼อู รา ลีพ๊า มู๋ หนู่เค เต๊เห่เห่เนอ, อู แม๊เถอะ ลีเทส่อพ๊า เออเตอหม่า โอ่ป่าเต่อเกอ โต่} 35 คูเปาโล เร๊อ คูบารนาบัส โอ่เป่แฮ โป่ เบ๊อะวีอันทิโอก อากูเนอ. เหย่ซี เร๊อ แกแย เด๊อ อาโร เต๊เห่ อิซว๊าอี๊แส่ แด๊โฉ่โด่แน โหร่ลู เร๊อ แบ่เจ่ อาลาอาโหง่ เบ๊อะเนอ.

คูเปาโล จว๊าโค๊แก เร๊อ คูบารนาบัส

36 ม๊อเนอม๊อเซ งยาแฮเฮ๊อ ตี๊กิ เร๊อ, คูเปาโล เฮ๊ คูบารนาบัส เน๊อ, “เป จว๊าโอ่เลเกอ คยาแซ๊ เพรหยื่อเอ่ เต๊เห่ เด๊อ เป แด๊โฉ่โด่แน โทเป่เฮ๊อ เหย่ซี เนอ แบ่เจ่ จอแปแหร่ อาลาอาโหง่ เนอเต๊เห่ ปว๊าวี โป๋, เหย่ซี อาเตหยื่อเตแหน่ จอแปแหร่ เนอหม่า อา เม ลอปลี แคร๋ เฮ๊อ ฮู๊เต เนอ เป กา แม๊คยา โหร่ลู โป๋.” 37 คูบารนาบัส ซิหยื่อ เอ๊จว๊าหนิ เกอ คูยอห์น เด๊อ อู เอ๊ ลู เน๊อ คูมาระโก เฮ๊ เออเนอ เตเพร. ^{▼▼เด๊อ ลีแก่ช๊า เต๊เห่ อากูเนอ เพรโด่แนพู๊ เต๊เห่ อามาดุ ๑๕:๓๗ ออ อา โอ่ปาโต่} 38 หม่าแน๊เร๊อ คูเปาโล ซิหยื่อ เอ๊จว๊าหนิ เกอ ลู โต่, เมเตเฮ๊เร๊อ อา จว๊าเม เกอ โทเฮ๊อ เน๊อ เหย่ซี ตื๊อดื่อเรอ อา เมปลื๊อเมโท เตเม โต่. โท๊โต่ อา แด่แก เหย่ซี เบ๊อะปัมฟีเลียเก่ เนอเรอ อา กาเผ่แก เหย่ซีเหล่ อาขว่าอาคยา, อา โตเบ่ เอ๊หนิคยา ปา ลู โต่เฮ๊อ อา แม๊เถอะ ฮู๊เน๊อ. ^k 39 คูเปาโล เร๊อ คูบารนาบัส เคร๊แขะ แคลู เน๊อ คูมาระโก คยา เออเนอหมา โก๊โน๋ โต่ อาขว่าอาคยา, เหย่ซี จว๊าโค๊จว๊าเปแก ลู. คูบารนาบัส เอ๊หนิ คูมาระโก เร๊อ เหย่ซี จว๊าแด๊หนิ ส่อเกลอดุ เร๊อ เถ่จว๊า แลแค เด๊อ ไซปรัสกลื๊อ. 40 คูเปาโล เร๊อ อา เอ๊หนิ เกอลาติ คูสิลาส. เร๊อ เพรหยื่อเอ่ เต๊เห่เนอ, อา เด๊อะ ตาแก คูเปาโล เร๊อ คูสิลาส เด๊อ จอแปแหร่ อาบุ๊ยอาเตอเรอ อา เตแม๊เตตู่ อากู เร๊อ เหย่ซี เออซิเนอ เถ่จว๊าแก เบ๊อะเนอ. 41 เร๊อ เหย่ซี เออซิเนอ จว๊าโนเล เด๊อ ซีเรียเก่ เน๊อ ซีลีเซียเก่ เร๊อ เด๊อะฉว่าเด๊อะชอแถ่ คยาแซ๊ เพรหยื่อเอ่ ตู๊หมู่ตอกล๊อ เบ๊อะเนอ เต๊เห่.