Act 16 | EkySCThai | STEP | คูเปาโล จว๊า เป่แฮ โป่ เด๊อ เง เร๊อ อา จว๊าโต่ เด๊อ วีเตอร์บี เร๊อ วีลิสตรา. เบ๊อะวีลิสตรา อากูเนอ, แกแย หยื่อเอ่ โอ่เตเพร เด๊อ อามุย เร๊อ คูทิโมธี. เร๊อ อาโหมะ หม่า แกแยยิวพู๊ เด๊อ อา หยื่อเอ่แหน่หยื่อรี เตเพร, หม่าแน๊เรอ อาเพ หม่า แกแยกรีกเมวเจอะพู๊ เตเพร.

Acts 16

ทิโมธี จว๊าครวาเกอ คูเปาโล เร๊อ คูสิลาส

1 คูเปาโล จว๊า เป่แฮ โป่ เด๊อ เง เร๊อ อา จว๊าโต่ เด๊อ วีเตอร์บี เร๊อ วีลิสตรา. เบ๊อะวีลิสตรา อากูเนอ, แกแย หยื่อเอ่ โอ่เตเพร เด๊อ อามุย เร๊อ คูทิโมธี. เร๊อ อาโหมะ หม่า แกแยยิวพู๊ เด๊อ อา หยื่อเอ่แหน่หยื่อรี เตเพร, หม่าแน๊เรอ อาเพ หม่า แกแยกรีกเมวเจอะพู๊ เตเพร. 2 เพรหยื่อเอ่ เด๊อ อา โอ่ แลแค เบ๊อะวีลิสตรา เร๊อ วีอิโคเนยูม เนอเต๊เห่ ถู่เซ๊ เกอเร๊อ แหน่เจ๊อ ลู เจ๊อ. 3 คูเปาโล ซิหยื่อ เอ๊ครวาจว๊าหนิ คูทิโมธี อาขว่าอาคยา, อา ดื๊อตีลี๊ เป่ ลู พ๊า. ^{▼▼คูทิโมธี เป๊เจ่เคเนอ, อา ดื๊อตีลี๊น๊อ พ๊า โต่ เมเตเฮ๊เรอ อาเพ หม่า เมวเจอะโร กรีกพู๊, แกแยยิวพู๊ หม่าโต่.} อา จว๊าเม ฮู๊เออ เมเตเฮ๊เรอ, แกแยยิวพู๊ เด๊อ อา โอ่ แลแค เบ๊อะเนอเต๊เห่ ซิเง ลอปลี เร๊อ คูทิโมธี อาเพ เนอหม่า กรีกเมวเจอะพู๊ เตเพร อาขว่าอาคยา, ตื๊อเรอ อา ดื๊อตีลี๊ เป่ ลู พ๊า แพ๊. 4 เบ๊อะเหย่ซี จว๊า โนตีวี เถ่ตีวี เบ๊อะเนอ, อา จว๊า อิซว๊าอี๊แส่ โทแก เป่ ลอ เฮ๊อ เพรหยื่อเอ่ เด๊อ อา โอ่ แลแค เบ๊อะวี เนอเต๊เห่ อากู เนอเต๊เห่ เฮ๊อ. เร๊อ อา อิซว๊าอี๊แส่ เป่ เหย่ซี ฮู๊ เพรโด่แนพู๊ เต๊เห่ เร๊อ เพรหยื่อเอ่ตู๊หมู่ตอกล๊อ โหมะพรูโหมะเผร่ ทวาดุทวาเต เด๊อ อา โอ่ แลแค เด๊อ วีเยรูซาเล็ม อากู เนอเต๊เห่ เฮ๊หม่าเฮ๊กลอ แด่ตาแด่เต โทเฮ๊อ โหง่เฮ๊แก เนอเต๊เห่ เฮ๊อ. 5 ฮู๊เนอ อาขว่าอาคยา, เพรหยื่อเอ่ ตู๊หมู่ตอกล๊อ เต๊เห่ อา เตหยื่อเตแหน่ อาฉว่าอาชอ แฮโต่. โท๊โต่ เพรหยื่อเอ่ เต๊เห่ โอ่โหร่แถ่ เร๊อ โอ่โหร่แถ่ เจ๊อ ปว๋า เตอเนอเจ๊อ.

คูเปาโล แม๊เถอะลว๊าเตเบ๊อะวีโตรอัส อากู

6 เบ๊อะเอเชียเก่กู เนอ, แหย่โยบูโพ๊แบ่เจ่ นอจว๊า แด๊โฉ่โด่แน เหย่ซี เร๊อ จอแปแหร่ อาลาอาโหง่ โต่ อาขว่าอาคยา, เหย่ซี จว๊าโค๊ เร๊อ จว๊าล๊อปลู๊เบ๊แก เร๊อ ฟรีเจียเก่ เน๊อ กาลาเทียเก่. 7 เบ๊อะเหย่ซี จว๊าโต่ เด๊อ มิเซีย เก่กือ เบ๊อะเนอ, เหย่ซี แอ๊จื๊อ จว๊าโน เด๊อ บิธีเนียเก่กู ตื๊อดื่อเรอ เหย่ซู่ อา แหย่โยบูโพ๊ นอจว๊าโน เหย่ซี โต่. 8 ฮู๊เนอ อาขว่าอาคยา, เหย่ซี จว๊า ตาลว๊าแก มิเซียเก่ เร๊อ จว๊า เด๊อ วีโตรอัส อากู แพ๊. 9 เบ๊อะเนอเตเซ, คูเปาโล แม๊เถอะลว๊า เตเต๊อเจ่อ. เร๊อ อา แม๊เถอะลว๊า เน๊อ มาซิโดเนีย เก่พู๊ เตเพร แฮก๊อถ่อ กุยซิยอ ลู เน๊อ, “แฮโน เมจว่า เป่เกอเหย่ เร๊อ เป เด๊อ มาซิโดเนีย เก่กูเออ.” 10 คูเปาโล แม๊เถอะลว๊า โทเตเออเออ เน๊อ, เป โอ่ตี๊หรี่แแตแร เปเหน่ เน๊อ เป เก่ เถ่จว๊า เด๊อ มาซีโดเนีย เก่, เมเตเฮ๊เร๊อ เป หยื่อเอ่ เร๊อ จอแปแหร่ เอ๊ เป เร๊อ เป เก่ จว๊า แด๊โฉ่โด่แน เป่เกอ มาซิโดเนีย เก่พู๊ เต๊เห่ เร๊อ เตซิครือมีลา อาหรี่อาแก.

เหมาะลิเดีย ทวาแถ่ เพรหยื่อเอ่ เด๊อ วีฟีลิปปี อากู

11 เป โอ่ เบ๊อะวีโตรอัส เนอ เร๊อ เป แถ่แด๊หนิ ส่อเกลอดุ เร๊อ เป เถ่จว๊า จ๊อ เจ๊อเจ๊อ เด๊อ สาโมธรัสกลื๊อ โอ่หนิ เนอโต๊โผะ, ปาโร เตอเนอเนอ, เป จว๊า เป่แฮ โป่ เด๊อ วีเนอัสโปลิส. 12 เป โอ่ เบ๊อะเนอ เร๊อ, เป เถ่จว๊า แฮเงโป่ เด๊อ วีฟีลิปปี. วี ตีวี หม่า วีดุ ตีวี เด๊อ อา โอ่ เด๊อ มาซิโดเนีย เก่กู. เร๊อ แกแย เบ๊อะเนอ เต๊เห่ หม่า โรมัน อา เทอพู๊เก่พู๊ ลอ ปว๋า เตเพร เจ๊อ. เร๊อ เป โอ่ เบ๊อะเนอ โซลุยแงเนอ.

13 เบ๊อะแกแยยิวพู๊ ม๊อเนอโด่ เบ่เฮ๊อ เบ๊อะเนอ, เป เถ่จว๊า เด๊อ วีกลอ เร๊อ เป จว๊า แฮเง เด๊อ เทอแลทือ. เบ๊อะเนอหม่า แกแยยิวพู๊ เต๊เห่ เหล่กุยจ๊อเบ อาเหล่โอ่ โอ่เกอเหล่ เป เหน่ เร๊อ เป จว๋า, เร๊อ เพรเหมาะ เต๊เห่ แฮโอ่ปล๊อ หนื่ออื่อ เหร่อ แลแค เบ๊อะเนอ เร๊อ เป โอ่แนเฮ๊เบ่ เน๊อ เหย่ซี. 14 เพรเหมาะ เด๊อ อา หนิดา เป เตเฮ๊เบ่ เออ อาเกล เตเพรเนอ, อามุย เร๊อ เหมาะลิเดีย, อา หม่า วีธิยาทิราพู๊ เตเพร เร๊อ อา อิเช อิเก เต๊เผ่ล๊อซอ งูดุ เต๊เห่. อา หม่า เพรเหมาะ เตเพร เด๊อ อา จ๊อบู่จ๊อเบ จอแปแหร่. เร๊อ แซ่ฮู๊ อา เก่ หยื่อเอ่เกอ คูเปาโล อา เตโด่แนเฮ๊เบ่ เป่ อู เออเต๊เห่ อาเงเนอเร๊อ, จอแปแหร่ บ๊าโม เป่ ลูซิปล่อ. 15 อา เร๊อ อา หี่พู๊แพพู๊ เร๊อ แกแย โอ่ ลอเกอ เบ๊อะเหมาะลิเดีย อาหี่กู เนอเต๊เห่ เจ แลแค อาเหน่ เร๊อ เทอ. โทเร๊อ อา เอ๊กา เป เร๊อ อา เฮ๊ เน๊อ, “ซี เก่ แด่แหน่เฮ๊อ แว เร๊อ แว หม่า แกแย เตเพร เด๊อ อา หยื่อเอ่แลแค ตาเต เตเพร เฮ๊อ เฮ๊เร๊อ ซี เบ่ กาโอ่เล โต่เกอ เด๊อ แวหี่,” อา เฮ๊ เร๊อ อา เอ๊ตื๊อดื่อ เป, เร๊อ เป เบ่ กาเกอ เจ๊อ ลู.

อู ด๊อตา คูเปาโล เร๊อ คูสิลาส เด๊อ ทอกู เด๊อ วีฟีลิปี อากู

16 เตอเนอเค เบ๊อะเป จว๊า เด๊อ เตกุยจ๊อเบ อาเหล่โอ่ โต๊โผ่ เบ๊อะเนอ, เป แม๊เถอะ ตาฉื่อ เน๊อ หลู่เล๊โหมะ พู๊ เตเพร. เร๊อ หลู่เล๊โหมะพู๊ เออเตเพรเนอ, โลเน๊โลหน่า โอ่ เด๊อ ลูเหน่ เร๊อ อา นอเฮ๊ ลู เน๊อ, ม๊อเนอม๊อเซ เด๊อ อา เก่ แฮทวาแถ่ เด๊อ เง ปา เนอเต๊เห่ อาหรี่อาแก. เด๊อ อา แด๊โฉ่ เป่ อู ฮู๊เนอ อาขว่าอาคยา, อาเมแจ่ เต๊เห่ พย๊าหนิ เอ๊แหน่เจ๊อ รือ เร๊อ อาขุคยา เจ๊อ. 17 อา ครวาจว๊าเกอ คูเปาโล เร๊อ เป เต๊เห่ เด๊อคยา เร๊อ, อา เอ๊โทแถ่ เน๊อ, “เพรคู เออเต๊เห่ หม่า จอแปแหร่ เด๊อ อาดุอาทู ตื๊อดื่อ เออเตเพร อาหลู่ เต๊เห่ เฮ๊อ. อา แด๊โฉ่โด่แน โล เป่ ซี เน๊อ จอแปแหร่ เมแลเปล๊ กา ซี อาหรี่อาแก เฮ๊อ.” 18 อา เฮ๊ ฮู๊เนอ ม๊อเนอม๊อเซ งยาเฮ๊อ เร๊อ อา เมซู๊ซ๊าดี๊แด แหน่เจ๊อ คูเปาโล อาซิปล่อ เร๊อ อา ตีรี๊ กาคยาโต ลู เร๊อ อา เฮ๊ โลเน๊โลหน่าเออ เน๊อ, “เด๊อ เหย่ซู่ครี๊ อามุย อากูเนอ, แว นอเถ่จว๊าแก เน เด๊อ เพรเหมาะ เออเตเพร อากู,” อา เฮ๊โท โตโพ๊โต โลเน๊โลหน่า เออโตโด เถ่จว๊าแก เด๊อ ลูเหน่.

19 เบ๊อะเป๊เจ่เพรเหมาะ เออเตเพร อาแบ่เจ่ ซิเงเฮ๊อ เร๊อ อา เหล่หนิเร๊อรือ แกล๊ โอ่ ปาโต่ เบ๊อะเนอ, เหย่ซี ปื่อ คูเปาโล เร๊อ คูสิลาส เร๊อ จุ่ยจว๊า เหย่ซี เด๊อ กู่กล๊อดุ กู๊ฉู่ทู เต๊เห่ อาเหล่โอ่ เด๊อ เกล๊กู เนอ. 20 เหย่ซี เอ๊จว๊า คูเปาโล เร๊อ คูสิลาส เด๊อ โรมัน เพรเฮ๊เบ่ เมจากาคยาเต เต๊เห่ อา เป๊เส่เง เร๊อ อา เฮ๊ เหย่ซี เน๊อ, “แกแย เออเต๊เห่ หม่า แกแยยิวพู๊ เร๊อ อา แฮเม ตอปลอตือซือ ลอปลี เป วีกู. 21 เหย่ซี อิซว๊าอี๊แส่ ตา โหง่ เด๊อ อา โค๊ดื่อ เร๊อ เป เตซว๊าเตแส่ อาเหล่โกล เต๊เห่. เป หม่า โรมัน เทอพู๊เก่พู๊ เต๊เห่ อาขว่าอาคยา, เป จูเอ่, ครวาเมเบ๊ แจ่เกอ เหย่ซี อาเหล่โกล เออเต๊เห่ โต่,” เหย่ซี เฮ๊ แลแค ฮู๊เนอ.

22 ล๋อ แกแย เบ๊หมู่ เออเต๊เห่เนอ อา เคร๊ฉื่อ เกอ ลอปลี คูเปาโล เน๊อ คูสิลาส. ฮู๊เนอเรอ เพรเฮ๊เบ่ เมจากาคยาเต เต๊เห่เนอ, อา นอท๊อยาแก แกแย เออซิเนอ เห่อจา, เร๊อ อา เฮ๊ตาอาโหง่ เนอ เบ่มือ เหย่ซี เร๊อ อิปลี๊หรี่. 23 อู เมจาเมจือ แหน่เจ๊อ เหย่ ซี เร๊อ เด๊อคยาเนอ, อู ด๊อโน เหย่ซี เด๊อ ทอกู, เร๊อ อู นอ โอ่ป่อหม่า ตาเตแร๊ เหย่ ซี เร๊อ เพรโอ่ป่อ ทอ อากู่กล๊อ เนอเตเพร. 24 เบ๊อะโหง่ แฮโต่เฮ๊อ เด๊อ เพรโอ่ป่อ ทอ กู่กล๊อ เออเตเพร อา โอ่ เบ๊อะเนอ, อา ด๊อโน เหย่ซี เด๊อ ทอกู เด๊อ อากู โต๊โต่ เร๊อ อา โกล๊หม่า เหย่ซี กู๊โด่ เร๊อ ส่อบย่าดุ.

25 เบ๊อะเหมาะเนเคเนอ, คูเปาโล เร๊อ คูสิลาส กุยจ๊อเบ เร๊อ อิโร ถู่เซ๊แถ่ จอแปแหร่ อาเค, แกแย โอ่ เด๊อ ทอกู เต๊เห่ หนิดา แลแค เหย่ซี เตกุยจ๊อเบ เต๊เห่ เร๊อ เหย่ซี เตอิโร เต๊เห่. 26 เออโตโพ๊เรอ เตเน่วท๊อดี แถ่คย๊า เร๊อ อา ท๊อ ฉว่าแหน่เจ๊อ เร๊อ เหล่ด๊อ โอ่อาทอ แก่ช๊า เออเนอ อา โกโยโต่ ลอ เจ๊อ. เบ๊อะเนอ โตโพ๊โต, ทอ กู่ดาดุ เต๊เห่ ลูโมแถ่ หนิเร๊อ ลอดื่อ อาเหน่. โท๊โต่ ล๋อ สู่เปลอต่อเท๊ เด๊อ อู จอหม่า เร๊อ อู ด๊อโอ่ แกแย เต๊เห่เนอ, อา แลโล๊ เถ่แก หนิ เร๊อดื่อ ลอ อาเหน่. 27 เบ๊อะเพรโอ่ป่อทอ กู่กล๊อ เออเตเพร ซิเหน่แถ่ เร๊อ อา แม๊เถอะ เร๊อ ทอด๊อ กู่ดา ลูโม เบ๊อะเนอ, อา เตเน เน๊อ อูตาทอ เต๊เห่ แกล่เถ่เปล๊ ลอเฮ๊อ เร๊อ อา บ๊าเถ่ อาเน๊ เร๊อ อา เตเร ชือเซอ เกอ เร๊อ อาเหน่. 28 เบ๊อะเนอเค คูเปาโล เอ๊โทจว๊า ลู เน๊อ, “ชือเซอ เร๊อดื่อ เนเหน่ แต่เหม่. เป โอ่ ลอปลี เบ๊อะเออ แพ๊.”

29 เพรโอ่ป่อทอ กู่กล๊อ นอพย๊าแฮ อู หมิเคว๊กอ เร๊อ อา แกล่โน แด๊งือตา แตแนตากยา เด๊อ คูเปาโล เร๊อ คูสิลาส อา กู๊โด่ช๊า. 30 อา เมฮู๊เนอ โทเร๊อ อา เอ๊เถ่ คูเปาโล เร๊อ คูสิลาส เด๊อ อากลอ เร๊อ อา แด๊เฮอ เหย่ซี เน๊อ, “โป่แหว่ ซี๋, แซ่ฮู๊ แว เก่ พย๊าหนิเกอ เตแลเปล๊กา อาเงเนอ, แว โตเบ่ เมฮู๊เต?”

31 เร๊อ เหย่ซี เฮ๊ฉื่อ ลู เน๊อ, “หยื่อเอ่แลแค แบ่เจ่ เหย่ซู่ เออเนอ, เร๊อ เน เด๊อ แกแย เด๊อ อา จว๊า โอ่ลอเกอ เร๊อ เน เด๊อ เนหี่กู เต๊เห่เนอ, อา เก่ พย๊าหนิ ดื่อ เตเมแลเปล๊กา ปา.” 32 โทเร๊อ คูเปาโล เร๊อ คูสิลาส แด๊โฉ่โด่แน เป่ อา เร๊อ ล๋อ แกแย โอ่ เด๊อ ลูหี่กู เนอเต๊เห่ เด๊อ แบ่เจ่ อาลาอาโหง่. 33 เบ๊อะเนอเตเซเซ๋ แพ๊, เพรโอ่ป่อทอกู กู่กล๊อ เออเตเพรเนอ อา ซู๊ปลีแก เป่ เหย่ซี อาจู่อาแท เต๊เห่, โทเร๊อ โตโพ๊โต อา เร๊อ ล๋อ อา หี่พู๊แพพู๊ เนอเต๊เห่ เจ ลอ แลแค อาเหน่ เร๊อ เทอ. 34 อา เอ๊กาหนิ คูเปาโล เร๊อ คูสิลาส เด๊อ อาหี่, โทเร๊อ อา เด๊อะเอ่เด๊อะโอ เป่ เหย่ซี เหล่เอ่เหล่โอ. อา เด๊อ อา หี่พู๊แพพู๊ เต๊เห่ อา หยื่อเอ่แหน่ แลแค เฮ๊อ จอแปแหร่ อาขว่าอาคยา, อา ซิครือซิลอ แลแค โก๊โน๋ โต่.

35 เด๊อคยา โตโรเนอ, โรมัน เพร เมโตเต เต๊เห่ นอจว๊า เกลอฮู๊ โอ่ป่อวี เต๊เห่ เด๊อ แกแยโอ่ป่อทอ กู่กล๊อ เออเตเพร อา โอ่. เร๊อ อา นอจว๊าเฮ๊ เพรโอ่ป่อทอ กู่กล๊อ เนอเตเพร เน๊อ, “ปลวาเถ่แก แกแย เนอเต๊เห่.” 36 ฮู๊เนอ เนอ, เพรโอ่ป่อทอ กู่กล๊อ เออเตเพร แด๊โฉ่โล คูเปาโล เน๊อ, “เพรเฮ๊เบ่เมโตเต เต๊เห่ เฮ๊ตาเฮ๊อ อาโหง่ เร๊อ เบ่ปลวาเถ่แก เน เร๊อ คูสิลาส อาขว่าอาคยา, ซี เถ่จว๊า หนิ เฮ๊อ. จว๊าโมโม แลแค นี๋.”

37 หม่าแน๊เรอ คูเปาโล เฮ๊ฉื่อ เกลอฮู๊โอ่ป่อ วีเต๊เห่ เน๊อ, “เป หม่า โรมัน เทอพู๊เก่พู๊ เต๊เห่ แพ๊. เหย่ซี แด๊เฮอเจแม๊ แต๋เป โตโพ๋ โต่. เร๊อ อา จว๊ามือจว๊าปอ ลอปลี เป เด๊อ อู ตูปลูเต๊เผ่ เป๊เส่เง, โท๊โต่ เหย่ซี จว๊าด๊อตา โต่ เป เด๊อ ทอกู เจ๊อ. กู๊แหน่เรอ, เหย่ซี ซิหยื่อ นอเถ่จว๊าโห่เป แอ? เหย่ซี จว๊าเมฮู๊เออ หม่า อาหนิ โต่. โรมัน เพรเฮ๊เบ่ เพร เมโตเต เออเต๊เห่ โตเบ่ แฮ เบ๊อะเออ เรอ เบ่แฮปลวาเถ่ เป เร๊อ อาเหน่.”

38 เกลอฮู๊ โอ่ป่อ วี เต๊เห่ แด๊โฉ่โล กาคยา เป่ คยาแซ๊ เตหรี่เตแก เออ เด๊อ โรมัน เพรเมโตเตเต เต๊เห่ อา โอ่ เร๊อ เบ๊อะเหย่ซี หนิโฮ เร๊อ คูเปาโล เร๊อ คูสิลาส หม่า โรมัน เทอพู๊เก่พู๊ เต๊เห่ แพ๊ เบ๊อะเนอ, เหย่ซี ซิอิเช แลแค. 39 ฮู๊เนอ อาขว่าอาคยา, โรมัน เพรเมโตเต เต๊เห่ แฮ กุยซิยอ คูเปาโล เร๊อ คูสิลาส เร๊อ เหย่ซี ซูเถ่ ลู เด๊อ ทอกลอ เร๊อ อา กุยซิยอ เหย่ซี เนอ อา เก่ เถ่จว๊าตาพา เด๊อ วี กูเออ. 40 คูเปาโล เร๊อ คูสิลาส อาโอ่ เด๊อ ทอกู เถ่ เร๊อ เถ่จว๊า เด๊อ เหมาะลิเดีย อาหี่. เหย่ซี จว๊าแม๊เถอะ เร๊อ เพรหยื่อเอ่ เต๊เห่ เบ๊อะเนอ. เร๊อ เหย่ซี เด๊อะอ๊าเด๊อะเหร่ เร๊อ อู เบ๊อะเนอ เต๊เห่ เร๊อ เหย่ซี เถ่จว๊าแก.