Acts 17

เด๊อ วีเธสะโลนิกา อากู

1เหย่ซี จว๊าตาลว๊าแก วีอัมฟีบุรี เร๊อ วีคูอปอลโลเนีย เร๊อ อา จว๊าโต่ แลแค เด๊อ วีเธสะโลนิกา. เบ๊อะวีเนอ ตีวี อากูเนอ, แกแยยิวพู๊ เตจ๊อเบโฮ โอ่ เตเม. 2ฮู๊ คูเปาโล เหล่โกล เม เกอ เร๊อ เนอ, อา จว๊าโน เด๊อ เตจ๊อเบโฮกู แกแยยิวพู๊ อา ม๊อเนอโด่ โซโพ๊ ลอเนอ อา จว๊า เฮ๊เบ่โด่แน เคร๊แขระ เร๊อ แกแย เบ๊หมู่ เบ๊อะเนอ เต๊เห่ เร๊อ อา แด๊โฉ่โล เป่ อู เร๊อ ลีเทส่อพ๊า อาหรี่อาแก. 3เร๊อ อา แด๊โฉ่ เป่ เหย่ซี เร๊อ อู ราหนื่ออื่อ ลีเทส่อพ๊า อาหรี่อาแก เนอเต๊เห่ เร๊อ อา ยูโลโปล เป่ อู เร๊อ ครี๊ อาหรี่อาแก. เร๊อ อา เฮ๊ เน๊อ, ครี๊ เด๊อ จอแปแหร่ นว๊าแถ่ อา เนอ เพรเมแลเปล๊กา อู เออเตเพร เนอหม่า อู เมจาเมจือ ลู โทปาเรอ อา เก่ ก๊อถ่อ เซอเพร กาคยา คยาแซ๊ เด๊อ เตเซอ เนอปา อา เฮ๊โฉ่โปล เป่ อู ฮู๊เนอ. เร๊อ อา เฮ๊ เน๊อ, “เหย่ซู่ เด๊อ แว แด๊โฉ่โล เป่ ซี กู๊แหน่เออ เตเพร เนอหม่า หม่าเฮ๊อ ครี๊ เด๊อ จอแปแหร่ นว๊าแถ่ ลู เด๊อ อา เก่ เมแลเปล๊ อู เออเนอ เตเพร เฮ๊อ.” 4เด๊อ แกแยยิวพู๊ อาเกล เต๊เห่เห่เนอ, อา หยื่อเอ่เกอ คูเปาโล อา เตเฮ๊เบ่ เร๊อ อาซิปล่อ โนกู เกอเร๊อ คูเปาโล เร๊อ คูสิลาส. กรีกพู๊ เด๊อ อา เบ่หยื่อเบ่แหน่ จอแปแหร่ เต๊เห่เนอ, อา หยื่อเอ่แหน่ โอ่โร๊ เกอลา เหย่ซี เออซิเนอ. โท๊โต่ เพร เหมาะ เด๊อ อา มุยดุมุยทู เต๊เห่เนอ, อาซิ ปล่อ โอ่เกอ เหย่ซี เออซิเนอ เร๊อ อา หยื่อเอ่แหน่ กาโน อาโร๊เกอ ลา เหย่ซี.

5หม่าแน๊เรอ แกแยยิวพู๊ เต๊เห่ ซิค๊าซิเถ่ เหย่ซี เร๊อ อา จว๊าเอ๊ปล๊อ แกแยจา แกแยมู๊แหม่ เด๊อ อา เลจว๊า เด๊อ เกล๊ กู เออเต๊เห่ เร๊อ อา นอ เมตอปลอตือซือ ลอ เจ๊อ อู ตีวี เจ๊อ. แซ่ฮู๊ เหย่ซี เก่ ปื่อจุ่ยตู๊หรู่ เถ่หนิ เร๊อ คูเปาโล เร๊อ คูสิลาส เด๊อ แกแย เบ๊หมู่ เออเต๊เห่ อา เป๊เส่เงเนอ, แกแยยิวพู๊ เออเต๊เห่ เร๊อ แกแย เบ๊หมู่ เออเต๊เห่ จว๊า โนเมโพร๊ คูยาโสน อาหี่ เร๊อ โนแม๊ปู คูเปาโล เร๊อ คูสิลาส. 6หม่าแน๊เรอ เหย่ซี แม๊เถอะ คูเปาโล เร๊อ คูสิลาส โต่ อาขว่าอาคยา, อา จุ่ยเถ่ คูยาโสน เร๊อ อาโป่แหว่ ครี๊พู๊ เด๊อ อาโร เต๊เห่ เร๊อ อา เอ๊จว๊า เหย่ซี เด๊อ แกแย ทวาดุทวาเต เด๊อวีกูเนอ เต๊เห่ อา เป๊เส่เง เร๊อ อา เอ๊โทแถ่ แลแค เน๊อ, “แกแย เออเต๊เห่ หม่า, เพรเม เมตอปลอตือซือ เต เด๊อ เหล่โอ่ ปว๋า โต๊โผ่ เจ๊อ. เร๊อ กู๊แหน่เออ เหย่ซี แฮโต่เฮ๊อ เด๊อ เป วีกู เฮ๊อ. 7เพร เอ๊โหมะฉื่อ เหย่ซี เด๊อ อาหี่กู หม่า คูยาโสน เฮ๊อ. เหย่ซี เฮ๊ แลแค เน๊อ คุ๊ยดุ โอ่ เด๊อ อาโร เตเพร, เร๊อ อามุย เร๊อ เหย่ซู่ อาขว่าอาคยา, เหย่ซี เฮ๊เบ่ ตาลว๊าตาแก เฮ๊อ คุ๊ยดุ ซีซาร์ อา เตซว๊าเตแส่ เต๊เห่ เฮ๊อ.” 8เด๊อ เหย่ซี เฮ๊เบ่ แลแค ฮู๊เออ อาขว่าอาคยา, อา เมมู๊แหม่ เมตอปลอตือซือ แถ่ลอ แกแย เบ๊หมู่ เร๊อ แกแย เด๊อ อา ทวาดุทวาเต เด๊อ วีกูเนอ เต๊เห่ เฮ๊อ. 9แซ่ฮู๊ คูยาโสน เร๊อ อาโป่แหว่ ครี๊พู๊ เด๊อ อาโร เต๊เห่ เก่ แลเปล๊ อาเงเนอ, เหย่ซี กุย คูยาโสน เร๊อ อาโค เออเต๊เห่ รือ, โทเร๊อ อา อาปลวาเถ่จว๊าแก เนอ เหย่ซี แพ๊.

เด๊อ วีเบโรอา อากู

10เหมาะคี๊เฮ๊อ เบ๊อะเนอ, เพรหยื่อเอ่ เต๊เห่ ซูจว๊าแก คูเปาโล เร๊อ คูสิลาส เด๊อ วีเบโรอา. เบ๊อะอา จว๊าโต่ เด๊อ วีกู เบ๊อะเนอ, อา จว๊าโน จ๊อจื้อ เจ๊อ เด๊อ แกแยยิวพู๊ อา เตจ๊อเบโฮ อากู เจ๊อ. 11แกแยยิวพู๊ โอ่ เบ๊อะวีเบโรอา เต๊เห่เนอ อา ซิปล่อทู แม๊เถอะ ยาเล๊อ เร๊อ วีเธสะโลนิกา ซีเต๊เห่. เหย่ซี หนิดา ฉ่าเผร่ ฉ่าอ่อ แหน่เจ๊อ เตหรี่เตแก เด๊อ เตซิปล่อฉว่า อากูเจ๊อ. โทเร๊อ แซ่ฮู๊ เหย่ซี เก่ ซิเง ตาเต เร๊อ คูเปาโล อา เตเฮ๊เบ่ เออเนอหม่า, อาหม่า แอ? หม่า หม่าโต่ แอเนอ? เร๊อ อา แม๊ปูซิเง แลแค เจ๊อ ลีเทส่อพ๊า ปวาเนอเนอ ปวาเซเซ เจ๊อ. 12เหย่ซี หยื่อเอ่แหน่ โร๊ลู, โทเร๊อ แกแยกรีกพู๊ เพรเหมาะ เด๊อ อา มุยดุมุยทู เต๊เห่ เร๊อ กรีกพู๊ เพรคู เต๊เห่ หยื่อเอ่แหน่ เกอ โร๊ลู.

13เร๊อ เบ๊อะแกแยยิวพู๊ เด๊อ วีเธสะโลนิกา เต๊เห่ หนิโฮเฮ๊อ เร๊อ คูเปาโล แด๊โฉ่โด่แน เป่ โป่ อู เร๊อ จอแปแหร่ อาลาอาโหง่ เด๊อ วีเบโรอา อากู เบ๊อะเนอ, เหย่ซี นอฉว่านอชอ แกแย เบ๊หมู่ เออเต๊เห่ เร๊อ อา นอ เมตอปลอตือซือ อู. 14เพรหยื่อเอ่ เต๊เห่ ซูจว๊า โตโพ๊ ซูจว๊าแก คูเปาโล เด๊อ เทอดุซาวาทือ, หม่าแน๊เรอ คูสิลาส เร๊อ คูทิโมธี ซิเนอลอ โอ่แกปา เบ๊อะวีเบโรอา อากู เนอแพ๊. 15เพร เด๊อ อา ซูจว๊า คูเปาโล เต๊เห่เนอ, อา กอครวา แถ่แด๊จว๊า เต่อเกอ ลู ส่อเกลอดุ เด๊อ วีเอเธนส์ เจ๊อ. เร๊อ เบ๊อะเหย่ซี กาคยา คยาแซ๊ เด๊อ วีเบโรอา เฮ๊อ เบ๊อะเนอ, คูเปาโล ครวาเมจว๊าหนิ เหย่ซี โหง่ เร๊อ อา เก่ กาแด๊โฉ่ หนิเป่ ลู คูสิลาส เร๊อ คูทิโมธี เก่ แฮแพรเกอ เด๊อ ลูโอ่.

เด๊อ วีเอเธนส์ อากู

16เบ๊อะคูเปาโล โอ่ป่อ คูสิลาส เร๊อ คูทิโมธี เบ๊อะวีเอเธนส์ เบ๊อะเนอ, อา แม๊เถอะ แหย่โย เต๊เห่ โอ่เอ๊ แหน่เจ๊อ เบ๊อะวีกู เนอ อาขว่าอาคยา, อา ซิปล่อปย๊า แหน่เจ๊อ. 17ฮู๊เนอ อาขว่าอาคยา, อา เฮ๊เบ่โด่แน เคร๊แขะ เร๊อ แกแยยิวพู๊ เร๊อ แกแยกรีกพู๊ เด๊อ อา เบ่หยื่อเบ่แหน่ จอแปแหร่ เต๊เห่ เบ๊อะเตจ๊อเบโฮ อากู เนอ. โท๊โต่ อา โด่แน เคร๊แขะ โป่เกอ เร๊อ แกแย เด๊อ อา โอ่ แลแค เด๊อ แกล๊กู เนอเต๊เห่ ฮู๊เนอ ปวาเนอเน๋อ เจ๊อ. 18ซ๊าร๊า เด๊อ อู เอ๊ เร๊อ, เอปิคูเรียนพู๊ เร๊อ สโตอิกพู๊ เต๊เห่ เฮ๊เบ่โด่แน เคร๊แขระ แลแค เร๊อ คูเปาโล. เหย่ซี อาเกล เต๊เห่เห่เนอ, อา เฮ๊ แลแค คูเปาโล เน๊อ, “แกแย เตซิเง โอ่เกออู เตอเจ๋อ โต่ เร๊อ อา จว๊าจ่าเม อาเหน่ ฮู๊ เพรเบ่แจ่เฮ๊แจ่ เออเตเพรเออ อา จว๊า เฮ๊แคร๋ อิเตเต?” เต๊เห่เรอ อา เฮ๊ติ เน๊อ, “อา แซ่เน๊อ อา โด่แน เทอโรเก่กลอ อา จอแปแหร่ เต๊เห่ อาหรี่อาแก,” อา เฮ๊ ฮู๊เนอ. เหย่ซี จว๊าเฮ๊โต่ แลแค ฮู๊เออ เมเตเฮ๊เรอ อา โตเบ๊อะคูเปาโล แด๊โฉ่โด่แน เป่ อู เร๊อ เหย่ซู่ อาหรี่อาแก เร๊อ อาเตเซอ ก๊อถ่อ เซอเพร กาคยา อาหรี่อาแก เบ๊อะเนอ อาขว่าอาคยา อา เฮ๊ แลแค ฮู๊เนอ. 19โทเร๊อ เหย่ซี เอ๊จว๊า คูเปาโล เด๊อ แกแย ทวา ทวาดุทวาเต เต๊เห่ อา โอ่ เร๊อ เหย่ซี จว๊า โอ่กู๊โอ่แก๊ ลู เบ๊อะอาเรโอปากัส กูโลขุเนอ, เร๊อ เหย่ซี แด๊เฮอ คูเปาโล เน๊อ, “เป ซิหยื่อ ซิเง เกอ เน เตอิซว๊าอี๊แส่ อาเซ เออเต๊อเจอะ อาหรี่อาแก. 20เตหรี่เตแก เด๊อ เน โด่แน เออเนอ, อาโค๊อาคยา แหน่เจ๊อ เด๊อ เปเง เร๊อ อาโหง่แลช๊า แฮ ฮู๊เตเนอ เป ซิหยื่อ ซิเงเกอ,” อา เฮ๊ ลู ฮู๊เนอ. 21(เมเตเฮ๊เรอ, แกแยเอเธนส์พู๊ เน๊อ เทอโรเก่กลอพู๊ เด๊อ อา โอ่ แลแค เบ๊อะเนอ ปว๋า เพรเนอ, ดา เตหรี่เตแก โอ่โลแถ่เซ อาโค๊คยา เฮ๊อ เต๊อเจ่อเจ่อ เฮ๊อ เฮ๊เนอหม่า, อา ซิหยื่อ โด่แน แลแค, อา ซิหยื่อ หนิดา เร๊อ อา เมลอแกเด ลอ อา ม๊อเนอม๊อเซ เตเออเต๊เห่ อาหรี่อาแก แพ๊.) เมเต?

22คูเปาโล ก๊อถ่อ เด๊อ แกแย ทวา ทวาดุทวาเต เต๊เห่ เหล่โอ่กู๊โอ่แก๊ ลู เบ๊อะอาเรโอปากัส โกโลขุ อาแบ๊เง เออเนอ เร๊อ อา เฮ๊ เน๊อ, “วีเอเธนส์พู๊ ลอปลี ซี๋, เบ๊อะเต๊อเจ่อเบ่เบ่, แว แม๊เถอะ เร๊อ ซี แด่ดุหยื่อแหน่ แหน่เจ๊อ จอแปแหร่ ว๋า. 23เมเตเฮ๊เรอ, เบ๊อะแว จว๊าเล เด๊อ ซี วีกู เนอ เร๊อ แว แม๊ ซี เตจ๊อบู่จ๊อเบ อาเหล่โอ่ เต๊เห่ เบ๊อะเนอ, แว แม๊เถอะ เตหลู่แต เบ๊อะเนอ โต๊โผ่ เด๊อ อู ราโอ่ ลู เน๊อ, ‘จอแปแหร่ เด๊อ อู ซิเง อา โต่ เตเพร อาเง’ ฮู๊เนอ. ฮู๊เนอ อาขว่าอาคยา, จอแปแหร่ เด๊อ ซี ซิเง ลู โต่ เร๊อ ซี จ๊อบู่จ๊อเบแถ่ เกอเร๊อ อา เออเตเพรเนอ, แว เก่ แด๊โฉ่โด่แน เป่ ซี เร๊อ อา อาหรี่อาแก กู๊แหน่.

24“จอแปแหร่ เด๊อ อา แบ๊ทวาแล ต๊อเหมาะ, เฉ่, เล, เห่ขุ เด๊อ เตปว๋า เต๊อเจอะ เออเตเพร เนอหม่า ม๊อขุ เร๊อ เห่ขุ อา แบ่เจ่ เฮ๊อ. เร๊อ เตหลู่แตโฮ เด๊อ แกแย เม อา เร๊อ อากู๊ขุ เต๊เห่เนอ, จอแปแหร่ โอ่ เบ๊อะเนอเต๊เห่ อากู โต่. ^a 25ฮู๊เนอ อาขว่าอาคยา, แกแย เก่ เมจว่าเกอ จอแปแหร่ อาเงเนอ อา โหล่ เร๊อ เตอเจ๋อ โต่, เมเตเฮ๊เรอ, อาแหน่ แบ่เจ่ เร๊อดื่อ เออเนอ, อา เด๊อ อู ปว๋า เตเพร ซิปล่อเซอเพร เร๊อ เตเซ๊โนเซ๊เถ่ เน๊อ เต เด๊อ อาโรเต๊เห่ ปว๋า เต๊อเจอะ เจ๊อ. 26จอแปแหร่ แบ๊แล แพ๊ แกแย เตเพร แพ๊ เร๊อ อา นอโอ่ทวาแถ่ แกแยเห่ขุพู๊ ปวาเมวปวาเจ่อ เร๊อ อา นอโอ่ลอ อู เด๊อ เห่ขุต๊าบ่า อากู. อาแหน่แบ่เจ่ เร๊อดื่อ ตี๊หรี่แตแร หนื่ออื่อ ตาเต ม๊อเนอม๊อเซ เร๊อ เตเหล่โอ่เหล่แบ่ เด๊อ แกแยเห่ขุพู๊ เก่โอ่เก่ช๊อ อาเง. 27แซ่ฮู๊ แกแยเห่ขุพู๊ เก่ แม๊ปู ลู ปา เร๊อ แตแร๊หม่า อา เก่ แม๊เถอะ ลู ปา เกอเล๋ อา เตเน เร๊อ อา แบ๊แล เฮ๊อ เหย่ซี. เก่ เฮ๊แกล๊จ๊อ หม่า จอแปแหร่ โอ่ผื่อ งย๊าแพ๊ เร๊อ เป แพ๊. 28ฮู๊ แกแย เตเพร เฮ๊โทเฮ๊อ เน๊อ, ‘เด๊อ จอแปแหร่ อาขว่าอาคยาเร๊อ, เป โอ่เซอเพรเบ๊, เร๊อ เป กู๊ก่ารู๊แรเบ๊,’ อา เฮ๊ ฮู๊เนอ. ฮู๊ ซี เพรราโหง่อิโร เต๊เห่ เฮ๊แก เน๊อ, ‘เป หม่า อาพู๊อาเลอ เต๊เห่,’ อา ราแก ฮู๊เนอ.

29“ฮู๊ เป ทวาเฮ๊อ จอแปแหร่ อาพู๊อาเลอ เต๊เห่เนอ, จอแปแหร่ หม่า อาแซ่เน๊อ รือ, เท, หม่าโต่เร๊อ หล่อ เต๊เห่ เป โตเบ่ เตเนหนิ ฮู๊เนอโต่. จอแปแหร่ หม่า เพรแบ๊ทวา เมแจ่หี่ เต๊เห่, เพรเมแจ่ จู๊โกจู๊เบ เร๊อ กู๊ขุ เต๊เห่ แบ๊ ทวาแถ่ แจ่ อา ฮู๊ แหย่โย เนอเต๊เห่ หม่าโต่. 30เบ๊อะอู ซิเง แล๋ จอแปแหร่ โต่ เบ๊อะเนอ, อา แม๊ เบ๊ขุตาโผ่แก แกแย เห่ขุพู๊ อาเตซื๊อ ฮู๊เนอ เต๊อเจ่อ แพ๊. หม่าแน๊เรอ กู๊แหน่เออเนอ, อา เฮ๊ตาเฮ๊อ อาโหง่ เร๊อ แกแย ปว๋า เตเพร เด๊อ อา โอ่ เด๊อ เหล่โอ่ เบ๊อะเต๋ โต๊โผ่เบ่เบ่ อา โตเบ่ ถู่แหล่เต๊เปล่กา แลแค อาซิปล่อ เร๊อ อา โตเบ่ ตีรี๊แม๊ กาคยาโต คยาแซ๊ เด๊อ จอแปแหร่ อา โอ่ ปว๋า เตเพร อา เฮ๊โท ฮู๊เนอ เฮ๊อ. 31เมเตเฮ๊เรอ, อา แด่หม่าแด่กลอ โทเฮ๊อ ม๊อเนอม๊อเซ เด๊อ อา เก่ เมโตเต จ๊อจ๊อเตเต ลอ เจ๊อ เห่ขุต๊าบ่า ปา. จอแปแหร่ นว๊าแถ่ โทเฮ๊อ เพรเมโตเต เตเพร เฮ๊อ. เร๊อ อา เด๊อะโล เป่ โทเฮ๊อ อูปว๋า เตเพร เร๊อ อาเตข่าเฮ๊โล เฮ๊อ. เร๊อ อา เตข่าเฮ๊โล เออ อาหรี่อาแก หม่า หม่าเฮ๊อ อา เมก๊อถ่อ เซอเพร กาคยา คยาแซ๊ แกแย เนอเตเพร เด๊อ เตเซอ เออเนอเฮ๊อ.”

32เบ๊อะเหย่ซี หนิโฮ คูเปาโล แด๊โฉ่โด่แน เป่ เหย่ซี เร๊อ เตเซอ ก๊อถ่อกาคยา อาคยา เบ๊อะเนอ, เต๊เห่เรอ อา งยาโคร ลู, เต๊เห่เห่ ลาติเร๊อ อา เฮ๊ เน๊อ, “เป ซิหยื่อ หนิโฮ คยาแซ๊โป่ เน เฮ๊ เป่ เป เตหรี่เตแก เออเนอ.” 33เออโตโพ๊เรอ คูเปาโล เถ่จว๊า ตาพาแก. 34แกแย เต๊เห่เห่เนอ อา ซิปล่อโอ่ ลู เร๊อ อา แบ๊ซว๊า เร๊อ ลู เร๊อ อา หยื่อเอ่แหน่ เกอ เต. เพร เด๊อ อา หยื่อเอ่แหน่ หยื่อรี เต๊เห่ อาเกลเนอ, อามุย เร๊อ คูดิโอนิสิอัส โอ่เตเพร. อา หม่า แกแย เตเพร เด๊อ อา โอ่เตอเกอ เด๊อ อาเรโอปากัส แกแย ทวา ทวาดุทวาเต ตู๊หมู่ตอกล๊อ เต๊เห่ อาเกล เตเพร. โท เร๊อ เพรเหมาะ เด๊อ อามุย เร๊อ เหมาะดามาริส เร๊อ แกแย เด๊อ อาโร เต๊เห่ หยื่อเอ่แหน่ เกอ เต.