Acts 18

เด๊อ วีโครินธ์ อากู

1เตทวาแถ่ โท ฮู๊เออ เนอ เร๊อ, คูเปาโล โอ่ เบ๊อะวีเอเธนส์ เนอ เร๊อ อา เถ่จว๊า เด๊อ วีโครินธ์. 2เร๊อ อา จว๊า แม๊เถอะ ตาฉื่อ เร๊อ แกแยยิวพู๊ เตเพร เด๊อ อามุย เร๊อ เพอาควิลลา เออ เบ๊อะเนอ โต๊โผ่. เพอาควิลลา เออเนอ, อา โอ่ เป๊เจ่เค เด๊อ วีปอนทัส เร๊อ อา เร๊อ อาเม โหมะปริสสิลลา แฮโต่เซ แลแค ปาแพ๊ เบ๊อะเนอ แพ๊. คุ๊ยดุ คูครวาดิอัส เฮ๊ตาอาโหง่ เน๊อ ล๋อ แกแยยิวพู๊ เต๊เห่เนอ, เบ่ เถ่จว๊าแก ลอปลี เบ๊อะวีโรม อากูเออ. เด๊อ คุ๊ย เฮ๊ตา อาโหง่ ฮู๊เออ อาขว่าอาคยา, เร๊อ คูอาควิลลา เออ เร๊อ อาเม โหมะปลิสสิสลา เถ่จว๊าแก เด๊อ อิตาลี เก่กู เร๊อ แฮโต่ แลแค เบ๊อะเออ แพ๊. เร๊อ คูเปาโล จว๊า แม๊เถอะ ตาฉื่อ เร๊อ เหย่ซี. 3เร๊อ คูเปาโล โอ่เกอ เร๊อ เหย่ซี เบ๊อะเนอ. เร๊อ อา เมโหร่เกอ เตเร๊อ เหย่ซี, เมเตเฮ๊เร๊อ คูเปาโลเนอ อา โบ่เอ่หนิ แพ๊ ซิปล่อเซอเพร เร๊อ อา เม เหล่สื่อหล่อป่า แซ่เน๊อ เม เร๊อ เว ซิเนอเออ เมเออเนอ แพ๊. 4แกแยยิวพู๊ ม๊อเนอโด่ ปว๋า โผ่โผ๋ เนอ, คูเปาโล โด่แน เคร๊แขะ อู เบ๊อะเตจ๊อเบโฮ อากูเนอ. แซ่ฮู๊ แกแยยิวพู๊ เร๊อ กรีกพู๊ เนอหมู่ลอ เก่ หยื่อเอ่แหน่ เกอ เหย่ซู่ อาเงเนอ, คูเปาโล แอ๊จื๊อ เฮ๊เบ่ จุ่ยหนิท๊อหนิ เหย่ซี ซิปล่อ.

5เบ๊อะคูสิลาส เร๊อ คูทิโมธี อาโอ่ เด๊อ มาซิโดเนียเก่ เถ่จว๊า เร๊อ อา แฮโต่ เด๊อ คูเปาโล โอ่ เบ๊อะเนอ, คูเปาโล เด๊อะแล ลอปลี อา ม๊อเนอม๊อเซ เด๊อ อา เก่ แด๊โฉ่โด่แน เป่ อู เร๊อ เตซิครือมีลา อาหรี่อาแก. เร๊อ อา ข่าเฮ๊โล เร๊อ แด๊โฉ่โด่แน โล เป่ แกแยยิวพู๊ เต๊เห่ เร๊อ เหย่ซู่ หม่า ครี๊, อา หม่า เพร เด๊อ จอแปแหร่ นว๊าแถ่ ลู เนอ เด๊อ อา เก่ เมแลเปล๊กาซี แกแยเห่ขุพู๊ เนอเตเพร เฮ๊อ, อา เฮ๊ ฮู๊เนอ เด๊อ อู ปว๋า เตเพร อา เป๊เส่เง. 6หม่าแน๊เรอ แกแยยิวพู๊ เต๊เห่ เคร๊ฉื่อ เป๊อเจ่ออิแช๊ คูเปาโล อาขว่าอาคยา, คูเปาโล ท๊อโพร๊ ตาแก เห่หมื่อ เด๊อ อา เห่อจาลู. อา ท๊อโพร๊ ตาแก เห่หมื่อ ฮู๊เออเนอหม่า อา เด๊อะโลเฮ๊อ เตม๊าเตแด เต๊อเจ่อ เด๊อ อู เคร๊ฉื่อ เหย่ซี ฮู๊เนอ. โทเร๊อ อา เฮ๊ฉื่อ เหย่ซี เน๊อ, “ซี เก่ โต่เด๊อ เตปย๊าเตหลู่ เฮ๊เนอหม่า ซีเร๊อซี หนิดื่อเฮ๊อ เตซื๊อเตปล๊า โอ่ปา เด๊อ แวลู โต่ เฮ๊อ. เป๊อแถ่ กู๊แหน่เออ ตาเป่แฮ เนอ, แว เก่ จว๊า แด๊โฉ่โด่แน เป่ดื่อเฮ๊อ เด๊อ แกแยยิวพู๊ หม่าโต่ เต๊เห่ อาเกลเฮ๊อ.”

7ฮู๊เนอ อาขว่าอาคยา, อา เถ่จว๊าแก เหย่ซี เบ๊อะเนอ เร๊อ อา จว๊า โอ่เกอ เด๊อ แกแยยิวพู๊ หม่าโต่ เด๊อ อามุย เร๊อ คูทิทิอัสยูสทัส เฮ๊ เออเนอ เตเพร อาหี่, เร๊อ อาหี่ โอ่ เบ๊อะเตจ๊อเบโฮ อาช๊าเนอ. อา หม่า แกแย เด๊อ อา จ๊อบู่จ๊อเบแถ่ จอแปแหร่ เตเพร. 8คูคริสปัส หม่า แกแย ทวา เตจ๊อเบโฮ อากู่กล๊อ เบ๊อะเนอ เตเพร. อา เน๊อ ล๋อ แกแย เด๊อ อา แฮโอ่เล เกอ ลู เบ๊อะอาหี่ เนอเต๊เห่ หยื่อเอ่แหน่ ลอปลี แบ่เจ่ เร๊อ แกแย อาโร เด๊อ อา โอ่ เด๊อ วีโครินธ์ อากู เด๊อ อา หนิโฮ เตซิครือมีลา เต๊เห่เนอ, อา หยื่อเอ่แหน่ เกอ เร๊อ อา เจ เกอ แลแค อาเหน่ เร๊อ เทอ.

9เตเซเนอ, คูเปาโล แม๊เถอะ เตแม๊ลว๊า เต๊อเจ่อ เร๊อ แบ่เจ่ เฮ๊เบ่ ลู เน๊อ, “ซิอิเช แต่เหม่! โอ่โก๊แก แต่ เน เตเฮ๊เบ่ แต่เหม่! โอ่โส่ตือครื๊อ แต่เหม่! 10เมเตเฮ๊เรอ เด๊อแว โอ่เกอดื่อ เร๊อ เน, เร๊อ อู เมแป่เมเช แจ่ เน เตเพร่ว โต่, เมเตเฮ๊เรอ แกแย โอ่เบ๊อะวี ตีวี อากู เนอเต๊เห่หม่า เพร เด๊อ อา หยื่อเอ่แหน่ แว เนอหม่า อา โอ่โหร่โอ่เอ๊ ลาเฮ๊อ.” 11ฮู๊เนอเร๊อ คูเปาโล โอ่เบ๊อะวีโครินธ์ เนอ ต๊าหน่า เร๊อ เลโซซว๊า เร๊อ อา อิซว๊าอี๊แส่ เป่ แกแย เบ๊หมู่ เต๊เห่ เร๊อ จอแปแหร่ อาลาอาโหง่.

12เบ๊อะคูกัลลิโอ ทวา โรมัน คุ๊ยดุ เด๊อ อาคายาเก่ เบ๊อะเนอ, แกแยยิวพู๊ เต๊เห่ เอ๊ปล๊อ เกอเร๊อ ลอ ลู เร๊อ อา จว๊าปื่อ แลแค คูเปาโล เร๊อ อา ซูจว๊า ลู เด๊อ เหล่ แด๊เฮอ เจแม๊ เหล่โอ่. 13เหย่ซี เฮ๊ เน๊อ, “แกแย เออเตเพรหม่า, แกแย เลจว๊า อิลออิโหล่ ลอ แกแย เบ๊หมู่. เร๊อ อา นอจ๊อเบแถ่ อู เร๊อ จอแปแหร่ เด๊อ อา โค๊เล๊อ เร๊อ เตซว๊าเตแส่ เนอเต๊เห่.”

14เบ๊อะคูเปาโล เตเร เฮ๊เบ่เถ่ เบ๊อะเนอ, คุ๊ยดุ กัลลิโอ เฮ๊ แกแยยิวพู๊ ซี๋เต๊เห่ เน๊อ, “แกแยยิวพู๊ ซี, เตหรี่เตแก เออเนอ อา เก่ หม่าแหน่เฮ๊อ เต เด๊อ อา ตาลว๊าตาแก เจ๊อ เทอเก่ อา เตซว๊าเตแส่ เต๊เห่ เจ๊อเบ่เบ่, แว โตเบ่ ซิปล่อทู หนิดา ดื่อ ซี แด๊โฉ่โลแถ่ เออเต๊เห่. 15หม่าแน๊เรอ เตหรี่เตแก เออเนอหมา อา หม่าแพ๊ เตเฮ๊เบ่ เคร๊แขะ ลู โหง่ เต๊เห่ เร๊อ มุย เต๊เห่, เน๊อ ซี แกแยยิวพู๊ เตซว๊าเตแส่ เร๊อดื่อ เต๊เห่ แพ๊ อาขว่าอาคยา, ซี โตเบ่ แด๊เฮอ เจแม๊ เกอ เร๊อดื่อ ซีเต แพ๊. แว หม่า แกแย เด๊อ อา ทวา เป่ อู เพรเมโตเต อาหรี่เตแก ฮู๊เออเนอ เต๊เห่ อาเงเนอ หม่าโต่.” 16เร๊อ อา เหว่เถ่แก แกแยยิวพู๊ เต๊เห่ เด๊อ เหล่แด๊เฮอ เจแม๊ เหล่โอ่ เออเนอ อากลอ. 17โทเร๊อ เหย่ซี ปว๋า เตเพร ปื่อหม่า เตจ๊อเบโฮ กู่กล๊อ คูโสสเธเนส เออ, เร๊อ อา มือ ลู เด๊อ เหล่ แด๊เฮอ เจแม๊ เหล่โอ่ เออเนอ แบ๊เง เจ๊อ ตื๊อดื่อเรอ คุ๊ยดุ คูกัลลิโอ เฮ๊ตาตือ เมตาตือ เหย่ซี เตอเจ๋อ โต่.

คูเปาโล กาคยา คยาแซ๊ เด๊อ วีอันทิโอก

18คูเปาโล โอ่เป่แฮ ม๊อเนอม๊อเซ งยากู๋ ลา. โป่ เบ๊อะวีโครินธ์ อากูเนอ. โทเร๊อ อา เถ่จว๊าแก เพรหยื่อเอ่ เบ๊อะเนอ เต๊เห่ อาเหล่. อา แถ่แด๊หนิ ส่อเกลอดุ เร๊อ อา เถ่จว๊า เด๊อ ซีเรียเก่. เร๊อ อา เถ่จว๊า เต่อเร๊อ โหมะปริสสิลลา เร๊อ เพอาควิลลา. เบ๊อะอา แถ่ แถ่แด๊ แต่ล๋า ส่อเกลอดุ โต่ เนอ, อา แบ แลหนิ อาเหน่ เด๊อ จอแปแหร่ อา เป๊เส่เง เบ๊อะวีเคนเครีย อากูเนอ เร๊อ อา จิแก อากู๊โล. ^a 19เหย่ซี จว๊าโต่ เด๊อ วีเอเฟซัส เร๊อ อาแด่แก โหมะปริสสิลลา เร๊อ เพอาควิลลา เบ๊อะเนอ. อา จว๊าโน เด๊อ เตจ๊อเบโฮกู เร๊อ อา จว๊า เฮ๊เบ่โด่แน เคร๊แขระ เร๊อ แกแยยิวพู๊ เต๊เห่. 20แกแยยิวพู๊ เต๊เห่ กุยซิยอ ลู เร๊อ อา เก่ โอ่งยา เป่เกอโป่ เหย่ซี เบ๊อะเนอ ตื๊อดื่อเรอ อา จูโต่. 21หม่าแน๊เรอ เบ๊อะอา เถ่จว๊า เฮ๊อ เบ๊อะเนอ, อา เฮ๊แก เหย่ซี เน๊อ, “อา เก่ โต จอแปแหร่ ซิปล่อ เฮ๊เรอ แว กาคยา เกอ คยาแซ๊ เด๊อ ซีโอ่ ปา.” อา เฮ๊ โทเรอ อา แถ่ แถ่แด๊ ส่อเกลอดุ เบ๊อะวีเอเฟซัส อากูเนอ เร๊อ อา เถ่จว๊าแก. 22เบ๊อะอา จว๊าโต่ เด๊อ วีเก่ซารียา เบ๊อะเนอ, อา แถ่ เด๊อ วีเยรูซาเล็ม เร๊อ อา แถ่ เฮ๊โมเฮ๊แร๊แก เพรหยื่อเอ่เต ตู๊หมู่ตอกล๊อ เบ๊อะเนอ เต๊เห่, เร๊อ อา จว๊าแล เด๊อ วีอันทิโอก.

23อา จว๊าแล โอ่ เบ๊อะเนอ แตแปล๊เตอเปลอฮู๊ เร๊อ อา เถ่จว๊าแก คยา. อา จว๊าเล เบ๊อะกาลาเทียเก่ เร๊อ ฟรีเจีย เก่กูเนอ โต๊โผ่ โท โต๊โผ่. โทเรอ อา จว๊า เด๊อ ฉว่าเด๊อชอแถ่ เป่ เพรหยื่อเอ่ โอ่ เบ๊อะเนอ เต๊เห่ อาอ๊าอาเหร่.

คูอปอลโล แรเต เด๊อ วีเอเฟซัส อากู เร๊อ วีโครินธ์ อากู

24แกแยยิวพู๊ เด๊อ อามุย เร๊อ คูอปอลโล โอ่เตเพร. อา อาโอ่เป๊เจ่เค เด๊อ วีอเล็กซานเดรีย, เร๊อ อา แฮ เด๊อ วีเอเฟซัส อา หม่า แกแย เฮ๊เบ่แจ่เฮ๊เบ่แหน่ ลา เตเพร. โท๊โต่ ลีเทส่อพ๊า อา ตารา ราม๊าราแด เต๊เห๋ หม่า อา ซิเงโปลปลื๊อ ลอ เจ๊อ. 25อู อิซว๊าอี๊แส่ เนอ โทเฮ๊อ อา เร๊อ แบ่เจ่ อาแกล๊อาโกล เต๊เห่ เฮ๊อ. โทเร๊อ อา ซิปล่อฉว่า โด่แนเป่ แหน่เจ๊อ อู, โทเร๊อ อา อิซว๊าอี๊แส่ ตาเต เป่ แหน่เจ๊อ อู เร๊อ เหย่ซู่ อาหรี่อาแก เต๊เห่. หม่าแน๊เรอ อา ซิเง แพ๊ดื่อ คูยอห์น อา เตเจอูเทอ อาหรี่อาแก เต๊อเจ่อโต แพ๊. 26อา เป๊อแถ่ เฮ๊เบ่บื่อเฮ๊เบ่คือ เด๊อ เตจ๊อเบโฮ อากู เบ๊อะโหมะปลิสสิลลา เร๊อ เพอาควิลลา หนิโฮ อา เตเฮ๊เบ่ เบ๊อะเนอ, อา เอ๊กา ลู เด๊อ อาหี่. แซ่ฮู๊ อา เก่ ซิเงแฮ ตาเต อากลอเล๊อโป่ เร๊อ อา เหล่โกลเล๊อ เออเนอเรอ, โหมะปลิสสิสลา เร๊อ เพอาควิลลา แด๊โฉ่โล เป่ โป่ ลู เนอ จอแปแหร่ อาแกล๊อาโกล เต๊เห่.

27เบ๊อะคูอปอลโล ซิหยื่อ จว๊า เด๊อ อาคายาเก่ เบ๊อะเนอ, เพรหยื่อเอ่ เบ๊อะวีเอเฟซัส เนอเต๊เห่ เมจว่า เป่ ลู เร๊อ เหย่ซี อาเตราลี เด๊อ อา เด๊อะฉว่าเด๊อะชอแถ่ เพรหยื่อเอ่ เด๊อ อา โอ่ เด๊อ อาเคนยา เก่กู เนอเต๊เห่. อา ราจว๊าหนิ เป่ เหย่ซี ลี ฮู๊เออ เมเตเฮ๊เรอ แซ่ฮู๊ อู เก่ เอ๊โมฉื่อแร๊ คูอปอลโล อาเงเนอ แพ๊. อา จว๊าโต่ เบ๊อะเนอ เร๊อ อา ทวาบุ๊ยทวาเตอเรอ เป่แหน่ เจ๊อ แกแย เด๊อ อา ทวากาเฮ๊อ เพรหยื่อเอ่ เด๊อ จอแปแหร่ อาบุ๊ยอาเตอเรอ อาขว่าอาคยา, แพ๊ เนอเต๊เห่ อาเง เจ๊อ. 28เมเตเฮ๊เรอ, อา เตเฮ๊เบ่โด่แน เคร๊แขระ อู เต๊เห่เนอ อา โอ่เร๊อ อาเตอเรออาฉว่าอาชอ, โท๊โต่ อา ยูโลเบ๊ เป่ อู ลีเทส่อพ๊า ข่าเฮ๊โล เต๊เห่ เร๊อ เหย่ซู่ หม่า ครี๊, โท๊โต่ เหย่ซู่ หม่า เพร เด๊อ จอแปแหร่ นว๊าแถ่ ลู เร๊อ อา เก่ เมแลเปล๊กาซี แกแย อาขว่าอาคยา, อา เคร๊แขระ เป่แก ลอ แกแยยิวพู๊ เต๊เห่ เด๊อ แกแย ตูปลูเต๊เผ่ อา เป๊เส่เง.