Acts 19
คูเปาโล จว๊า เด๊อ วีเอเฟซัส
1เบ๊อะคูอปอลโล โอ่เบ๊อะวีโครินธ์ อากู เบ๊อะเนอ, คูเปาโล จว๊าตาลว๊าแก ฟรีเจียเก่, เร๊อ อา จว๊าโต่ เด๊อ วีเอเฟซัส อากู. อา แม๊เถอะ เร๊อ เพรหยื่อเอ่ เต๊เห่ เบ๊อะวีเอเฟซัส อากูเนอ. 2เร๊อ อา แด๊เฮอ เหย่ซี เน๊อ, “เบ๊อะซี หยื่อเอ่แหน่เอ่เต เบ๊อะเนอ, ซี พย๊าหนิ โทเกอเฮ๊อ แหย่โยบูโพ๊แบ่เจ่ แอ?” เร๊อ เหย่ซี เฮ๊ฉื่อ ลู เน๊อ, “เป พย๊าหนิ น๊อเกอ ล๋ายโต่. โทเร๊อ แหย่โยบูโพ๊แบ่เจ่ โอ่ เฮ๊เน๊อ, เป หนิโฮน๊อ เกอ เจ๊อ อู โตโพ๋ โต่.” 3คูเปาโล แด๊เฮอ เหย่ซี เน๊อ, “เก่ เมฮู๊เนอเรอ ซี เจน๊อ แลแค เทอ ฮู๊เต เต๊อเจ่อเต?” เร๊อ เหย่ซี เฮ๊ฉื่อ ลู เน๊อ, “เป เจน๊อ แพ๊ คูยอห์น เจ เป เนอ แพ๊.” 4เร๊อ คูเปาโล เฮ๊ เป่ เหย่ซี เน๊อ, “คูยอห์น เจ เป่ แกแย เด๊อ อาถู่แหล่เต๊เปล่กา อาซิปล่อ เนอเต๊เห่ อาเง แพ๊. อา เฮ๊ แกแย เนอเต๊เห่ เร๊อ หยื่อเอ่แหน่ เพร เด๊อ อา เตเร แฮ เด๊อคยา เออเนอ เตเพร นี๋, อา หม่า แบ่เจ่เหย่ซู่ เฮ๊อ.” a 5เหย่ซี หนิโฮ อา เฮ๊ เป่ เหย่ซี ฮู๊เออ เนอ เร๊อ, เหย่ซี เจ แลแค อาเหน่ เร๊อ เทอ เด๊อ แบ่เจ่ แบ่เจ่เหย่ซู่ อามุย อากู. 6เบ๊อะคูเปาโล แด่แถ่ อากู๊ขุ เด๊อ เหย่ซี ลูอาเค, แหย่โยบูโพ๊แบ่เจ่ แฮแล เด๊อ เหย่ซีโอ่ เร๊อ เด๊อ แหย่โยบูโพ๊แบ่เจ่ อาขว่าอาคยา, เหย่ซี เฮ๊เบ่เถ่โหง่ เด๊อ อา อาโค๊ตีกลี๊ เต๊เห่ เร๊อ อา แด๊โฉ่โด่แน เป่ แลแค อู เร๊อ จอแปแหร่ อาลาอาโหง่ เต๊เห่. 7ล๋อ ปลี เนอหม่า อา โอ่ เช๊อซิเนอ แพ๊. 8คูเปาโล จว๊าโน เด๊อ เตจ๊อเบโฮกู เร๊อ อา เฮ๊เบ่โด่แน คือฮาบื่อ เจ๊อ เน๊อ แกแย เบ๊หมู่ เบ๊อะเนอ โซเล อากู. คูเปาโล เฮ๊เบ่โด่แน เคร๊แขระ เหย่ซี เน๊อ, จอแปแหร่ อาเทอเก่ อาหรี่อาแก เร๊อ อา ท๊อหนิจุ่ยหนิ ลอ เหย่ซี อาซิปล่อ. 9หม่าแน๊เรอ เต๊เห่เห่เนอ อา ซิปล่อชอ เร๊อ หยื่อเอ่ เกออู โต่. เร๊อ อา เป๊อเจ่ออิแช๊ แลแค แบ่เจ่ อาแกล๊อาโกล เด๊อ อู เด๊อะโล เออเนอ เด๊อ แกแย ตูปลูเต๊เผ่ เป๊เส่เง เจ๊อ. ฮู๊เนอ อาขว่าอาคยา, คูเปาโล เถ่จว๊า ตาพาแก เร๊อ เหย่ซี. เร๊อ อา เอ๊หนิ อา โคเจ่ เต๊เห่ เร๊อ ปวาเนอเน๋อ. อา เร๊อ อา โคเจ่ เต๊เห่ จว๊า เฮ๊เบ่โด่แน โหร่ลู เด๊อ อู เอ๊ เน๊อ ซ๊าร๊า ทีรันนัส เหล่อิซว๊าเต เบ๊อะเนอ เนอโต๊โผะ. 10เร๊อ อา จว๊า เมโหร่เกอ เตเบ๊อะเนอ เนอหน่า. ฮู๊เนอเรอ ล๋อ แกแยยิวพู๊ เร๊อ แกแยยิวพู๊ หม่าโต่ เต๊เห่ เด๊อ อา โอ่ เด๊อ เอเชียเก่กู เต๊เห่ หนิโฮน๊อ เกอ แบ่เจ่ อาลาอาโหง่.เพเสวา อาพู๊เพรคู เต๊เห่ เหว่เถ่แม๊เกอ โลเน๊โลหน่า
11จอแปแหร่ เด๊อ คูเปาโล เก่ เม โค๊ตีกลี๊เจ๊อ เด๊อ อาฉว่าอาชอเล๊อ เต๊เห่. 12ฮู๊เนอ อาขว่าอาคยา, คูเปาโล นอจ่อ เกอเร๊อ อา กู๊โทฮู๊ทื๊อเป๊เส่ เต๊เห่ เร๊อ อิเกพู๊ เด๊อ อา เหล่จอตาตือบี๊ เด๊อ เง เด๊อ อา นอเอ่น๊อ เกอเร๊อ โทเฮ๊อ เต๊เห่เนอ, อู เก่ พย๊าจว๊า เด๊อ แกแยชู๊ยแกแยเช เต๊เห่ อา โอ่, เน๊อ โลเน๊โลหน่า เมเบ่ ลู เต๊เห่ อา โอ่ เฮ๊เนอ, อา เตชุ๊ยเตเช อาโอ่เหม่แก เจ๊อ. โทเร๊อ โลเน๊โลหน่า เต๊เห่ เถ่แกล่ ตาพาแก ลอปลี เจ๊อ. 13แกแยยิวพู๊ เด๊อ จว๊า เล เหว่เถ่แก โลเน๊โลหน่าเนอ อา โอ่ เต๊เห่. เหย่ซี เหว่เถ่แก เกอ โลเน๊โลหน่า เน๊อ แบ่เจ่เหย่ซู่ อามุย. เหย่ซี เฮ๊ โลเน๊โลหน่า เต๊เห่ เน๊อ, “เหย่ซู่, เด๊อ คูเปาโล เฮ๊โฉ่โด่แนหนิ อามุย เออเตเพร อากูเนอ, แว นอเถ่จว๊าแก ซี,” อา เหว่เถ่ เกอ ฮู๊เนอ. 14แกแยยิวพู๊ เพรหลู่แต กู่กล๊อ เด๊อ อามุย เด๊อ เพเสวา เฮ๊ เออเตเพรเนอ, อา พู๊เพรคู โอ่ โซซว๊าเตเพร. อาพู๊ เออเต๊เห่ เนอหม่า อา แม๊ปู เหว่เถ่ แลแค โลเน๊โลหน่า ฮู๊เนอ เต๊เห่เฮ๊อ. 15หม่าแน๊เรอ โลเน๊โลหน่า เฮ๊ฉื่อ เหย่ซี เน๊อ, “แบ่เจ่เหย่ซู่ หม่า แว ซิเง. คูเปาโล หม๋า แว ซิเงเง. หม่าแน๊เรอ แว ซิเง ซี โต่. ซี หม่า อูเป?” 16แกแย เด๊อ โลเน๊โลหน่า เมเบ่ อา เออเตเพรเนอ, อา อี๊ฉ่าแถ่ เด๊อ เหย่ซี ลู เร๊อ อา วื๊อเป่แก ลอ เหย่ซี. ฮู๊เนอเรอ โลเน๊ เมเบ่เช เอ๊แหน่เจ๊อ เหย่ซี เร๊อ เหย่ซี แกล่เถ่ กะโกล ลอ แลแค เด๊อ หี่กลอ. 17ล๋อ แกแยยิวพู๊ เร๊อ เมวเจอะ โร กรีก เมวเจอะพู๊ เร๊อ อา โอ่ เบ๊อะวีเอเฟซัส อากู เนอเต๊เห่ หนิโฮ ลอปลี เตเม ทวาแถ่ อาเหน่ เออเต๊อเจ่อ. เร๊อ เหย่ซี ซิอิเช ลอปลี เจ๊อ เร๊อ เหย่ซี แด่ดุหยื่อแหน่, เร๊อ ถู่เซ๊แถ่หนิ แลแค แบ่เจ่ เหย่ซู่ อามุย. 18เพรหยื่อเอ่ เต๊เห่ แฮโหร่แฮโอ่เอ๊ลา เด๊อ คูเปาโล โอ่ เร๊อ เหย่ซี แฮ อ๊อแลนอแล แลแค เด๊อ แกแย ตูปลูเต๊เผ่ อา เป๊เส่เง. โทเร๊อ เหย่ซี แด๊โฉ่ล๊อลี แลแค อา เตเมมู๊แหม่รีแจ่ เด๊อ เหย่ซี เมโทเฮ๊อ เนอเต๊เห่. 19แกแย เออเต๊เห่ อาเกลเนอ, เต๊เห่เห่เรอ อา ทวา โลเน๊โลหน่า ซ๊าร๊า เร๊อ อา พย๊าแฮหนิ แลแค อาลี เด๊อ อา จว๊าอิซว๊าหนิ เกอ เตเมเออ เด๊อ อูลู อาหรี่อาแก เนอเต๊เห่ เร๊อ อา แฮ ซื๊ออือแก เร๊อ หมิ เด๊อ แกแย ตูปลูเต๊เผ่ อา เป๊เส่เง. เหย่ซี แด๊แม๊ ล๋อ ลี เออเต๊เห่ อางูเนอ, อา ตา รือเบ่ แงซ๊อ เบ๊อะเนอเจ๊อ. 20เด๊อ จอแปแหร่ เตโพรเตเตอเรอ โอ่โลแถ่ เด๊อ แกล๊ ฮู๊เออ อาขว่าอาคยา, จอแปแหร่ อาลาอาโหง่ โลปีชี จว๊าแหล่แถ่ โป่ เร๊อ อา ดุแถ่ทูแถ่ เป่แฮ โป่ เด๊อ เง.เตซู๊ซ๊าโอ่แถ่ เด๊อ วีเอเฟซัส อากู
21เตเมอาเหน่ ฮู๊เออเต๊เห่ โทเรอ คูเปาโล แด่แล อาซิปล่อ เร๊อ อา เก่ เลจว๊ารว๊า มาซิโดเนียเก่ เร๊อ อาเคยาเก่ เร๊อ อา เก่ จว๊าตาลว๊า เด๊อ วีเยรูซาเล็ม ปา. โทเร๊อ อา เฮ๊ เน๊อ, “แว จว๊าโท เด๊อ วีเยรูซาเล็ม เร๊อ แว เบ่ จว๊า เป่แฮ โป่ เด๊อ วีโรม ปา.” 22เบ๊อะอา จว๊า โอ่โก๊ เตอเปลอฮู๊ เบ๊อะเอเชียเก่ เบ๊อะเนอ, อา นอจว๊า ทิโมธี เร๊อ เอรัสทัส เด๊อ อา เมจว่า ลู เออซิเนอเนอ เด๊อ มาซิโดเนียเก่. 23เบ๊อะเนอเค, เด๊อ อู หยื่อเอ่ แบ่เจ่ เหย่ซู่ อาแกล๊อาโกล อาขว่าอาคยา, เตแป่เตเช ดู๋ เต๊อเจอะ โอ่แถ่ เด๊อ วีเอเฟซัส อากู. 24เพรดารือ เด๊อ อามุย เร๊อ คูเดเมตริอัส เฮ๊ เออเตเพรเนอ, อาดาเถ่ แบ่เจ่ โหมะ อาเทมิส ▼▼แซ่ฮู๊ กรีกพู๊ เต๊เห่ เก่ พู๊โอ่เอ๊ ปา อาเงเนอ, เหย่ซี หลู่แถ่ แลแค แบ่เจ่ โหมะ อาเทมิส.
เตหลู่แตหี่ฮู๊ เด๊อ อา ดา เร๊อ รือ เต๊เห่ เร๊อ เพรเมเตพู๊ เต๊เห่ หนิบุ๊ยหนิเตอเรอ เกอ แหน่เจ๊อ เน๊อ เตเอ่เตแร เออ อาขว่าอาคยา เจ๊อ. 25ฮู๊เนอ อาขว่าอาคยา, อา เอ๊ปล๊อ ลอปลี อา เพรแรเตเออ เต๊เห่ เน๊อ เพรเมเตพู๊ เด๊อ อาเตเม แซ่เน๊อ ลู เด๊อ อาโร เต๊เห่ เร๊อ อา เฮ๊ เหย่ซี เน๊อ, “โป่แหว่ ซี๋, เป ดุแหย่แถ่เซ แพ๊ เน๊อ เป เตเอ่เตแร เออเต๊อเจอะ อาคยา แพ๊ เนอหม่า ซี ซิเง ดื่อเฮ๊อ. 26คูเปาโล เฮ๊เออ เตเพรเนอ อา เมแคร๋ อิเต เนอหม่า ซี แม๊เถอะหนิโฮ ลอดื่อเฮ๊อ เร๊อ ซิเหน่ เฮ๊อ. อา จว๊า อิลออี๊โหล่ ปย๊า ลอ อู เร๊อ จอแปแหร่ เด๊อ แกแย แบ๊ เร๊อ อากู๊ขุ เต๊เห่เนอ, จอแปแหร่ หม่า ตีกี๋ โต่, อา เฮ๊ ฮู๊เนอ. เร๊อ อา อิลออี๊โหล่ หนิ โหร่แหน่เจ๊อ อู ตื๊อ แกแย โอ่เบ๊อะวีเอเฟซัส อากูเออ เต๊เห่เนอ หม่าโต่, อา ผือ อิลออี๊โหล่ หนิลอ เจ๊อเฮ๊อ เอเอเชีย เต๊เก๋เล เจ๊อเฮ๊อ. 27ฮู๊เนอเรอ, ซิอิเช เน๊อ เป เตเอ่เตแร เออ ปย๊าแก. โท๊โต่ แว เบ่ยอ เน๊อ ปาหม่า อู แด่ดุหยื่อแหน่ เกอ ปา แบ่เจ่ โหมะ อาเทมิส อา เตจ๊อเบโฮ โต่. เอเชียเก่ เต๊เก่เล เน๊อ เห่ขุต๊าบ่าลอ จ๊อเบแถ่ ลอปลี อาเทมิส. แว เบ่ยอ เร๊อ แบ่เจ่ โหมะ อาเทมิส อามุย โลเทอโลเก่ เออเนอ, ปาหม่า อา อาโอ่เหม่แก เห่.” 28เพรเมเออเนอ เออเต๊เห่ หนิโฮ เตเฮ๊เบ่ เออเต๊เห่ เร๊อ เหย่ซี ซิปล่อดุ โกโน๋ โต่, เร๊อ เหย่ซี เอ๊โทแถ่ ลอ เน๊อ, “เอเฟซัส แบ่เจ่ โหมะ อาเทมิส เออเตเพร หม่า อา เตอเรอดุเตอเรอทู แหน่เจ๊อ!” 29เตตอปลอตือซือ โอ่ทวาแถ่ เร๊อ อา จว๊าปีชี ลอ เจ๊อ ตีวีลอ เจ๊อ. แกแย เบ๊หมู่ ปื่อหม่า มาซิโดเนียพู๊ คูกายอัส เร๊อ คูอาริสทารคัส เด๊อ อา จว๊า หนิซว๊าหนิโค เกอแน๊ คูเปาโล เออซิเนอ. เร๊อ อู จุ่ยจว๊า เหย่ซี เด๊อ อู เหล่เด๊อะโล เตแลหวิแลวอ อาเหล่โอ่ เบ๊อะวีกูเนอ. 30คูเปาโล ซิหยื่อ จว๊า เด๊อะโล อาเหน่ เด๊อ แกแย เบ๊หมู่ เต๊เห่ อา เป๊เส่เง ตื๊อดื่อเรอ เพรหยื่อเอ่ เต๊เห่ เด๊อะจว๊า ลู โต่. 31คูเปาโล อา โคแบ๊ซว๊า เด๊อ อา ทวา เอเชียเก่ ทวาดุทวาเต เนอเต๊เห่ เจ๊อเบ่เบ่, อา นอซูแฮ เตหรี่เตแก เด๊อ ลูโอ่ เร๊อ อา กุยซิยอ ลู เร๊อ นอแฮ เด๊อะโล แต่ อาเหน่ เด๊อ อู เหล่แลหวิแลวอ อาเหล่โอ่ เออเนอ แต่เหม่ อา แด๊โฉ่โล จว๊า เกอ ลู ฮู๊เนอเนอ. 32เบ๊อะเนออาเค, แกแย เด๊อ อา แฮโอ่ปล๊อ แลแค เบ๊อะเนอ เต๊เห่ เมซู๊ซีซู๊ซ๊า โตโครแต๊แขระ เร๊อ เตเพร เต๊อเจอะเจ๋อ อา เอ๊โทเอ๊โม ลอ แลแค. เหย่ซี แฮ โอ่ปล๊อโอ่ปลูลอ แลแค เบ๊อะเนอ เร๊อ เตหรี่เตแก หม่าเต๋ เนอ อา ซิเง เกอเร๊อ แลแค อาเหน่โต่ เต๊เห่เนอ, อา ผื่อ เตเร ลอ เจ๊อ ปวาเพร เจ๊อ. 33แกแยยิวพู๊ เต๊เห่เห่เนอ อา นอเถ่ อเล็กซานเดอร์ เด๊อ แกแย เบ๊หมู่ อา เป๊เส่เง, เร๊อ แกแย เบ๊หมู่ เออเต๊เห่ เฮ๊ ลู เร๊อ เฮ๊เบ่ มอ เป. เร๊อ คูอเล็กซานเดอร์ บ๊อแถ่ อากู๊ขุ เร๊อ อา นอโอ่โส่ เหย่ซี. เร๊อ อา เฮ๊โฉ่โปล เป่ แกแย เบ๊หมู่ เออเต๊เห่ เร๊อ เตเมทวาแถ่ อาเหน่ เออเต๊เห่. 34หม่าแน๊เรอ เบ๊อะเหย่ซี ซิเงเฮ๊อ เร๊อ อา หม่า แกแยยิวพู๊ เตเพรแพ๊ อาเบ๊อะเนอ, เหย่ซี เอ๊โทแถ่ โหร่ลอ ลู เร๊อ อา เฮ๊ แลแค เน๊อ, “เอเฟซัส แบ่เจ่ โหมะ อาเทมิส เนอหม่า อาเตอเรอดุ แหน่เจ๊อ! อา เอ๊โทแถ่ เออเนอ, อา ผือ โอ่งยา เจ๊อ เนอมือเจ๊อ.” 35เด๊อคยา เร๊อ วี อา เพรราลี เออเตเพร นอโอ่โส่ แกแย เบ๊หมู่ เออเต๊เห่, เร๊อ อา เฮ๊ เหย่ซี เน๊อ, “วีเอเฟซัส ล๋อ ปลี ซี๋, อู ปว๋า เตเพร ซิเง เร๊อ เป วีเอเฟซัส เต๊เห่หม่า เพร เด๊อ อาแม๊อาตู่ แบ่เจ่ คุ๊ยโหมะ อาเทมิส เตหลู่แตโฮ เร๊อ หล่อบูโพ๊ เด๊อ อา โอ่ เด๊อ ม๊อขุ ตาแล เนอเตเม เนอหม่า อู ซิเง แลแค เจ๊อ ปว๋า เตเพร เจ๊อ. 36อู เท๊บี๊เมบี๊ เป่แจ่ เร๊อ เตหรี่เตแก เออเต๊เห่ เตเพร่ว โต่. เมฮู๊เนอเรอ, โส่โส๋ ซี โต โอ่ แลแค เร๊อ ซี โหล่ เมบูเมบย่า ล๋ายโต่. 37แกแย เด๊อ ซี เอ๊แฮ ลู เบ๊อะเออ เต๊เห่ เนอหม่า, แกแย เด๊อ อา ปื่อเผ่พย๊าเผ่ อูเต เด๊อ เตหลู่แตโฮ อากู เนอเต๊เห่ เน๊อ อา เป๊อเจ่ออิแช๊ เป แบ่เจ่ โหมะ เนอเต๊เห่ หม่าโต่. 38คูเดเมตริอัส เร๊อ อา เพรเมเตพู๊ เออเต๊เห่เนอ, อา เก่ ซิหยื่อ เบ่ เตซื๊อ อู เตเพรเพร เฮ๊เรอ อาหนิ แพ๊. เมเตเฮ๊เรอ เตแด๊เฮอ เจแม๊โฮ บ๊อโม แพ๊, โทเร๊อ ค๊าขิ โตแพ๊ เด๊อ เพรแด๊เฮอ เจแม๊ เต๊เห่ แฮโอ่ โต แลแค เบ๊อะเออ แพ๊. เบ๊อะเต๋ ตู๊หมู่ เบ่เบ่, อา เก่ แด่แถ่ อูเตซื๊อ เด๊อ แกแยดุโอ่, เร๊อ อา เก่ ซิหยื่อ เฮ๊เบ่ อู เร๊อ แกแยดุ เฮ๊เนอหม่า อาหนิ แพ๊. 39หม่าแน๊เรอ เตแด๊เฮอ เจแม๊เด๊อ อาโร เก่ โอ่ข่อ โป่ดื่อ เฮ๊เรอ, เหย่ซี โตเบ่แด๊เฮอ เจแม๊ คุ๊ย เหล่โกล เอ๊โอ่ปล๊อ เทอพู๊เก่พู๊ เบ๊อะเนอ. 40เตทวาแถ่เฮ๊อ อาเหน่ เออเตอเนอ อากูเนอ, เป ซิอิเช เร๊อ คุ๊ยโรม เต๊เห่ แด่เตซื๊อ เด๊อ เปเหน่ลู เร๊อ อา เก่ เฮ๊ เป เร๊อ ซี เมดุแถ่ เตซู๊ซีซู๊ซ๊า ฮู๊เนอ เตซู๊ซีซู๊ซ๊า ทวาแถ่ดุ ฮู๊เออเนอหม่า, เป เฮ๊เบ่แลเปล๊แจ่ เกอเร๊อ เปเหน่ เตอเจ๋อ โต่. เตซู๊ซีซู๊ซ๊า ทวาแถ่ เร๊อ เตหรี่เตแก อิเตเนอ, เป แด๊โฉ่โลแจ่ เป่ อู เตอเจ๋อ โต่.” 41อา เฮ๊โท ฮู๊เออ เร๊อ, อาปลวากาแก ลอ แกแย เบ๊หมู่ เออเต๊เห่.
Copyright information for
EkySCThai