Acts 20

คูเปาโล จว๊าโป่ เด๊อ มาซิโดเนียเก่ เร๊อ กรีกเก่

1เบ๊อะเตซู๊ซ๊า โอ่โส่ โทเฮ๊อ อาเบ๊อะเนอ, คูเปาโล เอ๊ปล๊อ เพรหยื่อเอ่ เต๊เห่ เร๊อ อา เด๊อะอ๊าเด๊อะเหร่ เหย่ซี, อา เฮ๊โมเฮ๊แร๊แก เหย่ซี โทเร๊อ อา เถ่จว๊า เด๊อ มาซิโดเนีย เก่กู. 2เบ๊อะอา จว๊ารว๊า ดอ อาโอ่ เบ๊อะแกล๊ลู เต๊เห่ อาเบ๊อะเนอ, อา เด๊อะอ๊าเด๊อะเหร่ จว๊า เอ๊เป่ ลา อู. โทเร๊อ อา จว๊า แฮเง โป่ เด๊อ กรีกเก่. 3อา จว๊าโอ่ เบ๊อะเนอ โซเล โทเร๊อ อา โอ่ ตี๊หรี่แตแรเฮ๊อ อาเหน่ เร๊อ อา เก่ เถ่จว๊า เด๊อ ซีเรียเก่ เน๊อ ส่อเกลอดุ ตื๊อดื่อเรอ อา ซิเง เร๊อ แกแยยิวพู๊ เต๊เห่ เคร เมเซอ ลู อาขว่าอาคยา, อา แด่แล คยาแซ๊ อาซิปล่อ เร๊อ อา เก่ กาโน จว๊าตาลว๊า คยาแซ๊ มาซิโดเนียเก่ เร๊อ อากู๊โด่. 4วีเบโรอาพู๊ เพโสปาเทอร์ อาพู๊คู คูปีรัส เร๊อ วีเธสะโลนิกาพู๊ คูอาริสทารคัส เร๊อ คูเสคุนดัส, โทเร๊อ วีเดอร์บีพู๊ คูกายอัส, เร๊อ คูทิโมธี, เร๊อ เอเชียเก่พู๊ คูทีคิกัส เร๊อ คูโตฟีมัส เต๊เห่ ครวาจว๊า เกอเร๊อ ลู. 5เหย่ซี จว๊าโอ่ป่อเหร่อ เป เด๊อ วีโตรอัส อากู. 6ป่วย ค๊อมู โชโด โฮหมื่อโต๊โผ่ โทเฮ๊อเฮ๊อเน๊อ, เป แถ่แด๊หนิ ส่อเกลอดุ เบ๊อะวีฟีลิปปี เนอ เร๊อ เป แฮแม๊เถอะ เร๊อ เหย่ซี เด๊อ วีโตรอัส. เป แฮ เด๊อ แกล๊ลู เนอ อา โอ่ เจ๊อ แงเซ เจ๊อ. เร๊อ เป แฮ โอ่งยา เบ๊อะเนอ โซซว๊าเตอเนอ.

คูเปาโล จว๊าโอ่เลเกอ เพรหยื่อเอ่ เต๊เห่ เด๊อ วีโตรอัส อาเนอเล๊อ โตโพ๊.

7เบ๊อะม๊อก่อต่อ เหมาะเฮ๊ อาเบ๊อะเนอ, เป โอ่ปล๊อโอ่เต่อ คยาแซ๊ลู เด๊อ เก่ บิกยา ค๊อมู อาเง. ป่าโรปา เนอ คูเปาโล เตเร เถ่จว๊าเฮ๊อ อาขว่าอาคยา, อา เฮ๊เบ่ โต่ เจ๊อ แกแย เบ๊หมู่ เออเต๊เห่เนอ เด๊อ เหมาะเนเค เจ๊อ. 8หี่ด๊อกู เด๊อ อาขุโต๊โต่ เบ๊อะเป เหล่โอ่กู๊เต่อ ลู อาเหล่โอ่ เนอ, อู ชีลี เอ๊ลา หมิ. 9เป๊เจ่ เพรคู พู๊เส่ เด๊อ อามุย เร๊อ คูยุทิกัส เฮ๊เออ เตเพรเนอ อา โอ่แนโอ่ เด๊อ กู่ดาพู๊ขุ. คูเปาโล โด่แน งยาแหน่เจ๊อ เร๊อ คูยุทิกัส โอ่เมอคา เร๊อ อา โอ่เมอตาปา ลา. เออโตโพ๊เรอ อา โอ่เด๊อ หี่ขุ โซโต่โต๊โต่ เร๊อ อา แลตา โต่เด๊อ เห่ขุ. เบ๊อะอู จว๊า แพ๊แถ่ ลู อาเบ๊อะเนอ, อา เซอเฮ๊อ. 10เร๊อ คูเปาโล แก๊ตา เด๊อ หี่เล เร๊อ อา โอ่เมอ แพ๊เกล๊ตา ลู เร๊อ อา เฮ๊ เน๊อ, “เบ่ยอ แต่เหม่. อา เซอเพรปา แพ๊!” 11โทเร๊อ อา แก๊แถ่ คยาแซ๊ เด๊อ หี่ด๊อกู เร๊อ อา แถ่บิกยา ค๊อมู เร๊อ อา เก่ เอ่เต่อโอเต่อเกอ เต เน๊อ เพรหยื่อเอ่ เต๊เห่. อา เฮ๊เบ่งยา เต่อเกอ เร๊อ เหย่ซี โต่เด๊อ เหมาะลีบู เร๊อ อา เถ่จว๊าแก เนอ แพ๊. 12เหย่ซี กาซู เป๊เจ่ เพรคูพู๊เส่ คูยุทิกัสเออ เด๊อ อาหี่. อา เซอเพร ปาแพ๊ อาขว่าอาคยา, อา โมคยา แหน่เจ๊อ เหย่ซี ซิปล่อ.

คูเปาโล โอ่เด๊อ วีโตรอัส เร๊อ เถ่จว๊า เด๊อ วีมิเลทัส

13คูเปาโล เฮ๊แก เป เน๊อ จว๊าแถ่แด๊ ส่อเกลอดุ เร๊อ เถ่จว๊า เหร่อ เด๊อ วีอัสโสส เน๊อ. เร๊อ คูเปาโล เก่ จว๊า แถ่แด๊ เกอ เป เบ๊อะเนอ ปา. เมเตเฮ๊เรอ อา เร๊อ อา เก่ จว๊า เน๊อ อากู๊โด่ เด๊อ โคขุ ตากยา ปา. 14เป แม๊เถอะฉื่อ ลู เด๊อ วีอัสโสส, เร๊อ เป แถ่แด๊จว๊า โหร่ลู ส่อเกลอดุ เด๊อ วีมีทิเลนี. 15เป แถ่แด๊ จว๊า ส่อเกลอดุเออ เร๊อ ป่าโร เตอเนอเนอ, เป จว๊าโต่ เด๊อ คิโอสกลื๊อ. เด๊อคยาเตอเนอ เร๊อ เป จว๊าโต่แลติ เด๊อ สามอส กลื๊อ. เด๊อคยาเตอเนอ โป่ เร๊อ เป จว๊าโต่ เด๊อ วีมิเลทัส. 16แซ่ฮู๊ ม๊อเนอม๊อเซ เก่ ลอแกเดเตเบ๊อะเอเชียเก่กู เออ แต่เหม่เนอ, คูเปาโล แด่แล อาซิปล่อ เน๊อ อา เก่ จว๊า ตาลว๊าแก วีเอเฟซัส. เก่ อาแร๊หนิ เร๊อ คูเปาโล ซิหยื่อ จว๊าโต่ แพรเล๊ เกอ ป่วยเพ็นเทคศเต เบ๊อะวีเยรูซาเล็ม อากูเนอ.

คูเปาโล เฮ๊เบ่ เร๊อ วีเอเฟซัส เพรหยื่อเอ่ตู๊หมู่ตอกล๊อ โหมะพรูโหมะเผร่ ทวาดุทวาเต เต๊เห่ เด๊ออาโน่เล๊อ โตโพ๊

17เบ๊อะคูเปาโล โอ่เบ๊อะวีมิเลทัส เบ๊อะเนอ, อา หม่าแฮ เพรหยื่อเอ่ตู๊หมู่ตอกล๊อ โหมะพรูโหมะเผร่ เด๊อ อา ทวา ทวาดุทวาเต เร๊อ อา โอ่ แลแค เด๊อ วีเอเฟซัส อากู เนอเต๊เห่ เด๊อ อา โอ่. เร๊อ อา เฮ๊ เหย่ซี เน๊อ อา เก่ จว๊า แม๊เถอะ ตาฉื่อ ลู เบ๊อะวีมิเลทัส อากูเออ. 18เบ๊อะเหย่ซี แฮโต่เฮ๊อ อาเบ๊อะเนอ, คูเปาโล เฮ๊ เหย่ซี เน๊อ, “เป๊อแถ่ เบ๊อะแว แฮโต่ลู่ เด๊อ เอเชียเก่ เนอเตอเนอ ตาเป่แฮเนอ, แว ก๊อถ่อโอ่แน เตอเน๊อ ซี ฮู๊เตฮู๊เตเนอ ซี ซิเง โทดื่อเฮ๊อ. 19เบ๊อะแว แม๊เถอะเบ่ เจ๊อ เร๊อ เตแป่เตเช เด๊อ แกแยยิวพู๊ เต๊เห่ เครเม มู๊แหม่รีแจ่ เจ๊อ แว อาเบ๊อะเนอ ตื๊อดื่อเรอ แว ย๊อ แรเต เด๊อ จอแปแหร่ อาเง อาขว่าอาคยา, แว เบ่ เป๊เส่เทอ ตา เจ๊อ. โท๊โต่ แว เบ่ แด่ทูซิปล่อ ตื๊อดื่อ เจ๊อ เด๊อแว ซิปล่อ. 20ซี ซิเงดื่อเฮ๊อ เน๊อ เตเฮ๊โฉ่โด่แน เต๊อเจ่อเจ่อ เด๊อ อา เก่ ทวาแถ่ เตเมจว่า เด๊อ ซิเง เฮ๊เนอ, แว เมบี๊เมโอ๊แก เร๊อ เตอเจ๋อ โต่. เร๊อ เด๊อ แกแย เบ๊หมู่ อาเกล เบ่เบ่, เด๊อ ซีหี่ซีแพ อากู เบ่เบ่, แว อิซว๊าอี๊แส่ เป่ โทเฮ๊อ ซี เฮ๊อ. 21แกแยยิวพู๊ เต๊เห่ เบ่เบ่, แกแยยิวพู๊ หม่าโต่ เต๊เห่ เบ่เบ่, แว เฮ๊ตาชอ แหน่เจ๊อ เหย่ซี เนอหมู่ลอ เน๊อ, ถู่แหล่ เต๊เปล่ แลแค ซี ซิปล่อ เร๊อ หยื่อเอ่แหน่ เกอ แลแค แบ่เจ่ เหย่ซู่, แว เฮ๊ เป่ เหย่ซี ฮู๊เนอ เนอ.

22“กู๊แหน่เออ, แว หนิดา แหย่โยบูโพ๊แบ่เจ่ อาโหง่ เร๊อ แว เก่ จว๊า เด๊อ วีเยรูซาเล็ม. เบ๊อะเนอ ปาเร๊อ เต เตเร เมอาเหน่ เน๊อ แว ฮู๊เตฮู๊เต ปาเนอ, แว ซิเงโต่. 23แว ซิเง แพ๊ เต๊อเจ่อเจ๋อ แพ๊ เน๊อ, เด๊อ วี ปว๊าตีวี อากูเนอ, แหย่โยบูโพ๊แบ่เจ่ เด๊อะรอ แว เน๊อ อู เบ่ จอกลอ หม่า แว ปา. เร๊อ เพร เมแป่เมเชแว เต๊เห่เนอ, อา โอ่ป่อ หนื่ออื่อเฮ๊อ แวแกล๊ เฮ๊อ. 24หม่าแน๊เรอ แซ่ฮู๊ แว เก่ เมโทแก เตเม เด๊อ แบ่เจ่ เหย่ซู่ เด๊อะแลแก แวเออ อาเงเนอ, แว แด่ดุ ซิโล เกอ เร๊อ ปา เจ๊อ แว ซิปล่อ เซอเพร เออเนอ โต่ เฮ๊อ. เตเม เด๊อ อา นอเม แว เออเต๊เห่ เนอหม่า หม่าเฮ๊อ แว เบ่ ข่าเฮ๊โล เน๊อ จอแปแหร่ อาบุ๊ยอาเตอเรอ อา เตซิครือมีลา เออ อาหรี่อาแก เออเนอ เฮ๊อ. ^a

25“กู๊แหน่เออ แว ซิเงเฮ๊อ เน๊อ ล๋อ ซี เด๊อ แว แด๊โฉ่โด่แน เป่โท ลอเฮ๊อ เน๊อ จอแปแหร่ อาเทออาเก่ อาหรี่อาแก เออเต๊เห่ เนอ, เป๊อแถ่ กู๊แหน่เออ ตาเป่แฮ เนอ ซี แม๊เถอะ ปา แว เตเพร่ว โต่ เฮ๊อ. 26ฮู๊เนอ อาขว่าอาคยา, เออเตอเนอ, แว เก่ แด๊โฉ่โล ซิเง ตาเตแก เป่ ซี เร๊อ ล๋อ ซี เออเต๊เห่เนอ, ซี เก่ ซิปล่อเซอเพร ปย๊าแก เตเพร เพร เก่เฮ๊เนอหม่า แว เตซื๊อ หม่า ปาโต่ เฮ๊อ. 27เมเตเฮ๊เรอ ล๋อ เต เด๊อ จอแปแหร่ เซเรหนื่ออื่อ เต๊เห่เนอ, แว ด๊อโอ๊ด๊อบี๊ เร๊อ เตอเจ๋อ โต่. แว เฮ๊โฉ่ซิเง เป่ โทลอเฮ๊อ ซี เฮ๊อ. 28แม๊ตู่ เร๊อ ดื่อ แลแค ซีเหน่ เร๊อ แม๊ตู่ เกอเร๊อ แลแค ล๋อ ซิหมิ เด๊อ แหย่โยบูโพ๊ เด๊อะตาแก เป่ ซี เด๊อ ซี เบ่ แม๊ตู่หนิ เออเนอ เต๊เห่ นี๋. ทวา แลแค เพรเกซิหมิพู๊ เด๊อ อา แม๊ตู่หนิ อาซิหมิ เออเต๊เห่ เนอ เต๊เห่ นี๋ แม๊ตู่หนิ แลแค จอแปแหร่ อา เพรหยื่อเอ่ ตู๊หมู่ตอกล๊อ เด๊อ อาพู๊คู พรีกา โทเฮ๊อ เน๊อ อาสุ่ย เร๊อดื่อ เออเนอ นี๋. 29แว เถ่จว๊าแก โทเฮ๊อ ปาเนอ, แว ซิเง เร๊อ แกแย เด๊อ อา แซ่ เน๊อ ถุ่ยมี เด๊อ อาฮาอาเฮ เต๊เห่ เก่ แฮโน เด๊อ ซีเกล ปา, เร๊อ อา เก่ โนเมเช ลอ ซิหมิ ตู๊หมู่ เออเต๊เห่ ปา. 30เร๊อ เด๊อ ซีเกลเนอ แกแย เก่ โอ่โลแถ่ เต๊เห่เห่ ปา. เร๊อ แซ่ฮู๊ เหย่ซี เก่ อิลออิโหล่ จว๊าหนิ เพรหยื่อเอ่ เต๊เห่ อาเง เนอเรอ, อา อี๊ลอแลโฮ จว๊า เหย่ซี ปา. 31ฮู๊เนอ อาขว่าอาคยา, รอเรหนิ แลแค ซิเหน่ นี๋. เร๊อ แว อิซว๊าอี๊แส่ หนิ ซี เหมาะคี๊คี๊ เหมาะเชเกลเกล โซหน่า อากู เจ๊อ. โท๊โต่ ปวา โพโพ๋ แว เป๊เส่เทอตา เด๊อ ซิเง เอ๊แหน่เจ๊อเนอ ซิเงแถ่เบ่ แลแค ดื่อนี๋.

32“กู๊แหน่เออ, แว เด๊อะตาแก ซี เด๊อ จอแปแหร่ อา เตแม๊เตตู่ อากู เร๊อ อาบุ๊ยดุอาเตอเรอทู อา เตหรี่เตแก เออเนอ อากู เฮ๊อ. อา เตหรี่เตแก เออเนอ อา เมดุแถ่ทูแถ่ แจ่ ซี เร๊อ อา เก่ เด๊อะ ซี อู่เจเต๊เหย่ เด๊อ อา เบ่ดว๊า หนื่ออื่อ เป่ เร๊อ อา แกแยหยื่อเอ่ ล๋อ ปลี เออเต๊เห่ อาเง เนอ ปา. 33รือ เบ่เบ่, เท เบ่เบ่, เห่อจ่า เหล่กือเหล่แซ๊ เบ่เบ่, แว ซิหยื่อซิลอ น๊อเกอ เน๊อ อูเต เตเพร่ว โต่. 34ล๋อ เต เด๊อ แว เน๊อ แว โคแบ๊ซว๊า โหล่เบ่ เต๊เห่เนอ, แว เมจว่า หนิเร๊อ ดื่อ เน๊อ แวเหน่ เนอหม่า ซี ซิเง ลอดื่อเฮ๊อ. 35แซ่ฮู๊ เป เก่ เมจว่า เบ๊เกอ แกแย เด๊อ อ๊าเจ่เหร่เจ่ เต๊เห่เนอเรอ, แว เม แบ๊บือ ลอ โทเฮ๊อ ซี ปว๋า เต๊อเจ่อ เน๊อ เป โตเบ่ เอครือแรครือ เต, ฮู๊เนอ. เร๊อ ซิเงแถ่เบ่ แลแค แบ่เจ่ เหย่ซู่ อา เตเฮ๊เบ่ เด๊อ อา เฮ๊ เน๊อ, ‘เด๊อะเต เน๊อ อูเนอ พย๊าหนิ เอ๊เล๊อ ปา เจ๊อ เตบุ๊ยเตเตอเรอ เน๊อ อู เด๊อะ เน เนอเจ๊อ,’” คูเปาโล เฮ๊ เป่ เหย่ซี ฮู๊เนอ.

36เบ๊อะคูเปาโล เฮ๊เบ่โทเฮ๊อ อาเบ๊อะเนอ, อา แด๊งือแล เต่อเกอลอ เร๊อ เหย่ซี ปว๋า เตเพร เร๊อ อา กุยจ๊อเบ. 37เร๊อ เหย่ซี แพ๊ โนมื๊อ เฮ๊โมเฮ๊แร๊แก คูเปาโล เร๊อ อา โหง่ แลแค เจ๊อ ปว๋า เตเพร. 38เหย่ซี ซิเปลซิหย่อ เล๊อหม่าเฮ๊อ คูเปาโล เฮ๊ เหย่ซี เร๊อ ซี แม๊เถอะน๊อ ปา แว โตโพ๋ โต่ ปา, อา เฮ๊ เหย่ซี เออตือมือ เนอเฮ๊อ. เร๊อ เหย่ซี ซูจว๊า ลู เด๊อ อู เหล่แด่ ส่อเกลอดุ เหล่โอ่เนอ.