Act 21 | EkySCThai | STEP | เป เฮ๊โมเฮ๊แร๊แกโท เหย่ซี เบ๊อะเนอ เร๊อ เป เถ่จว๊าแก. เป แถ่แด๊หนิ ส่อเกลอดุ เร๊อ เป จว๊า จ๊อจ๊อ เจ๊อ เด๊อ กลื๊อ. เด๊อ อู เฮ๊ เร๊อ โขส กลื๊อ. ป่าโร เตอ เนอเนอ เป จว๊าโต่ เด๊อ โรโด่ กลื๊อ เร๊อ เป จว๊า เป่แฮ ลาโป่ เด๊อ วีปาทารา.

Acts 21

คูเปาโล จว๊า เด๊อ วีเยรูซาเล็ม

1 เป เฮ๊โมเฮ๊แร๊แกโท เหย่ซี เบ๊อะเนอ เร๊อ เป เถ่จว๊าแก. เป แถ่แด๊หนิ ส่อเกลอดุ เร๊อ เป จว๊า จ๊อจ๊อ เจ๊อ เด๊อ กลื๊อ. เด๊อ อู เฮ๊ เร๊อ โขส กลื๊อ. ป่าโร เตอ เนอเนอ เป จว๊าโต่ เด๊อ โรโด่ กลื๊อ เร๊อ เป จว๊า เป่แฮ ลาโป่ เด๊อ วีปาทารา. 2 เป แม๊เถอะ ส่อเกลอดุ เบ๊อะเนอ เต๊เบ่ เด๊อ อา เตเร จว๊า เด๊อ วีฟีนีเซีย เร๊อ เป แถ่ แถ่แด๊หนิ เร๊อ เป เถ่จว๊า. 3 เบ๊อะเป แม๊เถอะจว๊าโลเฮ๊อ ไซปรัส กลื๊อ เบ๊อะเนอ, เป จว๊า เด๊อ ชิแล ตากยา เร๊อ เป จว๊า เด๊อ ซีเรียเก่. ส่อเกลอดุ เก่ เถ่แด่ ตาแก ตาหมื่อตาเต เต๊เห่ อาขว่าอาคยา, เป เถ่โอ่โก๊แก เด๊อ เทอทือ เบ๊อะวีไทระเนอ. 4 เป แม๊เถอะ เพรหยื่อเอ่ เบ๊อะเนอ เต๊เห่ เร๊อ เป จว๊า โอ่โก๊เกอ เหย่ซี เบ๊อะเนอ โซซว๊าเตอเนอ. เร๊อ แหย่โยบูโพ๊แบ่เจ่ ถู่แร เหย่ซี ซิปล่อ อาขว่าอาคยา, เหย่ซี แด๊โฉ่ เป่ คูเปาโล เน๊อ, “จว๊า แต่ เด๊อ วีเยรูซาเล็ม แต่เหม่ นี๋.” 5 หม่าแน๊เรอ โซซว๊าเตอเนอ โทเร๊อ เป เถ่จว๊า คยาแซ๊ แกล๊. ล๋อ เพร หยื่อเอ่ เบ๊อะเนอ เต๊เห่ เร๊อ อาพู๊อาเม เต๊เห่ ซูเถ่ เป เด๊อ วีกลอ เร๊อ ซูจว๊าเต่อ เป เด๊อ เทอดุซาวาทือ. เร๊อ เหย่ซี แด๊งือแล ลอปลี เบ๊อะเนอ ปว๋า เตเพร เร๊อ กุยจ๊อเบ แลแค เต. 6 เป เฮ๊โมเฮ๊แร๊แก โท ลู เตเพร เร๊อ เตเพร, เร๊อ เป แถ่ เด๊อ ส่อเกลอดุกู เร๊อ เหย่ซี กาคยาแก ลอ เด๊อ อาหี่.

7 เป เป๊อแถ่ แด๊หนิ ส่อเกลอดุ เบ๊อะวีไทระ เนอเรอ เป เถ่จว๊า เด๊อ วีทอเลเมอิส. เร๊อ เป เฮ๊โมเฮ๊แร๊หนิ เหย่ซี เพรหยื่อเอ่ เบ๊อะเนอ เต๊เห่ เร๊อ เป โอ่โก๊เกอ เร๊อ เหย่ซี เบ๊อะเนอ เตเซ. 8 เด๊อคยา เตอเนอเนอ, เป เถ่จว๊า เร๊อ เป จว๊าโต่ เด๊อ วีซารียา. เป จว๊า โอ่โก๊เกอ เร๊อ เพฟีลิป เด๊อ อา แด๊โฉ่โด่แน เป่ อู เร๊อ เตซิครือมีลา เออเตเพร อาหี่. เด๊อ วีเยรูซาเล็ม อากู เนอ, อู นว๊าแถ่ แกแย โซซว๊าเตเพร เด๊อ อา เก่ เมจว่า อู อาเกลเนอ, เพฟีลิป หม่า อา โอ่เต่อ เกอ เร๊อ แกแย เบ๊อะเนอ เต๊เห่ อาเกล เตเพร. ^a 9 อา พู๊เพรเหมาะ พู๊เส่โอ่ ซิลุย. เหย่ซี เฮ๊โพร หนื่ออื่อ เป่ อู เร๊อ จอแปแหร่ อาหรี่อาแก เต๊เห่.

10 เป โอ่ เบ๊อะเนอ, ม๊อเนอม๊อเซ งยาลา ช๊าเหล่เฮ๊อ อาเบ๊อะเนอ, แกแย มุย เร๊อ คูอากาบัส เฮ๊เออ เตเพรเนอ อา โอ่ เด๊อ ยูดาห์เก่ เร๊อ อา แฮโต่ เบ๊อะเนอ. ^b 11 อา แฮ เด๊อ เปโอ่ เร๊อ อา พย๊าเถ่ คูเปาโล ฮ๊อท๊อ เร๊อ อา จอกลอ เกอ เร๊อ คยาดื่อ เด๊อ อากู๊ขุ เร๊อ กู๊โด่ เร๊อ ฮ๊อท๊อ เออต๊าบ่า เร๊อ อา เฮ๊ เน๊อ, “แหย่โยบูโพ๊แบ่เจ่ เฮ๊ เน๊อ, ‘แกแยยิวพู๊ โอ่ เบ๊อะวีเยรูซาเล็ม อากู เนอเต๊เห่ เก่ จอกลอ ฮ๊อท๊อ แบ่เจ่ เออเตเพรเนอ ฮู๊เออ ปา เร๊อ อา เก่ เด๊อะตาแก ลู เด๊อ แกแยยิวพู๊ หม่าโต่ เต๊เห่ อา กู๊ยากู ปา.’”

12 เบ๊อะเป หนิโฮ เฮ๊อ โหง่เออ อาเบ๊อะเนอ, เป เร๊อ แกแย เด๊อ อาโร โอ่เบ๊อะเนอ เต๊เห่, เป กุยซิยอ คูเปาโล เร๊อ จว๊า แต่ เด๊อ วีเยรูซาเล็ม แต่เหม่ นี๋ เป เฮ๊ ลู ฮู๊เนอ. 13 หม่าแน๊เรอ คูเปาโล เฮ๊ฉื่อ เป เน๊อ, “ซีโหง่ซีเห่ เร๊อ ซี เม ซิเปลซิหย่อ แว เมเต? แว โอ่ตี๊หรี่แตแร หนื่ออื่อ เฮ๊อ แวเหน่ เด๊อ อู เก่ปื่อเก่จอ แว เบ๊อะวีเยรูซาเล็ม เออเนอ ปา ตื๊อดื่อ หม่าโต่, แว ตี๊หรี่แตแร หนื่ออื่อ โป่ เจ๊อเฮ๊อ เด๊อ แว เก่ เซอ เด๊อ แบ่เจ่ เหย่ซู่ อาเง เจ๊อ.” 14 เป กุยซิยอ อา เร๊อ อา หนิปาโต่ อาขว่าอาคยา, เป เฮ๊ ปา ลู เตอเจ๋อ โต่, เป เฮ๊แก แพ๊ เน๊อ, “จู๋ ดื่อเฮ๊อ อาโต แบ่เจ่ อาซิปล่อ อา เตซิหยื่อ เฮ๊อ กอ?” เป เฮ๊แก ลู ฮู๊เนอ แพ๊.

15 เป โอ่โป่ เบ๊อะเนอ เตอเปล๊อฮู๊ เร๊อ, เป ตี๊หรี่แตแรหนิ เป ตาหมื่อตาเต เร๊อ เป เถ่จว๊า เด๊อ วีเยรูซาเล็ม. 16 เพรหยื่อเอ่ เบ๊อะวีซารียา อากู เต๊เห่เนอ, อา จว๊าเกอ เร๊อ เป เร๊อ อา เอ๊จว๊า โอ่โก๊ เป เด๊อ ไซปรัสกลื๊อพู๊ คูมนาสัน เฮ๊ เออเตเพรเนอ อาหี่. คูมนาสัน หม่า เพรหยื่อเอ่ เด๊อ อาเหร่อเล๊อ เต๊เห่ อาเกล เตเพร เฮ๊อ.

คูเปาโล จว๊าโอ่เลเกอ คูยากอบ

17 เบ๊อะเป จว๊าโต่ เด๊อ วีเยรูซาเล็ม อากู เบ๊อะเนอ, เพรหยื่อเอ่ เต๊เห่ เหย่ซีซิครือซิลอ เอ๊โมฉื่อ เจ๊อ เป. 18 เตอเนอเนอ, คูเปาโล จว๊าเกอ เร๊อ เป เร๊อ เป จว๊าโอ่เล เฮ๊เบ่เกอ เร๊อ คูยากอบ เร๊อ เพรหยื่อเอ่ตู๊หมู่ตอกล๊อ โหมะพรูโหมะเผร่ เด๊อ อา ทวา ทวาดุทวาเต เบ๊อะเนอเต๊เห่ ปว๋า เตเพร. 19 คูเปาโล เฮ๊โมเฮ๊แร๊ โท เหย่ซี เร๊อ, อา แด๊โฉ่ โลปวาโลดวา เป่ ลอ เหย่ซี เร๊อ เตหรี่เตแก เด๊อ จอแปแหร่ เมโท เป่ ลอแคร๋ เฮ๊อ ลู เตเอ่เตแร เด๊อ แกแยยิวพู๊ หม่าโต่ เต๊เห่ อาเกล ฮู๊เต เนอเต๊เห่.

20 เหย่ซี หนิโฮโท อา เตเฮ๊เบ่ เร๊อ, เหย่ซี ถู่เซ๊แถ่ แลแค จอแปแหร่ ปว๋า เตเพร. โทเร๊อ เหย่ซี เฮ๊ คูเปาโล เน๊อ, “โป่แหว่ คูเปาโล๋, แกแยยิวพู๊ เด๊อ อา หยื่อเอ่แหน่เอ่รี เต๊เห่เนอ อา โอ่ เจ๊อ เฮ๊อ เด๊อ อารี๊อาซ๊อกู เจ๊อ เฮ๊อ เนอหม่า, เน แม๊เถอะ เฮ๊อ. โทเร๊อ เหย่ซี เออเต๊เห่เนอ อา แด่ดุ ลอปลี เจ๊อ แกแยยิวพู๊ อา เตซว๊าเตแส่ เต๊เห่เจ๊อ. 21 หม่าแน๊เรอ เน จว๊า อิซว๊าอี๊แส่ แก โต่ แกแยยิวพู๊ เด๊อ อา จว๊าโอ่ เด๊อ แกแยยิวพู๊ หม่าโต่ อาเกล เต๊เห่ เร๊อ เน นอ วีแก เหย่ซี เร๊อ คูโมเสส อา เตซว๊าเตแส่ เต๊เห่. โท๊โต่ เน นอ ดื๊อตีลี๊ เกอ เหย่ซี อาพู๊ เต๊เห่ อาพ๊า โต่, โท๊โต่ เน นอ ครวาเมโตโคร เกอปา เหย่ซี เร๊อ แกแยยิวพู๊ อา เหล่โกลเหล่แบ่ เต๊เห่ โต่, อู เฮ๊ เป่ เหย่ซี ฮู๊เนอ. 22 เน แฮโต่ เบ๊อะเนอ เนอหม่า, เหย่ซี เกล๋ หนิโฮ เน แพ๊ ฮู๊เนอ อาขว่าอาคยา, เป โตเบ่ เมฮู๊เต? 23 เร๊อ เมฮู๊ เป แด๊โฉ่ เป่ เน เออเนอ. เบ๊อะเออเนอ แกแย เด๊อ อา แบโทเฮ๊อ อาเหน่ เด๊อ จอแปแหร่ อา เป๊เส่เงเนอ, อา โอ่ ซิลุย. ^c 24 จว๊า เต่อเกอ เร๊อ เหย่ซี เร๊อ จว๊าเมโพ๊เมแปละ โรเกอ เนเหน่ เร๊อ เหย่ซี เนอ. โทเร๊อ นอกลือเตอเล๊อ เหย่ซี กู่กล๊อ เร๊อ ปล๊า เป่ เหย่ซี อาเก่เนอ. ^{▼▼เป๊อแถ่ เบ๊อะแกแยยิวพู๊ เต๊เห่ อาอ๊าอาแบ อาเบ๊อะเนอ, อา จิ อากู๊โล โต่. เบ๊อะอา เตอ๊าแบเออ อา เล๊อแถ่บาแถ่ เฮ๊อเนอ, อา กลือ เตอเล๊อเนอ อากู๊โล เร๊อ อา หลู่แถ่แตแถ่ เตงูดุงูชอ เนหรี่เนแก เด๊อ อู เฮ๊ เต๊เห่เนอ อู ปว๋า เตเพร เก่ ซิเง ลอดื่อ เร๊อ อาหม่า เตอเจ๋อ โต่ ปา.} โท๊โต่ อู เก่ ซิเง ลอดื่อ เร๊อ เน เหน่แบ่แจ่ เร๊อดื่อ เร๊อ เน โอ่เซอเพร ครวาเกอ ดื่อ คูโมเสส อา เตซว๊าเตแส่ อาคยาเนอ ปา. 25 เป ราซูจว๊าเฮ๊อ ลี ต๊าบ่า เด๊อ แกแยยิวพู๊ หม่าโต่ เด๊อ อา ทวาแถ่เฮ๊อ เพรหยื่อเอ่ เต๊เห่ อา โอ่ เร๊อ เป แด๊โฉ่โล เป่ เฮ๊อ เหย่ซี เร๊อ เป เฮ๊เบ่ปลื๊อ โทเฮ๊อ โหง่ เร๊อ เหล่เอ่ เต๊อเจ่อเจ่อ เด๊อ อู หลู่แตแถ่ อา เร๊อ แหย่โย เบ่เบ่, สุ่ย เบ่เบ่, เตมีเตดอ เด๊อ อู จิเซอ อาแกโบ เต๊เห่เนอ เบ่เบ่, เอ่ แต่ อา เหม่. โทเร๊อ โตเบ่ จว๊าซื๊อจว๊าปล๊าหนิ เพรเหมาะเพรคู โต่.” ^e

26 ฮู๊เนอ อาขว่าอาคยา, ช๊าป่าโรเนอ คูเปาโล จว๊าเต่อเกอ เร๊อ แกแยเนอ ซิลุย เร๊อ อา จว๊าเมโพ๊เมแปละ เต่อโร๊ อาเหน่ เร๊อ เหย่ซี พู๊ แกแยยิวพู๊ เหล่โกลเหล่แบ่ โอ่เนอ. แซ่ฮู๊ อา เก่ แด๊โฉ่โล ซิเง หนื่ออื่อ เหร่อ เป่ แกแยยิวพู๊ อา เพรหลู่แต เต เน๊อ อาจว๊าเมโพ๊เมแปละ อา ม๊อเนอเออ อาตื๊อดื่อ เบ๊อะเกเต ปา, โทเร๊อ เหย่ซีเออ ซิลุย เก่ แฮหลู่แฮแตแถ่ เต เบ๊อะเกเต ปา อาเงเนอ, เหย่ซี จว๊าเมโพ๊เมแปละ โท อาเหน่ เร๊อ คูเปาโล จว๊าแถ่โน เด๊อ แกแยยิวพู๊ เตหลู่แต โฮกู.

อู ปื่อ คูเปาโล เด๊อ เตหลู่แต โฮกู

27 เบ๊อะเตเมโพ๊เมแปละ ลี อาม๊อเนอ โซซว๊าเตอเนอ ผื่อโทเฮ๊อ อาเบ๊อะเนอ, แกแยยิวพู๊ โอ่ เด๊อ เเอเชียเก่ เต๊เห่ แม๊เถอะ คูเปาโล เด๊อ เตหลู่แต โฮกู, เร๊อ อาจว๊า นอฉว่านอชอ แกแย เบ๊หมู่ เต๊เห่ เร๊อ อา นอปื่อ อู เร๊อ คูเปาโล. 28 เหย่ซี เอ๊โทแถ่ เน๊อ, “อิสราเอลพู๊ ซี๋, เมจว่า เกอ มอ เป แต๋! แกแย เออเตเพร หม่า, อา จว๊าเล เจ๊อ เหล่โอ่ ปว๋า โต๊โผ่ เร๊อ อา จว๊าเล อิซว๊า เป่ ล๊อ อู ปว๋า เตเพร. อา จว๊าเล อิซว๊าอี๊แส่ เป่ ลอ อิสราเอลพู๊ เต๊เห่ เร๊อ อา อิซว๊าอี๊แส่ โค๊ ปย๊าลอ คูโมเสส อา เตซว๊าเตแส่ เต๊เห่ เน๊อ เตหลู่แตโฮ เออเตเม เฮ๊อ กู๊แหน่เออ. อา เอ๊แฮ หนิเจ๊อเฮ๊อ แกแยยิวพู๊ หม่าโต่ เต๊เห่ เด๊อ เตหลู่แต โฮกู เร๊อ อา แฮโน เม มู๊แหม่รีแจ่ ลอ เหล่โอ่ โพ๊แปละ เบ๊อะเออ เฮ๊อ.” 29 (เหย่ซี จว๊าเฮ๊โต่ ฮู๊เออ เมเตเฮ๊เรอ อา แม๊เถอะ เอเฟซัสพู๊ คูโตรฟีมัส โอ่เกอ เร๊อ คูเปาโล เด๊อ วีกู เร๊อ เหย่ซี เตเน แลแค เร๊อ คูเปาโล เอ๊แฮ โน ลู เด๊อ เตหลู่แต โฮกู อาขว่าอาคยา อา เฮ๊ แลแค ฮู๊เนอ.) ^f

30 เร๊อ อา ซู๊ซ๊าแถ่ ลอปลี เจ๊อ ตีวี เจ๊อ. เร๊อ แกแย เบ๊หมู่ เต๊เห่ แกล่แฮ ปลูลอ เด๊อ คูเปาโล โอ่ เร๊อ อา แฮปื่อ ลู เร๊อ อา จุ่ยเถ่ ลู เด๊อ เตหลู่แตโฮกลอ, เร๊อ โตโพ๊โต อู เมบี๊แก เตหลู่แตโฮ กู่ดาดุ เต๊เห่. 31 เบ๊อะแกแย เบ๊หมู่ เต๊เห่ แม๊ปู เมเซอเฮ๊อ คูเปาโล อาเบ๊อะเนอ, อู ซูจว๊า เตหรี่เตแก เด๊อ โรมัน เกลอฮู๊ตีรี๊ อากู่กล๊อ เออเตเพร อา โอ่, เร๊อ อู เฮ๊ ลู เร๊อ วีเยรูซาเล็ม ต๊อปล่อตือซือแถ่ ลอ เจ๊อเฮ๊อ ตีวี เจ๊อ. 32 โตโพ๊โต เกลอฮู๊ตีรี๊ อากู่กล๊อ เออเตเพร เอ๊หนิ เกลอฮู๊เตเย อากู่กล๊อ เต๊เห่ เน๊อ เกลอฮู๊ เต๊เห่ เร๊อ อา แกล่โน แลแค เด๊อ แกแย เบ๊หมู่ เต๊เห่ อากู, เร๊อ เบ๊อะแกแย เบ๊หมู่ เต๊เห่ แม๊เถอะ เน๊อเกลอฮู๊ กู่กล๊อ เน๊อ เกลอฮู๊ เต๊เห่เบ๊อะเนอ, เหย่ซี อามืออาปอ ปา คูเปาโลโต่.

33 เกลอฮู๊ตีรี๊ อากู่กล๊อ เออเตเพร แฮโต เด๊อ คูเปาโล โอ่ เร๊อ อา แฮปื่อ คูเปาโล. เร๊อ อา เฮ๊ตา อา โคเจ่ เต๊เห่ เร๊อ อา นอปื่อ จอกลอ คูเปาโล เร๊อ สู่เปลอ ต่อเท๊ เนอโบ โทเรอ อา แด๊เฮอ อู เน๊อ, “อา หม่า อูเป? อา จว๊าเม แคร๋ อิเตเต?” 34 แกแย เบ๊หมู่ เต๊เห่ เอ๊โทแถ่ เตเพร เตอเมว เตเพร เต๊อเจ่อ แพ๊, เด๊อ อาโคโร เต๊เห่ เร๊อ อา เอ๊โทแถ่ โค๊ลาติ เตอ เจ่อ. เด๊อ เตเมอาเหน่ ฮู๊เออ อาขว่าอาคยา, เกลอฮู๊ตีรี๊ อากู่กล๊อ เออเตเพร ซิเง ตาเต เป่ปาโต่ อาขว่าอาคยา, อา นอเอ๊ กาแก คูเปาโล เร๊อ อา โคเจ่ เต๊เห่ เด๊อ เกลอฮู๊ เต๊เห่ เหล่โอ่. 35 เบ๊อะคูเปาโล เร๊อ เกลอฮู๊ เต๊เห่ กาโต่ เด๊อ กู่โบ อาช๊า อาเบ๊อะเนอ, แกแย เบ๊หมู่ เต๊เห่ ลื๋อ เมซู๊ซ๊า ฉว่าแฮ อาขว่าอาคยา, เกลอฮู๊ เต๊เห่ จอแถ่ม๊อ กาแก ลู. 36 แกแย เบ๊หมู่ เออเต๊เห่ ครวาเกอ เร๊อ “เมเซอแก ลู,” อา เอ๊โท แลแค ฮู๊เนอ.

คูเปาโล เฮ๊เบ่ แลเปล๊ เกอเร๊อ อาเหน่

37 เบ๊อะเกลอฮู๊ เต๊เห่ เตเร เอ๊โน คูเปาโล เด๊อ เกลอฮู๊ เหล่โอ่ เบ๊อะเนอ, คูเปาโล เฮ๊ เกลอฮู๊ตีรี๊ อากู่กล๊อ เออเตเพร เน๊อ, “แว เฮ๊เบ่ เร๊อ เน หม่า อาหนิ ช๊าเหล่ แอ?” อา เฮ๊ เร๊อ,

เกลอฮู๊กู่กล๊อ เออเตเพร แด๊เฮอ ลู เน๊อ, “เน เฮ๊เบ่แจ่ ช๊าเหล่ กรีกโหง่ แฮ? 38 เด๊อ อาเหร่อเค อางยาล๋า ล๋ายโต่ เนอ, แกแย อียิปต์พู๊ เด๊อ อา เม ตอปลอตือซือ แถ่ ซู๊ซ๊า เร๊อ อา เอ๊เถ่จว๊าโค๊แก แกแยจา แกแยมู๊แหม่ อาเพรลุยรี๊ เด๊อ เก่เชเทอแก หล่อตาม๊าขุ เนอหม่า เน เฮ๊อ แวเฮ๊โต่?”

39 เร๊อ คูเปาโล เฮ๊ฉื่อ ลู เน๊อ, “แว หม่า แกแยยิวพู๊ เตเพร, แว โอ่เป๊เจ่แลเบ๊อะซีลีเซียเก่, วีทาร์ชัส อากู เนอแพ๊. วีเออ ตีวี เนอหม่า วี เด๊อ อามุย โลเทอโลเก่ ตีวี. แว หม่า วีทาร์ซัส พู๊ เตเพร แพ๊. แด่ทูซิปล่อ เร๊อ เด๊อะแว ค๊าขิ เด๊อ แว เก่ เฮ๊เบ่ เร๊อ แกแย เบ๊หมู่ เออเต๊เห่.”

40 เร๊อ เกลอฮู๊ตีรี๊ อากู่กล๊อ เออเตเพร เด๊อะอา ค๊าขิ อาขว่าอาคยา, คูเปาโล ก๊อถ่อ เบ๊อะกู่โบลู เนอ, เร๊อ อา วื๊อแหว่จว๊า อากู๊ขุ เด๊อ แกแย เบ๊หมู่ เออเต๊เห่ อา โอ่. เบ๊อะเหย่ซี โอ่โส่เฮ๊อ อาเบ๊อะเนอ, คูเปาโล เฮ๊เบ่ตา เหย่ซี เร๊อ ฮีบรูโหง่.