Acts 22

1เร๊อ คูเปาโล เฮ๊ เป่ เหย่ซี เน๊อ, “โป่แหว่ โหมะเพ ซี๋, หนิดา แลแค แว เตเฮ๊เบ่แลเปล๊ แวเหน่ เด๊อ ซี เป๊เส่เง เออ.” 2เบ๊อะเหย่ซี หนิโฮ อา เฮ๊เบ่ เหย่ซี เร๊อ ฮีบรูโหง่ เบ๊อะเนอ, เหย่ซี ลื๋อ โอ่ โส่ แร๊เกอเล๊อ ปาปา.

เร๊อ คูเปาโล เฮ๊เบ่ แฮเง โป่ เน๊อ, 3“แว หม่า แกแยยิวพู๊ เตเพร, แว กาโอ่เป๊เจ่แล เด๊อ วีทาร์ชัส, เด๊อ ชิลีเซียเก่ อา เตเป๊ออาเล, หม่าแน๊เรอ แว ดุแถ่ เด๊อ วีเยรูซาเล็ม. คูกามาลิเอล หม่า แว ซ๊าร๊า เร๊อ อา อิซว๊า ตาเต แหน่เจ๊อ แว เร๊อ เตซว๊าเตแส่ เด๊อ โหมะเพเพอโพ เด๋อ งย๊าเค เต๊เห่ ครวาเมเกอ โทเฮ๊อ เนอเต๊เห่. แว ซิปล่อฉว่า เมลอซิปล่อชีเม แหน่ ลอ เจ๊อ จอแปแหร่ อา เตเอ่เตแร แซ่เน๊อ ซี เด๊อ อา โอ่ เบ๊อะเออ เต๊เห่ ปวาเพร ซิปล่อฉว่า แหน่เจ๊อ กู๊แหน่ เออเนอเฮ๊อ. ^a 4แกแย เด๊อ อา โครครวา แกล๊ เด๊อ เหย่ซู่ครี๊ เด๊อะโล เออเนอ, แว เมจาเมจือ เจ๊อ เหย่ซี บ๋า เต เฮ๊เนอ, แว เมจาเมจือ โต่ เจ๊อ เหย่ซี เด๊อ อา อาเซอ เจ๊อ. โทเร๊อ แว ปื่อ ลอ เพรเหมาะเพรคู เต๊เห่ เร๊อ แว ด๊อตาลอ เหย่ซี เด๊อ ทอกู. ^b 5แว เฮ๊เบ่จ๊อเฮ๊เบ่เต แพ๊ เนอหม่า, เพรหลู่แต กู่กล๊อดุเล๊อ เออเนอ เด๊อ แกแยยิวพู๊ เน๊อ อา ทวา ทวาดุทวาเต ล๋อ ปลี เต๊เห่ เย๊อเบ๊ อาซิปล่อสู่เทอ เด๊อ แวเง แพ๊. เมเตเฮ๊เรอ, แซ่ฮู๊ แว เก่ จว๊าปื่อ แกแย เด๊อ อา โครครวา เกอ เหย่ซู่ครี๊ อาคยา เนอเต๊เห่ เร๊อ แว เก่ จอกลอ เหย่ซี เร๊อ สู่เปลอต่อเท๊, โทปาเรอ แว เก่ เอ๊กาแด๊เฮอ เจแม๊ เหย่ซี เด๊อ วีเยรูซาเล็ม ปา เนอเรอ, เหย่ซี ทวา ทวาดุทวาเต เนอเต๊เห่ ราจว๊าหนิ ลีเต๊เห่ เร๊อ อา เด๊อะจว๊า เร๊อ แว. ลี เออเต๊เห่เนอ, อา ราจว๊า เป่ อาโป่แหว่ แกแยยิวพู๊ เด๊อ อา ทวา ทวาดุทวาเต เร๊อ อา โอ่ แลแค เด๊อ วีดามัสกัส เด๊อ แว เตเร จว๊า วีเออ ตีวี อากู เนอเต๊เห่ อา โอ่.”

คูเปาโล แด๊โฉ่โล เป่ อู เด๊อ อาซิปล่อ ถู่แหล่เต๊เปล่ อาหรี่อาแก

6“เบ๊อะแว จว๊า ผื่อเฮ๊อ เด๊อ วีดามัสกัส เบ๊อะเหมาะโถ่เฮ๊อ เบ๊อะเนอ, เตลีเตเค โรโซโต๊โก่ โอ่ เด๊อ ม๊อขุ แฮแล ลีตาวา แถ่คย๊า เด๊อ แว อาช๊า. 7แว แลคื๊อตา เด๊อ เห่ขุ เร๊อ แว หนิโฮ โหง่ พราแถ่ เร๊อ อา เฮ๊ แว เน๊อ, ‘คูเซาโล๋, คูเซาโล๋, หม่าเมเตเรอ เน จว๊า เมจาเมจือ แว เมเต?’

8“เร๊อ แว แด๊เฮอฉื่อ อา เน๊อ, ‘แบ่เจ่, เน หม่า อูเป?’

“เร๊อ อา เฮ๊ฉื่อ แว เน๊อ, ‘แว หม่า วีนาซาเร็ธอาพู๊ เหย่ซู่ เด๊อ เน เมจาเมจือ เหย่ ซีเนอ เตเพร เฮ๊อ’ 9แกแย เด๊อ อา ครวาจว๊าเกอ เร๊อ แว เต๊เห่ แม๊เถอะ เตลี เนอโต๊โก่ ตื๊อดื่อเรอ อา หนิโฮ แลแค โหง่ เด๊อ อา เฮ๊เบ่ เน๊อ แว เออเนอ โต่.

10“‘แบ่เจ๋, แว โตเบ่ เมฮู๊เต?’ แว แด๊เฮอฉื่อ อา ฮู๊เนอ.

“เร๊อ แบ่เจ่ เฮ๊ฉื่อ แว เน๊อ, ‘ก๊อถ่อ เร๊อ จว๊าโน เด๊อ วีดามัสกัส อากู เนอ. จอแปแหร่ ตี๊หรี่แตแร เป่โทเฮ๊อ เด๊อ เนเง เฮ๊อ, เน โตเบ่ เมแคร๋ อิเตเนอ, อู เก่ แด๊โฉ่ เป่ดื่อ เน ปา.’ 11เตลีเตเค เนอโต๊โก่ อาขว่าอาคยาเร๊อ, แว เป๊เส่คี๊แก. แวซว๊าแวโค เต๊เห่ โตโตโน แพ๊ แว เด๊อ วีดามัสกัส อากู แพ๊.

12“แกแย อามุย เร๊อ คูอานาเนีย อาโอ่ เตเพร, อา หม่า แกแย เตเพร เด๊อ อา โมแหน่เจ๊อ จอแปแหร่, เร๊อ อา ลือ ครวาเมเกอ ฮู๊ เตซว๊าเตแส่ โอ่ เนอ. เร๊อ แกแยยิวพู๊ โอ่ เบ๊อะวีดามัสกัส อากู เนอเต๊เห่ แด่ดุหยื่อแหน่ แหน่เจ๊อ ลู เจ๊อ. 13อา แฮ ก๊อถ่อโอ่ เด๊อ แว อาช๊า เร๊อ อา เฮ๊ แว เน๊อ, ‘โป่แหว่ คูเซาโล๋, แม๊เถอะ กาคยา คยาแซ๊มอ,’ อา เฮ๊ เนอ, แวเป๊เส่ ลีกา โตโพ๊ ลีกาคยาเจ๊อ, เร๊อ แว แม๊เถอะเร อา.

14“เร๊อ คูอานาเนีย เฮ๊ แว เน๊อ, ‘จอแปแหร่ เด๊อ เปเพ เด๋อ งย๊าเค เต๊เห่ จ๊อเบแถ่ อา เตเพรเนอ, อา นว๊าแถ่เฮ๊อ เน เด๊อ เน เก่ ซิเง เตเด๊อ อาโต ลูซิปล่อ เต๊เห่, โทเร๊อ เน เก่ แม๊เถอะ อา เพรเมเตพู๊ จ๊อเต เตเพร, เร๊อ เน เก่ หนิโฮเบ่ ดื่อ โหง่ เด๊อ อา เฮ๊เบ่ เร๊อดื่อ เน เร๊อ อาเหน่ เออเนอ ปา. 15เมเตเฮ๊เรอ เน เก่ ทวาแถ่ เพรข่าเฮ๊โล เตเพร เด๊อ ลูเง ปา, เร๊อ เน เก่ แด๊โฉ่ เป่ อู ปว๋า เตเพร เน๊อ เต เด๊อ เน แม๊เถอะ, หนิโฮเบ่ เนอเต๊เห่ ปา. 16เน เม แป่เหย่ เนเหน่ เมเต? ก๊อถ่อมอ เร๊อ เจเกอมอ เนเหน่ เร๊อ เทอเนอ, เร๊อ กุยจ๊อเบแถ่ มอ อา เด๊อ อา เก่ ซู๊ปลีแก เน เตซื๊อ เออเนอ,’” คูเปาโล เฮ๊ เป่ เหย่ซี ฮู๊เนอ.

แบ่เจ่ เอ๊ คูเปาโล เร๊อ อา เบ่ จว๊าแด๊โฉ่โด่แน เป่ อู เด๊อ แกแยยิวพู๊ หม่าโต่ เต๊เห่ อาเกล

17คูเปาโล เฮ๊ โป่ เน๊อ, “แว กาคยา คยาแซ๊ เด๊อ วีเยรูซาเล็ม เร๊อ เบ๊อะแว กุยจ๊อเบ เด๊อ เตหลู่แต โฮกู เบ๊อะเนอ, แว แม๊เถอะลว๊า เตเต๊อเจ่อ. 18เด๊อ แว เตแม๊เถอะลว๊า เอออากูเนอ, แว แม๊เถอะ แบ่เจ่ เร๊อ อา เฮ๊ แว เน๊อ, ‘เถ่จว๊าแก แพรแพรเมอ เด๊อ วีเยรูซาเล็ม เอออากูเนอ, เมเตเฮ๊เรอ เนข่าเฮ๊โล เน๊อ เด๊อ แวหรี่แวแก เออเต๊เห่เนอ แกแย เบ๊หมู่ เบ๊อะเออ เต๊เห่ หนิดา เกอ เนเต โต่.’

19“แว เฮ๊ฉื่อ อา เน๊อ, ‘แบ่เจ๋, เหย่ซี ซิเง ตาเต เจ๊อเฮ๊อ เร๊อ แว จว๊า เด๊อ เตจ๊อเบโฮกู เตเม โท เตเม เร๊อ แกแย เด๊อ อา หยื่อเอ่แหน่ เน เต๊เห่เนอ, เต๊เห่เร๊อ แวมือแวปอ เหย่ซี, เต๊เห่เรอ แว ด๊อตา เหย่ซี เด๊อ ทอกู เฮ๊อ. 20เร๊อ เบ๊อะอู เมเซอ คูสเทเฟน เด๊อ อา ข่าเฮ๊โล เน๊อ เนหรี่เนแก เออเตเพร เบ๊เนอ, แว โอ่เกอ เบ๊อะเนอ, เร๊อ แว ครวาโป่ เกอเร๊อ เกอ แกแย เด๊อ อา เมเซอ ลู เนอเต๊เห่ ตากยา เร๊อ แว โอ่ป่อแม๊ หนิ เป่เกอ แกแย เด๊อ อา เมเซอ ลู เนอเต๊เห่ อาจากลอ เต๊เห่.’ ^c

21“แบ่เจ่ เฮ๊ แว เน๊อ, ‘จว๊ามอ! เมเตเฮ๊เรอ, แว เก่ นอจว๊า ตาพายาแก เน เด๊อ แกแยยิวพู๊ หม่าโต่ เต๊เห่ อา โอ่.’”

22เบ๊อะคูเปาโล เฮ๊เบ่ โต่เฮ๊อ เบ๊อะเออ อาคยาเนอ, แกแย เบ๊หมู่ เออเต๊เห่ หนิดาแคปาโต่ เร๊อ เหย่ซี จ่าเพรอ เอ๊โทแถ่ แลแค เน๊อ, “เมเซอแก อา! อาโต โอ่เซอเพร ปา โต่ เฮ๊อ!”

23เหย่ซี เอ๊โทเอ๊โม, โปล๊เถ่ ลอ จากลอ เร๊อ วื๊อแหว่แถ่ เร๊อ เว๊อแถ่ม๊อ ลอปลี เห่หมื่อ. 24แกแยยิวพู๊ เออเต๊เห่ จว๊า เอ๊โทเอ๊โม แลแค เจ๊อ เกเต๊เออ เร๊อ หม่า, เตหรี่เตแก เจ๊อฮู๊เตเตเนอ, โรมัน เกลอฮู๊ตีรี๊ อากู่กล๊อ เออเตเพร ซิหยื่อ ซิเง เกอ อาขว่าอาคยา, อา เฮ๊ตาอา โคเจ่ เต๊เห่ เร๊อ อา เก่ ซูจว๊า คูเปาโล เด๊อ เกลอฮู๊ เต๊เห่ เหล่โอ่ อาหี่กู. เร๊อ อา เก่ นอตา อาเกลอฮู๊ เต๊เห่ เก่ มือ คูเปาโล เร๊อ เก่ เจแม๊ ลู ปา. 25หม่าแน๊เรอ เบ๊อะเหย่ซี จอกลอ คูเปาโล เด๊อ อา เก่ มือ ลู เน๊อ อิปลี๊หรี่อาคยาเนอ, คูเปาโล เฮ๊ เกลอฮู๊เตเย อากู่กล๊อ เด๊อ อา ก๊อถ่อ โอ่เบ๊อะเนอ เตเพร เน๊อ, “โรมัน เทอพู๊เก่พู๊ เตเพรเนอ อาเตซื๊อ โอ่ แอ, หม่า อา โอ่โต่ แอ เนอ, ซี แด๊เฮอ เจแม๊ โทล๋ายโต่ เร๊อ ซี เตเร มือ อา เนอหม่า อาโต ช๊าเหล่ แหน่ เร๊อ เตซว๊าเตแส่ แฮ?”

26เบ๊อะเกลอฮู๊เตเย อากู่กล๊อ เออเตเพร หนิโฮ เตเออ เบ๊อะเนอ, อา จว๊า แด๊โฉ่ แฮเง เป่ เร๊อ เกลอฮู๊ตีรี๊ อากู่กล๊อ เร๊อ อา จว๊าแด๊เฮอ เกลอฮู๊ตีรี๊ อากู่กล๊อ เออ เน๊อ, “เน เตเร เม อา ฮู๊เต ปา? อา หม่า โรมัน เทอพู๊เก่พู๊ เตเพร ว๊า!”

27เด๊อ เตหรี่เตแก เออ อาขว่าอาคยาเร๊อ, เกลอฮู๊ตีรี๊ อากู่กล๊อ เออเตเพร จว๊า เด๊อ คูเปาโล อา โอ่ เร๊อ อา จว๊า แด๊เฮอ ลู เน๊อ, “เฮ๊เป่แม๊ แว, เน หม่า โรมัน เทอพู๊เก่พู๊ เตเพร แอ?”

เร๊อ คูเปาโล เฮ๊ฉื่อ ลู เน๊อ, “อ๋อ อาหมา”

28เร๊อ เกลอฮู๊ตีรี๊ อากู่กล๊อ เออเตเพร เฮ๊ ลู เน๊อ, “แซ่ฮู๊ แว ทวาหนิเกอ โรมัน เทอพู๊เก่พู๊ เตเพร เนอเรอ, แว เด๊อะเบ่ เอ๊ แหน่เจ๊อ รือ เจ๊อ”

หม่าแน๊เรอ คูเปาโล เฮ๊ฉื่อ ลู เน๊อ, “แวโหมะแวเพ หม่า โรมัน เทอพู๊เก่พู๊ อาขว่าอาคยา, แว เนอ, แว ทวา โรมัน เทอพู๊เก่พู๊ เด๊อ แว กาโอ่เป๊เจ่แล อาเคปา เจ๊อ.”

29โตโพ๊โต, แกแย เด๊อ อา เตเร ทื๊อเจแม๊ ลู เต๊เห่เนอ, อา จว๊า ตาพาแก ลอ เร๊อ ลู. โทเรอ เกลอฮู๊ตีรี๊ อากู่กล๊อ เออเตเพรเนอ, อา ซิอิเช เกอเร๊อ คยา แหน่เจ๊อ, เมเตเฮ๊เรอ อา ซิเง แฮ เร๊อ คูเปาโล หม่า โรมัน เทอพู๊เก่พู๊ เตเพรเจ๊อ, หม่าแน๊เรอ อา ย๋อ จว๊านอ จอกลอ หม่าซื๊อ โทเฮ๊อ อู เร๊อ สู่เปลอต่อเท๊ เต๊เห่ อาขว่าอาคยา, อา ซิอิเช เกอเร๊อ คยา แหน่เจ๊อ.

คูเปาโล จว๊าโต่ เด๊อ แกแยยิวพู๊ ทวาดุทวาเต เต๊เห่ อา เป๊เส่เง

30แกแยยิวพู๊ เต๊เห่ จว๊าแด่โต่ เตซื๊อ เด๊อ คูเปาโล อาลู เมเตเนอ, เกลอฮู๊ตีรี๊ อากู่กล๊อ เออเตเพร ซิหยื่อ ซิเง ตาเตแร๊ อาขว่าอาคยา, เหมาะลีบูเนอ, อา นอจว๊า ฉิโล๊แก สู่เปลอต่อเท๊ เด๊อ คูเปาโล อาลู. โทเรอ อา เด๊อะตา อาโหง่ เน๊อ อา นอโอ่กู๊โอ่แก๊ ลอ ล๋อ แกแย เด๊อ อา ทวา เพรหลู่แต กู่กล๊อ เต๊เห่ เร๊อ แกแยยิวพู๊ เด๊อ อา ทวา ทวาดุทวาเต เนอเต๊เห่. โทเรอ อา เอ๊ คูเปาโล เร๊อ อา นอก๊อถ่อโอ่ ลู เด๊อ เหย่ซี อาเป๊เส่เง.