Acts 24
แกแยยิวพู๊ แด่เตซื๊อ คูเปาโล เด๊อ คุ๊ยดุ เฟลิกส์ อาเป๊เส่เง
1เร๊อ โอ่โป่ แงเนอ เนอ, เพร หลู่แต กู่กล๊อดุเล๊อ คูอานาเนีย เร๊อ แกแยยิวพู๊ โหมะพรูโหมะเผร่ กู่กล๊อดุกู๊ฉู่ทู เต๊เห่ เอ๊แฮโอ่เต่อหนิ เร๊อ แกแย เฮ๊เบ่แจ่ เทอ เก่ อา เตซว๊าเตแส่ เตเพร เด๊อ อามุย เร๊อ คูเทอร์ทูลลัส, เร๊อ อา แฮแล แลแค เด๊อ วีซีซารียา. เหย่ซี แฮโน เด๊อ คุ๊ยดุ เฟลิกส์ อาเป๊เส่เง เร๊อ อา แฮแด่แถ่ คูเปาโล เตซื๊อ. 2อู เอ๊โนโท คูเปาโล เร๊อ คูเทอร์ทูลลัส แด่เตซื๊อ คูเปาโล เร๊อ อา เฮ๊ เน๊อ, “คุ๊ยดุ เฟลิกส์, เด๊อ เน เป๊อเต๊หรี่ แร๊แหน่เจ๊อ เต อาขว่าอาคยา, เป พย๊าหนิ อางยาลาเฮ๊อ เตเปเตดวา เฮ๊อ. โท๊โต่ เน แม๊เถอะ หนื่ออื่อ เต เด๊อ เง อาขว่าอาคยา, เต เด๊อ อา โตเบ่ ถู่แหล่ เต๊เห่เนอ เน ถู่แหล่ โทเฮ๊อ. 3เน เมเต เออเต๊เห่ เบ๊อะเตโต๊โผ่ เบ่เบ่, อาโต ลอปลี เป ซิปล่อ ปว๋า โตโพ๊ เจ๊อ อาขว่าอาคยา, เป เฮ๊บุ๊ยเฮ๊เตอเรอ แหน่เจ๊อ เน. 4แว ซิหยื่อ เมลอ งยา เนค๊าขิโต่. หม่าแน๊เรอ แว กุยซิยอ เน เร๊อ เน เก่ แด่ทูซิปล่อหนิดา เป่เกอเหร่อ เป เตหรี่เตแก เออ. แว เฮ๊เบ่โด่แนทู เป่ เร๊อ เน โต่. 5“เป ซิเง เร๊อ แกแย เออเตเพร หม่า แกแย เด๊อ อา แม๊ปู เมดี๊แด อู. แกแย เด๊อ อา เมโอ่แถ่ลอ เตตอปลอตือซือ เด๊อ แกแยยิวพู๊ เต๊เห่ อาเกล จว๊าโต่ลอ เด๊อ เห่ขุต๊าบ่า เออเนอหมา อาเฮ๊อ. อา หม่า นาซาเร็ธพู๊ อาตู๊หมู่ตอกล๊อ อากู่กล๊อ เตเพร. 6อา เม มู๊แหม่รีแจ่ โป่เกอ เตหลู่แตโฮ เร๊อ เป ปื่อ ลู แพ๊. (เป เฮ๊ปลื๊อโทเฮ๊อ โทเฮ๊อ เปโหง่ เร๊อ เป เก่ เมจากาคยา อา ฮู๊ เป เตซว๊าเตแส่ โอ่ เนอ เฮ๊อ. 7หม่าแน๊เรอ, เกลอฮู๊ตีรี๊ อากู่กล๊อ คูลีเซียส จ่าเพรอ แฮ จุ่ยเถ่เผ่แก ลู เด๊อ เป กู๊ยากู. 8โทเร๊อ คูลิเซียส เฮ๊ตาอาโหง่ เร๊อ เป โตเบ่ แด่เตซื๊อ คูเปาโล เด๊อ เน เป๊เส่เง.) ▼▼อู รา ลีพ๊า มู๋ หนู่เค เต๊เห่เห่เนอ, ลีเทส่อพ๊าหม่า เด๊อ อา โอ่ เด๊อ โกล๊โมโกล๊บี๊ อากู เออเตอมาเนอ, อู แม๊เถอะ อาโอ่ป่า เต่อ เกอ ลูโต่.
เน เก่ แด๊เฮอ แกแย เออเตเพร เฮ๊เนอหม่า, ล๋อ เป แด่แถ่ เตซื๊อ เด๊อ ลูโอ่ เต๊เห่เนอ, เน เก่ ซิเงลอ ดื่อ ปา.” 9เออโตโพ๊เรอ, แกแยยิวพู๊ เต๊เห๋ เร๊อ อา กอครวา แด่เกอลู เตซื๊อ เด๊อ คูเปาโล อาลู ฮู๊เนอเนอ. เร๊อ เหย่ซี เฮ๊ แลแค เร๊อ ล๋อ อา เฮ๊ เออเต๊เห่ เนอหม่า อา โตลอ แพ๊. คูเปาโล เฮ๊แลเปล๊ อาเหน่ เด๊อ คุ๊ยดุ เฟลิกส์ อาเป๊เส่เง
10เบ๊อะเนออาเค คุ๊ยดุ เออเตเพร บ๊อแถ่โล อากู๊ขุ เด๊อ คูเปาโล เก่ เฮ๊เบ่ เตเร๊อ คูเปาโล เฮ๊ฉื่อ เน๊อ, “เน ทวาดื่อเฮ๊อ เพรเฮ๊เบ่ เมโตเต เด๊อ แกแย เออเตเมว เต๊อเจ่อ อาขุ หม่า อาหน่าอาเล อางยาลาเฮ๊อ เนอหม่า แว ซิเง แพ๊. ฮู๊เนอ อาขว่าอาคยา, แว เตเร เฮ๊เบ่แลเปล๊หนิ แวเหน่ เด๊อ เน เป๊เส่เง ฮู๊เออเนอหม่า, แว ซิครือ แหน่เจ๊อ. 11แว จว๊าจ๊อเบ เด๊อ วีเยรูซาเล็ม เนอหม่า อางยาเล๊อ เร๊อ เช๊อเนอเซ ล๋ายโต่. เน เก่ แม๊ปูซิเง เร๊อ เนเหน่ เฮ๊เนอหม่า อาหนิ แพ๊. 12แกแยยิวพู๊ เออเต๊เห่เนอ อา แม๊เถอะ น๊อแด๊ แว จว๊า เคร๊แขระ เร๊อ แกแย เด๊อ เตหลู่แตโฮ อากูเนอ เตเพร่ว โต่. แว จว๊าเม ตอปลอตือซือ แกแย เบ๊หมู่ เด๊อ เตจ๊อเบโฮกู เฮ๊เนอ เบ่เบ่, เหล่โอ่ เด๊อ อาโร เด๊อ วีกูเออ เนอเบ่เบ่, เหย่ซี แม๊เถอะ น๊อแด๊ โตโพ๋ โต่. 13ตื๊อเนอโทโต่ เหย่ซี แด่เตซื๊อ เด๊อ แวลู กู๊แหน่เออ เต๊เห่เนอหม่า, อา ยูโลเบ๊ เร๊อ เหย่ซี แด่เตซื๊อ เออเนอหมา อา โตแพ๊ เนอ อา โอ่ เตอเจ๋อ โต่. 14หม่าแน๊เรอ, แว อ๊อแล เน๊อ แว จ๊อบู่จ๊อเบแถ่ เป โหมะเพเพอโพ เด๋อ งย๊าเค เต๊เห่ อา จอแปแหร่, เร๊อ หม่า เด๊อ แว โครครวา แกล๊ เด๊อ แบ่เจ่ เด๊อะโล เออเนอ เร๊อ เหย่ซี เฮ๊ แลแค แว เร๊อ แวหยื่อแวแหน่ ซื๊อเฮ๊อ เตเฮ๊อ, อา เฮ๊ แลแค ฮู๊เนอ. ล๋อ คูโมเสส อา เตซว๊าเตแส่ เด๊อ อา ราหนื่ออื่อ เหร่อ เต๊เห่เน๊อ เร๊อ ล๋อ เพรโพร อาลี เต๊เห่เนอ, แว หยื่อเอ่ เกอ ลอ แพ๊แพ๊. 15แว เตแม๊ชือ เด๊อ จอแปแหร่ อากู เนอหม่า อาแซ่เน๊อ เหย่ซี เนอแพ๊แพ๊. แว หยื่อเอ่ แม๊ชือ เร๊อ แกแยแร๊ เบ่เบ่, แกแยจา เบ่เบ่, อา เก่ ก๊อถ่อ เซอเพร กาคยา แลแค ปา. 16แซ่ฮู๊ แว ซิปล่อ อา เตเตเนเออ อา เก่ โพ๊แปละ เด๊อ จอแปแหร่ เน๊อ แกแยเห่ขุพู๊ อา เป๊เส่เง เนอ, แว แอ๊จื๊อ เมเต อาแร๊ ตื๊อดื่อ ปว๋า โตโพ๊ เจ๊อ. 17“แว จว๊าโอ่ตาพา งย๊า เร๊อ วีเยรูซาเล็ม เด๊อ อาหน่า, อาเลกู เจ๊อเฮ๊อ, เร๊อ เด๊อเหร่อเนอ, แซ่ฮู๊ แว เก่ จว๊าซู เป่ แว เมวเจอะพู๊ เร๊อดื่อ เต๊เห่ อารือ, โท๊โต่ แซ่ฮู๊ แว เก่ หลู่แถ่แตแถ่ เต เบ๊อะเนอ อาเง เนอเรอ, แว กาคยา คยาแซ๊ เบ๊อะวีเยรูซาเล็ม เออเนอ แพ๊. b 18เบ๊อะแว หลู่แตแถ่ เต เด๊อ เตหลู่แต โฮกู เบ๊อะเนอ, เหย่ซี แม๊เถอะ แว. แว เม โทปลื๊อแร๊ เตเมโพ๊แปละ แถ่ แวเหน่ ฮู๊ เตจ๊อบู่จ๊อเบ เหล่โกลเหล่แบ่ โอ่ เนอแพ๊. เร๊อ แว เมโพ๊แปละ โท แวเหน่ เร๊อ, เด๊อเหร่อเนอ แว เม ซู๊ซีซู๊ซ๊า ซิค๊าซิเถ่ อู เตอเจ๋อ โต่. เบ๊อะแว ช๊าเนอ แกแย โอ่แพ๊ ตูกูเตเพร แพ๊, แกแย เบ๊หมู่ โอ่ เน๊อ โต่. 19หม่าแน๊เรอ แกแยยิวพู๊ เด๊อ อา โอ่ เด๊อ เอเชียเก่ เต๊เห่ แฮโน โอ่เกอ เบ๊อะเนอ เต๊เห่. เหย่ซี เก่ ซิหยื่อ แด่ แว เตซื๊อ เฮ๊เร๊อ อา โต แฮโต เร๊อ อาเหน่ เด๊อ เนโอ่, เร๊อ อา โต แด่โลแถ่ เตหรี่เตแก เนอเต๊เห่. 20เก่หม่าโต่เรอ เบ๊อะแว ก๊อถ่อโอ่ เด๊อยูดาห์แกแย ทวาดุทวาทู เต๊เห่ อา เป๊เส่เง เบ๊อะเนอ, แกแย เบ๊อะเออ เต๊เห่ โต เฮ๊โลแถ่ แลแค ล๋อ แว เตซื๊อ เด๊อ อา แม๊เถอะ เนอเต๊เห่. 21แว เตซื๊อ เก่ โอ่ เฮ๊เนอหม่า อา โอ่แพ๊ตื๊อ แว ก๊อถ่อโอ่ เด๊อ เหย่ซี อาเป๊เส่เง เร๊อ แว เอ๊โทแถ่ เน๊อ, ‘ซี แด๊เฮอ เจแม๊ แว เออเตอเนอ เนอหม่า หม่า เด๊อ แว หยื่อเอ่ เร๊อ แกแย เด๊อ อาเซอ เต๊เห่ อาก๊อถ่อ เซอเพร กาคยา ปา, เออตือมือ อาขว่าอาคยา แพ๊,’” คูเปาโล เฮ๊ เป่ ลู ฮู๊เนอ. c 22โทเร๊อ คุ๊ยดุ เฟลิกส์ เด๊อ อา ซิเง โท แร๊เฮ๊อ แกล๊ เด๊อ แบ่เจ่ เด๊อะโล เออเนอเนอ, อา แด่ ตื๊อดื่อแก เตแด๊เฮอเจแม๊ เออ เร๊อ อา เฮ๊ เน๊อ, “ช๋า เกลอฮู๊ตีรี๊ กู่กล๊อดุ คูลีเซียส แฮโต่เฮ๊อ อาเคปาเนอ, แว เก่ เฮ๊เบ่ เมโต เป่ ซี เตหรี่เตแก เออเต๊อเจ่อ ปา,” อา เฮ๊ เหย่ซี ฮู๊เนอ. 23เร๊อ อา เฮ๊เบ่ อาโหง่ เด๊อ เกลอฮู๊เตเย กู่กล๊อ เออเนอ เตเพร อา โอ่ เน๊อ, โอ่ป่อหนิแร๊ คูเปาโลเออ นี๋, หม่าแน๊เรอ อาปลวาเปอเลอ จว๊าโทจว๊าแล เป่เกอ ช๊าเหล่ดื่อ อา จู๋ อาซิปล่อ ซิหยื่อเมเนอ เต๊เห่เห่ นี๋. อาซว๊าอาโค เต๊เห่ เก่ แฮแม๊แฮเด๊อะ ลู เต เด๊อ อา โหล่ เต๊เห่ เก่เฮ๊เรอ ปลวาแม๊ เป่ ลู นี๋.คูเปาโล โอ่ เด๊อ คุ๊ยดุ เฟลิกส์ เน๊อ อาเม โหมะดรูสิลลา เป๊เส่เง
24เด๊อคยา โซลุยแงเนอเนอ, คุ๊ยดุ เฟลิกส์ เร๊อ อาเม โหมะดรูสิลลา หม่าดื่อ ยูดาโหมะ เออเตเพร แฮ เร๊อ อา นอจว๊าเอ๊ อู เร๊อ คูเปาโล เร๊อ อา หนิดา แม๊ คูเปาโล เฮ๊เบ่ เป่ ลู เน๊อ เตหยื่อเตแหน่เหย่ซู่ครี๊ อาหรี่อาแก. 25เร๊อ เบ๊อะคูเปาโล เฮ๊เบ่ เป่ โป่ ลู เร๊อ เตจ๊อเต, เตเป๊อแลหนิ เหน่ เร๊อ เตเมจากาคยาม๊อเนอ เด๊อ อา เก่ แฮ ปา อาหรี่อาแก เออ เบ๊อะเนอ, คุ๊ยดุ เฟลิกส์ ซิอิเช เร๊อ อา เฮ๊ ลู เน๊อ, “เออตื๊อหื่อ เร๊อ เน กาหนิ เฮ๊อ. แว ค๊าขิ เก่ โอ่ ปา เฮ๊เรอ, แว เก่ เอ๊แฮโป่ คยา เน ปา.” 26ฮู๊เนอ อาขว่าอาคยา, อา เอ๊แฮ โตโมโตโม คูเปาโล เด๊อ อา เก่ แฮเฮ๊เบ่ เร๊อ ลู, เมเตเฮ๊เรอ อา แม๊ชือเกอ เร๊อ เตอเนอเนอ ปาเนอ, คูเปาโล เก่ เด๊อ ลู รือ ปา อา เตเน ฮู๊เนอ. 27อา ตาลว๊า แฮเฮ๊อ เนอหน่า โทเนอ, คูปอรสิอัสเฟสทัส ทวาแถ่ คุ๊ยดุ เด๊อ เฟลิกส์ อาเหล่โกล, เร๊อ คุ๊ยดุ เฟลิกส์ ซิหยื่อ เป๊เส่โอ่เกอ เด๊อ แกแยยิวพู๊ เต๊เห่ อา เป๊เส่เง อาขว่าอาคยา, อา ด๊อตา ตื๊อดื่อปา คูเปาโล เด๊อ ทอกู.
Copyright information for
EkySCThai