Acts 25

คูเปาโล กุยจว๊า เด๊อ โรมัน คุ๊ยดุ อา โอ่

1คุ๊ยดุ คูเฟสทัส แฮโต่ เบ๊อะเก่ เนอต๊าบ่า อากู เร๊อ อา บาเฮ๊อ โซเนอ โทเนอ, อา โอ่ เบ๊อะวีซารียา เนอ เร๊อ อา จว๊า เด๊อ วีเยรูซาเล็ม. 2เพรหลู่แต ทวาดุทวาเต เต๊เห่ เร๊อ แกแยยิวพู๊ อา กู่กล๊อดุ เต๊เห่ แฮ เด๊อะโลแถ่ แด่เตซื๊อ คูเปาโล เต๊เห่ เด๊อ คุ๊ยดุ คูเฟสทัส อา โอ่. 3เหย่ซี กุยซิยอ คุ๊ยดุ คูเฟสทัส เร๊อ อา เก่ เมบุ๊ยเมเตอเรอ เป่เกอ เหย่ซี เร๊อ เหย่ซี ซิหยื่อ เด๊อ คุ๊ยดุ คูเฟสทัส เก่ นอซูแฮ อู เน๊อ คูเปาโล เร๊อ อา เก่ ซูแฮ เป่ เหย่ซี เด๊อ วีเยรูซาเล็ม, เมเตเฮ๊เรอ เหย่ซี เตเร เครเมเซอ คูเปาโล เด๊อ แกล๊ลู ปา. 4คุ๊ยดุ คูเฟสทัส เฮ๊ฉื่อ เน๊อ, “อู ด๊อโอ คูเปาโล เด๊อ วีซีซารียา, เร๊อ งยาแต๋โต่ ปาเนอ, แว เก่ จว๊า เบ๊อะเนอ ปา. 5เร๊อ นอจว๊า เต่อเกอ ซี แกแยดุ เต๊เห่ เร๊อ แว เด๊อ วีซีซารียา ปา นี๋, เร๊อ เก่ คูเปาโล เมหม่าแหน่ เตซื๊อ เด๊อ อู โตเบ่ เมจากาคยา อา ปา เฮ๊เนอ, ซี แกแยดุ เออเต๊เห่ เก่ แด่แถ่โล ลู เตซื๊อ ปาหม่า อาหนิ แพ๊.”

6คุ๊ยดุ เฟสทัส โอ่โป่ เบ๊อะเยรูซาเล็มวีเนอ อาเนอลุยซว๊า, หม่าโต่เร๊อ เนอเช๊อ เบ๊อะเนอ โต๊โผ่ เร๊อ อา จว๊า เด๊อ วีซีซารียา. อาเนอเตอเนอ เร๊อ อา โอ่แนโอ่ เด๊อ เพรเมโตเต อาเหล่โอ่ อาขุ เร๊อ อา เฮ๊เตา อาโหง่ เร๊อ อู เก่ ซูแฮโน คูเปาโล เด๊อ อา โอ่. 7เบ๊อะคูเปาโล แฮโต่ เบ๊อะเนอ, แกแยยิวพู๊ เด๊อ อา โอ่ เด๊อ วีเยรูซาเล็ม เร๊อ อา แฮ เต๊เห่เนอ อา แฮ ก๊อถ่อโอ่ ตาวา ลอ คูเปาโล. เร๊อ เหย่ซี แฮแด่แถ่ เอ๊ลา เตซื๊อ เด๊อ อาดุ อาแย เต๊เห่ ตื๊อดื่อเรอ เหย่ซี แฮ แด่แถ่ ลู เตซื๊อ เออเต๊เห่เนอ, อาโต เตอเจ๋อ โต่.

8ฮู๊เนอเรอ คูเปาโล เฮ๊แลเปล๊ อาเหน่ เน๊อ, “เตซื๊อ เด๊อ อา เมปย๊าเมหลู่แก แกแยยิวพู๊ อา เตซว๊าเตแส่ เต๊เห่ เบ่เบ่, เตหลู่แตโฮเนอ เบ่เบ่, โทเร๊อ โรมัน อาคุ๊ยดุ เบ่เบ่ แว เมน๊อ เตอเจ๋อ โต่.”

9คุ๊ยดุ คูเฟสทัส ซิหยื่อ เป๊เส่โอ่ เด๊อ แกแยยิวพู๊ เต๊เห่ อา เป๊เส่เง อาขว่าอาคยาเรอ, อา แด๊เฮอ คูเปาโล เน๊อ, “เก่ จว๊า เมจากาคยา เป่ เน เตหรี่เตแก เออ เด๊อ เยรูซาเล็ม เด๊อ แว เป๊เส่เง เฮ๊เนอหม่า, เน ซิปล่อโอ่ จว๊า ช๊าเหล่ แอ?”

10เร๊อ คูเปาโล เฮ๊ฉื่อ อา เน๊อ, “กู๊แหน่เรอ แว ก๊อถ่อโอ่เฮ๊อ เด๊อ คุ๊ยดุ เหล่ เมจากาคยา อาเหล่โอ่ เฮ๊อ. เออ หม่า เหล่โอ่ เด๊อ โตเบ่ เมจา แด๊เฮอเจแม๊ แว เฮ๊อ. ฮู๊ เน ซิเง ตาเต โทดื่อเฮ๊อ เนอ เฮ๊อ, แว เมซื๊อน๊อ เน๊อ แกแยยิวพู๊ เต๊เห่ เตอเจ๋อ โต่. 11เก่ แว เมซื๊อ ตาลว๊าตาแก เฮ๊อ แกแยยิวพู๊ เต๊เห่ อา เตซว๊าเตแส่ เด๊อ อา โตเบ่ เร๊อ เตเมจากาคยา เซอ แว เต๊อเจ่อเจ่อ เฮ๊เรอ, แว กุยซิยอ ปา เร๊อ ซี เด๊อ ซี เก่ ปลวาเซอเพร โป่ แว เนอโต่. หม่าแน๊เรอ เหย่ซี อาเตแด่แถ่โลแว แว เตซื๊อ เออเต๊เห่ เนอ, เก่ อา โตโต่ เฮ๊เรอ อู เด๊อะตาแจ่ แว เด๊อ แกแยยิวพู๊ เต๊เห่ อา กู๊ยากู เตเพร่ว โต่. แซ่ฮู๊ อู เก่ เมจากาคยา แว เร๊อ แว กุยจว๊า อู เด๊อ อู เก่ ซูจว๊า แว เด๊อ โรมัน คุ๊ยดุ อา โอ่.”

12คุ๊ยดุ คูเฟสทัส เร๊อ แกแย ลีแมลีเพ๊ เต๊เห่ เฮ๊เบ่ ฉู่โนกู โหร่แคลู เร๊อ อา เฮ๊ฉื่อ คูเปาโล เน๊อ, “เน กุย อู เด๊อ อู เก่ ซูจว๊า เน เด๊อ คุ๊ยดุ ซีซาร์ โอ่เฮ๊อ อาขว่าอาคยา, เน เก่ จว๊าน๊อ เด๊อ ลูโอ่ ปา.”

คูเปาโล เด๊อ คุ๊ยดุ อากริปปา เร๊อ เหมาะ เบอร์นิส อาเป๊เส่เง

13เด๊อคยา โซลุยเนอ เฮ๊อเนอ เร๊อ คุ๊ยดุ อากริปปา เน๊อ อาเหมาะ เบอร์นิส แฮโต่ เด๊อ วีซีซารียา เด๊อ อา เตเร แฮ โอ่เล เกอ คุ๊ยดุ เฟสทัส เร๊อ อา เก่ แฮ โอ่เล เด๊อะลู เน๊อ อา เตเฮ๊โมเฮ๊แร๊ เต๊เห่. 14เหย่ซี จว๊าโอ่ ม๊อเนอม๊อเซ งยาหร่าเหร่ กู๋ ลา เบ๊อะเนอ เร๊อ คุ๊ยดุ คูเฟสทัส แด๊โฉ่โล เป่ คุ๊ยดุ อากริปปา เร๊อ คูเปาโล อาหรี่อาแก. เร๊อ อา เฮ๊ เน๊อ, “คุ๊ยดุ เพลิกส์ ด๊อตาแก แกแย เด๊อ ทอกู เตเพร. 15เร๊อ เบ๊อะแว จว๊า เด๊อ วีเยรูซาเล็ม เบ๊อะเนอ, แกแยยิวพู๊ เพรหลู่แต กู่กล๊อ เต๊เห่ เร๊อ แกแยยิวพู๊ โหมะพรูโหมะเผร่ เด๊อ อา ทวา ทวาดุทวาเต เต๊เห่ แฮ เด๊อะโลแถ่ ลู เตซื๊อ เร๊อ อานอ เมจากาคยา เร๊อ แว.

16“หม่าแน๊เรอ แว แด๊โฉ่ เหย่ซี เร๊อ เป โรมัน เต๊เห่ อา เหล่โกลเหล่แบ่ โอ่ เน๊อ, เบ๊อะอู เด๊อะตา แต่ล๋าย แกแย เมซื๊อ เทอเก่ เตซว๊าเตแส่ เตเพร เพร เด๊อ อู กู๊ยากู ล๋ายโต่เนอ, อา โตเบ่ พย๊าหนิ เบ๊อะอู เก่ หนิโฮ อู แด่เตซื๊อ เด๊อ อาเหน่ลู, โทเร๊อโต เบ่ เด๊อะลู ค๊าขิ เฮ๊เบ่แลเปล๊ เกอเร๊อ อาเหน่ เร๊อ เตซื๊อ เด๊อ อา เหน่ลู เออเนอ เต๊เห่. 17ฮู๊เนอ อาขว่าอาคยา, เบ๊อะเหย่ซี แฮโต่ เบ๊อะวีซีซารียา อากู เออเบ๊อะเนอ, แว จุ่ยทู เป่ ปา เหย่ซี ม๊อเนอม๊อเซ โต่. ช๊าอาเนอเตอเนอ เร๊อ แว โอ่แนโอ่ เด๊อ เหล่เมจากาคยา เหล่โอ่ เร๊อ แว นอ เอ๊แฮโน แกแย เนอเตเพร เด๊อ แว เป๊เส่เง. 18แกแย แฮ แด่เตซื๊อ คูเปาโล เออเต๊เห่ ก๊อถ่อ แลแค เร๊อ แด่แถ่โล ลอปลี ลูเตซื๊อ เต๊เห่. เร๊อ เหย่ซี เก่ เก่ คูเปาโล เตซื๊อ เร๊อ อา เมซื๊อ ตาลว๊าตาแก เทอเก่ อา เตซว๊าเตแส่ โอ่ ปา แอ แว เตเน ตื๊อดื่อเรอ เหย่ซี เก่ ลู เตซื๊อ เต๊เห่เนอ, อา เมซื๊อ ตาลว๊าตาแก เทอเก่ อา เตซว๊าเตแส่ เร๊อ อา โอ่ป่า เตอเจ๋อ โต่. 19เหย่ซี เคร๊แขระโชชื่อ คยาดื่อ ลู เร๊อ เหย่ซี อาเตจ๊อบู่จ๊อเบ เร๊อดื่อ เนอเต๊เห่ เร๊อ แกแย เด๊อ อามุย เร๊อ เหย่ซู่ เด๊อ อา เซอโทเฮ๊อ เนอเตเพร อาหรี่อาแก แพ๊, ตื๊อดื่อเรอ คูเปาโล เกอลาติ เรอ อา เฮ๊ เร๊อ อา โอ่ เซอเพร ปาแพ๊. 20แซ่ฮู๊ แว เก่ ซิเง เอ๊แถ่โป่ เตหรี่เตแก เออเต๊เห่ เรอ, แว โตเบ่ เมฮู๊เตเนอ แว เฮ๊โปลเบ๊ เป่ ปา เหย่ซี โต่ อาขว่าอาคยา, แว แด๊เฮอ คูเปาโล เน๊อ หม่า เน ซิปล่อโอ่ จว๊า เด๊อ วีเยรูซาเล็ม เร๊อ เน ซิหยื่อ นอ แด๊เฮอ เจแม๊ อู เตหรี่เตแก เออเต๊เห่ เน๊อ เนเหน่ แฮ? แว แด๊เฮอ ลู ฮู๊เนอ. 21หม่าแน๊เรอ คูเปาโล กุยโอ่ยวา โก๊หลื่อ เร๊อ อา ซิหยื่อ นอเมจากาคยา เตหรี่เตแก เออเนอ เน๊อ คุ๊ยดุ ซีซาร์. ฮู๊เนอ อาขว่าอาคยา, แว นอตา แว เกลอฮู๊ เต๊เห่ เก่ โอ่ป่อ หนิ ลู โต่เด๊อ เป ซูจว๊า โต่เบ่ เฮ๊อ ลู เด๊อ คุ๊ยดุ ซีซาร์ อา โอ่ ปา,” คุ๊ยดุ เฟสทัส เฮ๊ ฮู๊เนอ.

22คุ๊ยดุ อากริปปา เฮ๊ฉื่อ คุ๊ยดุ เฟสทัส เน๊อ, “แว ซิหยื่อ หนิโฮเกอ แกแย เออเตเพร อา เตเฮ๊เบ่อี๊โช เร๊อ แวเหน่ เร๊อดื่อ.”

เร๊อ คุ๊ยดุ เฟสทัส เฮ๊ฉื่อ ลู เน๊อ, “เก่ เฮ๊ฮู๊เนอ เร๊อ ช๊าป๊าโร ปาเนอ เน เก่ หนิโฮน๊อ ดื่อ ปา.”

23เด๊อคยา เตอเนอเนอ, คุ๊ยดุ อากริปปา เร๊อ อาโป่ เหมาะเบอร์นิส แฮ เร๊อ อา กือแซ๊ แฮหนิ เห่อจาตว่า เห่อจาแร๊ เด๊อ อา แปล๊เตเค เต๊เห่ เร๊อ อา แฮโน เต่อโหร่เกอ เกลอฮู๊ กู่กล๊อ เน๊อ แกแยดุแกแยทู เบ๊อะวีกู เนอเต๊เห่ เด๊อ อู เหล่โอ่กู๊โอ่แก๊ ลู อาเหล่โอ่ โต๊โผ่. คุ๊ยดุ เฟสทัส นอเอ๊โน อู เร๊อ คูเปาโล เด๊อ อากู. 24เร๊อ คุ๊ยดุ เฟสทัส เฮ๊ เน๊อ, “คุ๊ยดุ อากริปปา เร๊อ แกแย เด๊อ อา โอ่ เบ๊อะเออ ล๋อ ปลี ซี๋, ซี แม๊เถอะเฮ๊อ แกแย เออเตเพร เฮ๊อ. ล๋อ แกแยยิวพู๊ เด๊อ อา โอ่ เบ๊อะเออ เต๊เห่เนอ เบ่เบ่, อา โอ่ เด๊อ วีเยรูซาเล็ม อากู เนอเต๊เห่ เบ่เบ่, อา แฮ กุยซิยอ แว เร๊อ แกแย เออเตเพร อาหรี่อาแก เหย่ซี เอ๊โทแถ่ แลแค เร๊อ แกแย เออเตเพร โตเบ่ โอ่เซอเพร ปาโต่, อา เฮ๊ แลแค ฮู๊เนอ. 25หม่าแน๊เรอ, อา เม เตซื๊อ เด๊อ โตเบ่ เมจากาคยา เซอแก อาเนอ, แว แม๊เถอะ เตอเจ๋อ โต่. อาแหน่แบ่เจ่ เร๊อดื่อ กุยดื่อ เนอ อา ซิหยื่อนอ เมจากาคยา เร๊อดื่อ เร๊อ คุ๊ยดุ ซีซาร์ อาขว่าอาคยา, แว แด่แลเฮ๊อ แว ซิปล่อ เด๊อ แว เก่ ซูแล อา แพ๊. 26หม่าแน๊เรอ, เตหรี่เตแก เด๊อ แว เก่ ราโลแถ่ ตาเต เป่ เด๊อ คุ๊ยดุ โอ่เนอ, อา โอ่ เตอเจ๋อ โต่. ฮู๊เนอ อาขว่าอาคยา แว นอเอ๊แฮ อู เร๊อ อา เด๊อ ซี ล๋อ ปลี อา เป๊เส่เง เฮ๊อ. อา โหล่ดุ เหร่อเล๊อหมา เร๊อ แว เก่ นอจว๊า ลู เด๊อ คุ๊ยดุ อากริปปา หม่าเฮ๊อ เนเออ อา เป๊เส่เง เฮ๊อ. ช๋า เป แด๊เฮอ โทเฮ๊อ อา ปา ตื๊อหม่า แว ราแถ่โล ตาเตเนอ เตหรี่เตแก ปา, ฮู๊เนอแพ๊. 27เมเตเฮ๊เรอ อู ด๊อตา แกแย เด๊อ ทอกู เออเตเพรเนอ, แว เก่ เฮ๊โลโปลแถ่ ตาเต คยาแซ๊ เตซื๊อ เด๊อ อู เก่ อา เออเนอเต๊เห่ โต่ เฮ๊เรอ แว เก่ นอซูจว๊า ลู เด๊อ คุ๊ยดุ โอ่ เฮ๊เนอ, อา เจ๋อ เน๊อ อาโตอาเบ่ โต่,” คุ๊ยดุ เฟสทัส เฮ๊ ฮู๊เนอ.