Acts 26

คูเปาโล เฮ๊เบ่แลเปล๊ อาเหน่ เด๊อ คุ๊ยดุ อากริปปา อาเป๊เส่เง

1คุ๊ยดุ อากริปปา เฮ๊ คูเปาโล เน๊อ, “เน เก่ ซิเฮ๊เบ่ หม่า อาหนิ แพ๊.” เร๊อ คูเปาโล บ๊อแถ่ อากู๊ขุ เร๊อ อา เฮ๊เบ่แลเปล๊ เกอเร๊อ อาเหน่ ฮู๊เออ: 2คูเปาโล เฮ๊ คุ๊ยดุ อากริปปา เน๊อ, “คุ๊ยดุ อากริปป๋า, แว พย๊าหนิ ค๊าขี่ แร๊ เด๊อ แว โตเบ่ เฮ๊เบ่แลเปล๊ เกอเร๊อ แวเหน่ เด๊อ เน เป๊เส่เง ฮู๊เออ, โท๊โต่ แว โต เท๊ฉื่อ ล๋อ เตซื๊อ เด๊อ แกแยยิวพู๊ เกลอ แว เออเต๊เห่ เด๊อ เออเตอเนอ อากู อาขว่าอาคยา, อา โมแหน่เจ๊อ แว เจ๊อ. 3เมเตเฮ๊เรอ เน ซิเง ตาเต ลอดื่อเฮ๊อ แกแยยิวพู๊ อา เหล่โกลเหล่แบ่ เต๊เห่ เร๊อ เหย่ซี อาเตกย๊าเตงา เออเต๊เห่ ล๋อ ปลี เฮ๊อ อาขว่าอาคยา, อา โมลา แว. ฮู๊เนอเร๊อ, แว กุยซิยอ ดื่อ เน เน๊อ เน เก่แด่ทูซิปล่อ หนิดา เป่เกอเร๊อ แว เตเฮ๊เบ่เออ นี๋.

4“เป๊อแถ่ เด๊อ แว เป๊เจ่เค, เบ๊อะแว โอ่ เร๊อดื่อ เด๊อ แว เก่กู อาเค, เร๊อ เด๊อคยาเนอ แว จว๊าโอ่ เด๊อ วีเยรูซาเล็ม เร๊อ แว โอ่เซอเพร แคร๋ ฮู๊เตเนอ, แกแยยิวพู๊ เต๊เห่ ซิเงลอ ดื่อเฮ๊อ ปว๋า เตเพร. 5แว หม่า แว โอ่โนเต่อเกอดื่อ เด๊อ ฟาริสีพู๊ อาตู๊หมู่ตอกล๊อ เด๊อ อา ปื่อหม่า ชอแหน่เจ๊อ เตจ๊อบู่จ๊อเบ อา เตซว๊าเตแส่ เต๊เห่ ตู๊หมู่ เตเพรเนอหม่า เหย่ซี ซิเง งย๊า ลาเฮ๊อ แว เฮ๊อ. เก่ เหย่ซี ซิหยื่อ ข่าเฮ๊เด๊อะโล แวหรี่แวแก เฮ๊เนอหม่า อา ซิเง ลอปลี เจ๊อ. ^a 6แว ยอ แม๊ชือเตเด๊อ จอแปแหร่ อ๊อแล นอแล หนื่ออื่อ โทเฮ๊อ เป โหมะเพเพอโพ เด๋อ งย๊าเค เนอเต๊เห่ อาขว่าอาคยา, กู๊แหน่เออ แว เบ่ ก๊อถ่อโอ่ เบ๊อะเออ เร๊อ อู เบ่ แด๊เฮอทื๊อเจ แม๊เฮ๊อ แว เฮ๊อ. 7จอแปแหร่ อา เตอ๊อแล เออเนอหมา หม่าเฮ๊อ กู๊แหน่เออ แกแยยิวพู๊ เช๊อเนอโหมะ เม เป่เฮ๊อ ลู อา เตเอ่เตแร, เร๊อ เหย่ซี โอ่ป่อแม๊ชือ เกอเร๊อเฮ๊อ เหมาะเฮ๊เหมาะลี เด๊อ อาแซ่เน๊อ แว แม๊ชือ เออเนอ เต๊อเจ่อเฮ๊อ. เพคุ๊ยดู๋ เด๊อ แว แม๊ชือเฮ๊อ เออเนอ อาขว่าอาคยา, แกแยยิวพู๊ เต๊เห่ แม๊ปู เก่ ลอเฮ๊อ แว เตซื๊อ เฮ๊อ. 8จอแปแหร่ เมเซอเพร กาคยาแจ่ แกแยเซอ เต๊เห่เนอ, ซี เบ๊อะเนอ เต๊เห่ จว๊าเตเน โต่ แลแค เน๊อ อา เมแจ่ เกออู โต่ ฮู๊เต?

9“แว เหน่แบ่แจ่ เร๊อดื่อ เจ๊อ, เด๊อ เนอเค แว เตเนแต่ โทเฮ๊อ เบ๊อะแว เมเบ๊ ตื๊อดื่อเนอ, ฮู๊เตเต๋ เบ่เบ่ แว เบ่ แม๊ปู เคร๊ฉื่อเมฉื่อ เร๊อ แกแย เด๊อ อา หยื่อเอ่ วีนาซาเร็ธพู๊ เหย่ซู่ อามุย เออเนอเต๊เห่, แว เตเน โทเฮ๊อ ฮู๊เนอ. ^b 10ฮู๊เออเนอ แว เมโทลอเฮ๊อ เด๊อ วีเยรูซาเล็ม อากู เนอเฮ๊อ. แว พย๊าหนิ เตเตอเรอฉว่าชอ เด๊อ เพรหลู่แต กู่กล๊อ เต๊เห่ อา โอ่ เด๊อ แว ด๊อโน เอ๊ลาจอแปแหร่ อาแกแย แหย่โยบูโพ๊ เต๊เห่ เด๊อ ทอกู. เบ๊อะอู เมเซอ เหย่ซี เบ๊อะเนอ, แว ซิปล่อโอ่ อ๊อแลโนกู ป่าเต่อเกอ เน๊อ นอเมเซอแก อู. 11แวมือแวปอ, เมจาเมจือ น๊อ เอ๊ลา เหย่ซี เด๊อ เตจ๊อเบโฮ เต๊เห่ อากู, เร๊อ แว เฮ๊ชอ เหย่ซี เร๊อ แว นอเฮ๊ เหย่ซี เน๊อ, ‘แว หยื่อเอ่ ปา เหย่ซู่ โต่’ ฮู๊เนอ, เร๊อ แว ซิปล่อดุ โกโน๋ เหย่ซี โต่. โต่ เจ๊อ เด๊อ แว เก่ เถ่จว๊า เด๊อ เมวเจอะโรพู๊ โอ่ เกอเร๊อ วีเต๊เห่ อากู เร๊อ, แว เก่ จว๊า เมจาเมจือ เจ๊อ เหย่ซี เจ๊อ.”

คูเปาโล เฮ๊โลแถ่ เป่ อู เน๊อ อาซิปล่อ ถู่แหล่ เต๊เปล่กาคยา อาหรี่อาแก

12“ฮู๊เนอเรอ เตอเนอเค, แว จว๊า เด๊อ วีดามัสกัส. เร๊อ แว พย๊าจว๊าหนิ ลี ต๊าบ่า เด๊อ เพรหลู่แต ทวาดุทวาเต เต๊เห่ เด๊อะตา แว เน๊อ อา เตอเรอฉว่าชอ เต๊เห่ ต๊าบ่า. 13เก๋อ เพ คุ๊ยดุ อากริปปา, เตอเนอเร๊อ เบ๊อะแว จว๊า เด๊อ แกล๊ลู เร๊อ เบ๋อ เหมาะโถ่ จ๊อราเน๊ เฮ๊อ เบ๊อะเนอ, แว แม๊เถอะ เตลี ฉว่าชอ เตเม เร๊อ อา เตเคชอเล๊อ เจ๊อ เร๊อ ต๊อเหมาะเนอ, อา โอ่ เด๊อ ม๊อขุ เร๊อ อา ช๊าเตเคตา ตาวา แว เน๊อ แกแย เด๊อ อา จว๊า เต่อเกอ เร๊อ แว เต๊เห่. 14เป แลคื๊อตา ลอ เด๊อ เห่ขุ ปว๋า เตเพร เจ๊อ, เร๊อ แว หนิโฮ โหง่พราแถ่ เร๊อ ฮีบรูโหง่ ตือมื๊อ เร๊อ อา เฮ๊ แว เน๊อ, ‘เก๋อ คูเซาโล๋, คูเซาโล๋, เน เมจาเมจือ แว เมเต? เน ตอพอเช เกอเร๊อ คยาดื่อ เน กู๊โด่ เน๊อ ตอมอ เด๊อ อาแซ่เน๊อ ปู่ เตเป กาคยา เช เกอเร๊อ คยาแซ๊ดื่อ อา เหน่แบ่แจ่ อิปลี๊ เนอแพ๊,’ อา เฮ๊ แว เนอ ฮีบรูโหง่ ฮู๊เนอ.

15“เร๊อ แว แด๊เฮอ กาคยาฉื่อ อา เน๊อ, ‘แบ่เจ๋, เน หม่า อูเป?’

“เร๊อ แบ่เจ่ เฮ๊ฉื่อ แว เน๊อ, ‘แว หม่า เหย่ซู่ เด๊อ เน เมจาเมจือ เหย่ซีเนอ เตเพรเฮ๊อ,’ อา เฮ๊ แว ฮู๊เนอ. 16‘หม่าแน๊เรอ ตูรู๊ ก๊อถ่อ คยาแซ๊มอ, แว แฮ โอ่โลแถ่ เป่เฮ๊อ เน เร๊อ แวเหน่ ฮู๊เออ เนอหม่า หม่าเฮ๊อ เด๊อ แว เก่ นว๊าแถ่เฮ๊อ เน เน๊อ เน เก่ ทวาแถ่เฮ๊อ แว เพรโด่แนพู๊ เต๊เห่ เน๊อ เพรข่าเฮ๊โล เตเพร เฮ๊อ. เออเตอเนอ เน แม๊เถอะเฮ๊อ เน๊อ แว เบ๊อะเออ อาหรี่อาแก เออเต๊เห่ เร๊อ เต เด๊อ แว เตเร ยูโล เป่โป่ เน เด๊อคยา ปา เต๊เห่เนอ, เน เบ่ จว๊าแด๊โฉ่โล เป่ลอ อู ป๋า. 17แว เก่ นอซูจว๊า เน เด๊อ เน เมวเจอะเกอดื่อ เต๊เห่ เร๊อ แกแยยิวพู๊ หม่าโต่ เต๊เห่ อาเกล ปา. เร๊อ แว เก่ เมแลเปล๊เถ่ เน เด๊อ เหย่ซี เนอเต๊เห่ อา กู๊ยากู ปา. 18เน เบ่ บ๊าโมแถ่ เป่ เหย่ซี เต๊เห่ อาเป๊เส่ ปา, โทเร๊อ เน นอตีรี๊ กาคยา คยาแซ๊ เหย่ซี เด๊อ เตคี๊เตตาปา อาเล ปา. เร๊อ เน เก่ ซูจว๊า เหย่ซี เด๊อ เตลี ปา, โท๊โต่ เน เก่ ซูจว๊าโน เหย่ซี เด๊อ อา โอ่ เด๊อ โลเน๊มู๊แหม่รีแจ่ กู่กล๊อ อา เตอเรอฉว่าชอ อาเล เออเนอเต๊เห่ เด๊อ จอแปแหร่ อา เตโพรเตเตอเรอ อาเล ปา. เด๊อ เหย่ซี หยื่อเอ่ แว อาขว่าอาคยา, จอแปแหร่ เก่ ปลวาแก เหย่ซี เตซื๊อ ปา, โท๊โต่ เด๊อ จอแปแหร่ นว๊าแถ่ เกอเร๊อ อาแกแย เนอเต๊เห่อาเหล่โอ่ เออเนอ, เหย่ซี เก่ พย๊าหนิ เกอดื่อ ปา, อา เฮ๊ แว ฮู๊เนอ.’

คูเปาโล เฮ๊โลแถ่ อา เตเอ่เตแร เต๊เห่ อาหรี่อาแก

19“คุ๊ยดุ อากริปป๋า ฮู๊เนอ อาขว่าอาคยา, แว ครวาเมเกอ ฮู๊ เตแม๊เถอะลว๊า เด๊อ อา โอ่ เด๊อ ม๊อขุ แฮ เออเนอแพ๊. 20แว จว๊าเล แด๊โฉ่โด่แน เหร่อเล๊อ เป่ อู เด๊อ วีดามัสกัส โทเร๊อ เด๊อ วีเยรูซาเล็ม อากู, เด๊อคยาเร๊อ แว จว๊า เด๊อ ยูดาห์เก่ ปว๋า โต๊โผ่, โท๊โต่ แว จว๊า เกอดื่อ เด๊อ แกแยยิวพู๊ หม่าโต่ เต๊เห่ อาเกลเกล. เร๊อ แซ่ฮู๊ เหย่ซี เก่ ถู่แหล่แต๊แกละกาคยา เกอเร๊อ แลแค อา เตซื๊อเตปล๊าเต๊เห่, โทเร๊อ แซ่ฮู๊ เหย่ซี เก่ ตีรี๊ กาคยาโต คยาแซ๊ อาเหน่ เด๊อ จอแปแหร่ อา โอ่, โท๊โต่ แซ่ฮู๊ อา เก่ เด๊อะโลแถ่แลแค อาเตเม เด๊อ อาแร๊ เต๊เห่ เน๊อ อา ถู่แหล่แต๊แกละ กาโทเฮ๊อ อาซิปล่อ เฮ๊อ อาเงเนอ, แว แด๊โฉ่โด่แน เป่เฮ๊อ เหย่ซี เฮ๊อ. ^c 21เด๊อ เตหรี่เตแก เออ อาขว่าอาคยา, เบ๊อะแว โอ่ เด๊อ เตหลู่แตโฮกู เบ๊อะเนอ, แกแยยิวพู๊ เต๊เห่ ปื่อ แว เร๊อ อา แม๊ปู เมเซอ แว แพ๊. 22หม่าแน๊เรอ, จอแปแหร่ เมจว่า แว อาขว่าอาคยา, โต่เด๊อ เออเตอ เนอ แว ก๊อถ่อ ข่าเฮ๊โล เป่ปา เน๊อ แกแย เด๊อ อา โอ่ เบ๊อะเออ ปว๋า เตเพร. แกแย เด๊อ อู เตเนดุ ลู เบ่เบ่, อู เตเน ปีตี๊ ลู เบ่เบ่ แว แด๊โฉ่โล แซ๊เป่ ลอ ลู. เตหรี่เตแก เด๊อ แว เฮ๊ เป่ เหย่ซี เออเนอหมา, เตอเจอเจ๋อ แพ๊ ลู เร๊อ เพรโพร เต๊เห่ เร๊อ คูโมเสส แด๊โฉ่หนื่ออื่อ โทเฮ๊อ เนอเต๊เห่ แพ๊, เร๊อ อา เฮ๊ แลแค เน๊อ, 23ครี๊ เด๊อ จอแปแหร่ นว๊าแถ่ ลู เร๊อ เพรเมแลเปล๊กา แกแยเห่ขุพู๊ เออเตเพรเนอ, อา เก่ข่าเบ่ เตเมจาเมจือ ปา เร๊อ อา หม่า เพร เด๊อ อา ก๊อถ่อ เซอเพร กาคยา เหร่อเล๊อ อู เด๊อ เตเซอ เตเพร ปา, ^d ฮู๊เนอ อาขว่าอาคยา, อา เก่ แด๊โฉ่โด่แน เป่ แกแยยิวพู๊ เต๊เห่ เร๊อ แกแยยิวพู๊ หม่าโต่ เต๊เห่ เร๊อ เตลี ปา,” คูเปาโล เฮ๊ เป่ คุ๊ยดุ อากริปปา ฮู๊เนอ. ^e

24เบ๊อะคูเปาโล เฮ๊เบ่แลเปล๊ อาเหน่ ฮู๊เออ เบ๊อะเนอ, คุ๊ยดุ เฟสทัส จ่าเพรอ เอ๊โท ลู เน๊อ, “คูเปาโล๋, เน ตีมุย แพ๊. เน เตลีแมลีเพ๊ เด๊อ อาดุอาแย เต๊เห่ เมตีมุย ลอ เน เฮ๊อ.”

25คูเปาโล เฮ๊ฉื่อ ลู เน๊อ, “เพ คุ๊ยดุ เฟสทั๋ส, แว ตีมุย หม่าโต่. แว เฮ๊ เออเต๊เห่ เนอหม่า เตจ๊ออาเต แพ๊. 26เพ คุ๊ยดุ อากริปปา, แว เฮ๊เบ่ ฮา เด๊อ เนเป๊เส่เง ฮู๊เออ เมเตเฮ๊เรอ, เน ซิเงดื่อเฮ๊อ เตหรี่เตแก เออเต๊เห่ เฮ๊อ. เมเตเฮ๊เรอ แว หยื่อเอ่ ตาเต เจ๊อ เร๊อ เน เกล๊ ซิเง โทแหน่เฮ๊อ เตหรี่เตแก เออ เฮ๊อ, เมเตเฮ๊เรอ เตหรี่เตแก เออเต๊เห่ เนอหม่า อา ทวา แถ่โห่แถ่เซ๊ หม่าโต่. 27เพ คุ๊ยดุ อากริปป๋า, หม่า เน หยื่อเอ่ เกอ ช๊าเหล่ เพรโพร อา เตเฮ๊เบ่ เนอเต๊เห่ แอ? เน หยื่อเอ่ แพ๊ เนอหม่า แว ซิเง.”

28คุ๊ยดุ อากริปปา เฮ๊ฉื่อ คูเปาโล เน๊อ, “เด๊อ ค๊าขิ แตแปล๊เตอเปลอฮู๊ อากู เออเนอ, เน เตเน เร๊อ เน เก่ อิลอหนิ แว เด๊อ แว เก่ ทวาแถ่เกอ ครี๊พู๊ ปา เตเพรเนอ แอ?”

29คูเปาโล เฮ๊ฉื่อ เน๊อ, “เด๊อ เตอเปลอฮู๊ อากู เบ่เบ่, อา งยา เจ๊อ เบ่เบ่, อา โหล่ดุน๊อโต่. แว กุยจ๊อเบ เป่ตื๊อ เนเตเพร อาเง หม่าโต่, แว กุยจ๊อเบ หนิเป่ลอ ล๋อ แกแย เด๊อ อา หนิโฮ แว เตเฮ๊เบ่ กู๊แหน่เออ เต๊เห่ เก่ ทวาแถ่เกอ ครี๊พู๊ แซ่เน๊อ แวเออ, หม่าแน๊เรอ เต เด๊อ แว ซิหยื่อ นอป่อชิเต่อเบ่เกอ ซี โต่ เนอหม่า อา โอ่ตื๊อแพ๊ ฮู๊ อู ด๊อตา แว เด๊อ ทอกู เร๊อ อู จอหม่า แว เร๊อ สู่เปลอต่อเท๊ เออเนอแพ๊.”

30เบ๊อะเนอเค คุ๊ยดุ อากริปปา เร๊อ คุ๊ยเป๊ส่าตู๊ เร๊อ คุ๊ยดุ อากริปปา อาโป่ เหมาะเบอร์นิส เร๊อ ล๋อ แกแย โอ่แน เกอเน๊อ เหย่ซี เบ๊อะเนอ ปว๋า เตเพร ก๊อถ่อลอ. 31เร๊อ เหย่ซี เถ่จว๊าแก ลอ เด๊อ อากลอ เร๊อ อา เฮ๊ เกอเร๊อ แคลู เตเพร เร๊อ เตเพร ฮู๊เออ, “แกแย เออเตเพรเนอ อาเตซื๊อ เด๊อ เบ่ เมจากาคยา เซอแก อา เนอเบ่เบ่, หม่าโต่เร๊อ เบ่ ด๊อโนแก อา เด๊อ ทอกู เนอเบ่เบ่, เตซื๊อ เด๊อ อา เม ตาลว๊าตาแก ฮู๊เออเนอ, อา โอ่ เตอเจ๋อ โต่.”

32เร๊อ คุ๊ยดุ อากริปปา แด๊โฉ่ คุ๊ยดุ เฟสทัส เน๊อ, “แกแย เออเตเพร เก่ กุยซิยอ นอ เมจากาคยา อาเหน่ เร๊อ คุ๊ยดุ ซีซาร์ โต่ เฮ๊หม่า, โตเบ่ ปลวาเถ่แก ลู เฮ๊อ.”