Acts 27

คูเปาโล แถ่แด๊หนิ ส่อเกลอดุ เร๊อ เถ่จว๊า เด๊อ วีโรม

1เบ๊อะอู เฮ๊ปลื๊อเฮ๊โท เฮ๊อ โหง่ เด๊อ เป เบ่ แถ่แด๊หนิ ส่อเกลอดุ เร๊อ เบ่ เถ่จว๊า เด๊อ อิตาลีเก่ เบ๊อะเนอ, คูเปาโล เร๊อ แกแย อาโร เด๊อ อู ด๊อตา เหย่ซี เด๊อ ทอกู เต๊เห่เนอ, อู เด๊อะตาแก เหย่ซี เด๊อ คูยูเลียส อา กู๊ยากู. คูยูเลียส หม่า เกลอฮู๊เตเย อากู่กล๊อ เตเพร. อา หม่า อา โอ่ ป่าโนเต่อ เกอ เด๊อ โรมัน เกลอฮู๊ เด๊อ อา โอ่ อาเพร ตีรี๊ ตู๊หมู่, เร๊อ อู เอ๊ เร๊อ “ออกัสตัส อาเกลอฮู๊ เบ๊หมู่ดุ.” 2ส่อเกลอดุ เต๊เบ่ อา โอ่ เด๊อ วีอาดรามิททิยุม เร๊อ อา แฮ เร๊อ อา เตเร เถ่จว๊า เด๊อ วี เด๊อ อา โอ่รว๊า เทอดุซาวาทือ เด๊อ เอเชียเก่ เต๊เห่ เร๊อ เป แถ่ แถ่แด๊หนิ ลู. แกแย มุย เร๊อ คูอาริสทารคัส เด๊อ อา โอ่ เด๊อ วีเธสะโลนิกา, เด๊อ มาซิโดเนียเก่ อา เตเป๊ออาเล โอ่เตเพร เร๊อ อา จว๊า เต่อเกอ เร๊อ เป.

3ช๊าป่าโร เนอ, เป จว๊าโต่ เด๊อ วีไซดอน. คูยูเลียส ซิยอ เกอเร๊อ คูเปาโล. เร๊อ แซ่ฮู๊ อา โคแบ๊ซว๊า เต๊เห่ เก่ เด๊อะเป่ เกอ ลู เต เด๊อ อา โอ่ เต๊เห่เนอ เร๊อ อา ปลวาจว๊าโอ่เล เกอ ลู เด๊อ อา โคแบ๊ซว๊า เต๊เห่ อา โอ่. 4เป โอ่เบ๊อะเนอ เถ่จว๊า เร๊อ เก่แลเซ๊ เทอฮ๊าโฮ๊ชอ เป อาขว่าอาคยา, เป จว๊า ตาดวาบี๊แก เน๊อ ไซปรัสกลื๊อ เด๊อ แบ๊โท ตากยา. 5เป จว๊า ตาลว๊าแก ซี ลีเซีย เก่ เร๊อ วีปัมฟีเลีย อาเทอดุซาวา เร๊อ เป จว๊าโต่ เด๊อ วีมิรา, โอ่ เด๊อ ลูคี๊หย่า เก่กูเนอ. 6เบ๊อะเนอเค เกลอฮู๊เตเย อากู่กล๊อ เนอเตเพร แม๊เถอะ ส่อเกลอดุ โอ่ เด๊อ วีอเล็กซานเดรีย แฮ เร๊อ อา เตเร จว๊า เด๊อ อิตาลีเก่ เต๊เบ่, เร๊อ อา นอแถ่แด๊ จว๊าเกอ เป เน๊อ ส่อเกลอดุ เออเต๊เบ่. 7อา จว๊ายอ เป่ ซื๊อลือ เป เร๊อ ม๊อเนอม๊อเซ งยาแฮเฮ๊อ เร๊อ เด๊อคยาเนอ เป จว๊าโต่ แหย่แหน่เจ๊อ เด๊อ เหล่โอ่ โต๊โผ่, เบ๊อะอาผื่อ เร๊อ วีคนีดัส เนอ. เก่แลเซ๊ ย๋อ พอฉื่อ เป เร๊อ เป จว๊า เป่แฮ แจ่ปาโต่ อาขว่าอาคยา, เป จว๊า ตาดวาเฮ๊อ เด๊อ ครีตกลื๊อ ซิแล ตากยา. ครีตกลื๊อ เออเนอ อา โอ่ จว๊าโต เด๊อ สัลโมเน กลื๊อ ตอนอ เนอตือกลื๊อ. 8เป จว๊ารว๊า เทอดุซาวาทือ เออเนอ อาแหย่ แหน่เจ๊อ เป. เร๊อ เป แฮโต่ เด๊อ เหล่โอ่ โต๊โผ่ เด๊อ อู เอ๊ ลู เน๊อ เหล่โอ่โก๊ โม เฮ๊ เออเนอ โต๊โผ่. เหล่โอ่โก๊ เออเนอ หม่า อา โอ่ผื่อ เน๊อ วีลาเซีย.

9เป จว๊า เออเนอ, ม๊อเนอม๊อเซ อางยาลาเฮ๊อ อาขว่าอาคยา, เป เก่ จว๊า เป่แฮ โป่ เด๊อ เง เฮ๊เนอ แม๊เถอะแจ่ อาแหย่ เต๊เห่ปา, เมเตเฮ๊เรอ, เต ปลวาแก เตซื๊อ ป่วยเออเนอ อาม๊อเนอม๊อเซ ตาลว๊าแกเฮ๊อ อาขว่าอาคยา, คูเปาโล เด๊อะรอเด๊อะเร เหย่ซี เร๊อ อา เฮ๊ เน๊อ, 10“โคแบ๊ซว๊า ซี๋, แว แม๊เถอะ เน๊อ เก่ เป เถ่จว๊า เฮ๊เนอ, เป๊อแถ่ เบ๊อะเนอ ตาเป่แฮ โต่ เด๊อ เง เนอปาหม่า เป แม๊เถอะแจ่ อาแหย่ เต๊เห่ปา, เร๊อ เตแลจู่แลพรอ เก่ โอ่แถ่ เอ๊แหน่เจ๊อ ปา. เป เก่ แลจู่แลพรอ ตือแพ๊ ส่อเกลอดุ เร๊อ ตาหมื่อตาเต โอ่ เด๊อ ส่อเกลอดุกู เออเนอเต๊เห่ ตื๊อดื่อ หม่าโต่. เป ซิปล่อ เซอเพร เต๊เห่ เก่ แลจู่แลพรอแก เกอ ปาปา.” 11หม่าแน๊เรอ เกลอฮู๊เตเย อากู่กล๊อ เออเตเพรเนอ, อา หนิดา เกอ คูเปาโล อาโหง่ โต่. อา หนิดา แพ๊ตื๊อ ส่อเกลอดุ อา กู่กล๊อดุ เออเตเพร เน๊อ ส่อเกลอดุ อาแบ่เจ่ อาโหง่ แพ๊. 12ช๊า เก๊โหร่เค แฮโต่ปาเนอ, แลบ๊าโอ่โก๊ ส่อเกลอดุ เหล่โอ่ เบ๊อะเนอ เนอหม่า อา ตาโตตาเบ่ โต่. เหย่ซี ซิปล่อโต เอ๊เล๊อ เน๊อ เก่ เถ่จว๊าแก เบ๊อะเนอ, เร๊อ เก่ แอ๊จื๊อ จว๊าโต่เบ๊ เด๊อ วีฟีนิกส์ เฮ๊เนอ, ช๋า เก๊โหร่เค ปาเรอ เก่ จว๊าโอ่โก๊เหร่อ เบ๊อะเนอ ปา. วีฟีนิกส์ หม่า หม่าดื่อ ส่อเกลอดุ เบ๊อะครีตกลื๊อ เนอเต๊เห่ แลบ๊าจว๊าโอ่โก๊ ตาดวาแร๊ อาเหล่โอ่. วีเออเนอ, อา โอ่ โตเด จว๊า ซิโน ซิแล เน๊อ ซิโน ซิแถ่ ตากยา.

เก่แลเซ๊ดุ ตา เด๊อ เทอดุซาวา อากู

13เก่ เป๊อแถ่ แลเซ๊ ซิโดซิโด แฮ เด๊อ แบ๊แล ตากยา เร๊อ แกแย เต๊เห่ เตเน แลแค เร๊อ เออโตโพ๊เนอ, เก่ เถ่จว๊า หม่า อาหนิ เฮ๊อ อา เตเน แลแค ฮู๊เนอ. เร๊อ เหย่ซี จุ่ยแถ่เถ่แก ลอ เด๊อ อู เหล่จุ่ย โอ่โก๊หม่า เน๊อ ส่อเกลอดุเออ ▼

▼เหล่เมโอ่โก๊ ส่อเกลอดุ

เร๊อ อา ปลวาโกจว๊าแก ส่อเกลอดุเออ จว๊ารว๊า ครีตกลื๊อทือ เนอตากยา. 14หม่าแน๊เรอ งยาแต๋โต่เนอ, เก่แลเซ๊ พอชอ เร๊อ อู เอ๊ ลู เร๊อ “ชิโท ชิเถ่ เก่แลเซ๊” เนอ อา โอ่ เด๊อ กลื๊อขุ ตากยา เร๊อ อา แฮโต เด๊อ เหย่ซี โอ่. 15เก่แลเซ๊ แฮพอ ส่อเกลอดุเออ เร๊อ เหย่ซี อาแค อาย๊อเป่ เกอเร๊อ ปา อา ส่อเกลอดุ อากู่กล๊อ โต่ อาขว่าอาคยา, เป ปลวา พอจว๊าแก ลู เร๊อ เก่แลเซ๊. 16เบ๊อะเป จว๊าตาดวาเฮ๊อ เร๊อ คาวดากลื๊อฮู๊ เบ๊อะเนอ, แซ่ฮู๊ อา ส่อเกลอฮู๊ เด๊อ ส่อเกลอดุ จุ่ยจว๊าหนิ ลู เออเต๊เบ่ เก่ เพ๊ปย๊าแก แต่เหม่ เนอ, เป แอ๊จื๊อ ปื่อจว๊า หนิ คยาแซ๊ อา เด๊อ อาแหย่ อากูเจ๊อ. 17เหย่ซี จุ่ยแถ่ ส่อเกลอฮู๊ เออเตอเบ่ เด๊อ ส่อเกลอดุ อากู, โทเร๊อ แซ่ฮู๊ ส่อเกลอดุ เออเตอเบ่ เก่ เพ๊แก เตเมเนอ, เหย่ซี พย๊า สู่เปลอดุ เร๊อ อา จอตารา ตาวา หม่า เร๊อ ส่อเกลอดุ. ซิอิเช เร๊อ ส่อเกลอดุเออ อาลูจว๊า ต๊อบ่อ โอ่แต่ เด๊อ เสอร์ทิส เห่โซขุ เนอเรอ, เหย่ซี ท๊อตาแก ส่อเกลอดุ อา อิเกบ่าดุ อาเหล่ปลวาพอ เร๊อ เก่แลเซ๊ เออเนอ เร๊อ อา ปลวา โล่จว๊าแก ส่อเกลอดุ เออ, จู๋ ดื่อเฮ๊อ เก่แลเซ๊ พอจว๊า อา ฮู๊เนอ แพ๊. 18เก่แลเซ๊ฉว่า แลเซ๊ชอ ปา อาขว่าอาคยา, อาเนอ เตอเนอเนอ เหย่ซี ต่าตาแก ตาหมื่อตาเต เด๊อ ส่อเกลอดุกู เออเต๊เห่ เด๊อ เทอกู. 19เด๊อคยาโป่ เตอเนอเนอ, เหย่ซี อาแหน่แบ่เจ่ เร๊อดื่อ ต่าตาแก เกอโป่ ส่อเกลอดุ ครือขรว่า เต๊เห่ เด๊อ เทอกูกู. 20ต๊อเหมาะ เบ่เบ่, เฉ่ เบ่เบ่, เป แม๊เถอะน๊อ ปา โต่ เนอ, ม๊อเนอม๊อเซ อางยาลาเฮ๊อ, เก่แลเซ๊ แลแล แฮชอปา แหน่เจ๊อ เร๊อ เป แม๊ชือ เด๊อ เป เหล่แลเปล๊ เร๊อ อา โอ่ ปาโต่.

21เบ๊อะแกแย เออเต๊เห่ เอ่น๊อโอน๊อ ปาโต่ อางยาลาเฮ๊อ เบ๊อะเนอ, คูเปาโล ก๊อถ่อ เด๊อ เหย่ซี เบ๊เง เร๊อ อา เฮ๊ เหย่ซี เน๊อ, “โคแบ๊ซว๊า ซี๋ เบ๊อะเป โอ่ เด๊อ ครีตกลื๊อ เบ๊อะเนอ, ซี โตเบ่ เถ่จว๊า โต่ แว เฮ๊ ซี เบ๊อะเนอ, ซี โตเบ่ หนิดา ช๊าเหล่ แวโหง่. ซี เก่ หนิดา แวโหง่ เฮ๊เนอหม่า, ซี เตเรปย๊าเตเรแก, เตเร แลจู่แลพรอ ลอแก ฮู๊เออ โต่. 22หม่าแน๊เรอ กู๊แหน่เออ แว กุยซิยอ ซี, แด่ฉว่าแด่ชอ แลแค ซี ซิปล่อ, ซี ซิปล่อเซอเพร โตเบ่ แลจู่แกหนิ เตเพร่ว โต่. อา เก่ ปย๊าแก แพ๊ดื่อ ส่อเกลอดุ เยเต๊เบ่ ปา แพ๊. 23เมเตเฮ๊เรอ, เออเตเซ, จอแปแหร่ เด๊อ แว ทวาเฮ๊อ อาเต เร๊อ แว เมเฮ๊อ อาเตเม เออเตเพร อา เตเน่วม๊อขุ แฮ ก๊อถ่อโอ่ เด๊อ แว ช๊า, 24เร๊อ อา เฮ๊ แว เน๊อ, ‘คูเปาโล๋, ซิอิเช แต่เหม่. เน เบ่ แฮ ก๊อถ่อโอ่ โต่เบ่ เร๊อดื่อ เด๊อ คุ๊ยดุ ซีซาร์ อา เป๊เส่เง ปา. เร๊อ อา เก่ แด๊เฮอเจแม๊ ดื่อ เน ปา. จอแปแหร่ ย๊อ แม๊ เนเป๊เส่ เร๊อ อา เมบุ๊ยเมเตอเรอ เร๊อดื่อ เน อาขว่าอาคยา, อา เก่ เมแลเปล๊ เน เร๊อ แกแย เด๊อ อา แถ่แด๊ เต่อเกอ ส่อเกลอดุ เร๊อ เน เออเต๊เห่ ล๋อ ปลี ปา.’ 25ฮู๊เนอ อาขว่าอาคยา, โคแบ๊ซว๊า ซี๋, แด่ชอ แลแค ซี ซิปล่อ นี๋, เมเตเฮ๊เรอ แว หยื่อเอ่หนิดื่อ จอแปแหร่ เออเตเพร เร๊อ อา เก่ เมฮู๊ อา เฮ๊โทเฮ๊อ แว เนอ ปา. 26ฮู๊เตเต๋ เบ่เบ่, เก่แลเซ๊ เออ แกล๊ พอจว๊า แด่แถ่ เน เป เด๊อ กลื๊อ เตเมเม อาขุ ปา.”

27เบ๊อะเช๊อลุยเซ เบ๊อะเนอเตเซเนอ, เก่แลเซ๊ดุเออ อา พอจว๊า เป เด๊อ อาเดรีย เทอดุซาวา เออเนอ อากู. อาโต เบ๊อะเหมาะ เตเร ผื่อเหมาะเนเฮ๊อ เบ๊อะเนอ, เพรแคเออเนอ เด๊อ ส่อเกลอดุ อากู เออเต๊เห่ ซิเง เร๊อ อา แซ่ เร๊อ อา โหล่จว๊าผื่อเฮ๊อ เด๊อ โคขุ โต๊โผ่โผ่ เฮ๊อ. 28ฮู๊เนอ อาขว่าอาคยา, เหย่ซี เตแม๊ เทอเออ เร๊อ อา แย อากลี เนอเชอ, เร๊อ โอ่ เตอเปลอดุ เนอ เหย่ซี เตแม๊คยา เทอ เร๊อ อา โอ่แพ๊ อากลี เช๊อแง แพ๊. 29เหย่ซี ต๊อหร่อซิอิเช เร๊อ ซิอิเช ส่อเกลอดุ จว๊าต่าเบ่ เร๊อ หล่อ เร๊อ อา แจตา หล่อ เหล่เมโอ่โก๊ ส่อเกลอดุ ลุยเม เด๊อ เทอกู เร๊อ อา กุยจ๊อเบ แลแค เร๊อ เหมาะ เก่ ลี แพร เป่ เหย่ซี. 30เพรเมเต เด๊อ ส่อเกลอดุกู เต๊เห่ แม๊ปู แลแค แกล๊ เด๊อ อา เก่ แกล่เปล๊แก อาเง เร๊อ เหย่ซี แด่ตา ส่อเกลอฮู๊ เนอเต๊เบ่ เด๊อ เทอกู เร๊อ อา แด่ตา แลแค เหล่เมโอ่โก๊ ส่อเกลอดุ เออเต๊เห่ เด๊อ เทอกู เด๊อ ส่อเกลอดุ เออ อาเบ๊เง. 31เร๊อ คูเปาโล เฮ๊ เกลอฮู๊เตเย อากู่กล๊อ เออเตเพร เร๊อ เกลอฮู๊ เต๊เห่ เร๊อ เพรเมเออเนอ เด๊อ ส่อเกลอดุกู เออเต๊เห่ เน๊อ, “ซี เก่ โอ่ แลแค เด๊อ ส่อเกลอดุ อากู โต่ เฮ๊เนอหม่า ซี แลเปล๊แจ่ เตเพร่ว โต่.” 32ฮู๊เนอ อาขว่าอาคยา, เกลอฮู๊ เต๊เห่ ปาตือแก สู่เปลอ เด๊อ อู จอหม่า เร๊อ ส่อเกลอฮู๊ เออเตอเบ่ เต๊เห่ เร๊อ อา ปลวา โลจว๊าแก ส่อเกลอฮู๊ เออ.

33เหมาะ เตเร ลีบูเฮ๊อ เบ๊อะเนอ, คูเปาโล กุยซิยอ ตื๊อดื่อ ลอปลี เหย่ซี เร๊อ อา เก่เอ่เก่โอ คยาแซ๊ แลแค. “กู๊แหน่เร๊อ ซี ส่าเซ ตาล๊าเจ๊อ เช๊อลุยเซ เจ๊อเฮ๊อ, เร๊อ ซีเอ่ซีโอ น๊อล๋าย เตอเจ๋อ โต่. 34ฮู๊เนอเรอ, แว กุยซิยอ ซี เร๊อ ซี เก่เอ่เก่โอ แลแค เฉ่ เต๊อเจ่อเจ่อ. แซ่ฮู๊ ซี เก่ เซอเพร แลแค เนอ, ซี โหล่เอ่ แลแค เฉ่. กู๊โล แพ๊ โตโบ เด๊อ ซี กู่กล๊อลู แพ๊เนอ อา เบ่ โอ่เหม่แกหนิ โตโบ๋ โต่.” 35คูเปาโล เฮ๊โท เหย่ซี ฮู๊เออ เนอ, อา พย๊าหนิ ค๊อมู เร๊อ อา เฮ๊บุ๊ยเฮ๊เตอเรอ จอแปแหร่ เด๊อ เหย่ซี ล๋อ ปลี อา เป๊เส่เง. โทเร๊อ อา อาบิหมื่อ ค๊อมู เร๊อ อา เอ่ แลแค. 36ฮู๊เนอเร๊อ เหย่ซี ซิปล่อฉว่า ซิปล่อชอ กาคยา ลอคยาแซ๊ เร๊อ อา เอ่เกอ ลอคยาแซ๊ เฉ่ ปว๋า เตเพร. 37แกแย โอ่ เด๊อ ส่อเกลอดุ อากู ล๋อ ปลี เนอหม่า อา โอ่ เนอเย เร๊อ โซซว๊าเตอเชอ เร๊อ เพร โซซว๊า. 38อู เอ่ก๊อโอบา โทลอเฮ๊อ เฉ่ ปว๋า เตเพร เร๊อ แซ่ฮู๊ ส่อเกลอดุ เก่ อาพุยแฮ อาเง เนอ, เหย่ซี ต่าตาแก ลอ โบ๊กู่ลา เต๊เห่ เด๊อ เทอดุซาวา อากู.

ส่อเกลอดุ เพ๊ปย๊าแก

39เบ๊อะเหมาะลีบูเฮ๊อ เบ๊อะเนอ, เหย่ซี แม๊เถอะ โลเฮ๊อ โคขุ ตื๊อดื่อเรอ เหย่ซี จว๊าโต่โต เบ๊อะโต๊โผ่เตเนอ, เร๊อ อา ซิเง แลแค โต่. หม่าแน๊เรอ เหย่ซี แม๊เถอะ เทอดุซาวา อาเห่ขุ ต๊าหน่า เถ่เล๊อ โอ่โต๊โผ่ อาขว่าอาคยา, เหย่ซี เก่ จว๊าโต่แจ่ เบ๊อะเนอ เฮ๊เนอหม่า, อา ซิหยื่อจว๊า บ๊าโอ่โก๊ แลแค อา ส่อเกลอดุ เบ๊อะเนอ. 40ฮู๊เนอ อาขว่าอาคยา, เหย่ซี ปาตือแก สู่เปลอ เด๊อ อู จอกลอหม่า เร๊อ หล่อ เหล่เมโอ่โก๊ ส่อเกลอดุ เออเนอเต๊เห่ โทเร๊อ อา ปลวา แลจื๊อ ตาแก ลอ หล่อเออเต๊เห่ เด๊อ เทอดุซาวากู. โตโพ๊โต เหย่ซี ฉิโล๊แก สู่เปลอ เด๊อ อู จอกลอหม่า เร๊อ เหล่แค เหล่ย๊อ ส่อเกลอดุ เนอเต๊เห่. โทเร๊อ เหย่ซี จอแตแดแถ่ อิเกบ่าดุ เด๊อ ส่อเกลอดุ เบ๊เง ตากยา เร๊อ เหย่ซี ปลวาพอจว๊า เร๊อ เก่แลเซ๊ เด๊อ เทอทือ ตากยา. 41หม่าแน๊เรอ ส่อเกลอดุ แถ่โอ่แต่ เด๊อ เห่โซขุ โต๊โผ่. ส่อเกลอดุ อากู่กล๊อ ช๊าหม่า ย๊าเตอเกล๊อ เจ๊อ เร๊อ อา โกโย เป่ปาโต่. เด๊อ ส่อเกลอดุ อาเพ๊ เนอกยาเนอ, เทอฮ๊าโฮ๊ แปล่ฉว่า ตาลว๊าซิลือ เร๊อ อา เพ๊แกเฮ๊อ.

42ปาหม่า ล๋อ แกแย เด๊อ อู ด๊อตา เหย่ซี เด๊อ ทอกู เออเต๊เห่ เป๊เหย่เถ่ ลอ เด๊อ โคขุ เร๊อ เถ่แกล่ เปล๊จว๊าแก ลอ เห่, เกลอฮู๊ เต๊เห่ อา เตเน เร๊อ, เหย่ซี แด่แล แลแค เฮ๊อ อาซิปล่อ เด๊อ อา เก่ เมเซอแก ลอ เหย่ซี. 43หม่าแน๊เรอ เกลอฮู๊เตเย อา กู่กล๊อเออ อา ซิหยื่อ เมแลเปล๊ คูเปาโล อาขว่าอาคยา, เฮ๊ ดี๊แดตาตือ เกลอฮู๊ เต๊เห่ เร๊อ อา เก่ เมเซอ แต่ เหย่ซี เตเพร่ว แต่เหม่. ฮู๊เนอ อาขว่าอาคยา, อา เฮ๊ตา อาโหง่ เร๊อ แกแย เด๊อ อา เป๊เหย่แจ่ เทอ เต๊เห่เนอ อี๊ฉ่าตา เหร่อเล๊อมอ เด๊อ เทอกูเนอ เร๊อ เป๊เหย่เถ่เหร่อมอ เด๊อ โคขุ เนอ. 44แกแย เด๊อ อา โอ่แก เต๊เห่เนอ, แถ่แด๊หนิ ส่อบย่า เต๊เห่, หม่าโต่เรอ แถ่แด๊หนิ แลแค ส่อเกลอดุ เพ๊ ก๊ากีก๊ากว่า เออเต๊เห่ เร๊อ ครวา เป๊เหย่เถ่ เกอ แลแค. เร๊อ เหย่ซี เม ลอ แลแค พู๊ อา เฮ๊ เนอเรอ เหย่ซี เถ่โต่ แร๊แร๊โมโม ลอปลี เด๊อ โคขุ ปว๋า เตเพร.