Act 28 | EkySCThai | STEP | เบ๊อะเป แถ่โต่ แร๊แร๊โมโมโทเฮ๊อ เด๊อ โคขุ เบ๊อะเนอ, อู แด๊โฉ่โล เป่ เป เร๊อ กลื๊อ เนอตือกลื๊อ หม่า อู เฮ๊ เร๊อ มอลตากลื๊อ.

Acts 28

จว๊าโต่ เด๊อ มอลตากลื๊อ

1 เบ๊อะเป แถ่โต่ แร๊แร๊โมโมโทเฮ๊อ เด๊อ โคขุ เบ๊อะเนอ, อู แด๊โฉ่โล เป่ เป เร๊อ กลื๊อ เนอตือกลื๊อ หม่า อู เฮ๊ เร๊อ มอลตากลื๊อ. 2 แกแย โอ่ เบ๊อะกลื๊อลู เต๊เห่เนอ, อา เมแร๊ แหน่เจ๊อ เป. เก๊จือ แฮ เร๊อ เก๊โหร่แหน่เจ๊อ เป อาขว่าอาคยา, เหย่ซี โอ๊แกหมิ เร๊อ อา เอ๊ อิชุ๊ย แลแค เป หมิ. 3 คูเปาโล จว๊า เทกา ขรุ เตเท เร๊อ อา กา ชื๊อโน เด๊อ หมิกู เบ๊อะเนอ, หมิ เซ๊แถ่ กู่ หรู่ซิ โตโบ๊ เร๊อ อา เถ่ อิโพ คูเปาโล เร๊อ อา อิโพ จิจือ ลู๊เล๊อ หม่าเด๊อ ลู กู๊ขุลู. 4 แกแย กลื๊อขุพู๊ เบ๊อะเนอ เต๊เห่ แม๊เถอะ หรู่ จิจือลู๊เล๊อ หม่า เด๊อ คูเปาโล กู๊ขุลู เร๊อ อา เฮ๊ เกอเร๊อ แคลู เตเพร เร๊อ เตเพร ฮู๊เออ, “แกแย เออเตเพรหม่า เพรเมเซอ แกแย แพ๊. อา แลเปล๊ เร๊อ เตเซอ เด๊อ เทอดุซาวากู ตื๊อดื่อเรอ แบ่เจ่ เด๊อ อู เอ๊ เร๊อ เตจ๊อเตเต เออเตเพร แด่ โอ่เซอเพร ปา อา โต่.” 5 หม่าแน๊เรอ คูเปาโล ตีชี๊ ตาโนแก หรู่ เด๊อ หมิกู, เร๊อ อา เม ลู เตอเจ๋อ โต่. 6 เหย่ซี โอ่ป่อ แม๊ แลแค เร๊อ คูเปาโล เกล๊ เนแย๊ แฮ แหน่ปา เฮ๊อ. เหย่ซี โอ่ป่อ อางยาลาเฮ๊อ ตื๊อดื่อเรอ อา แม๊เถอะ อาแร แถ่ ลู เตอเจ๋อ โต่ อาขว่าอาคยา, เหย่ซี เตเน โค๊แก คูเปาโล เร๊อ อา หม่า จอแปแหร่ อาพู๊ เตเพร เพร แหน่ เฮ๊อ.

7 เหล่โอ่ ตีวี๊ตาวา ผื่อ เบ๊อะเนอโต๊โผะ หม่า, กลื๊อแบ่เจ่ อามุย เน๊อ คูปูบลิอัส อาเพร๊ โอ่ เต๊เหล่. เร๊อ อา เอ๊โมฉื่อ แร๊แหน่เจ๊อ เป, เร๊อ เป จว๊า ทวา โก๊เกอ ลู ซิเผระ โซเนอโซเซ. 8 คูปูบลิอัส อาเพ เหน่กู่ เร๊อ อา เชอ่า ลูฮ๊อกู อาขว่าอาคยา, อา โอ่เมอโอ่ เด๊อ อาเหล่เมอกู แพ๊. เร๊อ คูเปาโล โน เด๊อ อา หี่ด๊อกู เร๊อ, อา โน กุยจ๊อเบ เป่ ลู, เร๊อ อา แด่แถ่ อากู๊ขุ เด๊อ ลูเหน่ลู เร๊อ อา แหย่โอ่เหม่ เป่ ลู. 9 ฮู๊เนอ อาขว่าอาคยา, ล๋อ แกแยชู๊ยแกแยเช โอ่ เบ๊อะกลื๊อขุ เนอเต๊เห่ จว๊า แหย่โอ่เหม่ เกอ แลแค อาเหน่ เด๊อ ลูโอ่. 10 เหย่ซี เด๊อะปลูเด๊อะเผ่ เจ๊อ เป เชหยู่ เต๊เห่, เร๊อ เบ๊อะเป แถ่แด๊แถ่ ส่อเกลอดุ เบ๊อะเนอ, เหย่ซี แด่จว๊าหนิ เป่ เป เหล่เอ่เหล่โอ เด๊อ แกล๊ลู อาเง เต๊เห่.

คูเปาโล โอ่ เด๊อ แม๊หล่าห่า กลื๊อ เร๊อ เถ่จว๊า เด๊อ วีโรม

11 โซเล อาบาโท เด๊อคยาเนอ, เป แถ่แด๊แถ่ วีอเล็กซานเดรีย อา ส่อเกลอดุ เต๊เบ่. เด๊อ ส่อเกลอดุ อากู่กล๊อ เบ๊เงเนอ แบ่เจ่ ดีคยา อาแยโหย่ โอ่. เร๊อ ส่อเกลอดุ เออ อา จว๊า โอ่โก๊ ปลื๊อลอโต่ เด๊อ เก๊โหร่เค เบ๊อะกลื๊อ เนอตือกลื๊อ อาลู. 12 เป จว๊าโต่ เด๊อ วีไซราคิ้วส์ เร๊อ เป จว๊าโอ่ เบ๊อะเนอ โซเนอ. 13 เป โอ่ เบ๊อะเนอ เร๊อ เป เถ่จว๊า โป่ เด๊อ วีเรยีอูม. โทเร๊อ เด๊อคยา เตอเนอเนอ, เก่แลเซ๊ ดุแถ่ เด๊อ แบ๊แล ตากยา เร๊อ เนอเนอเตอเนอ เนอ เป จว๊าโต่ เด๊อ วีโปทิโอลี. 14 เป แม๊เถอะฉื่อ เร๊อ เพรหยื่อเอ่ เบ๊อะเนอ เต๊เห่, เร๊อ เหย่ซี เอ๊โอ่แกโก๊ โป่เกอ เป เบ๊อะเนอ โซซว๊าเตอเนอ. เป โอ่แก โท เบ๊อะเนอ เร๊อ เป เถ่จว๊าแก เด๊อ วีโรม. 15 เป โป่แหว่ เพรหยื่อเอ่ เด๊อ อา โอ่ เด๊อ วีโรม อากู เต๊เห่เนอ, อา หนิโฮ แลแค เปหรี่เปแก เร๊อ อา จว๊า แม๊เถอะฉื่อ โต่ เป เด๊อ วีอาปีย๊า เกล๊กู เนอ เต๊เห่, เต๊เห่เห่เร๊อ อา แฮ แม๊เถอะฉื่อ เป เด๊อ ซิเผระหี่ เนอ โซเม อากู. เบ๊อะคูเปาโล แม๊เถอะ เหย่ซี เบ๊อะเนอ, อา หนิอ๊าหนิเหร่ ลา ลู เร๊อ อา เฮ๊บุ๊ยเฮ๊เตอเรอ จอแปแหร่.

เด๊อ วีโรม อากู

16 เบ๊อะเป จว๊าโต่ เด๊อ วีโรม อากู เบ๊อะเนอ, อู นอโอ่ หนิเร๊อดื่อ คูเปาโล เร๊อ อู จว๊าแคโอ่ เป่ ลู หี่เตเม เร๊อ เกลอฮู๊ เตเพร โอ่ป่อ เกอเร๊อ ลู.

17 โซเซ บาเฮ๊อเนอ, คูเปาโล เอ๊ปล๊อหนิ แกแยยิวพู๊ เด๊อ อา ทวา อากู่กล๊อทวาดุ เบ๊อะวีโรม เนอเต๊เห่. เบ๊อะเหย่ซี แฮโต่ ลอเฮ๊อ เบ๊อะเนอ, อา เฮ๊ เหย่ซี เน๊อ, “แว โป่แหว่ ซี๋, เตเม โตโมเต๊เก่ฉื่อ เป เมวเจอะ เต๊เห่ เบ่เบ่, หม่าโต่เรอ เต เด๊อ อา โค๊เล๊อ เร๊อ เป เหล่โกลเหล่แบ่ เด๊อ เป พย๊าหนิ เด๊อ เป โหมะเพเพอโพ เด๋อ งย๊าเค เต๊เห่ อา โอ่ เนอ เบ่เบ่, แว เมน๊อ เร๊อ เตอเจ๋อ โต่. หม่าแน๊เรอ อู ปื่อ แว เด๊อ วีเยรูซาเล็ม อากู เร๊อ อู เด๊อะตาแก แว เด๊อ โรมัน เต๊เห่ อา กู๊ยากู. 18 เหย่ซี แด๊เฮอเจแม๊ โทเฮ๊อ แว เร๊อ เด๊อคยาเนอ, เหย่ซี แม๊เถอะ แว เตซื๊อ เด๊อ อาโต เร๊อ แด่ เตเมจากาคยา เซอ แกเนอ อา โอ่ เตอเจ๋อ โต่ อาขว่าอาคยา, เหย่ซี ซิหยื่อ ปลวาแก แว. 19 หม่าแน๊เรอ เบ๊อะแกแยยิวพู๊ เต๊เห่ เคร๊ฉื่อ เตเออ เบ๊อะเนอ, แว โตเบ่ เจแม๊ แวเหน่ เร๊อ คุ๊ยดุ ซีซาร์ แว เตเน ฮู๊เนอ แว แด่ เตซื๊อ เด๊อ แว เทอเก่พู๊ อาโอ่ เนอ อา โอ่ เร๊อ เตอเจ๋อ โต่. ^a 20 เด๊อ เตหรี่เตแก เออ อาขว่าอาคยาเร๊อ, แว กุย เกอ เหย่ซี เด๊อ อา เก่ เด๊อะแม๊เถอะ เฮ๊เบ่เกอ เต เน๊อ ซี. เก่เฮ๊เนอหม่า เด๊อ ซี หม่าเฮ๊อ แกแยยิวพู๊ เออเต๊เห่ อา เตแม๊ชือ อาขว่าอาคยาเร๊อ, อู เบ่ จอกลอหม่าแก แว เน๊อ สู่เปลอต่อเท๊ เออ เฮ๊อ.”

21 เร๊อ เหย่ซี เฮ๊ฉื่อ ลู เน๊อ, “เป พย๊าหนิน๊อ เร๊อ ลี โอ่ เด๊อ ยูดาห์เก่ แฮ เร๊อ อา แด๊โฉ่ เป่ เป เร๊อ เนหรี่เนแก เนอ อา โอ่ ต๊าบ๋า โต่. เป โป่แหว่ แกแยยิวพู๊ เด๊อ อา แฮ เบ๊อะเออ เต๊เห่เนอ, อา เฮ๊น๊อ เป่ เร๊อ เป เร๊อ เน เมซื๊อเมปล๊าเต อาหรี่อาแก เตเพร่ว โต่. 22 หม่าแน๊เรอ เป ซิหยื่อ หนิโฮ เกอดื่อ เน เตแม๊เถอะ เร๊อ เน เตเหล่เตเน เต๊เห่ แพ๊, เมเตเฮ๊เรอ, เป ซิเง เน๊อ แกแย เบ๊อะเต๋ โต๊โผ่ เบ่เบ่ อา เฮ๊ โตโมแตแก่ ลอปลี แกแย เออเตอหมู่.”

23 ฮู๊เนอเรอ เหย่ซี เฮ๊โอ่ ลู ม๊อเนอม๊อเซ เด๊อ อา เก่ แม๊เถอะ ตาฉื่อ คยาแซ๊ เร๊อ คูเปาโล เร๊อ เบ๊อะเหย่ซี เฮ๊โอ่ ลู เนอเตอเนอเนอ, แกแยยิวพู๊ เต๊เห่ แฮ แลแค เบ๊อะคูเปาโล โอ่ เกอเร๊อ หี่ เนอเตเม อากู, เร๊อ เหย่ซี แฮโหร่ เอ๊เล๊อ เจ๊อ เน๊อ เด๊อ อาเหร่อเค เนอตื๊อหื่อ เจ๊อ. เร๊อ คูเปาโล เป๊อแถ่ เฮ๊โฉ่โด่แนโล เป่ เหย่ซี เร๊อ จอแปแหร่ อาเทออาเก่ อาหรี่อาแก เร๊อ อาข่าเฮ๊โล หนิ อาหรี่อาแก เด๊อ เหมาะลี โต่ เจ๊อ เด๊อ เหมาะคี๊ เจ๊อ. แซ่ฮู๊ เหย่ซี เก่ หยื่อเอ่ เหย่ซู่ อาหรี่อาแก เอออาเงเนอเร๊อ, อา แอ๊จื๊อ เฮ๊โฉ่ซิเงโปล เป่ เหย่ซี เร๊อ คูโมเสส อา เตซว๊าเตแส่ เนอเต๊เห่ เน๊อ เพรโพรเฮ๊หนื่ออื่อ เนอเต๊เห่. 24 เต๊เห่เห่เร๊อ อา หยื่อเอ่ แลแค เร๊อ คูเปาโล เฮ๊ เออเต๊เห่ เนอหม่า อา หม่าแหน่ เจ๊อ, หม่าแน๊เรอ เต๊เห่เห่เนอ อา หยื่อเอ่ โต่. 25 เบ๊อะเหย่ซี ซิปล่อ เตเนโค๊คยาลู เร๊อ เหย่ซี เถ่จว๊าแก เบ๊อะเนอ, คูเปาโล เฮ๊เบ่ โหง่ เด๊อคยาเล๊อ ตือมือ เน๊อ, “แหย่โยบูโพ๊แบ่เจ่ เฮ๊เบ่ แฮเง เน๊อ เพรโพร อิสยาห์ เร๊อ อา เฮ๊โฉ่แก เป โหมะเพเพอโพ เด๋อ งย๊าเค เต๊เห่ เนอหม่า อา โตตื๊อ เจ๊อ. 26 เร๊อ อา เฮ๊ เน๊อ,

‘จว๊า เด๊อ แกแย เออ เตเมวเต๊อเจ่อ อา โอ่ เร๊อ เฮ๊ เหย่ซี เน๊อ, ซี หนิโฮ โท หนิโฮ แซ๊แซ๊ เจ๊อ ตื๊อดื่อเรอ ซี ซิเงโปลโต่. ซี แม๊โทโท แม๊แซ๊แซ๊ เจ๊อ ตื๊อดื่อเรอ ซี แม๊เถอะโต่. ^b 27 เมเตเฮ๊เรอ แกแย เออเตเมวเต๊อเจ่อ เนอ, อา ซิหยื่อ ซิเง เกอแหน่ อู โต่. เหย่ซี ตีบี๊ แลแค อา กู๊หลิโก่กู, โทเร๊อ อา เมบี๊ แลแค อา เป๊เส่ปล่อ. เก่หม่าโต่หม่า, เหย่ซี เก่ แม๊เถอะ เกอ แลแค เต เน๊อ อา เป๊เส่ปล่อ, เร๊อ เหย่ซี เก่ หนิโฮ เกอ แลแค เตเน๊อ อากู๊หลิโก่, เหย่ซี เก่ เตเนโปล แฮเกอ แลแค เร๊อ อา เก่ ตีรี๊ กาคยาโต แลแค อาเหน่ เด๊อ แว โอ่, เร๊อ แว เก่ แหย่โอ่เหม่ คยา เหย่ซี อา เฮ๊ ฮู๊เนอ.’ ^c 28 คูเปาโล เฮ๊ โป่ เน๊อ, ฮู๊เนอ อาขว่าอาคยา, ซี โตเบ่ ซิเง แลแค เน๊อ, จอแปแหร่ อา เตเมแลเปล๊แก อาหรี่อาแก เนอ, อู เก่ ซูจว๊าเฮ๊อ ลู เด๊อ แกแยยิวพู๊ หม่าโต่ เต๊เห่ อา โอ่ เฮ๊อ, เร๊อ แกแยยิวพู๊ หม่าโต่ เต๊เห่ เก่ หนิดา ลู ปา.” 29 คูเปาโล เฮ๊โท เต ฮู๊เออ เนอ, แกแยยิวพู๊ เต๊เห่ เถ่จว๊าแก เร๊อ เหย่ซี จว๊า แขระเซอแขระโอ่ เกอเร๊อ แคลู.) ^{▼▼อู รา โอ่ ลีเทส่อพ๊า เด๊อ อาแกช๊าเล๊อ เต๊เห่ อากู เนอ, เต๊เห่เห่เรอ ลีมาพู๊ ๒๙ เออเนอ อา โอ่ ปา โต่.}

30 คูเปาโล โอ่ เบ๊อะหี่ เด๊อ อา จว๊า คยา โอ่โก๊หนิ เออเนอ เนอหน่า เร๊อ อา เอ๊โหมะฉื่อ ล๋อ แกแย เด๊อ อา จว๊า โอ่เล เกอ ลู เนอเต๊เห่. 31 คูเปาโล แด๊โฉ่โด่แน เป่ อู เร๊อ จอแปแหร่ อาเทออาเก่ อาหรี่อาแก, เร๊อ อา อิซว๊าอี๊แส่ ตา เป่ อู เร๊อ แบ่เจ่ เหย่ซู่ครี๊ อาหรี่อาแก. โทเร๊อ อา เฮ๊เบ่คือเฮ๊เบ่บื่อ เร๊อ อู เมตาตือ เหย่ซีเนอ อา โอ่ เตเพร่ว โต่.