Acts 3
คูเปโตร เร๊อ คูยอห์น แหย่โอ่เหม่ แกแย กู๊โด่ด๊าตือรือ เตเพร
1เตอเนอเค เบ๊อะเหมาะเฮ๊แล โซมือ, อู โต กุยจ๊อเบ เบ๊อะเนอ, คูเปโตร เร๊อ คูยอห์น จว๊าแถ่ แลแค เด๊อ เตหลู่แตโฮ. 2เร๊อ อู จอแฮ แกแย กู๊โด่ด๊าตือรือ ปาเด๊อ อา โหมะฮ๊อกู เตเพร เร๊อ อู แฮ แด่โอ่ อา เบ๊อะเตหลู่แตโฮ กู่ดา อาช๊า เนอ. กู่ดา เออเนอ อู เอ๊ อา เน๊อ, “กู่ดาตว่า.” แซ่ฮู๊ อา เก่ กุยหนิเกอ รือ เด๊อ แกแย แฮโน เด๊อ เตหลู่แต โฮกู เนอเต๊เห่ อาโอ่ เร๊อ ปวาเนอเน๊อ อู จอแฮ แด่โอ่ ลู เบ๊อะเนอ. 3เบ๊อะอา แม๊เถอะ คูเปโตร เร๊อ คูยอห์น เตเร โน เด๊อ เตหลู่แต โฮกู เบ๊อะเนอ, อา กุยซิยอ เหย่ซี เด๊อ อา เก่ เด๊อะ เป่ ลูเตเต๊อเจ่อเจ่อ. 4เร๊อ เหย่ซี แม๊ตา ลู เร๊อ คูเปโตร เฮ๊ ลู เน๊อ, “แม๊จว๊าโต เด๊อ เปโอ่เออ!” 5เร๊อ อา เตเร พย๊าหนิเตเต๊อเจ่อเจ่อ เกอเหล่ อา เตเน เร๊อ อา แม๊จว๊าโต คูเปโตร เร๊อ คูยอห์น. 6หม่าแน๊เรอ คูเปโตร เฮ๊ ลู เน๊อ, “แวรือแวเท โอ่ เตเป๊ โต่, หม่าแน๊เรอเตเด๊อ อา โอ่ เร๊อ แว เออเนอ, แว เก่ เด๊อะ เน. เด๊อ วีนาซาเร็ธพู๊ เหย่ซู่ครี๊ เด๊อ อามุย โอ่ เร๊อ เตอเรอ ฉว่าชอ เออเตเพร ขว่าคยาเร๊อ แว เฮ๊ เน, ก๊อถ่อ จว๊ามอ!” 7อา เฮ๊โท ฮู๊เนอเรอ อา ปื่อ ลูกู๊ขุ จ๊อทว๊า เร๊อ อา จุ่ยก๊อถ่อ ลูลู เน๊อ โตโพ๊โต อากู๊โด่ตารา เน๊อ กู๊โด่ ชาเดอะ อา ฉว่าแถ่ชอแถ่ ล๊อปลี เจ๊อ. 8เร๊อ อา ป่าก๊อถ่อ เร๊อ อา ก๊อถ่อ จว๊ากาจว๊าแฮ โทเรอ อา จว๊าโน เต่อโหร่ เร๊อ เหย่ซี เด๊อ เตหลู่แตโฮ อากู เร๊อ อา จว๊ากาจว๊าแฮ, อี๊ฉ่าอิปลื๊อ เร๊อ ถู่เซ๊แถ่ จอแปแหร่. 9ล๋อ แกแย โอ่ เบ๊อะเนอ เต๊เห่ แม๊เถอะ ลอ อา จว๊าแจ่ เออเนอ เร๊อ อา เตอิโรถู่เซ๊แถ่ จอแปแหร่ เออเนอ เต๊เห่. 10เร๊อ เหย่ซี เตเนหม่า แลแค ลู เน๊อ อา หม่า แกแย โอ่แน กุยเอ่ อูรือ เบ๊อะเตหลู่แตโฮ กู่ดาตว่าช๊า เนอเตเพร แพ๊. เด๊อ อา จว๊าแจ่ คยาแซ๊ ฮู๊เออ อาขว่าอาคยา, เหย่ซี อาคย๊าอายื๊อ ล๊อปลี เจ๊อ ปว๋า เตเพร เจ๊อ.คูเปโตร อา เตเฮ๊โฉ่โด่แน เด๊อ เตหลู่แต โฮกู
11เบ๊อะแกแย เออเตเพร ปื่อหม่า เตอเกล๊อ หนิเร๊อ คูเปโตร เร๊อ คูยอห์น เบ๊อะเหล่โอ่ โต๊โผ่ เด๊อ อู เอ๊ เน๊อ คูซาโลมอน หี่ล๊าเก่ เบ๊อะเนอ, แกแย เบ๊อะเนอ เต๊เห่ อาคย๊าอายื๊อ เร๊อ แกล่แฮ แลแค เด๊อ เหย่ซี อา โอ่. 12คูเปโตร แม๊เถอะ เหย่ซี เร๊อ อา เฮ๊ เหย่ซี เน๊อ, “แว โคแบ๊ซว๊า อิสราเอลพู๊ ซี๋, ซี จว๊า อาคย๊าอายื๊อ แลแค เตเม เออเต๊อเจ่อ อาเหล่ เมเต? ซี จว๊า แม๊โอ่แต่ โต่ ลอ เป เมเต? แกแย เออเตเพร จว๊าแจ่ เออเนอหมา ซี เตเน แลแค เน๊อ เป เม เป่ อา เน๊อ เปเตโพรเตเตอเรอ เนอ แอ? ซี เตเน แลแค เน๊อ หม่า แกแย บูโพ๊ เต๊เห่ อาขว่าอาคยา ฮู๊เนอ แอ? 13เพอับราฮับ, เพอิสอัด เร๊อ เพยาโคบ เต๊เห่ อา จอแปแหร่ เน๊อ เป โหมะเพเพอโพ เด๋อ หนู่เค เต๊เห่ อา จอแปแหร่ เด๊อะโล แถ่เฮ๊อ อา เตลีเตเค เนอ อาหลู่เล๊ เหย่ซู่ เออเนอ เฮ๊อ. หม่าแน๊เรอ ซี เด๊อะตาแก อา เด๊อ แกแย ทวาดุทวาเต เต๊เห่ อา กู๊ยากู เร๊อ เบ๊อะคุ๊ยปีลาต เจแม๊ โทเฮ๊อ เด๊อ อา เก่ ปลวาเถ่แก ลู เบ๊อะเนอ, ซี จูเกอ ลู โต่. เด๊อ คุ๊ย เออเตเพร อา เป๊เส่เงเนอ, ซี เคร๊ฉื่อ ตาปา เจ๊อ อู เจ๊อ. a 14อา หม่า แกแยบูโพ๊, แกแยจ๊อแกแยเต เตเพร ตื๊อดื่อเร๊อ ซี วีแก อา. ซี กุย คุ๊ยปีลาต เน๊อ, ‘แด่ทูซิปล่อ เร๊อ ปลวาเถ่ เป่ เป แกแย เด๊อ อา เมเซอ อู เนอเตเพร.’ b 15ซี เมเซอแกเฮ๊อ แกแย เด๊อ อา เด๊อ อู ซิปล่อเซอเพร เออเนอ เตเพร เฮ๊อ, หม่าแน๊เรอ จอแปแหร่ เมเซอเพร กาคยา คยาแซ๊ อา เด๊อ เตเซอ เฮ๊อ. เร๊อ เตทวาแถ่ อาเหน่ ฮู๊เออ เนอหม่า เป แม๊เถอะ เจ๊อ เฮ๊อ เน๊อ เปเหน่ เฮ๊อ. 16ซี แม๊เถอะซิเงเฮ๊อ เร๊อ แกแย กู๊โด่ด๊าตือรือ เออเตเพร เนอหม่า หม่าเด๊อ อา หยื่อเอ่ เหย่ซู่ อามุย อาขว่าอาคยาเร๊อ, อา แร๊กาคยา แพ๊. เป ซิเง เน๊อ เออเนอหมา หม่า เด๊อ อา หยื่อเอ่ เหย่ซู่ อาขว่าอาคยา, เหย่ซู่ เมแร๊ ลอหล่าตี๊กลิ ลอ เจ๊อ ลู ฮู๊ ซี ล๋อ ปลี แม๊เถอะ ลอดื่อเฮ๊อ กู๊แหน่ เออเนอเฮ๊อ. 17“โป่แหว่ ซี๋, กู๊แหน่เร๊อ, ซี เร๊อ ซี ทวาดุทวาเต เมเซอ เหย่ซู่ เนอหม่า, ซี ย๊อ ซิเง อาโหง่แลช๊า โต่ อาขว่าอาคยาเร๊อ ซี เม อา แพ๊. 18จอแปแหร่ เฮ๊หนื่ออื่อโทลอเฮ๊อ อาโหง่ เน๊อ เพรโพร เต๊เห่ ล๋อ ปลี เฮ๊อ. เร๊อ อา เฮ๊หนื่ออื่อ เป่ เหย่ซี เน๊อ ครี๊ เบ่ ข่าเซอแหน่ เตจาเตจือ ปา. เร๊อ อา เล๊อแถ่บาแถ่ เฮ๊อ ฮู๊ อา เฮ๊ เออเนอ เฮ๊อ. 19แซ่ฮู๊ จอแปแหร่ เก่ ปลวาแก ซีเตซื๊อ เนอเร๊อ, ถู่แหล่แต๊แกละกา แลแค ซี ซิปล่อ เร๊อ กี่กย๊า กาคยา คยาแซ๊ แลแค เด๊อ จอแปแหร่ อา โอ่. ซี เก่ เมฮู๊เนอ เฮ๊เรอ ช๋า ม๊อเนอโตม๊อเนอเบ่ เฮ๊อ ปาเนอ แบ่เจ่ จอแปแหร่ อา เด๊อะอ๊าเด๊อะเหร่ คยา ซี ปา. 20เร๊อ อา เก่ นอแฮแล เป่ ซี เหย่ซู่ หม่าดื่อ เมสิยาห์ หม่าเฮ๊อ เพรเมแลเปล๊กาเด๊อ จอแปแหร่ นว๊าแถ่ เป่ โทเฮ๊อ เด๊อ ซิเง เออเนอ เตเพร ปา. 21ฮู๊ จอแปแหร่ เด๊อ ซิเงหนื่ออื่อ โทดื่อเฮ๊อ เน๊อ เพรโพร บูโพ๊ มู๋ หนู่เค เต๊เห่ เน๊อ เหย่ซู่ เออเนอ อา โตเบ่ โอ่ เด๊อ ม๊อขุ โต่เด๊อ แบ่เจ่ จอแปแหร่ เมเซ กาคยา ลอเฮ๊อ เตปว๋า เต๊อเจ่อ เบ๊อะเนอ ปา. 22เมเตเฮ๊เร๊อ คูโมเสส เฮ๊ เน๊อ, ‘ฮู๊ จอแปแหร่ นอแฮ แว เนอ, อา เก่ นอแฮเพรโพร เด๊อ ซี เมวเจอะเกล เตเพร ปา เร๊อ ซี โตเบ่ หนิดา เจ๊อ อาโหง่ ปว๋า ตือมือ เจ๊อ เนอปา. c 23แกแย เด๊อ อา หนิดา จูเอ่ เกอ เพรโพร เนอเตเพร อาลาอาโหง่ โต่ เต๊เห่เนอ, จอแปแหร่ เก่ แด่ตาพาแก เหย่ซี เร๊อ จอแปแหร่ อาพู๊อาเลอ เหล่โอ่ ปา, โท๊โต่ อา เก่ เมปย๊าแก เหย่ซี ปา.’ d 24“เป๊อแถ่ เด๊อ เพรโพร ซามูเอล ทือเค โต่เด๊อ ล๋อ เพรโพร เด๊อ อา แด๊โฉ่โด่แน จอแปแหร่ อาหรี่อาแก เด๊อ คยา เต๊เห่ อาทือเคเนอ, อา เฮ๊โฉ่หนื่ออื่อ โท ลอ เฮ๊อเตเด๊อ อา เก่ ทวาแถ่ ทือเค กู๊แหน่เค เออเต๊เห่ อาหรี่อาแก เฮ๊อ. 25จอแปแหร่ เตอ๊อแลนอแล เด๊อ อา นอเด๊อะโลตา ดื๊อตื่อ เพรโพร ซี เต๊เห่ เนอหม่า ซิเง เฮ๊อ. โท๊โต่ จอแปแหร่ อ๊อแล โทเฮ๊อ เน๊อ ซี โหมะเพเพอโพ เด๋อ งย๊าเค เต๊เห่ เน๋อ หม่า ซิเง โอ่ป่าเต่อเกอ เฮ๊อเฮ๊อ. ฮู๊ จอแปแหร่ เฮ๊โฉ่หนื่ออื่อ โทเฮ๊อ เพอับราฮับ เน๊อ, ‘แว เก่ เด๊อะบุ๊ยเด๊อะเตอเรอ แฮเง ลอ แกแยเห่ขุพู๊ เออเต๊เห่ ล๋อ ปลี เน๊อ เน กลุยแล แกแล เนอเตเพร อาคยา ปา.’ e 26เบ๊อะจอแปแหร่ นว๊าแถ่ อาหลู่เล๊ เหย่ซู่ เบ๊อะเนอ, อา นอแฮ เหร่อ เป่ ลู เด๊อ ซี โอ่ เฮ๊อ. แซ่ฮู๊ อา เก่ เด๊อะบุ๊ยเด๊อะเตอเรอ ซี เร๊อ อา นอแฮ ลู ฮู๊เนอ. เด๊อ จอแปแหร่ นอ ตีรี๊ก๊อโค๊แก ซี เน๊อ ซี ปว๋า เตเพร อาเตมู๊แหม่รีแจ่ อาขว่าอาคยา, อา เด๊อะบุ๊ยเด๊อะเตอเรอ ซี.”
Copyright information for
EkySCThai