Acts 4

อู ด๊อตา คูเปโตร เร๊อ คูยอห์น เด๊อ ทอกู

1เบ๊อะคูเปโตร เร๊อ คูยอห์น เฮ๊เบ่ปา เร๊อ แกแย เออเต๊เห่ เบ๊อะเนอ, เพรหลู่แต เต๊เห่ เร๊อ เพรโอ่ป่อ เตหลู่แตโฮ กู่กล๊อ เตเพร เร๊อ สะดูสี เต๊เห่ แฮโต่ แลแค. 2เพรโด่แนพู๊ เต๊เห่ เออซิเนอ อิซว๊าอี๊แส่ เป่ อู เร๊อ เหย่ซู่ เซอเพร กาคยา เด๊อ เตเซอ เร๊อ อา ยูโลโปล เป่ ลอ อู เน๊อ แกแยเซอ เต๊เห่ เก่ เซอเพร กาคยา แซ่เกอฮู๊ เออเนอ ปา อาขว่าอาคยา, เหย่ซี เนอเต๊เห่ ซิปล่อดุ แกแย เนอซิเนอ. 3เร๊อ เหย่ซี ปื่อ เพรโด่แนพู๊ เต๊เห่ เออซิเนอ เร๊อ อา ด๊อตา เหย่ซี เด๊อ ทอกู. อา ปื่อ เหย่ซี เบ๊อะเนอ, ย๊อ เหมาะเฮ๊ลาเฮ๊อ อาขว่าอาคยา, อา ด๊อโอ่ โต่ เหย่ซี เด๊อ หม่อลี. 4หม่าแน๊เร๊อ แกแย เด๊อ อา หนิโฮ เหย่ซี เตโด่แน เออเต๊เห่เนอ, อา หยื่อเอ่กา เอ๊ลา เหย่ซู่. แด๊ โชชื่อ แพ๊ เพรคูอาดุ เด๊อ อา หยื่อเอ่ เหย่ซู่ เต๊เห่เนอ อา ผื๋อ โอ่ เจ๊อ แงรี๊ เจ๊อ.

5อา ปื่อโท เหย่ซี อาเนอเตอเนอ เนอ แกแยยิวพู๊ อา กู่กล๊อดุ เต๊เห่ เน๊อ โหมะพรูโหมะเผร่ เด๊อ อา ทวา ทวาดุทวาเต เต๊เห่ เน๊อ เพรอิซว๊า เตซว๊าเตแส่ อา ซ๊าร๊า เต๊เห่ แฮ โอ่กู๊ ตาฉื่อตาปล๊อ แคลู เด๊อ วีเยรูซาเล็ม อากู. 6เหย่ซี แฮ โอ่กู๊ แม๊เถอะฉื่อ เน๊อ เพคายาฟาส, คูยอห์น, คูอเล็กซานเดอร์, เพรหลู่แต กู่กล๊อดุเล๊อ เพอันนาส เน๊อ แกแย อาโร เด๊อ อากลุยอาแล เน๊อ เพรหลู่แต กู่กล๊อดุเล๊อ เนอเตเพร เต๊เห่. 7เหย่ซี นอก๊อถ่อ เพรโด่แนพู๊ เต๊เห่ เออซิเนอ เด๊อ เหย่ซี เป๊เส่เง เร๊อ อา แด๊เฮอ เหย่ซี เน๊อ, “ซี เมแร๊ กาคยา คยาแซ๊ แกแย กู๊โด่ด๊าตือรือ เนอเตเพร ฮู๊เต? ซี เมฮู๊เออ เนอหม่า ซี เม เร๊อ อูเป อา เตเพรโพรเตเตอเรอ เป? หม่าโต่เร๊อ ซี จว๊า นอจ่อ อูเป อามุย เป?”

8คูเปโตร เล๊อบาแถ่ เร๊อ แหย่โยบูโพ๊แบ่เจ่ เร๊อ อา เฮ๊ฉื่อ เหย่ซี เน๊อ, “เพรทวาดุทวาเต ซี๋, เร๊อ โหมะพรูโหมะเผระ เด๊อ อา ทวา ทวาดุทวาเต ซี๋, 9เด๊อ เป เมแร๊ กาคยา แกแย กู๊โด่ด๊าตือรือ เออเตอเนอ เตเพร อาขว่าอาคยา, ซีเจแม๊ แด๊เฮอแม๊ เป ฮู๊เนอ แอ? เป แหย่โอ่เหม่กา ลู ฮู๊เต เนอหม่า ซี ซิหยื่อ ซิเง แอ? 10ล๋อ ซี เออเต๊เห่ เบ่เบ่, อิสราเอล อากลุยอาแล ล๋อ ปลี เบ่เบ่, อา โต ซิเง แลแค เร๊อ แกแย กู๊โด่ด๊าตือรือ เออเตเพร ก๊อถ่อจว๊าแจ่ แร๊กาคยา คยาแซ๊ เด๊อ ซี เป๊เส่เง กู๊แหน่เออ เนอหม่า หม่าเด๊อ วีนาซาเร็ธพู๊ เหย่ซู่ครี๊ อามุย อา เตโพรเตเตอเรอ อาขว่าอาคยา แพ๊. เหย่ซู่ครี๊ หม่า ซี มือเซอแถ่ อา เด๊อ อี๊ถื่อดีเต่ลู เนอเตเพร เฮ๊อ, หม่าแน๊เร๊อ จอแปแหร่ เมเซอเพร กาคยา คยาแซ๊ อา เด๊อ เตเซอ เฮ๊อ. 11เหย่ซู่ หม่า,

‘อา แซ่เน๊อ หล่อ เตเม เด๊อ ซี แบ๊แถ่ หี่ เร๊อ ซี ต่าแก อา หม่าแน๊เร๊อ เด๊อคยาเนอ อา ทวาแถ่ หล่อ เด๊อ อู นอจ่อ อา เด๊อ หี่หนะ เด๊อ อา โหล่ดุเล๊อ อู เตเม.’ ^a

12แกแย เด๊อ อา เมแลเปล๊ แจ่ เป หม่า ตือแพ๊ เหย่ซู่ เตเพร แพ๊. แกแย อาโร เด๊อ จอแปแหร่ เด๊อ เหย่ซี เร๊อ อา เก่ เมแลเปล๊กา เป อาเงเนอ, เด๊อ เห่ขุ เออต๊าบ่า ล๊อ เจ๊อ เนอ อา โอ่ เตเพร่ว โต่.”

13แกแยยิวพู๊ เด๊อ อา ทวาดุทวาเต เต๊เห่เนอ, อา แม๊เถอะ เร๊อ คูเปโตร เร๊อ คูยอห์น ซิปล่อคือเฮ๊บื่อ เร๊อ อา ซิเง เร๊อ เหย่ซี หม่า แกแย แจ่ลีแจ่ลา หม่าโต่ โท๊โต่ เหย่ซี หม่า แกแย แจ่ลีแจ่ลาโต่ เต๊เห่ อาขว่าอาคยา, อา คย๊ายื๊อ แลแค เจ๊อ. โท๊โต่ เหย่ซี ซิเง โป่ เร๊อ คูเปโตร เร๊อ คูยอห์น หม่า แกแย เด๊อ อา ครวาแบ๊ซว๊า เกอ เร๊อ เหย่ซู่ เต๊เห่. 14หม่าแน๊เรอ เหย่ซี แม๊เถอะ เร๊อ แกแย เด๊อ อากู๊โด่ด๊าตือรือ แร๊กาคยา เนอเตเพร ก๊อถ่อ โอ่ เบ๊อะคูเปโตร เร๊อ คูยอห์น อาช๊า อาขว่าอาคยา เหย่ซี เฮ๊แจ่ ปา เตอเจ๋อ โต่. 15โทเร๊อ เหย่ซี นอเถ่จว๊า ตาพาแก คูเปโตร เร๊อ คูยอห์น เด๊อ เพรหยื่อเอ่ ตู๊หมู่ตอกล๊อ หี่ด๊อกลอ เร๊อ เหย่ซี เนอเต๊เห่ โอ่กู๊โอ่แก๊แก ตื๊อ เร๊อดื่อ ลู. 16เหย่ซี แด๊เฮอ เกอเร๊อลู เน๊อ, “เป โตเบ่ เม เหย่ซี ฮู๊เต? เหย่ซี เม ทวาแถ่ เตโคตีกลี๊ เออเต๊เห่เนอ, ล๋อ แกแย โอ่ เด๊อ วีเยรูซาเล็ม อากู เออเต๊เห่ ซิเง ลอปลี เฮ๊อ อาขว่าอาคยา, เป เก่ เฮ๊ เร๊อ อาหม่าโต่ เนอ อา หนิปาโต่ เฮ๊อ. 17หม่าแน๊เรอ, แซ่ฮู๊ แกแย เก่ หนิโฮ ปีชีจว๊าเอ๊ แต่เหม่ เนอ, เป เบ่ เฮ๊ เหย่ซี เน๊อ เบ่ เฮ๊โฉ่โด่แนหนิ เป่ ปา อู เน๊อ เหย่ซู่ อามุย เตเพร่ว โต่.”

18เร๊อ เหย่ซี เอ๊กาโน คยาแซ๊ คูเปโตร เร๊อ คูยอห์น เร๊อ อา เฮ๊ เหย่ซี เน๊อ, “เหย่ซู่ อามุย เออเนอ, ซี เบ่ โป๊หนิ ปา โต่โต่, ซี เบ่ อิซว๊าอี๊แส่ หนิ เป่ ปา อู โต่โต่.” 19หม่าแน๊เรอ คูเปโตร เร๊อ คูยอห์น เฮ๊ฉื่อ เหย่ซี เน๊อ, “หม่า เป โตเบ่ หนิดา ซีโหง่ แอ? หม่าโต่เรอ เป โตเบ่ หนิดา จอแปแหร่ อาโหง่ แอ? เนอ, เตเนแล เกอเร๊อ แลแค ซีเหน่ เด๊อ จอแปแหร่ อา เป๊เส่เง เนอ. 20เมเตเฮ๊เรอเตเด๊อ เป แม๊เถอะ หนิโฮ โทเฮ๊อ เต๊เห่เนอ เป เก่ แด๊โฉ่โล เป่ อู โต่ เฮ๊เนอ, เป โอ่แจ่ โต่.”

21ฮู๊เนอเร๊อ แกแยยิวพู๊ เด๊อ อา ทวา ทวาดุทวาเต เต๊เห่ ลื๋อ เด๊อะรอเด๊อะเร ฉว่าชอ แฮเล๊อะ โป่ เหย่ซี เน๊อ เด๊อ อาเหร่อเค เนอ เจ๊อ, โทเรอ อา ปลวากาแก เหย่ซี แพ๊. เหย่ซี ซิเง เร๊อ แกแย ถู่เซ๊แถ่ ลอปลี จอแปแหร่ เร๊อ เหย่ซี เมทวาแถ่ เตเออเต๊เห่ อาขว่าอาคยา, อา เก่ เมจากาคยา คูเปโตร เน๊อ คูยอห์น ฮู๊เตเนอ, อา เตเนโปล แลแค โต่. 22แกแยเพ เด๊อ อู แหย่โอ่เหม่ โค๊ตีกลี๊ ลู เออเตเพรเนอ อาหน่า โอ่เฮ๊อ ลุยเชอเล๊อ เฮ๊อ.

เพรหยื่อเอ่ เออ เต๊เห่ กุยจ๊อเบ จอแปแหร่ เด๊อ อา เก่ เด๊อะ ลู เตซิปล่อคือฮาบื่อ

23เบ๊อะอู อาปลวาเถ่เฮ๊อ คูเปโตร เร๊อ คูยอห์น เออเนอ เนอเน๊อ โตโพ๊โต เหย่ซี กาคยา เด๊อ อา โคแบ๊ซว๊า เต๊เห่ อา โอ่. เร๊อ ล๋อ เพรหลู่แต ทวาดุทวาเต เต๊เห่ เร๊อ โหมะพรูโหมะเผร่ เด๊อ อา ทวา ทวาดุทวาเต เต๊เห่ เฮ๊แคร๋ เหย่ซี ฮู๊เต เนอ, อา กาแด๊โล เป่ เร๊อ อาโค เออเต๊เห่. 24เบ๊อะอา โคแบ๊ซว๊า เต๊เห่ หนิโฮ เตหรี่เตแก เออ เบ๊อะเนอ, เหย่ซี กุยจ๊อเบ โหร่ลอ ลู เด๊อ ซิปล่อ เตเม๋ จือ อากู เด๊อ จอแปแหร่ อา โอ่ เร๊อ อา เฮ๊ เน๊อ, “เก๋อ แบ่เจ่ดุ, เน หม่า เพร เด๊อ อา แบ๊ทวาแล ม๊อขุเห่ขุ, เทอดุซาวา ซีเต๊เห่ เร๊อ ล๋อเตเด๊อ อา โอ่ เด๊อ เตเออเต๊เห่ อากู ล๋อ ปลี เตเพร! ^b 25แหย่โยบูโพ๊แบ่เจ่ นอเฮ๊เบ่ เปโพดาวิด, หม่าเฮ๊อ เนหลู่เล๊ เออเนอ เน๊อ,

‘เมวเจอะโร เต๊เห่ จว๊า ซิปล่อดุแหน่เจ๊อ ลอ เจ๊อ แลแค เมเต? หม่าเมเตเร๊อ แกแย เต๊เห่ จว๊าเคร เมมู๊แหม่ แลแคเตเด๊อ อา แกเด เต๊เห่ เมเต? ^c 26เห่ขุจ๊อแผ่ เต๊เห่ ตี๊หรี่แตแร หนื่ออื่อ แลแค อาเหน่ เด๊อ อา เก่ ช๊า จอแปแหร่ เร๊อ คุ๊ย เด๊อ จอแปแหร่ นว๊าแถ่ ลู เด๊อ อา เก่ เมแลเปล๊กา แกแย เห่ขุ เออเตเพร. ฮู๊เนอเฮ๊อ เพรเป๊อตี๊หรี่ เต๊เห่ โอ่กู๊โอ่แก๊ โหร่ลู เด๊อ อา เก่ ช๊าเต่อโหร่เกอ เตเร๊อ เห่ขุ อาคุ๊ยจ๊อแผ่ เต๊เห่.’ ^d

27กู๊แหน่เร๊อ เด๊อ วีกู เออเนอ อา ทวาแถ่เฮ๊อ อาเหน่ ฮู๊เนอ เฮ๊อ! เมเตเฮ๊เร๊อ คุ๊ยเฮโรด เร๊อ ปอนทัสปีลาต โอ่กู๊โอ่แก๊ ตาฉื่อ เร๊อ แกแยยิวพู๊ หม่าโต่ เต๊เห่ เร๊อ แกแยยิวพู๊ เต๊เห่ เบ๊อะวีกูเออ. เร๊อ อา เตเน เมเซอ โหร่ลู เหย่ซู่ หม่าดื่อ เน หลู่เล๊บูโพ๊ เด๊อ เน เด๊อะทวา อา เร๊อ ครี๊ เออเนอ เตเพร. ^e 28เด๊อ เน เตโพรเตเตอเรอ อาขว่าอาคยา เน๊อเตเด๊อ เน แด่แล โทเฮ๊อ เน ซิปล่อ เด๊อ อา เก่ ทวาแถ่ ปา เต๊เห่ อาขว่าอาคยา, แกแย เออเต๊เห่ เม แลแค เฮ๊อ ฮู๊ เน ตี๊หรี่แตแร หนื่ออื่อ โทเนอ เฮ๊อ. 29หม่าแน๊เนอ, เก๋อ แบ่เจ๋, หนิดา แม๊มอ เหย่ซี เฮ๊ ต๊อหร่อเซ๊ ซิอิเช แลแค เป กู๊แหน่เออ เต๊เห่เนอ, โท๊โต่ แซ่ฮู๊ เป ทวา เนหลู่ เออเต๊เห่ เก่ เฮ๊เบ่คือเฮ๊บื่อ แร๊เกอ เนหรี่เนแก เนอเร๊อ, เมจว่าเหร่อ เป. 30เด๊อะโล เน เตโพรเตเตอเรอ เด๊อ อา เก่ แหย่โอ่เหม่ อู อาเง, เร๊อ เตเม อาโค๊ตีกลี๊ เต๊เห่ เร๊อ เตเม ตาปาคย๊ายื๊อ เต๊เห่, เร๊อ เด๊อ เน หลู่เล๊บูโพ๊ แบ่เจ่เหย่ซู่ เออเตเพร อามุยคยา เร๊อ นอโอ่โลแถ่ ดื่อ เตเออเต๊เห่ นี๋.”

31เบ๊อะเหย่ซี กุยจ๊อเบ โทเฮ๊อ เบ๊อะเนอ, เหล่โอ่ เบ๊อะเหย่ซี เหล่โอ่ปล๊อ เต่อลู เนอโต๊โผะ อา อาว๊าหรี่รือเจ๊อ เร๊อ เหย่ซี เล๊อบา ลอปลี เร๊อ แหย่โยบูโพ๊แบ่เจ่ ปว๋า เตเพร เร๊อ เหย่ซี ปว๋า เตเพร แด๊โฉ่โด่แน คือฮา เป่ แลแค อู เร๊อ จอแปแหร่ อาหรี่อาแก.

เพรหยื่อเอ่ เต๊เห่ เมหลู่เมแต เมจว่าเกอ แคลู เร๊อ เตเด๊อ อา โอ่ เร๊อ เหย่ซี เต๊เห่

32เพร เด๊อ อา หยื่อเอ่แหน่หยื่อรี เต๊เห่เนอ เหย่ซี โอ่ลู เร๊อ ซิปล่อ เตเม๋ จือ, เตเตเน เต๊อเจ๋อลู. เหย่ซี ตาหมื่อตาเต เต๊เห่เนอ เหย่ซี แด่กว๊า เกอเร๊อ แลแค เร๊อ อาเต เตเพร่ว โต่. เตเด๊อ อา โอ่ เร๊อ เหย่ซี เต๊เห่เนอ เหย่ซี เอ่โหร่พย๊าโหร่ แคลู. ^f 33เพรโด่แนพู๊ เต๊เห่ จว๊าเฮ๊โล เป่ อู เน๊อ แบ่เจ่ เหย่ซู่ อาก๊อถ่อ เซอเพร กาคยา อาหรี่อาแก เออเนอ, อา เล๊อบา เจ๊อ เน๊อ เตโพรเตเตอเรอ อาฉว่าอาชอ โท๊โต่ จอแปแหร่ กลอแลเล๊อ กลอแลบา เป่ เจ๊อ อาบุ๊ยอาเตเตอเรอ เด๊อ เหย่ซี ล๋อ ปลี อาเหน่ลู เจ๊อ. 34เด๊อ เพรหยื่อเอ่ เออ เออเต๊เห่ อาเกลเนอ, แกแย โซพ๊าโซแร โอ่ เตเพร่ว โต่, เมเตเฮ๊เร๊อ แกแย เด๊อ อา โอ่ เร๊อ เทออ่อแหล่รอ, เร๊อ หี่เร๊อแพ เต๊เห่เนอ, อา อิเชตาแก เร๊อ อา พย๊าแฮหนิ แลแค รือ เด๊อ อา อิเชตาหนิ เออเต๊เห่. 35เร๊อ แฮเด๊อะตา แลแค รือเออ เด๊อ เพรโด่แนพู๊ เต๊เห่ อา กู๊ยากู เร๊อ เหย่ซี เบ เป่ เร๊อ แกแย เด๊อ อา โหล่รือโหล่เท เนอเต๊เห่.

36ฮู๊เนอ อาขว่าอาคยา แกแย มุย เร๊อ คูโยเซฟ โอ่ เตเพร, อา หม่า เลวีพู๊ เตเพร เร๊อ อา โอ่ เป๊เจ่แล เด๊อ ไซปรัสกลื๊อขุ, เร๊อ เพรโด่แนพู๊ เต๊เห่ เออเต๊เห่ เอ๊ ลูมูย เร๊อ คูบารนาบัส, (อาโหง่แลช๊า หม่า แกแย เด๊อ อา เด๊อะอ๊าเด๊อะเหร่ อู.) 37อา อิเชแก อาแหล่ เต๊เหล่ เร๊อ อา แฮ เด๊อะตา อารือเออ เด๊อ เพรโด่แนพู๊ เต๊เห่ อา กู๊ยากู.