Acts 5

เพนาเนีย เร๊อ โหมะสัปฟีรา

1หม่าแน๊เรอ แกแย เด๊อ อามุย เร๊อ เพอานาเนีย โอ่เตเพร. อา เร๊อ อาเม สัปฟีรา อิเชแก เกอเร๊อ เห่ขุ เต๊เหล่. 2รือ เด๊อ เหย่ซี อิเชหนิ เออเนอ, อาเม ซิปล่อโอ่ แซ่เกอ เร๊อ ลู เด๊อ เหย่ซี เก่ เบเอ่แก เหย่ซีเง เต๊เห่ เร๊อ อา โอ่แก เด๊อ เออเต๊เห่เนอ อา แฮเด๊อ เร๊อ เพรโด่แนพู๊ เต๊เห่ เนอเต๊เห่.

3เร๊อ คูเปโตร เฮ๊ ลู เน๊อ, “เพอานาเนี๋ย เน จว๊า นอเป๊อเต่อ เนเหน่ เร๊อ โลเน๊ มู๊แหม่ กู่กล๊อ เมเต? เน แลโฮแกเฮ๊อ แหย่โยบูโพ๊ แบ่เจ่ เฮ๊อ. เน จว๊า เบ่ดว๊า โอ๊แก โต่ เห่ขุ งู เด๊อ เน อิเช หนิ เออ เนอเต๊เห่ เมเต? 4เบ๊อะเน อิเชตา แต่ล๋าย เนเห่ขุ โต่ เบ๊อะเนอ, เห่ขุเออ หม่า เนเต เร๊อดื่อ หม่าโต่ แอ? เน อิเชโทเฮ๊อ เร๊อ รือ เด๊อ เน พย๊าหนิ เต๊เห่เน๋อ หม่า เนเต แพ๊แพ๊. ฮู๊เนอเรอ เน จว๊า แด่แลโต เน ซิปล่อ เด๊อ เน เก่ เมฮู๊เออ เมเต? เออ หม่า เน แลโฮ แกแย หม่าโต่, เน แลโฮ เจ๊อ เฮ๊อ จอแปแหร่ เฮ๊อ.”

5คูอานาเนีย หนิโฮ โหง่ เออเนอ เร๊อ โตโพ๊โต อา แลคื๊อเซอแก เจ๊อ. เร๊อ ล๋อ แกแย เด๊อ อา หนิโฮซิเง แลแค เตเมทวาแถ่ อาเหน่ เออเต๊เห่เนอ อา ต๊อหร่อเซ๊ ซิอิเช ลอปลี เจ๊อ. 6เพรคู พู๊ดี๊พู๊เส่ เต๊เห่ แฮโนเต่อ เร๊อ อา ถู่ลูบี๊ ลู เร๊อ อิเก, เร๊อ เหย่ซี จอเถ่แก ลู เร๊อ จว๊า โล๊แก ลู.

7โทเร๊อ อา ผื๋อ โอ่เฮ๊อ โซมือ เบ๊อะเนอ, อาเม แฮโน โต่เด๊อ คูเปโตร อา โอ่. หม่าแน๊เรอ เด๊อ ปื๊อหนื่อเนอ, อา เมแคร๋ ฮู๊เตเนอ อา ซิเง เกออู เตอเจ๋อ โต่. 8คูเปโตร แด๊เฮอ โหมะสัปฟีรา เน๊อ, “เน แด๊โฉ่โล เป่ แม๊ แว, ล๋อ เน เร๊อ เนเว อิเชหนิ เห่ขุ อางู เนอหม่า รือ บ๊าเออ แหน่แพ๊ แอ?” เร๊อ อา เฮ๊ฉื่อ เน๊อ, “หม่าแหน่ว๊า, ล๋อ ปลี เนอหม่า บ๊าเออ แหน่แพ๊ เฮ๊อ.” 9ฮู๊เนอเรอ คูเปโตร เฮ๊ ลู เน๊อ, “หม่าเมเตเร๊อ เน เร๊อ เนเว จว๊า เมแม๊ โต่ แหย่โยบูโพ๊แบ่เจ่ เมเต? แกแย จว๊าโล๊ เนเว เต๊เห่เนอ, อา กาโต่ ปาแพ๊ เบ๊อะกู่ดาทือ เออเนอ แพ๊ เร๊อ เหย่ซี เก่ จอจว๊า เกอ โป่ เน ปา!”

10อา เฮ๊ โทเรอ โตโพ๊เรอ โหมะสัปฟีรา แลคื๊อ เซอตาแก เกอ เบ๊อะคูเปโตร กู๊โด่ ช๊า เนอ. เพรคู พู๊ดี๊พู๊เส่ เต๊เห่ แฮโน เร๊อ แม๊เถอะ เร๊อ อา เซอเฮ๊อ อาขว่าอาคยา เหย่ซี จอเถ่จว๊าโล๊ เต่อแก ลู เร๊อ อาเว. 11ล๋อ เพรหยื่อเอ่ ตู๊หมู่ตอกล๊อ เออเต่อหมู่ลอ เร๊อ แกแย เด๊อ อาโร เต๊เห่ หนิโฮซิเง แลแค เตเมทวาแถ่ อาเหน่ เออเต๊เห่เร๊อ อา ซิอิเช แลแค โกโน๋ โต่.

เตโคตีกลี๊คยา เร๊อ เตเม ตาปาคย๊ายื๊อเต๊เห่

12เตเม อาโค๊ตีกลี๊ เต๊เห่ เบ่เบ่, เตเม ตาปาคย๊ายื๊อ เต๊เห่ เบ่เบ่, เพรโด่แนพู๊ เต๊เห่ เมโล เป่ เอ๊ลา อู ล๋อ เพรหยื่อเอ่ เออ เต๊เห่ แฮ แม๊เถอะ ตาฉื่อ ลู เด๊อ เตหลู่แตโฮ เบ๊อะเนอ โต๊โผ่ เด๊อ อู เฮ๊ เร๊อ คุ๊ยซาโลมอน หี่ล๊าเก่ เออเนอ อากู. 13แกแย เด๊อ อา หยื่อเอ่แลแค โต่ เต๊เห่เนอ อา แฮโน โอ่บื่อ เกอ เหย่ซี เตเพร่ว โต่ ตื๊อดื่อเรอ อา ถู่เซ๊ เกอเร๊อ แหน่เจ๊อ เหย่ซี. 14หม่าแน๊เรอ เพรเหมาะเพรคู เด๊อ อา หยื่อเอ่ แบ่เจ่ เต๊เห่เนอ, อา แฮโนโหร่ เอ๊แถ่ เร๊อ เอ๊แถ่ เกอ เด๊อ เหย่ซี ตู๊หมู่ตอกล๊อ อากู. 15เพรโด่แนพู๊ เต๊เห่ ย๋อ เม อาโค๊ตีกลี๊ เป่ เฮ๊อ อู เตเออเต๊เห่ อาขว่าอาคยา, เบ๊อะคูเปโตร จว๊ารว๊า แกล๊กู เบ๊อะเหย่ซี แก่ช๊า เออ เบ๊อะเนอ, แซ่ฮู๊ อา แหย่โย เก๊โอ่ เก่ตาเบ่ เพรชุ๊ยเพรเช เออเต๊เห่ เนอเรอ, แกแย เต๊เห่ แย๊แฮหนิ แลแค แกแยชู๊ยแกแยเช เต๊เห่ เร๊อ อา แฮ เด๊แล เป่ เหย่ซี อาเหล่เมอ เต๊เห่, เหล่เด เต๊เห่ เด๊อ แกล๊ดุกู. 16แกแย เบ๊หมู่ เด๊อ อา โอ่ ตีวี๊ตาวา ผื่อ เร๊อ วีเยรูซาเล็ม เนอเต๊เห่ แย๊แฮหนิ แลแค แกแยชู๊ยแกแยเช เต๊เห่, หม่าโต่เรอ แกแย เด๊อ โลเน๊มู๊แหม่ เมเบ่ ลู เต๊เห่ เด๊อ เหย่ซี อา โอ่ เร๊อ อา แหย่โอ่เหม่ เป่ ลอ เจ๊อ อู ปว๋า เตเพร.

เพรโด่แนพู๊ เต๊เห่ ป่อชิเต่อ เตเมจาเมจือ

17เออโตโพ๊เรอ เพรหลู่แต กู่กล๊อดุเล๊อ เตเพร เร๊อ ล๋อ เพร เด๊อ อา ครวาเกอ ลูคยา เด๊อ อา โอ่ป่าโน เต่อเกอ เด๊อ สะดูสีพู๊ ตู๊หมู่ตอกล๊อ เบ๊อะเนอ เต๊เห่, ซิค๊าซิเถ่ ตื๊อดื่อ เจ๊อ เพรโด่แนพู๊ เต๊เห่ เออเต๊เห่ เจ๊อ. 18เหย่ซี ปื่อ เพรโด่แนพู๊ เต๊เห่ เร๊อ ด๊อตาแก เหย่ซี เด๊อ ทอกู. 19หม่าแน๊เร๊อ เบ๊อะเบ๊อะเนอเตเซเนอ, แบ่เจ่ เตเน่วม๊อขุพู๊ เตเพร แฮบ๊าโม กู่ดา เร๊อ อา ปลวาเถ่แก เพรโด่แนพู๊ เต๊เห่ เออเต๊เห่ เร๊อ อา เฮ๊ เหย่ซี เน๊อ, 20“จว๊าโน ก๊อถ่อโอ่ แลแค เด๊อ เตหลู่เเตโฮ อาวีกู เนอ เร๊อ แด๊โฉ่โด่แน เป่ ลออู เร๊อ เตโอ่เซอเพร อาซิปล่อ เออ อาหรี่อาแก เนอ.”

21เพรโด่แนพู๊ เต๊เห่ หนิดา ม๊อขุเตเน่วพู๊ เนอเตเพร อาโหง่ เร๊อ, เบ๊อะหม่อลีบู เบ๊อะเนอ, เหย่ซี จว๊าโน แลแค เด๊อ เตหลู่เเตโฮ อา เตเร๊รากู เร๊อ เหย่ซี เป๊อแถ่ อิซว๊าอี๊แส่ ตา ลอ อู เบ๊อะเนอ.

เพรหลู่แต กู่กล๊อดุเล๊อ เตเพร เร๊อ แกแย เด๊อ อา ครวาแฮเกอ ลูคยา เต๊เห่ แฮโต่ เร๊อ แฮ เอ๊ปล๊อ ลอยูดาห์กู่กล๊อดุ เต๊เห่ เร๊อ โหมะพรูโหมะเผร่ เต๊เห่ เร๊อ เหย่ซี โอ่กู๊โอ่แก๊ ลอ ลู. โทเร๊อ อา นอจว๊าเอ๊แฮ เพรโด่แนพู๊ เต๊เห่ โอ่ เด๊อ ทอกู เนอเต๊เห่ เด๊อ เหย่ซี เป๊เส่เง. 22หม่าแน๊เร๊อ เบ๊อะ ยูดาห์เกลอทวาดุ เต๊เห่ จว๊าโน เด๊อ อู เหล่ด๊อโอ่ เหย่ซี อาเหล่โอ่ เบ๊อะเนอ, อา แม๊เถอะ ปา เพรโด่แนพู๊ เต๊เห่ เออเต๊เห่ เตเพร่ว โต่ อาขว่าอาคยา, เหย่ซี กาแด๊โฉ่ คยา แกแย ทวา ทวาดุทวาเต เนอเต๊เห่ เร๊อ โหมะพรูโหมะเผร่ เนอเต๊เห่, เร๊อ อา เฮ๊ เหย่ซี เน๊อ, 23“เบ๊อะเป จว๊าโต่ เด๊อ อู เหล่ด๊อโอ่ แกแย เบ๊อะเนอ, เป แม๊เถอะ อู ก่าหม่า โอ่แร๊ปา กู่ดา เร๊อ ชอ. โทเรอ ล๋อ เพรโอ่ป่อ ทอ เออเต๊เห่เนอ, อา ก๊อถ่อโอ่ป่อโอ่ แลแค เบ๊อะกู่ดาทือ เนอ ปว๋า เตเพร ตื๊อดื่อเรอ เป บ๊าโม กู่ดา เร๊อ เป โนแม๊ เด๊อ อากู เบ๊อะเนอ, เป แม๊เถอะ ปา เตเพร่ว โต่.” 24เบ๊อะเพรโอ่ป่อ เตหลู่เเตโฮ กู่กล๊อ เออเตเพร เร๊อ เพรหลู่แต กู่กล๊อ เต๊เห่ หนิโฮ เตหรี่เตแก เออ เบ๊อะเนอ, อา เถ่ตาปา โทเรอ ลู เร๊อ อา เตเน แลแค เร๊อ หม่า อา เตเร ทวาแถ่ เกอลู โป่ แคร๋ อิเต ปา อา เตเน ลอปลี ฮู๊เนอ.

25เออโตโพ๊เรอ แกแย แฮโน เตเพร เร๊อ อา เฮ๊ เหย่ซี เน๊อ, “หนิดา แลแค๋ ซี ด๊อตา แกแย เด๊อ ทอกู เนอเต๊เห่ จว๊าโอ่ เด๊อ เตหลู่เเตโฮ อา เตเร๊รากู เนอ เร๊อ อา อิซว๊าอี๊แส่ ตา ลอปลี อู เบ๊อะเนอ เฮ๊อ.” 26ฮู๊เนอเรอ เพรโอ่ป่อ เตหลู่เเตโฮ กู่กล๊อ เออเตเพร เร๊อ อา โคเจ่ เต๊เห่ เถ่จว๊า เอ๊กาคยา เพรโด่แนพู๊ เต๊เห่ เนอเต๊เห่. หม่าแน๊เร๊อ ซิอิเช เร๊อ อู วี เหย่ซี เร๊อ หล่อ เร๊อ เหย่ซี เมฉว่าเมชอ บื่อ ลา แน๊ เหย่ซี โต่.

27เหย่ซี ซูจว๊า เพรโด่แนพู๊ เต๊เห่ เออเต๊เห่ เด๊อ แกแยยิวพู๊ ทวาดุทวาเต เออเต๊เห่ อาเป๊เส่เง เร๊อ เพรหลู่แต กู่กล๊อดุเล๊อ เออเตเพร แด๊เฮอ เจแม๊ เหย่ซี. 28อา เฮ๊ เหย่ซี เน๊อ, “เป เฮ๊ตาเฮ๊เต โทเฮ๊อ ซี เร๊อ อิซว๊าอี๊แส่ ปา แต่ อู เร๊อ แกแย เออเตเพร อามุย แต่เหม่ นี๋, เร๊อ กู๊แหน่เออ ซี แม๊แม๊ ซี จว๊า เมแคร๋ เฮ๊อ อิเตเต! ซี อิซว๊า เป่จว๊า ลอปลี เฮ๊อ อู เด๊อ วีเยรูซาเล็ม อากู เออเนอ เฮ๊อ. แกแย เนอเตเพร อาเซอ เนอมา เป เออเต๊เห่ อาคยา เฮ๊อ, ซี ซิหยื่อ แด่ แลแค เป เตซื๊อ ฮู๊เนอ.” ^a

29คูเปโตร เร๊อ เพรโด่แนพู๊ เต๊เห่ เฮ๊ฉื่อ เน๊อ, “ผื๋อ เร๊อ เตเร หนิดา แกแย เห่ขุพู๊ อาโหง่เนอ, เบ่ หนิดาดุ เล๋อ เด๊อ จอแปแหร่ อาโหง่. 30ซี มือเซอแถ่ โทเฮ๊อ เหย่ซู่ เด๊อ อี๊ถื่อดีเต่ลู เร๊อ เปเพอเปโพ อา จอแปแหร่ เออเตเพร เมเซอเพร กาคยา คยาแซ๊ อา เด๊อ เตเซอ เบ๊อะเนอ เฮ๊อ. 31แซ่ฮู๊ จอแปแหร่ เก่ เด๊อ เป่ อิสราเอล เต๊เห่ เตถู่แหล่แต๊แกละกา อา ซิปล่อ เน๊อ ปลวาแก เตซื๊อ เต๊เห่ อาเงเนอ, อา แด่โอ่เฮ๊อ เหย่ซู่ เด๊อ อากู๊ขุ จ๊อทว๊า ตากยา ฮู๊ แกแย ทวาดุทวาทู เตเพร เร๊อ เพรเมแลเปล๊กา อู เตเพรเนอ เฮ๊อ. 32เป หม่า เพร เด๊อ อา ข่าเฮ๊โล เป่ อูเร๊อ เตเออ เต๊เห่ อาหรี่อาแก เฮ๊อ. ฮู๊เนอเฮ๊อ แหย่โยบูโพ๊แบ่เจ่ เออ เบ่เบ่, อา ข่าเฮ๊โล แซ่เกอ ฮู๊เนอเนอ. แหย่โยบูโพ๊แบ่เจ่ เออเนอ จอแปแหร่ เด๊อะตา เป่ เร๊อ แกแย เด๊อ อา หนิดา ลูโหง่ เนอเต๊เห่ อาเง แพ๊.”

33เบ๊อะแกแยยิวพู๊ กู่กล๊อดุ กู๊ฉู่ทู เต๊เห่ เร๊อ แกแยยิวพู๊ โหมะพรูโหมะเผร่ เด๊อ อา ทวา ทวาดุทวาเต เต๊เห่ หนิโฮ เตเฮ๊เบ่เออ เบ๊อะเนอ, อา ซิปล่อดุ โก๊โน๋ โต่. เร๊อ อา ซิหยื่อ เตเรเมเซอแก เจ๊อ เพรโด่แนพู๊ เต๊เห่ เออเต๊เห่ เจ๊อ. 34หม่าแน๊เรอ เบ๊อะเหย่ซี อาเกลเนอ ฟาริสี เด๊อ อามุย เร๊อ คูกามาลิเอล โอ่เตเพร. อา หม่า เตซว๊าเตแส่ อาซ๊าร๊า เตเพร, โท๊โต่ อา หม่า แกแย เตเพร เด๊อ อู แด่ดุเบ่ยื่อเบ่แหน่หนิ ลู. อา ก๊อถ่อ เด๊อ แกแย ทวา กู่กล๊อ เต๊เห่ อาโอ่เด๊อเง เร๊อ อา นอเอ๊เถ่ โค๊แก ลอ เพรโด่แนพู๊ เต๊เห่ เด๊อ อากลอ เตอเปลอฮู๊แพ๊. 35โทเรอ อา เฮ๊ แกแยยิวพู๊ เด๊อ อา ทวา ทวาดุทวาเต เต๊เห่ เน๊อ, “โคแบ๊ซว๊า อิสราเอลพู๊ ซี๋, ซี เตเร เม แกแย เออเต๊เห่ ฮู๊เตเนอ, เตเน ตาเต แลแค ตี๊กิ นี๋. 36เตเนแถ่ โต่ แลแค เร๊อ เด๊อ อาเหร่อเค เนอหม่า แกแยมูย เร๊อ คูธุดาส โอ่แถ่ เตเพร. อา เฮ๊ เกอเร๊อ อาเหน่ เร๊อ แว หม่า แกแย ทวาดุ เตเพร. อาโคเจ่ เด๊อ อา ครวาเกอ ลู เนอ อา ผื๋อ โอ่ ลุยเย เจ๊อ, ตื๊อดื่อเรอ เบ๊อะอู เมเซอแก โทเฮ๊อ ลู เบ๊อะเนอ, อา โคเจ่ เต๊เห่ ลูโพร๊ลูแพร ลอ แพ๊. โทเรอ อา เตเอ่เตแร เต๊เห่เนอ อา ปย๊าแกลอ เบ๊อะเนอ แพ๊. 37เด๊อคยา เบ๊อะอู พย๊าโอ่ปล๊อ เทอพู๊เก่พู๊ อามุย ตารา ราม๊าราแด เบ๊อะเนอ, แกแยกาลิลีพู๊ เด๊อ อามุย เร๊อ คูยูดาส เฮ๊เออเนอ เตเพร โอ่โลแถ่ คยาแซ๊, อา จว๊า อิลออี๊โหล่ หนิ เอ๊ลา แกแย ตื๊อดื่อเรอ งยาแต๋โต่เร๊อ อู เมเซอแก ลู เร๊อ อา โคเจ่ เต๊เห่ ลูโพร๊ลูแพรแก คยาแซ๊ แพ๊. 38ฮู๊เนอเฮ๊อ เตหรี่เตแก เด๊อ อา ทวาแถ่ กู๊แหน่เออ เบ่เบ่, แว ซิหยื่อ เฮ๊ ซี เร๊อ เม แต่ เหย่ซี เตอเจ๋อ แต่เหม่. นอโอ่ดื่อ เหย่ซี ฮู๊เนอ, เมเตเฮ๊เร๊อ เหย่ซี เตเน เมเต เออเต๊เห่เนอ, เก่ หม่า แพ๊ อา แฮ เด๊อ แกแยเห่ขุพู๊ อา เตเหล่เตเน เก่เฮ๊เร๊อ อา ปย๊าแก ดื่อ อาเต ปา. 39หม่าโต่เรอ เตเม เออเนอ, อา โอ่ เด๊อ จอแปแหร่ อา โอ่แฮ เก่เฮ๊เนอหม่า ซี เมเป่ เน๊อ เหย่ซี โต่, ซี วื๊อฉื่อ แพ๊ เร๊อ จอแปแหร่ แพ๊ เนอ, ซี แม๊เถอะ ซีเหน่กล่อ เร๊อ ซีเหน่ ปา.”

40เพร ทวา แกแยยิวพู๊ กู่กล๊อดุกู๊ฉู่ทู เต๊เห่ จูเอ่ เกอ คูกามาลิเอล อา เตเด๊อะเตเนจว่า เออ เร๊อ อา เอ๊โน คยาแซ๊ เพรโด่แนพู๊ เต๊เห่ เออเต๊เห่. โทเรอ อา มือ เหย่ซี เร๊อ อิปลี๊หรี่ โทเรอ อา เฮ๊ เหย่ซี เน๊อ ซี เบ่ โด่แนแด๊โฉ่หนิ เป่ ปา อู เร๊อ เหย่ซู่ อามุย เออเนอ โต่, อา เฮ๊โท ฮู๊เนอเรอ อา ปลวา กาแก เหย่ซี.

41เพรโด่แนพู๊ เต๊เห่ เหย่ซีซิครือซิลอ เถ่จว๊าแก เด๊อ แกแยยิวพู๊ ทวาดุทวาเต เออเต๊เห่ อา เป๊เส่เง, เมเตเฮ๊เรอ เด๊อ เหย่ซู่ อาขว่าอาคยาเร๊อ, จอแปแหร่ แด่โอ่ แหน่ เฮ๊อ เหย่ซี เร๊อ อา โต แหน่ เฮ๊อ เร๊อ อา เบ่ ป่อชิเต่อ อู เมเตเร เหย่ซี ฮู๊เออ เนอหมา อา อาต่า แหน่ เฮ๊อ ฮู๊เนอ แพ๊. 42เร๊อ เด๊อคยาเนอ, เหย่ซี โอ่โก๊แก โต่. เด๊อ เตหลู่แตโฮ อากูเนอ เบ่เบ่, เด๊อ อูหี่อูแพ อากูเนอ เบ่เบ่, ปวาเนอเน๋อ เหย่ซี อิซว๊าอี๊แส่ แฮเง เป่ อู, เหย่ซี แด๊โฉ่โด่แน แฮเง โล เป่ โป่ อู เร๊อ เตซิครือซิลอมีลา อาหรี่อาแก. เตซิครือซิลอมีลา หม่า หม่าเฮ๊อ เหย่ซู่ หม่า แกแย เด๊อ อา เมแลเปล๊กา แกแย เห่ขุพู๊ ลอปลี เตเพร เฮ๊อ.