Act 6 | EkySCThai | STEP | เบ๊อะเนอ เค, เพรหยื่อเอ่ เต๊เห่ โอ่โหร่แถ่ เร๊อ โอ่โหร่แถ่ เร๊อ แกแยยิวพู๊ เด๊อ อา เฮ๊เบ่ กรีกโหง่ เต๊เห่ เร๊อ แกแยยิวพู๊ เด๊อ อา เฮ๊เบ่ หนิเร๊อดื่อ อาโหง่ เต๊เห่ เคร๊แขระคยาลู. แกแยยิวพู๊ เด๊อ อา เฮ๊เบ่ กรีกโหง่ เต๊เห่ เฮ๊ เร๊อ แกแย เด๊อ อา เบเอ่เบโอ เหล่เอ่เหล่โอ เตอเนอ เร๊อ เตอเนอ เต๊เห่เนอ อา แม๊ตาโผ่ เบ๊ขุแก เหย่ซี เพรเหมาะโอ่แคร๊ เต๊เห่, อา เฮ๊ แลแค ฮู๊เนอ.

Acts 6

นว๊าแถ่ เพรเมจว่า เกออู โซซว๊าเตเพร

1 เบ๊อะเนอ เค, เพรหยื่อเอ่ เต๊เห่ โอ่โหร่แถ่ เร๊อ โอ่โหร่แถ่ เร๊อ แกแยยิวพู๊ เด๊อ อา เฮ๊เบ่ กรีกโหง่ เต๊เห่ เร๊อ แกแยยิวพู๊ เด๊อ อา เฮ๊เบ่ หนิเร๊อดื่อ อาโหง่ เต๊เห่ เคร๊แขระคยาลู. แกแยยิวพู๊ เด๊อ อา เฮ๊เบ่ กรีกโหง่ เต๊เห่ เฮ๊ เร๊อ แกแย เด๊อ อา เบเอ่เบโอ เหล่เอ่เหล่โอ เตอเนอ เร๊อ เตอเนอ เต๊เห่เนอ อา แม๊ตาโผ่ เบ๊ขุแก เหย่ซี เพรเหมาะโอ่แคร๊ เต๊เห่, อา เฮ๊ แลแค ฮู๊เนอ. 2 ฮู๊เนอเรอ เพรโด่แนพู๊ เต๊เห่ เช๊อซิเนอเออ, อา เอ๊ปล๊อ ลอ เพรหยื่อเอ่ เออ เต๊เห่ เร๊อ อา เฮ๊ เหย่ซี เน๊อ, “เป เก่ แด่โอ่โก๊แก เหล่แด๊โฉ่โด่แน เป่ อู เร๊อ จอแปแหร่ อาลาอาโหง่ เออเต๊เห่ เร๊อ เป เก่ เบตา เป่ อู เหล่เอ่เหล่โอ เนอหม่า อา โตโต่. 3 ฮู๊เนอ อาขว่าอาคยา, โป่แหว่ ซี๋, นว๊าแถ่ แลแค แกแย โซซว๊าเตเพร เด๊อ อา เล๊อบา เร๊อ แหย่โยบูโพ๊แบ่เจ่ เร๊อ เตลีแม เต๊เห่ เร๊อ เป เก่ นอเม เหย่ซี เตเม เด๊อ อา เบ่ เด๊อะเอ่เด๊อะโอ เป่ อู เหล่เอ่เหล่โอ เต๊เห่. 4 เป เออเต๊เห่ เกอลาติ เร๊อ เป โตเบ่ เมบาม๊อเนอม๊อเซ เด๊อ เตกุยจ๊อเบ เร๊อ เหล่แด๊โฉ่โด่แน เป่ อู เร๊อ จอแปแหร่ อาลาอาโหง่ ตากยา.”

5 ล๋อ แกแย โอ่ เด๊อ ตู๊หมู่ตอกล๊อกู เออเต๊เห่ ปว๋า เตเพร ซิปล่อโตเกอ ลอปลี เน๊อ เพรโด่แนพู๊ เต๊เห่ แด๊โฉ่โลแถ่ เออเต๊เห่, เร๊อ เหย่ซี นว๊าแถ่ คูสเทเฟน เด๊อ อา เล๊อบา เร๊อ เตหยื่อเตแหน่ เร๊อ แหย่โยบูโพ๊แบ่เจ่ เออเตเพร. โทเรอ อา นว๊าแถ่ โป่ เร๊อ คูฟีลิป, คูโปรโครัส, คูนิคาโนร์, คูทิโมน, คูปารเมนัส. โทเรอ อา นว๊าแถ่หนิ คูนิโคลัส, อา หม่า แกแยยิวพู๊ หม่าโต่, อา หม่า วีอันทิโอกพู๊ เตเพร เร๊อ อา กาโน เกอ เด๊อ ยูดาห์ อา เตจ๊อบู่จ๊อเบ อากู. 6 เหย่ซี อาตู๊หมู่ตอกล๊อเออ ซูแฮ แกแยเออ โซซว๊าเตเพร เด๊อ เพรโด่แนพู๊ เต๊เห่ อา โอ่. เร๊อ อา กุยจ๊อเบ เป่ โท เหย่ซี เร๊อ อา แด่แถ่ แลแค อากู๊ขุ เด๊อ เหย่ซี เออเต๊เห่ อาโอ่.

7 ฮู๊เนอเรอ จอแปแหร่ อาลาอาโหง่เออ อา โลปีชี จว๊า เร๊อ จว๊า เจ๊อ. โทเรอ เด๊อ วีเยรูซาเล็ม อากู เนอ, แกแย เด๊อ อา หยื่อเอ่แหน่เอ่รี เต๊เห่ โอ่โหร่โอ่เอ๊แถ่ เร๊อ แถ่ เจ๊อ. โท๊โต่ เพร หลู่แตเต เต๊เห่เนอ, อา หยื่อเอ่แหน่เอ่รี เอ๊ เกอ แหน่เจ๊อ.

อู ปื่อ คูสเทเฟน

8 คูสเทเฟน เด๊อ อา เล๊อบา เร๊อ จอแปแหร่ อาบุ๊ยอาเตเตอเรอ เร๊อ อา เพรโพรเตเตอเรอ เออเตเพรเนอ, อา เมโล เป่ อู โอ่ เบ๊อะเนอ เต๊เห่ เร๊อ เตเม อาโค๊ตีกลี๊ เต๊เห่ เร๊อ เตเม อาตาปา คย๊ายื๊อ เต๊เห่ เบ๊อะเนอ. 9 หม่าแน๊เร๊อ แกแย เด๊อ อา เคร๊ฉื่อ ลู เนอ อา โอ่ เต๊เห่. เหย่ซี หม่า แกแย ตู๊หมู่ เด๊อ อา โน โอ่เตอเกอ เด๊อ (ฮู๊ อู เอ๊ เหย่ซี เร๊อ) แกแยยิวพู๊ เด๊อ อา พย๊าหนิ เตปาลา ^{▼▼อิสรภาพ} เต๊เห่ อา เตจ๊อเบโฮ ตู๊หมู่ตอกล๊อ. เหย่ซี หม่า อา โอ่ เด๊อ วีไซรีน เร๊อ วีอเล็กซานเดรีย อากู. เหย่ซี เออเต๊เห่ เร๊อ แกแยยิวพู๊ เด๊อ อาโรเต๊เห่ เด๊อ อา โอ่ เด๊อ ซีลีเซียเก่ เร๊อ เอเชียเก่ ซี เต๊เห่เนอ, อา เป๊อแถ่ เคร๊แขระฉื่อ คูสเทเฟน. 10 หม่าแน๊เรอ เบ๊อะคูสเทเฟน เฮ๊เบ่เต เบ๊อะเนอ, แหย่โยบูโพ๊แบ่เจ่ เด๊อะ ลู เตลีแมลีเพ๊ เต๊เห่ อาขว่าอาคยา, เหย่ซี เคร๊กาคยาฉื่อ แจ่ ปา ลู เตอเจ๋อ โต่.

11 ฮู๊เนอเรอ เหย่ซี จว๊า อี๊ลอโห่ แกแย เด๊อ อาโรเต๊เห่ เร๊อ อา นอเฮ๊แลโฮ เหย่ซี เน๊อ, “เป หนิโฮน๊อ โทเฮ๊อ คูสเทเฟนเออ, อา เคร๊ฉื่อ, อา เฮ๊เบ่ มู๊แหม่รีแจ่ คูโมเสส อา เตซว๊าเตแส่ เต๊เห่ เร๊อ จอแปแหร่ เจ๊อ.”

12 เหย่ซี จว๊า เด๊อ แกแย เบ๊หมู่ เออเต๊เห่ อาโอ่, เร๊อ แกแยยิวพู๊ ทวาดุทวาเต เต๊เห่, เร๊อ เพรอิซว๊า เตซว๊าเตแส่ อาซ๊าร๊า เต๊เห่ อาโอ่ เร๊อ อา จว๊า แฉ่ครวา เร๊อ อา จว๊า นอเมซู๊ซ๊าแถ่ เหย่ซี เร๊อ แกแย เออเต๊เห่ จว๊า ปื่อ คูสเทเฟน เร๊อ จุ่ยแฮ ลู เด๊อ แกแย ทวา ทวาดุทวาเต เต๊เห่ อา เป๊เส่เง. 13 โทเรอ เหย่ซี เอ๊แฮ แกแย เด๊อ อา ข่าเฮ๊โล แลโฮหนิ เร๊อ คูสเทเฟน อาหรี่อาแก เต๊เห่. เร๊อ แกแย เออเต๊เห่เนอ อา เฮ๊ แลแค เน๊อ, “แกแย เออเตเพร หม่า อา เฮ๊ปย๊าเฮ๊แก ลอปลี เป เตหลู่เเตโฮ บูโพ๊เออ เร๊อ คูโมเสส อา เตซว๊าเตแส่เต๊เห่ ปว๋า โตโพ๊ เจ๊อ เม. 14 เป หนิโฮ อา เฮ๊ เร๊อ วีนาซาเร็ธ แบ่เจ่เหย่ซู่ เออ เก่ เมตาพรอแก เตหลู่เเตโฮ เออเนอ ปา เร๊อ อา เก่ ถู่แหล่ เต๊เปล่แก เป เหล่โกลเหล่แบ่ เด๊อ คูโมเสส เด๊อะโอ่แก โทเฮ๊อ เป เออเนอเต๊เห่ ปา,” อา เฮ๊ ฮู๊เนอ.

15 ล๋อ แกแย เด๊อ อา โอ่แนโอ่ เบ๊อะแกแย ทวา ทวาดุทวาเต อาเหล่โอ่ เออเนอ เต๊เห่ แม๊ตาเต่อ ลอ คูสเทเฟน, เร๊อ เหย่ซี แม๊เถอะ ลู เป๊เส่เนอ อา แซ่เจ๊อ เร๊อ เตเน่วม๊อขุ อาเป๊เส่ เนอ เจ๊อ.