Act 8 | EkySCThai | STEP | อู เมเซอ คูสเทเฟน เออเนอ, คูเซาโล โนกู แซ่เกอ อาซิปล่อ เร๊อ เพรเมเซอ คูสเทเฟน เนอเต๊เห่ เร๊อ อา ครวาอ๊อแล แซ่เกอ ฮู๊เนอ. เป๊อแถ่ เบ๊อะเนอ เตอ เนอ ตาเป่แฮ เร๊อ แกแย เด๊อ อา โอ่ เด๊อ วีเยรูซาเล็ม อากู เร๊อ อา หยื่อเอ่แลแค เหย่ซู่ เต๊เห่เนอ, อา เมจาเมจือ แหน่เจ๊อ เหย่ ซี เจ๊อ. แกแย เด๊อ อา โอ่แก เด๊อ วีเยรูซาเล็ม อากู เต๊เห่ เนอหม่า, ตื๊อแพ๊ เพรโด่แนพู๊ เต๊เห่ แพ๊. เร๊อ ล๋อ แกแย เด๊อ อา หยื่อเอ่แหน่เอ่รี เต๊เห่เนอ, อา เถ่แกล่ จว๊าโพร๊จว๊าแพร ลอปลี เด๊อ ยูดาห์เก่ เร๊อ สะมาเรียเก่.

Acts 8

1 อู เมเซอ คูสเทเฟน เออเนอ, คูเซาโล โนกู แซ่เกอ อาซิปล่อ เร๊อ เพรเมเซอ คูสเทเฟน เนอเต๊เห่ เร๊อ อา ครวาอ๊อแล แซ่เกอ ฮู๊เนอ. เป๊อแถ่ เบ๊อะเนอ เตอ เนอ ตาเป่แฮ เร๊อ แกแย เด๊อ อา โอ่ เด๊อ วีเยรูซาเล็ม อากู เร๊อ อา หยื่อเอ่แลแค เหย่ซู่ เต๊เห่เนอ, อา เมจาเมจือ แหน่เจ๊อ เหย่ ซี เจ๊อ. แกแย เด๊อ อา โอ่แก เด๊อ วีเยรูซาเล็ม อากู เต๊เห่ เนอหม่า, ตื๊อแพ๊ เพรโด่แนพู๊ เต๊เห่ แพ๊. เร๊อ ล๋อ แกแย เด๊อ อา หยื่อเอ่แหน่เอ่รี เต๊เห่เนอ, อา เถ่แกล่ จว๊าโพร๊จว๊าแพร ลอปลี เด๊อ ยูดาห์เก่ เร๊อ สะมาเรียเก่. 2 เพร เมโมหนิ แหน่เจ๊อ จอแปแหร่ เนอ อา โอ่ เต๊เห่ เร๊อ อา จว๊า โล๊ ดว้าแก คูสเทเฟน. เร๊อ เหย่ซี โหง่เซอ โหง่โอ่ แลแค เจ๊อ. 3 คูเซาโล เฮ๊เออ เตเพรเนอ อา เมปย๊า เมหลู่แก ครี๊ อา เพร หยื่อเอ่เต ตู๊หมู่ตอกล๊อ เต๊เห่. อา จว๊าแถ่ โน เด๊อ หี่เตเม โท เตเม อากู, เร๊อ อา จว๊าจุ่ย ตู๊หรู่เถ่ เพรเหมาะหม่อ, เพรคูคู เด๊อ อา หยื่อเอ่แหน่เอ่รี เต๊เห่ เร๊อ ด๊อโน เหย่ซี เด๊อ ทอกู. ^a

คูฟีลิป แด๊โฉ่โด่แน เตซิครือซิลอมีลา เด๊อ สะมาเรีย เก่กู

4 เพรหยื่อเอ่พู๊ เด๊อ อา แกล่ จว๊าโพร๊จว๊าแพร แก ลอ ลู เต๊เห่เนอ, อา จว๊าเต่อลอ เด๊อ เหล่โอ่ ปว๋า โต๊โผ่ เร๊อ อา จว๊าเล แด๊โฉ่โด่แน เป่ อู เร๊อ เหย่ซู่ อา เตซิครือซิลอมีลา อาหรี่อาแก เออเต๊เห่. 5 คูฟีลิป จว๊าโต่ เด๊อ วีดุเล๊อ เด๊อ อา โอ่ เด๊อ สะมาเรีย เก่กูเนอ เตอวี. เร๊อ อา จว๊า แด๊โฉ่โด่แน เป่ แกแย โอ่ เบ๊อะเนอ เต๊เห่ เร๊อ ครี๊ อาหรี่อาแก. 6 แกแย เบ๊หมู่ เต๊เห่ หนิโฮน๊อ โทเฮ๊อ คูฟีลิป อา เหล่แด๊โฉ่โด่แน เต๊เห่, โทเร๊อ เหย่ซี แม๊เถอะน๊อ โทเฮ๊อ ลู เตเม อาโค๊ตีกลี๊ เต๊เห่ อาขว่าอาคยา, อา หนิดา แร๊แหน่เจ๊อ ลู เตเฮ๊เบ่ เต๊เห่. 7 โลเน๊โลหน่า มู๊แหม่ เต๊เห่ เอ๊โทเอ๊โม เถ่จว๊า ตาพาแก เด๊อ แกแย เต๊เห่ อาลู เนอ อา โอ่ เอ๊ลา. โท๊โต่ อา แหย่โอ่เหม่ โอเอ๊ เป่ ลา แกแย เด๊อ อา เซอ ชี๊กยา เต๊เห่ เร๊อ แกแย เด๊อ อา กู๊โด่ด๊า ตือรือ เต๊เห่. 8 ฮู๊เนอ อาขว่าอาคยา, วีกูพู๊ เต๊เห่ เหย่ซีซิครือซิลอ แหน่เจ๊อ.

9 เบ๊อะวีกูเนอ แกแย เด๊อ อามุย เร๊อ คูซีโมน อาโอ่ เตเพร. อา เฮ๊ เกอเร๊อ อาเหน่ เน๊อ อา หม่า อา ทวา กู่กล๊อดุ กู๊ฉู่ทู เตเพร, เร๊อ อา จว๊าเล เมตาปา คย๊ายื๊อ โท เอ๊ เป่ ลา เฮ๊อ สะมาเรียพู๊ เต๊เห่ เร๊อ เตเม เต๊เปล่ อูเป๊เส่ เต๊เห่. 10 ฮู๊เนอเรอ ล๋อ แกแย เด๊อ อา ทวาดุทวาทู เร๊อ อา โอ่ เบ๊อะวีกู เนอเต๊เห่ เบ่เบ่, แกแย เอ่เฉ่ แรเตพู๊ โอ่ เบ๊อะวีกู เนอเต๊เห่ เบ่เบ่, อา หนิดา เซอหนิดา โอ่ ลอปลี เจ๊อ ลูโหง่. เหย่ซี เฮ๊ แลแค เน๊อ, “แกแย เออเตเพร หมา จอแปแหร่ อา เตโพรเตเตอเรอ เด๊อ อู เอ๊ เร๊อ เตโพรเตเตอเรอ เด๊อ อาดุอาแย แหน่เฮ๊อ.” 11 อา เม คย๊ายื๊อ เป่ อู เร๊อ อาเตเม เต๊เปล่ อูเป๊เส่ เบ๊อะเนอ หม่า อางยาลาเฮ๊อ อาขว่าอาคยา, อู หนิดา เซอหนิดา โอ่ เจ๊อ ลูโหง่. 12 หม่าแน๊เรอ เบ๊อะคูฟีลิป แด๊โฉ่โด่แน เป่ เหย่ซี เร๊อ จอแปแหร่ อาเทออาเก่ อาหรี่อาแก เร๊อ เหย่ซู่ครี๊ อาหรี่อาแก เบ๊อะเนอ, เพรเหมาะเหมาะ, เพรคูคู อา หยื่อเอ่แลแค เตซิครือซิลอมีลา เร๊อ เจกา ลอ อาเหน่ เร๊อ เทอ. 13 คูซีโมน อาเหน่แบ่เจ่ เร๊อดื่อ อา หยื่อเอ่แลแค เกอ เหย่ซู่ เร๊อ อา เจเกอ อาเหน่ เร๊อ เทอ เทอ. โท๊โต่ อา จว๊าโหร่กาโหร่ เกอ เจ๊อ เร๊อ คูฟีลิป ปว๋า โตโพ๊. เบ๊อะอา แม๊เถอะ เตเม อาตาปา คย๊ายื๊อ เด๊อ อาดุอาแย เต๊เห่ ฮู๊เออ เบ๊อะเนอ, อา คย๊ายื๊อ แหน่เจ๊อ.

14 เบ๊อะเพรโด่แนพู๊ เต๊เห่ เด๊อ วีเยรูซาเล็ม อากู เต๊เห่ หนิโฮ เร๊อ สะมาเรียพู๊ เต๊เห่ หยื่อเอ่ เกอ แลแค จอแปแหร่ อาลาอาโหง่ เบ๊อะเนอ, เหย่ซี นอจว๊า คูเปโตร เร๊อ คูยอห์น เด๊อ เหย่ซีโอ่. 15 เบ๊อะเหย่ซี แฮโต่เฮ๊อ เบ๊อะเนอ, แซ่ฮู๊ สะมาเรียพู๊ เต๊เห่ อา พย๊าหนิเกอ แหย่โยบูโพ๊แบ่เจ่ อาเงเนอ, อา กุยจ๊อเบ เป่ เหย่ซี. 16 เมเตเฮ๊เรอ แหย่โยบูโพ๊ แฮแล แต่ เด๊อ เหย่ซี อาโอ่ เตเพร่ว โต่. เหย่ซี เจ ตื๊อปาแพ๊ แลแค อาเหน่ เร๊อ เทอ เด๊อ แบ่เจ่ เหย่ซู่ อามุย อากู ปาแพ๊. 17 ฮู๊เนอเรอ คูเปโตร เร๊อ คูยอห์น แด่แถ่ อากู๊ขุ เด๊อ เหย่ซี อาลู, เร๊อ เหย่ซี พย๊าหนิ แลแค แหย่โยบูโพ๊ แบ่เจ่.

18 – 19 เบ๊อะเพรโด่แนพู๊ เต๊เห่ คูเปโตร เร๊อ คูยอห์น แด่แถ่ อากู๊ขุ เด๊อ เพรหยื่อเอ่ เออ เต๊เห่ อาลู เร๊อ เหย่ซี พย๊าหนิ แหย่โยบูโพ๊แบ่เจ่ เบ๊อะเนอ, คูซีโมน แม๊เถอะ เร๊อ อา ซิหยื่อ เด๊อะ คูเปโตร เร๊อ คูยอห์น รือ เร๊อ อา เฮ๊ เหย่ซี เน๊อ, “แว เก่ แด่แถ่ เกอ แว กู๊ขุ เด๊อ อูเป เตเพร อาลู ปา เนอ เบ่เบ่, แซ่ฮู๊ อู เก่ พย๊าหนิเกอ แหย่โยบูโพ๊แบ่เจ่ อาเงเนอเรอ, เด๊อะเป่เกอ แว เตโพรเตเตอเรอ เออเนอเต๊อเจ่อ.”

20 เร๊อ คูเปโตร เฮ๊ฉื่อ ลู เน๊อ, “จอแปแหร่ อา เตเด๊อะครา เชหยู่ เออเนอ, พรี อา เร๊อ รือ หม่า อาหนิ แพ๊, เน เตเน ฮู๊เนอ อาขว่าอาคยา, เน เร๊อ เนรือ เก่ แลตา เต่อดื่อลู เด๊อ หง่าหร่าปอรากยากู นี๋. 21 เน หม่า แกแย เด๊อ อา โอ่เต่อ เกอ เด๊อ เป เตเอ่เตแร อากู หม่าโต่, เมเตเฮ๊เรอ เน ซิปล่อ เออเนอ, อาจ๊อ เด๊อ จอแปแหร่ อา เป๊เส่เง โต่. 22 เน ซิปล่อ อา เตเตเน มู๊แหม่รีแจ่ เออเต๊เห่เนอ, เน โตเบ่ ซิปล่อแต๊แกละ กาคยา คยาแซ๊ มอ อา เร๊อ กุยจ๊อเบ จอแปแหร่ เนอ. แตแร๋ หม่า จอแปแหร่ ปลวาแก แจ่ ปา เน เตเนซื๊อ เออเนอ เต๊เห่ ปา. 23 เมเตเฮ๊เรอ แว แม๊เถอะ เร๊อ เน ซิปล่อ เนอ อา บาตีปี๊ เจ๊อ เร๊อ เตซิเถ่ซิฮา เร๊อ เน เตซื๊อเตโอ่หร่า จอกลอหม่า เน แซ่เจ๊อเร๊อ อู ตา เด๊อ ทอกู เตเพรเนอ เจ๊อ.”

24 คูซีโมน เฮ๊ฉื่อ คูเปโตร เร๊อ คูยอห์น เน๊อ, “แซ่ฮู๊ ล๋อ ซี เฮ๊เฮ๊อ เออเต๊เห่ อา ตาเบ่ แต่ แว เต่อเจ๋อ แต่เหม่ เนอ เร๊อ กุยจ๊อเบ เป่ แลแค แว เด๊อ แบ่เจ่ โอ่.”

25 เบ๊อะคูเปโตร เร๊อ คูยอห์น แด๊โฉ่โล เป่ อู เร๊อ เต เด๊อ อา ซิเง แม๊เถอะน๊อ โทเฮ๊อ เหย่ซู่ครี๊ อาหรี่อาแก เนอเต๊เห่ เร๊อ โด่แนโล เป่ โท อู เร๊อ แบ่เจ่ อาลาอาโหง่ เบ๊อะเนอ, เหย่ซี กาคยา คยาแซ๊ เด๊อ วีเยรูซาเล็ม. เบ๊อะเหย่ซี กา เด๊อ แกล๊ลู เบ๊อะเนอ, อา เลกา เด๊อ สะมาเรีย ดอโอ่เอ๊ลู เร๊อ อา โน ตอดอ เถ่ ตอดอ เร๊อ อา เล แด๊โฉ่โด่แน โล กา เป่ อู เตซิครือมีลา.

คูฟีลิป เร๊อ แกแย ทวา เอทิโอเบีย กู่กล๊อดุ เตเพร

26 แบ่เจ่ อา เตเน่วม๊อขุพู๊ เตเพร เฮ๊ คูฟีลิป เน๊อ, “ตี๊หรี่แตแร หนื่ออื่อ เนเหน่ เร๊อ จว๊าเป่แล รว๊าโป่ แกล๊ จว๊า เด๊อ วีเยรูซาเล็ม เร๊อ อา ตากาแล จว๊ารว๊า เด๊อ วีกาซา เนอโตโบ. แกล๊ เออเนอหมา เก่เชเทอแก หล่อตาม๊าขุ อาแกล๊.” 27 ฮู๊เนอเรอ คูฟีลิป โอ่ ตี๊หรี่แตแร อาเหน่ เร๊อ อา เถ่จว๊า. เบ๊อะอา จว๊า เด๊อ แกล๊ลู เบ๊อะเนอ, อา แม๊เถอะฉื่อ เร๊อ เอธิโอเปียพู๊ เด๊อ อาชุ๊ยแก อา เดอะ เตเพร. อา หม่า อา ทวา กู่กล๊อ เร๊อ อา เบ่ แม๊ตู่ เพรเป๊อตี๊หรี่ เอธิโอเปีย คุ๊ยโหมะ ดานดาสี อารือเท ล๋อ ปลี เตเพร อา จว๊า จ๊อบู่จ๊อเบ โท เด๊อ วีเยรูซาเล็ม เร๊อ อา กาคยา เด๊อ อาดอ เร๊อ ตีซิโหล่. 28 เบ๊อะอา กา เด๊อ แกล๊ลู เบ๊อะเนอ, อา แด๊ ลี เด๊อ เพรโพร อิสยาห์ ราโอ่ เด๋อ งย๊าเค เนอเต๊เห่. 29 แหย่โยบูโพ๊แบ่เจ่ แด๊โฉ่ คูฟีลิป เน๊อ, “จว๊า เด๊อ อา ตีซิโหล่ อาช๊าเนอ.”

30 เร๊อ คูฟีลิป แกล่จว๊า เด๊อ ตีซิโหล่ แก่ช๊า เร๊อ เบ๊อะอา หนิโฮ อา แด๊ลี เพรโพร อิสยาห์ ลี เบ๊อะเนอ, อา แด๊เฮอ ลู เน๊อ, “เน แด๊ ลีเออ เนอหม่า, เน ซิเง เกอเร๊อ ช๊าเหล่ อาโหง่แลช๊า แอ?” 31 เร๊อ แกแย ทวา กู่กล๊อ เออเตเพร เฮ๊ฉื่อ ลู เน๊อ, “อู เก่ เฮ๊โฉ่ซิเงโปล เป่ แว เตเพร่ว โต่ เฮ๊เรอ แว จว๊า ซิเงแจ่ ฮู๊เต?” อา เฮ๊ เร๊อ อา เอ๊แถ่ แถ่แด๊ เป่ ลู โหล่.

32 แกแย เด๊อ อาชุ๊ยแก อาเดอะ เออเตเพร แด๊ ลีเทส่อพ๊า ตามา เด๊อ อา เฮ๊ เน๊อ,

“เหย่เนอ อาแซ่เน๊อ ซิหมิ (ซิหมิ โตโด เด๊อ อู จุ่ยจว๊า เร๊อ อู เตเร เมเซอ ลู เนอ, เร๊อ อาแซ่เน๊อ อู จิ ซิหมิพู๊ อาฉื่อ เด๊อ อา โหง่ เอ๊โทเอ๊โม เกออู ตือมื๋อ โต่ โตโด, อา เฮ๊ฉื่อ เกออู โหง่ ตือมื๋อ โต่. ^b 33 อู เมเตเร ลู เร๊อ อู แด๊เฮอ เจแม๊จ๊อเต เป่ ลู โต่, แกแย เด๊อ อา โด่แนแจ่ เป่ อู เร๊อ อา กลุยอาแล อาหรี่อาแก เนอ อา โอ่ เตเพร่ว โต่, เมเตเฮ๊เรอ อู พย๊ากาแก ลู ซิปล่อเซอเพร เด๊อ เห่ขุเออ เฮ๊อ.” ^c

34 แกแย ทวา กู่กล๊อ เออเตเพร เนอ, อา แด๊เฮอ คูฟีลิป เน๊อ, “แด๊โฉ่ เป่แม๊ แว เพรโพร เออเตเพร เฮ๊เบ่ เตเออ, หม่า อา เฮ๊ หนิเกอเร๊อดื่อ แพ๊ อา อาหรี่อาแก แพ๊ แอ? หม่าโต่หม่า อา เฮ๊เร๊อ อูโร เตเพร เพร อาหรี่อาแก แอ?” 35 ฮู๊เนอเรอ คูฟีลิป เป๊อแถ่ เฮ๊ เป่ ลู เร๊อ ลีเทส่อพ๊า เออตามา เร๊อ อา เฮ๊โฉ่โลหนิ เป่ ลู เร๊อ เหย่ซู่ อา เตซิครือซิลอมีลา อาหรี่อาแก. 36 เร๊อ เบ๊อะเหย่ซี เออซิเนอ จว๊า เป่แฮ โป่ เด๊อ เง เบ๊อะเนอ, เหย่ซี จว๊าโต่ เด๊อ เทอเหล่โอ่ โต๊โผ่. เออโตโพ๊เรอ แกแย ทวา กู่กล๊อ เออเตเพรเนอ อา เฮ๊ ลู เน๊อ, “เทอ โอ่ เบ๊อะเออ ว๊า! แว เก่ ซิหยื่อ เจ แวเหน่ เร๊อ เทอ เฮ๊เนอหม๋า เตเมดี๊แด ตาตือ แวแกล๊ โอ่ เต๊อเจ่อเจ่อ แอ?” 37 (คูฟีลิป เฮ๊ฉื่อ ลู เน๊อ, “เน เก่ หยื่อเอ่ ซิกอล๊อแกแน หม่าแหน่ เหย่ซู่ครี๊ เฮ๊เนอหม่า, เน เจ เนเหน่ เร๊อ เทอ หม่า อาหนิ แพ๊.” อา เฮ๊ ลู เร๊อ อา เฮ๊ฉื่อคยา เน๊อ, “เหย่ซู่ครี๊ หม่า จอแปแหร่ อาพู๊คู หม่าแหน่ เนอหม่า แว หยื่อเอ่” อา เฮ๊ฉื่อ ฮู๊เนอ) ^{▼▼อู รา โอ่ ลีเทส่อพ๊า เด๊อ กูลู่เค เต๊เห่เนอ, เต๊เห่เห่เนอ ลีมา ๘:๓๗ เออเนอ อา โอ่ปาโต่} 38 แกแย ทวา ทวาดุทวาเต เออเตเพรเนอ อา เอ๊ โอ่โก๊ เพรเหว่ ตีซิโหล่ เออเตเพร. เร๊อ คูฟีลิป เร๊อ แกแย ทวา กู่กล๊อดุ เออซิเนอ แก๊ตา ลอ เด๊อ เทอกู, เร๊อ คูฟีลิป เจ เป่ อา ทวา กู่กล๊อดุ เออเตเพร เร๊อ เทอ. 39 เบ๊อะเหย่ซี โอ่ เด๊อ เทอกู กากิแถ่ เบ๊อะเนอ, แหย่โยบูโพ๊แบ่เจ่ พย๊าจว๊า โอ่เหม่แก เร๊อ คูฟีลิป. แกแย ทวา กู่กล๊อ เออเตเพร แม๊เถอะ ปา ลู โต่ ตื๊อดื่อเรอ อา ซิครือซิลอ เร๊อ อา กา เป่แฮ ลา เด๊อ อาดอ. 40 เร๊อ คูฟีลิป ซิเง เกอเร๊อ อาเหน่ เร๊อ อา จว๊าโต่ เด๊อ วีอาโซทัส อากู เร๊อ อา จว๊า เป่แฮโป่ เด๊อ วีซารียา. เบ๊อะอา จว๊า เด๊อ แกล๊ลู เบ๊อะเนอ, อา แด๊โฉ่โด่แน เป่ อู เร๊อ เหย่ซู่ครี๊ อา เตซิครือมีลา อาหรี่อาแก เออ ปว๋า ตีวี เจ๊อ.