Acts 9

คูเซาโล ทวาแถ่ เพรหยื่อเอ่ เกอ เตเพร

1เบ๊อะเนอโตโพ๊ คูเซาโล เฮ๊ ซิอิเช แบ่เจ่ อา โคเจ่ เต๊เห่ เด๊อ อา เก่ เมเซอ เหย่ซี. อา จว๊า เด๊อ เพรหลู่แต กู่กล๊อดุเล๊อ เตเพร อา โอ่. 2เร๊อ อา จว๊ากูยซิยอ ลู เร๊อ อา เก่ ราจว๊าหนิ ลี ข่าเฮ๊โล เต๊เห่ เร๊อ อา เก่ ราจว๊า เป่ยูดาห์เต่จ๊อเบโฮ เด๊อ อา โอ่ เด๊อ วีดามัสกัส อากู เนอเต๊เห่ อาโอ่. ลี ข่าเฮ๊โล เออ เต๊เห่ เนอ, อา เฮ๊ จว๊า เหย่ซี เร๊อ เพรเหมาะ เบ่เบ่, เพรคู เบ่เบ่, อูเปเป๋ เบ่เบ่, เบ๊อะคูเซาโล แม๊เถอะ เร๊อ เหย่ซี ครวาเมเกอ แบ่เจ่ เหย่ซู่ อาแกล๊ เต๊เห่ เฮ๊เนอ, อา เก่ ปื่อ เหย่ซี ปา เร๊อ อา เก่ ซูกาแก เหย่ซี เด๊อ วีเยรูซาเล็ม ปา, อา ราจว๊า ฮู๊เนอ. 3คูเซาโล จว๊า เด๊อ วีดามัสกัส เร๊อ เบ๊อะอา ผื่อ จว๊าโต่เฮ๊อ วี เบ๊อะเนอ, เตลีเตเค เด๊อ ม๊อขุ ช๊าเตเค ตาตาวา เด๊อ ลู อาช๊า. 4เร๊อ อา แลคื๊อตา เด๊อ เห่ขุ เร๊อ อา หนิโฮ โหง่พราเถ่ ตือมือ เร๊อ อา เฮ๊ ลู เน๊อ, “คูเซาโล, คูเซาโล, เน เมจาเมจือ แว เมเต?”

5เร๊อ คูเซาโล แด๊เฮอฉื่อ ลู เน๊อ, “แบ่เจ๋, เน หม่า อูเป?”

เร๊อ โหง่พรา เออ เฮ๊ กาคยา ฉื่อลู เน๊อ, “แว หม่า เหย่ซู่ เด๊อ เน เมจาเมจือ อา เนอเตเพร เฮ๊อ. 6หม่าแน๊เรอ ก๊อถ่อมอ เร๊อ จว๊าโน เด๊อ วีกู เนอ. เน โต เมแคร๋ ฮู๊เตเนอ, อู เก่ เฮ๊โฉ่ดื่อ เน ปา.”

7แกแย เด๊อ อา ครวาจว๊าเกอ เร๊อ คูเซาโล เออเต๊เห่เนอ, อา หนิโฮ โหง่พรา ตื๊อดื่อเรอ อา แม๊เถอะ แกแย เตเพร่ว โต่ อาขว่าอาคยา, ตือ, อา โอ่โก๊ ลอ แลแค เร๊อ อา เตเนโปล เฮ๊เบ่ ปา เตอเจ๋อ โต่. อา เถ่ตาปา ลอปลี เจ๊อ เหย่ซี. 8คูเซาโล ก๊อถ่อ เร๊อ อา จ่าเพรอแอ๊จื๊อ แม๊กอลอเถ่ ตื๊อดื่อเรอ อา แม๊เถอะ เตอเจ๋อ โต่ อาขว่าอาคยา, เหย่ซี โตโตจว๊า ลู เร๊อ อา ซูโน ลู เด๊อ วีดามัสกัส อากู. 9เร๊อ โซเนอโซเซ เฮ๊อ อา แม๊เถ่แจ่โต่, โท๊โต่ อาเอ่อาโอ เตอเจ๋อ โต่.

10เด๊อ วีดามัสกัส อากูเนอ, เพรหยื่อเอ่ เด๊อ อามุย เร๊อ คูอานาเนีย โอ่ เตเพร. อา แม๊เถอะลว๊าเหร่อ เต เร๊อ เด๊อ อา เตแม๊เถอะลว๊าเหร่อ อากูเออเนอ, แบ่เจ่ เอ๊ อา เน๊อ, “คูอานาเนีย!” เร๊อ อา กาคยาฉื่อ เน๊อ, “แบ่เจ่ แวโอ่ แพ๊.”

11เร๊อ แบ่เจ่ เฮ๊ ลู เน๊อ, “โอ่ ตี๊หรี่แตแร มอ เนเหน่ เร๊อ จว๊า มอ เด๊อ แกล๊ เนอโตโบ เด๊อ อู เอ๊ อามุย เร๊อ แกล๊จ๊อ เฮ๊เนอ โตโบ เนอ. เร๊อ จว๊า แด๊เฮอ มอ วีทาร์ซัสพู๊ เด๊อ อามุย เร๊อ คูเซาโล เด๊อ คูยูดาส อาหี่กู เนอ. กู๊แหน่เรอ อา กุยจ๊อเบ เฮ๊อ เต. 12เร๊อ อา แม๊เถอะลว๊าเหร่อ เฮ๊อ เนอ, แซ่ฮู๊ อา เก่ แม๊เถอะ กาคยา คยาแซ๊ อาเงเนอ, แกแย เด๊อ อามุย เร๊อ คูอานาเนีย เฮ๊เนอ เตเพร แฮเด๊อ ลูโอ่ เร๊อ อา แอฮ แด่แถ่ อากู๊ขุ เด๊อ ลู ลู.”

13คูอานาเนีย เฮ๊ฉื่อ เน๊อ, “แบ่เจ่, แกแย เออเตเพร อาหรี่อาแก เนอ, แว หนิโฮ อู แด๊โฉ่เป่ เอ๊แหน่ เจ๊อ แว เนอ, อา เมจาเมจือ เน แกแยหยื่อเอ่ โอ่ เด๊อ วีเยรูซาเล็ม อากู เนอเต๊เห่, เฮ๊ว๊า. 14โท๊โต่, อา แฮ เด๊อวีดามัสกัส เออเนอหม่า อา แฮ เด๊อ อา เตเร แฮปื่อ ลอ ล๋อ แกแย เด๊อ อา จ๊อเบ เน เนอเต๊เห่ แพ๊. เพรหลู่แต ทวาดุทวาเต เต๊เห่ เด๊อะ ลู เตอเรอฉว่าชอ เม.”

15หม่าแน๊เรอ แบ่เจ่ เฮ๊ ลู เน๊อ, “จว๊ามอ, เมเตเฮ๊เรอ แว นว๊าแถ่ เฮ๊อ อา เด๊อ อา เก่ แด๊โฉ่โด่แน เป่ แกแยยิวพู๊ หม่าโต่ เต๊เห่ เร๊อ คุ๊ยจ๊อแผ่ เต๊เห่, เร๊อ อิสราเอลพู๊ เต๊เห่ เร๊อ แวหรี่แวแก ปา. 16ล๋อ เตจาเตจือ เด๊อ อา โตเบ่ ข่าจา เด๊อ แวขว่าแวคยา เต๊เห่เนอ, แว เก่ เด๊อะโล ซิเง เจ๊อดื่อ ลู เร๊อ แวเหน่ ปา.”

17ฮู๊เนอเรอ คูอานาเนีย จว๊าโน เด๊อ หี่ เบ๊อะคูเซาโล โอ่ เกอเร๊อ เนอเตเม อากู. โทเรอ อา โนแด่แถ่ อากู๊ขุ เด๊อ คูเซาโล อาลู เร๊อ อา เฮ๊ ลู เน๊อ, “โป่แหว่ คูเซาโล, แซ่ฮู๊ เน เก่ แม๊เถอะ กาคยา แร๊ คยาแซ๊, โทเร๊อ แซ่ฮู๊ เน เก่ เล๊อบาแถ่ เร๊อ แหย่โยบูโพ๊แบ่เจ่ อาเงเนอ, แบ่เจ่ เหย่ซู่ เด๊อ อา โอ่โลแถ่ เป่ โทเฮ๊อ เน เด๊อ แกล๊ลู เนอเตเพร, นอแฮ แว เด๊อ เนโอ่ เฮ๊อ.” 18เบ๊อะเนอ โตโพ๊เรอ เต เด๊อ อาแซ่เน๊อ เต๊วบ่า โอ่ เด๊อ ลู เป๊เส่ปล่อลู เนอ อาตาแก เร๊อ อา แม๊เถอะ กาคยา คยาแซ๊. เออโตโพ๊เรอ อา ก๊อถ่อ เร๊อ อา จว๊า เจ กาคยา อาเหน่ เร๊อ เทอ. 19อาเอ่อาโอ คยาแซ๊ เร๊อ อาอ๊าอาเหร่ โอ่แถ่ คยาแซ๊.

คูเซาโล แด๊โฉ่โด่แน เป่ อู เด๊อ วีดามัสกัส อากู

เร๊อ อา โอ่เกอ เร๊อ เพรหยื่อเอ่ เต๊เห่ เบ๊อะวีดามัสกัส อากูเนอ โซลุยเนอ. 20เร๊อ โตโพ๊เรอ คูเซาโล เถ่จว๊า จ๊อจ๊อ เด๊อ ยูดาห์ เตจ๊อเบโฮ เต๊เห่ อากู เร๊อ อา จว๊าแด๊โฉ่โด่แน เป่ อู เร๊อ เหย่ซู่ หม่า จอแปแหร่ อาพู๊ เตเพร อาหรี่อาแก. 21ล๋อ แกแย เด๊อ อา หนิโฮ ลู เฮ๊เบ่ เต๊เห่เนอ, อา เถ่ตาปา ลอปลี เหย่ซี เร๊อ อา เฮ๊ แลแค เน๊อ, “อา หม่า แกแย เด๊อ อา จว๊าลือ เมเซอ แกแย เด๊อ อา จ๊อเบ เหย่ซู่ เด๊อ วีเยรูซาเล็ม อากู เนอเต๊เห่ เตเพร หม่าโต่ แอ? อา แฮ เบ๊อะเออ เร๊อ อา เก่ แฮปื่อ แกแย เพรหยื่อเอ่ เต๊เห่ เร๊อ อา เตเร ซูกา อู เด๊อ เพรหลู่แต ทวาดุทวาเต เต๊เห่ อา โอ่, แวเฮ๊โต่?” 22คูเซาโล อา เหล่แด๊โฉ่โด่แน เป่ อู เออเนอ, อา เตอเรอฉว่าชอ ดุแถ่ เร๊อ ดุแถ่ เจ๊อ เร๊อ อา ข่าเฮ๊โล ตาเต เป่ อู เร๊อ เหย่ซู่ หม่า ครี๊ หม่าแหน่ เจ๊อ เตเพร อาขว่าอาคยา, โต่ เจ๊อ เด๊อ แกแยยิวพู๊ โอ่ เบ๊อะวีดามัสกัส อากู เนอเต๊เห่ เฮ๊ฉื่อกาคยา แจ่ ปา เจ๊อ ลู เตอเจ๋อ โต่.

23ม๊อเนอม๊อเซ งยาแฮเฮ๊อ ตี๊กิ เร๊อ แกแยยิวพู๊ เต๊เห่ โอ่กู๊ ตาฉื่อ เกอเร๊อ ลู เร๊อ อา เตเน เครเมเซอ คูเซาโล. ^a 24หม่าแน๊เรอ อู แด๊โฉ่โล ซิเง เป่ ลู เร๊อ อู เก่ เคร เมเซอ ลู ปา, เร๊อ แซ่ฮู๊ อู เก่ เมเซอหนิ ลู อาเงเนอ, อู โอ่ป่อ เบ๊อะวี กู่ดาดุทือเนอ เหมาะคี๊คี๊ เหมาะเชเกล เจ๊อ. 25หม่าแน๊เรอ เบ๊อะเหมาะคี๊ เบ๊อะเนอ, คูเซาโล อา โคเจ่ เต๊เห่ ฉู่โน ลู เด๊อ สู่ เตเม อากู เร๊อ อา แถ่ แจตา ลู เด๊อ เกเร๊อู๊บึ แถ่โล กู่ดาพู๊ อากู ตูกู เร๊อ อา แจตาแก ลู เด๊อ เกเร๊อู๊บึ กลอตากยา.

คูเซาโล กาคยา คยาแซ๊ เด๊อ วีเยรูซาเล็ม

26คูเซาโล กา เด๊อ วีเยรูซาเล็ม เร๊อ อา แอ๊จื๊อ แบ๊ซว๊าแบ๊โค อาเหน่ เร๊อ เพรหยื่อเอ่ เต๊เห่ ตื๊อดื่อเรอ เหย่ซี ซิอิเช ลอปลี ลูเหล่. อา ทวา เฮ๊อ เพรหยื่อเอ่แหน่เอ่เกอ เตเพร เฮ๊อ ตื๊อดื่อเรอ เหย่ซี หยื่อเอ่ ลู โต่. 27เออโตโพ๊เรอ คูบารนาบัส เมจว่า ลู เร๊อ อา เอ๊จว๊า ลู เด๊อ เพรโด่แนพู๊ เต๊เห่ อา โอ่. เร๊อ อา แด๊โฉ่โล ซิเง เป่ เหย่ซี เร๊อ คูเซาโล แม๊เถอะเฮ๊อ แบ่เจ่ เหย่ซู่ เบ๊อะอา จว๊า เด๊อ วีดามัสกัส เบ๊อะเนอ, โทเรอ แบ่เจ่ แด๊โฉ่โล เป่ โทเฮ๊อ ลู เร๊อ อา อาหรี่อาแก เต๊เห่. โท๊โต่ คูบารนาบัส แด๊โฉ่โล เป่ โป่ เหย่ซี เร๊อ คูเซาโล แด๊โฉ่โด่แน บื่อคือฮา เป่ เจ๊อ วีดามัสกัสพู๊ เต๊เห่ เร๊อ เหย่ซู่ อาหรี่อาแก. 28ฮู๊เนอเรอ คูเซาโล โอ่เต่อ เกอเร๊อ เหย่ซี เร๊อ อา จว๊า เล แด๊โฉ่โด่แน บื่อ คือฮาเจ๊อ เป่ เจ๊อ อู เร๊อ แบ่เจ่ อาหรี่อาแก เด๊อ วีเยรูซาเล็ม อากู ปว๋า โต๊โผ่. 29อา โด่แนโปล กาคยาแฮเง ฉื่อ เร๊อ แกแยยิวพู๊ เด๊อ อา เฮ๊เบ่ กรีกโหง่ เต๊เห่ ตื๊อดื่อเรอ เหย่ซี แอ๊จื๊อ แม๊ปู แกล๊ เด๊อ อา เก่ เมเซอ ลู. 30เบ๊อะเพรหยื่อเอ่ เต๊เห่ หนิโฮ เตหรี่เตแก เออ เบ๊อะเนอ, เหย่ซี เอ๊เถ่ จว๊าแก คูเซาโล เด๊อ วีเก่ซารียา เร๊อ ซูจว๊าแก ลู เด๊อ วีทาร์ซัส.

31ฮู๊เนอเรอ เบ๊อะเนอเค เพรหยื่อเอ่ ตู๊หมู่ตอกล๊อ เด๊อ อา โอ่ เด๊อ ยูดาห์เก่, กาลิลีเก่, สะมาเรียเก่ เออเต๊เห่ อากู เต๊เห่ โอ่โส่โอ่เคร น๊อเกอ เนอ อู แพ๊. เด๊อ แหย่โยบูโพ๊แบ่เจ่ อาขว่าอาคยา, เพรหยื่อเอ่ ตู๊หมู่ตอกล๊อ เต๊เห่ อาอ๊าอาเหร่ ฉว่าแถ่ชอแถ่, เหย่ซี หนิอ๊าหนิเหร่, เหย่ซี โอ่โหร่โอ่เอ๊แถ่ เร๊อ โอ่เซอเพร แลแค เด๊อ เตแด่ดุหยื่อแหน่ แบ่เจ่ อากู.

คูเปโตร จว๊าโต่ เด๊อ วีลิดดา เร๊อ วียัฟฟา อากู

32คูเปโตร จว๊าเล ลอ เหล่โอ่ ปว๋า โต๊โผ่. โตโพ๊ปา เร๊อ อา จว๊าโอ่เลโอ่ เต่อเกอ เพรหยื่อเอ่พู๊ เด๊อ อา โอ่ เด๊อ วีลิดดา เนอเต๊เห่ อา โอ่. 33เร๊อ อา จว๊า แม๊เถอะ ตาฉื่อ เร๊อ แกแย เซอชี๊กยา เด๊อ อามุย เร๊อ คูไอเนอัส โอ่ เบ๊อะเนอ เตเพร, อา โอ่เมอโอ่แต่ แพ๊ เด๊อ เหล่เมอ เร๊อ อา ก๊อถ่อเบ๊โต่ เนอ อา โอ่ เฮ๊อ อาหน่าลุยซว๊า เฮ๊อ. 34เร๊อ คูเปโตร เฮ๊ อา เน๊อ, “คูไอเนอัส, เหย่ซู่ครี๊ แหย่โอ่เหม่เฮ๊อ เน เฮ๊อ. ก๊อถ่อ มอ เร๊อ กิกย๊าดว้า เน เหล่เมอเนอ” เร๊อ ไอเนอัส ก๊อถ่อ โตโปล่ตา ปยา เจ๊อ. 35ล๋อ แกแย โอ่ เด๊อ วีลิดดา อากู เน๊อ ชาโรน เก่รือดือ เต๊เห่เนอ, อา แม๊เถอะ เตเมทวาแถ่ ฮู๊เออ อาขว่าอาคยา, อา หยื่อเอ่แลแค เกอ ลอปลี แบ่เจ่.

36เบ๊อะวียัฟฟา อากูเนอ, เพรเหมาะ เด๊อ อา หยื่อเอ่แลแค เหย่ซู่ เนอ อาโอ่ เตเพร. เร๊อ อามุย เร๊อ เหมาะทาบิธา (กรีกโหง่ หม่า อามุย เร๊อ เหมาะโดรคัส, อาโหง่แลช๊า หม่า เตอเคอ โตโด) อา ม๊อเนอม๊อเซ ลอ ปลี เนอ อา เมบุ๊ยเมเตอเรอ เป่ อูโร โทเรอ เมจว่าเกอ เป่ แกแย โซพ๊าโซแรพู๊ เต๊เห่. 37เบ๊อะเนอเค อาชุ๊ย เร๊อ อา เซอแก. อาโล เออเนอ, อู อี๊โหล่ปลี อี๊โหล่โพ๊ แร๊ โทเฮ๊อ เร๊อ เทอ เร๊อ อู แด่โอ่ ลู เด๊อ หี่ด๊อกู เด๊อ อาขุ โต๊โต่. 38วีลิดดา เออเนอ, อา โอ่ผื่อ เร๊อ วียัฟฟา อาขว่าอาคยา, เบ๊อะเพรหยื่อเอ่ เต๊เห่ หนิโฮ เร๊อ คูเปโตร โอ่ เด๊อ วีลิดดา เบ๊อะเนอ, เหย่ซี นอจว๊า แกแย ซิเนอ เด๊อ ลูโอ่ เร๊อ อา จว๊า กุยซิยอ ลู เน๊อ, “แด่ทูซิปล่อ เมแพรแพร เร๊อ แฮแพร เด๊อ เป โอ่ เฮ๊เนอ!”

39เร๊อ คูเปโตร ตี๊หรี่แตแรแถ่หนิ อาเหน่ เร๊อ อา เถ่จว๊า เต่อโหร่เกอ เร๊อ เหย่ซี. อา จว๊าโต่ เด๊อ เหย่ซีโอ่ เบ๊อะเนอ, เหย่ซี เอ๊แถ่ ลู เด๊อ หี่ด๊อกู เด๊อ อาขุ โต๊โต่. เร๊อ ล๋อ เพรเหมาะโอ่แคร๊ เต๊เห่ โอ่ แลแค เบ๊อะเนอ เร๊อ เหย่ซี ก๊อถ่อ โหง่ ตาวา ลอปลี เร๊อ คูเปโตร. เร๊อ อา เด๊อะโล เป่ คูเปโตร เร๊อ จา เร๊อ อาจากลอ ซีเต๊เห่ เด๊อ เหมาะโดรคัส เช๊ เป่ เหย่ซี เบ๊อะอา โอ่เซอเพร เต่อเกอปา เร๊อ เหย่ซี เค เนอเต๊เห่.

40คูเปโตร นอเถ่แก ลอ อู เด๊อ อากลอ เร๊อ อา แด๊งือแล กุยจ๊อเบ เต. โทเรอ อา ตีรี๊ แม๊จว๊า เด๊อ เหมาะโดรคัส โลโอ่เนอ เร๊อ อา เฮ๊ เน๊อ, “เหมาะทาบิธ๋า ก๊อถ่อมอ” อา เฮ๊ เร๊อ เหมาะทาบิธา แม๊กอลอเถ่ เร๊อ อา แม๊เถอะ คูเปโตร อาเค, อา ก๊อถ่อ โอ่แนโอ่. 41คูเปโตร บ๊อแฮ อากู๊ขุ เร๊อ อา จุ่ยก๊อถ่อ ลู. โทเรอ อา เอ๊โน คยาแซ๊ เพรหยื่อเอ่ เต๊เห่ เร๊อ เพรเหมาะโอ่แคร๊ เต๊เห่ เร๊อ อา เด๊อะโล เหย่ซี เร๊อ เพร เหมาะ เด๊อ อา เซอเพร กาคยา คยาแซ๊ เออเตเพร. 42เตหรี่เตแก เออเนอ, อา โลปีซีจว๊า โต่ ลอ เด๊อ วียัฟฟา เต๊เก่เล เร๊อ อู หยื่อเอ่ โร๊แลแค แบ่เจ่. 43คูเปโตร โอ่งยาโป่เกอ เร๊อ เหย่ซี เบ๊อะเนอ ม๊อเนอม๊อเซ อางยากู๊ปา ลา ช๊าเหล่ เด๊อ คูซีโมน หี่ เบ๊อะวียัฟฟา อากู เนอ. คูซีโมน หม่า แกแย เด๊อ อา เมเถ่ ตาหมื่อตาเต เออเต๊เห่เนอ เร๊อ เตมีเตแหม่ อาพ๊า เตเพร.