Colossians 1

1แว หม่า คูเปาโล, แว เร๊อ เป โป่แหว่ ครี๊พู๊ คูทิโมธี รา เป่ ซี ลี เออต๊าบ่า. จอแปแหร่ ซิปล่อโอ่หนิเกอ แว เร๊อ แว เก่ ทวาแถ่ เหย่ซู่ครี๊ อา เพรโด่แนพู๊ เต๊เห่ เตเพร.

2แว รา จว๊าหนิ เป่ เป โป่แหว่ ครี๊พู๊ เด๊อ อา บูโพ๊ เร๊อ อาจ๊อ เร๊อ อาโหง่ เร๊อ อา โอ่ แลแค เด๊อ วีโคโลสี อากู เนอเต๊เห่ อา โอ่. เปเพ จอแปแหร่ อาบุ๊ยดุอาเตอเรอทู เร๊อ อา เตโมเตแร๊ เก่ โอ่เกอดื่อ เร๊อ ซี นี๋.

เตเฮ๊บุ๊ยเฮ๊เตอเรอ เร๊อ เตกุยจ๊อเบ

3เบ๊อะเป กุยจ๊อเบ เต เด๊อ ซีเง เบ๊อะเนออาเค, เป เฮ๊บุ๊ยเฮ๊เตอเรอ เป แบ่เจ่ เหย่ซู่ครี๊ อาเพ จอแปแหร่ ปว๋า โตโพ๊ เจ๊อ. 4เมเตเรอ เป เฮ๊บุ๊ยเฮ๊เตอเรอ เฮ๊เนอหม่า, ซี หยื่อเอ่หนิ เหย่ซู่ครี๊ เร๊อ ซี โม หนิเกอเร๊อ จอแปแหร่ อาแกแย บูโพ๊ ล๋อ ปลี เต๊เห่เนอหม่า, เป หนิโฮ โทลอเฮ๊อ. 5เบ๊อะซี หนิโฮ ลู่ เตซิครือมีลา เด๊อ อาหม่า อาจ๊อ เออ เบ๊อะเนออาเค, ซี หนิโฮ โทดื่อเฮ๊อ เตแม๊ชือ เด๊อ เตซิครือมีลา เด๊อะ ซี เออเนอ เฮ๊อ. เด๊อ เตแม๊ชือ เออ อาขว่าอาคยา, ซี หยื่อเอ่ จอแปแหร่, โทเรอ ซี โมหนิเร๊อ อูโร. จอแปแหร่ แด่ดว๊าแด่ปล๊อ เป่ เฮ๊อ ซี เตแม๊ชือ เออเนอ เด๊อ ม๊อขุ เฮ๊อ. 6เตซิครือมีลา เออ อา พย๊าแฮหนิ เตเด๊อะบุ๊ยเด๊อะเตอเรอ เร๊อ อา โลปีชีจว๊า ลอเฮ๊อ เด๊อ เห่ขุต๊าบ่า เฮ๊อ. อา โลปีชีจว๊า เร๊อ อา พย๊าแฮหนิ เตเด๊อะบุ๊ยเด๊อะเตอเรอ แซ่เน๊อ อา พย๊าแฮหนิ เป่เฮ๊อ ซี เบ๊อะซี หนิโฮ เร๊อ ซี ซิเงโปลแฮ เฮ๊อ เตหมะเตจ๊อ หม่าเฮ๊อ จอแปแหร่ อาบุ๊ยอาเตอเรอ อาหรี่อาแก เออเนอ เฮ๊อ. 7คูเอปาฟรัส หม่า แกแย เด๊อ อา แด๊โฉ่โด่แน โล เหร่อเล๊อ เป่ ซี เร๊อ จอแปแหร่ อา เตบุ๊ยดุเตอเรอทู เตเพร เฮ๊อ. อา หม่า เหย่ซู่ครี๊ อา หลู่เล๊ เด๊อ อา เมเต่อ เต เร๊อ เป เร๊อ เป โม เกอเร๊อ ลู เตเพร. อา หม่า ครี๊ อา เพรแรเต เด๊อ อาจ๊อ เร๊อ อาโหง่ เตเพร. เร๊อ อา เม ฮู๊เออเนอหม่า อา เม แต๊เป่ เปเง เฮ๊อ. ^a 8อา แด๊โฉ่โล เป่ เป เร๊อ แหย่โยบูโพ๊แบ่เจ่ ถู่แร ซี เด๊อ ซี เก่ โมหนิเร๊อ อู.

9ฮู๊เนอเรอ, เป๊อแถ่ เบ๊อะเป หนิโฮเบ่ อาเมวกู เนอ เตอเนอเนอ, เป แด่โอ่โก๊แกน๊อ เป เตกุยจ๊อเบ เด๊อ ซีเง โตโพ๋ โต่. เป กุยจ๊อเบ จอแปแหร่ เด๊อ อา เก่ เด๊อะตา เล๊อบา ล๋อปลี ซี เตแจ่เตลีแม เด๊อ แหย่โย ตากยา เร๊อ เตซิคว๊าซิเง เด๊อ แหย่โย ตากยา เร๊อ เด๊อ เออเต๊เห่ อาขว่าอาคยา, เป กุยจ๊อเบ จอแปแหร่ เร๊อ อา เก่ เด๊อซิเง เล๊อเล๊อบาบา เป่ ซี เร๊อ ซี เก่ แรเต ฮู๊ อาโต ลูซิปล่อ เนอเต๊เห่. 10แซ่ฮู๊ ซี เก่ โอ่เซอเพร เกอติ เร๊อ แบ่เจ่ โทเรอ แซ่ฮู๊ ซี เก่ เมโม ลู ซิปล่อ อาเงเนอ, เป กุยจ๊อเบ จอแปแหร่ ฮู๊เนอ. โท๊โต่ แซ่ฮู๊ ซี เก่ เมเตแร๊ ปว๊าเต๊อเจ่อ, เร๊อ ซี เก่ เส่แถ่แร๊ เร๊อ ซี เก่ ดุแถ่ดื่อ เด๊อ เตซิเง จอแปแหร่ อากู อาเงเนอ, เป กุยจ๊อเบ เป่ โป่ เด๊อ ซีเง. 11แซ่ฮู๊ ซี เก่ ซิครือซิลอ ข่าจาข่าจือเบ๊ แด่ทูซิปล่อเบ๊ เตแป่เตเช เออเนอ เร๊อ, เป กุยจ๊อเบ เร๊อ ล๋อ จอแปแหร่ อา เตโพรเตเตอเรอ ฉว่าชอ เต๊เห่ เก่ เด๊อะอ๊าเด๊อะเหร่ ลอ ดื่อ ซี ซิปล่อ. 12ซี เก่ เฮ๊บุ๊ยเฮ๊เตอเรอ ดื่อ เพ จอแปแหร่ เด๊อ อา เด๊อะ ทวา โทเฮ๊อ ซี เร๊อ อาแกแย, เร๊อ ซี เก่ พย๊าหนิ เต่อเกอดื่อ อา อู่เจเต๊เหย่ เออเต๊เห่เนอ, เร๊อ อาแกแย บูโพ๊ เต๊เห่ เด๊อ อาเทออาเก่ เด๊อ อา ลีเตเค อากู เออเนอดื่อ ปา นี๋. 13อา เมแลเปล๊กา เป เด๊อ โลเน๊มู๊แหม่ กู่กล๊อ อา เตฉว่าเตชอ เด๊อ อา เป๊อหนิ เตคี๊ ลอ เออโตโด อาเล เร๊อ อา ซูโน เป เด๊อ อาพู๊คู เด๊อ อา โม หนิเกอเร๊อ เออเตเพรเออ อาเทอเก่กู เฮ๊อ. 14เด๊อ พู๊คูเออ อาขว่าอาคยาเร๊อ, จอแปแหร่ อี๊ถ่า เฮ๊อ เป, โท๊โต่ อา ปลวาแก ลอเฮ๊อ เป เตซื๊อ เต๊เห่. ^b

ครี๊ เร๊อ อาเตแร

15เหย่ซู่ครี๊ เด๊อ เป แม๊เถอะแจ่ อา เออเตเพรเนอ, อา เด๊อะโล ตาตาเตเต ดื่อ เฮ๊อ เป เร๊อ จอแปแหร่ เด๊อะ เป แม๊เถอะแจ่ อา โต่ เออเตเพร เฮ๊อ. อา หม่า จอแปแหร่ อาพู๊คู แหว่เพร่ว เด๊อ อาโพร, อาฉว่าอาชอ อา ดุเล๊อทูเล๊อ เร๊อ เตแบ๊ทวาแถ่ ปว๋า เต๊อเจ่อ เตเพร เฮ๊อ. 16เมเตเฮ๊เรอ, ล๋อ เตเด๊อ อา โอ่ เด๊อ ม๊อขุ เนอเต๊เห่ เบ่เบ่, เด๊อ เห่ขุ เต๊เห่ เบ่เบ่, เต เด๊อ เป แม๊เถอะแจ่ อา เต๊เห่ เร๊อ เป แม๊เถอะแจ่ อา โต่ เต๊เห่ เบ่เบ่, แกแย เด๊อ อา โอ่ เร๊อ อา เตโพรเตเตอเรออาฉว่าชอ เต๊เห่ เบ่เบ่, อา โอ่ เร๊อ อา เตฉว่าเตชอ เต๊เห่ เบ่เบ่, เพรเป๊อตี๊หรี่เต ล๋อ ปลี เนอเต๊เห่ เบ่เบ่, จอแปแหร่ นอแบ๊แล บ่อทือแฮเง เร๊อ ครี๊ แพ๊. โทเรอ ล๋อ เต เออเต๊เห่เนอ อา แบ๊ตา เร๊อ อาเหน่ เร๊อดื่อ เร๊อ อา แบ๊ตา เร๊อ อาเง แพ๊. 17ครี๊ โอ่หนื่ออื่อ เหร่อ โทดื่อเฮ๊อ เร๊อ เต ล๋อ ปลี, เร๊อ แซ่ฮู๊ เตเออเต๊เห่ เก่ จว๊า ตาโตตาเบ่ อาเงเนอ, อา ปื่อหม่าปื่อกลอ หนิ ล๊อปลี. 18ล๋อ แกแย เด๊อ อา หยื่อเอ่ ครี๊ เต๊เห่เนอ, ครี๊ เป๊อตี๊หรี่หนิ เหย่ซี เร๊อ อา ยูแกล๊ยูโกล เหย่ซี แซ่เน๊อ กู่กล๊อ ยูแกล๊ยูโกล หนิ เหน่กล่อ เนอ, เร๊อ แกแย เด๊อ อา หยื่อเอ่ ลู เต๊เห่เนอ อาแซ่เน๊อ เหน่กล่อ เออเนอ เฮ๊อ. โท๊โต่ อา หม่า อา เด๊อะเป่ เพร เด๊อ อา หยื่อเอ่แหน่เอ่เต เต๊เห่ อา ซิปล่อเซอเพร เตเพร เฮ๊อ. โทเรอ แซ่ฮู๊ อา เก่ ทวาแถ่ เตล๋อ ปลี อากู่กล๊อ อาเงเนอ, จอแปแหร่ เม ก๊อถ่อเซอเพร กาคยา เหร่อเล๊อ เฮ๊อ อา เฮ๊อ. ^c 19เมเตเฮ๊เรอ, ล๋อ จอแปแหร่ โอ่ เร๊อ อา เตเล๊อเตบา เต๊เห่เนอ, อา ซิหยื่อ นอโอ่เกอ เด๊อ ครี๊ อากู. 20ล๋อ เต เด๊อ อา โอ่ เด๊อ ม๊อขุ เนอเต๊เห่ เบ่เบ่, เด๊อ เห่ขุเออเนอ เต๊เห่ เบ่เบ่, จอแปแหร่ นอ โครเกล กาคยา ลอ แฮเง คยาแซ๊ ลอปลี เร๊อ ครี๊ เฮ๊อ. อา นอแฮ ข่าเซอ อาพู๊คู เด๊อ อี๊ถื่อดีเต่ อาโอ่ เร๊อ อาสุ่ย เบ่ ทุ๊ยแลตา เด๊อ เปเง อาขว่าอาคยา, อา เมเปเมดวา กาคยา คยาแซ๊ ลอปลี เฮ๊อ เตปว๋า เต๊อเจ่อ ฮู๊เนอเฮ๊อ. ^d

21เด๊อ เหร่อเคเนอ เบ๊อะซี หยื่อเอ่ แต่ล๋าย เหย่ซู่ครี๊ โต่ เบ๊อะเนออาเค, ซี หม่า แกแย เด๊อ อา จว๊า โค๊แก เร๊อ จอแปแหร่. ซี เหล่เตเน เต๊เห่เนอ อา ลูโค๊ เร๊อ จอแปแหร่, โท๊โต่ ซี เมเต เต๊เห่เนอ อา มู๊แหม่รีแจ่. 22หม่าแน๊เรอ กู๊แหน่เออ, ครี๊ อาเหน่แบ่เจ่ เร๊อดื่อ แฮ ข่าเซอ อาเหน่ อาขว่าอาคยา, จอแปแหร่ เมโครเกล กาคยา คยาแซ๊ เฮ๊อ ซี เร๊อ อาเหน่กล่อ เร๊อดื่อ เจ๊อ เฮ๊อ. เด๊อ จอแปแหร่ อา เป๊เส่เง ปาเนอ, แซ่ฮู๊ ซี เก่ บูโพ๊ เร๊อ ซี เก่ ลว๊าแก เร๊อ เตซื๊อ, โท๊โต่ อู เก่ แด่แจ่ ปา แต่ เตซื๊อ เด๊อ ซีโอ่ เตเพร่ว แต่เหม่ เนอ, จอแปแหร่ เมโครเกล กาคยา คยาแซ๊เฮ๊อ ซี ฮู๊เนอ เฮ๊อ. 23แซ่ฮู๊ ซีเป๊เส่ เก่ โอ่ เกอดื่อ เด๊อ จอแปแหร่ อา เป๊เส่เง เนอเรอ, ตูรู๊ หยื่อเอ่ เป่แฮ ลาโป่ แลแค ฮู๊เนอเฮ๊อ. หยื่อเอ่ฉว่า หยื่อเอ่ชอ แลแค, เร๊อ โอ่หม่าโอ่กลอ แลแค เด๊อ ซี เตหยื่อ อากู นี๋. เบ๊อะซี หนิโฮ ลู่ เตซิครือมีลา เบ๊อะเนออาเค, ซี พย๊าหนิ โทเฮ๊อ เตแม๊ชือ เฮ๊อ. เร๊อ ซิปล่อ ลูโทลูแล แต่ แลแค เด๊อ ซี เตแม๊ชือ เออ อากู เนอ แต่เหม่ นี๋. เตซิครือซิลอมีลา เด๊อ จอแปแหร่ เมแร๊ กาคยา คยาแซ๊ แกแย เต๊เห่ เร๊อ อาเหน่ เร๊อดื่อ เออเนอ, อู โด่แน จว๊าเฮ๊อ ลู เด๊อ แกแย ปว๋า เตเพร อา โอ่, เร๊อ เด๊อ เห่ขุ ชีบ่า อา โอ่ เฮ๊อ. แว หม่าเฮ๊อ คูเปาโล, แว ทวา หลู่เล๊ เตเพร แว โด่แน เกอ เตซิครือซิลอมีลา เออเนอ เฮ๊อเฮ๊อ.

คูเปาโล แรเต ฮู๊ เพรแรเต เตเพร เด๊อ เพรหยื่อเอ่ตู๊หมู่ตอกล๊อ อากู

24แซ่ฮู๊ ซี เก่ หนิบุ๊ยหนิเตอเรอ อาเงเนอ, กู๊แหน่เออ แว ข่าเบ่เต เด๊อ ซีเง ฮู๊เออเนอหม่า แว ซิครือ แพ๊. ฮู๊ ครี๊ ข่า เป่ เฮ๊อ แกแย เด๊อ อา หยื่อเอ่ ลู เด๊อ อา แซ่ดื่อ เน๊อ อาเหน่กล่อ เต๊เห่เนอ, แว ซิปล่อฉว่า เด๊อ แว เหน่กล่อพ๊าหย่า เออ เก่ ข่า เป่เกอ ลอดื่อ ล๋อ แกแย เด๊อ อา หยื่อเอ่ ลู เนอเต๊เห่ อาเงเง. 25แซ่ฮู๊ แว เก่ แด๊โฉ่โด่แน เล๊อบา เป่ ซี เน๊อ จอแปแหร่ อา เตหรี่เตแก อาเงเนอ, จอแปแหร่ เด๊อะแล เฮ๊อ แว เหล่เอ่เหล่แร เออ เด๊อ ซีเงเฮ๊อ. โท๊โต่ อา นอทวาแถ่ เฮ๊อ แว เน๊อ ล๋อ เพรหยื่อเอ่ ครี๊ เนอเต๊เห่ อา หลู่เล๊ เตเพร เฮ๊อ. 26แกแย โอ่เซอเพร เด๊อ อาเหร่อตือทือ เต๊เห่ ล๋อ ปลีเนอ, จอแปแหร่ นอเตเนโปล แล เหย่ซี เน๊อ เตซิครือซิลอมีลา เออ อาหรี่อาแก ล๋ายโต่. เตซิครือซิลอมีลา เออเนอ, จอแปแหร่ เบ่ แด่โอ๊แด่บี๊ ปา ลู แพ๊, หม่าแน๊เรอ กู๊แหน่เออ อา เด๊อะโล แถ่เฮ๊อ เด๊อ อาแกแย เต๊เห่ อา โอ่ เฮ๊อ. 27จอแปแหร่ ซิปล่อโอ่ เด๊อ อา เก่ เบ่ แด่โลแถ่ เป่ อาแกแย เต๊เห่ เน๊อ อา เตแด่โอ๊แด่บี๊ เออเต๊อเจ่อ. อา เตแด่โอ๊แด่บี๊ เออเนอหมา แกแยยิวพู๊ หม่าโต่ เต๊เห่ อาเง เนอหม่า อาหม่าหม่า. เตแด่โอ๊แด่บี๊ เออเนอหมา อา งูดุงูชอ, อาเตอเรอดุเตอเรอทู แหน่เจ๊อ. เตแด่โอ๊แด่บี๊ เออเนอหมา หม่าเฮ๊อ ครี๊ เด๊อ อา โอ่ เด๊อ ซีเหน่ลู เออเนอเฮ๊อ, เร๊อ อาโหง่แลช๊า หม่า หม่าเฮ๊อ ซี เก่ พย๊าหนิ เกอดื่อ จอแปแหร่ อาเตอเรอดุเตอเรอทู ปา, เออเนอเฮ๊อ.

28แซ่ฮู๊ เป เก่ ซูโน แกแย ปว๋า เตเพร เด๊อ จอแปแหร่ เป๊เส่เง ฮู๊ แกแย เด๊อ อา ทวาแถ่ เฮ๊อ เตเต๊อเจ๋อ โต เน๊อ ครี๊ เร๊อ อา ดุเผร่ ตาเต เฮ๊อ เด๊อ แหย่โย ตากยา เต๊เห่ อาเงเนอ, เป แด๊โฉ่โด่แน เป่ เฮ๊อ อู ปว๋า เตเพร เน๊อ ครี๊ อาหรี่อาแก เฮ๊อ. โท๊โต่ เป เด๊อะรอเด๊อะเร เฮ๊อ อู ปว๋า เตเพร, เร๊อ เป อิซว๊าอี๊แส่ เป่ เฮ๊อ อู ปว๋า เตเพร เน๊อ ล๋อ ลีแมลีเพ๊ เออเนอเต๊เห่ เฮ๊อ. 29ครี๊ อา เตโพรเตเตอเรอ เออ อา เมฉว่าเมชอ แหน่เจ๊อ เด๊อ แวกู แว ซิเล แถ่หนิ อา เตโพรเตเตอเรอ ฉว่าชอ เออ เร๊อ แว จ่าเพรอแอ๊จื๊อ เร๊อ แว ซิครือเมเฮ๊อ จอแปแหร่ อาเตแร เออเต๊เห่ เฮ๊อ.