Col 2 | EkySCThai | STEP | แว ซิหยื่อ เด๊อซิเง เป่ ซี เน๊อ แว แอ๊จื๊อ แอ๊เหร่ เม เป่ แหน่เจ๊อ เด๊อ ซีเง, เน๊อ แกแย โอ่เด๊อ วีเลาดีเซีย อากู เนอเต๊เห่ อาเง, เน๊อ แกแย เด๊อ อา ซิเง แม๊เถอะ แต่ล๋าย แวโต่ เนอเต๊เห่ อาเง บ๋า เต เนอแพ๊.

Colossians 2

1 แว ซิหยื่อ เด๊อซิเง เป่ ซี เน๊อ แว แอ๊จื๊อ แอ๊เหร่ เม เป่ แหน่เจ๊อ เด๊อ ซีเง, เน๊อ แกแย โอ่เด๊อ วีเลาดีเซีย อากู เนอเต๊เห่ อาเง, เน๊อ แกแย เด๊อ อา ซิเง แม๊เถอะ แต่ล๋าย แวโต่ เนอเต๊เห่ อาเง บ๋า เต เนอแพ๊. 2 แซ่ฮู๊ แว เก่ เด๊อะอ๊าเด๊อะเหร่หนิ เหย่ซี เร๊อ แว เมฮู๊เออ แพ๊. แซ่ฮู๊ เหย่ซี ซิปล่อ เก่ จิจือ หนิเกอเร๊อ ลู เตเพร เน๊อ เตเพร เด๊อ เตโม อากู, โท๊โต่ แซ่ฮู๊ เหย่ซี เก่ พย๊าหนิ ลอหล่าตี๊กลิ ตาเตลอ เตซิเง, ฮู๊เนอเรอ เหย่ซี ซิเงโปลแฮเฮ๊อ จอแปแหร่ อาเตแด่ โอ๊โอ่บี๊ หม่าเฮ๊อ ครี๊ เออเนอ เร๊อ แว แอ๊จื๊อ แอ๊เหร่ เม แหน่แหน่ เจ๊อ เป่ ซี เฮ๊อ. 3 เตลีแม เน๊อ เตซิคว๊าซิเง ล๋อ ปลี หม่าดื่อเฮ๊อ เตเด๊อะบุ๊ยเด๊อะเตอเรอ งูดุงูชอ เออเนอ, อา โอ่โอ๊โอ่บี๊ เด๊อ ครี๊ อากู. 4 แซ่ฮู๊ อู เก่ อี๊ลอแลโฮ จว๊า แต่ ซี เน๊อ อู เตอิซว๊าอี๊แส่ เด๊อ อาซื๊อ เนอเต๊เห่ แต่เหม่เนอเรอ, แว เฮ๊ ซี ฮู๊เออ เนอแพ๊. เตอิซว๊าอี๊แส่ เออเต๊เห่เนอ, อา แซ่เจ๊อ เน๊อ อาโต อาเบ่เบ่, หยื่อเอ่ แต่เหม่ นี๋. 5 เมเตเฮ๊เรอ, แว เหน่กล่อ โอ่เต่อเกอ เน๊อ ซี โต่ ตื๊อดื่อเรอ แว ซิปล่อ จิจือ เน๊อ ซี เร๊อ แว หนิโฮ เด๊อ ซี โอ่ลู เร๊อ ซิปล่อ เตเม๊วโต, โท๊โต่ ซี ปื่อหม่าปื่อกลอ เตหยื่อเตแหน่ เด๊อ ครี๊ อากู อาขว่าอาคยา, แว ซิครือซิลอ แหน่เจ๊อ.

6 ฮู๊ ซี หยื่อเอ่ โทเฮ๊อ เหย่ซู่ครี๊ ฮู๊ ซี แบ่เจ่ เตเพร เนอ, โอ่เซอเพร เป่แฮ แลแค ฮู๊ แบ่เจ่ ซิหยื่อ นอโอ่เซอเพร ซี เนอ. 7 ช๊อตา แยแย แลแค ซี เตหยื่อ เด๊อ เหย่ซู่ครี๊ อากู ฮู๊ ส่อหรุ่ย ช๊อตาแย เนอ. เร๊อ ดุแถ่ แลแค เด๊อ เหย่ซู่ครี๊ อากู นี๋. ซี หยื่อเอ่ เออเนอ อา เบ่ ฉว่าชอแฮ เน๊อ ชอแฮ เป่แฮ ฮู๊ อู อิซว๊า โทเฮ๊อ ซี เนอ, เร๊อ ล๋อ จอแปแหร่ เม เป่ โทเฮ๊อ ซี เต๊เห่เนอ, ถู่เซ๊ เฮ๊บุ๊ยเฮ๊เตอเรอ แถ่ แลแค ลู นี๋.

8 รอหนิ แลแค ซีเหน่ นี๋. นออิลออี๊โหล่ หนิเกอเร๊อ แต่ ซีเหน่ เน๊อ แกแย เด๊อ อา อิซว๊าอี๊แส่ซื๊อ ดื่อเง เตเนอเต๊เห่ เตเพร่ว แต่เหม่ นี๋. เตเนอเต๊เห่ หม่า อา แกเด แพ๊. เตอิซว๊าอี๊แส่ ฮู๊เนอ เต๊เห่หม่า หม่าแพ๊ แกแย เห่ขุพู๊ อาเหล่โกล เด๊อะตา แฮเงโต่ คยาลู ตือทือ โท ตือทือ เนอเต๊เห่ แพ๊. เร๊อ เนอเต๊เห่ หม่า อา แฮ เด๊อ โลเน๊โลหน่า มู๊แหม่ เด๊อ อา เป๊อ เห่ขุชีบ่า เนอเต๊เห่ อา โอ่ แพ๊. เตอิซว๊า ฮู๊เนอ เต๊เห่หม่า อา แฮ เด๊อ เหย่ซู่ครี๊ อา โอ่ หม่าโต่.

9 เมเตเฮ๊เรอ เหย่ซู่ครี๊ แฮ กลว่าแถ่ อาเหน่กล่อ ฮู๊ แกแย เนอ ตื๊อดื่อเรอ, อา เล๊อบา ลอ เจ๊อ เน๊อ จอแปแหร่ อาเหล่โกล เต๊เห่ ล๋อ ปลี เจ๊อ. 10 เร๊อ เด๊อ ซี เน๊อ ครี๊ ทวาเฮ๊อ ลู เตอเจ๋อโต อาขว่าอาคยา, เด๊อ แหย่โย ตากยา อาเตโหล่ ล๋อ ปลี เต๊เห่เนอ, ซี พย๊าหนิ เล๊อบา โทลอปลี เฮ๊อ. ครี๊ หม่า ล๋อ โลเน๊โลหน่า อา เตฉว่าเตชอ เนอเต๊เห่ เน๊อ เห่ขุ อา เตอเรอฉว่าชอ เต๊เห่ อากู่กล๊อ เฮ๊อ. 11 ซี โอ่ เด๊อ ครี๊ อากู อาขว่าอาคยา, อา แซ่เฮ๊อ เน๊อ ซี ดื๊อตีลี๊พ๊า เฮ๊อ. เตดื๊อตีลี๊พ๊า เออเนอ แกแย ดื๊อ ซี หม่าโต่. เบ๊อะครี๊ พย๊าเถ่แก เฮ๊อ ซี ซิปล่อ อา เตซิหยื่อซิลอ มู๊แหม่รีแจ่ เต๊เห่ เบ๊อะเนออาเค, อา ดื๊อตีลี๊ ซีพ๊า เฮ๊อ. 12 เบ๊อะซี เจ ซีเหน่ เน๊อ เทอ เบ๊อะเนอ, ซี เหล่โกล มู๊แหม่ เต๊เห่เนอ, ซี โล๊ตา เต่อเกอ โทเฮ๊อ เร๊อ ครี๊ เฮ๊อ. เร๊อ ซี เหน่เหล่โกลเม เต๊เห่เนอ, จอแปแหร่ เมเซอเพร กาคยา เต่อเกอ เฮ๊อ เน๊อ ครี๊ เฮ๊อ. เด๊อ ซี หยื่อเอ่หนิ จอแปแหร่ อา เตโพรเตเตอเรออาฉว่าชอ เด๊อ อา เม ก๊อถ่อเซอเพร กาคยา คยาแซ๊ ครี๊ เด๊อ เตเซอ เออ อาขว่าอาคยา, อา ทวาแถ่ โทลอ เฮ๊อ ฮู๊เนอ เฮ๊อ. ^a

13 เบ๊อะซี หยื่อเอ่ แตแล๋ เหย่ซู่ครี๊ โต่ เบ๊อะเนอ, เด๊อ ซี เตซื๊อ อาขว่าอาคยาเร๊อ, ซี แซ่เน๊อ แกแยเด๊อ อาเซอ เด๊อ แหย่โย ตากยา เฮ๊อ. โท๊โต่ ซี แลเปล๊เถ่เบ๊ เน๊อ ซี เหล่โกล เมเตซื๊อ อา เพรโพรฉว่าชอ เออเนอ โต่. หม่าแน๊เรอ กู๊แหน่เออ จอแปแหร่ เม ก๊อถ่อเซอเพร กาคยา เต่อเกอ เฮ๊อ ซี เน๊อ ครี๊ เฮ๊อ. จอแปแหร่ ปลวาแก ลอเฮ๊อ เป เตซื๊อ ล๋อ ปลี เฮ๊อ ^b 14 อา ทื๊อปลีแก ล๊อ เฮ๊อ เตราม๊าราแด เด๊อ อา เตเร เมจากาคยา เป เนอเต๊เห่ เฮ๊อ. เบ๊อะอู มือเซอแถ่ ครี๊ เด๊อ อี๊ถื่อดีเต่ลู เบ๊อะเนอ, จอแปแหร่ ท๊อยาท๊อหมื่อแก โท ลอเฮ๊อ เตราม๊าราแด เนอเต๊เห่ เฮ๊อ. ^c 15 เบ๊อะเหย่ซู่ อาเซอ เด๊อ อี๊ถื่อดีเต่ลู เบ๊อะเนอ, ล๋อ โลเน๊โลหน่า เด๊อ อา โอ่ เน๊อ อา เตอเรอฉว่าชอ เต๊เห่เนอ, จอแปแหร่ ปื่อเผ่แก ลอปลี เฮ๊อ เหย่ซี อาเตเตอเรอฉว่าชอ เนอเต๊เห่ เร๊อ อา เด๊อะโล โล๊ลี เป่ เฮ๊อ แกแย ปว๋า เตเพร เน๊อ อา เมเป่แก เฮ๊อ เหย่ซี เฮ๊อ.

16 ฮู๊เนอเรอ, แกแย เด๊อ อา แด่ ซี เตซื๊อ เน๊อ ซี เตเอ่เตโอ อาหรี่อาแก เต๊เห่เนอ, หนิดา แต่ เหย่ซีโหง่ แต่เหม่ นี๋. ปวาหน่าหน๋า ซี เก่ เมป่วยเมลา เป่เกอ เหย่ซี ม๊อเนอบูโพ๊ โต่, ดา เลบา เฮ๊อเร๊อ ซี เก่ เมป่วยเมลา เป่เกอ เหย่ซี โต่ เฮ๊เนอ, เหย่ซี ซิหยื่อ แด่ ซี เตซื๊อ. หม่าแน๊เรอ หนิดา แต่ เหย่ซี อาโหง่ แต่เหม่ นี๋. ^d 17 เมเตเฮ๊เรอ, มู๋ หนู่เคเนอ, จอแปแหร่ เด๊อะตา เตซว๊าเตแส่, เมป่วยเมลา เออเต๊เห่ เร๊อ ล๋อ เต เออเต๊เห่ เนอหม่า, อาแซ่เน๊อ เตแหย่โยเออ เด๊อ อา เด๊อะโล เน๊อ เต เตเร ทวาแถ่ เด๊อ เง ฮู๊เต ปา เนอแพ๊. อาเหน่แบ่เจ่ หม่าแหน่ แหน่ หม่า ครี๊ แพ๊. 18 แกแย เด๊อ อา นอฉว่า ซี เน๊อ ซี เบ่ แด่หยว่า ซี ซิปล่อ เร๊อ อา นอจ๊อเบแถ่ เกอ ซี เน๊อ ม๊อขุเตเน่วพู๊ เต๊เห่ ฮู๊ เหย่ซี จ๊อเบแถ่ เออเนอ เต๊เห่เนอ, ครวาเม เกอ แต่ เหย่ซี แต่เหม่ นี๋. ซี เก่ ครวาเกอ เหย่ซี อาเตอิซว๊าอี๊แส่ เต๊เห่ เฮ๊เนอหม่า, เตเมหนิคว๊าเก่ เด๊อ จอแปแหร่ อ๊อแล โทเฮ๊อ ซี เน๊อ อา เก่ เด๊อ ซี เนอเต๊เห่ ปาเนอ, ซี พย๊าหนิ ปา โต่. แกแย ฮู๊เนอเต๊เห่ หม่า อา เฮ๊ หนิเกอเร๊อ แลแค เจ๊อ อาเหน่ เน๊อ เป แม๊เถอะ เตแม๊ลว๊า เด๊อ จอแปแหร่ อา โอ่ อาขว่าอาคยา, เป พย๊าหนิ โค๊ดื่อ เตซิคว๊าซิเง เด๊อ จอแปแหร่ อา โอ่, อา เฮ๊ แลแค ฮู๊เนอ. เหย่ซี พย๊าแถ่โล หนิเกอเร๊อ แหน่เจ๊อ อา เหล่เตเน เออเต๊เห่ เน๊อ อา เตแด๊เล๊อแด๊กลอ เออเนอเต๊เห่ เจ๊อ. 19 แกแย เนอเต๊เห่ หม่า อา ปื่อหม่าปื่อกลอ ปา ครี๊ โต่ เฮ๊อ ครี๊ หม่า อาแซ่เน๊อ กู่กล๊อ เร๊อ ล๋อ แกแย เด๊อ อา หยื่อเอ่ ลู เต๊เห่ เนอหม่า อา ทวา ลู เหน่กล่อ. กู่กล๊อ เออเนอ อา เด๊อะอ๊าเด๊อะเหร่ เป่ เหน่กล่อ เร๊อ อา นอ ทวาแถ่ มาทือ เร๊อ หรุ่ยถว่า ล๊อปลี เก่ ปื่อหม่า จิจือหนิ โหร่ลู เหน่กล่อ เร๊อ อา เหน่กล่อ เออเนอ อา ดุแถ่ ฮู๊ จอแปแหร่ นอดุแถ่ ลู เนอแพ๊. ^e

เซอ เต่อเกอ เน๊อ ครี๊, เซอเพร เต่อเกอ เน๊อ ครี๊

20 ซี เซอ เต่อเกอ เน๊อ เหย่ซู่ครี๊ เฮ๊อ เร๊อ อา เมแลเปล๊กา เฮ๊อ ซี เน๊อ โลเน๊โลหน่า เด๊อ อา เป๊อหนิ เห่ขุชีบ่า เออเนอเต๊เห่ อา กู๊ยากู เฮ๊อ. ซี จว๊า โอ่เซอเพร ปา แลแค ฮู๊ แกแย เด๊อ อา แซ่ปา เน๊อ เห่ขุพู๊ เออเต๊เห่เนอ ฮู๊เต? เร๊อ ซี จว๊า หนิดา ครวาเมเกอ ปา เตโด่เตดว๊า เต๊เห่ เมเต? 21 เตซว๊าเตแส่ เน๊อ เตโด่เตดว๊า เออเต๊เห่ เฮ๊ เน๊อ, “เออเต๊อเจ่อเนอ ปื่อขร่า แต่ อา แต่เหม่,” “เด๊อะเนอเต๊อเจ่อ เร๊อ หย่าแม๊ แต่ อา แต่เหม่,” “เด๊อ เนอเต๊อเจ่อ เกอลาติ เร๊อ เต่อเบ่ แต่ อา แต่เหม่.” 22 เออเต๊เห่ เนอหม่า อา อิซว๊าอี๊แส่ แพ๊ เตเด๊อ อา โอ่เด๊อะโล แตแปล๊เตอเปลอ เนอเต๊เห่ แพ๊. เป นอเอ่ หนิโท อา เร๊อ เป เบ่ วีแก คยาแซ๊ อา แพ๊. เตซว๊าเตแส่ เน๊อ เตอิซว๊าอี๊แส่ เออเต๊เห่ เนอหม่า แกแย เด๊อะ โอ่ทวาแถ่หนิ อา แพ๊. 23 เด๊อ เตซว๊าเตแส่ เออ อาขว่าอาคยา, แกแย เต๊เห่เห่เนอ อา จ่า จ๊อเบ บย่าแพ๊ แลแค จอแปแหร่, อา จ่า แด่ทู บย่าแพ๊ แลแค อาซิปล่อ เร๊อ อา เมจาเมจือ แล เกอเร๊อ แลแค อาเหน่. เตซว๊าเตแส่ เออเต๊เห่เนอ อา แซ่เจ๊อเน๊อ อาโอ่ เน๊อ เตแจ่เตลีแม แหน่เจ๊อ ตื๊อดื่อเรอ อาหม่าน๊อโต่. แซ่ฮู๊ อู เก่ ค๊อเบ๊ อูซิปล่อ อา เตซิหยื่อซิลอ มู๊แหม่ เต๊เห่ อาเงเนอ, เตซว๊าเตแส่ เออเต๊เห่ เมจว่าเบ๊ น๊อ อู โต่.