Colossians 4
1หลู่ แบ่เจ่ ซี๋ เมแร๊ แลแค ซีหลู่ นี๋, แด่จ๊อแด่เต แลแค ซิปล่อ เด๊อ เหย่ซี อาขุ นี๋, แม๊ดุแม๊ปีตี๊ แต่ อู แต่เหม่ นี๋, เมเตเฮ๊เรอ ซี ซิเง เกอดื่อ เฮ๊อ เร๊อ ซี แบ่เจ่ โอ่ เด๊อ ม๊อขุ เฮ๊อ. aเตอิซว๊าอี๊แส่ เต๊เห่
2กุยจ๊อเบ ฉาเผร่ แลแค จอแปแหร่ เร๊อ ซิเหน่ กุยจ๊อเบแถ่ ครือครือ อา นี๋. โอ่ส่าเซ แลแค, เร๊อ โอ่ แลแค เน๊อ เตเฮ๊บุ๊ยเฮ๊เตอเรอ แถ่ อา นี๋. 3เด๊อ เนอเคหม่า แกแย เต๊เห่ ซิเง ครี๊ อาหรี่อาแก โต่. จอแปแหร่ ด๊อโอ๊ด๊อบี๊ เร๊อดื่อ ครี๊ อาหรี่อาแกเออ. หม่าแน๊เรอ กู๊แหน่เออ เตด๊อโอ๊ด๊อบี๊ เออเนอ อา โอ่โลแถ่ เฮ๊อ. แซ่ฮู๊ จอแปแหร่ เก่ บ๊อโม หนิเป่ เปแกล๊ เด๊อ เป เก่ แด๊โฉ่โด่แน หนิเป่ อู เร๊อ ครี๊ อาหรี่อาแก เออเนอเร๊อ, กุยจ๊อเบ เป่เกอ แลแค เด๊อ เปเง นี๋. มู๋ หนู่เคหม่า เตด๊อโอ๊ เออเนอ, อา โอ่โลแถ่ แต๋โต่, ตื๊อดื่อเรอ กู๊แหน่เออ อา โอ่โลแถ่ เฮ๊อ. เด๊อ แว โด่แน เป่ อู เน๊อ ครี๊ อาหรี่อาแก อาขว่าอาคยา, อู ด๊อตา แว เด๊อ ทอกู แพ๊. 4ฮู๊ แว โตเบ่ โด่แน เป่แหน่เฮ๊อ อู เนอ, แซ่ฮู๊ แว เก่ โด่แน โปลเพ๊แร๊ เป่ เด๊อ อู อาเง เนอเรอ, กุยจ๊อเบ เป่เกอ แลแค เด๊อ แวเง นี๋. 5แจ่เตเน ลีแม แลแค เร๊อ แอ๊แซแร ซีเหน่ เด๊อ แกแย เด๊อ อา หยื่อเอ่แต่ล๋าย ครี๊ โต่ เต๊เห่ อาเป๊เส่เง นี๋. บ๊อเกเต๋ เบ่เบ่, เบ๊อะซี พย๊าหนิ เตโตเตเบ่แร๊ เด๊อ ซี เก่ เม เตแร๊ เบ๊อะเนอ, ตูรู๊ เมแร๊ แลแค ปว๋า โตโพ๊ นี๋. b 6แซ่ฮู๊ ซี เก่ ซิเง เกอ แลแค เน๊อ ซี โต เฮ๊ฉื่อ กาคยาแจ่ เป่ อู ปว๋า เตเพร ฮู๊เตฮู๊เต อาเงเนอ, เฮ๊เบ่เจ่เฮ๊เบ่หนิ, เฮ๊เบ่ ท๊อหนิจุ่ยหนิ เกอ แลแค อู ซิปล่อ นี๋.เตเฮ๊โมเฮ๊แร๊ เด๊อคยา ตื๊อดื่อ
7คูทีคิกัส เก่ แด๊โฉ่ ลอเป่ ซี เร๊อ แวหรี่แวแก ปา. c อา หม่า โป่แหว่ เด๊อ อู โมหนิเร๊อ ลู เตเพร, โท๊โต่ อา หม่า แกแย เตเพร เด๊อ อาจ๊อ เร๊อ จอแปแหร่ อาเตเม, เร๊อ อา เม แบ่เจ่ อาเตเม เร๊อ อา เม เต่อเกอ เต เน๊อ เป เตเพร. d 8แซ่ฮู๊ อา เก่ แด๊โฉ่โล เป่ ซี เน๊อ เปหรี่เปแก ล๋อ ปลี, โท๊โต่ แซ่ฮู๊ อา เก่ เด๊อะอ๊าเด๊อะเหร่ เมโมหนิ ซี ซิปล่อ อาเงเนอ, แว ซูแล เฮ๊อ อา เด๊อ ซี โอ่ เฮ๊อ. 9คูโอเนสิมัส เก่ แฮแล เต่อเกอ เร๊อ ลู ปา. อา หม่า แกแย เด๊อ อาจ๊อ เน๊อ อาโหง่ เร๊อ อู โม หนิเกอเร๊อ ลู เตเพร. อา หม่า ซี ดอกูพู๊ เร๊อดื่อ แพ๊. เหย่ซี เก่ แด๊โฉ่ เป่ ลอ ซี เน๊อ ล๋อ เตทวาแถ่ อาเหน่ เบ๊อะเออ เนอเต๊เห่ ปา. e 10คูอาริสทารคัส เด๊อ อู ด๊อตา เต่อเกอ อา เร๊อ แว เออเตเพร ซูแฮ เป่เกอ ซี อาเตเฮ๊โมเฮ๊แร๊, โทเรอ คูบารนาบัส โต๊โป่บู คูมาระโก ซูแฮ เป่เกอ ซี อาเตเฮ๊โมเฮ๊แร๊ เด๊อ ซี โอ่โอ๋. f (ซี พย๊าหนิ โทเฮ๊อ ลี เด๊อ อู ราโล เป่ ซี เน๊อ คูมาระโก อาหรี่อาแก เออเนอเฮ๊อ. อา เก่ แฮโตเกอ เด๊อ ซี โอ่ ปา เร๊อ เอ๊โมฉื่อแร๊ ลู นี๋.) g 11คูเหย่ซู่ เด๊อ อู เอ๊ อา เร๊อ คูยุสทัส เออเตเพร ซูแลเกอ อา เตเฮ๊โมเฮ๊แร๊ เด๊อ ซี โอ่โอ่. แกแยยิวพู๊ เด๊อ อา หยื่อเอ่ ครี๊ เต๊เห่ อาเกลเนอ, เพร เด๊อ อา เมโหร่ เกอ เต เร๊อ แว เด๊อ จอแปแหร่ อาเทออาเก่ อาเงเนอ หม่า อา โอ่แพ๊ ซิโซโซ๋ แพ๊. เหย่ซี หม่า อา เมโม แหน่เจ๊อ แว ซิปล่อ. 12คูเอปาฟรัส หม่า ซี ดอกูพู๊ เตเพรเพร. อา หม่า อา ทวา ครี๊ อาหลู่ เตเพร. อา เฮ๊โมเฮ๊แร๊ แฮหนิ ซี. อา ซิปล่อฉว่า เร๊อ อา กุยจ๊อเบ โตโมโตโม เป่ เจ๊อ เด๊อ ซีเง เจ๊อ. แซ่ฮู๊ ซี เก่ โอ่หม่าโอ่กลอ เด๊อ ซี เตหยื่อเตแหน่ อากู เร๊อ ซี เก่ ดุแถ่เบ๊ แลแค เด๊อ แหย่โย ตากยา, โท๊โต่ แซ่ฮู๊ ซี เก่ หยื่อเอ่ ซิเงแฮ ตาเตโป่ จอแปแหร่ อา เตซิหยื่อ ปว๋า เต๊อเจ่อ อาเงเนอเรอ, อา กุยจ๊อเบ เป่ เด๊อ ซีเง. h 13แวข่าเฮ๊โล เด๊อ อาเง เร๊อ อา หม่า แกแย เตเพร เด๊อ อา แอ๊จื๊อ แหน่เจ๊อ เด๊อ ซีเง เน๊อ วีเลาดีเซียพู๊ เต๊เห่ อาเง เน๊อ วีฮีเอราบุรี เต๊เห่ อาเง เจ๊อ. 14เตขุซ๊าร๊า คูลูกา เด๊อ เป โม หนิเกอเร๊อ อา เออเตเพร เน๊อ คูเดมาส เออ, ซูแล หนิเกอดื่อ อา เตเฮ๊โมเฮ๊แร๊ เด๊อ ซี โอ่โอ๋. i 15แด่ทูซิปล่อ เร๊อ ซู จว๊าเป่ เป เตเฮ๊โมเฮ๊แร๊ เออเนอ เด๊อ เป โป่แหว่ วีเลาดีเซีย เต๊เห่ เร๊อ เป โป่แหว่ เหมาะนุมฟา เร๊อ เพรหยื่อเอ่เออ ตู๊หมู่ตอกล๊อ โอ่เด๊อ ลูหี่กู เนอเต๊เห่ นี๋. 16ช๋า ซี โคโลสี เพรหยื่อเอ่เออ ตู๊หมู่ตอกล๊อ เต๊เห่ แด๊โทเฮ๊อ เปลีเออ ปาเนอเรอ, เด๊อะแด๊ เป่เกอ เพรหยื่อเอ่เออ ตู๊หมู่ตอกล๊อ เนอเต๊เห่ ปา นี๋. โทเรอ แด๊เกอ แลแค แวลี เด๊อ แว ซูแล เป่ เหย่ซี เออเนอ ปา นี๋. 17แด๊โฉ่ เป่เกอ คูอารคิปปัส เน๊อ, “เตเอ่เตแร เด๊อ แบ่เจ่ เด๊อะแล เฮ๊อ เน เออเนอ, เมโทแก อา,” เฮ๊ อา ฮู๊เนอ นี๋. j 18แว หม่า คูเปาโล เร๊อ เตเฮ๊โมเฮ๊แร๊ เออเนอหมา, แว ราจว๊าเป่ ซี เน๊อ แว กู๊ขุ เร๊อดื่อ แพ๊. แว ย๋อ โอ่ เด๊อ ทอกูเออ อาขว่าอาคยา, โชตาปา แต่ แว แต่เหม่ นี๋. จอแปแหร่ อาบุ๊ยอาเตอเรอ เก่ โอ่เกอ ดื่อ เร๊อ ซี นี๋.
Copyright information for
EkySCThai