Ephesians 4

เตทวาแถ่ เตอเจ๋อโต เฮ๊อ ลู เด๊อ ครี๊ อากู

1ฮู๊เนอ อาขว่าอาคยา, แว กุยซิยอหนิเกอ ซี แซ่เน๊อ อู ด๊อตา แกแย เด๊อ ทอกู เด๊อ แบ่เจ่ อาเง เตเพรเนอ. จอแปแหร่ เอ๊เฮ๊อ ซี เด๊อ ซี เก่ ทวาแถ่ เพรหยื่อเอ่ เออ เต๊เห่ อาขว่าอาคยา, แว กุยซิยอ ซี เร๊อ ซี เก่ โอ่เซอเพร แด่แร๊เกอ ซี ซิปล่อ ฮู๊ เพรหยื่อเอ่ เออ เต๊เห่ โตเบ่ โอ่เซอเพร เนอ. 2เด๊อ ซี แรเต ล๋อ ปลี อาเกลเนอ, ซี โตเบ่ ทวา แลแค แกแย เด๊อ อา แด่หยว่า อาซิปล่อ เร๊อ อา ซิโดซิงา เต๊เห่. โทเรอ แด่ทูซิปล่อ หนิเกอเร๊อ แลแค ลู เตเพร เร๊อ เตเพร เด๊อ เตโม เกอเร๊อลู อากู เนอ นี๋. ^a 3แหย่โยบูโพ๊แบ่เจ่ เมปล๊อเมจือ เฮ๊อ ซี เฮ๊อ. แซ่ฮู๊ ซี เก่ โอ่ปล๊อโอ่จือ ตื๊อดื่อ เต่อลู อาเงเนอ, แอ๊จื๊อ โอ่เซอเพร แลแค เด๊อ อาเพรอาดือ อากู นี๋. 4เป เออเต๊เห่ หม่า เปเหน่กล่อ โอ่จือเต่อลู เตเพรเพร่ว แพ๊. เป พย๊าหนิ จือโหร่ลู แหย่โยบูโพ๊แบ่เจ่ เตเพรเพร่ว แพ๊. ฮู๊เนอเฮ๊อ, เบ๊อะจอแปแหร่ เอ๊ เป เบ๊อะเนอ, อา อ๊อแล เร๊อ อา เก่ เด๊อะเนอ เป เตแร๊ เออ เด๊อคยา ปา. ฮู๊เนอเรอ เป ล๋อ ปลี แม๊ชือ โหร่ลอ ลู อาเตเออ เตอเจ๋อ แพ๊. 5เป แบ่เจ่ จือ ลู เตเพรเพร่ว แพ๊, เป่ เตหยื่อเตแหน่ หม่า เตอเจอเจ๋อ แพ๊ ลู, โท๊โต่ เป เจ โหร่ลู เทอ เตอเจอเจ๋อ แพ๊. 6เป จอแปแหร่ จือ ลู เตเพรเพร่ว แพ๊. อา หม่า เป ล๋อ ปลี อาเพ จือลู แพ๊. อา เป๊อ แซ่ ลอปลี เป, เร๊อ อา เม แฮเง เต เด๊อ เป ล๋อ ปลี อากู. อา โอ่เกอ เด๊อ เป ล๋อ ปลี อากู.

7หม่าแน๊เรอ ครี๊ เด๊อะตา โค๊ลู เป เตแจ่เตลีแม เตเพร เร๊อ เตเพร เด๊อ เป เก่ เมโค๊ลู อา เตเอ่เตแร เต๊เห่. ครี๊เบตา เป่เป เตแจ่เตลีแม เออเนอ, อา ซิโล หนิเกอเร๊อ โต่. 8ลีเทส่อพ๊า ราหนื่ออื่อ เนอหม่า อา เฮ๊ ฮู๊เออ เฮ๊อ. เร๊อ อา เฮ๊ เนอ,
“เบ๊อะอา กา กี๊แถ่เฮ๊อ เด๊อ เหล่โอ่แถ่โล เบ๊อะเนอ, อา ปื่อจว๊าหนิ เพรซิเถ่ อา เด๊อ อา แลจู่แก ลูเหล่ เนอเต๊เห่. เร๊อ อา เด๊อะเฮ๊อ อาแกแย เต๊เห่ เชหยู่ เฮ๊อ.” ^b

9“อา กา กี๊แถ่,” อาโหง่แลช๊า หม่า อิเต? “อา กา กี๊แถ่,” อาโหง่แลช๊า หม่า อา ซิ เฮ๊ เร๊อ ครี๊ แฮแล โทเฮ๊อ เด๊อ เห่ขุเล เด๊อ อา แยเล๊อ อู เออเนอ เตเพร เฮ๊อ. 10แกแย เด๊อ อา แฮแล โทเฮ๊อ เด๊อ เห่ขุ เออเตเพรเนอ, เตเพรเพร่ว แพ๊ ลู เร๊อ อา กา กี๊แถ่ เด๊อ เหล่โอ่แถ่โล เล๊อ เร๊อ ม๊อขุ เต๊เห่ เนอเตเพร เฮ๊อ. เด๊อ ม๊อขุ เบ่เบ่, เด๊อ ม๊อเล เบ่เบ่, เด๊อ เห่ขุ เหล่โอ่ เบ๊อะโต๊โผ่ เบ่เบ่, แซ่ฮู๊ อา เก่ โอ่ลอ เหล่โอ่ ปว๋า โต๊โผ่เนอ เรอ, อา กา กี๊แถ่ เด๊อ ม๊อขุ แพ๊. 11แซ่ฮู๊ อู เก่ ทวา เพรโดแนพู๊ เต๊เห่, อู เก่ ทวา เพรโพร เต๊เห่, อู เก่ ทวา เพรโด่แน เตซิครือมีลา เต๊เห่, อู เก่ ทวา เพรหยื่อเอ่ตู๊หมู่ตอกล๊อ ซ๊าร๊า เต๊เห่, อู เก่ ทวา เพรอิซว๊า ลีเทส่อพ๊า อาซ๊าร๊า เต๊เห่เนอเรอ, เพร เด๊อ อา เด๊อะตา อู เตแจ่เตลีแม เด๊อ อา โค๊คยาดื่อ ลู เต๊เห่ เออเตเพร เนอหม่า หม่าเฮ๊อ ครี๊ เฮ๊อ. 12แซ่ฮู๊ จอแปแหร่ อาแกแย เต๊เห่ เก่ โอ่ ตี๊หรี่แตแร อาเหน่ เร๊อ อา เก่ เม เป่ ลู เตเม อาเง, โท๊โต่ แซ่ฮู๊ อา เก่ เด๊อะฉว่าเด๊อะชอแถ่ เพรหยื่อเอ่อา ตู๊หมู่ตอกล๊อ เด๊อ อา หม่า ครี๊ อาเหน่กล่อเออ อาเงเนอเรอ, อา เด๊อะตา ดื่อเฮ๊อ ฮู๊เนอเฮ๊อ. 13เร๊อ ครี๊ อาเหน่กล่อเออ อา เก่ ฉว่าแถ่ชอแถ่ โต่เด๊อ เป ล๋อ ปลี เก่ โอ่ลู เร๊อ เตหยื่อ เตอเจ๋อโต เร๊อ เตซิเงแฮ จอแปแหร่ อาพู๊คู เตอเจ๋อ โต ปา. โท๊โต่ เป เก่ ทวาแถ่ เพรหยื่อเอ่ เออ เด๊อ อา ดุเผร่ ตาเต เต๊เห่ ปา. เตดุเผร่ ตาเต เออเนอหมา หม่าเฮ๊อ เป ทวาแถ่เฮ๊อ แกแย เด๊อ อา เล๊อบา แซ่เน๊อ ครี๊ เด๊อ อาเล๊ออาบา เออเตเพร เนอเฮ๊อ.

14ฮู๊เนอเรอ เป่ หม่า อาแซ่เน๊อ เป๊เจ่ฮู๊ เด๊อ อา อินู๊ปา เนอเต๊เห่ หม่าปาโต่ เฮ๊อ. แกแยกะ เด๊อ อา อิซว๊าแลโฮ เต เต๊เห่เนอ, อา อี๊หล่าแลโฮ แจ่ ปา เป โต่, เร๊อ เป หยื่อเอ่ซื๊อ แจ่เกอ ปา เหย่ซี อาเตอิซว๊าอี๊แส่ โต่ เฮ๊อ. เป แซ่ปา เร๊อ ส่อเกลอ เด๊อ เก่แลเซ๊ดุ เร๊อ อา พอ ก๊อกลี๊ อา เต๊เบ่เนอ หม่า ปาโต่เฮ๊อ. 15หม่าแน๊เรอ, เป โต เฮ๊เบ่แหน่ เด๊อ อาจ๊ออาเต เร๊อ เตโม เออเต๊เห่. โทเรอ เด๊อ เป เม เตปว๋า เต๊อเจ่อ อากูเนอ, เป เบ่ ทวาแถ่ แซ่เกอดื่อ เร๊อ เป แบ่เจ่ ครี๊ เด๊อ อา ทวา เป่ กู่กล๊อ เออเนอ เตเพร เฮ๊อ. 16ครี๊ ปื่อหม่า โอ่ปล๊อจือ เต่อลอ อาแกแย ซีเต๊เห่ เด๊อ อาแซ่เน๊อ แกแย หรุ่ยถว่า เร๊อ อาครุ๊ยอาคร๊วา เด๊อ จิจือหมะ จิจือ หนิเต่อ ลอ เหน่กล่อ ครือขรว่า เด๊อ อา โค๊ลู เออเนอเต๊เห่ เฮ๊อ. เก่ เหน่กล่อ ครือขรว่า เต๊อเจ่อ เร๊อ เต๊อเจ่อ เก่ เมดื่อ อาเตเม เด๊อ อา โต เม เต๊เห่ เฮ๊เนอหม่า, เหน่กล่อ ชีเพรลอ เก่ ดุแถ่ เร๊อ ชอแถ่ เร๊อ ชอแถ่ ปา. เพรหยื่อเอ่ตู๊หมู่ตอกล๊อ เนอหม่า อา แซ่ ฮู๊เนอ เฮ๊อเฮ๊อ. เพรหยื่อเอ่ เออ ตู๊หมู่ตอกล๊อ เด๊อ อาเตเม โค๊ลู เออเต๊เห่เนอ, อา เก่ โม เกอเร๊อลู เตเพร เร๊อ เตเพร เร๊อ อา เก่ เม หนิเกอเร๊อดื่อ เตเพร เร๊อ เตเพร อาเตเม เฮ๊เนอหม่า, เพรหยื่อเอ่ตู๊หมู่ตอกล๊อ เออ เก่ ดุแถ่ เล๊อบา แฮเง ดื่อ เร๊อ ครี๊ อา เตโพรเตเตอเรอ อาคยา ปา. ^c

เตโอ่เซอเพร อาเซ เด๊อ ครี๊ อากู

17ฮู๊เนอเรอ, เด๊อ ครี๊ อามุย อากู เร๊อ แว เบ่ เฮ๊ชอชอ แหน่ ซี เร๊อ โอ่เซอเพร แลแค แต่ ฮู๊ แกแย เด๊อ อา ซิเง จอแปแหร่ โต่ เนอเต๊เห่ โอ่เซอเพร เนอ แต่เหม่. เหย่ซี อาเหล่เตเน เต๊เห่ เนอหม่า อาบุ๊ยอาเตอเรอ โอ่ เตอเจ๋อ โต่. 18เหย่ซี เนอเต๊เห่ หม่า อา ซิเงโปล เบ๊ เกออู เตหมะเตจ๊อ โต่. เด๊อ เหย่ซี กู่กล๊อเพรอ อาขว่าอาคยา, อา ซิเง เกอ แลแค อู จอแปแหร่ อาแกล๊อาโกล โต่, เด๊อ เหย่ซี ซิเงเกอ แลแค อู จอแปแหร่ อาแกล๊อาโกล โต่ อาขว่าอาคยาเร๊อ, เหย่ซี พย๊าหนิ เกออู ซิปล่อเซอเพร อาเซ เด๊อ จอแปแหร่ เด๊อ เออเนอ โต่. 19เบ๊อะเหย่ซี เมซื๊อ เจ๊อ เต เบ๊อะเนอ, อา เตเน ซิเตเร หนิเกอเร๊อ เกอปา เจ๊อ อาเหน่ โต่. เหย่ซี ลือเม ฮู๊ อาเหน่กล่อ พ๊าหย่า อา เตซิหยื่อซิลอ กุย เหย่ซีเนอ, เหย่ซี เด๊อะแลแก อาเหน่กล่อ เด๊อ สุ่ยเทอพ๊าหย่า อา เตซิหยื่อ มู๊แหม่ ปาต๊าเปอเตอ เด๊อ อา เก่ เมลอ ล๋อ เหย่ซี ซิปล่อ อา เหล่เตเน มู๊แหม่รีแจ่ เนอเต๊เห่ เจ๊อ. เร๊อ อา ซิหยื่อ เม เป่แฮ ตื๊อดื่อโป่ แลแค เจ๊อ.

20ซี เรอ, เบ๊อะซี ซิเงแฮ เฮ๊อ ครี๊ เบ๊อะเนอ, อู อิซว๊าน๊อ ซี เร๊อ ซี เก่ โอ่เซอเพร เมฮู๊เนอ เตเพร่ว โต่. 21ซี เด๊อ อา ทวาแถ่ เตอเจ๋อโต เร๊อ ครี๊ เฮ๊อ เต๊เห่เนอ, แว หยื่อเอ่ เร๊อ ซี หนิโฮ ตาเต โทเฮ๊อ ครี๊ อาหรี่อาแก เฮ๊อ. โทเรอ อู อิซว๊า โท เป่เฮ๊อ ซี เตอิซว๊า เด๊อ อาจ๊ออาเต เด๊อ เหย่ซู่ อิซว๊า โทเฮ๊อ เนอเต๊เห่ เฮ๊อ. 22อู อิซว๊าเฮ๊อ ซี เร๊อ ซี โตเบ่ โปล๊ตาแก ซี เตโอ่เซอเพร อาเลออาหลว่า เต๊เห่. เบ๊อะซี โอ่เซอเพร เด๊อ เตโอ่เซอเพร อาเลออาหลว่า กูเออ เบ๊อะเนอ, ซี ซิปล่อ อา เตซิหยื่อ มู๊แหม่ เต๊เห่เนอ อา อี๊หล่าปย๊าอี๊หล่าแก ซี เร๊อ อา เม มู๊แหม่รีแจ่ ลอ ซี ซิปล่อ. ^d 23อู อิซว๊า โทเฮ๊อ ซีเน๊อ นอ แหย่โย บูโพ๊แบ่เจ่ เมเซแถ่ เต๊เปล่ ซี ซิปล่อ อาเตเตเน เนอเต๊เห่. 24เร๊อ อากืออาแซ๊ แลแค เตโอ่เซอเพร อาเซ ฮู๊ จอแปแหร่ แบ๊ตา แซ่เกอโทเฮ๊อ ซี เร๊อ อาเหน่กล่อ. ^e เด๊อ อาจ๊ออาเต หม่าแหน่ เร๊อ เต บูโพ๊ หม่าแหน่ อากู เนอเต๊เห่ นี๋. ^f

25ฮู๊เนอเรอ แลโฮ ปา แต่ อู เตเพร่ว แต่เหม่ นี๋. เฮ๊เบ่จ๊อเฮ๊เบ่เต แลแค อู ปว๋า เตเพร นี๋, เมเตเฮ๊เรอ เป หม่า อาแซ่เน๊อ เหน่กล่อ เตเพรเพร่ว แพ๊ ลู, หม่าแน๊เรอ อาครืออาขรว่า โค๊ลู ฮู๊เนอแพ๊. ^g 26ซี เก่ ซิปล่อดุ เร๊อ เมซื๊อ เต แต่เหม่ นี๋. เหมาะตา แต่ล๋ายโต่ เนอ, ซี เบ่ ซิปล่อ ชุ๊ยเหล่ คยาแซ๊ นี๋. ^h 27แซ่ฮู๊ โลเน๊มู๊แหม่ กู่กล๊อ เก่ จุ่ยโนหนิ ซี เด๊อ เตซื๊อ อากู แต่เหม่เนอ, ปลวาโมเป่ แต่ อาแกล๊ แต่เหม่ นี๋. ฮู๊เนอเรอ ซิปล่อดุ ตื๊อดื่อ แต่ แลแค แต่เหม่. 28แกแย เด๊อ อา เซอเพร เอ่โห่ เตเพรเนอ, เอ่โห่ เป่แฮ ปา แต่เหม่ นี๋. แซ่ฮู๊ อา เก่ เด๊อะเอ่เด๊อะโอ เบ๊เป่เกอ แกแย โซพ๊าโซแรพู๊ เต๊เห่เนอ, อา เบ่ เอ่ครือแรครือ หนิเกอดื่อ เตแร เด๊อ อา จ๊อจื้อ เต๊เห่.

29โหง่ เด๊อ อา ทวาบุ๊ยทวาเตอเรอ เด๊อ อูเง โต่ เนอ, นอเถ่เปล๊ แต่ เด๊อ ซี แกกู ตือมื๋อ แต่เหม่ นี๋. แซ่ฮู๊ อา เก่ หนิอ๊าหนิเหร่ เป่ แกแย เด๊อ อา หนิโฮ เต เต๊เห่ อาเงเนอ, เฮ๊เบ่ แลแค แพ๊ โหง่ เด๊อ อา ทวาบุ๊ยทวาเตอเรอ เร๊อ อา เก่ เมจว่า อู เตดุแถ่ทูแถ่ เนอเต๊เห่ แพ๊ นี๋. เฮ๊เบ่แพ๊ แลแค โหง่ เด๊อ อา หนิบุ๊ยหนิเตอเรอ เด๊อ อูเง เนอเต๊เห่ แพ๊ นี๋. 30เมซิเปล แต่ จอแปแหร่ อา แหย่โยบูโพ๊ แต่เหม่. จอแปแหร่ เด๊อ ซี แหย่โยบูโพ๊แบ่เจ่ เออเนอหมา, อา แซ่เฮ๊อ เร๊อ เมม๊าเมแด เต๊อเจ่อ เด๊อ ซี หม่า จอแปแหร่ อาเต เฮ๊อ. แหย่โยบูโพ๊แบ่เจ่ เออเนอ, อา เก่ โอ่เต่อ เร๊อ ซี โต่เด๊อ จอแปแหร่ แฮ เมแลเปล๊กา ซี ปา เนอเตอเนอ ปา. 31วี๊แก แก เตซิปล่อเช, เตซิปล่อดุ, เตกย๊า เอ๊โทเอ๊โม ลู, เตแด๊เหมอะเทอโย, เตซิค๊า มู๊แหม่รีแจ่ อู ปว๊าเต๊อเจอะ เออเต๊เห่ นี๋. 32เมโมเมแร๊ หนิเกอเร๊อ ลู เร๊อ ซิยอ หนิเกอเร๊อ ลู เตเพร เร๊อ เตเพร นี๋. เด๊อ ครี๊ อาขว่าอาคยาเร๊อ, จอแปแหร่ ปลวาแก เฮ๊อ ซี เตซื๊อ อาขว่าอาคยา, ปลวาแก หนิเกอเร๊อ เกอ ลู เตซื๊อ เตเพร เร๊อ เตเพร ฮู๊เนอ นี๋. ⁱ