Ephesians 6

พู๊ เร๊อ โหมะเพ เต๊เห่

1พู๊เลอซี, ซี ทวาแถ่เฮ๊อ เตเตอเจ๋อโต เร๊อ แบ่เจ่ เฮ๊อ อาขว่าอาคยา, หนิดา แลแค ซีโหมะซีเพ อาโหง่ นี๋, เมเตเฮ๊เรอ หนิดา โหมะเพโหง่ หม่า เต เด๊อ อาโตอาเบ่. ^a 2“เบ่หยื่อเบ่แหน่ แลแค ซีโหมะ เร๊อ ซีเพ นี๋.” ^b โหง่เฮ๊แก เออเนอหมา จอแปแหร่ เฮ๊แก เหร่อเล๊อ อาโหง่ ตือมือ เด๊อ อา โอ่เต่อเกอดื่อ เร๊อ อา เตอ๊อแล เฮ๊อ. 3อา เตอ๊อแล เออเนอหม่า แคร๋ อิเต เฮ๊เรอ, ซี เก่ เบ่หยื่อเบ่แหน่ ซีโหมะซีเพ เฮ๊เนอ, ซี เก่ พย๊าหนิ เตเด๊อะบุ๊ยเด๊อะเตอเรอ ปา. โท๊โต่ ซี เก่ โอ่เซอเพร ม๊อเนอม๊อเซ หน่าทู เด๊อ เห่ขุเออ ปา. ^c

4เพซี๋, เมซิปล่อดุ แต่ ซีพู๊ แต่เหม่ นี๋. โบ่เอ่โบ่โอ อิซว๊าอี๊แส่ ดุแถ่เผระแถ่ เร๊อเกอดื่อ เหย่ซี เร๊อ แบ่เจ่ จอแปแหร่ อาลาอาโหง่ เนอ. โท๊โต่ ยูแกล๊ยูโกลเร๊อ เหย่ซี เน๊อ แบ่เจ่ จอแปแหร่ ซิหยื่อ นอเม เป เนอเต๊เห่ นี๋. ^d

หลู่เล๊ เร๊อ อาแบ่เจ่

5หลู่ ซี๋, หนิดา แลแค ซี เห่ขุ แบ่เจ่ เออเต๊เห่ อาโหง่ นี๋. ชิอิเช เหย่ซี เร๊อ เบ่เบ่หยื่อเบ่แหน่ เหย่ซี นี๋. ฮู๋ ซี หนิดา ครี๊ อาโหง่ เนอ, หนิดา ซิกอล๊อแกแน เหย่ซี อาโหง่ นี๋. ^e 6แซ่ฮู๊ อา เก่ ถู่เซ๊หนิ ซี เร๊อ ซี หนิดา แพ๊ เหย่ซีโหง่ ตื๊อแพ๊ เบ๊อะอา โอ่ป่อแม๊ ซี เบ๊อะเนอ แต่เหม่ นี๋. เมเตเฮ๊เรอ ซี หม่า ครี๊ อาหลู่ เต๊เห่ อาขว่าอาคยา, เม ลอซิปล่อ เชเม เป่ เหย่ซี ฮู๊ จอแปแหร่ ซิหยื่อ นอเม ซี เนอ นี๋. 7เม ฉาเผร่แหน่เจ๊อ เป่ เหย่ซี แซ่เน๊อ ซี เม เป่ ม๊อขุ แบ่เจ่ อาเตเม เนอ นี๋, จว๊า เตเน แต่ เร๊อ ซี เม เป่ เห่ขุ แบ่เจ่ อาเตเม เต๊เห่เนอ แต่เหม่ นี๋. 8เมเตเฮ๊เรอ ซี ซิเงเฮ๊อ เน๊อ, แกแย ทวาหลู่ เต๊เห่ เบ่เบ่, แกแย โอ่ปาลา เต๊เห่ เบ่เบ่, เก่ อา เม เตแร๊ เฮ๊เรอ จอแปแหร่ เก่ เด๊อ อา เตเมหนิคว๊าเก่ ปา.

9ฮู๊เนอเฮ๊อ, หลู่ แบ่เจ่ ซี๋, เมแร๊เกอ แลแค ซีหลู่ เต๊เห่ ฮู๊เนอ นี๋. เฮ๊ ต๊อหร่อเซ๊ ซิอิเช แต่ เหย่ซี แต่เหม่ นี๋. ซี เบ่เบ่, เหย่ซี เบ่เบ่, ซี แบ่เจ่ โอ่จือ แพ๊ ลู เตเพรเพร่ว แพ๊ เด๊อ ม๊อขุ แพ๊เนอ, ซิเงดื่อ แลแค นี๋. ^f ซีแบ่เจ่ เด๊อ ม๊อขุ เออเนอหมา, อา แม๊ดุ แม๊ปีตี๊ โต่. ^g

คูเปาโล เฮ๊โฉ่เป่ เพรหยื่อเอ่ เออ เต๊เห่ เด๊อ อา เก่ เบ่ ช๊าฉื่อ โลเน๊มู๊แหม่รีแจ่ กู่กล๊อ ฮู๊เต

10เด๊อคยา ตื๊อดื่อเนอ, แว ซิหยื่อ เฮ๊ ซี ฮู๊เออ, แซ่ฮู๊ ซี เก่ฉว่าเก่ชอแถ่ เนอ, พย๊า แลแค แบ่เจ่ อา เตโพรเตเตอเรอ ฉว่าชอ เออเต๊เห่ นี๋. อา เตโพรเตเตอเรอ ฉว่าชอ เออเต๊เห่ เนอหม่า อาฉว่าอาชอ แหน่เจ๊อ. 11แซ่เน๊อ เกลอฮู๊ เต๊เห่ กือแซ๊แถ่ อา โจ๊โกโจ๊เบเนอ, กือแซ๊แถ่ ลอ แลแค โจ๊โกโจ๊เบ เด๊อ จอแปแหร่ เด๊อ ซี เออเนอ นี๋. แซ่ฮู๊ ซี เก่ เมตาตือ ฉื่อเบ๊ดื่อ โลเน๊มู๊แหม่รีแจ่ กู่กล๊อ อา อิลออี๊โหล่ แลโฮ เต๊เห่เนอ, กือแซ๊แถ่ แลแค ฮู๊เนอ นี๋. 12เมเตเฮ๊เรอ, เป ช๊าฉื่อ เร๊อ แกแย เด๊อ อาโอ่ เร๊อ อาพ๊าอาหย่า อาสุ่ยอาเทอ เต๊เห่เนอ หม่าโต่. เป ช๊าฉื่อ เร๊อ โลเน๊โลหน่า เด๊อ อา เป๊อเต เต๊เห่, เร๊อ โลเน๊ เด๊อ อาโอ่ เร๊อ อา เตอเรอฉว่าชอ เต๊เห่ เร๊อ โลเน๊ ฉว่าชอ เด๊อ อา เป๊อ เห่ขุ อา คี๊เล เนอเต๊เห่, เร๊อ โลเน๊ มู๊แหม่ เด๊อ อา โอ่ เด๊อ ม๊อเล เนอเต๊เห่. 13ฮู๊เนอเรอ, ช๋า เตแป่เตเช อาม๊อเนอ แฮโต่เฮ๊อ ปา เบ๊อะเนอ, แซ่ฮู๊ ซี เก่ ก๊อถ่อ แตแน ฉื่อแร๊ เกออู, โท๊โต่ ช๋า ซี ช๊าปลื๊อช๊าโทเฮ๊อ ปาเนอ, ซี เก่ โปล๊แก แต่เหม่เนอ เร๊อ กือแซ๊แถ่ ลอ แลแค จอแปแหร่ อา โจ๊โกโจ๊เบ เออเนอ เต๊เห่. 14ฮู๊เนอ อาขว่าอาคยา, ก๊อถ่อ แตแน ฉื่อแร๊ แลแค ซีเหน่. แหร่แถ่หม่า จอแปแหร่ อา เตหมะเตจ๊อ เออ เด๊อ อาแซ่เน๊อ ซี แหร่แถ่หม่าเฮ๊อท๊อ เด๊อ ซี แหง่ตา อากูเนอ นี๋. ^h กือแซ๊แถ่ อาจ๊ออาเต เออ ฮู๊ ซี กือแซ๊แถ่ จาต่อเท๊ เด๊อ อา เก่ เตเกบี๊เกอเร๊อ ซีเหน่ เออเนอ นี๋. ⁱ 15แซ่เน๊อ เกลอฮู๊ ตี๊หรี่แตแร แด๊แถ่ หนื่ออื่อ แลแค อา แข่แด๊พ๊า โตโปล๊ เด๊อ อา เก่ เถ่จว๊า อาเงเนอ, ตี๊หรี่แตแร หนื่ออื่อ แลแค ซีเหน่ เร๊อ เตซิครือมีลา เด๊อ อา เด๊อะ ซี เตโส่เตเคร เตเพรเตดือ เออเนอ นี๋. ^j 16โท๊โต่, อาแซ่เน๊อ ซี ปื่อหม่าปื่อกลอ เร๊อ เหล่โด่แด ตาตือฉื่อ เออเนอ, ตูรู๊ ปื่อหม่าปื่อกลอ หนิ แร๊ แลแค ซี เตหยื่อเตแหน่ เด๊อ อา เก่ เมปี ฉื่อแก โลเน๊ อาเปล่ หมิอือ เด๊อ อา เค๊ แฮโต ซี เนอเต๊เห่ นี๋. 17ซิเง ตาเต แลแค เตเมแลเปล๊กา อาหรี่อาแก เด๊อ จอแปแหร่ เม เป่ โทเฮ๊อ ซี เด๊อ อาแซ่เน๊อ ซี โก่แถ่ กู๊โก่ต่อเท๊ เด๊อ อา เก่ เตเก ตาตือฉื่อ เป่ ซี เออเนอ. โท๊โต่ ปื่อหม่า แหย่โยบูโพ๊แบ่เจ่ อาเน๊ เด๊อ อา หม่าดื่อ จอแปแหร่ อาลาอาโหง่ เออเนอ นี๋. ^k 18กุยจ๊อเบ จอแปแหร่ เร๊อ กุยซิยอ หนิ ลู เด๊อ อา เก่ เมจว่า ซี เตปว๋า เต๊อเจ่อ นี๋. กุยจ๊อเบ แลแค ฮู๊ แหย่โยบูโพ๊แบ่เจ่ ยูแกล๊ยูโกล ซี เนอ ปว๋า โตโพ๊ นี๋. เร๊อ เบ๊อะซี กุยจ๊อเบ ฮู๊เนอ อาเค, โอ่ส่าเซ เร๊อ รอหนิ แลแค ซีเหน่ นี๋. กุยจ๊อเบ หนิเป่ลอ ล๋อ จอแปแหร่ อาแกแย เนอเต๊เห่ ปว๋า โตโพ๊ นี๋.

19แซ่ฮู๊ จอแปแหร่ เก่ นอเฮ๊เบ่ แว โหง่ เด๊อ อา โตเบ่ เฮ๊เบ่ เนอเต๊เห่ อาเงเนอเรอ, เบ๊อะแว เตเร เป๊อแถ่ เฮ๊ เป่ อู เนอ, กุยจ๊อเบ หนิเป่เกอ เด๊อ แวเง นี๋. โท๊โต่ แซ่ฮู๊ แว เก่ แด๊โฉ่โด่แน ฮาฮา เป่เกออู เร๊อ จอแปแหร่ อา เตซิครือมีลา เด๊อ อา โอ่โอ๊โอ่บี๊ งย๋า ลาเฮ๊อเออ อาเงเนอ, กุยจ๊อเบ หนิเป่ เกอโป่ เด๊อ แวเง นี๋. 20เด๊อ ครี๊ นว๊าเถ่ เฮ๊อ แว เร๊อ อา เพรเฮ๊โฉ่ เตหรี่เตแก เตเพร เด๊อ แว เก่ แด๊โฉ่โด่แน เป่ อู เร๊อ เตซิครือมีลา เออ อาขว่าอาคยา, กู๊แหน่เออ แว ตาเฮ๊อ เด๊อ ทอกู เฮ๊อ. เต เด๊อ แว โตเบ่ โด่แน เป่ อู เต๊เห่เนอ, แซ่ฮู๊ แว เก่ โด่แน ฮาฮา เป่ อู อาเงเนอเนอ, กุยจ๊อเบ เป่ เกอ เด๊อ แวเง นี๋.

คูเปาโล อา เตเฮ๊โมเฮ๊แร๊ เด๊อ คยา ตื๊อดื่อ

21คูทีคิกัส หม่า เป โป่แหว่ เด๊อ เป โม เกอเร๊อ แหน่เจ๊อ ลู เตเพร, โท๊โต่ อา หม่า โป่แหว่ เตเพร, โท๊โต่ อา หม่า แบ่เจ่ อาหลู่เล๊ เด๊อ อาจ๊อ เตเพร. แซ่ฮู๊ ซี เก่ ซิเง เร๊อ แว โอ่โมโอ่แร๊ แอ, หม่า โต่ แอ, โท๊โต่ แว เมแคร๋ อิเตเตเนอ, อา เก่ แฮ แด๊โฉ่โล เป่ลอ ซี ปา. ^l 22เตหรี่เตแก อา แก่ช๊าแก่แร เด๊อ แว ซิหยื่อ ซูแฮ อา เด๊อ ซีโอ่ เนอหม่า หม่าเฮ๊อ, แซ่ฮู๊ ซี เก่ ซิเง เร๊อ เป โอ่โมโอ่แร๊ แอ, หม่า โต่ แอ, โท๊โต่ แซ่ฮู๊ อา เก่ แฮ เด๊อะฉว่าเด๊อะชอแถ่ เป่ ซี ซิปล่อ อาเง แพ๊.

23เพ จอแปแหร่ เร๊อ เป แบ่เจ่ เหย่ซู่ครี๊ เก่ เด๊อะดื่อ โป่แหว่ ครี๊พู๊ เต๊เห่ เร๊อ อาเพรอาดือ, เตโมหนิเกอ ลู เตเพร เร๊อ เตเพร, เร๊อ เตหยื่อเอ่ ครี๊ เออเต๊เห่ นี๋. 24จอแปแหร่ เก่ เด๊อะโล เป่ดื่อ อาบุ๊ยอาเตอเรอ เร๊อ แกแย เด๊อ อา โม แบ่เจ่ เหย่ซู่ครี๊ เนอเต๊เห่ เร๊อ อาเตโม เด๊อ อาตื๊อดื่อ แจ่โต่ เออเนอ นี๋.