Gal 2 | EkySCThai | STEP | เด๊อ คยา เช๊อลุยหน่า โทเนอ แว เร๊อ คูบารนาบัส กาคยา คยาแซ๊ เด๊อ วีเยรูซาเล็ม เร๊อ แว เอ๊กาหนิ เต่อเกอโป่ เร๊อ คูติตัส.

Galatians 2

คูเปาโล เร๊อ เพรโด่แน เด๊อ อาโร เต๊เห่

1 เด๊อ คยา เช๊อลุยหน่า โทเนอ แว เร๊อ คูบารนาบัส กาคยา คยาแซ๊ เด๊อ วีเยรูซาเล็ม เร๊อ แว เอ๊กาหนิ เต่อเกอโป่ เร๊อ คูติตัส. ^a 2 จอแปแหร่ เด๊อะโลแถ่ แว เนอ แว โตเบ่ จว๊า เบ๊อะเนอ อาขว่าอาคยาเร๊อ, แว จว๊า แพ๊. เบ๊อะแว โอ่ เบ๊อะเนอ อาเค, แว แม๊เถอะโห่หนิ เร๊อ แกแย เด๊อ อู แด่ เหย่ซี เร๊อ เพรหยื่อเอ่ตู๊หมู่ตอกล๊อ ทวาดุทวาเต เต๊เห่ เร๊อ แว เฮ๊โฉ่โปลหนิ เป่ เหย่ซี เร๊อ เตซิครือมีลา ฮู๊ แว แด๊โฉ่โด่แน เป่ อู ปว๋า โพ๊ เด๊อ แกแยยิวพู๊ หม่าโต่ เต๊เห่ อาเกล เนอแพ๊. แว เตเฮ๊โฉ่โด่แน เด๊อ อา ตาลว๊าแก โทเนอ เต๊เห่ เบ่เบ่, กู๊แหน่เออ เต๊เห่เนอ เบ่เบ่, แว ซิหยื่อ นอทวาแถ่ แกเด โต่. 3 คูติตัส เด๊อ อา โอ่เกอ เร๊อ แว เออเตเพร เนอหม่า, แกแยเมวเจอะโร กรีกพู๊ เจ๊อ เตเพร หม่าแน๊เรอ เตดื๊อตีลี๊พ๊า เนอ, อู นอตื๊อดื่อ น๊อ อา เตเพร่ว โต่. 4 หม่าแน๊เรอ คูติตัส เออเนอ แกแย เต๊เห่เห่ ซิหยื่อ นอดื๊อตีลี๊ ลูพ๊า. เหย่ซี เนอเต๊เห่ หม่า แกแย เด๊อ อา ครวาแลโฮ อาเหน่ ฮู๊ โป่แหว่ เนอเต๊เห่ แพ๊. แซ่ฮู๊ เหย่ซี เก่ โนแม๊ปู ทื๊อโห่หนิ เป โทเฮ๊อ เตปาลา เด๊อ เหย่ซู่ครี๊ อากู เออเนอเร๊อ เหย่ซี แฮโนโห่ เด๊อ เปเกล แพ๊. เร๊อ เหย่ซี ซิหยื่อ นอทวาแถ่ เป เร๊อ แกแยยิวพู๊ เต๊เห่ อา เตซว๊าเตแส่ อาหลู่เล๊ แพ๊. 5 หม่าแน๊เรอ แซ่ฮู๊ เตซิครือมีลา อาหม่าอาจ๊อ เออ เก่ โอ่หม่าโอ่กลอ เด๊อ ซีเหน่ลู อาเงเนอเรอ, เป หนิดา เกอ เร๊อ เหย่ซี เตเฮ๊เบ่ ตีกี๊ โต่.

6 เร๊อ แกแย เด๊อ อู นอทวา เหย่ซี เร๊อ ทวาดุทวาเต เด๊อ เพรหยื่อเอ่ตู๊หมู่ตอกล๊อ อากู เต๊เห่ เนอหม่า, อา นอฉู่โนเล๊อ ฉู่โนตาลว๊า โป่ เร๊อ แว เตเฮ๊โฉ่โด่แน เออเนอเต๊เห่ เตอเจ๋อ โต่. อู เฮ๊ เร๊อ เหย่ซี หม่า ทวาดุทวาเต เด๊อ อามีลาดุ เจ๊อ เต๊เห่ หม่าแน๊เรอ แว ซิเง เร๊อ จอแปแหร่ เนอ อา แม๊ดุ แม๊ปีตี๊ เร๊อ อู เตเพร่ว โต่. ^b 7 แกแย ทวา ทวาดุทวาเต เนอเต๊เห่ เฮ๊เล๊อเฮ๊ตา ลว๊า เร๊อ แว เตเฮ๊โฉ่โด่แน เตอเจ๋อ โต่. อา เฮ๊ เตเปล๋ ปา เจ๊อ แว เนอ, เหย่ซี แม๊เถอะ จอแปแหร่ เด๊อ แว เตเอ่เตแร เด๊อ แว เก่ เลจว๊า แด๊โฉ่โด่แน เป่ อู เร๊อ เตซิครือมีลา เด๊อ แกแยยิวพู๊ หม่าโต่ เต๊เห่ อา โอ่ ฮู๊ อา เด๊อะตา โทเฮ๊อ คูเปโตร เหล่แร หม่าดื่อ เหล่แร เด๊อ อา เบ่ แด๊โฉ่โด่แน เป่ อู เตซิครือมีลา เด๊อ แกแยยิวพู๊ เต๊เห่ อาเกล เนอ เฮ๊อ. 8 เมเตเฮ๊เรอ จอแปแหร่ เด๊อะตา แฮเง เฮ๊อ อา เตอเรอโพรเตเตอเรอ เร๊อ คูเปโตร เด๊อ อา เก่ เม เตแร ฮู๊ เพรโด่แน เตเพรเนอ เด๊อ แกแยยิวพู๊ เต๊เห่ อาเงเฮ๊อ. อา แซ่ ฮู๊เนอเฮ๊อ จอแปแหร่ เด๊อะตา แฮเง เกอเฮ๊อ แว เน๊อ แว เก่ เมเกอฮู๊ เพรโด่แน เตเพรเนอ เด๊อ แกแยยิวพู๊ หม่าโต่ เต๊เห่ อาเง เฮ๊อเฮ๊อ. 9 คูยากอบ เร๊อ คูเปโตร เร๊อ คูยอห์น เด๊อ อู แด่ เฮ๊อ เหย่ซี เร๊อ ทวาดุทวาเต เออเต๊เห่เนอ, อา ซิเงโปล แลแค เร๊อ เตบุ๊ยเตเตอเรอ เออเนอหมา จอแปแหร่ เด๊อะ แว แพ๊, อา แม๊เถอะ แลแค ฮู๊เนอ. เด๊อ เตเออ อาขว่าอาคยา, เหย่ซี แม๊เถอะ เร๊อ คูบารนาบัส เน๊อ แว เนอหม่า เพรเมโหร่ลูเต เร๊อ เหย่ซี ฮู๊เนอ แพ๊. เหย่ซี ซิปล่อฉู่โต ฉู่เทอฉู่เบ่ เฮ๊อ เร๊อ เป่ เก่ แรเต เด๊อ แกแยยิวพู๊ หม่าโต่ เต๊เห่ อาเกลเฮ๊อ. เหย่ซี เร๊อ อา เก่ เม เกอลาติ เด๊อ แกแยยิวพู๊ เต๊เห่ อาเกล ฮู๊เนอ แพ๊. 10 ตื๊อ เตเต๊อเจ่อ เด๊อ เหย่ซี ซิหยื่อ นอเม เป เนอหม่า, หม่าแพ๊ตื๊อ เป เก่ โชตาปา เมจว่า แต่ แกแย โซพ๊าโซแร เต๊เห่ แต่เหม่ เนอแพ๊. เออเนอหมา เตเต๊อเจ่อ เด๊อ แว ซิปล่อฉว่า เมแหน่ ดื่อเฮ๊อ เนอแพ๊.

คูเปาโล อิซว๊า คูเปโตร เด๊อ วีอันทิโอก อากู

11 หม่าแน๊เรอ เบ๊อะคูเปโตร โอ่ เด๊อ วีอันทิโอก เบ๊อะเนออาเค, อา ย๋อ เมโต เตโต่ อาขว่าอาคยา, แว เฮ๊ อา เด๊อ แกแย หยื่อเอ่ ครี๊ เต๊เห่ อา เป๊เส่เง เจ๊อ. 12 เมเตเฮ๊เรอ เบ๊อะคูยากอบ นอแฮ อาแกแยยิวพู๊ เด๊อ อา หยื่อเอ่แหน่เอ่เต เต๊เห่ แฮโต่ แต่ล๋ายโต่ เบ๊อะเนออาเค, คูเปโตร เอ่เต่อโอเต่อเกอ เร๊อ แกแยยิวพู๊ หม่าโต่ เด๊อ อา หยื่อเอ่แหน่ ครี๊ เต๊เห่. อา เอ่เต่อโอเต่อ ฮู๊เออเนอหม่า อาโต แพ๊. หม่าแน๊เรอ เด๊อคยา, เบ๊อะคูยากอบ นอแฮ อาแกแย เออเต๊เห่ แฮโต่เฮ๊อ เบ๊อะเนออาเค, อา ซ๊อซื๊อ ตาพา จว๊าแก เร๊อ อา เอ่เต่อโอเต่อเกอ ปา เน๊อ เหย่ซี เนอเต๊เห่ โต่, เมเตเฮ๊เรอ คูยากอบ อา โคแบ๊ซว๊า แกแยยิวพู๊ เออเต๊เห่เนอ, อา ซิหยื่อ เด๊อ แกแยยิวพู๊ หม่าโต่ เต๊เห่ เก่ ดื๊อตีลี๊ พ๊า อาขว่าอาคยา, อา ชิอิเช เหย่ซีเหล่ เร๊อ อา ซ๊าซื๊อ ตาพา จว๊าแก แพ๊. 13 แกแยยิวพู๊ เด๊อ อา หยื่อเอ่ ครี๊ เด๊อ อาโร เต๊เห่เนอ, อา ซิเง เร๊อ คูเปโตร เม เออเนอหมา อา โตโต่, หม่าแน๊เรอ อา ครวาเมเกอ ฮู๊ คูเปโตร เมเนอเนอ. คูบารนาบัส ครวาเมเกอ ดื่อเฮ๊อ ฮู๊ เหย่ซี แอ๊ค๊าแอ๊โข่ เมเนอ เฮ๊อเฮ๊อ.

14 เบ๊อะแว แม๊เถอะ เด๊อ เหย่ซี จว๊าโต ปา เร๊อ เตซิครือมีลา อา เตหมะเตจ๊อ อาแกล๊อาโกล โต่ เบ๊อะเนออาเค, แว เฮ๊ คูเปโตร เด๊อ เหย่ซี เป๊เส่เง เน๊อ, “เน หม่า แกแยยิวพู๊ เตเพร หม่าแน๊เรอ เน โอ่เซอเพร ฮู๊ แกแยยิวพู๊ หม่าโต่ เตเพร เนอหม่า อาหนิ เฮ๊อ. ฮู๊ แกแยยิวพู๊ เตเพร อาเหล่โกล เมเนอ, เน โต โหล่ครวา เมเกอ ปาโต่เฮ๊อ, เมเตเฮ๊เรอ กู๊แหน่เออ เน หยื่อเอ่ โทเฮ๊อ ครี๊ เฮ๊อ. เมฮู๊เนอเรอ กู๊แหน่เออ เน จว๊า นอตือดื๊อ แกแยยิวพู๊ หม่าโต่ เด๊อ อาหยื่อเอ่ครี๊เต๊เห่ เร๊อ อา เก่ ครวาเมเกอ ฮู๊ แกแยยิวพู๊ อาเหล่โกล เนอหม่า อาหนิ แหน่ แอ?”

แกแยยิวพู๊ เร๊อ แกแยยิวพู๊ หม่าโต่ เต๊เห่ อา เตหยื่อเตแหน่ ขว่าคยา, เหย่ซี พย๊าหนิ เมแลเปล๊กา

15 แว เฮ๊ แฮเงโป่ คูเปโตร เน๊อ, “เป เร๊อ เป โอ่เป๊เจ่แล ฮู๊ แกแยยิวพู๊ เด๊อ อา ซิเง จอแปแหร่ อา เตซว๊าเตแส่ เออเต๊เห่เน๊อ. เป หม่า อาแซ่เน๊อ แกแยยิวพู๊ หม่าโต่ เด๊อ อา ซิเง เกอ อู เตซว๊าเตแส่ โต่ เนอเต๊เห่ หม่าโต่. โทเรอ แกแย ฮู๊เนอ เต๊เห่ หม่า เป เอ๊ เหย่ซี เร๊อ เพรเมเตซื๊อพู๊. 16 หม่าแน๊เรอ เป แกแยยิวพู๊ เด๊อ อา หยื่อเอ่ ครี๊ เออเต๊เห่ เนอหม่า, เป ซิเง เร๊อ จอแปแหร่ แด่จ๊อแด่เต แกแย เตเพรเนอหม่า อา แด่จ๊อแด่เต ลู เน๊อ อา ลือครวา เมเกอ เตซว๊าเตแส่ อาคยาเนอ หม่าโต่. หม่าแพ๊ ตื๊อ อา หยื่อเอ่แหน่ เหย่ซู่ครี๊ เออเนอ แพ๊ เป เออเต๊เห่เนอ เบ่เบ่, แซ่ฮู๊ จอแปแหร่ เก่ แด่จ๊อแด่เต เกอ เป เร๊อ เป เตหยื่อเตแหน่ ครี๊ เออ อาคยา เนอเรอ, เป หยื่อเอ่แหน่ เกอเฮ๊อ เหย่ซู่ครี๊ เฮ๊อ. หม่า เด๊อ เป ครวาเมเกอ เตซว๊าเตแส่ อาคยาเนอ หม่าโต่, เมเตเฮ๊เรอ เด๊อ อู ลือครวา เมเบ๊ เตซว๊าเตแส่ อาคยา เร๊อ อู ทวาแถ่เบ๊ แกแยจ๊อแกแยเต เนอ อา โอ่ เตเพร่ว โต่. ^c

17 “เบ๊อะเป แอ๊จื๊อ แม๊ปู เร๊อ จอแปแหร่ เก่ แด่จ๊อแด่เต เป เด๊อ ครี๊ ขว่าคยา เบ๊อะเนออาเค, อู แม๊เถอะ แพ๊ เป ฮู๊ เป ทวา เพรเมเตซื๊อพู๊ แซ่เน๊อ แกแยยิวพู๊ หม่าโต่ เนอเต๊เห่ แพ๊. เก่ อา ทวาแพ๊ ฮู๊เนอแพ๊ เฮ๊เรอ, ครี๊ หม่า เพร เด๊อ อา นอตือดื๊อ เป เน๊อ เป เบ่ เมเตซื๊อ ฮู๊เนอ แอ? อา นอตือดื๊อ เป ฮู๊เนอ หม่าโต่. 18 หม่าแน๊เรอ เก่ แว เฮ๊ ฉิกย๊า กาคยาโค๊ คยาแซ๊ แวโหง่ เร๊อ จอแปแหร่ แด่จ๊อแด่เต แกแย เด๊อ อา ลือครวาเม เกอ เตซว๊าเตแส่ เนอเต๊เห่ แพ๊. เก่เฮ๊เรอ แว เก่ ทวา ปาแพ๊ เพรเมเตซื๊อพู๊ เตเพรเพร่ว แพ๊. 19 เบ๊อะแว แอ๊จื๊อ ลือครวาเม เตซว๊าเตแส่ เบ๊อะเนออาเค, แว ลือ เมโต เบ๊แจ่ จอแปแหร่ อาซิปล่อ โตโพ๋ โต่. ฮู๊เนอเร๊อ แซ่ฮู๊ แว เก่ โอ่เซอเพรเบ๊ เป่ เด๊อ จอแปแหร่ อาเงเนอเรอ, แว เซอแกเฮ๊อ เด๊อ เตซว๊าเตแส่ อากู เฮ๊อ. ^{▼▼แว เซอแกเฮ๊อ เด๊อ เตซว๊าเตแส่ อากู เฮ๊อ อาโหง่แลช๊า หม่า แว โอ่ปา เด๊อ เตซว๊าเตแส่ อา เตเป๊ออาเล โต่ เฮ๊อ.} 20 เออเนอหมา อา แซ่เฮ๊อ เน๊อ แว เซอ เต่อเกอ เร๊อ ครี๊ เด๊อ อี๊ถื่อดีเต่ อาลู เฮ๊อ. แว โอ่เซอเพร หม่าปาโต่ เฮ๊อ หม่าแน๊เรอ ครี๊ โอ่เซอเพร เฮ๊อ เด๊อ แวกู เฮ๊อ. เตโอ่เซอเพร เด๊อ แว โอ่เซอเพร กู๊แหน่ เออเนอหมา หม่าแพ๊ แว โอ่เซอเพร เด๊อ เตหยื่อเอ่ จอแปแหร่ อาพู๊คู เด๊อ อา โมเร๊อ แว เร๊อ อา เด๊อะแลแก อา ซิปล่อเซอเพร เด๊อ แวเง เออเนอ เตเพร อาคยา แพ๊. 21 แว วี๊แก จอแปแหร่ อาบุ๊ยอาเตอเรอ โต่, เมเตเฮ๊เรอ แกแย เตเพรเพร เก่ ทวาแถ่ เบ๊แจ่ แกแยจ๊อแกแยเต เร๊อ ลือครวาเม เตซว๊าเตแส่ อาคยา แพ๊ เก่เฮ๊เรอ, ครี๊ ข่าเซอ อาซิปล่อ เออเนอหมา อา แกเด ลอเฮ๊อ”