Galatians 3

แอ๊จื๊อ ครวาลือเกอยูดาห์อา เตซว๊าเตแส่ หม่าโต่เร๊อ โอ่เซอเพร เน๊อ เตหยื่อ เด๊อ ครี๊ อากู

1กาลาเทียพู๊ เด๊อ อา บี่ซิปล่อสู่เทอ ซี๋ แซ่ฮู๊ ซี ซิหยื่อ หนิดา ครวาเมเกอ คยาแซ๊ คูโมเสส อา เตซว๊าเตแส่ เออเนอ เร๊อ อูเป แฮ อี๊ลอแลโฮ ซี เป? แว โด่แนโปลเพ๊ เป่โทเฮ๊อ ซี เร๊อ เหย่ซู๊ครี๊ข่าเซอ อาเหน่เด๊อ อี๊ถื่อดีเต่ลู เนอเฮ๊อ แวเฮ๋. 2เฮ๊ เป่แม๊ แว ตื๊อ เออเต๊อเจ่อเจ๋อ เนอแพ๊. เด๊อ ซี ครวาเมเกอ เตซว๊าเตแส่ อาคยา เร๊อ ซี พย๊าหนิ แหย่โยบูโพ๊ แบ่เจ่ แอ? เก่หม่าโต่เรอ เด๊อ ซี หนิโฮ เตซิครือมีลา เร๊อ ซี หยื่อเอ่แหน่ อาขว่าอาคยาเร๊อ, ซี พย๊าหนิ แหย่โยบูโพ๊ แบ่เจ่ ฮู๊เนอ แอ? 3ตีกี๊ เร๊อ ซี เตเนโปล เจ๊อ โต่ เมเต? เบ๊อะซี เป๊อแถ่ หยื่อเอ่ลู่ ครี๊ เบ๊อะเนอ, ซี ซิเลหนิ โทเฮ๊อ แหย่โยบูโพ๊ แบ่เจ่ เฮ๊อ หม่าแน๊เรอ กู๊แหน่เออเรอ หม่า ซี จ่าเพรอ โอ่เซอเพร ซิเลแถ่ เกอเร๊อดื่อ แหน่เฮ๊อ ซีเหน่ ฮู๊เนอ แอ? 4ซี ข่าจาข่าจือ โทเฮ๊อ ปว๊าเต๊อเจ่อ เด๊อ เตซิครือมีลา อาเง เฮ๊อ หม่าแน๊เรอ กู๊แหน่เออ อา ทวา แกเด ลอ เฮ๊อ แอ? เฮ๊ตาต๋า หม่า ซี ข่าจาข่าจือ เตเออ เนอหม่า อาบุ๊ยอาเตอเรอ โอ่ หม่าแหน่ เจ๊อ เม. 5ฮู๊เนอเรอ เด๊อ ซี ครวาเมเกอ เตซว๊าเตแส่ อาคยา เร๊อ จอแปแหร่ เด๊อ ซี แหย่โยบูโพ๊ แบ่เจ่ เร๊อ อา เม เตโค๊ตีกลี๊ เด๊อ ซีเกล ฮู๊เนอ แอ? ฮู๊เนอ หม่าโต่. เด๊อ ซี หนิโฮ เตซิครือมีลา เร๊อ ซี หยื่อเอ่ อาขว่าอาคยาเร๊อ อา เด๊อ แพ๊ ซี แพ๊. เด๊อ ซี ลือครวาเม เกอ เตซว๊าเตแส่ เออ อาคยา เนอ หม่าโต่.

6เตเนแม๊มอ แลแค, ลีเทส่อพ๊ากู เฮ๊ เนอ, เพ อับราฮัม อา เตโอ่เซอเพร เออเนอ, “อา หยื่อเอ่ จอแปแหร่ เร๊อ เด๊อ อา เตหยื่อเตแหน่ อาขว่าอาคยา, จอแปแหร่ แด่ เฮ๊อ อา ฮู๊ แกแยจ๊อแกแยเต เตเพร เนอเฮ๊อ.” ^a 7เมฮู๊เนอเรอ ซี โต ซิเง เร๊อ แกแย เด๊อ อา หยื่อเอ่แหน่ จอแปแหร่ เต๊เห่ เนอหม่า เพ อับราฮัม อากลุยอาลุ๊ย หม่าแหน่ เฮ๊อ. ^b 8ลีเทส่อพ๊า เฮ๊หนื่ออื่อ โทดื่อ เฮ๊อ มู๊หนู่มู๊ส่าเค ปา เนอ, จอแปแหร่ เก่ แด่จ๊อแด่เต แกแยยิวพู๊ หม่าโต่ เต๊เห่เนอ เร๊อ เหย่ซี อาเตหยื่อเตแหน่ อาคยา ปา, อา เฮ๊หนื่ออื่อ ฮู๊เนอ. จอแปแหร่ อาลาอาโหง่ เด๊อะ ซิเงเหร่อ เตซิครือมีลา อาหรี่อาแก เด๊อ เพ อับราฮัม อา โอ่ เร๊อ อา เฮ๊ เน๊อ, “เด๊อ เนขว่าเนคยา เนอ, แว เก่ เด๊อะบุ๊ยเด๊อะเตอเรอ แฮเง ลอ ล๋อ แกแยเมวเจอะ เต๊เห่ เร๊อ เน ปา.” ^c อา เฮ๊ ลู ฮู๊เนอ. 9ฮู๊ เพ อับราฮัม หยื่อเอ่ จอแปแหร่ เร๊อ อา พย๊าหนิ เตบุ๊ยเตเตอเรอ เนอ, ล๋อ แกแย เด๊อ อา หยื่อเอ่ เต เต๊เห่เนอ อา เก่ พย๊าหนิ เกอ เตบุ๊ยเตเตอเรอ ฮู๊ อา เนอ ปา.

10หม่าแน๊เรอ แกแย เด๊อ อา ซิเลแถ่ เร๊อดื่อ เตซว๊าเตแส่ เด๊อ อา เก่ พย๊าหนิ เตจ๊อเตเต อาเง เต๊เห่เนอ, จอแปแหร่ เก่ มือ เหย่ซี ปา. เมเตเฮ๊เนอเรอ ลีเทส่อพ๊ากู เฮ๊ เน๊อ, “แกแย เตเพรเพร เด๊อ อา โอ่เซอเพร ครวาลือเม เกอ เตซว๊าเตแส่ อาคยา ปวาตามา โต่ เตเพรเนอ, จอแปแหร่ เก่ เมจากาคยา อา ปา,” ^d อา เฮ๊ ฮู๊เนอ. 11เป ซิเง ลอหล่าตี๊กลิ เจ๊อ เน๊อ แกแย เด๊อ อา แอ๊จื๊อ ครวาลือเม เกอ เตซว๊าเตแส่ อาคยา เต๊เห่เนอ, จอแปแหร่ แด่จ๊อแด่เต เหย่ซี เตเพร่ว โต่. เมเตเฮ๊เนอเรอ ลีเทส่อพ๊ากู เฮ๊ เน๊อ, “แกแยจ๊อแกแยเต เตเพร เด๊อ อา พย๊าหนิ ซิปล่อเซอเพร เนอหม่า หม่าเด๊อ อา เตหยื่อเตแหน่ อาขว่าอาคยา แพ๊.” ^e 12หม่าแน๊เรอ แกแย เด๊อ อา ซิเลแถ่ เกอเร๊อ อา ครวาลือ เมเบ๊ เตซว๊าเตแส่ อาคยา เต๊เห่เนอ, อา ซิเลแถ่ หนิแจ่ เด๊อ เตหยื่อ อาลู โต่. อา หยื่อเอ่ เกอเร๊อลอ แพ๊ ล๋อ อา เมเบ๊ เนอเต๊เห่ แพ๊ ลีเทส่อพ๊ากู เฮ๊ เน๊อ, “แกแย เตเพรเพร เด๊อ อา ลือครวาเม ลอ ล๋อ เตซว๊าเตแส่ โอ่ เต๊เห่เนอ, อา เก่ เซอเพร หม่าแหน่ ปา,” อา เฮ๊ ฮู๊เนอ. ^f 13ล๋อ เตซว๊าเตแส่ เต๊เห่เนอ, อู ลือครวา เมเบ๊ เตเพร่ว โต่ อาขว่าอาคยา, จอแปแหร่ เก่ เมจากาคยา ลอ อูปว๋า เตเพร ปา, หม่าแน๊เรอ ครี๊ อี๊ถ่า เฮ๊อ เป เฮ๊อ. เด๊อ อา ข่าเป่ เป เตจา เด๊อ อี๊ถื่อดีเต่ลู เออ อาขว่าอาคยาเร๊อ, อา แฮโน ข่าเป่เฮ๊อ เป เตเมจากาคยา เด๊อ อา เก่ กาเบ่ เป ปา เออเนอ อาเง เฮ๊อ. เมเตเฮ๊เรอ ลีเทส่อพ๊ากู เฮ๊ เน๊อ, “แกแย เตเพรเพร เด๊อ อู มือเซอแถ่ อา เด๊อ อี๊ถื่อดีเต่ อาโอ่ เนอ, เตเมจากาคยา เบ่เฮ๊อ อา เฮ๊อ,” อา เฮ๊ ฮู๊เนอ. ^g 14แซ่ฮู๊ แกแยยิวพู๊ หม่าโต่ เต๊เห่ เก่ พย๊าหนิ เกอดื่อ เตบุ๊ยเตเตอเรอ เนอเรอ, เหย่ซู่ครี๊ แฮอิถ่ากา โท ลอ เป่ เฮ๊อ เป เฮ๊อ. เตเด๊อะบุ๊ยเด๊อะเตอเรอ เออเนอ, อา แซ่เฮ๊อ เน๊อ จอแปแหร่ อ๊อแลแก เพ อับราฮัม มู๋ หนู่เค เนอ เฮ๊อ. โท๊โต่ จอแปแหร่ อ๊อแล โทเฮ๊อ เน๊อ อา เก่ เด๊อะตา เป แหย่โยบูโพ๊ แบ่เจ่ ปา. แซ่ฮู๊ แกแย เด๊อ อา หยื่อเอ่ เหย่ซู่ เต๊เห่ เก่ พย๊าหนิ แหย่โยบูโพ๊ แบ่เจ่ ปาเนอเรอ, เหย่ซู่ แฮ อี๊ถ่า เป แพ๊.

เตซว๊าเตแส่ เร๊อ เตอ๊อแลนอแล

15โป่แหว่ ซี๋, แว เก่ แด๊โฉ่โล เป่ ซี เน๊อ เต เด๊อ อู เหล่โกล เม เกอเร๊อ อา เหมาะเฮ๊เหมาะลี เต๊อเจ่อ. เบ๊อะแกแย ซิเนอ เอ่หม่า โทเฮ๊อ ลูโหง่ เบ๊อะเนอ, อูเปเป๋ เบ่เบ่, อา เก่ แฮ เมปย๊าแก หม่าโต่เรอ อา เก่ แฮ เมโค๊แก เฮ๊เนอ, อาหนิ ปา โต่ เฮ๊อ. 16ฮู๊เนอเฮ๊อ จอแปแหร่ เด๊อะตา อา เตอ๊อแล เน๊อ เพ อับราฮัม เร๊อ อากลุยอาลุ๊ย อาเกล เตเพร แพ๊. “เด๊อ อากลุยอาลุ๊ย เต๊เห่,” จอแปแหร่ เฮ๊ ฮู๊เนอ หม่าโต่. อาโหง่แลช๊า หม่า แกแย โอ่ เอ๊ หม่าโต่. อา เฮ๊ ดื่อเน๊อ, “เด๊อ เนกลุยเนลุ๊ย อาเกลเตเพร,” ^h อา เฮ๊ ฮู๊เนอ ขว่าคยา, อาโหง่แลช๊า หม่า อา เฮ๊โล แพ๊ ตื๊อ เตเพร แพ๊. อา ซิหยื่อ เฮ๊ เออเนอหมา ครี๊ เออเนอ เฮ๊อ. 17เตเด๊อ แว ซิหยื่อ เฮ๊เนอหม่า ฮู๊เต เฮ๊เนอเรอ, จอแปแหร่ อ๊อแล โทเฮ๊อ เร๊อ เพ อับราฮัม เร๊อ เด๊อคยา อาหน่า ลุยเย เร๊อ โซเชอ เนอ, อา เด๊อะตาเนอ แพ๊ เตซว๊าเตแส่ เด๊อ คูโมเสส อา โอ่ แพ๊. เตซว๊าเตแส่ เออเนอหมา, อา เม ตูพูแกแจ่ เร๊อ จอแปแหร่ อา เตอ๊อแล โต่. ⁱ 18เด๊อ เป ลือครวา เม เตซว๊าเตแส่ อาขว่าอาคยา, เป เก่ พย๊าหนิแจ่ จอแปแหร่ อาเตเด๊อะบุ๊ยเด๊อะเตอเรอ อู่เจเต๊เหย่ เก่เฮ๊เร๊อ เตเด๊อะบุ๊ยเด๊อะเตอเรอ เออเต๊เห่ เนอหม่า อา แฮ หม่าแหน่ เด๊อ จอแปแหร่ อา เตอ๊อแล เออเนอ อา โอ่ หม่าโต่. หม่าแน๊เรอ จอแปแหร่ ล๋อ อ๊อแล โทเฮ๊อ เตเด๊อะบุ๊ยเด๊อะเตอเรอ อู่เจเต๊เหย่ เออเนอ เร๊อ เพ อับราฮัม อาขว่าอาคยา, อา เด๊อะโทเฮ๊อ เตเด๊อะบุ๊ยเด๊อะเตอเรอ อู่เจเต๊เหย่ เออเนอ เน๊อ ลู เฮ๊อ. ^j

19จอแปแหร่ จว๊าเด๊อะตา โต่ เป เตซว๊าเตแส่ เมเต? แกแย ย๋อ เมเตซื๊อ อาขว่าอาคยา, อา เด๊อะตา เป แพ๊. เตซว๊าเตแส่ เออเนอ, อา โอ่หม่าโอ่กลอ เง โต่เด๊อ เพ อับราฮัม อากลุยอาลุ๊ย แฮโต่เนอ. เพ อับราฮัม อากลุยอาลุ๊ย เด๊อ จอแปแหร่ อ๊อแลแก เนอเตเพร หม่า หม่าเฮ๊อ เหย่ซู่ครี๊ เออเนอเฮ๊อ. จอแปแหร่ เด๊อะตา เตซว๊าเตแส่ เออ เด๊อ ม๊อขุเตเน่วพู๊ อา กู๊ยากู. เร๊อ ม๊อขุเตเน่วพู๊ เด๊อะตา แฮเง เด๊อ คูโมเสส เร๊อ คูโมเสส เด๊อะตา แฮเง เด๊อ แกแย อา โอ่. คูโมเสส หม่า เพรแรเต เด๊อ อากล๊าเมกู เตเพร แพ๊. 20เพรแรเต เด๊อ อากล๊าเมกู เตเพรหม่า อา โอ่จิจือ ลอ เนอโค๊เนอกยา. จอแปแหร่ เด๊อะตา อา เตอ๊อแล เด๊อ เพ อับราฮัม อา โอ่ เนอ, อา โอ่ เร๊อ เพรแรเต เด๊อ อากล๊าเมกู เตเพร่ว โต่. จอแปแหร่ อ๊อแล ตื้อดื่อ เตเพร แพ๊.

เตซว๊าเตแส่ อา เตเตเนหนื่ออื่อ

21เมฮู๊เนอเรอ เตซว๊าเตแส่ เออเนอ อา เมชู๊แก่ ฉื่อ จอแปแหร่ อา เตอ๊อแล เออเต๊เห่เนอ แอ? อา เมชู๊แก่ ฉื่อ เตอเจ๋อโต่. เมเตเฮ๊เรอ เตซว๊าเตแส่ เออ, อา เก่ เด๊อะโอ่แถ่แจ่ เป เตโอ่เซอเพร อาเซ เก่เฮ๊เรอ จอแปแหร่ แด่จ๊อแด่เต เป เน๊อ เป ครวา จูเอ่เกอ เตซว๊าเตแส่ เออเต๊เห่ อาคยา แพ๊. 22หม่าแน๊เรอ ลีเทส่อพ๊ากู เฮ๊ เนอ, เห่ขุ เออต๊าบ่า ลอเนอ, อา โอ่ ลอ เด๊อ เตซื๊อเตปล๊า อา เตเป๊ออาเล แพ๊. ฮู๊เนอ อาขว่าอาคยา, จอแปแหร่ อา เตเด๊อะบุ๊ยเด๊อะเตอเรอ เออเนอ อา อ๊อแล เน๊อ เป เก่ หยื่อเอ่ เหย่ซู่ ตื๊อหม่า อา เด๊อ เป ปา แพ๊. ซิปล่อเซอเพร ตูจูเพร เออเนอ อา เด๊อะตื๊อแพ๊ แกแย เด๊อ อา หยื่อเอ่ เหย่ซู่ครี๊ เนอเต๊เห่ แพ๊.

23เบ๊อะเตหยื่อเตแหน่ เออ แฮโต่ แต่ล๋ายโต่ เบ๊อะเนอ, เตซว๊าเตแส่ ด๊อโอ่หม่า ตื๊อดื่อปา เป แซ่เน๊อ แกแย โอ่ เด๊อ ทอกู เนอเต๊เห่ เฮ๊อ. เป โอ่ ตื๊อดื่อ เบ๊อะอา ทอกูเนอ โต่เด๊อ จอแปแหร่ เด๊อะโลแถ่ เตหยื่อเตแหน่ โตโพ๊ ปา. 24ฮู๊เนอ อาขว่าอาคยา, เตซว๊าเตแส่ เออเนอ อาแซ่เน๊อ เพร โอ่ป่อหม่าหนิ เป เตเพรเนอ เฮ๊อ. โทเรอ แซ่ฮู๊ จอแปแหร่ เก่ แด่จ๊อแด่เต เป เร๊อ เป เตหยื่อเตแหน่ ครี๊ อาคยา เนอ เร๊อ, เตซว๊าเตแส่ เออเนอ อา ซูจว๊าเฮ๊อ เป เด๊อ ครี๊ อา โอ่ เฮ๊อ. 25กู๊แหน่เรอ เป แด่ เฮ๊อ เป เตหยื่อเตแหน่ เด๊อ เหย่ซู่ครี๊ อากู อาขว่าอาคยา, เตซว๊าเตแส่ เออเนอ อา โอ่ป่อหม่าหนิ ปา เป โต่, โท๊โต่ อา ยูแกล๊ยูโกล หนิ ปา เป โต่ เฮ๊อ.

26เด๊อ เตหยื่อเตแหน่ อาขว่าอาคยา, ซี ล๋อ ปลี ทวาลอเฮ๊อ เตเตอเจ๋อโต เร๊อ ครี๊ เฮ๊อ เร๊อ ซี ทวาลอเฮ๊อ จอแปแหร่ อาพู๊อาเลอ เต๊เห่ เฮ๊อ. 27เมเตเฮ๊เรอ แกแย เด๊อ อา เจเฮ๊อ อาเหน่ เร๊อ เทอ เต๊เห่เนอ, อา ทวาแถ่เฮ๊อ เตเตอเจ๋อโต เร๊อ ครี๊ เฮ๊อ เต๊เห่ เนอหม่า หม่าเฮ๊อ อา กือแถ่แซ๊แถ่เฮ๊อ ครี๊ แซ่เน๊อ อา อากืออาแซ๊ เห่อจา เด๊อ อาเซ เนอเต๊เห่ เฮ๊อ. 28แกแยยิวพู๊ เร๊อ แกแย เมว เจ่อโร กรีกพู๊ เต๊เห่, หลู่ เร๊อ เพร พย๊าหนิ เตปาลาพู๊ เต๊เห่, เพรคู เร๊อ เพรเหมาะ, ล๋อ เต เออเต๊เห่ เนอหม่า อากลว่าโค๊ เร๊อ ลู โต่, เมเตเฮ๊เรอ ล๋อ ซี เออเต๊เห่ เนอหม่า ซี ทวาแถ่ ลอ เฮ๊อ เตเตอเจ๋อโต เร๊อ ครี๊ เฮ๊อ. 29ซี เก่ ทวาเฮ๊อ ครี๊ อาเต เฮ๊เรอ ซี ทวา หม่าเฮ๊อ เพ อับราฮัม อากลุยอาลุ๊ย เต๊เห่เฮ๊อ. เร๊อ ซี เก่ พย๊าหนิ เตเด๊อะบุ๊ยเด๊อะเตอเรอ เต๊เห่ เด๊อ จอแปแหร่ อ๊อแลแก เพ อับราฮัม เนอเต๊เห่ ปา. ^k