Galatians 4

1เต เด๊อ แว ซิหยื่อ เฮ๊ เอ๊แถ่ โป่ เนอหม่า ฮู๊เตเฮ๊เนอ, เฮ๊โก๊หลื่อ, พู๊เพรคู เตเพร เด๊อ อา โตเบ่ พย๊าหนิ อาเพ อู่เจเต๊เหย่ หม่าแน๊เรอ เบ๊อะอา เป๊เจ่ปา เบ๊อะเนอ, อา หม่า อา แซ่ ปาแพ๊ เร๊อ หลู่เล๊ เตเพรเนอ แพ๊. หม่าแน๊เรอ อา หม่า แกแย เตเพร เด๊อ อา โตเบ่ พย๊าหนิ ลอ หม่าแหน่ เจ๊อ อู่เจเต๊เหย่ ล๋อ ปลี เออเนอ ปา เตเพร เฮ๊อ. 2พู๊เพรคู เออเตเพร เนอหม่า อา โตเบ่ โอ่ป่อ ตื๊อดื่อ โต่ปา เด๊อ อู โบ่ดุ แม๊ตู่ หนิเกอเร๊อ ลู เน๊อ อู ยูแกล๊ ยูโกล หนิ ลู อาเล, เร๊อ อา โตเบ่ โอ่ป่อ โต่เด๊อ ม๊อเนอโต ม๊อเนอเบ่ เฮ๊อ เด๊อ อาเพ ตี๊หรี่แตแร เด๊อะตา ลู เออเนอ ปา. 3เป เออเต๊เห่ เนอหม่า อาแซ่เน๊อ เนอเฮ๊อ. เบ๊อะครี๊ แฮ แต่ล๋ายโต่ เบ๊อะเนอ, เป ทวา เห่ขุเน๊ขุ อา เตซว๊าเตแส่ เร๊อ อา เหล่โกลเหล่แบ่ เต๊เห่ อาหลู่เล๊. 4หม่าแน๊เรอ เบ๊อะม๊อเนอโต ม๊อเนอเบ่ แฮโต่เฮ๊อ เบ๊อะเนอ, จอแปแหร่ นอแฮแล อาพู๊คู เร๊อ อา แฮ โอ่เป๊เจ่แล เด๊อ เพรเหมาะ เตเพร อา โอ่, เร๊อ อา แฮ โอ่ เป๊เจ่แล เด๊อ แกแยยิวพู๊ อา เตซว๊าเตแส่ อาเล. 5เมเตเฮ๊เรอ, แซ่ฮู๊ อา เก่ แฮ อี๊ถ่า แกแย โอ่เซอเพร เด๊อ เตซว๊าเตแส่ อาเล เนอเต๊เห่, โท๊โต่ แซ่ฮู๊ เป เก่ ทวาแถ่ จอแปแหร่ อาพู๊อาเลอ เต๊เห่ อาเงเนอ อา นอแฮ อาพู๊คู แพ๊. ^a 6ซี ย๋อ ทวาเฮ๊อ จอแปแหร่ อาพู๊อาเลอ เต๊เห่ อาขว่าอาคยา, เด๊อ เป ซิปล่อกู เออเนอ, จอแปแหร่ ฉู่โนเฮ๊อ อาพู๊คู อา แหย่โยบูโพ๊ เด๊อ อา เอ๊โทแถ่ เน๊อ, “อับบา, เพ” ฮู๊เนอ หม่า อา หนิ เฮ๊อ เออเนอเฮ๊อ. 7เมฮู๊เนอเรอ เน หม่า หลู่ เตเพร หม่าปาโต่ เฮ๊อ. เน ทวา เฮ๊อ พู๊ เตเพร เฮ๊อ. เน ทวา เฮ๊อ จอแปแหร่ อาพู๊ เตเพร อาขว่าอาคยา, กู๊แหน่เออ ล๋อ อู่เจเต๊เหย่ เด๊อ เน โต พย๊าหนิ เต๊เห่เนอ, จอแปแหร่ เก่ เด๊อะลอ เน๊อ เน ปา.

คูเปาโล ซิปล่อ เตเนกู่เตเนแก เด๊อ กาลาเทียพู๊ ซีเต๊เห่ อาเง

8ม๊อเนอ เด๊อ อา ตาลว๊า โท เต๊เห่เนอ, ซี ซิเง จอแปแหร่ โต่ อาขว่าอาคยา, ซี ทวาเฮ๊อ หลู่เล๊ เด๊อ จอแปแหร่ หม่าโต่ เต๊เห่ อาเล เฮ๊อ. 9หม่าแน๊เรอ กู๊แหน่เออ ซี ซิเงเฮ๊อ จอแปแหร่ เฮ๊อ. แว เก่ เฮ๊ หม่าแหน่ เจ๊อ ซี เร๊อ จอแปแหร่ ซิเงเฮ๊อ ซี เฮ๊อ. หม่าเมเตเรอ ซี ซิหยื่อ ฉิกย๊าคยา ปา เด๊อ เห่ขุเน๊ขุ อา เตซว๊าเตแส่ เต๊เห่ เร๊อ อาเหล่โกล เหล่แบ่ เต๊เห่ เด๊อ อา อ๊าเจ่ เหร่เจ่ เร๊อ อาบุ๊ยอาเตอเรอ โอ่โต่ เออเต๊เห่ อาเล เนอ เมเต? หม่า ซี ซิหยื่อ ทวาแถ่ คยาแซ๊ เหย่ซี อาหลู่เล๊ แอ? 10หม่าเมเตเรอ ซี จว๊า แอ๊จื๊อ ลือครวา เมโมโต่ จอแปแหร่ อาซิปล่อ เร๊อ ซี แด่ดุ โค๊คยาดื่อ ม๊อเนอเต๊เห่, เล เต๊เห่, เร๊อ โตเบ่ เต๊เห่ เร๊อ หน่ากู เต๊เห่เมเต? 11เด๊อ ซี เมฮู๊เนอ อาขว่าอาคยา, แว ซิปล่อกู่ ซิปล่อแก แหน่เจ๊อ เด๊อ ซีเง เจ๊อ. ปาหม่า ล๋อ เตเม เด๊อ แว เม เป่โทเฮ๊อ เด๊อ ซีเง เนอเต๊เห่, ทวาแถ่ แกเด ลอดื่อ เฮ๊อ ปา เฮ๊อ.

12โป่แหว่ ซี๋, แว กุยซิยอ ซี เน๊อ ซี เก่ แม๊บือ ครวาเม เกอดื่อ ฮู๊ แว เม เออเนอ, เมเตเฮ๊เรอ แว ทวาแถ่เฮ๊อ แกแยยิวพู๊ หม่าโต่ เด๊อ อาแซ่เน๊อ ซี เด๊อ อา ทวา ปา เตซว๊าเตแส่ อาหลู่เล๊ โต่ เตเพร เนอเฮ๊อ. เด๊อ อาเหร่ออาเนอ เนอหม่า ซี เมซื๊อน๊อ เร๊อ แว เตอเจ๋อ โต่. 13เบ๊อะแว โอ่เต่อเกอ เร๊อ ซี เร๊อ แว แด๊โฉ่โด่แน เป่เร๊อ ซี เน๊อ เตซิครือมีลา อาเหร่อเล๊อ โตโพ๊เนอหม่า แว ล๋อ ชุ๊ย เนอหม่า ซี ซิเง ลอดื่อ เฮ๊อ. 14แว เหน่กล่อ อา เตชุ๊ยเตเช เออ อา ทวาแถ่ แหน่เจ๊อ เตแป่เตเช เด๊อ ซีเง หม่าแน๊เรอ ซี ซิเถ่ ซิโตโคน๊อ เร๊อ แว โตโพ๋ โต่. ซี ลื๋อ เอ๊โมฉื่อ แร๊ เตเปล๋ ปา เจ๊อ แว แซ่เจ๊อเร๊อ แว ทวา จอแปแหร่ อา เตเน่วพู๊ เตเพรเนอ เจ๊อ, โท๊โต่ ซี เอ๊โมฉื่อ แว เออเนอ, อา แซ่เฮ๊อ เน๊อ ซี เอ๊โมฉื่อ เหย่ซู่ครี๊ อาเหน่แบ่เจ่ เนอ เจ๊อ เฮ๊อ. 15ซี ซิครือ โทเฮ๊อ, หม่าแน๊เรอ กู๊แหน่เออ ซี จว๊าเม ซีเหน่ ฮู๊เต? แว เฮ๊จ๊อจ๋อ ซี, เด๊อ อาเหร่อเค เนอหม่า ซี โม แว บ๋า เตเนอ ซี เก่ ก๊ออูเถ่แจ่ ซี เป๊เส่ปล่อ เฮ๊เนอหม่า ซี ก๊ออูเถ่ เร๊อ ซี เก่ เด๊อะแก เจ๊อ เร๊อ แว เจ๊อ เก่. 16หม่าแน๊เรอ กู๊แหน่เออ เด๊อ แว แด๊โฉ่ เป่ ซี เตหมะเตจ๊อ อาขว่าอาคยาเร๊อ หม่า, แว จว๊า ทวาแถ่ แซ่เจ๊อ เฮ๊อ ซี เหล่ซิเถ่ซิฮา แว แอ?

17แกแย เด๊อ อา ซิหยื่อ ครวาเมเกอ แกแยยิวพู๊ อา เตซว๊าเตแส่ เต๊เห่เนอ เหย่ซี ซิหยื่อ นอครวาเกอ แหน่เจ๊อ ซี หม่าแน๊เรอ เตเออเนอหม่า อาแร๊โต่. แซ่ฮู๊ ซี เก่ ซิปล่อ จว๊าโนเต่อ เกอ เด๊อ เหย่ซี อาเกลเนอ เรอ, เหย่ซี ซิหยื่อ เม ลูโพร๊ลูแพรแก แว เร๊อ ซี แพ๊. 18ซี เก่ ซิปล่อฉว่า ซิหยื่อ เม หม่าแหน่ เตแร๊ เฮ๊เนอหม่า อาแร๊ เฮ๊อ. แอ๊จื๊อ เม แลแค ปว๋า โตโพ๊ นี๋. แอ๊จื๊อ เม แพ๊ตื๊อ เบ๊อะแว โอ่เต่อเกอ เร๊อ ซี เบ๊อะเนอ แต่เหม่ นี๋. 19แวพู๊ เด๊อ แว โมหนิเร๊อ ซี๋ แว ซิปล่อฉว่า แหน่เจ๊อ เด๊อ ซี เก่ ดุแถ่เผร่แถ่ เกอ เด๊อ แหย่โย ตากยา แซ่เกอดื่อ เร๊อ ครี๊ เนอ เจ๊อ. แว เตซิปล่อฉว่า เออเนอ, อา เด๊อะกู่เด๊อะแก แหน่เจ๊อ แว ซิปล่อ เจ๊อ. แว ซิปล่อ อา เตกู่เตแก เออเนอ, อา แซ่เจ๊อเฮ๊อ เร๊อ โหมะ เด๊อ อา เตเร พู๊โอ่ เร๊อ อาฮ๊อเช เออเนอ เจ๊อ. 20กู๊แหน่เรอ แว ซิหยื่อ โอ่เต่อเกอ เร๊อ ซี เร๊อ แว ซิหยื่อ เฮ๊เบ่แจ่เฮ๊เบ่แหน่ แฮโตเล๊อ แวโหง่ เมเตเฮ๊เรอ แว เตเนโปล เร๊อ ปา ซี โต่ เฮ๊อ.

โหมะฮาการ์ เร๊อ โหมะซาราห์ อาหรี่อาแก

21ซี เด๊อ อา ซิหยื่อ นอทวาแถ่ เตซว๊าเตแส่ เออเนอ เร๊อ ซีแบ่เจ่ เต๊เห่ ซี๋ เตซว๊าเตแส่ เฮ๊ ฮู๊เตเนอหม่า ซี หนิโฮน๊อ เกออู โต่ แอ? แด๊โฉ่ เป่แม๊ แว. 22ลีเทส่อพ๊ากู เฮ๊ เนอ, เพ อับราฮัม พู๊เพรคู โอ่ ซิเนอ. ^b เตเพร หม่า หลู่เล๊เพรเหมาะ พู๊โอ่ เกอเร๊อ ลู, เด๊อ อาโรเตเพร หม่า หลู่เล๊เพรเหมาะ หม่าโต่ เตเพร พู๊โอ่ เกอเร๊อ ลู. ^c 23หลู่เล๊เพรเหมาะ เออเตเพรเนอ อาพู๊โอ่ ฮู๊ แกแย อาเหล่โกล โอ่ เกอเร๊อ เนอ. หม่าแน๊เรอ หลู่เล๊ เพรเหมาะ หม่าโต่ เออเตเพรเนอ, จอแปแหร่ ล๋อ อ๊อแล หนื่ออื่อ โทเฮ๊อ เพ อับราฮัม อาขว่าอาคยา, อาพู๊โอ่ ฮู๊ จอแปแหร่ อ๊อแล หนื่ออื่อ โทเฮ๊อ ลู เนอแพ๊.

24เพรเหมาะ เออซิเนอเนอ อา เด๊อะโล โข่ เป่เฮ๊อ อู เหล่ซิเงโปลแฮ อาเง แพ๊, เมเตเฮ๊เรอ เพรเหมาะ เออ ซิเนอ เนอ อา เด๊อะโลแถ่ จอแปแหร่ อา เตอ๊อแล เนอเจ่อ. เตอ๊อแล หม่าดื่อ เตซว๊าเตแส่ เออเนอหมา จอแปแหร่ เด๊อะตา เร๊อ คูโมเสส เด๊อ ซีนายโฉ่ขุ. เออเนอหมา อา เด๊อะโล โข่ แพ๊. หลู่เล๊เพรเหมาะ โหมะฮาการ์ เตอ๊อแลนอแล เออเนอ, อาพู๊โอ่ เกอเร๊อ แกแย เด๊อ อา ทวา เตซว๊าเตแส่ อาหลู่เล๊ เนอเต๊เห่ เฮ๊อ. 25ฮู๊เนอเฮ๊อ, โหมะฮาการ์ เออเนอ อา แซ่เฮ๊อ เน๊อ โฉ่ซีนาย เด๊อ อาระเบียเก่ เบ๋อ จอแปแหร่ เด๊อะตา อู เตซว๊าเตแส่โฉ่เนอเตเม เฮ๊อ. โหมะฮาการ์ เร๊อ อาพู๊ เต๊เห่เนอ อา ทวา หลู่เล๊ แซ่เฮ๊อเร๊อ เยรูซาเล็มพู๊ เด๊อ อา ทวา เตซว๊าเตแส่ อาหลู่เล๊ เนอเต๊เห่ เฮ๊อ. 26หม่าแน๊เรอ หลู่เล๊เพรเหมาะ หม่าโต่ โหมะซาราห์ เออเนอหมา อา แซ่เฮ๊อ เร๊อ วีเยรูซาเล็ม เด๊อ ม๊อขุ อาขว่าอาคยา, อาพู๊ เต๊เห่เนอ อา ทวา หลู่เล๊ โต่ อา หม่า เปโหมะ เฮ๊อ. 27เมเตเฮ๊เรอ ลีเทส่อพ๊า เฮ๊ดื่อ ฮู๊เออ,
“เพรเหมาะ โชพู๋ เด๊อ อา ข่าเบ่ น๊อ เกออู พู๊โอ่เฮ๊อเช โตโพ๋ โต่ เตเพร, ซิครือ เร๊อ เอ๊โท ซิครือซิลอ ม๋อ. เมเตเฮ๊เรอ เพรเหมาะ โชพู๊ เด๊อ อาเว แด่แก อา เออเตเพร เก่ พู๊ โอ่โหร่ เล๊อ เจ๊อ เน๊อ เพรเหมาะ เด๊อ อาเว โอ่น๊อ เนอเต๊เห่ เจ๊อ ปา.” ^d

28โป่แหว่ ซี๋, กู๊แหน่เออ ซี แซ่เน๊อ คูอิสอัค เนอเฮ๊อ. อา เออเนอ อา โอ่เป๊เจ่แล เน๊อ จอแปแหร่ อา เตอ๊อแล. จอแปแหร่ อา เตอ๊อแล อาขว่าอาคยา, อา แด่ เฮ๊อ ซี ฮู๊ เพ อับราฮัม อาพู๊เหมาะพู๊คู เต๊เห่เนอ เฮ๊อ. 29เบ๊อะเนอเค พู๊เพรคู เด๊อ อา โอ่เป๊เจ่แล ฮู๊ แกแยเห่ขุพู๊ อาเหล่โกล โอ่ เกอเร๊อ เออเตเพรเนอ, อา เมจาเมจือ พู๊เพรคู เด๊อ อา โอ่เป๊เจ่แล เร๊อ แหย่โยบูโพ๊ แบ่เจ่ อา เตอเรอ ฉว่าชอ เออเนอ เตเพร. กู๊แหน่เรอ, อา ทวาแถ่ เกอ ดื่อเฮ๊อ อาเหน่ ฮู๊เนอ เฮ๊อ. ^e 30หม่าแน๊เรอ ลีเทส่อพ๊ากู เฮ๊ เน๊อ, “เหว่เถ่แก หลู่เล๊เพรเหมาะ เร๊อ อา พู๊คู เนอ, เมเตเฮ๊เรอ หลู่เล๊เพรเหมาะ อาพู๊คู เก่ พย๊าหนิ เต่อเกอ ฮู๊อู่เจเออ เร๊อ หลู่เล๊เพรเหมาะ หม่าโต่. เออ อาพู๊คู เนอหม่า อาหนิ โต่.” ^f 31เมฮู๊เนอเรอ โป่แหว่ ซี๋, เป หม่า หลู่เล๊เพรเหมาะ เนอ เตเพร อาพู๊ หม่าโต่. เป หม่า หลู่เล๊เพรเหมาะ หม่าโต่ เนอ เตเพร อาพู๊ เต๊เห่ เฮ๊อ.