Galatians 5

เตปาลา เด๊อ เหย่ซู่ครี๊ อากู

1แซ่ฮู๊ เป เก่ พย๊าหนิ เกอ เตปาลา เออ อาเงเนอ, เหย่ซู่ครี๊ เมแลเปล๊กา เฮ๊อ เป เด๊อ เป ทวา เตซว๊าเตแส่ อาหลู่เล๊ เออ อาเล เฮ๊อ. ฮู๊เนอเรอ โอ่หม่าโอ่กลอ แลแค เร๊อ ตีรี๊แม๊ กาคยา ทวา ปา แต่ แลแค หลู่เล๊ เออเนอ แต่เหม่ นี๋.

2หนิดา เกอเหร่อ แว หม่าเฮ๊อ คูเปาโล เออ เก่ เฮ๊ เป่ ซี เออ, ซี เก่ ครวาเม เกอ เตดื๊อตีลี๊พ๊า เฮ๊เนอหม่า, ครี๊ ข่าเซอ เด๊อ ซีเง เนอ, อา ทวาบุ๊ยทวาเตอเรอ ปา เด๊อ ซีเง เตอเจ๋อ โต่ เฮ๊อ. 3แว เด๊อะรอหนิ คยาแซ๊ ซี เร๊อ แกแย เตเพรเพร เด๊อ อา เก่ จูเอ่ เตดื๊อตีลี๊พ๊า เออเฮ๊เนอ อา โตเบ่ ลือครวาเม ลอ เตซว๊าเตแส่ ปว๋า ตามา. 4เด๊อ ซีเกล เต๊เห่เห่เนอ, อา เตเนซื๊อ แลแค เน๊อ เหย่ซี เก่ ลือครวา เม เตซว๊าเตแส่ เฮ๊เนอหม่า จอแปแหร่ เก่ แด่จ๊อแด่เต ลู ปา, ฮู๊เนอ. ซี เก่ เตเน แลแค ฮู๊เนอ เฮ๊เรอ ซี แบ๊ซว๊าแบ๊โค ปา ซีเหน่ เร๊อ ครี๊ โต่ เฮ๊อ. ซี ท๊อเป ตาพาแกเฮ๊อ ซีเหน่ เร๊อ จอแปแหร่ อาบุ๊ยอาเตอเรอ เออเนอเฮ๊อ. 5หม่าแน๊เรอ เด๊อ แหย่โยบูโพ๊ แบ่เจ่ อาขว่าอาคยาเร๊อ, เป หยื่อเอ่เกอเร๊อ เปเหน่ เร๊อ จอแปแหร่ เก่ แด่จ๊อแด่เต เป, เมเตเฮ๊เรอ เป หยื่อเอ่หนิ เหย่ซู่ครี๊. เป โอ่ป่อแม๊ชือ หม่าแหน่ เจ๊อ เตเออเนอ เฮ๊อ. 6เมเตเฮ๊เรอ เบ๊อะซี ทวาแถ่เฮ๊อ เตเตอเจ๋อโต เร๊อ เหย่ซู่ครี๊ เบ๊อะเนอ, เตดื๊อตีลี๊พ๊า เบ่เบ่, เตดื๊อตีลี๊พ๊า โต่ เบ่เบ่, อา ทวาบุ๊ยทวาเตอเรอ เน๊อ เตอเจ๋อ โต่. เต เด๊อ อา ทวาบุ๊ยทวาเตอเรอ เล๊ออูโค เนอหม่า, เตหยื่อเตแหน่ เด๊อ อา เด๊อะโล เตโม จอแปแหร่ เร๊อ อูโร เออเนอ แพ๊.

7ซี แกล่ แร๊แร๊แจ่แจ่ โทเฮ๊อ หม่าแน๊เรอ หม่าอูเป เตเพร นอโอ่โก๊ ซี เด๊อ ซี เก่ หนิดา แต่ เตหมะเตจ๊อ แต่เหม่ เออเนอ เป? 8จอแปแหร่ เด๊อ อา เอ๊ ซี เออเตเพร เนอหม่า, อา นอโอ่โก๊ เร๊อ ซี โต่. 9“โฮหมื่อ ตี๊กิ แพ๊เนอ อา เม โต๊โผ่แถ่ เอ๊แจ่ ค๊อมู ตื๊อบื่อลอ เจ๊อ.” ^a 10หม่าแน๊เรอ เด๊อ เป ทวาแถ่เฮ๊อ เตเตอเจ๋อ โต เร๊อ แบ่เจ่ เฮ๊อ อาขว่าอาคยา, แว หยื่อเอ่ เร๊อ ซี เตแม๊เถอะ เออเนอหมา อา ลูจว๊าโค๊ เร๊อ แว โต่. อูเป๊ เบ่เบ่ เด๊อ อา เมดู๊แด ซี เตเพรเพรเนอ, จอแปแหร่ เก่ เมจากาคยา ดื่อ ลู ปา. 11โป่แหว่ ซี๋, แว เก่ แด๊โฉ่โด่แน เป่ ซี เร๊อ แกแยยิวพู๊ อาเหล่โกล ดื๊อตีลี๊พ๊า เนอหม่า เต เด๊อ อา โหล่ดุ หม่าโต่. เด๊อ เหย่ซู่ อาขว่าอาคยา, แกแยยิวพู๊ เต๊เห่ เมจาเมจือ ตื๊อดื่อปา แว แพ๊. แว เก่ แด๊โฉ่โด่แน เป่ ซี เน๊อ ซี เบ่ ดื๊อตีลี๊พ๊า เก่เฮ๊เนอหม่า, แกแยยิวพู๊ เต๊เห่ เกล๊ ซิปล่อโม แหน่ แพ๊. หม่าแน๊เรอ แว โด่แน ฮู๊เนอโต่. แว โด่แน แพ๊ เร๊อ ครี๊ อี๊ถื่อดีเต่ เด๊อ แกแยยิวพู๊ เต๊เห่ ซิปล่อ โม เกอเร๊อ โต่เออ อาหรี่อาแก แพ๊. 12แกแย เด๊อ อา เมจา เมซู๊ซ๊า ซี ซิปล่อ เร๊อ เตดื๊อตีลี๊พ๊า อาหรี่อาแก เต๊เห่เนอ, แว ซิหยื่อ นอชุ๊ยแกหนิ ลอโป่ เจ๊อ อา เดอะ เนอ เจ๊อ.

13แว โป่แหว่ ซี๋, แซ่ฮู๊ ซี เก่ พย๊าหนิ เตปาลา อาเงเนอเรอ, จอแปแหร่ เอ๊เฮ๊อ ซี เฮ๊อ. หม่าแน๊เรอ เด๊อ ซี พย๊าหนิ เตปาลา เออ อาขว่าอาคยาเร๊อ, นอเป๊อ แต่ ซีเหน่ เร๊อ ซี สุ่ยเทอพ๊าหย่า อา เตซิหยื่อซิลอ เนอเต๊เห่ แต่เหม่ นี๋. หม่าแน๊เรอ, ซี โต โม เกอเร๊อ ลู เตเพร เร๊อ เตเพร, ซี โต เมจว่าเกอ เกอเร๊อ ลู เตเพร เร๊อ เตเพร. 14เมเตเฮ๊เรอ ล๋อ เตซว๊าเตแส่ เต๊เห่เนอ เก่ แด่โอ่ปล๊อเต่อ ลอ ลู ตือมือแพ๊ เฮ๊เนอหม่า, อา เก่ เฮ๊ เน๊อ, “โมหนิ เร๊อ แกแย เด๊อ อา โอ่ ผื่อ ตีวี๊ตาวา เร๊อ เน เนอเต๊เห่ แซ่เน๊อ เน โมแล เกอเร๊อ เนเหน่ เนอ นี๋,” อา เก่ เฮ๊ แหน่ ฮู๊เออ แพ๊. ^b 15หม่าแน๊เรอ ซี เก่ แอ๊ ซีเหน่ ฮู๊ เตมีเตแหม่ เร๊อ ซี เก่ เอ่เกอเร๊อ คยาลู เตเพร เร๊อ เตเพร เฮ๊เนอหม่า รอหนิ แลแค ซีเหน่ นี๋, เมเตเฮ๊เรอ ปาหม่า ซี เมปย๊าเมหลู่ เกอเร๊อ ลอคยา ซีเหน่ เตเพร เร๊อ เตเพร เห่.

โอ่เซอเพร เร๊อ แหย่โยบูโพ๊ แบ่เจ่

16ฮู๊เนอเรอ แว เฮ๊ ซี, โอ่เซอเพร แลแค ฮู๊ แหย่โยบูโพ๊ แบ่เจ่ ยูแกล๊ยูโกล หนิ ซี เนอ นี๋. ซี เก่ เมฮู๊เนอ ตื๊อเรอ ซี ลือครวา เม ปา ซี สุ่ยเทอพ๊าหย่า อา เตซิหยื่อซิลอ โต่ เฮ๊อ. 17เมเตเฮ๊เรอ สุ่ยเทอพ๊าหย่า อา เตซิหยื่อซิลอ เออเนอหมา, อา ลูจว๊า โค๊แก เร๊อ แหย่โยบูโพ๊ แบ่เจ่ อา เตซิหยื่อซิลอ. เร๊อ แหย่โยบูโพ๊ แบ่เจ่ อา เตซิหยื่อซิลอ เออเนอ อา ลูจว๊า โค๊แก คยาแซ๊ดื่อ เร๊อ เหน่กล่อพ๊าหย่า อา เตซิหยื่อซิลอ. เตเออ เนอเจ่อเนอ อา เร ลู โต่ อาขว่าอาคยา, ฮู๊ ซี ซิหยื่อ เม เนอ ซี เมแจ่ ปา โต่ เฮ๊อ. ^c 18แหย่โยบูโพ๊ แบ่เจ่ เก่ ซู ซี เฮ๊เรอ, ซี โอ่ ปา เด๊อ เตซว๊าเตแส่ อาเล โต่ เฮ๊อ.

19สุ่ยเทอพ๊าหย่า อาเตเม เนอเต๊เห่หม่า อา โอ่โล ลอหล่าตี๊กลิ เจ๊อ ฮู๊เต เฮ๊เนอเรอ อา จว๊าซื๊อ เพรเหมาะเพร คู, อา โอ่เซอเพร ซิรอซิเร, อาซิปล่อ ปาต๊าเปอเตอ, 20อา จ๊อเบ แลแค เพรแหย่โยแหย่กี, อา เม แลแค โลเน๊มู๊แหม่รีแจ่ เตเม เต๊เห่, อา ซิเถ่ซิฮา เกอเร๊อ ลู, อา เคร๊แขะ คยาลู, ซิเคว๊ คยาลู, ซิปล่อดุครือ ลู, ซิหยื่อ มุย โลเทอโลเก่, ซิปล่อ โนกู ลู โต่, ซิโตโคแก ครี๊พู๊ ตู๊หมู่ตอกล๊อ เด๊อ อาโร เต๊เห่. 21แม๊ปูเมเอ่ อูขุ, เตเอ่มือโอแพร๊, เมป่วย เด๊อ อา แลคื๊อ แลลอ เร๊อ เตเม อาโร เด๊อ อาแซ่ เร๊อ เออเนอเต๊เห่. ฮู๊ แว เด๊อะรอ รอหนิ โทเฮ๊อ ซี เด๊อ อาเหร่อเค เนอ เฮ๊อ, แว เด๊อะรอ รอหนิ โป่คยาแซ๊ ซี กู๊แหน่เออ. แกแย เด๊อ อา โอ่เซอเพร ฮู๊เออ เต๊เห่เนอ, อา พย๊าหนิ เกออู จอแปแหร่ เทอ เลเก่กู อา เตเด๊อะบุ๊ยเด๊อะเตอเรอ โต่.

22หม่าแน๊เรอ แหย่โยบูโพ๊ แบ่เจ่ เนอหม่า อา เด๊อะ โอ่แถ่ เตโม, เตซิครือซิลอ, อาเพรอาดือ, เตแด่ทูซิปล่อ, เตซิยอกล่าเบ่, เตตว่าเตแร๊, เตจูลาพย๊าโหง่, 23เตซิโดซิงา เร๊อ เตค๊อเป่เร๊อ ซิปล่อ ซี เต๊เห่เนอ เฮ๊อ. ซี เก่ เมฮู๊เออ เฮ๊เนอหม่า, อาซื๊อ เฮ๊อ เตซว๊าเตแส่ เฮ๊น๊อ ฮู๊เนอ ตาม๋า โต่. 24แกแย เด๊อ อา ทวา เหย่ซู่ครี๊ อาเต เต๊เห่ เนอหม่า อา สุ่ยเทอพ๊าหย่า อา เตซิหยื่อซิลอ เป๊อตี๊หรี่ ปา ลู โต่ เฮ๊อ. อา มือเซอแถ่แก เฮ๊อ อา สุ่ยเทอพ๊าหย่า อา เตซิหยื่อซิลอ ล๋อ ปลี เด๊อ อี๊ถื่อดีเต่ อาลู เฮ๊อ. 25เป โอ่เซอเพร เฮ๊อ เร๊อ แหย่โยบูโพ๊ แบ่เจ่ อาขว่าอาคยา, เป เบ่ ครวาเม ฮู๊ แหย่โยบูโพ๊ แบ่เจ่ ยูแกล๊ยูโกล เป เนอ. 26เป เบ่ พย๊าแด่ดุหนิ เปเหน่ โต่. เมซิปล่อดุ เกอเร๊อ แต่ ลู เตเพร เร๊อ เตเพร แต่เหม่. ซิเคว๊ เกอเร๊อ คยาลู เตเพร เร๊อ เตเพร แต่เหม่ นี๋.