Galatians 6
วี๊แย๊ โหร่ลู เตเพร เร๊อ เตเพร อา เตวี๊เตแย๊
1โป่แหว่ ซี๋, ซี เก่ แม๊เถอะ แกแย เตเพรเพร เด๊อ อา เมซื๊อ เต เต๊อเจ่อเจ่อ เฮ๊เนอ, ซี เด๊อ อา โอ่เซอเพร ฮู๊ แหย่โยบูโพ๊ แบ่เจ่ ยูแกล๊ยูโกล หนิ ซี เออ เต๊เห่เนอ, ซี โหล่ จว๊า อิซว๊าอี๊แส่ กาคยา อา. ซี เบ่ อี๊ลอ ซิโดซิงา อา โทเรอ แซ่ฮู๊ ซี เก่ ครวาจว๊าเกอ แต่ เด๊อ อิลออี๊โหล่ อากู แต่เหม่ เนอ, รอหนิ แลแค ซีเหน่ นี๋. 2วี๊แย๊ โหร่ลู เตเพร เร๊อ เตเพร อา เตวี๊เตแย๊ เต๊เห่ นี๋. ซี เก่ เมฮู๊เนอ เฮ๊เนอหม่า ซี เม เฮ๊อ ฮู๊ เหย่ซู่ครี๊ อิซว๊าอี๊แส่แก เนอเฮ๊อ. 3แกแย เตเพรเพร เด๊อ อา เฮ๊ เกอเร๊อ อาเหน่ เน๊อ, แว หม่า แกแย เด๊อ อู โหล่ดุหนิเล๊อะ เตเพร อา เฮ๊ หม่าแน๊เรอ อา เก่ หม่า ฮู๊เนอ หม่าโต่ เฮ๊เนอหม่า อา แลโฮ แล เกอเร๊อดื่อ อาเหน่ แพ๊. 4แกแย ปว๋า เตเพร โต แด๊เฮอแล เกอเร๊อดื่อ อาเหน่. เร๊อ อา โตเบ่ ดี๊เจหนิ อาเหน่ เร๊อ แกแย เด๊อ อาโร เต๊เห่ โต่. เตเม เด๊อ อา เมโทเฮ๊อ เต๊เห่เนอ, อา เก่ แร๊ เฮ๊เรอ เด๊อ อา เตเมเออ อาขว่าอาคยา, อา เก่ ซิครือ หม่า อาหนิ แพ๊. 5เมเตเฮ๊เรอ แกแย ปว๋า เตเพร เบ่วี๊เบ่แย๊ เกอเร๊อดื่อ อา เตเอ่เตแร เต๊เห่. 6แกแย เด๊อ อา อิซว๊าอี๊แส่ ซี เร๊อ จอแปแหร่ อาลาอาโหง่ เต๊เห่ เนอหม่า, ซี โตเบ่ เด๊อ เป่ เหย่ซี เตตว่าเตแร๊ ปว๋าเต๊อเจ่อ. 7แลโฮแล เกอเร๊อ แต่ ซีเหน่ แต่เหม่ นี๋. เตเน แต่ เร๊อ เน เก่ เมตาดวา เมโอ๊เมบี๊ เบ๊แจ่ เด๊อ จอแปแหร่ อา เป๊เส่เง แต่เหม่ นี๋. เน โหล่ตา ฮู๊เตเนอ, เน เก่ เก๊เบ่น๊อ เกอเร๊อ คยาแซ๊ดื่อ ปา. 8เมเตเฮ๊เรอ แกแย เด๊อ อา โหล่ตา สุ่ยเทอพ๊าหย่า อา เตซิหยื่อซิลอ เต๊เห่เนอ, อา เก่ เก๊ กาคยา เบ่น๊อ เกอเร๊อ คยาแซ๊ดื่อ เตปย๊าเตหลู่ เนอเต๊เห่ ปา. หม่าแน๊เรอ แกแย เด๊อ อา โหล่ตา เตครวาเมเกอ ฮู๊ แหย่โยบูโพ๊ แบ่เจ่ อา เตยูแกล๊ยูโกล ลู เต๊เห่เนอ, อา เก่ เก๊เบ่น๊อ เร๊อคยาแซ๊ดื่อ ซิปล่อเซอเพร ตูจูเพร ปา. 9เมเตแร๊เนอ ซิปล่อปย๊า แลแค แต่เหม่ นี๋. เป เก่ ซิปล่อปย๊าโต่ เฮ๊เรอ, ช๋า ม๊อเนอม๊อเซ โตเก๊ ปาเนอ, เป เก่ เก๊เบ่น๊อ คยาแซ๊ดื่อ เตเส่เตโพ ปา. 10ฮู๊เนอ อาขว่าอาคยา, เบ๊อะเกเต๋ เบ่เบ่, เบ๊อะเป พย๊าหนิ ตาโตตาเบ่ แร๊ เบ๊อะเนอ, เป เบ่ เมแร๊ เป่ อู ปว๋า เตเพร. หม่าแน๊เรอ ซี เมเตแร๊เนอ แม๊ดุเหร่อเล๊อ โค๊เป่ดื่อ เพรหยื่อเอ่ เออ เนอเต๊เห่ นี๋.เตเด๊อะรอ เร๊อ เตเฮ๊โมเฮ๊แร๊ เด๊อคยา ตื๊อดื่อ
11กู๊แหน่เออ, แม๊ แลแค มอ! ลีปล่อดุ เออเต๊เห่ เนอหม่า แว รา เร๊อดื่อ เร๊อ แวเหน่ แพ๊. 12แกแย เด๊อ อา นอตือดื๊อ ซี เนอ เบ่ ดื๊อตีลี๊พ๊า เนอเต๊เห่หม่า อา ซิหยื่อ นอถู่เซ๊หนิ อู เร๊อ อาเหน่ แพ๊. เมเตเฮ๊เรอ แกแย เนอเต๊เห่หม่า อา เก่ แด๊โฉ่โด่แน ตื๊อแพ๊ ครี๊ อาเตเซอ เด๊อ อี๊ถื่อดีเต่ลู แพ๊ เก่เฮ๊เรอ อา ซิอิเช อู เมจาเมจือ ลูเนอ. 13เหย่ซี เด๊อ อา ดื๊อตีลี๊ เจ๊อพ๊า เนอเต๊เห่ เจ๊อ เร๊อ อา จูเอ่ เกออู เตซว๊าเตแส่ โต่. หม่าแน๊เรอ แซ่ฮู๊ เหย่ซี เก่ แด่แถ่โล แลแค อาซิปล่อ เร๊อ ซี ครวา ดื๊อตีลี๊ เป่ เกอ ลู พ๊า เออ อาคยา เนอเรอ, เหย่ซี ซิหยื่อ นอดื๊อตีลี๊ เกอ ซีพ๊า แพ๊. 14แว เก่ เฮ๊เบ่แถ่โล เกอ ฮู๊ เหย่ซีเนอ เก่เฮ๊เรอ, แว เก่ เฮ๊เบ่แถ่โล แพ๊ เด๊อ แว โด่แน เป่ แบ่เจ่ เหย่ซู่ครี๊ อา อี๊ถื่อดีเต่ อาหรี่อาแก เออเนอ แพ๊. เหย่ซู่ เซอ เด๊อ อี๊ถื่อดีเต่ลู เฮ๊อ อาขว่าอาคยา, เตปว๋า เต๊อเจ่อ เด๊อ อา จิจือ เร๊อ เห่ขุ เออเต๊เห่เนอ, อา เซอแก เป่ลอเฮ๊อ เด๊อ แวเงเฮ๊อ, ฮู๊เนอเฮ๊อ, แว เร๊อ แว เซอแก เป่ลอเฮ๊อ เตเด๊อ อา จิจือ เร๊อ เห่ขุ เออเนอเต๊เห่ เฮ๊อเฮ๊อ. ▼▼อาโหง่แลช๊า หม่า อา ซิหยื่อ เฮ๊ ฮู๊เออ เหย่ซู่ เซอ เด๊อ อี๊ถื่อดีเต่ลู เฮ๊อ อาขว่าอาคยา, เต เด๊อ เห่ขุพู๊ ซิหยื่อซิลอ เต๊เห่เนอ, แว แด่ดุ ปา เตอเจ๋อโต่ เฮ๊อ. เร๊อ เห่ขุพู๊ เด๊อ อาโร เต๊เห่เนอ, อา เตเนดุ ปา แว เตเพร่ว โต่ เฮ๊อ.
15แกแย ดื๊อตีลี๊พ๊า เต๊เห่ เบ่เบ่, อา ดื๊อตีลี๊ เกออู โต่ เต๊เห่ เบ่เบ่, อา โหล่ดุ เน๊อ เตอเจ๋อโต่. เตเด๊อ อา โหล่ดุเล๊ออู เนอหม่า ทวาแถ่ จอแปแหร่ อาแกแย เออเนอ แพ๊. 16จอแปแหร่ อาเพรอาดือ เร๊อ อา เตซิยอกล่าเบ่ เก่ โอ่ เกอดื่อ เร๊อ แกแย เด๊อ อา จูเอ่ เตอิซว๊าอี๊แส่ เออเนอ เต๊เห่อาลู เร๊อ จอแปแหร่ อาแกแย หม่าแหน่ เร๊อดื่อ เนอเต๊เห่ อาลู นี๋. 17ตาแฮเง กู๊แหน่ เออเนอ, นอ เมซู๊ซ๊าแมแฮ ปา แต่ แว ซิปล่อ เร๊อ อู เตเพร่ว แต่เหม่ นี๋, เมเตเฮ๊เรอ เตอาโจยเด๊อ อา โอ่ เด๊อ แวเหน่ลู เออเต๊เห่ เนอหม่า, อา เด๊อะโล เร๊อ แว หม่า เหย่ซู่ครี๊ อาหลู่เล๊ เตเพร หม่าแหน่ เฮ๊อ. 18โป่แหว่ ซี๋, แบ่เจ่ เหย่ซู่ครี๊ เก่ ฉู่โนดื่อ อาบุ๊ยอาเตอเรอ เด๊อ ซี ล๋อ ปลี อา ซิปล่อกู นี๋. อาเมน
Copyright information for
EkySCThai