Genesis 10

เพโนอาห์ อาพู๊เพรคู เต๊เห่ อากลุยอาลุ๊ย

1เออ หมา เตราม๊าราแดหนิ เพโนอาห์ อาพู๊เพรคู คูเซม, คูฮาม เน๊อ คูยาเฟท ซี อากลุยอาแล ตากาแล เต๊เห่ เด๊อ อาพู๊ โอ่แล แลแค เบ๊อะ เทอดุ โทเฮ๊อ เห่ขุ เบ๊อะเนอเต๊เห่ อาหรี่อาแก เฮ๊อ.

เพยาเฟท อากลุยอาลุ๊ย เน๊อ อาเมวเจ่อ เต๊เห่

2เมวเจ่อ เด๊อ อากลุยอาลุ๊ย ตากาแล แฮเง เน๊อ เพยาเฟท เต๊เห่ เนอหม่า, โกเมอร์ เมวเจ่อ, มาโกก เมวเจ่อ, มาดัยเมวเจ่อ, ยาวาน เมวเจ่อ, ทูบัล เมวเจ่อ, เมเชค เมวเจ่อ เน๊อ ทิราส เมวเจ่อ เนอเต๊เห่ เฮ๊อ. 3เมวเจ่อ เด๊อ อากลุยอาลุ๊ย ตากาแล แฮเง เน๊อ เพโกเมอร์ เต๊เห่ หม่า อัชเคนัสเมวเจ่อ, รีฟาท เมวเจ่อ เน๊อโทการมาห์ เมวเจ่อ เนอเต๊เห่ เฮ๊อ. 4เมวเจ่อ เด๊อ อากลุยอาลุ๊ย ตากาแล แฮเง เน๊อ เพยาวาน เต๊เห่ เนอหม่า, เอลีชาห์เมวเจ่อ, ทารชิชเมวเจ่อ, คิทธิมเมวเจ่อ เน๊อ โดดานิม เมวเจ่อ เนอเต๊เห่ เฮ๊อ.

5เหย่ซี เออเต๊เห่ เนอหม่า อา โอ่ปีชีจว๊า ลอ รว๋า เก่ เบ๊อะ เมติเทอเรเนียน เทอดุซาวาทือ เนอ. เพยาเฟท อากลุยอาลุ๊ย โต๊โหมะ เน๊อ โต๊โหมะ เนอ อา ทวาแถ่ โค๊ ลอดื่อ เมวเจ่อ เต๊อเจ่อ เน๊อ เต๊อเจ่อ, โอ่เกอเร๊อ ข่อดื่อ อาเก่ เน๊อ อาเก่, อาโหง่ เน๊อ อาโหง่.

เพฮาม อากลุยอาลุ๊ย เน๊อ อาเมวเจ่อ เต๊เห่

6เมวเจ่อ เด๊อ อากลุยอาลุ๊ย ตากาแล แฮเง เน๊อ เพฮาม เต๊เห่ เนอหม่า,

คูชเมวเจ่อ, อียิปต์เมวเจ่อ, พูต เมวเจ่อ เน๊อ คานาอัน เมวเจ่อ เนอ เต๊เห่ เฮ๊อ.

7เมวเจ่อ เด๊อ อากลุยอาลุ๊ย ตากาแล แฮเง เน๊อ เพคูช เต๊เห่ เนอหม่า, เส-บา เมวเจ่อ, ฮาวิลาห์ เมวเจ่อ, สับทาห์ เมวเจ่อ, ราอามาห์ เมวเจ่อ เน๊อ สับเทคา เมวเจ่อ เนอ เฮ๊อ. เมวเจ่อ เด๊อ อากลุยอาลุ๊ย ตากาแล แฮเง เน๊อ เพ ราอามาห์ เต๊เห่ เนอหม่า, เชบา เมวเจ่อ เน๊อ เดดาน เมวเจ่อ เนอเฮ๊อ.

8เพคูช หม่า คูนิมโรด อาเพ. เบ๊อะ เห่ขุเออ คูนิมโรด หม่า เพร เด๊อ อา โอ่ เน๊อ เตอเรอฉว่าชอ เด๊อ เตช๊าเตปา ตากยา อาเหร่อเล๊อ เตเพร. 9เด๊อ จอแปแหร่ ตูจูเพร อาเป๊เส่เงเนอ คูนิมโรด หม่า เพรลือเตมี เด๊อ อาแจ่อาลีแม แหน่เจ๊อ เตเพร, ตื๊อเร๊อ โหง่ เฮ๊โอ่ เน๊อ, “อาแซ่ เจ๊อ เน๊อ คูนิมโรด, เพรลือแจ่ลีแมเตมี เด๊อ จอแปแหร่ ตูจูเพร อาเป๊เส่เง เนอเตเพร เจ๊อ.” 10วีดุ เด๊อ อา ช๊อแถ่ เหร่อเล๊อ เด๊อ ชินาร์เก่กู เต๊เห่ เนอหม่า บาบิโลน, วีเอเรก, วีอาเก่ด๊า เน๊อ วีก๊อเหน่ เออเต๊เห่ เฮ๊อ. 11อา โอ่ เบ๊อะ อาเก่ เนอเต๊เก่ อากู เร๊อ อา เถ่จว๊า เด๊อ อัสซีเรียเก่ เร๊อ อา จว๊า ช๊อแถ่ วีนีนะเวห์, วีเรโหโบทอีร์, วีคาลาห์, 12เน๊อ วีเรเสน, เร๊อ วีเรเสน หม่า วีดู๋ แหน่เจ๊อ เร๊อ อา โอ่ เบ๊อะ วีนีนะเวห์ เน๊อ วีคาลาห์ อาเปล่กู.

13เมวเจ่อ เด๊อ อากลุยอาลุ๊ย ตากาแล แฮเง เน๊อ เพอียิปต์ เนอเต๊เห่ หม่า, ลูดิม เมวเจ่อ, อานามิม เมวเจ่อ, เลหะบิม เมวเจ่อ, นัฟทูฮิม เมวเจ่อ, 14ปัทรุสิม เมวเจ่อ, คัสลูฮิม เมวเจ่อ เน๊อ คัฟโทริม เมวเจ่อ เนอเต๊เห่เฮ๊อ. ฟีลิสเตีย เมวเจ่อ เนอหม่า อาตากาแล แฮเง เด๊อ คัสลูฮิม เมวเจ่อ.

15เพคานาอัน อาพู๊เต๊เห่ เนอหม่า หม่า เฮ๊อ อาพู๊แหว่เพร่ว คูไซดอน, โทเร๊อ เฮท เมวเจ่อ, 16เออเยบุส เมวเจ่อ, อาโมไรต์เมวเจ่อ, เกอร์กาชี เมวเจ่อพู๊, 17ฮีไวต์ เมวเจ่อ, อารคี เมวเจ่อ, สินี เมวเจ่อ, 18อารวัด เมวเจ่อ, เศเมอร์ เมวเจ่อ เน๊อ ฮามัธ เมวเจ่อ เนอเต๊เห่ เฮ๊อ.

เร๊อ เด๊อคยาเนอ คานาอัน เมวเจ่อ เต๊เห่ เพ๊เถ่ ปีชี เอ๊แถ่ โป่. 19คานาอันเก่ เก่กือ เนอหม่า อา เป๊อแถ่ เบ๊อะ วีไซดอน เร๊อ อาแหล่จว๊าโต่ เด๊อ วีเก-ราร์, วีกาซา อาช๊า โทเร๊อ อาแหล่ จว๊าโต่โป่ เด๊อ วีโสโดม, วีโกโมราห์, วีอัดมาห์ เน๊อ วีเศโบยิม, เร๊อ อา จว๊าโต่ ปา เด๊อ วีลาชา เจ๊อ.

20ล๋อ เออเต๊เห่ หม่า เพฮาม อาพู๊เพรคู ซี อากลุยอาลุ๊ย เต๊เห่ เฮ๊อ เร๊อ เหย่ซี โอ่เกอเร๊อ ดื่อ เน๊อ อากลุยอาแล เน๊อ อาลาอาโหง่ เน๊อ อาเทออาเก่ เน๊อ อาเมวอาเจ่อ เร๊อดื่อ เฮ๊อ.

เพเชม อากลุยอาลุ๊ย เน๊อ อาเมวเจ่อ เต๊เห่

21เพเชม เด๊อ อา ดุเล๊อ เน๊อ เพยาเฟท เออเตเพร เนอหม่า อาพู๊ โอ่เอ๊ ลา, เร๊อ เพเชม หม่า หม่าเฮ๊อ เพเอเบอร์ อาพู๊เต๊เห่ อาเพออาโพ เฮ๊อ. 22เร๊อ เมวเจ่อ เด๊อ อากลุยอาลุ๊ย ตากาแล แฮเง เน๊อ เพเชม เต๊เห่ เนอหม่า หม่าเฮ๊อ เอลาม เมวเจ่อ, อัสชูร เมวเจ่อ, อารปัคชาด เมวเจ่อ, ลูด เมวเจ่อ เน๊อ อารัม เมวเจ่อ เนอเต๊เห่ เฮ๊อ. 23เมวเจ่อ เด๊อ อากลุยอาลุ๊ย ตากาแล แฮเง เน๊อ เพอารัม เต๊เห่ เนอหม่า, อูส เมวเจ่อ, ฮูล เมวเจ่อ, เกเธอร์ เมวเจ่อ เน๊อ มัช เมวเจ่อ เนอเต๊เห่ เฮ๊อ.

24เพอารปัคชาด หม่า คูเชลาห์ อาเพ, เร๊อ เพเชลาห์หม่า คูเอเบอร์ อาเพ. 25เพเอเบอร์ เนอหม่า อาพู๊เพรคู โอ่ ซิเนอ. เร๊อ อาพู๊ แหว่เพร่วหม่า อามุย เน๊อ คูเพเลก. เบ๊อะ อา ทือเค, เนอ แกแยเห่ขุพู๊ โอ่ ปีชี จว๊าโพร๊ จว๊าแพร ลอ เด๊อ เห่ขุเออ เร๊อ เพเลก อาโหง่แลช๊า หม่า จว๊าปีชี. เด๊อ อาโป่เพรคู ติ เร๊อ อามุย เน๊อ คูโยกทาน.

26เมวเจ่อ เด๊อ อากลุยอาลุ๊ย ตากาแล แฮเง เน๊อ เพโยกทาน เต๊เห่ เนอหม่า, อัลโมดัด เมวเจ่อ, เชเลฟ เมวเจ่อ, ฮาซารมาเวท เมวเจ่อ, เยราห์ เมวเจ่อ, 27ฮาโดรัม เมวเจ่อ, อุซาล เมวเจ่อ, ดิคลาห์ เมวเจ่อ, 28โอบาล เมวเจ่อ, อาบีมาเอล เมวเจ่อ, เชบา เมวเจ่อ, 29โอฟีร์ เมวเจ่อ, ฮาวิลาห์ เมวเจ่อ เน๊อ โยบับ เมวเจ่อ ซี เนอเต๊เห่ เฮ๊อ. ล๋อ แกแยเออ เต๊เห่ เนอหม่า เพโยกทาน อากลุยอาลุ๊ย เน๊อ อาเมวอาเจ่อ เต๊เห่เฮ๊อ.

30เหย่ซี เก่กือ เหล่โอ่ เนอ อา เป๊อแถ่ เบ๊อะ เมชาเก่ โต่ เด๊อ เสฟาร์ เด๊อ อาโอ่ เด๊อ เก่ซิเถ่ เนอตากยา.

31เออหม่า เพเชม อาพู๊เพรคู ซี อากลุยอาแล เน๊อ อาเมวอาเจ่อ เต๊เห่ เฮ๊อ เร๊อ เหย่ซี โอ่เกอเร๊อดื่อ เน๊อ อากลุยอาแล เน๊อ อาลาอาโหง่ เน๊อ อาเทออาเก่ เน๊อ อาเมวอาเจ่อ เร๊อดื่อ เฮ๊อ. 32ล๋อ เมวเจ่อ เออเต๊เห่หม่า อาตากลุยตาลุ๊ย ลอเฮ๊อ เด๊อ เพโนอาห์ อาพู๊เพรคู อากลุยอาลุ๊ย เด๊อ อา โอ่ เด๊อ เหย่ซี อาเมวอาเจ่อกู เนอเต๊เห่ เฮ๊อ, เบ๊อะ เทอดุบี๊ โทเฮ๊อ เห่ขุ เบ๊อะเนอ, เหย่ซี อากลุยอาลุ๊ย เออเต๊เห่ โอ่ปีชี จว๊าลอ เด๊อ เห่ขุ ต๊าบ่าลอ เจ๊อ.