Genesis 16
โหมะฮาการ์ เน๊อ คูอิชมาเอล
1คูอับราม อาเม เหมาะซาราย เนอ อา โซพู๊ เร๊อ อา พู๊โอ่แลน๊อ เตเพร่ว โต่. หม่าแน๊เรอ อาหลู่ อียิปต์ เมวเจ่อโหมะ โอ่เกอ ลู เตเพร เร๊อ อามุย เน๊อ เหมาะฮาการ์. 2ฮู๊เนอเร๊อ อา เฮ๊ อาเว คูอับราม เน๊อ, “จอแปแหร่ ตูจูเพร นอโชพู๊ เฮ๊อ แว เฮ๊อ. จว๊าโอ่เมอเต่อ มอ เน๊อ แวหลู่เล๊โหมะ เนอ. ตาแร๋ หม่า แว เก่ พย๊าหนิ แฮเง เกอ แวพู๊คู เร๊อดื่อ เน๊อ อาขว่าอาคยา ปา เกอเหล่.” เร๊อ คูอับราม จู เกอฮู๊ อาเม เหมาะซาราย เฮ๊ ลู เนอ. 3เร๊อ เหมาะซาราย เด๊อะ อาหลู่โหมะ เหมาะฮาการ์ เออ เน๊อ อาเว เด๊อ อา เก่ ทวา ลูเม เตเพร. เออหม่า อา ทวาแถ่ เบ๊อะ คูอับราม จว๊าโอ่ เด๊อ คานาอันเก่กู บาโท เฮ๊อ อาหน่าเช๊อ เบ๊อะเนอ, เฮ๊อ. 4ฮู๊เนอเร๊อ คูอับราม โอ่เมอเต่อ เน๊อ เหมาะฮาการ์ เร๊อ อา โหมะดอแถ่. เบ๊อะ อา ซิเง เฮ๊อ เน๊อ อา โหมะดอเฮ๊อ เบ๊อะเนอ, อา แด่แถ่โล เกอเร๊อ อาเหน่ เร๊อ อา เตเน ปีตี๊แก อาแบ่เจ่โหมะ เหมาะซาราย. 5เออโตโพ๊ เร๊อ เหมาะซาราย เฮ๊ คูอับราม เน๊อ, “เหมาะฮาการ์ เตเนปีตี๊ แว เออเนอหม่า หม่า เด๊อ เนเตซื๊อ เออ อาขว่าอาคยาแพ๊. แซ่ฮู๊ อา เก่ ทวา เนเม อาเงเนอ, แว เด๊อะ อา เน๊อ แวเหน่ ตื๊อดื่อเร๊อ กู๊แหน่เร๊อ อา ซิเง เฮ๊อ เน๊อ อา โหมะดอเฮ๊อ เร๊อ อา เตเน ปีตี๊แก เจ๊อ แว เจ๊อ. เมฮู๊เนอเร๊อ แว เน๊อ เนเออ เบ๊อะเต เตเพรเต อาโตเล๊อ เนอ, จอแปแหร่ ตูจูเพร เก่ เมโตเมเบ่ ดื่อ เป ปา นี๋.” 6เร๊อ เพอับราม เฮ๊ฉื่อ ลู เน๊อ, “อาแร๊ เฮ๊อ, อา หม่า เนหลู่เล๊โหมะ เน๊อ เนเหน่ เร๊อ อา โอ่ เด๊อ เนกู่ยา กู แพ๊. เน เตเน เน๊อ อาแร๊เล๊อ ฮู๊เตเนอ, จู๋ ดื่อ เฮ๊อ เน เม อา เนอ.” เออโตโพ๊ เรอ เหมาะซาราย เมจาเมจือ หนิ เหมาะฮาการ์ เร๊อ อา เถ่แกล่จว๊า แก เหมาะซารายเหล่. 7จอแปแหร่ ตูจูเพร อาเตเน่วม๊อขุพู๊ แม๊เถอะ เหมาะฮาการ์ เบ๊อะ เก่เชเทอแก่ เหล่โอ่ เทอเถ่ขู่กู อาช๊า โต๊โผะ, เหล่โอ่ เนอโต๊โผะ หม่า อา โอ่ เบ๊อะ แกล๊ เหล่จว๊า เด๊อ ชูร์เก่ เนอโตโบ อาลู. 8เร๊อ อา เฮ๊ ลู เน๊อ, “เหมาะซาราย อาหลู่โหมะ เหมาะฮาการ์, เน โอ่ เบ๊อะเต แฮ, เร๊อ เน เกเร จว๊าโต เบ๊อะเต?” เร๊อ เหมาะฮาการ์ เฮ๊ ฉื่อ ลู เน๊อ, “แว เถ่แกล่จว๊า แก แวแบ่เจ่โหมะ เหมาะซาราย อาเหล่.” 9เร๊อ จอแปแหร่ ตูจูเพร อาเตเน่วม๊อขุพู๊ เฮ๊ กาคยาฉื่อ ลู เน๊อ, “กาคยา ทวา คยาแซ๊ มอ ลูหลู่ เนอ.” 10เร๊อ อา เฮ๊โป่ ลู เน๊อ, “แว เก่ นอ โอ่โหร่โอ่เอ๊ แถ่ดื่อ เนกลุยเนแล เต๊เห่ ปา เร๊อ เตเพร่ว หม่า อู เก่ แด๊เบ๊ ปาเจ๊อ เหย่ซี โต่ ปา. 11เน เก่ พู๊โอ่ หนิ พู๊เพรคู เตเพร ปา, เร๊อ เน เบ่ เอ๊ ลูมุย เน๊อ คูอิชมาเอล ปา, เมเตเฮ๊เร๊อ จอแปแหร่ ตูจูเพร หนิโฮ เนซิปล่อกู่แก เร๊อ เน เอ๊โทแถ่ เออเนอ เฮ๊อ. (อิชมาเอล อาโหง่แลช๊า หม่า จอแปแหร่ หนิโฮ.) 12หม่าแน๊เรอ เนพู๊เพรคู เออเตเพร เนอ อา เก่ แซ่เน๊อ ตีซิมี ปา, อา เก่ วื๊อฉื่อช๊าฉื่อ ลอ อู ปว๋า เตเพร ปา, เร๊อ อู ปว๊า เตเพร เก่ วื๊อฉื่อช๊าฉื่อ ลอ ลู ปาปา. อา เก่ โอ่ตาพายา โค๊แก ตื๊อดื่อ เน๊อ อากลุยอาแล เต๊เห่ ปา.” a 13เหมาะฮาการ์ เอ๊ จอแปแหร่ ตูจูเพร เด๊อ อา เฮ๊เบ่ เน๊อ ลู เออเนอเตเพร อามุย เน๊อ, เน หม่า จอแปแหร่ เด๊อ อา แม๊เถอะ แว เนอเตเพร เฮ๊อ. เร๊อ อา เฮ๊แล เกอเร๊อดื่อ อาเหน่ เน๊อ, “เก๋อ! กู๊แหน่เร๊อ แว แม๊เถอะ น๊อ เฮ๊อ จอแปแหร่ เด๊อ อา แม๊เถอะ แว เออเตเพร เฮ๊อ.” 14ตื๊อเร๊อ เทอกลื่อ เออตื๊อกลื่อ เนอ อู เอ๊หนิ ลูมุย เน๊อ, เบเออลาไฮรอย. เทอกลื่อ เออเนอ อา โอ่ เบ๊อะ คาเดช เทอเถ่ขุ เหล่โอ่ เน๊อ วีเบเรด อาเปล่กูเนอ โต่ กู๊แหน่. (เบเออลาไฮรอย อาโหง่แลช๊า หม่า เพรเซอเพร เด๊อ อา แม๊เถอะ แว เออเตเพร อาเทอกลื่อ.) b 15เร๊อ โหมะฮาการ์ พู๊โอ่หนิ เป่ เพอับราม พู๊เพรคู เตเพร, เร๊อ เพอับราม เอ๊ หนิ ลูมุย เน๊อ คูอิชมาเอล. c 16เบ๊อะ โหมะฮาการ์ เน๊อ เพอับราม พู๊โอ่แล หนิ คูอิชมาเอล เบ๊อะเนอ, เพอับราม หน่า โอ่เฮ๊อ เชอลุยซว๊า เน๊อ หน่า โซซว๊า เฮ๊อ.
Copyright information for
EkySCThai