Genesis 17

เตดื๊อตีลี๊พ๊า หม่า เตอ๊อแล อาม๊าอาแด เต๊อเจ่อ

1เบ๊อะ เพอับราม หน่า โอ่ เฮ๊อ ลุยซว๊า เตอเชอ เน๊อ ลุยซว๊า ต๊าหน่า เฮ๊อ เบ๊อะเนอ, จอแปแหร่ ตูจูเพร โอ่โลแถ่ เป่ ลู เร๊อ อา เฮ๊ ลู เน๊อ, “แว หม่า จอแปแหร่ เด๊อ อาโพรฉว่าชอ ▼

▼ฮีบรูโหง่ หม่า “เอ๊หล่าเส่อเด๊”

เตเพร. หนิดา แวโหง่ เร๊อ โอ่เซอเพร เมโตเมเบ่ แวซิปล่อ ปว๋า โตโพ๊ นี๋. ^b 2แว เก่ เมหม่าเมกลอ หนิ แวเตเอ๊อแล เน๊อ เน เออเนอ ปา, เร๊อ แว เก่ นอ โอ่โหร่โอ่เอ๊ แถ่โป่ เนกลุยเนแล ปา.” ^c

3ฮู๊เนอเร๊อ เพอับราม แด๊งือ งอแล เร๊อ จอแปแหร่ เฮ๊ ลู เน๊อ, 4“แว เม เตเอ๊อแลโหง่ เน๊อ เน ฮู๊เออ, แว อ๊อแลนอแลดื่อ เน๊อ เน เก่ ทวา แกแย เมวเจ่อ ปว๊าเจ่อ อาเพ ปา. ^d 5อู เก่ เอ๊ ปา เนมุย เน๊อ อับรามโต่, อู เก่ เอ๊โค๊ เนมุย เน๊อ อับราฮัม ปา, (อาโหง่แลช๊า หม่า เมวเจ่อ ปว๊า เจ่อ อาเพ) เมเตเฮ๊เร๊อ แว นอทวาแถ่ เฮ๊อ เน เน๊อ แกแย เมวเจ่อ ปว๊าเจ่อ อาเพ เฮ๊อ. ^e 6แว เก่ นอ โอ่โหร่โอ่เอ๊แถ่ เนกลุยเนแล เต๊เห่ ปา. แว เก่ นอ โอ่แถ่ เมวเจ่อ เต๊เห่ เด๊อ เนกลุยเนแล อาเกล ปา, โท๊โต่ คุ๊ย เต๊เห่ เก่ โอ่แถ่ เด๊อ เนกลุยเนลุ๊ย อาเกล ปา. ^f 7แว ซิหยื่อ เมหม่าเมกลอ หนิ แวเตอ๊อแล โหง่ เออ ตูจูเพร เน๊อ เน เน๊อ เนกลุยเนแล ตากาแล เด๊อคยา เต๊เห่ ตือทือ โท ตือทือ. แว เก่ ทวา เนจอแปแหร่ดุ ปา โท๊โต่ แว เก่ ทวา เกอดื่อ เนกลุยแล ตากาแล เด๊อคยา เต๊เห่ อาจอแปแหร่ดุ ปาปา. ^g 8คานาอันเก่ เต๊เก๋ ลอ เด๊อ เน โอ่ เกอเร๊อ อา แซ่เน๊อ เทอโรเก่กลอพู๊ เตเพร กู๊แหน่เออ เนอ, แว เก่ เด๊อะลา เน๊อ เน เน๊อ เนกลุยเนแล ตากาแล เด๊อ คยา เต๊เห่ ตูจูเพร ปา เร๊อ แว เก่ ทวา เหย่ซีจอแปแหร่ ปา,” ^h

9จอแปแหร่ดุ เฮ๊เป่แฮโป่ เพอับราฮัม เน๊อ, “เน ติเร๊อ, เน เบ่ ปื่อกล่อหม่าหนิ แวเตอ๊อแล โหง่ เน๊อ เน เออเนอ, ตื๋อ เน หม่าโต่, เนกลุยเนแล ตากาแล เด๊อคยา เต๊เห่ เบ่ ปื่อกล่อหม่า หนิเกอดื่อ เตอ๊อแลโหง่ เออ ปาปา. 10เตอ๊อแล เด๊อ เน เน๊อ เนกลุยเนแล ตากาแล เด๊อคยา เต๊เห่ โตเบ่ ปื่อกล๊อหม่า หนิเนอ หม่า อิเต เฮ๊เร๊อ, ซีกลุยซีแล อาเกล เพรคู เต๊เห่เนอ, อา โตเบ่ ดื๊อตีลี๊พ๊า ปว๋า เตเพร ปา. ⁱ 11ซี เบ่ ดื๊อตีลี๊พ๊า, เร๊อ เตดื๊อตีลี๊พ๊า เออเนอหม่า อา เด๊อะโลเฮ๊อ เน๊อ ซี เน๊อ แว เตอ๊อแล อาม๊าอาแด เต๊อเจ่อ เฮ๊อ. ^j 12เมฮู๊เนอเร๊อ ล๋อ เพรคู เด๊อ ซีกลุยซีแล อาเกล อา ตากาแล ตือทือ โท ตือทือ เต๊เห่เนอ, อา ดา บาเฮ๊อ เนอลุยซว๊า เฮ๊เร๊อ, อา เบ่ ดื๊อตีลี๊พ๊า. เร๊อ แกแย เด๊อ อา โอ่เป๊เจ่แล เบ๊อะ ซีหี่ด๊อกู เนอเต๊เห่ เบ่เบ่, ซีกลุยแล หม่าโต่ เนอเต๊เห่ เบ่เบ่, เทอโหร่เก่กลอพู๊ แพ๊ ตื๊อดื่อเร๊อ ซีพรี กาหนิ เหย่ซี เน๊อ รือ ฮู๊ หลู่ เนอเต๊เห่ เบ่เบ่, เหย่ซี เบ่ ดื๊อตีลี๊ ลอ พ๊า ปว๋า เตเพร. ^k 13หลู่เพรคู เด๊อ อา โอ่เป๊เจ่แล เด๊อ ซีหี่ด๊อกู เต๊เห่เนอ เบ่เบ่, ซี พรีกา เหย่ซี เน๊อ รือ เนอเต๊เห่ เบ่เบ่, อู เบ่ ดื๊อตีลี๊ ลอ เป่ เหย่ซีพ๊า. ซี เก่ เม ฮู๊เนอเร๊อ แวเตอ๊อแล เออ อา เมม๊าเมแด เฮ๊อ, เด๊อ ซีพ๊าซีหย่าลู เฮ๊อ, เร๊อ อา เด๊อะโลแถ่ เฮ๊อ เน๊อ เตอ๊อแลเออ อา โอ่หม่าโอ่กลอ ตูจูเพร เฮ๊อ. 14เมฮู๊เนอเร๊อ เพรคู เตเพรเพร เด๊อ อา ดื๊อตีลี๊ เกอ อู อาพ๊า โต่ เนอเต๊เห่ หม่า อา เมปย๊าแก เฮ๊อ แวเตอ๊อแล อาขว่าอาคยา, เบ่ พย๊าเถ่แก ลูมุย เด๊อ อาโคแกแย อาเกล.”

15จอแปแหร่ เฮ๊โป่ เพอับราฮัม เน๊อ, “เนเม เหมาะซาราย เกอติเร๊อ, เน เบ่ เอ๊หนิ ปา ลู เน๊อ เหมาะซาราย โต่เฮ๊อ, เบ่ เอ๊ โค๊ ลูมุย เน๊อ เหมาะซาราย ปา. 16แว เก่ เด๊อะบุ๊ยเด๊อะเตอเรอ อา ปา เร๊อ อา เก่ พู๊โอ่แล หนิเป่ เนเง พู๊เพรคู เตเพร ปา. แว เก่ เด๊อะบุ๊ยเด๊อะเตอเรอ อา ปา อาขว่าอาคยา, อา เก่ ทวา เมวเจ่อ เต๊เห่ อาโหมะ ปา, โท๊โต่ เมวเจ่อ คุ๊ย เต๊เห่ เก่ โอ่แถ่ เบ๊อะ อากลุยแล อาเกล เนอ ปา.”

17เพอับราฮัม แด๊งือ งอแล เร๊อ อางยา เร๊อ อา เฮ๊แลเกอเร๊อ เด๊อ อาซิปล่อกู เน๊อ, “แกแย เด๊อ อาหน่า โอ่ เจ๊อเฮ๊อ เตเย เฮ๊อ เตเพรเพร เนอหม่า อา พู๊โอ่แจ่ ปาแหน่ แอ? เหมาะซาราย ติเร๊อ อาหน่า โอ่ เจ๊อ เฮ๊อ ลุยซว๊าเตอเชอ เจ๊อ เร๊อ หม่า อา พู๊โอ่แจ่ ปาแหน่ แอ?” 18เออโตโพ๊ เร๊อ เพอับราฮัม เฮ๊ จอแปแหร่ เน๊อ, “แด่ทูซิปล่อเร๊อ, นอ พย๊าหนิ เกอ แวพู๊เพรคู คูอิชมาเอล เน๊อ เตเด๊อะบุ๊ยเด๊อะเตอเรอ เด๊อเนอ๊อแลแว เนอ แต๋?”

19เร๊อ จอแปแหร่ เฮ๊ ลู เน๊อ, “โต่, คูอิชมาเอล อาโตหนิแจ่โต่. เนเม โหมะซาราห์เออ เก่ พู๊โอ่หนิ เป่ เน พู๊เพรคู เตเพร ปา, เร๊อ เน เบ่ เอ๊ อามุย เน๊อ คูอิสอัค ปา. แว เก่ เมหม่าเมกลอ แวเตอ๊อแล เน๊อ อา ปา, เร๊อ เตอ๊อแล เออเนอ อา เก่ หม่าดื่อ เตอ๊อแล ตูจูเพร แตแลเคร๊ เด๊อ อาเง เน๊อ อาพู๊เหลอตา เด๊อคยา ตือทือ โท ตือทือ ปา. (อิสอัค อาโหง่แลช๊า หม่า อางยา, เมเตเฮ๊เร๊อ อา หนิโฮ เน๊อ เกเร พย๊าหนิ พู๊เพรคู เบ๊อะเนอ เร๊อ อางยา.) 20คูอิชมาเอล อาเงติเร๊อ, แว หนิโฮ เฮ๊อ เน กุย แว เออเฮ๊อ แว เก่ เด๊อะบุ๊ยเด๊อะเตอเรอ หม่าดื่อ อา ปา แว เก่ นอ พู๊โอ่โหร่ เหลอโอ่เอ๊ ลู ปา เร๊อ อากลุยอาลุ๊ย ตากาแล เก่ โอ่โหร่โอ่เอ๊ แหน่เจ๊อ ปา. อา เก่ ทวาดื่อ คุ๊ยพู๊ เช๊อซิเนอ อาเพ ปา, เร๊อ แว เก่ นอทวาแถ่ อา เน๊อ เมวเจ่อ ดู๋ เต๊อเจ่อ ปา. 21หม่าแน๊เรอ แวเตอ๊อแล เออเนอ, แว เก่ เมหม่าเมกลอ เน๊อ คูอิสอัค เด๊อ โหมะซาราห์ เกเร พู๊โอ่ เกอเร๊อ ลู ช๋า หน่าเบ่ ฮู๋ กู๊แหน่เค เออเนอ ปา.” 22เบ๊อะ จอแปแหร่ เฮ๊เบ่ โทเฮ๊อ เน๊อ เพอับราฮัม เบ๊อะเนอ, อา กา กาแถ่ โอ่เหม่แก ลูเหล่.

23เบ๊อะเนอ เตอเนอ เจ๊อเฮ๊อ, เพอับราฮัม เอ๊ อาพู๊คู คูอิชมาเอล เน๊อ ล๋อ เพรคู เด๊อ อา โอ่เป๊เจ่แล เบ๊อะ ลูหี่กู เนอเต๊เห่ เน๊อ หลู่ เด๊อ อา พรี เน๊อ รือ ซีเต๊เห่ เน๊อ ล๋อ เพรคูดุ โอ่ เบ๊อะ ลูหี่กู เนอเต๊เห่ เร๊อ อา นอ ดื๊อตีลี๊ ลอ เหย่ซีพ๊า ฮู๊ จอแปแหร่ เฮ๊แก ลู โหง่ เนอ. 24เบ๊อะ อู ดื๊อตีลี๊ เป เพอับราฮัม พ๊าคยา เบ๊อะเนอ, อาหน่า โอ่ เฮ๊อ ลุยซว๊าเตอเชอ เน๊อ ลุยซว๊าต๊าหน่า เฮ๊อ. 25อาพู๊ คูอิชมาเอล เร๊อ อาหน่า โอ่ เฮ๊อ เช๊อโซหน่า เฮ๊อ. 26เพอับราฮัม เน๊อ อาพู๊ คูอิชมาเอล ซิเนอลอ อา ดื๊อตีลี๊ พรว่าลอลู พ๊า เตอเนอโต. 27ล๋อ เพรคู โอ่ เบ๊อะ เพอับราฮัม หี่กู เนอเต๊เห่ เน๊อ ล๋อ แกแย เด๊อ อา โอ่เป๊เจ่แล เบ๊อะ ลูหี่กู เนอเต๊เห่ เน๊อ เทอโรเก่กลอพู๊ เด๊อ อา พรีกา ลู เต๊เห่เนอ, เหย่ซี ดื๊อตีลี๊ ผรว่าลอลู พ๊าคยา เน๊อ เพอับราฮัม เตอเนอโต แพ๊.