Genesis 18:20-33

20เร๊อ จอแปแหร่ ตูจูเพร เฮ๊ เพอับราฮัม เน๊อ, “วีโสโดมพู๊ เน๊อ วีโกโมราห์ พู๊ เต๊เห่ เม เตมู๊แหม่รีแจ่ อาดุ แหน่เจ๊อ เร๊อ อู เอ๊โทเอ๊โม นอ เมจาตา แว เนอ แว หนิโฮ เฮ๊อ. เหย่ซี เมซื๊อเมปล๊า เต เนอ อาดุอาแย แหน่เจ๊อ. 21แว แฮตา แม๊แม๊, หม่า เหย่ซี มู๊แหม่รีแจ่ หม่าแหน่ ฮู๊ แว หนิโฮ อู เอ๊โทแถ่ แว เนอ แอ หม่าโต่แอ เนอ แว เก่ ซิเง ปา.”

22เหย่ซี อาเกล ซิเนอ เร๊อ อา เถ่จว๊าโต เด๊อ วีโสโดม อาโอ่, หม่าแน๊เรอ เพอับราฮัม ก๊อถ่อ โอ่แก เด๊อ จอแปแหร่ ตูจูเพร เนอเตเพร อาเป๊เส่เง. 23เร๊อ อา แฮผื่อ เด๊อ จอแปแหร่ ตูจูเพร อาโอ่ เร๊อ อา เฮ๊ ลู เน๊อ, “เน เกเร เมจาปย๊า หม่าแหน่ เต่อเกอลอ เพรจ๊อเพรเต เต๊เห่ เน๊อ เพรมู๊แหม่รีแจ่ เนอเต๊เห่ ปา แอ? 24เฮ๊โก๊เหร่อ เบ๊อะ วีกู เออเนอ เพรจ๊อเพรเต เก่ โอ่ อาเพร แงเชอ เฮ๊หม่า, เน เกเร เมจาปย๊า หม่าแหน่ ลอเจ๊อ ตีวี ลอเจ๊อ ปา แอ? เน แม๊ เกอ เพรจ๊อเพรเต เนอแงเชอ อาเป๊เส่ เร๊อ เน ซิโล เกอเร๊อ ปาเจ๊อ วี เนอตีวี โต่ แอ? 25เน โตเบ่ เมเซอ เต่อ เพรจ๊อเพรเต เนอเต๊เห่ เน๊อ เพรมู๊แหม่รีแจ่ เนอเต๊เห่ โต่. เน เก่ เม ฮู๊เออ เฮ๊หม่า, เน เมจากาคยา แซ่แก เพรจ๊อเพรเต เนอเต๊เห่ เน๊อ เพรมู๊แหม่รีแจ่ เนอเต๊เห่ เฮ๊อ, เนเม ฮู๊เนอ แตแค๋ โต่. เน หม่า เพร เด๊อ อา เมจากาคยา จ๊อเต เด๊อ เห่ขุ ซีบ่า ลอ อาขว่าอาคยา, เน เบ่ เมโตเมเบ่ แหน่ แพ๊.”

26จอแปแหร่ ตูจูเพร เฮ๊ฉื่อ เน๊อ, “แว เก่ แม๊เถอะ หม่าแหน่ เพรจ๊อเพรเต อาเพร แงเชอ เบ๊อะ วีโสโดมกู เออเนอ เฮ๊เร๊อ เด๊อ เหย่ซี อาขว่าอาคยา, แว เก่ ซิโล เกอเร๊อ ลอเจ๊อ วี เนอตีวี ปา.”

27เพอับราฮัม กุยซิยอ คยาแซ๊ เน๊อ, “แว หม่า แกแย เด๊อ อา หม่า เน๊อ เตอเจ๋อ โต่, อา แซ่เน๊อ เห่หมื่อดอเกล เน๊อ กู๊เผะ เต๊เห่ แพ๊ ตื๊อดื่อเรอ แว เฮ๊เบ่ คือฮา เน๊อ แบ่เจ่ดุ เออ แด่ทูซิปล่อ เหร่อ แวนี๋. 28หม่าแน๊เรอ เพรจ๊อเพรเต เก่ โอ่บาเป่ แงเชอ โต่, อา เก่ ตายว่าแก ซิแง เล? เด๊อ อา ตายว่าแก ซิแง อาขว่าอาคยา เร๊อ เน เกเร เมจาปย๊าแก ลอเจ๊อ ตีวีลอ เจ๊อ ปา แอ?”

เร๊อ จอแปแหร่ตูจูเพร เฮ๊ เน๊อ, “แว เก่ แม๊เถอะ อาเพร ลุยเชอ เน๊อ ซิแง เฮ๊เร๊อ แว เมจากาคยา ปย๊าแก น๊อ โต่.”

29เพอับราฮัม เฮ๊ โป่ เน๊อ, “เน เก่ แม๊เถอะ แพ๊ตื๊อ อาเพร ลุยเชอ แพ๊ เล?”

เร๊อ จอแปแหร่ เฮ๊ฉื่อ ลู เน๊อ, “แกแย เก่ โอ่ แพ๊ตื๊อ อาเพร ลุยเชอ แพ๊ เบ่เบ่, แว เมจากาคยา ปย๊าแก น๊อ โต่โต่.”

30ฮู๊เนอ เร๊อ เพอับราฮัม เฮ๊ โป่ เน๊อ, “เก๊อ แบ่เจ่ดุ, แด่ทูซิปล่อ เร๊อ ซิปล่อดุ แต่ แว เหม่นี๋. แวเบ่ แด๊เฮอ โป่ เหร่อ เน โตโพ๊. เฮ๊โก๊เหร่อ เน เก่ แม๊เถอะ แพ๊ตื๊อ แกแย อาเพร โซเชอ แพ๊ เล?”

เร๊อ จอแปแหร่ เฮ๊ฉื่อ ลู เน๊อ, “แว เก่ แม๊เถอะ แพ๊ อาเพร โซเชอ แพ๊ เฮ๊เร๊อ แว เมจากาคยา ปย๊าแก น๊อ โต่โต่.”

31ฮู๊เนอ เร๊อ เพอับราฮัม เฮ๊ โป่ เน๊อ, “แด่ทูซิปล่อ โป่ เหร่อ แว เฮ๊โก๊เหร่อ เน เก่ แม๊เถอะ แพ๊ แกแย อาเพร เนอเชอ แพ๊ เก่เฮ๊เล?”

เร๊อ จอแปแหร่ เฮ๊ฉื่อ ลู เน๊อ, “แว เก่ แม๊เถอะแพ๊ เพรจ๊อเพรเต อาเพร เนอเชอ แพ๊ เบ่เบ่, แวเมจากาคยา ปย๊าแก น๊อ โต่โต่.”

32ฮู๊เนอ เร๊อ เพอับราฮัม เฮ๊ คยาแซ๊ เน๊อ, “เก๊อ แบ่เจ่ดุ, แด่ทูซิปล่อ เร๊อ ซิปล่อดุ แต แว เหม่ นี๋. แว แด๊เฮอ โป่ เหร่อ เน โตโพ๊โพ๋ แพ๊ นี๋. เน เก่ แม๊เถอะ แพ๊ตื๊อ อาเพรเช๊อ แพ๊ เก่ เฮ๊เล?”

เร๊อ จอแปแหร่ เฮ๊ฉื่อ ลู เน๊อ, “แวเก่ แม๊เถอะ เพรจ๊อเพรเต อาเพรเช๊อ แพ๊ เบ่เบ่, แว เมจากาคยา ปย๊าแก น๊อ วี เนอตีวี โต่โต่.”

33จอแปแหร่ ตูจูเพร เฮ๊เบ่ โทเฮ๊อ เน๊อ เพอับราฮัม เร๊อ อา เถ่จว๊าแก. เร๊อ เพอับราฮัม กาแก เด๊อ อาหี่.

Genesis 19:1-25

จอแปแหร่ตูจูเพร เมจากาคยา ปย๊าแก วีโสโดม เน๊อ วีโกโมราห์

1เบ๊อะ เหมาะเฮ๊เหมาะตาเฮ๊อ เบ๊อะเนอ, เตเน่วม๊อขุพู๊ ซิเนอ แฮโต่ เด๊อ วีโสโดม, เบ๊อะเนอเค, เพโลท โอ่แนโอ่ เบ๊อะ วีกูดาดุทือ เนอ. เบ๊อะ อา แม๊เถอะเฮ๊อ เตเน่วพู๊ เนอ ซิเนอ เบ๊อะเนอ, โตโพ๊โต อา ก๊อถ่อ แกล่จว๊าแม๊ฉื่อ เหย่ซี, เร๊อ อา แด๊งือง่อแล เด๊อ เห่ขุ เบ๊อะ เหย่ซี เป๊เส่เง เนอ. 2เร๊อ เพโลท เฮ๊ เน๊อ, “เก๊อ แวแบ่เจ่ ซี, แด่ทูซิปล่อ เร๊อ จว๊าโอ่โก๊ เกอเหร่อ เด๊อ แวหี่ เออ. จว๊าซู๊ปลี หนิ แลแค ซีคาโด่ เร๊อ โอ่เมอเกอ แว เบ๊อะเออ เตเซ. เร๊อ ก๊อถ่อ จว๊าโรมื๋อ เป่แฮ โหน่คยาแซ๊ ซีแกล๊ ช๊า ป่าโรปา นี๋.”

หม่าแน๊เรอ เตเน่วพู๊ เต๊เห่ เฮ๊ฉื่อ ลู เน๊อ, “อาหนิแพ๊, เออเตเซ เร๊อ เป่ โอ่เมอดื่อ เบ๊อะ วีกลาเมกู เนอ ปา.”

3หม่าแน๊เรอ เพโลท ย๊อ เอ๊ ตื๊อดื่อดื่อ เจ๊อ เหย่ซี อาขว่าอาคยา, อาโหน่เล๋อ เร๊อ เหย่ซี ครวากาเกอแก เด๊อ ลูหี่. เร๊อ เพโลท ตี๊หรี่แตแร เป่ เหย่ซี เหล่เอ่เหล่โอ. อา ชื๊อเอ่ เป่ เหย่ซี ค๊อมู โซโด โฮหมื่อโต๊โผะ เร๊อ เหย่ซี เอ่ แลแค. ^a 4เบ๊อะ ซิเผระ เออซิเนอ โอ่เมอ แต่ล๋ายโต่ เบ๊อะเนอ, ล๋อ เพรคู พู๊เส่เส่, เพรคู โหมะเผระเผระ โอ่ เบ๊อะ วีโสโดมกู เนอเต๊เห่ แฮโอ่ ตาวา ลอ แลแค เพโลท อาหี่. 5เร๊อ เหย่ซี เอ๊โทแถ่ แลแค เพโลท เน๊อ, “เป่ ซิเง เน๊อ เออเตเฮ๊ ซิเผระ เพรคู แฮโอ่เมอ เกอ เด๊อ เนหี่ ซิเนอ ว๊า, เหย่ซี โอ่โต แลแค เบ๊อะเต? เอ๊เถ่ เป่ เป เด๊อ อากลอเออ, เป ซิหยื่อ โอ่เมอเต่อ, แลวอเต่อ เน๊อ เหย่ซี.” ^b

6เพโลท เถ่โต เหย่ซี เด๊อ หี่กลอ เร๊อ อา ซ๊อบี๊ กาคยาแก กู่ดาดุ เด๊อคยา. 7เร๊อ อา เฮ๊ เหย่ซี เน๊อ, “เก๋อ โคแบ๊ซว๊าซี, เม แต่ แลแค เตมู๊แหม่รีแจ่ ฮู๊เนอเต๊เห่ แต่เหม่! 8เด๊อ หี่ด๊อกู เนอ แวพู๊ เพรเหมาะ โอ่ ซิเนอ เร๊อ เหย่ซี โอ่เมอเต่อ น๊อ ล๋าย เพรคู เตเพร่ว โต่. แว เอ๊เถ่ เป่ ดื่อ ซี เร๊อ ซี ซิหยื่อ เม เหย่ซี ฮู๊เตเต๋ เบ่เบ่, ตูรู๊ เม แลแค ดื่อ. หม่าแน๊เรอ ซิเผระ เออ ซิเนอเนอ เม แต่ เหย่ซี เตอเจ๋อ แต่เหม่ นี๊. เมเตเฮ๊เร๊อ เหย่ซี ย๊อ ทวาเฮ๊อ แวซิเผระ เร๊อ แว เบ่ เตเกบี๊ เกอเร๊อ เหย่ซี เฮ๊อ” เพโลท เฮ๊ เหย่ซี ฮู๊เนอ.

9เพโลท เฮ๊ เหย่ซี ฮู๊เนอ ตื๊อดื่อเร๊อ เหย่ซี เฮ๊ฉื่อ ลู เน๊อ, “จว๊าตาพาเป เบ่แกล่! เน หม่า ดอชว๊าพู๊ เตเพร แพ๊, เน แฮโอ่เกอ ฮู๊ ซิเผระ เตเพร เบ๊อะ เป่วีกู เออ แพ๊ เร๊อ, หม่าเมเต เน ซิหยื่อทวา เพรเฮ๊เบ่เมโตเต เตเพร เด๊อ เปขู่? เป่ เก่ เมมู๊แหม่รีแจ่ เล๊อเล๊อ เจ๊อ เน เน๊อ แกแย เนอ ซิเนอ ปา,” เร๊อ เหย่ซี แฉ่กาคยาแก เพโลท เร๊อ อา ดุ๊ยเป่แฮ เด๊อเง เร๊อ อา เกเร ด่อโพร๊ แลแค กู่ดาดุ. ^c

10หม่าแน๊เรอ เตเน่วพู๊ เนอซิเนอ บ๊อเถ่ อากู๊ขู่ เด๊อ อากลอ เร๊อ อา จุ่ยโนแก เพโลท เด๊อ หี่ด๊อกู เร๊อ อา ซ๊อบี๊แก กู่ดาดุ. 11แซ่ฮู๊ เหย่ซี เก่ แม๊เถอะแจ่ ปา กู่ดากู โต่ อาเงเนอ, เตเน่วพู๊ เมคี๊แก ล๋อ วีโสโดม เพรคู ดุดุ ปีตี๊ตี๊ โอ่ เบ๊อะ กู่ดาทือ เนอเต๊เห่ อาเป๊เส่เปลาะ. ^d

12เตเน่วพู๊ เนอซิเนอ แด๊เฮอ เพโลท เน๊อ, “เบ๊อะ วีกู เออ เนกลุยเนแล, เนเม, เนพู๊เพรคู หม่าโต่เร๊อ เนพู๊เพรเหมาะ โอ่ ปา เต๊เห่เห่ แอ? อา เก่ โอ่ เฮ๊เร๊อ กู๊แหน่ นอ เถ่จว๊า ตาพาแกลอ มอ เหย่ซี เด๊อ วีกลอ เนอ. 13เมเตเฮ๊เร๊อ เป เกเร เมจากาคยา ปย๊าแก เฮ๊อ วี เออตีวี เฮ๊อ. วีโสโดมพู๊ เต๊เห่ เมเต มู๊แหม่รีแจ่ เนอ อาดู๋ แหน่เจ๊อ, เร๊อ อู เอ๊โทเอ๊โม นอ เมจาตา จอแปแหร่ ตูจูเพร เนอ อา หนิโฮ เฮ๊อ เร๊อ อา ซูแฮ เฮ๊อ เป เด๊อ เก่ เมจากาคยา ปย๊าแกลอ วี เออตีวี เฮ๊อ.”

14ฮู๊เนอเร๊อ เพโลท เถ่จว๊า แด๊โฉ่โล เป่ อาเมเพรคูซี เด๊อ อา แฮเด๊อะม๊า โทเฮ๊อ เน๊อ อาพู๊เหมาะซี เออเต๊เห่ เน๊อ, “จอแปแหร่ ตูจูเพร เตเร เมจากาคยา ปย๊าแก ลอเฮ๊อ วี เออตีวี เฮ๊อ อาขว่าอาคยา, เมแพรมอ, เถ่ จว๊าตาพาแพรแกมอ เน๊อ วีเออ ตีวี.” หม่าแน๊เรอ อาเมเพรคูซี เต๊เห่ เตเนแพ๊ เน๊อ อา ฉู่เบ๊แลวอ เหย่ซี แพ๊.

15เบ๊อะ เหมาะคี๊โป๊โหล่ ปาแพ๊ เบ๊อะเนอ, เตเน่วพู๊ เออซิเนอ เฮ๊ชอชอ เฮ๊อ เพโลท เน๊อ, “เมแพรมอ! เอ๊หนิมอ เนเม เน๊อ เนพู๊เหมาะ เออ ซิเนอ เร๊อ เถ่จว๊าแพรมอ! เน เก่ เถ่แกล่ โต่ เฮ๊หม่า, ปาหม่า จอแปแหร่ ตูจูเพร เก่ เมจากาคยา เซอ เต่อเกอลอ ซี เน๊อ วีกูพู๊ เออเต๊เห่ เห่.”

16เพโลท เมคอเมยอ เป่ ลู อาขว่าอาคยา, เตเน่วพู๊ เออซิเนอ จุ่ยจว๊าหนิ เพโลท เน๊อ อาเม เน๊อ อาพู๊เหมาะเออ ซิเนอ อากู๊ขู่ เร๊อ อา เอ๊เถ่จว๊า ตาพาแก เหย่ซี เด๊อ วีกลอ, เมเตเฮ๊เร๊อ จอแปแหร่ ตูจูเพร ย๋อ ซิยอ เกอเร๊อ ลู อาขว่าอาคยา, อา เอ๊เถ่จว๊า แก เหย่ซี. ^e 17เตเน่วพู๊ เต๊เห่ เอ๊เถ่โต่ เฮ๊อ เหย่ซี เด๊อ วีกลอ เร๊อ เตเน่วพู๊ เนอซิเนอ อาเกล เตเพร เฮ๊ เหย่ซี เน๊อ, “แกล่แลเปล๊ เกอเร๊อมอ ซีเหน่, แม๊กาคยา เเต่เหม่ นี๋. จว๊าโอ่โก๊ แต่ เด๊อ เก่รือดือขุ แต่เหม่ นี๋. ตูรู๊ แกล่แถ่โต เด๊อ โฉ่ขุ เนอ. โต่ เฮ๊หม่า ซี เก่ เซอ เต่อเกอลอเฮ๊อ เน๊อ วีพู๊ เนอเต๊เห่ ปา.”

18หม่าแน๊เรอ เพโลท เฮ๊ฉื่อ เหย่ซี เน๊อ, “เก๋อ แวแบ่เจ่ ซี, แด่ทูซิปล่อ เร๊อนอ จว๊ายาปา แต่ เป แต่เหม่ นี๋. 19เน เมแร๊ เอ๋ แหน่เจ๊อ เฮ๊อ เต เด๊อ แวเง เฮ๊อ. เน ซิยอหนิ แว เร๊อ เน เมแลเปล๊ เฮ๊อ แว เฮ๊อเฮ๊อ, หม่าแน๊เรอ แว แกล่แถ่โต่ เบ๊ ปา เด๊อ โฉ่ขู่ โต่ เฮ๊อ. เบ๊อะ แว แกล่แถ่โต่ แต่ล๋าย เด๊อ โฉ่ขู่ โต่ เบ๊อะเนอ, เตปย๊าเตแก เก่ ตาตีตีเล๊ แว ปา เร๊อ แว เก่ เซอ แก ป๋า. 20แม๊มอ! วี ฮู๊ โอ่ เด๊อ เนอตีวี เร๊อ อา ยาลา ปา น๊อ โต่. นอ แกล่จว๊า โอ่ เป เบ๊อะเนอ นี๊, วี ปีตี๊ แพ๊ แว เฮ๊ แต๋? เร๊อ แว เก่ แลเปล๊ ป๋า.” เพโลท เฮ๊ ฮู๊เนอ.

21เร๊อ อา เฮ๊ฉื่อ ลู เน๊อ, “อ่อ, อาแร๊ แหน่เจ๊อ, แวซิปล่อ โตตื๊อ เกอเจ๊อ เน๊อ ฮู๊ เน เฮ๊ เนอ เจ๊อ. วีฮู๊ เด๊อ เน เฮ๊ เนอตีวี, แว เก่ เมจากาคยา ปย๊าแก ปา อา โต่ เฮ๊อ. 22เมมอ เร๊อ แกล่จว๊าแพรมอ แลแค เบ๊อะเนอ. ซี เก่ จว๊าโต่ เด๊อ วี เนอตีวี ลายโต่ เฮ๊หม่า, แว เมแจ่ ล๋าย เต เตอเจ๋อ โต่.” วี เนอตีวี อู เอ๊ เน๊อ วีโศอาร์. (โศอาร์ อาโหง่แลช๊าหม่า ปีติ้ว)

23เบ๊อะ เพโลท จว๊าโต่ เฮ๊อ เด๊อ วีโศอาร์ เบ๊อะเนอ, ต๊อเหมาะ แถ่ เฮ๊อ. 24เออโต๊โพ๊ เร๊อ จอแปแหร่ ตูจูเพร นอ จือตา หย่าซู๊แบ เน๊อ หมิ เด๊อ ม๊อขุ เร๊อ อา ตาอือ แกลอปลี เจ๊อ วีโสโดม เร๊อ วีโกโมราห์. ^f 25อา เมจากาคยา ปย๊าแก ลอหลา ตี๊กลิ เจ๊อ วี เออ เนอวี เน๊อ ล๋อ เก่รือดือขุ เบ๊อะเนอ เน๊อ ล๋อ แกแย โอ่ เบ๊อะ วีกู เนอเต๊เห่ เน๊อ ส่อเหมาะเหว่โบ เด๊อ อา เพ๊แถ่ เบ๊อะ เก่ เนอโต๊โผะ ล๋อ ปลี เจ๊อ.