Genesis 21
คูอิสอัค โอ่เป๊เจ่แล
1กู๊แหน่เร๊อ จอแปแหร่ ตูจูเพร แฮ เด๊อะบุ๊ยเด๊อะเตอเรอ เหมาะซาราย. เร๊อ อา เม ทวาแถ่ เป่ ลู ฮู๋ อา อ๊อแล หนื่ออื่อ โทเฮ๊อ อาโหง่ เนอ. 2เบ๊อะ เพอับราฮัม โหมะเผระ ลาเฮ๊อ เบ๊อะเนอ, เหมาะซาราย โหมะดอแถ่ เร๊อ เหย่ซี พู๊โอ่แล หนิ พู๊เพรคู เตเพร. เร๊อ อา พู๊โอ่ โตตื๋อ เจ๊อ เบ๊อะ จอแปแหร่ดุ เฮ๊หนื่ออื่อ เน๊อ อา โตพู๊โอ่แลหนิ อาค๊าอาขิ เนอเจ๊อ. a 3เพอับราฮัม อาพู๊เพรคู เด๊อ โหมะซาราย พู๊โอ่หนิ เป่ ลู เออเตเพรเนอ, อา เอ๊ เกอเร๊อ ลูมุย เน๊อ คูอิสอัค. (อิสอัค อาโหง่แลช๊า หม่า อา งยา, เมเตเฮ๊เร๊อ อา เกเร พย๊าหนิ พู๊เพรคู อาขว่าอาคยา, อา งยา.) เห่ขุทวาลู่ ๑๗:๑๗-๑๙ 4เบ๊อะ เพอับราฮัม อาพู๊ คูอิสอัค โอ่ เฮ๊อ อาเนอ ลุยซว๊า เบ๊อะเนอ, อา ดื๊อตีลี๊ เป่ ลูพ๊า ฮู๋ จอแปแหร่ดุ เฮ๊แก ลู โหง่ เนอ. b 5เบ๊อะ คูอิสอัค โอ่เป๊เจ่แล เบ๊อะเนอ, เพอับราฮัม อาหน่า โอ่เฮ๊อ เตเย เฮ๊อ. 6เร๊อ โหมะซาราย เฮ๊ เน๊อ, “จอแปแหร่ดุ เด๊อะเฮ๊อ แว เตซิครือซิลอ เร๊อ แวงยา เบ๊ เฮ๊อ. ล๋อ แกแย เด๊อ อา หนิโฮ เกอ แว เตหรี่เตแก เออ เต๊เห่เนอ, เหย่ซี เก่ งยา โห่เกอลอ เน๊อ แว ปา.” c 7เร๊อ อา เฮ๊โป่ เน๊อ, “เพอับราฮัม เน๊อ โหมะซาราย เก่ พู๊โอ่แล ปา เร๊อ อา เด๊อะอินู๊ หนิ อาพู๊ ปา, อู เฮ๊ ฮู๊เนอ เตเพร่ว โต่. หม่าแน๊เรอ แว พู๊โอ่แล หนิเป่ เพอับราฮัม พู๊เพรคู เตเพร เบ๊อะ อา โหมะเผระ ลาเฮ๊อ อาเค เออเนอ เฮ๊อ”เพอับราฮัม นอเถ่จว๊า ตาพาแก โหมะฮาการ์ เน๊อ คูอิชมาเอล
8คูอิสอัค ดุแถ่ เร๊อ อา อินู๊ ปา โต่ เฮ๊อ. เบ๊อะ คูอิสอัค อินู๊ ปา โต่เฮ๊อ เนอเตอเนอ เบ๊อะเนอ, อาเพ เมดุ หนิเป่ เจ๊อ ลู ป่วยดู๋ เต๊อป่วย. 9เตอเนอเค, โหมะซาราย แม๊เถอะ เน๊อ อียิปต์เมวเจ่อพู๊ โหมะฮาการ์ อาพู๊ คูอิชมาเอล เด๊อ อา พู๊โอ่แล หนิ เน๊อ เพอับราฮัม เนอเตเพร แลวอ งยาโคร โหมะซาราย อาพู๊ คูอิสอัค. 10เร๊อ โหมะซาราย เฮ๊ เพอับราฮัม เน๊อ, “เหว่เถ่แก หลู่โหมะ เออ เน๊อ อาพู๊คู เออเนอ, เมเตเฮ๊เรอ หลู่โหมะ อาพู๊คู เบ่ พย๊าหนิ เต่อเกอ พู๊อู่เจเออ เน๊อ แวพู๊คู คูอิสอัค โต่.” d 11โหมะซาราย เฮ๊ เต เออเนอ อา เบ่เช แหน่เจ๊อ เพอับราฮัม ซิปล่อ, เมเตเฮ๊เร๊อ คูอิชมาเอล หม่า อาพู๊เพรคู เตเพร หม่า เกอดื่อดื่อ. 12หม่าแน๊เรอ จอแปแหร่ดุ เฮ๊ เพอับราฮัม เน๊อ, “เด๊อ เนหลู่โหมะ เน๊อ อาพู๊เพรคู อาเง เออเนอ, ซิปล่อ เบ่เชลา แต่เหม่. เนกลุยเนแล เต๊เห่เนอ อา เก่ แฮตา แฮเง เด๊อ คูอิสอัค อาโอ่ ปา แพ๊ อาขว่าอาคยา, โหมะซาราย เฮ๊ เน ฮู๊เตเต๋ เบ่เบ่, ตูรู๊ หนิดา ลูโหง่ เนอ นี๊. e 13เนหลู่โหมะ อาพู๊เพรคู เออเตเพร เนอหม่า เนพู๊ หม่า เฮ๊อเฮ๊อ อาขว่าอาคยา, แว เก่ นอทวาแถ่ เกอดื่อ อา เน๊อ เมวเจ่อ เต๊อเจ่อ ปาปา.” 14ช๋า อาโหน่ โตโร เหมาะลีโรมื่อ เบ๊อะเนอ, เพอับราฮัม พย๊า เฉ่เอ่ เต๊เห่ เร๊อ อา ชาบาหนิ เทอ เน๊อ เทอโอพ๊า เตเม, เร๊อ อา เด๊อะชาแถ่ เน๊อ โหมะฮาการ์. เร๊อ อา นอเอ๊จว๊า หนิ ลู เน๊อ อาพู๊คูเออ เร๊อ อา นอเถ่จว๊าแก ลอ เหย่ซี. โหมะฮาการ์ เน๊อ อาพู๊ คูอิชมาเอล เถ่จว๊าแก เร๊อ อา เถ่จว๊า เลโทเลแล เบ๊อะ วีเบเออร์เชบา แก่ช๊า เก่เชเทอแก เนอโต๊โผะ. 15เบ๊อะ เทอ เด๊อ เทอโอพ๊ากู ลอ เฮ๊อ เบ๊อะเนอ, อา จว๊าแด่โอ่แก อาพู๊คูเออ เด๊อ แจ๊โจ่ โต๊โจ่ อาเล. 16โทเร๊อ อา เตเน, “แว ซิหยื่อ โอ่ป่อแม๊เถอะ หนิ แวพู๊ เซอ โต่,” เร๊อ อา เถ่จว๊า โอ่ตาพายาแก เน๊อ อาพู๊ อายา อาเปล่ เนอเย เจ๊อ เร๊อ อา จว๊าโอ่แน โหง่เซอโหง่โอ่ เบ๊อะเนอ. 17เร๊อ จอแปแหร่ดุ หนิโฮตา เป๊เจ่ โหง่พรา เร๊อ จอแปแหร่ดุ อาเตเน่วพู๊ โอ่ เด๊อ ม๊อขุ เอ๊ตา โหมะฮาการ์ เร๊อ อา เฮ๊ ลู เน๊อ, “เหมาะฮาการ์, เน โหง่ เมเต? ซิอิเช เเต่เหม่, จอแปแหร่ดุ หนิโฮตาเฮ๊อ เป๊เจ่ โหง่ เด๊อ แจ๊โจ่กู เออเนอ เฮ๊อ. 18ก๊อถ่อมอ, จว๊าแพ๊ อา เร๊อ อิลออี๊มอ อา เนอ, เมเตเฮ๊เร๊อ แว เก่ นอ ทวาแถ่ อา เน๊อ เมวเจ่อดู๋ เต๊อเจ่อ ปา.” 19เออโต๊โผะ เร๊อ จอแปแหร่ดุ เด๊อะ แม๊เถอะ ลู เทอกลื่อ ตื๊อกลื่อ. เร๊อ อา จว๊าแด๊โนบา หนิ เทอ เน๊อ เทอโอพ๊า เออเนอ เร๊อ อา กาเด๊อะโอ เน๊อ อาพู๊. 20เป๊เจ่เออ อา ดุแถ่ เร๊อ จอแปแหร่ดุ โอ่เกอ เน๊อ ลู. อา โอ่ เด๊อ ป่าหร่า เก่เชเทอแก่ขุ เร๊อ อา ทวา เพรลือแจ่ แหน่เจ๊อ เตมี เตเพร. 21อาโหมะ แม๊เถอะ เป่ ลูเม เน๊อ อียิปต์โหมะ เตเพร เร๊อ อาพย๊า หนิลู.เพอับราฮัม เม เตอ๊อแล เน๊อ คุ๊ยอาบีเมเลค
22เบ๊อะเนออาเค, คุ๊ยอาบีเมเลค เน๊อ อาเกลอกู่กล๊อดุ ฟีโคล์ เออซิเนอ แฮ เด๊อ เพอับราฮัม อาโอ่ เร๊อ อา เฮ๊ ลู เน๊อ, “เน เม เต อิเตเต๋ เบ่เบ่ จอแปแหร่ดุ โอ่เกอ เน๊อ เน. f 23แว เบ่เบ่, แวพู๊แวเลอ เบ่เบ่, แวกลุยแวแล เต๊เห่ เบ่เบ่, แซ่ฮู๊ เน เก่ แลโฮ เป โต่ อาเงเนอ, กู๊แหน่ แบแลมอ เนโหง่ เน๊อ แว เด๊อ จอแปแหร่ดุ อาเป๊เส่เง เออ. ฮู๊เนอเร๊อ ฮู๋ แว เจ๊อ เน๊อ เน เร๊อ แว เมโมเมแร๊ โทเฮ๊อ เน เนอ, เมโมเมแร๊ กาคยา คยาแซ๊ เป่ แว เน๊อ เทอเก่ เด๊อ เน โอ่ ซิเผระ เกอเร๊อ อา เออเต๊เก่ เนอ นี๋.” 24เร๊อ เพอับราฮัม เฮ๊ฉื่อ ลู เน๊อ, “ฮู๊ เน เฮ๊ แว เนอ, แว แบดื่อ แวโหง่ เฮ๊อ.” 25เด๊อ อาเหร่อเค เนอ เพอับราฮัม ซี เว หนิ เทอกลื่อ ตื๊อกลื่อ, เร๊อ คุ๊ยอาบีเมเลค อาหลู่ เต๊เห่ พย๊าเผ่แก เหย่ซี อาขว่าอาคยา, กู๊แหน่ เร๊อ เพอับราฮัม เฮ๊กาคยาฉื่อ ติ คุ๊ยอาบีเมเลค. 26เร๊อ คุ๊ยอาบีเมเลค เฮ๊ฉื่อ ลู เน๊อ, “เก๋อ! อูเป จว๊าพย๊าเผ่แก ซี เป เนอ แว ซิเง น๊อ โต่. เน เฮ๊โฉ่โล เป่ แว โต่โต่! แว ตื๋อหนิโฮ ปา กู๊แหน่เออ แพ๊.” 27เร๊อ เพอับราฮัม พย๊าแฮ ซิหมิ เน๊อ ปู่ เป๊เหน่ เต๊เห่ เร๊อ อา เด๊อะ เน๊อ คุ๊ยอาบีเมเลค เร๊อ เหย่ซี ซิเนอ อ๊อแล หนิ ลู โหง่. 28โทเร๊อ เพอับราฮัม แด่เถ่ ต๊าหน่า โค๊แก ซิหมิโหมะ โซซว๊าโตโด เด๊อ เตมีเตดอหมู่ อาเกล. 29เร๊อ คุ๊ยอาบีเมเลค แด๊เฮอ ลู เน๊อ, “เน จว๊าแด่เถ่ โค๊แก ซิหมิโหมะ เออ โซซว๊าโตโด หม่า เมเต?” 30เร๊อ อา เฮ๊ฉื่อ เน๊อ, “พย๊าฉื่อเกอ แวซิหมิโหมะ โตโล่เออ โซซว๊าโตโด. เน เก่ พย๊าฉื่อ ตื๊อหม่า เน ข่าเฮ๊โลเฮ๊อ เน๊อ เทอกลื่อ เออตื๊อกลื่อ เนอหม่า แว เวเร๊อดื่อ เน๊อ แวเหน่ ฮู๊เนอเฮ๊อ.” 31ฮู๊เนอเร๊อ แกแย ซิเนอ เอ่หม่าเอ่กลอฉื่อลูเฉ่ โทเร๊อ เหย่ซี เอ๊แลแค เทอกลื่อ อามุย เน๊อ เบเออร์เชบา. (เบ่หร่า อาโหง่แลช๊าหม่า เทอ กลื่อ, แส่บ๊า อาโหง่แลช๊า หม่า เตเอ่หม่าเอ่กลอ ลู โหง่ เน๊อ โซซว๊าเต่อ.) 32เหย่ซี เอหม่าเอ่กลอ ลูเฉ่ เบ๊อะ เบ่หร่าแส่บ๊า เนอโต๊โผะ เร๊อ คุ๊ยอาบีเมเลค เน๊อ อาเกลอกู่กล๊อดุ ฟีโคล์ ซิเนอ กาแก คยาแซ๊ เด๊อ เหย่ซี โอ่เร๊อ เบ๊อ ฟีลิสเตียเก่. 33เพอับราฮัมช๊อม๊าแก ส่อเหมาะ ต๊อเหมาะ ▼▼ส่อเหมาะ เออ หม่า อาแซ่เน๊อ ตูงูเหมาะ เร๊อ อู จุ๊ยโอ อาเหล่ เร๊อ อาชือเปล.
เบ๊อะ เบ่หร่าแส่บ๊า เหล่โอ่เนอ, โทเร๊อ อา จ๊อเบแถ่ จอแปแหร่ดุ เด๊อ อาเซอเพร ตูจูเพร เออ เนอ เตเพร. h 34เร๊อ อา โอ่ งยากู๋ เกอ ลา เบ๊อะฟีลิสเตียเก่กู เนอ.
Copyright information for
EkySCThai