Genesis 22
เตเจแม๊ เพอับราฮัม อาเตหยื่อเตแหน่
1เพอับราฮัม โอ่ หน่างยาเลงยา เฮ๊อ เบ๊อะ ฟีลิสเตียเก่กู โทเร๊อ จอแปแหร่ดุ เจแม๊ ลู เตหยื่อเตแหน่ เร๊อ, “อับราฮัม,” อา เอ๊ ลู เร๊อ, “แว โอ่ แพ๊ แบ่เจ่ดุ,” อา เต๊ฉื่อ ลู ฮู๊เนอ. a 2เร๊อ จอแปแหร่ดุ เฮ๊ ลู เน๊อ, “เอ๊หนิ เนพู๊เพรคู คูอิสอัค เด๊อ เน พู๊โอ่ ตื๊อ แพ๊ ลู เร๊อ เน โมเกอเร๊อ แหน่เจ๊อ ลู เออเตเพรเนอ เร๊อ จว๊า เด๊อ เก่ เต๊เก่ เด๊อ อู เอ๊ เน๊อ โมริยาห์ เนอ. เร๊อ จว๊า เด๊อ โฉ่ เด๊อ แว เก่ ยูโล เน ปา เนอเตเม อาลู, เร๊อ เมเซอ เนพู๊ เร๊อ ชื๊ออือ หลู่แตแถ่ ลูเบ๊อะ เนอปา นี๊.” b 3อาโหน่เตอเนอ เหมาะลีโรมื่อ เบ๊อะเนอ, เพอับราฮัม ก๊อถ่อ โพเพ๊ หนิ ขรุ เหล่ชื๊ออือ หลู่แตแถ่ อาเง. เร๊อ ตี๊หรี่แตแร แถ่ ลอ ตาเต เด๊อ อาแมอ๊อแหล่ลู. อา เอ๊หนิ อาหลู่เล๊ ซิเนอ เน๊อ อาพู๊ คูอิสอัค, เร๊อ อา เถ่จว๊า เด๊อ จอแปแหร่ดุ นอจว๊า ลู เหล่โอ่ เนอ โต๊โผะ. 4โซเนอ เตอเนอ เฮ๊อเนอ, เพอับราฮัม แม๊จว๊าจู เร๊อ อา แม๊เถอะจว๊าโล เหร่อ โฉ่ เนอเตเม. 5เร๊อ อา เฮ๊ อาหลู่เล๊ ฮู๊ซี เต๊เห่ เน๊อ, “ซี ซิเนอ เร๊อ โอ่แกโก๊ เกอเหร่อ เน๊อ แมอ๊อแหล่ เบ๊อะเออ นี๊. แว เน๊อ แวพู๊ เร๊อ เป่ จว๊า แถ่ เหร่อ เด๊อ โฉ่ขู่. เป จว๊า จ๊อบู่จ๊อเบแถ่ โทปา เร๊อ เปกาคยา เกอคยาแซ๊ ดื่อ ซี ปา.” 6เพอับราฮัม พย๊าขรุ เหล่ชื๊ออือ หลู่แตแถ่ เออ เร๊อ อา นอ แย๊จว๊า เน๊อ อาพู๊เพรคู คูอิสอัค. อา เร๊อ อา ปื่อจว๊าหนิ หมิโก๊ เน๊อ เน๊. เร๊อ เหย่ซี ซิเนอ จว๊าโหร่ ลู. 7เร๊อ คูอิสอัค เฮ๊ อาเพ เน๊อ, “เก๋อ เพ,” เร๊อ อาเพ เต๊ฉื่อ ลู เน๊อ, “เมเต, พู๊คู?” เร๊อ คูอิสอัค แด๊เฮอ ลู เน๊อ, “เพ๋ หมิโก๊ เน๊อ ขรุซี เร๊อ อา โอ่ เฮ๊อเฮ๊อ, หม่าแน๊เรอ ซิหมิพู๊ เด๊อ เหล่ชื๊ออือ หลู่แตแถ่ อาเง เร๊ออา โอ่ โต เบ๊อะเต?” 8อาเพ เฮ๊ฉื่อ ลู เน๊อ, “พู๊คู, จอแปแหร่ดุ อาเหน่เร๊อดื่อ เก่ เด๊อะดื่อ ซิหมิพู๊ เด๊อ เป โหล่อา เน๊อ เหล่ชื๊ออือ หลู่แตแถ่ อาเงเออ เนอ ปา.” เร๊อ เหย่ซี ซิเนอ จว๊า เป่แฮ โหร่ ลู. 9เบ๊อะ เหย่ซี จว๊าโต่ เฮ๊อ เด๊อ จอแปแหร่ดุ เฮ๊ ลู เหล่โอ่ เนอโต๊โผะ เบ๊อะเนอ, เพอับราฮัม ต่าแถ่ เตหลู่แตเหร่ เบ๊อะเนอ, โทเร๊อ อา แด่แถ่ ขรุ เด๊อ เตหลู่แตเหร่ลู. โทเร๊อ อา จอกลอหม่า เกอเร๊อ อาพู๊ คูอิสอัค เร๊อ อา แด่แถ่ ลู เด๊อ เตหลู่แตเหร่ขุ เด๊อ ขรุขุ เนอ. c 10เร๊อ เพอับราฮัม พย๊าแถ่ เน๊ เร๊อ อา เกเร ชือเซอ เน๊อ อาพู๊เพรคู. 11หม่าแน๊เรอ จอแปแหร่ ตูจูเพร อาเตเน่วพู๊ โอ่ เด๊อ ม๊อขุ เร๊อ อา เอ๊โทตา ลู เน๊อ, “เก๋อ อับราฮัม, อับราฮัม.” เร๊อ อา เต๊ฉื่อ ลู เน๊อ, “เมเต, แบ่เจ่ดุ, แว โอ่ แพ๊.” 12จอแปแหร่ ตูจูเพร อาเตเน่วพู๊ เฮ๊ ลู เน๊อ, “เมเบ่เช แต่ เป๊เจ่ เออเตเพร แต่ เหม่! เม แต่ อา เตอเจ๋อ แตเหม่! เนพู๊เพรคู โอ่ตื๋อ เตเพร ตื๊อดื่อเร๊อ เน ซิโล เกอเร๊อ ลู โต่ อาขว่าอาคยา, กู๊แหน่เออ แว ซิเง เฮ๊อ เน๊อ เน ซิอิเช แด่ดุหยื่อแหม่ เฮ๊อ จอแปแหร่ดุ เฮ๊อ.” 13เพอับราฮัม แม๊โทแม๊แล เร๊อ อา แม๊เถอะ ซิหมิเพ โตโด บ๊อวี โอ่หม่า อานอ เน๊อ แจ๊โจ่. เร๊อ อา จว๊าจุ่ยแฮ ซิหมิเพ เนอโตโด เร๊อ อา เมเซอ ซื๊ออือ หลู่แตแถ่แก ลู เร๊อ อาพู๊เพรคู เหล่โกล. 14เร๊อ อา โป๊แก เหล่โอ่เนอโต๊โผะ อามุย เน๊อ, เยโฮวาห์ยิเรห์. อู เตเฮ๊เบ่ โอ่แก เน๊อ, “เด๊อ จอแปแหร่ ตูจูเพร อาโฉ่ขุเออ อา เก่ เด๊อะ เป่เตโหล่.” (เยโฮวาห์ยิเรห์ อาโหง่แลช๊าหม่า จอแปแหร่ ตูจูเพร เด๊อะ เป่เตโหล่.) 15จอแปแหร่ ตูจูเพร อาเตเน่วพู๊ โอ่ เด๊อ ม๊อขุ เร๊อ เอ๊ คยาแซ๊ เพอับราฮัม เนอโพ๊โต๊โพ๊. 16เร๊อ อา เฮ๊ ลู เน๊อ, “จอแปแหร่ ตูจูเพร เฮ๊ฮู๊เออ เน๊อ, ‘เนพู๊เพรคู โอ่ ตื๋อ เตเพร แพ๊ ตื๊อดื่อเร๊อ เน ซิโล เกอเร๊อ โต่. เน หลู่แตแถ่ อา อาขว่าอาคยา, แวเหน่ เร๊อดื่อ อ๊อแล เน๊อ แว เก่ เด๊อะบุ๊ยเด๊อะเตอเรอ เน. d 17แว เด๊อะบุ๊ยเด๊อะเตอเรอ หม่าแหน่ เจ๊อ เน ปา. แว นอ โอ่โหร่โอ่เอ๊แถ่ เนกลุยเนลุ๊ย เต๊เห่ แซ่เจ๊อเน๊อ เฉ่ เด๊อ ม๊อเล, แซ่เจ๊อเน๊อ หล่อตาม๊า เด๊อ เทอดุซาวาทือ เด๊อ อู แด๊ ลอเป่ ปาเจ๊อโต่ เออเนอ ปา. เร๊อ เนกลุยเนลุ๊ย เนอ อา เมปย๊าแก เหย่ซี เต๊เห่ ปา, เร๊อ อา เป๊อะหนิลอ เหย่ซีวี เต๊เห่ ปา. e 18เน หนิดา แวโหง่ อาขว่าอาคยา, ล๋อ เมวเจ่อ เด๊อ เห่ขุ เออเต๊เห่ อา เก่ พย๊าหนิ แฮเง เตเด๊อะบุ๊ยเด๊อะเตอเรอ เด๊อ เนกลุยเนลุ๊ย อาขว่าอาคยา ปา.’” f 19ฮู๊เนอโทเร๊อ เพอับราฮัม เน๊อ อาพู๊เพรคู กาคยา คยาแซ๊ เด๊อ อาหลู่เล๊ เต๊เห่ อาโอ่, เร๊อ เหย่ซี กา โหร่ลู เด๊อ เหย่ซี เหล่โอ่ เกอเร๊อ เบเออร์เชบา เหล่โอ่ เนอโต๊โผะ.เพนาโฮร์ อากลุยอาลุ๊ย เต๊เห่
20เด๊อคยาเร๊อ เพอับราฮัม หนิโฮ เน๊อ อาแหม่เพรคู เพนาโฮร์ อาเม โหมะมิลคาห์ พู๊โอ่แล หนิ อาพู๊เพรคู เต๊เห่. 21อาพู๊เพรคูเต๊เห่ หม่า หม่าเฮ๊อ พู๊แหว่เพร่ว คูอูส, อาโป่ คูบูส, คูอารัม อาเพ เพเคมูเอล, 22คูเคเสด, คูฮาโซ, คูปิลดาช, คูยิดลาฟ เน๊อ คูเบธูเอล เฮ๊อ. 23เพเบธูเอล หม่า เหมาะเรเบคาห์ อาเพ. โหมะมิลคาห์ เน๊อ เพอับราฮัม อาแหม่เพรคู เพนาโฮร์ พู๊โอ่ แลแค พู๊เพรคู อาเพรลุยซว๊า. 24เพนาโฮร์ อาเมโหน่โป่ ▼▼อาเมโหน่ หม่า เม เด๊อ พย๊าโหน่ เด๊อ คยา เร๊อ อาหม่าอากลอแจ่ โต่,
โหมะเรอูมาห์ อาพู๊โอ่แล หนิเป่โป่ ลู คูเต๊บ๊า, คูกาฮัม, คูทาหาช คูมาอาคาห์.
Copyright information for
EkySCThai