Genesis 23:3-16
3โทเร๊อ เพอับราฮัม โอ่ เบ๊อะ อาเม โลโตโล ช๊าเนอ เร๊อ อา ก๊อถ่อจว๊า เด๊อ ฮิตไทต์ เมวเจ่อพู๊ เต๊เห่ อาโอ่ เร๊อ อา จว๊าเฮ๊ เหย่ซี เน๊อ, 4“แว หม่า เทอโหร่เก่กลอพู๊ เตเพร เด๊อ อา แฮโอ่เกอ เน๊อ ซี, เร๊อ อิเช เป่เกอ แว ซีโลขุ ตื๋อ หม่า แวโล๊โน หนิ เน๊อ แวเม แพ๊.” a 5เร๊อ ฮิตไทต์พู๊ เต๊เห่ เฮ๊กาคยาฉื่อ เพอับราฮัม เน๊อ, 6“เก๋อ เพดุ, แด่ทูซิปล่อเร๊อ หนิดา โก๊เหร่อ เป เฮ๊ เออ, เด๊อ เปเกลเนอ เพดุ หม่า เตอเรอฉว่าชอ เล๊อ เน๊อ เป. เพดุ ซิหยื่อ โล๊โน โหมะดุ เด๊อ เป่โลขุเออ เด๊อ อาแร๊เล๊อ เบ๊อะเต โต๊โผะ เต๋ เบ่เบ่, จู๋ ดื่อ เพดุ อาซิปล่อ แพ๊. เพดุ เก่โล๊โน โหมะดุ โล เบ๊อะ เปโลขู เออ เจ๊อ หม่า, เตเพร่ว อู เมตาตือ เน๊อ เพดุ โต่.” 7เพอับราฮัม ก๊อถ่อจว๊า เร๊อ อา จว๊าง่อแล เด๊อ ฮิตไทต์ เมวเจ่อ เด๊อ อา โอ่ เบ๊อะ เก่ เนอเต๊เก่กู เนอเต๊เห่ อา เป๊เส่เง. 8เร๊อ อา เฮ๊ เหย่ซี เน๊อ, “ซี เก่ ซิปล่อ โอ่ หม่าแหน่ แหน่เน๊อ ซี ซิหยื่อ นอ โล๊โน แวเม เบ๊อะเออ เฮ๊ เร๊อ แว เฮ๊ ซี, หนิดา โก๊เหร่อ เร๊อ จว๊าแด๊เฮอ เป่ แว เพยอห์น อาพู๊ คูเอโฟรน เออเนอ นี๊. 9นอ อิเช เป่เกอ แว หล่อกู เด๊อ มัคเป-ลาห์ เหล่โอ่ เด๊อ คูเอโฟรน อาเพร๊ทือ เนอโต๊โผะ. แซ่ฮู๊ อา เก่ ทวา แวโลขู่ เร๊อดื่อ อาเงเนอ, อา เฮ๊ เจ๊อ อางูอาพรี บ๊า เตเต๋ เจ๊อ เบ่เบ่, แว เก่ เด๊อะ ดื่อ อางู เด๊อ ซี ทวา เพรแม๊ เออเต๊เห่ อาเป๊เส่เง เจ๊อปา.” 10เบ๊อะ เพอับราฮัม กุยพรี ลู เพร๊ เบ๊อะเนอ, ฮิตไทต์พู๊ คูเอโฟรน เออ โอ่แน โอ่ เด๊อ อาโค ซีเต๊เห่ อาเกล. แซ่ฮู๊ ล๋อ อาโคเมวเจ่อพู๊ เด๊อ อา แฮโอ่กู๊ เด๊อ วีกู่ดาดุทือ เนอเต๊เห่ เก่ หนิโฮ อาเงเนอ, อา เฮ๊ฉื่อ เป่ เพอับราฮัม เด๊อ เหย่ซีเป๊เส่เง. 11เร๊อ อา เฮ๊ เน๊อ, “เก๋อ เพดุ, ฮู๊เนอ หม่า โต่, แด่ทูซิปล่อเร๊อ หนิดา โก๊เหร่อ แว เฮ๊ เออ, เพร๊ เบ่เบ่, หล่อกู เบ่เบ่, แว เด๊อะครา ลอดื่อ เฮ๊อ เน๊อ เน เด๊อ แวเมว เจ่อ เต๊เห่ อาเป๊เส่เง เร๊อ โล๊โน มอ เน๊อ โหมะดุ เนอนี๋.” 12เพอับราฮัม งอแล คยาแซ๊ เด๊อ ฮิตไทต์พู๊ เต๊เห่ อาเป๊เส่เง. 13เร๊อ อา เฮ๊ คูเอโฟรน เด๊อ อู ปว๋า เพร อาเป๊เส่เง เน๊อ, “แด่ทูซิปล่อเร๊อ, หนิดาเหร่อ แว เฮ๊ เน เออ. แว เด๊อะดื่อ เนเพร๊ อางูอาพรี. แซ่ฮู๊ แวโล๊โน หนิ เน๊อ แวเม อาเงเนอ, พย๊าฉื่อ เกอเร๊อ แว อางูอาพรี เออ นี๋.” 14คูเอโฟรน เฮ๊ฉื่อ เพอับราฮัม เน๊อ, 15“เพดุ, เตเนแม๊มอ, เพร๊ เออหม่า อา งูโอ่ รือหย่า ลุยจ่วย หม่าแน๊เรอ แว เน๊อ เนหม่า โหล่เฮ๊ เน๊อ ลู อางูอาพรี โต่, โล๊โน มอ เน๊อ โหมะดุ เนอ.” 16เออโต๊โพ๊ เร๊อ เพอับราฮัม ซิปล่อโต เน๊อ คูเอโฟรน เฮ๊ ลู อางู เออเนอ เฮ๊อ. เร๊อ อา แจ เป่ ลู รือ ลุยจ่วย. รือ ลุยจ่วย เออหม่า หม่าเฮ๊อ คูเอโฟรน เฮ๊โล เป่ เด๊อ ฮิตไทต์พู๊ เต๊เห่ อาเป๊เส่เง เนอ เฮ๊อ. อา แจ รือ ฮู๊ อู อิพรีอิเช ลู เด๊อ เกล๊กู เหย่ซี ทือเคเนอ.
Copyright information for
EkySCThai