Genesis 25

เพอับราฮัม อาเตเซอ เน๊อ อากลุยอาลุ๊ย เต๊เห่

1เพอับราฮัม พย๊าเต๊เปล่โหน่ อาเม เตเพร เร๊อ อามุย เน๊อ โหมะเคทูราห์. 2อา พู๊โอ่ หนิเป่ ลู พู๊เพรคู เต๊เห่ เร๊อ อามุย แลแค เน๊อ คูศิมราน, คูโยกชาน, คูเมดาน, คูมีเดียน, คูอิชบาก, คูชูอาห์. ^a 3เพโยกชาน อาพู๊ หม่า คูเชบา เน๊อ คูเดดาน. คูเดดาน อากลุยอาลุ๊ย เต๊เห่ หม่า อัสชูริมเมวเจ่อ, เลทูชิมเมวเจ่อ, คูเลอุมมิม เมวเจ่อ. 4เพมีเดียน อาพู๊ เต๊เห่หม่า คูเอฟาห์, คูเอเฟอร์, คูฮาโนค, คูอาบีดา, เน๊อ คูเอลดาอาห์ ซี เต๊เห่ เฮ๊อ. เร๊อ ล๋อ เหย่ซี เออเต๊เห่ หม่า หม่าเฮ๊อ โหมะเคทูราห์ อากลุยอาลุ๊ย ล๋อ ปลี เฮ๊อ.

5– 6เบ๊อะ เพอับราฮัม เซอ แต่ล๋ายโต่ เบ๊อะเนอ, อา เด๊อะ เป่เกอ อาเมโหน่โป่ เนอเต๊เห่ อาพู๊ เต๊เห่ เชหยู่, เร๊อ อา นอจว๊า ตาพายาแก เหย่ซี เน๊อ อาพู๊เพรคู คูอิสอัค เด๊อ เก่ ซิเถ่ ตากยา. เร๊อ เบ๊อะ อา เซอ โท เบ๊อะเนอ, อา เด๊อะ ลอ ล๋อ เต เด๊อ อาโอ่ เน๊อ อา เนอเต๊เห่ เน๊อ อาพู๊ คูอิสอัค. ^b

7เพอับราฮัม โอ่เซอเพร อาหน่า เตเย เน๊อ โซซว๊าเตอเชอ เน๊อ แงหน่า. ^c 8อา โอ่เซอเพร โต่ เด๊อ อาโหมะเพร่ หน่าดุเลทู, หน่าบาเลบา เร๊อ อา เซ๊ปลื๊อแก, เร๊อ อู โล๊โน เต่อ เกอดื่อ ลู เน๊อ อาเพออาโพ ซีเต๊เห่. ^d 9อาพู๊ เพรคู คูอิสอัค เน๊อ คูอิชมาเอล โล๊โนแก ลู เด๊อ หล่อกู โอ่ เด๊อ มัคเป-ลาห์ ช๊า, เด๊อ อา โอ่ผื่อ เน๊อ คูมัมเร อาเห่ขุเหล่โอ่ เนอโต๊โผะ. เด๊อ ฮิตไทต์ พู๊ เพโศหาร์ อาพู๊ คูเอโฟรน อาเพร๊ขู่ เนอโต๊โผะ. ^e 10เพร๊เหล่ เด๊อ อู โล๊โนแก เน๊อ เพอับราฮัม เน๊อ อาเม โหมะซาราห์ เนอเต๊เหล่ หม่า หม่าเฮ๊อ เพอับราฮัม พรีแก ฮิตไทต์ เมวเจ่อ เพร๊ เนอเต๊เหล่ เฮ๊อ. ^f 11เบ๊อะ เพอับราฮัม เซอ โทเฮ๊อ เบ๊อะเนอ, จอแปแหร่ดุ เด๊อะบุ๊ยเด๊อะเตอเรอ เร๊อดื่อ อาพู๊ เพรคู คูอิสอัค. กู๊แหน่เร๊อ คูอิสอัค จว๊าโอ่ผื่อ เบ๊อะ เบเออลาไฮรอย เหล่โอ่ อาช๊า เนอโต๊โผะ. ^g

เพอิชมาเอล อากลุยอาลุ๊ย เต๊เห่

12เออหม่า หม่าเฮ๊อ คูอิชมาเอล อากลุยอาลุ๊ย ตากาแล ซีเต๊เห่ อาหรี่อาแก เฮ๊อ. อา หม่า เพอับราฮัม อาพู๊เพรคู เด๊อ โหมะซาราห์ อาหลู่โหมะ อียิปต์เมวเจ่อพู๊ โหมะฮาการ์ พู๊โอ่แลหนิ เป่ ลู เนอ เตเพร เฮ๊อ. ^h

13เออหม่า เพอิชมาเอล อาพู๊เพรคู อาพู๊โอ่ ตากาแล แฮเง ลู เต๊เห่ อามุย เตเพร โท เตเพร อาเตราม๊าราแด เฮ๊อ, เร๊อ อาพู๊เพรคู แหว่เพร่ว หม่า อามุย เน๊อ คูเนบาโยธ, อาโป่ เต๊เห่ หม่า คูเคดาร์, คูอัดบีเอล, คูมิบสัม, ⁱ 14คูมิชมา, คูมาห์, เน๊อ คูมัสสา. 15คูฮาดัด, คูเทมา, คูเยทูร์, คูนาฟิช เน๊อ คูเคเดมาห์ ซี เนอเต๊เห่ เฮ๊อ. 16เหย่ซี เนอเต๊เห่ หม่า เพอิชมาเอล อาพู๊เพรคู ซีเต๊เห่ อามุย เฮ๊อ. เหย่ซี ทวาดื่อ คุ๊ยพู๊ เช๊อซิเนอ เต๊เห่ เฮ๊อ, เร๊อ โต๊โหมะ เน๊อ โต๊โหมะ เนอ เหย่ซี เอ๊ เกอเร๊อ ลอดื่อ เหย่ซีดอโส่ เน๊อ กู๊เหล่ เหล่โอ่ เต๊เห่ เน๊อ เหย่ซีมุย เร๊อดื่อ. ^j 17เร๊อ เพอิชมาเอล อาเซ๊ปลื๊อแก เบ๊อะ อาหน่า โอ่ เฮ๊อ เตเย เน๊อ โซเชอ เน๊อ โซซว๊า ต๊าหน่า เบ๊อะเนอ, เร๊อ อู โล๊โน เต่อเกอแก ลู เน๊อ อาเพออาโพ ซีเต๊เห่. 18เพอิชมาเอล อากลุยอาลุ๊ย เต๊เห่ พย๊าโอ่หนิ แลแค อาเหล่โอ่ เบ๊อะ ฮาวิลาห์เก่ โต่เด๊อ ชูร์เก่ เนอโต๊โผะ, เร๊อ อา โอ่ผื่อ เน๊อ อียิปต์เก่, เน๊อ แกล๊ เหล่จว๊า เด๊อ อัสซีเรียเก่ เนอโตโบ. เร๊อ เหย่ซี โอ่ตาพา โค๊แก เน๊อ เพอับราฮัม อากลุยอาลุ๊ย เด๊อ อาโร เนอเต๊เห่.

เพอิสอัค อาพู๊เพรคู เต๊เห่

19เออหม่า เตราม๊าราแดโอ่แก เพอับราฮัม อาพู๊เพรคู เพอิสอัค อากลุยอาลุ๊ย ซีเต๊เห่ อาหรี่อาแก เพอับราฮัม หม่า คูอิสอัค อาเพ. ^k 20เบ๊อะ คูอิสอัค พย๊า เหมาะเรเบคาห์ เบ๊อะเนอ, อาหน่า โอ่เฮ๊อ ลุยเชอ เฮ๊อ. เร๊อ เหมาะเรเบคาห์ หม่า อารัมมีเมวเจ่อพู๊, เพเบธูเอล อาพู๊เพรเหมาะ, เร๊อ เหย่ซี โอ่ แลแค เด๊อ ปัดดานอารัมเก่, เร๊อ อาหม่า อารัมมีเมวเจ่อพู๊ คูลาบัน อาโป่เพรเหมาะ. ^l

21คูอิสอัค อาเมเนอ อา โซพู๊ ดื่อเง อาขว่าอาคยา, อา กุยจ๊อเบแถ่ เป่ อาเม อาเง เด๊อ จอแปแหร่ ตูจูเพร อาโอ่, เร๊อ จอแปแหร่ ตูจูเพร หนิดา ลู เตกุยจ๊อเบ เร๊อ อาเม เหมาะเรเบคาห์ โหมะดอแถ่. ^m 22เร๊อ อา โหมะดอ ดีคยา, เร๊อ เป๊เจ่พู๊ โอ่ เด๊อ เฮ๊อกู เออซิเนอ วื๊อเร๊อ ลู เตเพร เน๊อ เตเพร. เร๊อ เหมาะเรเบคาห์ แด๊เฮอ จอแปแหร่ ตูจูเพร เน๊อ, “เก๋อ แบ่เจ่ดุ, อา จว๊าทวาแถ่ โต่ ฮู๊เออ เมเตเต?”

23เร๊อ จอแปแหร่ ตูจูเพร เฮ๊ฉื่อ ลู เน๊อ,

“เด๊อ เนฮ๊อกูเนอ เมวเจ่อ เก่ โอ่แถ่ เนอเก่ ปา,

เมวเจ่อ เออ เนอเจ่อเนอ, อา เก่ ทวาแถ่ เพรดี๊เจ ตากวาเตเร แคลู ปา,

เต๊อเจ่อ ปา เร๊อ อา เหร่ฉว่า เหร่ชอ เล๊อเน๊อ เด๊อ อาโรเต๊อเจ่อ ปา,

อาดุ เตเพร เก่ ทวา อาโป่หลู่ ปา.” ⁿ

24เร๊อ เบ๊อะ อาค๊าขิ โต่เฮ๊อ เด๊อ เหมาะเรเบคาห์ โต พู๊โอ่ เฮ๊อ เบ๊อะเนอ, อาพู๊เพรคู โอ่ ดีคยาลู. 25อา พู๊โอ่เถ่ เหร่อเล๊อ เนอเตเพร เร๊อ อาพ๊าอาหย่า ลีกาซุ๊ย เจ๊อ, เร๊อ อาฉื่อ โอ่โดลอ เจ๊อ ลูเหน่ ซีเพร แซ่เจ๊อเน๊อ อาแซ๊ จากลอฉื่อ เนอเจ๊อ. ฮู๊เนออาขว่าอาคยา, เหย่ซี โป๊ หนิ ลูมุย เน๊อ คูเอซาว. ^o 26อาแหม่ โอ่เถ่ เร๊อ อาโป่ ครวาปื่อหม่าเถ่ หนิเกอ อาแหม่ คูเอซาว อาแก๊โหน่แก อาขว่าอาคยา, อู เอ๊ ลูมุย เน๊อ คูยาโคบ. เบ๊อะ โหมะเรเบคาห์ พู๊โอ่ หนิ เหย่ซี เออซิเนอ เบ๊อะเนอ, เพอิสอัค หน่าโอ่ เฮ๊อ เชอโซซว๊า เฮ๊อ. (ฮีบรูโหง่ เนอ, คูยาโคบ อาโหง่แลช๊า หม่า แก๊โหน่แก หม่าโต่หม่า ลีแมเอ่ อูขุ.) ^p

27เบ๊อะ เป๊เจ่พู๊ เออ ซิเนอ ดุแถ่เฮ๊อ เบ๊อะเนอ, คูเอซาว เร๊อ อาทวา เพรลื่อเตมีเตแหม่ เด๊อ อา เค๊จ๊อ แจ่แหน่ แหน่เจ๊อ เตเพร, เร๊อ อา ซิครือ เถ่จว๊าเล แพ๊ เด๊อ มีเกล, หม่าแน๊เรอ คูยาโคบ เนอ, อา ชาเผร่เล๊อ เร๊อ อา โอ่ แพ๊ เด๊อ เหล่สื่อกู แพ๊. ^q

28เพอิสอัค ย๊อ เอ่ น๊อเกอ อาพู๊ คูเอซาว อาเตมีเตแหม่ หย่า อาขว่าอาคยา, อา โม เกอเร๊อ ลู, หม่าแน๊เรอ เด๊อ โหมะเรเบคาห์ ติเร๊อ อา โม เกอเร๊อติ คูยาโคบ. ^r 29เตอเนอเค, เบ๊อะ คูยาโคบ โพเอ่ กู๊บีปล่อลี เบ๊อะเนอ, คูเอซาว โอ่ เด๊อ มีเกล กา เร๊อ อา ซิพร๊าแลแด๊ ซิเอ่ซิโอ แหน่เจ๊อ เฮ๊อ. 30เร๊อ อา เฮ๊ คูยาโคบ เน๊อ, “แว ซิเอ่ เซอแก เฮ๊อ ดี เฮ๊อ, เด๊อะเอ่ เป่ แว เน โพเอ่ กู๊บีปล่อลี เนอเตเบ.” ฮู๊เนออาขว่าอาคยา, อู เอ๊ โป่ คูเอซาวมุย เน๊อ คูเอโดม. (เอโดม อาโหง่แลช๊า หม่า อาลี.)

31เร๊อ คูยาโคบ เฮ๊ฉื่อ ลู เน๊อ, “เมฮู๊เนอเร๊อ อิเช เหร่อ แว เนพู๊แหว่เพร่ว เหล่โกล เด๊อ เน เหล่พย๊าหนิ อู่เจเต๊เหย่ เนอ.”

32คูเอซาว เฮ๊ฉื่อ ลู เน๊อ, “เมมอ, แว ซิเอ่ เซอแก เฮ๊อ, แว เซอเฮ๊อ ปา. พู๊แหว่เพร่ว เหล่โกล โต๊โก่เร๊อ หม่า อา หนิบุ๊ยหนิเตอเรอ เด๊อ แวเง อิเต?”

33เร๊อ คูยาโคบ เฮ๊ฉื่อ ลู เน๊อ, “แบแลเหร่อ มอ เนโหง่ กู๊แหน่เออ เน๊อ เนพู๊แหว่เพร่ว อาเหล่โกล ทวาเฮ๊อ แวเต่ เฮ๊อ ฮู๊เนอ.” เออโต๊โพ๊ เรอ คูเอซาว แบแลแก อาโหง่ เร๊อ อา อิเชเอ่แก อาพู๊แหว่เพร่ว เหล่โกล เน๊อ คูยาโคบ. ^s

34โทเร๊อ คูยาโคบ เด๊อะเอ่ ลู ค๊อมู เน๊อ อิซุ๊ย กู๊บีปล่อลี เออ อา เอ่โทโอโท เร๊อ อา ก๊อถ่อ จว๊าแก.

เมฮู๊เนอเร๊อ คูเอซาว เตเนปีตี๊ เกอเร๊อแก อาพู๊แหว่เพร่ว เหล่โกล.