Genesis 26

เพอิสอัค เน๊อ คุ๊ยอาบีเมเลค

1เบ๊อะเนอเค, เบ๋อ เพอิสอัค โอ่ เบ๊อะ เบ่หร่าหล่าเฮ๊โร๊ เหล่โอ่ เบ๊อะเนอ, ฮู๊ เก่วีเก่กอ ทวาแถ่ น๊อ โทเฮ๊อ เด๊อ เพอับราฮัม อาทือเคเนอ อา ทวาแถ่ โป่ โต๊โพ๊. ฮู๊เนออาขว่าอาคยา, เพอิสอัค เถ่จว๊าแก เด๊อ วีเก-ราร์, ฟีลิสเตียเต เมวเจ่อ เต๊เห่ อาคุ๊ย คุ๊ยอาบีเมเลค เออเตเพร อาโอ่. ^a 2จอแปแหร่ ตูจูเพร โอ่โลแถ่ เป่ คูอิสอัค เร๊อ อา เฮ๊ ลู เน๊อ, “จว๊า แต่ เด๊อ อียิปต์เก่ แต่เหม่ นี๊! โอ่ แพ๊ เก่ เบ๊อะ แว นอโอ่ เน เนอเต๊เก่ แพ๊ นี๊. ^b 3โอ่เกอ โก๊เหร่อ เบ๊อะ เก่ เนอเต๊เก่ อากู นี๋. แว เก่ โอ่ เกอเน๊อ เน เร๊อ แว เก่ เด๊อะบุ๊ยเด๊อะเตอเรอ เน ปา, เมเตเฮ๊เร๊อ เตอ๊อแล เด๊อ แว ออแล หนื่ออื่อ โทเฮ๊อ เน๊อ เนเพอับราฮัม เนอ แว เก่ เมเล๊อเมบาแถ่ ดื่อ ปา เร๊อ ล๋อ เห่ขุ เหล่โอ่ เบ๊อะเออ เต๊เห่เนอ, แว เก่ เด๊อะ ลอดื่อ เน๊อ เน เน๊อ เนกลุยเนลุ๊ย เต๊เห่ ปา. ^c 4แว เก่ นอ โอ่เอ๊แถ่ ดื่อ เนกลุยเนแล แซ่เจ๊อเน๊อ เฉ่ โอ่ เด๊อ ม๊อเลเนอ เจ๊อ ปา, เร๊อ ล๊อ เห่ขุ เออเต๊เห่ เนอ แว เก่ เด๊อะ ลอดื่อ เน๊อ เหย่ซี ปา. เด๊อ เนกลุยเนแล เออ อาขว่าอาคยา เร๊อ ล๋อ เมวเจ่อ โอ่ เด๊อ เห่ขุ เออเต๊เห่ เก่ พย๊าหนิ แฮเงเกอ เตเด๊อะบุ๊ยเด๊อะเตอเรอ ปา. ^d 5เพอับราฮัม ย๊อ หนิดาจูเอ่ เกอลอ ล๋อ แวเตเมแกโหง่ เน๊อ แวเตอิซว๊าอี๊แส่ เน๊อ แวเตซว๊าเตแส่ เนอเต๊เห่ อาขว่าอาคยา, แว เก่ เด๊อะบุ๊ยเด๊อะเตอเรอ หม่าแหน่ เน ปา.” ^e 6ฮู๊เนอเร๊อ เพอิสอัค โอ่แพ๊ เบ๊อะ วีเก-ราร์ กู เนอ.

7เบ๊อะ อู แด๊เฮอ ลูเม โหมะเรเบคาห์ อาหรี่อาแก เบ๊อะเนอ, อา เฮ๊ เป่ อู เน๊อ, “อา หม่า แว โป่เพรเหมาะ แพ๊,” อา ซิอิเช เฮ๊ เป่ อู เน๊อ, “อาหม่า แวเม,” ฮู๊เนอ. เมเตเฮ๊เร๊อ โหมะเรเบคาห์ เออ อา ย๊อ โหมะตว่า แหน่เจ๊อ อาขว่าอาคยา, “เด๊อ อา อาขว่าอาคยา เร๊อ ปาหม่า แกแย โอ่ เบ๊อะเนอ เต๊เห่ เก่ เมเซอ แว เห่,” อา เตเน เกอเร๊อ อาเหน่ ฮู๊เนอ. ^f

8เบ๊อะ เพอิสอัค โอ่งยา เฮ๊อ เบ๊อะ เหล่โอ เนอโต๊โผะ เบ๊อะเนอ, คุ๊ยอาบีเมเลค หม่าเฮ๊อ ฟีลิสเตีย อาคุ๊ย เออ อา โอ่ เด๊อ กู่ดาพู๊กู เร๊อ อา แม๊ตา เบ๊อะเนอ, อา แม๊เถอะ เพอิสอัค แพ๊โนมื๊อ เกอเร๊อ อาเม โหมะเรเบคาห์. 9เออโต๊โพ๊ เร๊อ คุ๊ยอาบีเมเลค เอ๊ คูอิสอัค เร๊อ อา เฮ๊ ลู เน๊อ, “อา หม่า เนเม หม่าแหน่ เจ๊อ ว๊า, หม่าเมเตเร๊อ เนจว๊า เฮ๊โต่ แว เน๊อ, ‘อา หม่า แวโป่เพรเหมาะ แพ๊’ เมเต?”

คูอิสอัค เฮ๊ฉื่อ ลู เน๊อ, “อ่อ, เพคุ๋ย, แว เก่ เฮ๊ เน๊อ อาหม่า แวเม เฮ๊ เร๊อ, ปาหม่า อู เมเซอ แว เห่, แว เตเน ซิอิเช เร๊อ ฮู๊เนอ หนิ.”

10เร๊อ คุ๊ยอาบีเมเลค เฮ๊ ลู เน๊อ, “เน จว๊าเมโต่ เป่ ฮู๊เออ เมเต? แวแกแย เพรคู เตเพรเพร เก่ จว๊า โอ่เมอเต่อ ตาแต่ เน๊อ เนเม เฮ๊หม่า, เด๊อ เน แลโฮ เป ฮู๊เออ อาขว่าอาคยา, อา เก่ เมซื๊อ แต่ เร๊อ จอแปแหร่ เก่ เมจากาคยา เป ปา.” ^g

11เออโต๊โพ๊ เร๊อ คุ๊ยอาบีเมเลค เด๊อะรอเด๊อะเร เกอเร๊อลอ แกแย เนอเต๊เห่ ล๋อ ปลี เน๊อ, “แกแย เตเพรเพร เก่ เมเบ่เช เพรคู เออเตเพร หม่าโต่เร๊อ อาเม เฮ๊เนอหม่า, อู เบ่ เมเซอ หม่าแหน่เจ๊อ ลู ปา.”

12จอแปแหร่ ตูจูเพร เด๊อะบุ๊ยเด๊อะเตอเรอ หนิ คูอิสอัค อาขว่าอาคยา, อา อิช๊ออิปลือตา เตเหมาะเตโบ เบ๊อะ เหล่โอ่ เนอโต๊โผะ เร๊อ เบ๊อะเนอ ต๊าหน่า อากู อา พย๊าหนิ เอ๊เล๊อโป่เจ๊อ เน๊อ อากลุย เด๊อ อา อิช๊ออิปลือตา เนอ อาโพ๊เตเย เจ๊อ. 13ฮู๊เนอเร๊อ คูอิสอัค เอ่เบ่โอโท เป่แฮ เน๊อ เป่แฮ, เร๊อ อา ทวาแถ่ เพร่ดุแหย่แถ่เซ แหน่เจ๊อ เตเพร. 14อาซิหมิ เน๊อ เป่, อาปู่เป๊เหน่ เน๊อ อาหลู่เล๊ เต๊เห่ โอ่โหร่โอ่เอ๊ แหน่เจ๊อ เร๊อ ฟีลิสเตีย เมวเจ่อ เต๊เห่ ซิเถ่ลอลู. ^h 15ฮู๊เนอเร๊อ ล๋อ เทอกลื่อ เด๊อ คูอิสอัค อาเพ เพอับราฮัม อาหลู่ เต๊เห่ เวหนิ แลแค เบ๊อะ อาเพอับราฮัม ทือเค เต๊เห่เนอ, ฟีลิสเตีย เมวเจ่อ เต๊เห่ เวตาบี๊แกลอ เทอกลื่อ เนอเต๊เห่ เร๊อ เห่. ⁱ

16โทเร๊อ คุ๊ยอาบีเมเลค เฮ๊ คูอิสอัค เน๊อ, “เถ่จว๊า พา แกมอ เน๊อ เป่, เนเตอเรอฉว่าเตอเรอชอ เล๊อโป่ เจ๊อ เน๊อ เปเฮ๊อ.”

17เร๊อ คูอิสอัค เถ่จว๊าแก เน๊อ เหล่โอ่ เบ๊อะเนอ เร๊อ อา จว๊าโอ่ เด๊อ เก-ราร์ เก่ตอกู โต๊โผะ. 18คูอิสอัค เวโม คยาแซ๊ เทอกลื่อ เด๊อ อาเพ เพอับราฮัม ทือเค อา เว หนิแก เนอเต๊เห่. เร๊อ เทอกลื่อ เออเต๊เห่เนอ หม่า หม่าเฮ๊อ เบ๊อะ เพอับราฮัม เซอ โทเฮ๊อ เบ๊อะเนอ, ฟีลิสเตีย เมวเจ่อ เต๊เห่ เวตาบี๊แก ลอ อา เนอเต๊เห่ เฮ๊อ. เร๊อ คูอิสอัค เอ๊ คยาแซ๊ เทอกลื่อ เนอเต๊เห่ อามุย แซ่เน๊อ อาเพ เอ๊หนื่ออื่อ โทเฮ๊อ เนอ.

19เพอิสอัค อาหลู่ เต๊เห่ เวตา เทอกลื่อ เบ๊อะ เก่ตอกู เนอโต๊โผะ เร๊อ อา เวตา ซิเต่อ เน๊อ เทอเถ่ขุ ตูกู. 20เก-ราร์เก่พู๊ เพรเก ซิหมิ, ปู่ เต๊เห่ แฮกย๊างา เน๊อ เพอิสอัค อาหลู่เล๊ เต๊เห่ เน๊อ, “เทอ เออ หม่า เปเต.” ฮู๊เนอเร๊อ เพอิสอัค โป๊แก เทอกลื่อมุย เน๊อ เอเสก. (เอเสก อาโหง่แลช๊า หม่า เตเพร เน๊อ เตเพร กย๊างา คยาลู.) 21เพอิสอัค อาหลู่เล๊ เต๊เห่ เว โค๊ คยาแซ๊ เทอกลื่อ เด๊อ อาโร ตื๊อกลื่อ ตื๊อดื่อเร๊อ อา แฮกย๊าแฮงา แฮวื๊อ ปาปา เหย่ซีซี, ฮู๊เนอเร๊อ เพอิสอัค โป๊หนิ เทอกลื่อ เออ อามุย เน๊อ ซินาห์. (ซินาห์ อาโหง่แลช๊าหม่า วื๊อเร๊อ ลู.) 22โทเร๊อ อา จว๊า ตาพาแก เด๊อ เหล่โอ่ อาโร โต๊โผะ เร๊อ อา จว๊าเว โค๊ โป่ เทอกลื่อ ตื๊อกลื่อ เร๊อ อู แฮกย๊าแฮงา ปา เหย่ซี เตเพร่ว โต่, ฮู๊เนอเร๊อ เพอิสอัค โป่แก เทอกลื่อเออ อามุย เน๊อ เรโหโบท. เร๊อ อา เฮ๊ เน๊อ, “กู๊แหน่เออ, จอแปแหร่ ตูจูเพร เด๊อะ เฮ๊อ เป่ กู๊เหล่ เหล่โอ่ โต๊โผะ เฮ๊อ เร๊อ เป่ เก่ เอ่เบ่โอโท เบ๊อะเออ โต๊โผะ ปา.” (เรโหโบท อาโหง่แลช๊า หม่า เด๊อะ เฮ๊อ เป เหล่โอ่แหล่ดุ โต๊โผะเฮ๊อ.)

23เพอิสอัค เถ่จว๊าแก เน๊อ เหล่โอ่ เบ๊อะเนอ เร๊อ อา จว๊า โอ่โก๊ติ เด๊อ วีเบเออร์เชบา. 24เบ๊อะเนอ เตเซ เร๊อ จอแปแหร่ ตูจูเพร โอ่โลแถ่ เป เพอิสอัค เร๊อ อา เฮ๊ ลู เน๊อ, “แว หม่า เนเพ อับราฮัม อาจอแปแหร่ดุ, แวโอ่เต่อเกอ เน๊อ เน อาขว่าอาคยา, ซิอิเช แต่เหม่ นี๊. แว เก่ เด๊อะบุ๊ยเด๊อะเตอเรอ เน ปา, เร๊อ แว เก่ นอ โอ่โหร่โอ่เอ๊ แถ่หนิ เนกลุยเนลุ๊ย เต๊เห่ ฮู๊ แว อ๊อแลหนื่ออื่อ โทเฮ๊อ เน๊อ แวหลู่ อับราฮัม เนอ ปา.”

25โทเร๊อ เพอิสอัค ต่าแถ่ เตหลู่แตเหร่ เต๊เหร่ เน๊อหล่อ เบ๊อะเนอ โต๊โผะ เร๊อ จ๊อบู่จ๊อเบแถ่ จอแปแหร่ ตูจูเพร. เร๊อ อา ช๊อแถ่ หนิ อาเหล่สื่อหล่อป่า เบ๊อะเนอ เร๊อ อาหลู่ เต๊เห่ เว แลแค เทอกลื่อ เบ๊อะเนอ ตื๊อกลื่อ.

26เบ๊อะเนออาเค, คุ๊ยอาบีเมเลค เน๊อ อาโค เพรเด๊อะซิเงจว่า ลู คูอาหุสซัท เน๊อ อาเกลอ กู่กล๊อดุ คูฟีโคล์ โอ่ เด๊อ วีเก-ราร์ เร๊อ อา แฮโต เด๊อ เพอิสอัค โอ่. ^j 27เร๊อ เพอิสอัค แด๊เฮอ เหย่ซี เน๊อ, “ซี จว๊า แฮโต่ เด๊อ แวโอ่ หม่า เมเต? ซี ซิเถ่ แว เร๊อ ซี นอเถ่จว๊า ตาพายาแก โทเฮ๊อ แวเน๊อ ซีเก่ เฮ๊อ แวแต?”

28เร๊อ เหย่ซี เฮ๊ฉื่อ ลู เน๊อ, “กู๊แหน่เออ เป แม๊เถอะซิเง หม่าแหน่ เฮ๊อ เน๊อ จอแปแหร่ ตูจูเพร โอ่ เกอเน๊อ เน อาขว่าอาคยา, เป แด่แล เฮ๊อ เปซิปล่อ เน๊อ เด๊อ เป เน๊อ เน อาเปล่กูเออ เป โตแด่ โอ่ เน๊อ เตเอ่หม่าเอ่กลอลูโหง่, ฮู๊เนอเร๊อ เป เอ่หม่าเอ่กลอ ลูโหง่ โป๋. 29ฮู๊ เป เมเบ่เมเช น๊อ เน โต่ เนอ, อ๊อแลมอ เน๊อ เน เก่ เมเบ่เมเช เป โต่, เมเตเฮ๊เร๊อ เบ๊อะ เน เถ่จว๊า แต่ล๋ายโต่เนอ, เปแม๊เปตู่ แร๋ แหน่เจ๊อ เน เร๊อ เป นอเถ่จว๊า โมโมแร๊แร๊ เน แพ๊. กู๊แหน่เร๊อ จอแปแหร่ ตูจูเพร เด๊อะบุ๊ยเด๊อะเตอเรอ หนิเฮ๊อ เน เฮ๊อ.” 30เร๊อ เพอิสอัค เม เป่ เหย่ซี เตเอ่ปล๊อโอจือลู เร๊อ เหย่ซี เอ่เต่อโอเต่อ โหร่ ลู. 31เบ๊อะ อาโหน่ โตโร เหมาะลี โรมื๋อ เบ๊อะเนอ, เหย่ซี เอ่หม่าเอ่กลอ โหร่ แลแค ลู เฉ่ เตเพร เน๊อ เตเพร. เร๊อ เพอิสอัค เฮ๊โมเฮ๊แร๊ เหย่ซี เร๊อ ปลวากาแก เหย่ซี, เร๊อ เหย่ซี กา โมโมแร๊แร๊ แลแค แพ๊. 32เบ๊อะเนอ เตอเนอ เฮ๊อ, เพอิสอัค อาหลู่ เต๊เห่ กาเฮ๊โฉ่ ลู เน๊อ เหย่ซี เว เทอกลื่อ อาหรี่อาแก. เร๊อ อา กา เฮ๊ ลู เน๊อ, “เป แม๊เถอะเฮ๊อ เทอเถ่ขู่ เฮ๊อ!” 33เร๊อ อา เอ๊ เทอกลื่อ เนอตื๊อกลื่อ อามุย เน๊อ เบเออร์เชบา, เมฮู๊เนอเร๊อ โต่กู๊แหน่ วี เนอตีวีเนอ อู เอ๊ ลูมุย เน๊อ เบเออร์เชบา. (เชบา อาโหง่แลช๊า หม่า เตเอ่หม่าเอ่กลอ ลู โหง่ เน๊อ โซซว๊าเต่อ.)

คูเอซาว พย๊า อาเม เน๊อ ฮิตไทต์ เมวเจ่อโหมะ เต๊เห่

34เบ๊อะ คูเอซาว อาหน่า โอ่ เฮ๊อ ลุยเชอ เบ๊อะเนอ, อา พย๊า อาเม เน๊อ ฮิตไทต์ เมวเจ่อโหมะ เพเบเออรี อาพู๊เพรเหมาะ เหมาะยูดิธ เน๊อ ฮิตไทต์ เมวเจ่อเพ เพเอโลน อาพู๊เพรเหมาะ เหมาะบาเสมัท. 35เหย่ซี เมกู่เมแก เมโซพ๊าโซแร แหน่เจ๊อ เพอิสอัค เน๊อ โหมะเรเบคาห์ อาซิปล่อ เจ๊อ.