Genesis 27:27-40
27เร๊อ อา แฮผื่อ เด๊อ อาเพโอ่ เร๊อ อา แฮโนมื๊อ ลู. เร๊อ เบ๊อะ เพอิสอัค โนหวิแม๊ ลูเห่อจา เบ๊อะเนอ, อา เด๊อะบุ๊ยเด๊อะเตอเรอ ลู เร๊อ อา เฮ๊ เน๊อ, “เอ๋อ, แวพู๊เพรคู อาเตโนมื๊อเออ, อา โนมื๊อ แซ่เจ๊อเน๊อ เพร๊ขุ เด๊อจอแปแหร่ ตูจูเพรเด๊อะบุ๊ยเด๊อะเตอเรอ อา เนอเต๊เหล่ อาเตโนมื๊อ เจ๊อ. a 28จอแปแหร่ดุ เก่ กลอแลแล๊แล เป่เจ๊อดื่อ เน ม๊อขุ เทอตีชิ ปา, นอ หย่าหรีหย่าแร๊ เป่ดื่อเจ๊อ เน เห่ขุ ปา, เร๊อ เนโบ๊กู่ลา เน๊อ แท๊ทือเทอแย เต๊เห่ เก่ หนิ ตาปอตาเป เจ๊อ ดื่อ ปา นี๋. 29เมวเจ่อ เต๊เห่ เก่ ทวาดื่อ เนหลู่เล๊ เต๊เห่ ปา, เร๊อ เหย่ซี เก่ แด๊งือแล ลอดื่อ เด๊อ เนเป๊เส่เง ปา นี๋. เน เก่ เป๊อตี๊หรี่ เร๊อดื่อ เนโป่แหว่ เต๊เห่ ปา, เร๊อ ล๋อ เนโหมะ อากลุยอาลุ๊ย เต๊เห่ เก่ แด๊งือ ลอดื่อ เด๊อ เนเป๊เส่เง ปา นี๋. แกแย เด๊อ อา อิชอมู๊แหม่, เน เต๊เห่เนอ, จอแปแหร่ เก่ อิชอมู๊แหม่ ฉื่อ เหย่ซี ปา, เร๊อ แกแย เด๊อ อา เด๊อะบุ๊ยเด๊อะเตอเรอ เน เต๊เห่เนอ, จอแปแหร่ดุ เก่ เด๊อะบุ๊ยเด๊อะเตอเรอ ดื่อ เหย่ซี ปา นี๋.” bคูเอซาว กุยซิยอเกอ อาเพอิสอัค เตบุ๊ยเตเตอเรอ
30เพอิสอัค เด๊อะบุ๊ยเด๊อะเตอเรอ คูยาโคบ โทโท๋ เน๊อ คูยาโคบ เถ่จว๊าแก เด๊อ อาเพเป๊เส่เง, เร๊อ คูเอซาว จว๊าลือเค๊ เตมี เร๊อ อา กาโต่ เฮ๊อ. 31อา เร๊อ อา กาโพเอ่หวี่แร๋ เร๊อเกอ อิซุ๊ย เร๊อ อา แฮเด๊อะเอ่ เน๊อ อาเพ, เร๊อ อา เฮ๊ อาเพ เน๊อ, “เก๋อ เพ, แซ่ฮู๊ เน เก่ เด๊อะบุ๊ยเด๊อะเตอเรอ หนิ แว อาเงเนอ, ก๊อถ่อเอ่มอ แวเตมีหย่า เออเต๊เห่.” 32เร๊อ อาเพอิสอัค แด๊เฮอ ลู เน๊อ, “เน หม่า อูเป?” เร๊อ อา เฮ๊ฉื่อ อาเพ เน๊อ, “แว หม่า เนพู๊แหว่เพร่ว คูเอซาว เฮ๊อ.” 33เร๊อ เพอิสอัค คย๊า แตแนตากยา ซิเซอซิโอ่เจ๊อ เร๊อ อา เฮ๊ เน๊อ, “อา พย๊าแฮ โทเฮ๊อ เตมีหย่า เด๊อ แวโอ่ เออเตเพร หม่า อูเป? เน พย๊าแฮ แต่ล๋าย เนเต โต่เนอ, แว เอ่ โทเฮ๊อ ลูเต เร๊อ แว เด๊อะบุ๊ยเด๊อะเตอเรอแก โทลอ เฮ๊อ ลู เฮ๊อ, เร๊อ อา เก่ พย๊าหนิ หม่าแหน่ เจ๊อ เฮ๊อ เตบุ๊ยเตเตอเรอ ตูจูเพร เฮ๊อ.” 34เบ๊อะ คูเอซาว หนิโฮ อาเพ เฮ๊ ฮู๊เนอ เบ๊อะเนอ, อา โหง๋ เซอโหง่โอ่ เจ๊อ, เร๊อ อา เฮ๊ อาเพ เน๊อ, “เก๋อ เพ, เด๊อะบุ๊ยเด๊อะเตอเรอ มอ แว๋, แด่ทูซิปล่อ เร๊อ เด๊อะบุ๊ยเด๊อะเตอเรอหนิ เกอมอ แว นี๋.” 35หม่าแน๊เรอ อาเพ เฮ๊ฉื่อ ลู เน๊อ, “เนโป่ แฮแลโฮ พย๊าเผ่ แก เฮ๊อ เนเตบุ๊ยเตเตอเรอ เฮ๊อ.” 36เร๊อ คูเอซาว เฮ๊ เน๊อ, “อามุย เน๊อ คูยาโคบ หม่า อาเร๋ หม่าแหน่ เจ๊อ เน๊อ อามุย เจ๊อ, อา ลีแมเอ่ เด๊อ แวขุ เนอโพ๊ เฮ๊อ. อา ลีแม พย๊าเผ่ แกโทเฮ๊อ แว พู๊แหว่เพร่ว อาเหล่โกล เฮ๊อ. กู๊แหน่เร๊อ อา แลโฮ พย๊าเผ่ โป่เฮ๊อ แว เตบุ๊ยเตเตอเรอ เฮ๊อเฮ๊อ!” เร๊อ อา แด๊เฮอ โป่ อาเพ เน๊อ, “เตบุ๊ยเตเตอเรอ เด๊อ เน แด่โอ่โค๊แก เป่ แวเง เนอ อาโอ่ ปา เจ๊อแหน่ เตอเจ๋อ โต่ แอ?” (ยาโคบ อาโหง่แลช๊า หม่า ลีแมเอ่ เด๊อ อูขุ.) c 37เพอิสอัค เฮ๊ฉื่อ ลู เน๊อ, “แว นอ เป๊อตี๊หรี่ หนิเฮ๊อ ลู เน๊อ เน เฮ๊อ, เร๊อ ล๋อ อากลุยอาแล เต๊เห่เนอ แว นอ ทวาแก เฮ๊อ เน๊อ ลูหลู่ เฮ๊อ. แว เด๊อะบุ๊ยเด๊อะเตอเรอ ลอ โป่เฮ๊อ ลู โบ๊กู่ลา เน๊อ แท๊ทือเทอแย เต๊เห่เฮ๊อเฮ๊อ. เก๋อ แวพู๊เพรคู, เด๊อ เนเงเนอ แว เมแจ่ ปา เตอเจ๋อ โต่ เฮ๊อ.” 38คูเอซาว เฮ๊ โป่ อาเพ เน๊อ, “เก๋อ เพ, เตเด๊อะบุ๊ยเด๊อะเตอเรอ เด๊อ แวเง เต๊อเจ่อ ฮู๊แพ๊เนอ อา โอ่ ปาเจ๊อแน โต่ แอ? เก๋อ เพ, เด๊อะบุ๊ยเด๊อะเตอเรอ แว, เด๊อะบุ๊ยเด๊อะเตอเรอ เกอเหร่อ แว นี๋,” อา เฮ๊ เร๊อ อา โหง่ เอ๊โทเอ๊โม เจ๊อ. d 39เร๊อ อาเพ เพอิสอัค เฮ๊ฉื่อ ลู เน๊อ, “เน เบ่ โอ่ แพ๊ เหล่โอ่ เด๊อ เห่หย่ารีหย่าแร๊ โต่, เทอตีชิ เด๊อ ม๊อขุ ตาเกอ โต่ อาเหล่โอ่ เนอโต๊โผะปา. e 40เน เบ่ โอ่เซอเพร เน๊อ เน๊ ปา, เน เบ่ ทวา เนโป่หลู่ ปา. หม่าแน๊เรอ เบ๊อะ เน ซิหยื่อโอ่ ปา เด๊อ ลูเล โต่ เบ๊อะเนอ ปาเนอ, อา เป๊อตี๊หรี่ น๊อปา เน โต่. เร๊อ เน เก่ พย๊าหนิ เตป่าลา ปา.” f
Copyright information for
EkySCThai