Genesis 3
แกแยเห่ขุพู๊ หนิดา โหง่ โต่
1เบ๊อะเนอเค, หรู่ โอ่ โตโบ. เร๊อ เบ๊อะ แบ่เจ่ จอแปแหร่ ตูจูเพร แบ๊ตา เตมีเตดอ เต๊เห่ อาเกลเนอ, เตมี เนอเต๊เห่ อาเกล หรู่ เออเนอ หม่า อา ลีแม เล๋อ แหน่เจ๊อ เน๊อ อู เจ๊อ. เร๊อ อา แฮเฮ๊ เพรเหมาะ เนอเตเพร เน๊อ, “จอแปแหร่ เฮ๊ หม่าแหน่แหน่ เน๊อ ส่อเส่เด๊ออาโอ่เด๊อ เอเดน เตเร๊วีกู เออเนอ, ส่อเส่อิเตเต๋ เบ่เบ่, ซี เบ่ เอ่หนิ โต่, อา เฮ๊ หม่าแหน่ ซี ฮู๊เนอ แอ?” a 2เร๊อ เพรเหมาะ เฮ๊ฉื่อ หรู่ เนอโตโบ เน๊อ, “ล๋อ ส่อเส่ เด๊อ อา โอ่ เด๊อ เตเร๊วีกู เออเต๊เห่เนอ, เอ่หนิ ลอปลี แพ๊. b 3หม่าแน๊เรอ จอแปแหร่ดุ เฮ๊ เน๊อ, ‘ส่อเหมาะ เด๊อ อา โอ่ เด๊อ เตเร๊ กล่าเมกู เนอต๊อส่อ อาเส่ เนอ ซี เบ่ เอ่หนิ โต่, ซี เบ่ เต่อเบ่ หนิ โต่โต่, ซี เก่ เอ่ เฮ๊หม่า, ซี เซอ ปา.’” 4เร๊อ หรู่ เฮ๊ฉื่อ เพรเหมาะ เนอเตเพร เน๊อ, “ซี เซอ แตแค๋ โต่. c 5จอแปแหร่ดุ ซิเง เน๊อ ซี เก่ เอ่ ส่อเส่ เออ เฮ๊เนอหม่า, ซีเป๊เส่ ลีแถ่ ปา, ซี เก่ แซ่เน๊อ จอแปแหร่ดุ ปา, เร๊อ ซี ซิเงแฮ เตแร๊ เน๊อ เตมู๊แหม่ ปา.” d 6เบ๊อะ เพรเหมาะ แม๊เถอะ ส่อเส่เออ เบ๊อะเนอ, อาตว่าอาแบ แหน่เจ๊อ เด๊อ ลูเง, อา โตเฮ๊อ ลูซิปล่อ เด๊อ อาซิหยื่อเอ่, เบ่เฮ๊อ ลูโส่เทอ เด๊อ เก่ เด๊อะ ลู เตลีแม เร๊อ อา ด่าแถ่ ส่อเส่เออ เร๊อ อา เอ่, โท๊โต่ อา เด๊อะเอ่ แฮเง เป่เกอ เน๊อ อาเว เด๊อ อา โอ่ เกอ เน๊อ ลูเออ เร๊อ อาเว เอ่ เกอ ส่อเส่เออ. e 7เออโตโพ๊ เร๊อ เหย่ซี ซิเนอลอ เอ่ โทโท เน๊อ อาเป๊เส่ ลีแถ่, เร๊อ เหย่ซี ซิเงแล เกอเร๊อ แลแค อาเหน่ เน๊อ อา โอ่ กะโกลลอ. เร๊อ เหย่ซี จว๊าด่า เช๊ จิจือ แลแค ก่อดุ๊ยเหล่ ▼▼ก่อดุ๊ยเหมาะ เด๊อ อิสราเอลเก่กู เนอเต๊เห่ หม่า อาเหล่ดุเล๊อ เร๊อ อาเกเซ๊ เน๊อ โต่.
เร๊อ อา เมบี๊ เกอเร๊อ เน๊อ อาเหน่. 8เร๊อ เบ๊อะ เหมาะเฮ๊ เบ๊อะเนอ, เหย่ซี หนิโฮ แบ่เจ่ จอแปแหร่ ตูจูเพร จว๊า พราโล เด๊อ เตเร๊วีกู เร๊อ เหย่ซี จว๊าโอ่ว๊าโอ่ แลแค จอแปแหร่ อาเหล่ เด๊อ เตเร๊กู ส่อเหมาะเกล. 9เร๊อ แบ่เจ่ จอแปแหร่ ตูจูเพร เอ๊โท เพรคู เนอเตเพร เน๊อ, “เน โอ่ โต เบ๊อะเต?” 10เร๊อ เพรคู เฮ๊ฉื่อ ลู เน๊อ, “แว หนิโฮ เน๊อ แบ่เจ่ดุ จว๊า เด๊อ เตเร๊กู, เร๊อ แว ย๊อ โอ่ กะโกล อาขว่าอาคยา, แว ซิอิเช ซิเตเร เร๊อ แว จว๊า โอ่ว๊าโอ่โฮ่ เฮ๊อ แบ่เจ่ดุเหล่ เน๋อ.” g 11เร๊อ จอแปแหร่ ตูจูเพร เฮ๊ ลู เน๊อ, “อูเป เตเพร เฮ๊ เน เน๊อ เน โอ่กะโกล เป? หม่า เน จว๊าเอ่ เจ๊อเฮ๊อ ส่อเส่ เด๊อ แว นอ เอ่ เน โต่ เนอ เฮ๊อกอ?” 12เร๊อ เพรคู เฮ๊ฉื่อ ลู เน๊อ, “เพรเหมาะ เด๊อ แบ่เจ่ดุ เด๊อะ แว เนอเตเพร เด๊อะ แว ส่อ เนอต๊อส่อ อาเส่ เร๊อ แว เอ่ เน๋อ.” 13แบ่เจ่ จอแปแหร่ ตูจูเพร เฮ๊ เพรเหมาะ เนอเตเพร เน๊อ, “เน จว๊าเมโต่ ฮู๊เออ เมเต?” เร๊อ เพรเหมาะ เฮ๊ฉื่อ ลู เน๊อ, “หรู่ อี๊ลอเอ่ แว เร๊อ แว จว๊าเอ่ เกอ.” h 14เร๊อ แบ่เจ่ จอแปแหร่ ตูจูเพร เฮ๊ตา หรู่ เน๊อ, “เน จว๊าอี๊ลอ แลโฮ เอ่ เพรเหมาะ เออเตเพร อาขว่าอาคยา, เตอิชอฮา เบ่ ตื๋อ เน แพ๊. เตมีเตดอ เด๊อ อาแน เนอเต๊เห่ เบ่เบ่, อาแปล เด๊อ มีเกลเนอ เต๊เห่ เบ่เบ่ แว อิชอฮา เต่อโต่. เน เบ่ บ๊าจว๊า เน๊อ เนฮ๊อ เร๊อ เน เบ่ เอ่ เห่หมื่อ ตูจูเพร ปา. i 15แว นอ ทวาแถ่ เนเออ เน๊อ เพรเหมาะ เออเตเพร เก่ ซิเถ่ซิฮา ลู ปา, เนกลุยเนลุ๊ย เน๊อ เพรเหมาะ อากลุยอาลุ๊ย เก่ ช๊า ลู ปา, เร๊อ เพรเหมาะ อากลุยอาลุ๊ย เก่ หยิหมื่อ เนกู่กล๊อ ปา, เร๊อ เน เก่ อ่าติ เพรเหมาะ อากลุยอาลุ๊ย เพรคู เนอเตเพร อากู๊โหน่แก ปา.” j 16โทเร๊อ อา เฮ๊ เพรเหมาะ เนอเตเพร เน๊อ, “เน เก่ โหมะดอแถ่ เน๊อ เตแป่เตเช เตโซพ๊าโซแร แหน่เจ๊อ ปา, เร๊อ เน เก่ พู๊โอ่ ข่าจาข่าจือ ปา. เนซิปล่อ อาเตซิหยื่อ เนอ อา เก่ ทวา เนเว อาเง ปา, เร๊อ อา เก่ เป๊อตี๊หริ เร๊อ เน ปา.” k 17เร๊อ อา เฮ๊ ติ คูอาดาม เน๊อ, “แว เฮ๊แกโหง่ เน๊อ เน เบ่ เอ่ หนิ ส่อ เนอต๊อส่อ อาเส่ โต่ แว เฮ๊แก เน ตื๊อดื่อเรอ เน หนิดา เนเมโหง่ เร๊อ เน จว๊าเอ่ อาขว่าอาคยา, เด๊อ เนขว่าเนคยา เร๊อ แว อิชอฮา แกเฮ๊อ เห่ขุเออ เฮ๊อ. เน เหล่เอ่เหล่โอ อาเง เน เบ่ แอ๊จื๊อเอ่ แอ๊จื๊อแร เต ตูจูเพร ปา. l 18โท๊โต่ ส่อแช๊เหมาะ เน๊อ แจ๊โจ่แจ๊แป ซีเต๊เห่ เก่ แด๊แถ่ เป่ เด๊อ เนเง ปา เร๊อ เน เก่ เอ่แพ๊ ส่อตอส่อดอ แด๊แถ่ เด๊อ เห่ขุ เนอเต๊เห่ ปา. 19เน เหล่เอ่เหล่โอ อาเง เน เบ่ แอ๊จื๊อเอ่ แอ๊จื๊อแร กู่บ๊อกู่ซาตา โต่เด๊อ เน กาทวา คยาแซ๊ เห่หมื่อ ปา. อู แบ๊ เน เน๊อ เห่ อาขว่าอาคยา, เน เบ่ กาทวา คยาแซ๊ เห่หมื่อ ปา.” m 20คูอาดาม อาเมเออ อา เก่ ทวาดื่อ ล๋อ แกแย เด๊อ อา เซอเพร เต๊เห่ อาโหมะ ปา อาขว่าอาคยา, คูอาดาม เอ๊ เกอเร๊อ ลูมุย เน๊อ, เหมาะเอวา. (เอวา อาโหง่แลช๊า หม่า เตเซอเพร.) 21เร๊อ แบ่เจ่ จอแปแหร่ ตูจูเพร เม เป่ คูอาดาม เน๊อ อาเม เหมาะเอวา เห่อจ่า เน๊อ เตมีเตดอ อาพ๊า เร๊อ อาเด๊อะกือ เด๊อะแซ๊ แถ่เร๊อ ลู. 22แบ่เจ่ จอแปแหร่ ตูจูเพร เฮ๊ เน๊อ, “กู๊แหน่เร๊อ แกแยเห่ขุพู๊เออ อา แซ่แก เฮ๊อ เน๊อ เป เตเพรเพร เฮ๊อ, อา ซิเง เฮ๊อ เตแร๊ เน๊อ เตมู๊แหม่ เฮ๊อ. เป จว๊าปลวา บ่าเอ่ เหย่ซี เน๊อ ส่อเส่ เด๊อ อา เด๊อะ อู เตเซอเพร เนอต๊อส่อ อาเส่ หม่า อาหนิ โต่. อา เก่ เอ่ เฮ๊หม่า, อา เซอแจ่ ปา แตแค๋ โต่ เฮ๊อ.” n 23ฮู๊เนอ อาขว่าอาคยา, แบ่เจ่ จอแปแหร่ ตูจูเพร เหว่เถ่จว๊าแก เหย่ซี เด๊อ เอเดนเตเร๊กลอ เร๊อ อา นอเอ่นอแร นออิช๊ออิปลือ เอ่หนิ เหย่ซี เด๊อ เห่ขุ เด๊อ อู แบ๊ เน๊อ เหย่ซีเออ. 24จอแปแหร่ ตูจูเพร เหว่เถ่จว๊าแก โท เหย่ซี เร๊อ อา แด่โอ่ เน๊อ เตมีเตดอ เด๊อ อาด๊า โอ่ เร๊อ อู เอ๊ ลู เน๊อ เครูบ แด่เด๊อ เอเดนเตเร๊วี ซิเถ่ ตากยา เร๊อ อา แด่โอ่เร๊อ เน๊ เต๊เบ่ เด๊อ อาเต๊อเข่อเตเค เร๊อ อา แกโรโซแถ่ แซ่เจ๊อเน๊อ หมิแก เนอเจ๊อ. เร๊อ อา นอ โอ่ป่อแตแน๊ เร๊อ ลู เน๊อ ส่อ เด๊อ อา เด๊อะ อู เตเซอเพร เนอต๊อเหมาะ.
Copyright information for
EkySCThai